វៀតណាម៖ ប្រតិភូ គ្រូបង្វឹក និងកីឡាករកីឡាការិនីតំណាងមកពីប្រទេសចំនួន១២ ជាពិសេសប្រតិភូកីឡាកម្ពុជា ដែលជាម្ចាស់ក្បាច់គុន បានត្រៀមខ្លួនរួចរាល់អស់ហើយ ដើម្បីប្រកួតប្រជែងក្នុងព្រឹត្តិការណ៍ប្រដាល់គុនខ្មែរជើងឯកអាស៊ី លើកទី១ (1st ASIAN Kun Khmer Championship) ឆ្នាំ២០២៦ ដែលនឹងបើកការប្រកួតផ្លូវការជាប្រវត្តិសាស្រ្តលើកដំបូង នៅទីក្រុង Can Tho ប្រទេសវៀតណាម នាយប់ថ្ងៃទី៣ ខែកញ្ញានេះ នឹងបញ្ចប់នៅរាត្រីថ្ងៃទី៧ ខែកញ្ញា ឆ្នាំ ២០២៦។
តាមរបាយការណ៍ចុងក្រោយរបស់គណៈកម្មការរៀបចំការប្រកួតបានឱ្យដឹងថា ការប្រកួតគុនខ្មែរជើងឯកអាស៊ី លើកទី១ ឆ្នាំ២០២៦នេះ មានកីឡាករ កីឡាការិនីចូលរួមជាង២០០នាក់ ដែលពួកគេត្រូវប្រកួតតំណាងឱ្យប្រទេសចំនួន១២ ហើយក្នុងនោះកម្ពុជា បានបញ្ជូនក្រុមអត្តពលិកចំនួន៦៤នាក់ និងប្រតិភូគ្រូបង្វឹក និងមន្រ្តីបច្ចេកទេសចំនួន២២នាក់ សរុបចំនួន៨៦នាក់ទៅចូលរួម។
ជាមួយគ្នានេះ ការពិនិត្យសុខភាព និងថ្លឹងទម្ងន់របស់កីឡាករ កីឡាការិនីមកពីបណ្តាប្រទេសទាំង១២ ត្រូវបានធ្វើរួចរាល់ហើយ ចំណែកការប្រជុំបច្ចេកទេស និងការបើកវគ្គបណ្តុះបណ្តាលទៅដល់អាជ្ញាកណ្តាលចៅក្រម សម្រាប់ចូលរួមកាត់សេចក្តី និងដឹកនាំការប្រកួតគុនខ្មែរជើងឯកអាស៊ីនេះ ក៏បានធ្វើរួចរាល់ គឺមានន័យថា គ្រប់គ្នាបានត្រៀមខ្លួនរួចរាល់អស់ហើយ ដើម្បីប្រកួតដណ្តើមយកមេដាយគុនខ្មែរ។
លោក ផាត សូដា គ្រូបង្វឹកធំបានឱ្យដឹងថា កីឡាករ កីឡាការិនីកម្ពុជាទាំង៦៦នាក់ បានត្រៀមខ្លួនរួចរាល់អស់ហើយ ទាំងទៅលើការពិនិត្យសុខភាព និងការថ្លឹងទម្ងន់។ បើទោះបីជាពួកគេ មានការនឿយហត់ ក្នុងការធ្វើដំណើរតាមឡានក្រុង ដោយចំណាយពេលជាង១០ម៉ោង ប៉ុន្តែគ្រប់គ្នា បានបង្ហាញឆន្ទៈខ្ពស់ ក្នុងការបង្ហាញសមត្ថភាព ដើម្បីឱ្យអន្តរជាតិ បានឃើញកាន់តែច្បាស់ពីគុណតម្លៃ និងចំណុចខ្លាំងរបស់គុនខ្មែរ។
ជាមួយគ្នានេះ លោក សូដា បានបង្ហាញមោទនភាពក្នុងនាមជាកូនខ្មែរ ដែលបានឃើញកីឡាអត្តសញ្ញាណជាតិរបស់កម្ពុជា ត្រូវបានរៀបចំឱ្យមានការប្រកួតកម្រិតអាស៊ី ជាលើកដំបូង និងជាលើកទី១ នៅក្រៅប្រទេស ដោយប្រទេសវៀតណាម ជាសមាជិកសហព័ន្ធគុនខ្មែរអន្តរជាតិ សុំធ្វើម្ចាស់ផ្ទះមុនគេ។
លោក ផាត សូដា បានបញ្ជាក់ថា៖ «នេះជាលើកដំបូង ដែលការប្រកួតគុនខ្មែរជើងឯកអាស៊ី ត្រូវបានធ្វើឡើងជាលើកដំបូង និងជាលើកទី១ នៅក្រៅប្រទេស គឺមាន័យថា គុនខ្មែររបស់យើង កំពុងបោះជំហានទៅមុខ ហើយ គ្រូៗទាំងអស់ពិតជាមានមោទនភាព ពេលឃើញគុនខ្មែរកាន់តែរីកចម្រើន។ សូម្បីតែអ្នកគាំទ្រ និងប្រជាពលរដ្ឋខ្មែរយើង ក៏សប្បាយចិត្ត នៅពេលក្បាច់គុនដូនតាយើង ចេញមកផ្សព្វផ្សាយនៅក្រៅប្រទេសនេះ»។
ទន្ទឹមនឹងនេះ លោក ផាត សូដា ដែលជាគ្រូបង្វឹកក្រុមជម្រើសជាតិថ្នាលគុនខ្មែរផងនោះ បានអះអាងថា ការចេញមកប្រកួតនៅក្រៅប្រទេស ក្នុងលក្ខណៈទ្រង់ទ្រាយធំបែបនេះ ពិតជាផ្តល់អត្ថប្រយោជន៍ខ្លាំងដល់ក្រុមអត្តពលិក ជាពិសេសក្រុមយុវជនថ្នាល ដើម្បីជំរុញឱ្យពួកគេកាន់តែខំប្រឹងថែមទៀត ក្នុងការអភិវឌ្ឍសមត្ថភាពខ្លួនឯងឱ្យបានខ្លាំង ក្នុងការចាប់បានឱកាសចេញទៅផ្សព្វផ្សាយគុនខ្មែរ នៅតាមបណ្តាប្រទេសផ្សេងៗទៀត។
លោកបញ្ជាក់ថា៖ «កីឡាករ កីឡាការិនីរបស់យើង សុទ្ធតែបានប្រឹងប្រែងខ្លាំង គឺអ្នកខ្លះ ទោះមានការលើសគីឡូ តែបានខំប្រឹងហាត់ និងរត់សម្រក ហើយយើងជឿជាក់ថា ពួកគាត់នឹងបញ្ចេញសមត្ថភាព ក៏ដូចជាការផ្សព្វផ្សាយក្បាច់គុនខ្មែរយើង ដើម្បីឱ្យគេស្គាល់កាន់តែច្រើនថែមទៀត ហើយខ្ញុំជឿថា នឹងមានកម្មវិធីប្រកួតនៅតាមបណ្តាប្រទេសផ្សេងៗជាបន្តបន្ទាប់ទៀត»។
គ្រូបង្វឹករូបនេះ បន្ថែមថា៖ «ពួកខ្ញុំជាគ្រូបង្វឹកចង់បានបំផុតគឺឱ្យកីឡាករ កីឡាការិនីរបស់យើង បញ្ចេញសមត្ថភាព និងបច្ចេកទេស ដែលមានទាំងអស់ ដើម្បីឱ្យអន្តរជាតិបានឃើញ ហើយការដណ្តើមយកមេដាយជូនជាតិ ក៏ជារឿងសំខាន់ ព្រោះយើងជាម្ចាស់ក្បាច់គុនខ្មែរ យើងត្រូវតែបង្ហាញភាពខ្លាំង ដើម្បីឱ្យគេបានស្គាល់កាន់តែច្បាស់»។
ចំណែកគ្រូបង្វឹកមកពីខេត្តបន្ទាយមានជ័យលោក ឆៀប ឆាត និងសិស្សរបស់លោកចំនួន៦នាក់ (ស្រី២នាក់) ក៏បានធ្វើដំណើរមកប្រកួតតំណាងឱ្យកម្ពុជា ក្នុងការប្រកួតគុនខ្មែរជើងឯកអាស៊ី លើកទី១នេះដែរ។ លោកបានទទួលស្គាល់ថា ការហ្វឹកហាត់បែបស្មោះចិត្តនៅតាមខេត្ត វាមិនបានពេញលេញដូចអ្នកនៅភ្នំពេញទេ ព្រោះអត្តពលិកភាគច្រើនជាប់រៀនសូត្រ និងជួយធ្វើការងារផ្ទះ ប៉ុន្តែសម្រាប់ការទទួលបានឱកាសចេញក្រៅប្រទេសជាលើកដំបូងនេះ ពួកគេបានដាក់ចិត្តខ្លាំង។
លោកបានបញ្ជាក់ថា៖ «ខ្ញុំមានមោទនភាពណាស់ ដែលមានប្រទេសជិតខាងយើង បានលើកតម្កើង និងយកក្បាច់គុនយើង មករៀបចំនៅលើទឹកដីរបស់គេ ហើយនេះជាឱកាសដំបូងរបស់ខ្ញុំនិងក្មេងៗមកពីខេត្តបន្ទាយមានជ័យ បានចេញមកប្រកួតនៅក្រៅប្រទេស អ៊ីចឹងពួកគាត់ខំប្រឹងប្រែង និងដាក់ចិត្តខ្លាំងណាស់»។
គ្រូបង្វឹកវ័យ ៤៧ឆ្នាំរូបនេះ បានបន្ថែមថា៖ «ពួកគាត់ឃើញរៀមច្បងមុនៗ ចេញទៅក្រៅស្រុក ហើយមានកេរ្តិ៍ឈ្មោះល្បី ហេតុនេះគាត់បានព្យាយាមធ្វើតាម ចំណែកខ្ញុំជាគ្រូ ពិតជាចង់ឃើញពួកគាត់ដណ្តើមបានមេដាយ ព្រោះនេះជាមោទនភាពរបស់យើង ដែលបានរួមចំណែកជួយលើកកម្ពស់កិត្តិយសជូនជាតិ ដើម្បីផ្សព្វផ្សាយគុនខ្មែរឱ្យបានខ្លាំងថែមទៀត»។
ចំណែកកីឡាការិនី ធន់ ស្រីពេញ ដែលធ្លាប់បានចេញទៅប្រកួតនៅប្រទេសជប៉ុន ចិន ក្រិក និងបានឈ្នះមេដាយប្រាក់ សម្រាប់ការប្រកួតកីឡាយុវជនអាស៊ី នៅប្រទេសបារ៉ែន កាលពីខែតុលា ឆ្នាំ២០២៥នោះ បានបង្ហាញការតាំងចិត្តខ្ពស់ ដណ្តើមយកមេដាយជូនជាតិ ក្នុងនាមជាម្ចាស់ក្បាច់គុន សម្រាប់ការប្រកួតគុនខ្មែរជើងឯកអាស៊ី ជាលើកដំបូង នៅក្រៅប្រទេស លើទឹកដីប្រទេសវៀតណាមនេះ។
កីឡាការិនីវ័យ១៨ឆ្នាំរូបនេះ បាននិយាយថា៖ «ខ្ញុំសប្បាយចិត្ត ដែលគុនខ្មែរ បានមកផ្សព្វផ្សាយនៅប្រទេសរបស់គេ ហើយយើងក៏នឹងខំប្រឹងឱ្យអស់ពីសមត្ថភាព ដើម្បីដណ្តើមយកមេដាយមាសជូនជាតិ។ ខ្ញុំបានត្រៀមខ្លួន និងតាំងចិត្ត១០០ភាគរយ សម្រាប់ការប្រកួតនេះ ព្រោះខ្ញុំចង់លើកស្ទួយគុនខ្មែរឱ្យគេស្គាល់កាន់តែច្រើន ហើយខ្ញុំនឹងខំប្រឹងដណ្តើមយកមេដាយឱ្យបាន»។
ចំណែកកីឡាការិនី មឿយ ស៊ឹង ដែលបានហ្វឹកហាត់ប្រដាល់នៅថៃ ហើយធ្លាប់ដណ្តើមបានខ្សែក្រវាត់១គ្រឿង សម្រាប់ការប្រកួតនៅទីនោះ ចន្លោះពីឆ្នាំ២០១៧ ដល់ឆ្នាំ២០២០ ក៏បានត្រៀមខ្លួនរួចរាល់ ដើម្បីប្រកួតលើវិញ្ញាសាគុនគ្រូ និងប្រយុទ្ធទម្ងន់៦២គីឡូក្រាម សម្រាប់ការប្រកួតគុនខ្មែរជើងឯកអាស៊ី លើកទី១នេះ។
វិញ្ញាសាទាំង២នេះ មឿយ ស៊ឹង ធ្លាប់ឈ្នះបានមេដាយមាស១ និងប្រាក់១ សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជា និងធ្លាប់ឈ្នះបានមេដាយសំរឹទ្ធ១ ពីការប្រកួតស៊ីហ្គេម ឆ្នាំ២០២២ នៅវៀតណាមផងដែរ ហើយ មឿយ ស៊ឹង បានបង្ហាញមោទនភាពខ្លាំង ចំពោះការប្រកួតលើកនេះ។
កីឡាការិនីវ័យ២៦ឆ្នាំរូបនេះ បានបញ្ជាក់ថា៖ «ខ្ញុំធ្លាប់ដណ្តើមបានមេដាយច្រើនហើយជាការតបស្នងជូនជាតិវិញ ហើយលើកនេះខ្ញុំកាន់តែមានមោទនភាព។ ទោះបីជាខ្ញុំត្រូវប្រកួត២វិញ្ញាសាតែម្នាក់ឯង ដែលរាងហត់បន្តិច ប៉ុន្តែខ្ញុំនឹងប្រឹងប្រែងដណ្តើមយកមេដាយជូនជាតិឱ្យបាន ព្រោះយើងចង់បង្ហាញថា យើងជាម្ចាស់ក្បាច់គុន គឺកម្ពុជាយើង មានក្បាច់គុនជារបស់ខ្លួន តាំងពីបរមបុរាណ»។
ចំណែកលោក ខូវ ឆាយ អគ្គលេខាធិការសហព័ន្ធគុនខ្មែរអន្ដរជាតិ និងជាប្រធានសហព័ន្ធកីឡាប្រដាល់គុនខ្មែរ បានអះអាងថា យើងធ្លាប់រៀបចំការប្រកួតគុនខ្មែរជើងឯកអាស៊ាន និងជើងឯកពិភពលោកជាច្រើនលើកមកហើយ នៅលើទឹកដីខ្លួនឯង ប៉ុន្តែនេះជាលើកដំបូង ដែលយើងបានរៀបចំការប្រកួតគុនខ្មែរជើងឯកអាស៊ី លើកទី១នេះ ដោយខាងវៀតណាម សុំសិទ្ធិធ្វើជាម្ចាស់ផ្ទះមុនគេ។
លោកបញ្ជាក់ថា៖ «នេះជាព្រឹត្តិការណ៍ប្រវត្តិសាស្ត្រថ្មីមួយ សម្រាប់វិស័យគុនខ្មែរ ដោយបានឆ្លុះបញ្ចាំងឱ្យឃើញថា គុនខ្មែរ ដែលជាក្បាច់គុនដ៏ចំណាស់ និងជាមរតកវប្បធម៌របស់បុព្វបុរសខ្មែរ កំពុងទទួលបានការគាំទ្រ ការទទួលស្គាល់ និងការអភិវឌ្ឍកាន់តែទូលំទូលាយនៅក្នុងតំបន់អាស៊ី និងនៅលើឆាកអន្តរជាតិ»។
ជាមួយទិសដៅវែងឆ្ងាយនេះ សហព័ន្ធគុនខ្មែរអន្តរជាតិ មានផែនការសម្របសម្រួលដល់សមាជិកប្រមាណ៦០ប្រទេសផ្សេងៗទៀត ឱ្យបន្តធ្វើជាម្ចាស់ផ្ទះការប្រកួតគុនខ្មែរជើងឯកអាស៊ីនេះឱ្យបានជារៀងរាល់ឆ្នាំ ហើយនេះជាយុទ្ធសាស្រ្តរុញ «គុនខ្មែរ» ឱ្យកាន់រីកធំនៅលើឆាកអន្តរជាតិ។
លោក ខូវ ឆាយ បន្ថែមថា៖ «ការរៀបចំការប្រកួតជើងឯកអាស៊ីជាលើកដំបូងនេះ គឺជាជំហានយុទ្ធសាស្ត្រដ៏សំខាន់មួយក្នុងការកសាងប្រព័ន្ធ ប្រកួតប្រជែងកម្រិតទ្វីប ពង្រឹងសមត្ថភាពអត្តពលិក គ្រូបង្វឹក និងមន្រ្តីបច្ចេកទេស ព្រមទាំងបង្កើនកិច្ចសហប្រតិបត្តិការរវាងសហព័ន្ធ និងអង្គការកីឡាគុនខ្មែរនៃបណ្តាប្រទេសក្នុងតំបន់អាស៊ី អ៊ីចឹងបន្ទាប់ពីប្រទេសវៀតណាម ការប្រកួតគុនខ្មែរជើងឯកអាស៊ី នឹងបន្តរៀបចំឱ្យមានជារៀងរាល់ឆ្នាំ នៅតាមបណ្តាប្រទេសផ្សេងៗទៀត ដែលជាសមាជិកសហព័ន្ធគុនខ្មែរអន្តរជាតិរបស់យើង»៕
