អ្នកសារព័ត៌មានក្នុងស្រុកម្នាក់ប្រចាំការនៅខេត្តបាត់ដំបងត្រូវបានសាលាដំបូងខេត្តចេញដីកាបញ្ជាឱ្យចូលខ្លួន បន្ទាប់ពីគាត់បានឡាយព័ត៌មានផ្ទាល់ទាក់ទងនឹងវិវាទដីធ្លីនៅតំបន់អាងភាសស្ថិតក្នុងឃុំពាមឯក ស្រុកឯកភ្នំ ខេត្តបាត់ដំបង។
អ្នកសារព័ត៌មានម្នាក់ឈ្មោះ សេន វីរៈ ជាភ្នាក់ងារសារព័ត៌មាន SBP Post News ប្រចាំខេត្តបាត់ដំបង ត្រូវបានសាលាដំបូងខេត្តបាត់ដំបងចេញបង្គាប់ឱ្យចូលខ្លួនបន្ទាប់ពីគាត់បានឡាយព័ត៌មានផ្ទាល់ទាក់ទងនឹងវិវាទដីធ្លីនៅតំបន់អាងភាស ស្ថិតនៅឃុំពាមឯក ស្រុកឯកភ្នំ ខេត្តបាត់ដំបង កាលពីខែសីហា។
លោក សូ ឌី ប្រធានមន្ទីរនៃទីបញ្ជាការកងរាជអាវុធហត្ថខេត្តបាត់ដំបងបានឱ្យដឹងថា លោក សេន វីរៈ ត្រូវបានព្រះរាជ្ញអាជ្ញារងអមសាលាដំបូងខេត្តបាត់ដំបងចេញដីកាបញ្ជាឱ្យចូលខ្លួនមែនដើម្បីសួរបំភ្លឺពាក់ព័ន្ធនឹងការញុះញង់ ដែលអាជ្ញាធរចោទតែអ្នកកាសែតរូបនេះមិនឃើញនៅបន្ទប់ជួលរបស់ខ្លួននោះទេពេលសមត្ថកិច្ចទៅរក។
លោក សូ ឌី៖ «ដីកាឱ្យចូលខ្លួននេះសមត្ថកិច្ចអាចចាប់ខ្លួនបានតែវាមានសុពលភាពរបស់វាតែគេចេញដីកាឱ្យចូលខ្លួនហ្នឹងគឺហៅមកសួរនាំហ្នឹងមិនប្រាកដថាគាត់មានទោស រឺអត់នោះទេ វាត្រូវការស៊ើបអង្កេត»។
លោក សេន វីរៈ ភ្នាក់ងារសារព័ត៌មាន SBP Post News ប្រចាំខេត្តបាត់ដំបងដែលកំពុងនៅខេត្តផ្សេងបានប្រាប់តាមសារអេឡិចត្រនិចថា គាត់មានការព្រួយបារម្ភដែរនៅពេលដែលមានការចោទប្រកាន់មកលើរូបលោកដូច្នេះ ។ លោកបញ្ជាក់ថា លោកចុះទៅយកព័ត៌មានបំពេញតាមវិជ្ជាជីវៈនិងតាមការអញ្ជើញពីប្រជាពលរដ្ឋ មិនមានគោលបំណងណាញុះញង់ប្រឆាំង រឺ នាំប្រជាពលរដ្ឋបះបោរណាមួយនោះទេ។
លោក វីរៈ ឱ្យដឹងថា៖ «ខ្ញុំគឺសម្ភាសន៍សួរតាមប្រជាពលរដ្ឋឆ្លើយប្រជាពលរដ្ឋចង់និយាយប៉ុណ្ណឹង។ ខ្ញុំកំពុងរង់ចាំការបំភ្លឺពីអភិបាលខេត្តឱ្យបំភ្លឺយ៉ាង ណានោះ? មានតែការង់ចាំទទួលព័ត៌មានបន្ថែមដែរ?»។
លោកបន្ថែមថា «យើងមានការភ័យខ្លាចដែរមានការចោទចឹងក្នុងនាមអ្នកសារ ព័ត៌មានយើងធ្វើដោយវិជ្ជាជីវៈ ជាការនាំសារ ជាកញ្ចក់ ដើម្បីនាំព័ត៌មានទៅរាជរដ្ឋាភិបាលក៏ដូចអភិបាលខេត្តឱ្យយល់សុខទុក្ខប្រជាពលរដ្ឋដែលគាត់ចង់ឱ្យរកដំណោះស្រាយប៉ុណ្ណោះ»។
ជុំវិញការចេញដីកាឱ្យអ្នកកាសែតចូលខ្លួនខាងលើ អ្នកស្រី ជា ច័ន្ទរស្មី អ្នកនាំពាក្យសាលាដំបូងខេត្តបាត់ដំបងឆ្លើយតបតាមសារ អេឡិចត្រនិចតេឡេក្រាម ដោយរុញឱ្យសួរអ្នកនាំពាក្យអយ្យការជំនួសវិញ ។ ខេមបូចា មិនអាចទាក់ទងអ្នកនាំពាក្យអយ្យការនៃសាលាដំបូងខេត្តបាត់ដំបងបាននៅឡើយទេ ។
អ្នកសារព័ត៌មានក្នុងខេត្តម្នាក់សុំមិនបញ្ចេញឈ្មោះដែលមានបន្ទប់ជួលក្បែរគ្នាជាមួយនឹងអ្នកកាសែតខាងលើបានឱ្យដឹងថា មុនដំបូងលោកមិនដឹងរឿងរបស់លោក វីវៈ នោះទេ តែគ្រាន់តែដឹងថាគាត់បានចេញពីបន្ទប់ជួលរបស់ខ្លួនស្ថិតនៅភូមិអូរតាគាំសង្កាត់ទួលតាឯកក្រុងបាត់ដំបងក្រោយពីគាត់ ឡាយព័ត៌មានផ្ទាល់ទាក់ទងនឹងអាងភាសកាលពីថ្ងៃទី១៨ ខែសីហា ឆ្នាំ២០២២។ អ្នកសារព័ត៌មានរូបនេះបញ្ជាក់ថា ទំនងលោក វីរៈ មានការភ័យខ្លាចដោយសារឃើញមានកម្លាំងអាវុធហត្ថបានមករកដល់បន្ទប់ជួលរបស់គាត់។
អ្នកសារព័ត៌មានរូបនេះថ្លែងថា៖ «ខ្ញុំចេះតែឆ្ងល់ម៉េចបានអត់ឃើញវីរៈមកបន្ទប់ក្រោយមកទើបដឹង ពេលឃើញប៉េអឹមមកដល់ក្បែរៗបន្ទប់ ប្រហែលគាត់ភ័យ ខ្លាចមិនហ៊ានចូលបន្ទប់ហើយ ហើយខ្ញុំក៏ទាក់ទងគាត់លែងបានដែរ»។
សូមបញ្ជាក់ថាលោក សេន វីរៈ ភ្នាក់ងារ SBP Post News ប្រចាំខេត្តបាត់ដំបងធ្លាប់បានចុះទៅឡាយព័ត៌មានផ្ទាល់ទាក់ទងនឹងការឡើងតវ៉ា របស់ប្រជាពលរដ្ឋនៅដីអាងភាសច្រើនលើកមកហើយនិងការចុះឡាយព័ត៌មានចុងក្រោយនៅពេលដែលប្រជាពលរដ្ឋ៦០ទៅ៧០នាក់បានឡើងតវ៉ានៅចំណុចអាងភាសនៅថ្ងៃទី១៦ ខែសីហា ឆ្នាំ២០២២ សុំឱ្យបញ្ឈប់គ្រឿងចក្រកាយដីស្រែពួកគាត់ និងសុំឱ្យអាជ្ញាធរកាត់ឆ្វៀលដីស្រែឱ្យពួកគាត់ដែលអាស្រ័យផលយូរឆ្នាំ និងខ្លះអះអាងថា អាស្រ័យផលតជំនាន់ដល់រយឆ្នាំផងដែរ។
ក្រោយមកនៅថ្ងៃទី១៨ខែសីហាឆ្នាំ ២០២២ អ្នកកាសែតរូបនេះក៏បានឡាយជាថ្មីទៀតទាក់ទងប្រជាពលរដ្ឋជាច្រើននាក់នាំគ្នាថ្លែងអំណរគុណដល់លោកនាយករដ្ឋមន្រ្តីហ៊ុនសែន ដែលបានបញ្ជាឱ្យអាជ្ញាធរខេត្តចុះដោះស្រាយដីធ្លីជូនប្រជាពលរដ្ឋរស់នៅជាក់ស្តែងនៅចំណុចអាងភាសនៅ ឃុំពាមឯក ស្រុកឯកភ្នំ ខេត្តបាត់ដំបងនេះក្រោយពីប្រជាពលរដ្ឋលើកគ្នាតវ៉ា។
លោក សុខ លូ អភិបាលខេត្តបាត់ដំបងបានថ្លែងខណៈដែលលោកចុះចែកអំណោយដល់ប្រជាពលរដ្ឋរស់នៅចំណុចអាងភាសជាង ២០០គ្រួសារកាលពីចុងខែសីហា ដោយលោកប្រកាសយោងលើគោលការណ៍ដោះស្រាយដីអាងភាស របស់លោកនាយករដ្ឋមន្រ្តី មានបួនចំណុច ក្នុងនោះ ១-ដោះស្រាយជូនប្រជាពលរដ្ឋដែលអាស្រ័យផលជាក់ស្តែង ២៣គ្រួសារ ២-គិតគូរពិចារណាដោះស្រាយជូនប្រជាពលរដ្ឋ រស់នៅ ក្នុងអាង៧០គ្រួសារ ៣-ប្រជាពលរដ្ឋ ១៥៩គ្រួសាររស់នៅលើខ្នងអាងភាសត្រូវរំកិលទៅក្រោយបន្តិចតាមការណែនាំរបស់ក្រសួងធនធានទឹក និងអង្គការដៃគូរ និងទី៤-ចំពោះមេក្លោងនិងអ្នកសារព័ត៌មានញុះញង់ត្រូវមានវិធានការច្បាប់។
លោក សុខ លូ បានបន្ថែមថា អាងភាសមានទំហំជិត ២ ០០០ហិកតាជាអាងរបស់រដ្ឋ ក្រោមការគ្រប់គ្រងរបស់ក្រសួងធនធានទឹកដែលអាចផ្ទុកទឹកបាន៣៦លានម៉ែត្រគូបក្រោយស្តាររួចនិងមានលទ្ធភាពស្រោចស្រពដីស្រែរបស់ប្រជាពលរដ្ឋរាប់ពាន់ហិកតានិងអាចធ្វើបានបីរដូវផងដែរ។
លោកបញ្ជាក់ថា ប្រជាពលរដ្ឋខ្លះដែលអះអាងថាខ្លួនបានធ្វើស្រែតាំងពីដូនតា១០០ឆ្នាំមកហើយនោះគឺខុសស្រឡះពីកាពិតវាមិនដូចការញុះញង់នោះទេ។ បន្ថែមពីនោះលោកក៏បានបង្ហាញឈ្មោះអ្នកមានដីធំៗចំនួនពីរនាក់ដែលអះអាងថាទិញតពីប្រជាពលរដ្ឋម្នាក់ជាង៦០ហិកតានិង ម្នាក់ជាង១៨០ហិកតាគឺជាការទិញដូរដីរដ្ឋខុសច្បាប់នឹងថាជាអ្នកញុះញង់បំផ្លាញ សម្បត្តិរដ្ឋផងដែរ។
លោក សេន វីរៈ ភ្នាក់ងារសារព័ត៌មានSBP Post News ជាកូនចៅរបស់លោក សាន ប៊ុនធឿន ដែលមហាជនធ្លាប់ស្គាល់។ កាលពីថ្ងៃទី២២ ខែសីហា ឆ្នាំ២០២២ ក្រសួងព័ត៌មានបានសម្រេចលុបអាជ្ញាបណ្ណគេហទំព័រwww.sbtpost.com របស់លោក សាន ប៊ុនធឿន ដោយក្រសួងបញ្ជាក់ថា ម្ចាស់អាជ្ញាបណ្ណនេះបានប្រព្រឹត្តអំពើអសីលធម៌ ជេរប្រមាថជាសាធារណៈ ធ្វើឱ្យប៉ះពាល់ដល់សីលធម៌សង្គម និងកិត្តិយសសេចក្តីថ្លៃថ្នូរ របស់អ្នកសារព័ត៌មានអាជីព ដែលជាការបំពានយ៉ាងធ្ងន់ធ្ងរលើវិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្នុងក្រសួងព័ត៌មាន។ ការដកអាជ្ញាបណ្ណនេះក្រោយពីលោក សាន ប៊ុនធឿន ត្រូវបានលុបឈ្មោះចេញពីកងអង្គរក្ស។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ ខេមបូចា បានមានប្រសាសន៍ថា អ្នកសារព័ត៌មានមានសិទ្ធិនិងសេរីភាពគ្រប់គ្រាន់ទៅតាមច្បាប់រដ្ឋធម្មនុញ្ញ ច្បាប់ស្តីពីរបបសារព័ត៌មាន និងច្បាប់អន្តរជាតិផ្សេងៗទៀត នៅក្នុងការយកព័ត៌មាននៅគ្រប់ទីកន្លែងសាធារណៈ និងយកព័ត៌មានអំពីការតវ៉ារបស់ប្រជាពលរដ្ឋមានជម្លោះដីធ្លី។ល។
លោក ណុប វី បានចាត់ទុកការរារាំងនិងការប្រើប្រាស់រូបភាពផ្សេងៗគឺជាការគំរាមកំហែងដល់ការអនុវត្តការងាររបស់អ្នកសារព័ត៌មានដែលសមត្ថកិច្ចគួរតែបញ្ឈប់ ។
លោក ណុប វី បន្ថែមថា៖ «អាជ្ញាធរគួរតែផ្តល់មធ្យោបាយ ផ្តល់ការការពារសន្តិសុខ និង សុវត្ថិភាពដល់អ្នកសារព័ត៌មានដើម្បីធានាថារដ្ឋបានចូលរួមនៅក្នុងការអនុវត្តតាមច្បាប់អន្តរជាតិនិងរដ្ឋធម្មនុញ្ញ»។
ទាក់ទងនឹងសំណុំរឿងអ្នកកាសែតខាងលើនេះដែរ លោក ប៉ែន បូណា ប្រធានក្លឹបអ្នកកាសែតកម្ពុជា (CCJ) មិនទាន់ឆ្លើយតបនៅឡើយ ដោយលោកសុំពេលសិក្សារឿងនេះសិន។
លោក ប៉ែន បូណា មានប្រសាសន៍ថា៖ «ខ្ញុំសុំសិក្សារឿងនេះបន្តិចសិនដើម្បីឱ្យយល់សាច់រឿងមុនឆ្លើយ អគុណ! ឥឡូវខ្ញុំកំពុងជាប់កម្មវិធី»។
ចំណែកលោក មាស សុភ័ណ្ឌ អ្នកនាំពាក្យក្រសួងព័ត៌មានបានមានប្រសាសន៍តាមតេឡេក្រាមថា សិទ្ធិសេរីភាពសារព័ត៌មានត្រូវបានធានាដូចមានចែងក្នុងច្បាប់របបសារព័ត៌មាន។ អ្នកសារព័ត៌មានមានសិទ្ធិសេរីភាពក្នុងការផ្សព្វផ្សាយព័ត៌មានពិតពីគ្រប់ប្រភពដែលពាក់ព័ន្ធ ប៉ុន្តែអ្នកសារព័ត៌មានត្រូវផ្សាយដំណឹងទាំងឡាយដោយសុចរិតព្រមទាំងធ្វើអត្ថាធិប្បាយឬរិះគន់ឱ្យបានត្រឹមត្រូវនិងសមស្របតាមគតិយុត្តិធ៌មព្រមទាំងត្រូវចៀសវាងការ ផ្សព្វផ្សាយដែលញុះញង់ឱ្យមានការប្រកាន់ពូជសាសន៍ពណ៌សម្បុរ ភេទ ភាសា ជំនឿ សាសនា មតិឬនិន្នាការនយោបាយ ដើមកំណើតជាតិ ឋានៈសង្គម ធនធាន ឬស្ថានភាពដទៃ។
លោក សុភ័ណ្ឌ បន្ថែមថា៖ «បុគ្គលណាម្នាក់ដែលយល់ថាអត្ថបទណាមួយនៃសារព័ត៌មានដែលផ្សាយមានលក្ខណៈខុសពីការពិតធ្វើឱ្យខូចខាតដល់កិត្តិយសនិងសេចក្តីថ្លៃថ្នូររបស់ខ្លួន មានសិទ្ធិទាមទារឱ្យសារព័ត៌មានព័ត៌មាននោះធ្វើការកែតម្រូវ ឬមានសិទ្ធិឆ្លើយតប និងធ្វើបណ្តឹងទៅអាជ្ញាធរមានសមត្ថកិច្ច(តុលាការ) ចំពោះការប៉ះពាល់កិត្តិយសនិងសេចក្ដីថ្លៃថ្នូររបស់ខ្លួនបាន»។
ទោះបីយ៉ាងណាអ្នកនាំពាក្យរូបនេះបានបញ្ជាក់ថា ដើម្បីចៀសផុតពីការចោទប្រកាន់ផ្សេងៗ អ្នកសារព័ត៌មាន ត្រូវគោរពច្បាប់ និងលិខិតបទដ្ឋានគតិយុត្តិ ដែលមានជាធរមាន ព្រមទាំងគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈសារព័ត៌មាន។
លោក សុភ័ណ្ឌ បញ្ជាក់ថា៖ « អ្នកសារព័ត៌មានគួរផ្សាយតែព័ត៌មានទាំងឡាយណាដែលជាការពិតនិងមានប្រភពច្បាស់លាស់គ្រប់ជ្រុងជ្រោយ» ។ លោក សុភ័ណ្ឌ បានឱ្យដឹងថា គិតត្រឹមខែសីហា ឆ្នាំ២០២២ អង្គភាពសារព័ត៌មានជាតិនិងបរទេសដែលបានចុះបញ្ជីនៅក្រសួងព័ត៌មាន មានចំនួន ២ ១៥៤អង្គភាព ដែលក្នុងនោះអង្គភាពសារព័ត៌មានដែលផ្សាយតាមគេហទំព័រ និងទូរទស្សន៍អនឡាយមានចំនួន៨៥១អង្គភាព។ ក្នុងរយៈពេល ៨ខែក្នុងឆ្នាំ២០២២នេះ មានតែអង្គភាពសារព័ត៌មានមួយប៉ុណ្ណោះ ដែលក្រសួងបានចេញសេចក្តីសម្រេចដកអាជ្ញាបណ្ណ។ លោកបន្ថែមថា បច្ចុប្បន្ននេះមានសំណុំរឿងអ្នកកាសែតពីរករណីដែលកំពុងស្ថិតនៅក្នុងនីតិវិធីរបស់តុលាការដែលក្រសួងព័ត៌មានបានផ្តល់ជំនួយផ្នែកច្បាប់តាមការស្នើសុំ៕