មន្ត្រីរដ្ឋាភិបាល និងកងកម្លាំងប្រដាប់អាវុធបានថ្កោលទោសក្រុមសកម្មជនដែលប្រឆាំងនឹងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) និងបានប្តេជ្ញាបង្ក្រាបសកម្មភាពណាមួយដែលផ្តួចផ្តើមដោយ «ក្រុមប្រឆាំងជ្រុលនិយម» ដែលមានមូលដ្ឋាននៅក្រៅប្រទេសដែល«ប៉ុនប៉ងផ្តួលរំលំរដ្ឋាភិបាល»។
ពលរដ្ឋខ្មែររាប់ពាន់នាក់បានធ្វើបាតុកម្មនៅប្រទេសកូរ៉េខាងត្បូងជប៉ុន និងអូស្ត្រាលីកាលពីថ្ងៃអាទិត្យ ដើម្បីទាមទារឲ្យរដ្ឋាភិបាលដកខ្លួនចេញពីគម្រោង CLV-DTA ដោយសារបារម្ភខ្លាចប្រទេសកម្ពុជាបាត់បង់ទឹកដីនៅខេត្តភាគឦសានទៅប្រទេសវៀតណាម។
អ្នកតវ៉ាម្នាក់បានថ្លែង អំឡុងការប្រមូលផ្តុំតវ៉ាមួយនៅប្រទេសកូរ៉េខាងត្បូងថា៖ «បើកម្ពុជាបន្តដាក់គម្រោង CLV ដែលជាផ្លូវទៅរកគ្រោះមហន្តរាយនៃការបាត់បង់បូរណភាពទឹកដី។ ការឈឺចាប់ប្រជាពលរដ្ឋដល់កម្រិតអាចនឹងផ្ទុះដូចនៅបង់ក្លាដែសជាមិនខាន»។
ក្នុងឃ្លីបវីដេអូមួយដែលថតដោយវិទ្យុអាស៊ីសេរី RFA នៅប្រទេសអូស្ត្រាលី លោក ចាន់ ចេន មានប្រសាសន៍ថា៖ «យើងមកនេះ យើងមកដោយស្ម័គ្រចិត្ដ […] បើសិនជាខ្មែរទាំងអស់គ្នា យើងមិនពួតដៃគ្នា ដើម្បីការពារប្រទេសជាតិរបស់យើង ការពារទឹកដីរបស់យើង យើងនឹងមិនមានប្រទេសសម្រាប់រស់នៅតទៅទៀតទេ […] យើងសូមជម្រាបផងដែរថា អ្វីដែលរដ្ឋាភិបាលបច្ចុប្បន្នលោកបានចូលក្នុងគម្រោង CLV នេះ យើងយល់ថា ជាការមិនត្រឹមត្រូវទេ។ យ៉ាងហោចណាស់ ក៏រដ្ឋាភិបាលមុននឹងការចូលទៅជាគម្រោង CLV ក៏ត្រូវសួរដល់ប្រជាពលរដ្ឋខ្មែរ»។
រដ្ឋសភាជាតិ ក្រសួង ស្ថាប័នរដ្ឋ កងយោធពលខេមរភូមិន្ទ និងអគ្គស្នងការនគរបាលជាតិ បានចេញសេចក្តីថ្លែងការណ៍គាំទ្រគម្រោង CLV-DTA និងថ្កោលទោសក្រុមអ្នកប្រឆាំង។
អគ្គស្នងការនគរបាលជាតិបានលើកឡើងថា រយៈពេលថ្មីៗកន្លងទៅនេះ«ក្រុមប្រឆាំងអគតិ និងជ្រុលនិយមមួយក្តាប់តូច» ដែលមានមូលដ្ឋាននៅក្រៅប្រទេស នៅតែបន្តអនុវត្តគ្រប់ឧបាយកល សកម្មភាពរបស់ខ្លួន ដោយបំផុសបំផុលបង្កឱ្យមានចលាចល ញុះញង់ឱ្យប្រជាពលរដ្ឋ និងកម្លាំងប្រដាប់អាវុធធ្វើ«ការបះបោរ» ប្រឆាំងនឹងរាជរដ្ឋាភិបាល។
អគ្គស្នងការនគរបាលជាតិ បានបញ្ជាក់នៅក្នុងសេចក្តីថ្លែងការណ៍កាលពីថ្ងៃអាទិត្យថា «យើងហ៊ានធ្វើពលិកម្មសព្វបែបយ៉ាង ដើម្បីការពាររាជរដ្ឋាភិបាលស្របច្បាប់ និងចាត់វិធានការម៉ឺងម៉ាត់ក្នុងការទប់ស្កាត់ បង្ក្រាបរាល់អំពើក្បត់ជាតិទាំងនោះ ដោយគ្មានការលើកលែង ទោះស្ថិតក្នុងតម្លៃណាក៏ដោយ»។
លោក ឈុំ សុជាតិ អ្នកនាំពាក្យក្រសួងការពារជាតិ បានបញ្ជាក់ប្រាប់ខេមបូចាថា កងយោធពលខេមរភូមិន្ទបានគាំទ្ររដ្ឋាភិបាលទាក់ទងនឹងគម្រោង CLV-DTA ហើយនឹងកម្ចាត់«ក្រុមណាមួយ» ដែលបានតវ៉ាប្រឆាំងនឹងរដ្ឋាភិបាល។
លោក សុជាតិ បានមានប្រសាសន៍ថា៖ «យើងត្រូវតែបង្ក្រាបក្រុមដែលតវ៉ាប្រឆាំងរដ្ឋាភិបាល និងការបង្កើតអង្គការឧទ្ទាម។ យើងសន្យាថា នឹងមិនឲ្យមានសកម្មភាពណាមួយកើតទ្បើង ដែលបង្កអសន្តិសុខ»។
ស្របពេលជាមួយគ្នានេះ អតីតនាយករដ្ឋមន្ត្រី ហ៊ុន សែន ដែលបច្ចុប្បន្នជាប្រធានព្រឹទ្ធសភា បានបង្ហោះសារពិសេសព្រមានក្រុមអ្នកតវ៉ា ដែលជំរុញឱ្យមានការផ្តួលរំលំរដ្ឋាភិបាលកម្ពុជា ដូចអ្វីដែលបានកើតឡើងនៅប្រទេសបង់ក្លាដែស។
លោកបន្តថា៖ «ចំណុចនេះ បងប្អូនត្រូវគិតឱ្យបានហ្មត់ចត់។ ប្រសិនបើបងប្អូនភ្លាត់ភ្លាំងដោយប្រការណាមួយ [ ដើម្បីផ្ដួលរំលំរដ្ឋាភិបាល] បងប្អូនអាចរងគ្រោះថ្នាក់។ រឿងនេះ [ដូចនៅប្រទេសបង់ក្លាដែស] វាមិនអាចទៅរួចទេ»។
លោកបានគូសបញ្ជាក់ថា សាធារណជនយល់ច្រឡំពាក្យ «អភិវឌ្ឍន៍រួម» និង «សហប្រតិបត្តិការ» ។ លោកមានប្រសាសន៍ថា៖ «រដ្ឋាភិបាលគ្មានសិទ្ធិនឹងយកដីខ្មែរទៅដាក់រួមជាមួយនឹងប្រទេសណាទេ។ យើងគ្មានចេតនា ដើម្បីនឹងបង្កើតតំបន់នោះឱ្យទៅជាតំបន់ស្វយ័ត ដោយកាត់មួយភាគរបស់កម្ពុជា មួយភាគរបស់ឡាវ មួយភាគរបស់វៀតណាម ហើយកើតជាតំបន់ស្វយ័តឬប្រទេសមួយក៏អត់ដែរ»។
កាលពីខែកក្កដា លោក ហ៊ុន សែន បានពន្យល់ថា កន្លងមក មានការចុះហត្ថលេខាលើកិច្ចព្រមព្រៀងមួយចំនួន រួមមានអនុស្សរណៈនៃការយោគយល់ (MoU) ដែលផ្ដោតលើការជំរុញតំបន់ត្រីកោណអភិវឌ្ឍន៍ពាណិជ្ជកម្ម ការដោះដូរពាណិជ្ជកម្ម និងការដឹកជញ្ជូនតាមផ្លូវគោកតាមបណ្តោយព្រំដែនវៀតណាម។
លោកមានប្រសាសន៍ថា មានអនុស្សរណៈនៃការយោគយល់មួយស្តីពីសេវាដឹកជញ្ជូនតាមផ្លូវគោកជាមួយឡាវ និងវៀតណាម និងអនុស្សរណៈនៃការយោគយល់គ្នាផ្សេងទៀត ដែលបានចុះហត្ថលេខារវាងស្ថាប័នរដ្ឋនៃប្រទេសនីមួយៗ។
លើសពីនេះទៀត កាលពីខែមីនាឆ្នាំនេះ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធាន CLV-DTA សម្រាប់ព្រះរាជាណាចក្រកម្ពុជា បានចូលរួមក្នុងពិធីចុះហត្ថលេខាលើកំណត់ហេតុនៃកិច្ចប្រជុំគណៈកម្មាធិការសម្របសម្រួលចម្រុះ CLV លើកទី១៣ ដែលត្រូវបានរៀបចំឡើងនៅប្រទេសឡាវ។
កំណត់ហេតុនេះ គឺជាឯកសារមូលដ្ឋាន ក្នុងគោលបំណងបន្តជំរុញការអភិវឌ្ឍសេដ្ឋកិច្ចសង្គម កិច្ចសហប្រតិបត្តិការសេដ្ឋកិច្ច និងរក្សាទំនាក់ទំនងកាន់តែជិតស្និទ្ធរវាងប្រមុខរដ្ឋាភិបាលនៃប្រទេសទាំងបី។
កាលពីខែមុន សកម្មជនកិច្ចព្រមព្រៀងសន្តិភាពទីក្រុងប៉ារីស ៤នាក់ ត្រូវបានចាប់ខ្លួន និងចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម បន្ទាប់ពីបានបង្ហោះវីដេអូមួយដោយចោទថា៖ «កម្ពុជាបាត់បង់ដីទៅប្រទេសវៀតណាម»។
លោក ប៉ែន បូណា អ្នកនាំពាក្យរដ្ឋាភិបាល បានប្រាប់ ខេមបូចា ថា កងកម្លាំងប្រដាប់អាវុធ ជាធម្មតាទោះបីជាយោធា នគរបាល ឬកងរាជអាវុធហត្ថកម្លាំងរបស់ប្រទេសជាតិ។ ពួកគាត់ត្រូវតែការពាររដ្ឋាភិបាលស្របច្បាប់ ដែលត្រូវបានជ្រើសរើសដោយប្រជាពលរដ្ឋតាមរយៈការបោះឆ្នោត។
លោកបន្តថា ដូច្នេះ ពួកគាត់ត្រូវតែការពាររដ្ឋាភិបាលពីអ្នកដែលប៉ុនប៉ងផ្តួលរំលំរដ្ឋាភិបាលតាមមធ្យោបាយ «ខុសច្បាប់ និងមិនប្រជាធិបតេយ្យ»។
កងកម្លាំងប្រដាប់អាវុធនឹងចាត់វិធានការលើក្រុមជ្រុលនិយមណាមួយដែលព្យាយាមអំពាវនាវឱ្យប្រជាពលរដ្ឋក្រោកឡើងផ្តួលរំលំរដ្ឋាភិបាលតាមមធ្យោបាយមិនប្រជាធិបតេយ្យ។
លោក ប៉ែន បូណា បានមានប្រសាសន៍ថា៖ «កងកម្លាំងប្រដាប់អាវុធគាត់មានកាតព្វកិច្ចបញ្ជាក់ថា ពួកគាត់ការពាររដ្ឋាភិបាលស្របច្បាប់ពីក្រុមជ្រុលនិយមណា ដែលចង់ផ្លាស់ប្តូរប្រទេស និងបំផ្លាញសន្តិភាព សេចក្តីសុខសាន្តរបស់ប្រជាពលរដ្ឋ គឺជាការទទួលខុសត្រូវរបស់កងកម្លាំងប្រដាប់អាវុធ»៕
ប្រែសម្រួលពីអត្ថបទភាសាអង់គ្លេស៖ Armed Forces To Root Out Extremist Groups Opposing CLV-DTA Amid Protests Overseas
