ស្រ្តីខ្មែរជិត២០០នាក់ត្រូវបានហាមឃាត់មិនឱ្យធ្វើដំណើរទៅក្រៅប្រទេសនៅក្នុងឆមាសទី១ឆ្នាំ២០២៦ ដោយអាជ្ញាធរបានសង្ស័យថាអ្នកទាំងនោះប្រឈមនឹងហានិភ័យនៃការជួញដូរមនុស្ស។ នេះបើតាមការឱ្យដឹងពីមន្ត្រីរដ្ឋាភិបាលក្នុងសប្ដាហ៍នេះ។
អគ្គនាយកនៃអគ្គនាយកដ្ឋានអន្តោប្រវេសន៍ លោក សុខ វាសនា បានឲ្យដឹងកាលពីថ្ងៃចន្ទ ថាអាជ្ញាធរបានទប់ស្កាត់មនុស្សជិត៤០០នាក់ មកពី២២ប្រទេសមិនឲ្យចាកចេញពីកម្ពុជាក្នុងអំឡុងពេលនោះ ដោយមានអ្នកខ្លះកំពុងជាប់បណ្ដឹង អ្នកខ្លះស្ថិតក្នុងបញ្ជីតាមដានរបស់សមត្ថកិច្ច ឬអ្នកខ្លះត្រូវអាជ្ញាធរសង្ស័យថាកំពុងប្រមូលមនុស្សតាមរយៈរូបភាពបោកប្រាស់។
លោកបានថ្លែងថា៖ «ស្រ្តី [ខ្មែរ] ជិត២០០នាក់ជាប់សង្ស័យថាត្រូវគេបោកប្រាស់ឲ្យធ្វើដំណើរទៅក្រៅប្រទេសដើម្បីរកការងារធ្វើ ឬរៀបការ»។
លោកបន្តថា ស្រ្តីខ្មែរទាំងនោះត្រូវគេជឿថាមានមេខ្យល់ល្បួងឲ្យធ្វើដំណើរទៅកាន់ប្រទេសចិន ជាកន្លែងដែលអាជ្ញាធរកម្ពុជា-ចិន កន្លងមកបានសហការគ្នាបញ្ចូនត្រឡប់មកវិញនូវស្រ្តីដែលគេដឹងថាជាជនរងគ្រោះដោយអំពើជួញដូរ។
សេចក្ដីប្រកាសនេះកើតឡើងបន្ទាប់ពីកម្ពុជាបានទទួលស្រ្តីខ្មែរជិត១០០នាក់ពីប្រទេសចិនវិញកាលពីឆ្នាំទៅ ដែលអ្នកទាំងនោះត្រូវបានអាជ្ញាធរអះអាងថាត្រូវគេជួញដូរ និងមានមួយចំនួននៃអ្នកទាំងនោះបានទទួលយកឱកាសការងារនៅប្រទេសចិន តែចុងក្រោយត្រូវគេបង្ខំឲ្យរៀបការទៅវិញ។
អាជ្ញាធរអន្តោប្រវេសន៍បានឲ្យដឹងទៀតថា ក្នុងឆមាសទី១ ឆ្នាំ២០២៦ នេះអាជ្ញាធរអន្តោប្រវេសន៍ក៏បានបដិសេធមិនឲ្យជនបរទេសជិត ២ ០០០នាក់មកពី៧៦ប្រទេសចូលមកកម្ពុជាដោយអ្នកទាំងនោះបានបំពេញលក្ខខណ្ឌគ្រប់គ្រាន់ក្នុងការសុំចូលមកកម្ពុជា និងមានខ្លះទៀតមានឈ្មោះក្នុងបញ្ជីតាមដានរបស់អាជ្ញាធរផងដែរ។
ខណៈដែលមានស្ត្រីខ្មែរមួយចំនួនបានស្ម័គ្រចិត្តធ្វើដំណើរទៅរៀបការនៅប្រទេសចិន អាជ្ញាធរ និងអង្គការសិទ្ធិមនុស្សបានរកឃើញថាមានស្រ្តី និងក្មេងស្រីត្រូវគេបង្ខំឲ្យរៀបការនៅប្រទេសចិនជាច្រើនទសវត្សវ៍មកហើយដែរ។ ជនរងគ្រោះច្រើនត្រូវបានមេខ្យល់ល្បួងថារកការងារឲ្យធ្វើនៅប្រទេសចិន ឬក៏ការសន្យាថារកគូស្រករល្អនៅទីនោះ មុនពេលដែលដឹងខ្លួនថាត្រូវគេកេងប្រវ័ញ្ច ដែលបញ្ហាទាំងនេះច្រើនកើនពីគ្រួសារមានជីវភាពខ្វះខាតរបស់គ្រួសារខ្មែរមួយចំនួន និងវិសមភាពយេនឌ័រដែលកើតមាននៅប្រទេសចិនជាយូរមកហើយ។
កម្ពុជាបានហាមឃាត់មិនឲ្យមានភ្នាក់ងាររៀបចំអាពាហ៍ពិពាហ៍ឆ្លងដែននេះទេ ប៉ុន្តែអាជ្ញាធរបានលើកឡើងថាសកម្មភាពបែបនេះនៅតែកើតមានឡើងតាមបណ្ដាញក្រៅផ្លូវការ។
តួលេខរបស់រដ្ឋាភិបាលបង្ហាញថា ចំនួនស្រ្តីខ្មែរដែលត្រូវបញ្ចូនត្រឡប់ពីប្រទេសចិនវិញក្រោមរូបភាពជាជនរងគ្រោះដោយអំពើជួញដូរមានការឡើងចុះពីមួយឆ្នាំទៅមួយឆ្នាំ។ កាលពីឆ្នាំ២០១៣ មានស្រ្តីខ្មែរត្រូវបញ្ចូនត្រឡប់មកវិញចំនួន២១នាក់ នៅឆ្នាំ២០១៤ មាន៥៨នាក់ នៅឆ្នាំ២០១៥ មានចំនួន៨៥នាក់ និងមាន១១២ករណីទៀតនៅឆ្នាំ២០១៩។
អ្នកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មិនបានឆ្លើយតបភ្លាមៗទៅនឹងសំណើសុំអត្ថាធិប្បាយលើករណីនេះពីអ្នកសារព័ត៌មាននោះទេ។
លោក អំ សំអាត នាយកគ្រប់គ្រងកិច្ចការទូទៅរបស់អង្គការ លីកាដូ បានស្វាគមន៍ចំពោះចំណាត់ការរបស់រដ្ឋាភិបាល ប៉ុន្តែលោកថាអាជ្ញាធរគួរស៊ើបអង្កេររកមេខ្យល់ដែលល្បួងស្រ្តីទាំងនោះដើម្បីឲ្យធ្លាក់ក្នុងអាពាហ៍ពិពាហ៍បោកប្រាស់ទាំងនោះ។
រដ្ឋាភិបាលក៏បានរងនូវការរិះគន់ចំពោះវិធានការរបស់ខ្លួនទាក់ទងនឹងអំពើជួញដូរមនុស្សនេះលើផ្នែកផ្សេងៗផងដែរ។ ក្រុមអង្គការសិទ្ធិមនុស្សបានដាក់ជាសំនួរថាតើកម្ពុជាបានគាំពារមនុស្សដែលអាជ្ញាធរបានឃាត់ខ្លួនក្នុងយុទ្ធនាការបង្ក្រាបទីតាំងឆបោកអនឡាញនោះកម្រិតណា ដោយបានលើកឡើងថាជនដែលសង្ស័យថាត្រូវគេជួញដូរកម្លាំងពលកម្មតែងតែត្រូវបានឃុំខ្លួន ឬបញ្ជូនទៅប្រទេសកំណើតវិញដោយជាប់ឈ្មោះថាជាជនល្មើស ជាជាងការកំណត់អត្តសញ្ញាណឲ្យបានច្បាស់លាស់ និងបានការការពារ។
មុនពេលដែលកម្ពុជាចាប់ផ្ដើមយុទ្ធនាការរបស់ខ្លួនក្នុងការបង្រ្កាបលើឧស្សាហកម្មឆបោកតាមអនឡាញដែលមានទំហំទឹកប្រាក់រាប់ពាន់លានដុល្លារនេះ អង្គការសហប្រជាជាតិបានប៉ាន់ប្រមាណថាមានមនុស្សប្រហែល១សែននាក់មកពីរាប់សិបប្រទេសត្រូវបានបង្ខំឲ្យធ្វើការនៅក្នុងមជ្ឈមណ្ឌលឆបោកអនឡាញទាំងនោះនៅទូទាំងប្រទេសកម្ពុជា៕
ប្រែសម្រួលពីអត្ថបទភាសាអង់គ្លេស៖ Cambodia Stops Nearly 200 Women Over Suspected Bride Trafficking
