សាកសពនិស្សិតកម្ពុជា ឈ្មោះ ចាន់ ឧត្ដម ដែលបានបាត់បង់ជីវិតក្នុងអំឡុងជម្លោះប្រដាប់អាវុធរវាងកងទ័ពអ៊ីស្រាអែល និងក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ បានបញ្ជូនមកដល់ប្រទេសកម្ពុជាហើយ កាលពីយប់ថ្ងៃចន្ទកន្លងទៅនេះ ។ នេះបើយោងតាមអ្នកនាំពាក្យសាលាខេត្តកណ្ដាល លោក នូវប៉េង ច័ន្ទតារា ។
ថ្លែងប្រាប់អ្នកសារព័ត៌មាន ខេមបូចា លោក ច័ន្ទតារា បានឲ្យដឹងថា សាកសពរបស់ ឧត្ដម ត្រូវបានបញ្ជូនទៅកាន់ស្រុកកំណើតរបស់លោក នៅស្រុកកោះធំ ដើម្បីឱ្យក្រុមគ្រួសាររៀបចំពិធីបុណ្យសព ។
បងប្រុសរបស់ ឧត្ដម លោក ចាន់ សីម៉ា មិនអាចធ្វើអត្ថាធិប្បាយ ដោយនិយាយថា លោករវល់ ។
ការបញ្ជូនសាកសពត្រូវបានពន្យារពេលដោយសារតែត្រូវឆ្លងកាត់ការត្រួតពិនិត្យនិងកំណត់អត្តសញ្ញាណនៅក្នុងប្រទេសអ៊ីស្រាអែល ។ នេះបើតាមប្រសាសន៍របស់លោកនាយករដ្ឋមន្ត្រី ហ៊ុន ម៉ាណែត ដែលថ្លែងនៅក្នុងពិធីជួបជុំជាមួយកម្មករកម្មការិនីនៅខេត្តកំពង់ចាម ។
ជម្លោះរវាងក្រុមហាម៉ាសនិងប្រទេសអ៊ីស្រាអែលបានផ្ទុះឡើងនៅថ្ងៃទី៧ ខែតុលា ដែលចំថ្ងៃបុណ្យសាសនា Simchat Torah ដែលជាទិវាកត់សម្គាល់ការបញ្ចប់ការអានប្រចាំឆ្នាំនូវគម្ពីរ Torah ។ មនុស្សជាង ៥០០០នាក់បានបាត់បង់ជីវិតចាប់តាំងពីការចាប់ផ្ដើមនៃការប្រយុទ្ធគ្នានេះមក ។
នៅក្នុងពិធីជួបជុំជាមួយកម្មកររោងចក្រ លោក ហ៊ុន ម៉ាណែត បានធានាអះអាងថា រដ្ឋាភិបាលបាននឹងកំពុងធ្វើការយ៉ាងជិតស្និទ្ធជាមួយអាជ្ញាធរអ៊ីស្រាអែល និងនិស្សិតកម្ពុជាដែលនៅទីនោះ ដើម្បីធានាសុវត្ថិភាពរបស់ពួកគេ ចាប់តាំងពីការចាប់ផ្ដើមនៃជម្លោះនេះមក ។
លោក ហ៊ុន ម៉ាណែត ថ្លែងយ៉ាងដូច្នេះថា៖ «[យើងកំពុង]ធ្វើយ៉ាងណាធានាថា ជីវិតរបស់ប្រជាជនយើងត្រូវបានយកចិត្តទុកដាក់ ។ យើងបាន[ពិនិត្យតាមដានស្ថានភាព]របស់និស្សិតយើងនៅអ៊ីស្រាអែលក្នុងពេលប៉ុន្មានសប្ដាហ៍ចុងក្រោយនេះ ។ យើងនឹងមិនបោះបង់ពួកគេចោលទេ រហូតទាល់តែ[ការប្រយុទ្ធគ្នា]នៅទីនោះបញ្ចប់» ។
ក្នុងអំឡុងសប្ដាហ៍ទីមួយនៃជម្លោះ និស្សិតខ្មែរជាច្រើននាក់នៅក្នុងប្រទេសអ៊ីស្រាអែល បានស្នើសុំឱ្យរដ្ឋាភិបាលកម្ពុជានាំយកពួកគេមកផ្ទះវិញ បន្ទាប់ពីការស្លាប់របស់ ឧត្ដម ដោយសារពួកគេព្រួយបារម្ភពីសុវត្ថិភាព និងថា នៅទីនោះពុំមានទឹកនិងអាហារគ្រប់គ្រាន់ទេ ។
នៅក្នុងប្រទេសអ៊ីស្រាអែល មានប្រជាជនខ្មែរ ៤៥៣នាក់ ក្នុងនោះ ៣២៣នាក់ត្រូវបានជម្លៀសទៅកាន់ទីកន្លែងមានសុវត្ថិភាព ចំណែកឯ ១៣០នាក់ទៀតកំពុងស្ថិតក្នុងហានិភ័យនៅឡើយ ។
លោក ហ៊ុន ម៉ាណែត បានថ្លែងថា៖ «មានការខ្វះទឹកប្រើប្រាស់នៅកន្លែងខ្លះ ដោយសារតែការលំបាក ប៉ុន្តែ យើងអាចចាត់ចែងជួយពួកគេបានហើយ ។ ការផ្គត់ផ្គង់ស្បៀងអាហារក៏មានភាពយឺតយ៉ាវដែរ ។ ប៉ុន្តែ យើងបានណែនាំស្ថានកុងស៊ុលឱ្យទិញស្បៀងអាហារយកទៅឱ្យពួកគេ[និស្សិត]ហើយ» ។
ទោះបីជាស្ថានភាពនៅក្នុងប្រទេសអ៊ីស្រាអែលបច្ចុប្បន្នមានភាពល្អប្រសើរជាងកាលពីពីរសប្ដាហ៍មុនក្ដី តែបញ្ហានៅតែពុំមានភាពច្បាស់លាស់នៅឡើយ ។ ដូច្នេះ រដ្ឋាភិបាលបានដាក់ចេញនូវផែនការមួយចំនួន ។
លោកនាយករដ្ឋមន្ត្រីបានបន្តថា៖ «ក្នុងពេលមួយសប្ដាហ៍ យើងបានរៀបចំផែនការបម្រុងសុវត្ថិភាព ។ យើងបាន[បង្កើត]កន្លែងសុវត្ថិភាពមួយនៅក្រោមការគ្រប់គ្រងរបស់អ៊ីស្រាអែល និងមួយទៀត នៅចម្ងាយ ៣០០គីឡូម៉ែត្រឆ្ងាយពីតំបន់ក្រហម» ។ លោកបានបន្ថែមថា៖ «នេះជាផែនការមួយដើម្បីសង្គ្រោះពួកគេចេញពីគ្រោះថ្នាក់ ប៉ុន្តែ ប្រសិនបើស្ថានភាពនៅក្នុងប្រទេសអ៊ីស្រាអែលទាំងមូលធ្លាក់ក្នុងភាពធ្ងន់ធ្ងរ យើងមានផែនការ[ផ្សេងទៀត] ដើម្បីផ្ដល់សន្តិសុខបន្ថែមទៅដល់ប្រជាជនរបស់យើង» ។
លោកបានបន្ថែមថា ប្រសិនបើនិស្សិតចាំបាច់ត្រូវតែជម្លៀសចេញទៅកាន់ទីកន្លែងសុវត្ថិភាពនៅក្នុងប្រទេសអ៊ីស្រាអែល រដ្ឋាភិបាលត្រៀមខ្លួនរួចជាស្រេចដើម្បីជួយដល់ពួកគេ ។ ប៉ុន្តែ មនុស្សជាច្រើនបានស្ម័គ្រចិត្តមិនចាកចេញទេ ក្រោមហេតុផលផ្សេងៗ និងចង់បន្តធ្វើការតទៅទៀត ពីព្រោះពួកគេជឿជាក់ថាវាមានសុវត្ថិភាព និងថាសុវត្ថិភាពរបស់ពួកគេត្រូវបាន«ធានា»ដោយម្ចាស់កសិដ្ឋាន ។
អំឡុងពេលនៃការសរសេរសេចក្ដីរាយការណ៍នេះ អ្នកសារព័ត៌មាន ខេមបូចា ពុំទាន់អាចទាក់ទងទៅកាន់និស្សិតខ្មែរដែលរស់នៅក្នុងប្រទេសអ៊ីស្រាអែល ដើម្បីសុំការផ្ដល់ព័ត៌មានបច្ចុប្បន្នភាពពីស្ថានភាពនៅអ៊ីស្រាអែល នៅឡើយទេ ៕
ប្រែសម្រួលពីអត្ថបទភាសាអង់គ្លេស៖ Body of Cambodian Student, Perished in Hamas-Israel Conflict, Arrives Home