សមាគមសម្ព័ន្ធអ្នកសារព័ត៌មានកម្ពុជា

សកម្មជនបឹងតាមោករត់គេចខ្លួនទៅប្រទេសថៃ ដើម្បីស្វែងរកសិទ្ធិជាជនភៀសខ្លួន

អ្នកស្រី ប្រាក់ សុភា ចង្អុលប្រាប់ទីតាំងគេចាក់ដីទៅក្នុងបឹងនៅខាងក្រោយផ្ទះអ្នកស្រីកាលពីថ្ងៃទី២៥ ខែកុម្ភៈ ឆ្នាំ២០២៣។(ខេមបូចា/ ផុន សុទ្ធីរ័ត្ន)
អ្នកស្រី ប្រាក់ សុភា ចង្អុលប្រាប់ទីតាំងគេចាក់ដីទៅក្នុងបឹងនៅខាងក្រោយផ្ទះអ្នកស្រីកាលពីថ្ងៃទី២៥ ខែកុម្ភៈ ឆ្នាំ២០២៣។(ខេមបូចា/ ផុន សុទ្ធីរ័ត្ន)

ដោយ​បារម្ភ​ពី​ការ​ចាប់​ខ្លួន អ្នកស្រី ប្រាក់ សុភា ដែល​ជា​សកម្មជន​សិទ្ធិ​ដីធ្លី​ដ៏​លេច​ធ្លោ​ម្នាក់​ ប្រាប់ ​ខេមបូចា ​ថា អ្នក​ស្រី​បាន​គេច​ខ្លួន​ទៅ​កាន់​ប្រទេស​ថៃ​ដើម្បី​ស្វែង​រក​សិទ្ធិ​ជនភៀស​ខ្លួន​កាល​ពី​សប្ដាហ៍​កន្លង​ទៅ​។

អ្នកស្រី សុភា ​ជា​អ្នក​រស់​នៅ​ក្នុង​សហគមន៍​បឹង​តាមោក និង​ជាបុគ្គល​លេច​ធ្លោ​ក្នុង​ការ​តវ៉ា​រឿង​ការ​ជម្លៀស​ប្រជាពល​រដ្ឋ​ចេញពីសហគមន៍​ កំពុង​ប្រឈម​នឹង​បណ្ដឹង​នៅ​តុលាការ​ចំនួន​បី​គិត​តាំង​ពី​ឆ្នាំ​មុន​មក ហើយអ្នក​ស្រីបាន​ចាក​ចេញ​ពីប្រទេស​កម្ពុជា​បន្ទាប់​ពី​អ្នកស្រី​ឮ​ដំណឹង​ថា​អាច​នឹង​មាន​បណ្ដឹង​ផ្សេង​ទៀត​ប្ដឹង​ប្រឆាំង​នឹង​អ្នក​ស្រី​។​

អ្នកស្រី សុភា មានប្រសាសន៍ថា៖ «ខ្ញុំ​បាន​សុំជំនួយពី​អង្គការ​សហប្រជាជាតិ​ដើម្បី​អន្តរាគមន៍ និង​ជួយ​ខ្ញុំ​​រស់​នៅ​ទី​នេះក្រោមការការពារ និង​សុំ​ឲ្យពួកគាត់​ជួយ​សហគមន៍[បឹងតាមោក]​របស់​យើង»។​

​អ្នក​ស្រី​ពន្យល់​ថា អ្នកស្រី​បាន​ផ្ញើ​លិខិត​ទៅ​កាន់​ឧត្តមស្នងការ​អង្គការ​សហប្រជាជាតិ​សម្រាប់​ជន​ភៀស​ខ្លួន (UNHCR)​ ដើម្បី​សុំ​សិទ្ធិជាជន​ភៀស​ខ្លួន​។​

អ្នកនាំពាក្យភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប្រចាំប្រទេសថៃ Morgan Roussel-Hemery បាន​បដិសេធអត្ថាធិប្បាយលើ​ករណី​របស់​អ្នកស្រី ប្រាក់ សុភា។

អ្នកនាំពាក្យ​រូប​នេះ​ប្រាប់ ​ខេមបូចា ​តាម​រយៈអ៊ីម៉ែល​ថា៖ «ក្រោម​ហេតុ​ផល​ការការពារ និង​ការ​រក្សា​ភាពសម្ងាត់ UNHCR មិន​អាច​ផ្ដល់ការ​អត្ថាធិប្បាយ​លម្អិត ឬសូម្បីតែ​បញ្ជាក់​ពីវត្តមាន​របស់​​ករណី​បុគ្គលណាមួយ»។​ 

មុន​ពេល​គេច​ខ្លួន​ពី​ផ្ទះ អ្នកស្រី សុភា បាន​និយាយ​ថា ​អ្នកស្រីត្រូវ​ជន​ស្លៀក​ពាក់​ស៊ីវិល​ជា​ច្រើន​នាក់​តាម​ឃ្លាំ​មើល និង​បាន​ជិះ​ម៉ូតូកាត់​មុខ​ផ្ទះ​អ្នកស្រី​ទៅ​មក​ជា​ច្រើន​ដង ខណៈ​ក្នុង​ពេល​ជាមួយ​​គ្នា​នោះ​ដែរ អ្នកស្រី​ក៏​បាន​ទទួល​ដំណឹង​ថា​មាន​បុគ្គល​ស្និទ្ធ​នឹង​អាជ្ញាធរ​ខណ្ឌ​ព្រែកព្នៅ គ្រោង​ដាក់​ពាក្យ​បណ្ដឹង​លើ​អ្នកស្រី​ផង​ដែរ​។​

នាយរងប៉ុស្ដិ៍​នគរបាល​សង្កាត់​សំរោង លោក ស៊ឹម វាសនា បាន​បដិសេធថាគ្មាន​ការ​តាម​ឃ្លាំ​មើល​អ្នកស្រី សុភា នោះទេ ហើយ​ថា​អាជ្ញាធរ​តែង​តែ​ធើ្វ​ការ​ល្បាត​ក្នុង​ភូមិ​អ្នកស្រី​ជា​ធម្មតា ដើម្បី​បង្ការ​បទល្មើស​ផ្សេងៗ​។​

លោក​មាន​ប្រសាសន៍ថា៖ «យើង​មាន​កងកម្លាំង​ដើរ​ល្បាត​តាម​គោលដៅ​ជាធម្មតា​ដើម្បីបង្ការ​បទល្មើស​ផ្សេងៗ ពួកគាត់​ធ្វើ​ដំណើរ​ទៅ​វិញ​ទៅ​មក​តាម​ផ្លូវ​លេខ​១៥១ [កន្លែងអ្នកស្រី​ សុភា រស់នៅ​]»។ លោក​បន្តថា៖ ​«យើង​ដើរ​ល្បាតជាទូទៅ យើង​មិន​មាន​ការ​ងារតាម​ឃ្លាំ​មើល​គាត់ទេ យើង​ទៅ​មើល​ប្រជាពល​រដ្ឋ​ទាំងអស់​គ្នា»។​

អភិបាល​ខណ្ឌព្រែក​ព្នៅ លោក ធឹម សំអាន​ ដែល​បឹង​តាមោក​ស្ថិត​ក្នុងដែនសមត្ថកិច្ច​របស់​លោកដែរនោះ បាន​បដិសេធអត្ថាធិប្បាយ​លើ​រឿង​នេះ។ ចៅសង្កាត់​សំរោង លោក យ៉ុន អ៊ីម និង​មេភូមិ​សំរោងត្បូង លោក អ៊ុន អន មិន​អាច​ទាក់​ទង​សុំ​ការអត្ថាធិប្បាយ​បាន​ទេ​។​

ប្រជា​ពល​រដ្ឋ​៧៥​គ្រួសារ​នៅ​ក្នុង​ភូមិ​សំរោង​ត្បូង កំពុង​មា​នភាព​មិន​ច្បាស់​លាស់​ចំពោះទី​តាំង​ដែល​ខ្លួន​រស់​នៅ​ សម្រាប់​ប៉ុន្មាន​ឆ្នាំ​ចុង​ក្រោយ​នេះ បន្ទាប់​ពី​បឹង​តាមោក​ត្រូវ​បាន​ផ្ដល់​ទៅ​ឲ្យ​អ្នកស្និទ្ធ​នឹង​បុគ្គល​មាន​អំណាច​។​ ប្រជា​ពល​រដ្ឋ​រាប់​សិប​គ្រួសារ​បាន​យល់ព្រម​ទទួល​សំណង​ពី​អាជ្ញាធរ​ក្នុង​ការ​ចាក​ចេញ​។  អ្នក​ភូមិ​នៅ​ទី​នោះ​រស់​នៅ​ដោយ​ពឹង​លើការនេសាទត្រី​ក្នុង​បឹង​ខាង​ក្រោយ​ផ្ទះ​របស់​ខ្លួន ថ្វី​បើ​ផ្ទៃ​បឹង​ភាគ​ច្រើន​ត្រូវ​បាន​ចាក់​ដី​បំពេញ​សម្រាប់​អភិវឌ្ឍន៍​ទៅ​ហើយ​ក្ដី​។​ សមាជិក​សហគមន៍ ដូច​ជា​អ្នកស្រី សុភា បាន​ប៉ះទង្គិច​គ្នា​ជាច្រើន​ដង​ជាមួយ​អាជ្ញាធរ ព្រោះ​អ្នក​ភូមិ​ចង់​បន្ត​រស់​នៅ និង​នេសាទ​ក្នុង​តំបន់​នោះ​ដដែល​។​ 

គិត​តាំងពី​ឆ្នាំ​២០២២​មក មាន​អ្នក​រស់​នៅ​បឹង​តាមោក​យ៉ាង​តិច​ ១០​នាក់​ត្រូវ​បាន​ចោទ​ប្រកាន់ ដែល​​សំណុំ​រឿង​កំពុង​ស្ថិត​ក្នុង​ដៃតុលាការ​នៅឡើយ​។​​

អ្នកស្រី សុភា បានអំពាវ​នាវ​ពីប្រទេស​ថៃ​ដល់នាយក​រដ្ឋមន្ត្រី​ជិត​ចូល​កាន់​អំណាច លោក ហ៊ុន ម៉ាណែត ឲ្យ​ជួយ​ដោះ​ស្រាយ​បញ្ហា​សហគមន៍​បឹង​តាមោក​ដោយ​យុត្តិធម៌​។​

លោក​ស្រី​លើក​ឡើង​ថា៖ ​«ខ្ញុំ​ជំរុញ​ឲ្យ​នាយក​រដ្ឋមន្ត្រី​ថ្មី ពិចារណា​ទឹក​ភ្នែក​ប្រជាពល​រដ្ឋ ពិចារណា​លើ​ការអភិវឌ្ឍ សូម​ឲ្យ​មាន​សន្តិភាព​នៅក្នុង​ចិត្ត​ប្រជាពល​រដ្ឋ កុំ​ឲ្យ​មាន​តែឈ្មោះ»។​ 

យ៉ាងណា អ្នកស្រី ពន្យល់ថាអ្នកស្រី​អាច​នឹង​ត្រឡប់​មក​មាតុភូមិ​វិញ​បាន​ដរាប​ណា​រដ្ឋាភិបាល​សន្យាអនុវត្ត​ច្បាប់​ឲ្យ​មាន​ភាព​ស្មើ​គ្នា​រវាង​ប្រជាពល​រដ្ឋគ្រប់​រូប​​។​​

​អ្នកស្រី​បញ្ជាក់​ថា៖ «​ខ្ញុំ​នឹង​ត្រឡ​ប់​ទៅ​ស្រុក​កំណើត​វិញ​បាន ដរាប​ណា​ប្រ​ទេស​របស់​ខ្ញុំ​មាន​លទ្ធិ​ប្រជា​ធិបតេយ្យ​ពិតប្រាកដ ដរាបណា​ប្រទេស​របស់ខ្ញុំ​កែ​ប្រែ​ច្បាប់​ឲ្យ​មាន​ភាព​ស្មើ​គ្នា ដរាបណា​ប្រទេស​របស់​ខ្ញុំ​មាន​សន្តិភាព​ផ្លូវចិត្តពិត​ប្រាកដ»។ អ្នកស្រីបន្ថែម​ថា៖ «ប៉ុន្តែ​ខ្ញុំ​សុខចិត្ត​ស្លាប់​ [នៅ​ប្រទេសថៃ] ហើយ​ចោល​ឆ្អឹង​របស់​ខ្ញុំ​នៅ​ប្រទេស​នេះ»​

ប្រែសម្រួលពីអត្ថបទភាសាអង់គ្លេស៖ Boeng Tamok Activist Flees to Thailand, Seeking Refugee Status

483 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម