សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចបង្ក្រាបបានករណីគ្រឿង​ញៀន​ពីរធំៗសរុបជាង២តោននៅ​ដើម​ឆ្នាំ២០២៤

សមត្ថកិច្ចប៉ូលិសបង្ហាញមុខជនល្មើសគ្រឿងញៀនជាជនជាតិចិន៥នាក់ និងគ្រឿងញៀនជាង១តោន នៅថ្ងៃទី២៤ ខែមករា ដែលរឹបអូសបាននៅដែនសមុទ្រ ខេត្ដព្រះសីហនុ កាលពីថ្ងៃទី២២ ខែមករា ឆ្នាំ២០២៤។ (រូបភាពផ្ដល់ឱ្យ)
សមត្ថកិច្ចប៉ូលិសបង្ហាញមុខជនល្មើសគ្រឿងញៀនជាជនជាតិចិន៥នាក់ និងគ្រឿងញៀនជាង១តោន នៅថ្ងៃទី២៤ ខែមករា ដែលរឹបអូសបាននៅដែនសមុទ្រ ខេត្ដព្រះសីហនុ កាលពីថ្ងៃទី២២ ខែមករា ឆ្នាំ២០២៤។ (រូបភាពផ្ដល់ឱ្យ)

សមត្ថកិច្ចប៉ូលិស និងកងរាជអាវុធហត្ថ បានបង្រ្កាបបទលើ្មសគ្រឿងញៀនករណីពីរធំៗ​នៅ​ដើម​ឆ្នាំ២០២៤ ដែលរឹប​អូសគ្រឿងញៀនបានជាង២តោន នៅខេត្តព្រះវិហារ និង​ខេត្ត​ព្រះសីហនុ។

នៅព្រឹកថ្ងៃទី២៤ ខែមករានេះ មន្ទីរប្រឆាំងបទល្មើសគ្រឿងញៀនបាន​បង្ហាញមុខ​ក្រុម​ជន​ល្មើស​​​ជាជនជាតិចិនចំនួន៥នាក់ និងគ្រឿងញៀនជាង១តោន ដែលរឹបអូលបានកាល​ពី​ថ្ងៃ​ទី២២ ខែមករា ឆ្នាំ២០២៤​ ខណៈកងរាជអាវុធហត្ថខេត្តព្រះវិហារ បង្ក្រាប និង​ដកហូត​គ្រឿង​ញៀន​បាន​ជាង​១តោន កាល​ពីយប់ថ្ងៃទី២០ ខែមករា ឆ្នាំ២០២៤ អំឡុងជនល្មើស​ដឹកតាម​រថយន្ត​ប្រភេទ​ម៉ាស្តា​​មួយ​​គ្រឿង ដោយនាំ​ចេញពីប្រទេសឡាវឆ្លងកាត់ខេត្តនេះ។

លោក អ៊ិន សុង អនុប្រធាន និងជា​អ្នកនាំ​ពាក្យមន្ទីរប្រឆាំងបទល្មើសគ្រឿងញៀន​នៃក្រសួង​មហាផ្ទៃ ​បានថ្លែងថា សមត្ថកិច្ចប៉ូលិសបានបង្រ្កាបករណីគ្រឿងញៀនធំមួយ​ដោយឃាត់ខ្លួន​ឧក្រិដ្ឋជនចិនបានចំនួន៥នាក់ និង​​រឹបអូស​​គ្រឿងញៀនបានជាង១តោនៅដែនសមុទ្រ ខេត្ដ​ព្រះសីហនុ។ ​លោក​បន្ដថា ក្រោយពីបង្ហាញមុខឧក្រិដ្ឋជនរួចហើយ អង្គភាព​បាន​បញ្ជូន​សំណុំ​ទៅតុលាការ​ដើម្បីបន្ដនីតិវិធី​តាមច្បាប់។

លោកបញ្ជាក់ថា៖ «បាទ! យើងបង្រ្កាបបាននៅដែនសមុទ្របានជាង១តោន សុទ្ធតែ​ជនជាតិ​ចិន។ យើងបានបញ្ជូនទៅតុលាការដើម្បីបន្ដរួចហើយ ប៉ុន្ដែយើងនៅតែបន្ដស្វែងរកអ្នកពាក់​ព័ន្ធ​​បន្ថែម​ទៀត»។ លោកបន្ថែមថា អង្គភាព​លោក​នៅតែបន្ដស្វែងរកអ្នកពាក់ព័ន្ធ​នឹង​ករណី​នេះ​ដើម្បីនាំយកមកដាក់ទោស​ឱ្យបាន។

ចំណែកឯលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា កម្លាំង​កងរាជ​អាវុធហត្ថខេត្ត​ព្រះវិហារ ​ពិតជាបានបង្រ្កាប និងរឹបអូសគ្រឿងញៀនបាន​ជាង១តោន​ពិតមែន ប៉ុន្ដែ​លោកថា​ករណីនេះ គឺបានបញ្ជូនទៅសាលាដំបូងរួចហើយ ដើម្បីបន្ដ​នីតិវិធី​ច្បាប់។

យ៉ាងណាលោកបន្ដថា ករណីគ្រឿងញៀន គឺនៅមានច្រើនករណីបន្ដទៀតដែលលោក​នឹង​បន្ដ​បង្រ្កាប ព្រោះជាកាតព្វកិច្ចរបស់កងរាជអាវុធហត្ថ។ លោកបានបដិសេធនឹងសំណួរ​របស់​ខេមបូចា ជុំវិញរបាយការណ៍នៃការបង្រ្កាបគ្រឿងញៀន និងទីតាំងនៃការបង្រ្កាបបាននោះទេ ដោយ​លោកថា វាហួសពីអ្វីដែលលោកអាចផ្ដល់បទសម្ភាសន៍។

លោកថ្លែងថា៖ «បាទ! ពិតមែន។ ឱ្យមានករណីគ្រឿងញៀន គឺយើងចុះបង្ក្រាបភ្លាម។ ករណី​នេះ​មានការសម្របសម្រួលពីតំណាងអយ្យការដូច្នេះលោកអាចទៅតុលាការទើបគេអាច​ឆ្លើយ​បាន។ កងកម្លាំងរាជអាវុធហត្ថបានត្រឹមបង្រ្កាបទេ​ តែតុលាការជាអ្នកបន្ដនីតិវិធី។ យើងនៅតែ​បន្ដចុះ​បង្ក្រាប​ព្រោះ​តួនាទីយើងគឺធ្វើលើរឿងហ្នឹង»

សមត្ថកិច្ចអាវុធហត្ថ បានឱ្យដឹងថា គ្រឿង​ញៀន​​ប្រភេទម៉ាទឹកកកប្រមាណជា១០២០ដុំ ទម្ងន់​ប្រមាណ​ជា១០២០គីឡូក្រាម (១តោន២០​គីឡូក្រាម) ត្រូវបានចាប់រឹបអូសដោយកម្លាំង​កងរាជ​អាវុធហត្ថខេត្តព្រះវិហារ ខណៈឧក្រិដ្ឋជន ដឹកតាមរថយន្តប្រភេទម៉ាស្តាមួយគ្រឿងនាំចេញ​ពី​ប្រទេសឡាវឆ្លងកាត់ខេត្តព្រះវិហារ និងបន្តទៅគោលដៅផ្សេងៗ តែត្រូវបាន​កម្លាំង​កងរាជ​អាវុធហត្ថ​បង្ក្រាបបាន កាល​ពី​យប់ថ្ងៃទី២០ ខែមករា ឆ្នាំ២០២៤។

ចំណែកឯ អ្នកស្រី ជុំ កន្នីយ៉ា អ្នកនាំពាក្យសាលាដំបូងខេត្ដព្រះវិហារ បានថ្លែងថា ពាក់​ព័ន្ធ​នឹងករណីបង្រ្គាបគ្រឿងញៀនរបស់កម្លាំងកងរាជអាវុធហត្ថខេត្តព្រះវិហារនេះ អ្នក​ស្រីថា​កំពុង​ស្ថិតនៅតុលាការ ប៉ុន្ដែអ្នកស្រីមិនអាចអត្ថាធិប្បាយ​ឱ្យលម្អិតជូនបាន​នោះ​ទេ។

អ្នកនាំពាក្យរូបនេះបន្ថែមថា៖ «រឿងហ្នឹងបានដៃសាលាដំបូងហើយ។យើងកំពុងដំណើរការ​រឿងហ្នឹង។ ខ្ញុំមិនអាចជម្រាបលោកបានទេ អរគុណ»

លោក មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិ​ប្រយុទ្ធប្រឆាំង​គ្រឿង​​ញៀន បានថ្លែងថា ក្នុង​២០២៣​​​នេះ​បរិមាណគ្រឿងញៀនដែលរឹមអូសបាន​មាន​ការ​ថយ​ចុះជាង២០២២ ប៉ុន្ដែ​ករណី​មាន​ការ​កើនឡើង តែការរឹបអូសគ្រឿងញៀន​មានការថយចុះ។​ លោកបន្ដថា ក្នុងការបង្រ្កាបនេះ គឺ​មាន​ចម្រុះជាតិសាសន៍ ប៉ុន្ដែក្នុងនោះភាគច្រើន​ជាជនជាតិ​ចិន។

លោកមានប្រសាសន៍ទៀតថា តាមរយៈរបាយការណ៍​បូក​សរុប​ការងារ​​បង្រ្កាបបទល្មើស​ចែក​ចាយ និងប្រើប្រាស់​គ្រឿនញៀន​ទូទាំងប្រទេសបង្ហាញ​ថា ក្នុងឆ្នាំ២០២៣ សមត្ថកិច្ចបាន​​​បង្ក្រាប​​ករណី​​គ្រឿងញៀន​ដោយ​រឹប​អូសវត្ថុតាងបាន​ជិត​៣តោន​ ក្នុងចំណោម ៨ ០៦២​ករណី ប៉ុន្ដែករណីធំៗមានចំនួន១០ករណី។

លោកបញ្ជាក់ថា៖ «ករណីចាប់បានមានច្រើន ប៉ុន្ដែបរិមាណគ្រឿងញៀនមានការថយចុះ​ជាង២០២២។ ករណីធំៗមាន១០ ក្នុងនោះមានមេខ្លោងជនជាតិចិន។ យើងនៅ​បន្ដ​ប្រើ​យុទ្ធសាស្រ្ដ​​ដដែល ប៉ុន្ដែយើងត្រូវពង្រឹងចំណុចណាខ្សោយដើម្បីអាច​បង្រ្កាបញ្ហាគ្រឿងញៀន​ឱ្យបាន។ វាអាស្រ័យ​លើស្ថាប័នពាក់ព័ន្ធទាំងអស់ចូលរួមសហការទើបប្រទេសយើងបានល្អ​ប្រសើរ»។​

លោកបានឱ្យដឹងទៀតថា ករណី​ដែល​ចាប់​បាន​ដូចជា​នៅខេត្ដស្វាយរៀង​កន្លង​មក លោកថា គ្រឿងញៀនបានជាង១តោន ប៉ុន្ដែ​​មេខ្លោង​ត្រូវ​បាន​គេចខ្លួនបាត់។ ការណ៍នេះលោកថា អង្គភាព​លោក​នឹងបន្ដសហការ​ជាមួយ​​ស្ថាប័ន​ពាក់ព័ន្ធ​​​ដើម្បី​ចាប់មេខ្លោងឱ្យបាន

គ្រឿងញៀនដែលបង្រ្កាបបានចំនួនជាង១តោនពីការបង្រ្កាបបានរបស់​កងកម្លាំង​រាជអាវុធហត្ថព្រះវិហារ កាលពីថ្ងៃទី២០ ខែមករា ឆ្នាំ២០២៤។ (រូបភាពផ្ដល់ឱ្យ)

ទន្ទឹមនឹងនេះដែរ លោក អ៊ិន សុង ​​បានថ្លែងទៀតថា ករណីគ្រឿងញៀនជាបទល្មើសសកល ហើយ​អង្គភាព​លោកតែងតែ​ព្យាយាម​​បង្រ្កាប។ លោកបន្ដថា នៅពេលនេះប្រទេសកម្ពុជា​បាន​ក្លាយ​ជាទីតាំង​របស់​ជនឧក្រិដ្ឋគ្រឿងញៀនក្នុងការចរាចរគ្រឿងញៀនទៅកាន់ប្រទេសទី៣។ លោកបានចាត់​ទុកថា កម្ពុជាជាប្រទេសរងគ្រោះសុទ្ធសាធ។

លោកបញ្ជាក់ថា៖ «ប្រទេស[កម្ពុជា]បានក្លាយជាកន្លែងនៃការចរាចរនៃឧក្រិដ្ឋជន​គ្រឿងញៀន​ក្នុងការនាំទៅប្រទេសទី៣។ ទើបដើមឆ្នាំទេយើងមិនទាន់មានរបាយការណ៍ទេ ប៉ុន្ដែយើង​បង្រ្កាប​បាន​ករណីធំៗដឹងតែប៉ុណ្ណឹងបានហើយ»។ លោកបន្ថែមថា៖ «ប្រទេសយើង​បាន​នឹងកំពុងក្លាយជាប្រទេសរងគ្រោះនៃគ្រឿងញៀន វាជាការព្រួយបារម្ភ ហើយយើងកំពុងតែ​ព្យាយាមបង្រ្កាបលើបញ្ហានេះ»។

លោកបានបញ្ជាក់ថា ឆ្នាំ២០២៣ មានការថយចុះនៃការរឹបអូសបានគ្រឿងញៀន ព្រោះ​កាល​ឆ្នាំ២០២២ បង្ក្រាបបាន ៨ ០៦៣ក្នុងចំណោម ៦ ៣៩០ករណី(កើន ១៦៧៣ ករណី) និងឃាត់​ខ្លួន​មនុស្ស ២០ ០០២ក្នុងចំណោម ១៥ ០០២នាក់(កើន ៥ ០០០នាក់)ក្នុងនោះមានស្រី ១ ៣៦៧​នាក់​។ លោកបន្ដថា ឆ្នាំ២០២៣ រឹបអូសបានគ្រឿងញៀន២តោន៩៨៨គីឡូក្រាម។ ហើយ​ឆ្នាំ​២០២២ រឹបអូសបាន១៤តោន ៩១៩គីឡូក្រាម មានការថយចុះ១១តោន ៩៣០គីឡូក្រាម​សម្រាប់​ឆ្នាំ​២០២៣។

លោករំពឹងថា ករណីគ្រឿងញៀនក្នុងឆ្នាំ២០២៤នឹងកាន់តែថយបន្ថែម ព្រោះមេខ្លោង​គ្រឿង​ញៀន​ធំៗ​បានដកខ្លួនចេញពីប្រទេសកម្ពុជាដោយយកប្រទេសផ្សេង គឺជាទីតាំងថ្មី​ក្នុងការ​ផលិត​គ្រឿងញៀន។ លោកបន្ដថា មេខ្លោងដែលអង្គភាពចុះបង្រ្កាបភាគច្រើន​ជាជនជាតិ​ចិនតែម្ដង។

លោកបន្ដថា៖ «មេខ្លោងយើងបង្រ្កាបបានគឺជនជាតិចិន​តែម្ដង។ខ្ញុំគិតថាវានឹងមានការថយចុះ​ដោយ​មេខ្លោងធំៗ​បានដូរទៅផលិតនៅប្រទេសឡាវវិញ ប៉ុន្ដែយើងនៅតែព្រួយបារម្ភ​ពីការ​នាំ​ចូល»

កាលពីថ្ងៃទី៣០ ខែតុលា ឆ្នាំ២០២៣ កន្លងទៅ ​លោក​នាយក​រដ្ឋមន្ត្រី ​ហ៊ុន ម៉ាណែត​ បាន​បញ្ជាក់​ក្នុងពិធីសម្ពោធអគាររដ្ឋបាលថ្មីខេត្តកំពង់ស្ពឺថា ​រដ្ឋាភិបាល​សម្រេច​កែសម្រួល​ក្បាល​ម៉ាស៊ីន​ដឹកនាំ​អាជ្ញាធរជាតិ​ប្រយុទ្ធ​ប្រឆាំង​គ្រឿងញៀន​ ដោយ​បញ្ហានេះ​ត្រូវដឹកនាំ​ដោយ​ឧបនាយក​រដ្ឋមន្ត្រី​ចំនួន​៤រូប​។

​លោកបន្ដថា ​បញ្ហា​គ្រឿងញៀន ​ដែល​ការសម្រេច​ដំបូង​ដឹកនាំ​ដោយ​ទេសរដ្ឋមន្ត្រី​មួយរូប ​គឺ​មិន​គ្រប់​គីឡូ​ទេ ​ក្នុងការ​កាត់បន្ថយ ​និង​លុបបំបាត់​ឲ្យ​អស់​គ្រឿង​ញៀន​​ពី​កម្ពុជា​។

បើតាមលោក យ៉ង់ គិមអេង ប្រធាន​មជ្ឈមណ្ឌល​ប្រជាពលរដ្ឋដើម្បីអភិវឌ្ឍន៍ និង​សន្តិភាព ថ្លែងថា ករណីគ្រឿងនេះវាបានបំផ្លាញសង្គមយ៉ាងខ្លាំងនាពេលបច្ចុប្បន្ននេះ ជាពិសេសវា​បាន​រាំងស្ទះដល់ការអភិវឌ្ឍសង្គមជាតិតាមរយៈការពង្វក់យុវជន និងសកម្មភាពផ្សេងៗ​គ្រប់​រូបភាព។

លោកបន្ដថា ជាយុទ្ធសាស្រ្ដរដ្ឋាភិបាលគួរតែពង្រឹងច្បាប់ឱ្យបានរឹងមាំបន្ថែមទៀត ម្យ៉ាងវិញ​ទៀត​លោកថា ការចាប់មេខ្លោងធំបានគឺជារឿងសំខាន់ ជាក់ស្ដែងករណី​គ្រឿង​ញៀន​នេះ ភាគច្រើន គឺអ្នកមានអំណាច និងមន្ដ្រីរាជការមួយចំនួនបានយកតួនាទីរបស់ខ្លួន​ទៅជួញដូរ​គ្រឿងញៀន។ ការណ៍នេះវារឹតតែគ្រោះថ្នាក់សង្គមជាតិ បើមន្ដ្រី និងអ្នកមានអំណាច​បន្ដ​សកម្មភាព​​បែបនេះ។

លោកថ្លែងថា៖ «ខ្ញុំមើលឃើញថា ការជួញដូរគ្រឿងញៀនមិនមែនអ្នកតូចតាចអាចជូញដូរ​បានទេ ព្រោះកន្លងមក គឺយើងដឹងហើយថា មានតែអ្នកមានអំណាច និងមន្ដ្រីមួយចំនួនបាន​ប្រើ​ប្រាស់​អំណាចរបស់ខ្លួនក្នុងការជួញដូរ។ វាគ្រោះថ្នាក់ណាស់ វាអាចឱ្យកើតអំពើឆក់ប្លន់ កាប់សម្លាប់គ្នា និងអបាយមុខផ្សេងៗតាមរយៈគ្រឿងញៀននេះ»។ លោកបន្ថែមថា៖ «ខ្ញុំ​យល់​ថារដ្ឋាភិបាលគួរតែពង្រឹងច្បាប់បន្ថែមទៀត ជាពិសេសការចាប់មេខ្លោងធំៗនឹងដាក់ទោស​ឱ្យខ្លាំងៗ​ទើបអាចលុបបំបាត់បាន។ បើមិនអឹចឹងទេ គឺពលរដ្ឋ​ និងយុវជនងាយរងគ្រោះណាស់ ដូចយើងបានដឹងស្រាប់ហើយ»

កាលពីថ្ងៃទី១៨ ខែធ្នូ ឆ្នាំ២០២៣កន្លងទៅ លោក ស សុខា ឧបនាយករដ្ឋមន្ដ្រី រដ្ឋមន្ដ្រី​ក្រសួង​មហាផ្ទៃ  បានបញ្ជាឱ្យបណ្ដេញចេញពីក្របខណ្ឌតែម្ដង ចំពោះមន្ដ្រីនគរបាល​រូបណា​ដែល​តេស្ដរកឃើញមានសារធាតុញៀន។ ការដាក់​បទបញ្ជាក្នុងក្របខណ្ឌមន្ដ្រី​នគរបាល​ក្រសួង​មហាផ្ទៃ ពីលោក ស សុខា បានធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការ ទីតាំង​មណ្ឌល​សំចតប៉ោយប៉ែត នៅក្រុងប៉ោយប៉ែត ខេត្តបន្ទាយមានជ័យ។

លោក ស សុខា បានព្រមានជាថ្មីម្ដងទៀត ចំពោះជនទាំងឡាយណាដែល​ពាក់ព័ន្ធជាមួយ​បទល្មើសគ្រឿងញៀន សូមដកខ្លួនចេញឲ្យឆ្ងាយ ខណៈអ្នកដែលដឹងថា ខ្លួនមានសារធាតុ​ញៀន ក៏ត្រូវស្វែងរកវិធីសាស្ដ្រដើម្បីផ្ដាច់ចោល៕

1,331 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម