អាជីវកម្មបើកដំណើរការឡើងវិញ បន្ទាប់ពីតំបន់លឿងនៅភ្នំពេញបញ្ចប់ការបិទខ្ទប់

អ្នកលក់ដូរបានបើកហាងរបស់ខ្លួនឡើងវិញបន្ទាប់ពីរដ្ឋាភិបាលបានបញ្ចប់ការបិទខ្ទប់នៅទីតាំងមួយចំនួនក្នុងរាជធានីភ្នំពេញ និងក្រុងតាខ្មៅ ថ្ងៃទី៦ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ
អ្នកលក់ដូរបានបើកហាងរបស់ខ្លួនឡើងវិញបន្ទាប់ពីរដ្ឋាភិបាលបានបញ្ចប់ការបិទខ្ទប់នៅទីតាំងមួយចំនួនក្នុងរាជធានីភ្នំពេញ និងក្រុងតាខ្មៅ ថ្ងៃទី៦ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

អ្នក​រស់​នៅ​ក្នុង​រាជធានី​ភ្នំពេញ​បានចាប់​ផ្ដើម​បើក​ដំណើរ​ការ​អាជីវកម្ម​របស់​ខ្លួន​វិញ​ហើយ​បន្ទាប់​ពី​អាជ្ញាធរ​រាជធានី​បាន​ប្រកាស​ដក​ចេញ​វិធានការ​បិទខ្ទប់​​សម្រាប់​អ្នក​រស់​នៅ​ក្នុង​តំបន់​លឿង​​។ ចំណែក​តំបន់​តូចៗ​ដែល​មាន​អត្រា​ឆ្លង​កូវីដ១៩ ខ្ពស់​នៅ​បន្ត​រឹត​បន្តឹង​លើ​ការ​ធ្វើ​ដំណើរ ជាមួយ​គ្នា​នេះ​ដែរ អ្នក​សិក្សា​ពីបញ្ហា​សង្គម​ព្រមាន​ថា​អាច​នឹង​មាន​ការ​ផ្ទុះ​ការឆ្លង​រាលដាល​ជា​ថ្មី​នៅពេលណា​មួយ ប្រសិនបើ​សាធារណ​ជន​មិន​អនុវត្តតាម​វិធានការ​សុខាភិបាល។​

លោក ផន ដា វ័យ​២២​ឆ្នាំ ជា​ម្ចាស់​ហាង​​តុប​តែង បាន​បើក​ដំណើរ​ការ​ហាង​របស់​ខ្លួន​ឡើង​វិញ​ហើយ​នៅ​ថ្ងៃនេះ បន្ទាប់ពី​បាន​បិទ​អស់​រយៈពេល​២១​ថ្ងៃ​។​

លោក​ និយាយថា៖ «​ខ្ញុំ​ទើប​តែ​បើក​ហាង​នៅ​ព្រឹក​នេះ ហើយ​ខ្ញុំ​សប្បាយ​ចិត្ត​ណាស់​ដែល​គេ​អនុញ្ញាត​ឲ្យ​ខ្ញុំ​បើក​ដំណើរ​ការ​អាជីវកម្ម​ដូច​ធម្មតា​វិញ»។​ 

លោក ផន ដា ដែល​មាន​អាជីវកម្ម​នៅ​ក្នុង​សង្កាត់​ដង្កោ ខណ្ឌដង្កោ និយាយ​ទៀត​ថា​ការ​បិទ​ខ្ទប់​នេះ​បាន​ដាក់​បន្ទុក​យ៉ាងធ្ងន់​ដល់​ជីវភាព​របស់​លោក​។​

លោក​បន្ថែមថា៖ «​ខ្ញុំ​មិន​មាន​ប្រាក់ចំណូល​ទេអំឡុងពេល​បិទខ្ទប់ ហើយ​ខ្ញុំ​ត្រូវ​ចំណាយ​លើ​ថ្លៃជួល​កន្លែង ក៏​ដូច​ជា​ប្រាក់​ខែ​បុគ្គលិក​របស់​ខ្ញុំ​ផង»។ លោក​ថា ថ្លៃជួល​ហាង​របស់​លោក​ថ្លៃ​៤០០​ដុល្លារ​ក្នុង​មួយ​ខែ ក៏​ដូច​ជា​៣ ០០០​ដុល្លារ​ផ្សេង​ទៀត​សម្រាប់​ប្រាក់ខែ​បុគ្គលិក​ចំនួន​១០​នាក់ និង​ប្រាក់​សង​ធនាគារ​ផង​។​

ទន្ទឹម​នឹង​លោកស្វាគមន៍​ចំពោះ​ការ​សម្រេច​របស់​រដ្ឋាភិបាល លោក​ក៏​កំពុង​បារម្ភ​ដែរ​ថា​នឹង​ត្រូវ​ជួបបញ្ហានេះ​ម្ដង​ទៀត បើមាន​ការ​ផ្ទុះការ​ឆ្លង​​​រាល​ដាល​ជា​ថ្មី​។​

លោក​ថា៖ «​បើសិនជា​គេ​បិទ​ខ្ទប់​យើង​ម្ដង​ទៀត អាជីវកម្ម​របស់​ខ្ញុំ​នឹង​រលំមិន​ខាន»។​

មិន​មែន​អាជីវកម្មទាំងអស់​សុទ្ធ​តែអាច​បើក​ដំណើរ​ការ​ឡើង​វិញ​បានទេ។ សម្រាប់​អ្នក​​រស់​នៅ​ក្នុង​តំបន់​ក្រហម និងលឿង​ទុំ ក្នុង​ផ្នែកខ្លះនៃសង្កាត់​ចំនួន​១១​ ក្នុង​ខណ្ឌ៧មករា ខណ្ឌទួលគោក ខណ្ឌមានជ័យ ខណ្ឌពោធិ៍​សែន​ជ័យ ខណ្ឌឬស្សីកែវ និង​ខណ្ឌច្បារអំពៅ នឹង​ត្រូវ​បន្ត​ស្ថិត​ក្នុង​វិធានការ​បិទខ្ទប់​​ដដែល​។ ​

លោក ទូច រ៉ុង វ័យ​៤២ឆ្នាំ ជាអ្នក​ល់គ្រឿង​ទេស ស្វាគមន៍​ចំពោះ​ការ​សម្រេច​របស់​រាជរដ្ឋាភិបាល​។

លោក​ឲ្យ​ដឹង​ថា៖ «​ខ្ញុំ​មិន​សូវ​រង​ផល​ប៉ះពាល់​ធ្ងន់​ធ្ងរ​អ្វី​ទេ ព្រោះ​ហាង​នៅ​បន្ត​ដំណើរ​ការ ខ្ញុំ​ក៏​សប្បាយ​ចិត្ត​ដែល​អាជ្ញាធរ​បាន​អនុញ្ញាត​ឲ្យ​ប្រ​ជា​ពល​រដ្ឋ​ធ្វើ​ដំណើរ​[ក្នុង​តំបន់​លឿង] ហើយ​ខ្ញុំ​អាច​​ដឹក​ទំនិញ និង​បន្លែ​បាន​ងាយ​ស្រួល​»។​

លោកបន្ថែមថា៖ «​ខ្ញុំ​មិន​អាច​និយាយ​ថាយ៉ាងម៉េចទេ រឿង​កូវីដ១៩ នឹង​ផ្ទុះ​ឡើង​ជា​ថ្មី​ឬ​យ៉ាងណា ព្រោះខ្ញុំ​ឃើញ​ចំនួន​អ្នក​ឆ្លង​នៅ​តែ​បន្ត​កើន​ឡើង ហើយ​ខ្ញុំ​ក៏​នៅ​តែ​បារម្ភពី​ការ​ឆ្លង​ដែរ»។​

ស្ថានភាពចរាចរណ៍កកកុញនៅលើផ្លូវព្រះនរោត្តមក្នុងទីក្រុងភ្នំពេញនៅថ្ងៃទី៦ ខែឧសភា បន្ទាប់ពីអាជ្ញាធរអនុញ្ញាតឲ្យមានការធ្វើដំណើរឡើងវិញនៅក្នុងតំបន់លឿង។ ខេមបូចា/ បញ្ញា ឆព័ណ្ណ
ស្ថានភាពចរាចរណ៍កកកុញនៅលើផ្លូវព្រះនរោត្តមក្នុងទីក្រុងភ្នំពេញនៅថ្ងៃទី៦ ខែឧសភា បន្ទាប់ពីអាជ្ញាធរអនុញ្ញាតឲ្យមានការធ្វើដំណើរឡើងវិញនៅក្នុងតំបន់លឿង។ ខេមបូចា/ បញ្ញា ឆព័ណ្ណ

ថ្លែង​ក្នុង​សន្និសីទ​សារព័ត៌មាន​នៅព្រឹក​ថ្ងៃព្រហស្បតិ៍ អភិបាល​រង​រាជធានី​ភ្នំពេញ​លោក កើត ឆែ បាន​អំពាវ​នាវ​ឲ្យ​ប្រ​ជា​ពល​រដ្ឋ​រស់​នៅ​ក្នុង​តំបន់​ក្រហម និង​តំបន់​លឿង​ទុំ​មាន​ការ​អត់ធ្មត់​។​

លោក​មាន​ប្រសាសន៍​ថា៖ «​នៅ​ក្នុង​តំបន់​លឿង ប្រ​ជា​ពល​រដ្ឋ​អាច​ធ្វើ​ដំណើរ​បាន​ច្រើន​ជាង​មុន ប៉ុន្តែ​មិន​មែន​មាន​ន័យ​ថា​ ពួក​គាត់​អា​ចទៅ​មក​ដូច​ធម្មតា​មុន​ព្រឹត្តិការណ៍​២០ កុម្ភៈ នោះទេ ពួកគាត់​ត្រូវ​តែ​គោរព​វិធានការ​រឹត​បន្តឹង​មួយ​ចំនួន​»។ លោក​ថ្លែង​ដោយ​សំដៅ​ដល់​ការចាប់ផ្តើម​នៃ​ព្រឹត្តិការណ៍​នាំឲ្យ​ផ្ទុះ​ការ​ឆ្លង​កូវីដ១៩ ចុងក្រោយ​នេះ។​

លោក​បន្តថា ប្រ​ជា​ពល​រដ្ឋ​អាច​​ធ្វើ​ដំណើរ​ចូល​រាជធានី​ភ្នំពេញ​ដោយ​មិន​ចាំ​បាច់​ត្រូវ​ធ្វើ​ចត្តាឡីស័ក​១៤​ថ្ងៃ សម្រាប់​អ្នក​​ដែល​មិន​មក​ពី​តំបន់​ប្រឈម​ឆ្លងកូវីដ១៩​ ខ្លាំង​។​

 លោក​បញ្ជាក់ថា៖ «​ប្រ​ជា​ព​ល​រដ្ឋ​អាច​ធ្វើ​ដំណើរ​ចូល​ក្នុង​ក្រុង​បាន​ ពីព្រោះ​យើង​បាន​បញ្ឈប់​ការ​ហាម​ឃាត់​ហើយ ប៉ុន្តែ​ត្រូវ​តែ​អនុវត្ត​តាម​ការណែ​នាំ​របស់​អាជ្ញាធរ​រាជធានី​ភ្នំពេញ»។​

លោក​ឲ្យ​ដឹង​ទៀតថា៖ «វា​មាន​ន័យថា បើ​សិន​ជា​យើង​ដឹង​ថា​អ្នក​មក​ពី​តំបន់​ក្រហម យើង​នឹង​ទៅ​យក​សំណាក[ធ្វើ​តេស្ត​] ហើយ​អ្នក​នឹង​ត្រូវ​ធ្វើ​ចត្តាឡីស័ក…​ប៉ុន្តែ​បើ​សិនជា​អ្នក​មកពី​តំបន់​មាន​សុវត្ថិ​ភាព យើង​មិន​យក​សំណាក​អ្នក​ទេ ហើយ​អ្នក​ក៏​មិន​ចាំ​បាច់​ធ្វើ​ចត្តាឡីស័ក​ដែរ»។​

លោក​ថា ប្រ​ជា​ពល​រដ្ឋ​ក្រុង​ភ្នំពេញ ​រស់​នៅ​តំបន់​លឿង​អាចធ្វើ​ដំណើរ​ទៅ​តាម​បណ្ដា​ខេត្ត​បាន ប៉ុន្តែ​អ្នក​ទាំង​នោះ​ត្រូវ​តែ​អនុវត្ត​តាម​ការ​ណែនាំរបស់​អាជ្ញាធរ​មូល​ដ្ឋាន​។

លោក ហុង វណ្ណៈ អ្នក​ស្រាវ​ជ្រាវ​ផ្នែកអាជីវកម្ម​នៅ​រាជបណ្ឌិត្យ​សភាកម្ពុជា មាន​ប្រ​សាស​ន៍​ថា ការ​ដក​ចេញ​​វិធានការ​បិទខ្ទប់​នឹង​ជួយ​បង្កើន​ចំណូល​របស់​ប្រ​ជាពល​រដ្ឋ​។​​

លោក​បន្ថែម​ថា៖ «ខ្ញុំ​គិត​ថា​វា​នឹង​ជួយ ហើយ​នឹង​ស្ដារ​ជីវភាព​ប្រ​ជា​ពល​រដ្ឋ​រស់​នៅ​តំបន់​លឿង​ឡើង​វិញ»។ លោក​បន្ត​ថា​រយៈពេល​២១​ថ្ងៃ​នៃ​ការ​បិទខ្ទប់ បាន​ប៉ះពាល់​ចំណូល​របស់​ប្រជា​ពល​រដ្ឋ និង​អាជីវកម្ម​មួយ​ចំនួន ប៉ុន្តែ​ថា​ជីវិត​គឺ​សំខាន់​ជាង​សេដ្ឋកិច្ច។​

យ៉ាងណា លោក វណ្ណៈ ព្រមាន​ពី​លទ្ធភាព​ដែល​អាច​កើន​ឡើង​ការ​ឆ្លង​កូវីដ១៩​ដែរ បន្ទាប់ពី​មាន​ការ​កដ​ចេញ​វិធានការ​បិទខ្ទប់នេះ ប្រសិនបើ​សាធារណ​ជន​មិន​អនុវត្តតាម​វិធានការ​របស់​ក្រ​សួង​សុខាភិបាល ដើម្បី​ទប់​ស្កាត់​ការ​ចម្លង​កូវីដ១៩​។​

អ្នកលក់​បន្លែ​នៅ​តាម​ផ្លូវ​ក្បែរ​តំបន់​ក្រហម​ក្នុង​ខណ្ឌ​ទួលគោក ថ្ងៃទី​៦ ខែឧសភា ឆ្នាំ​២០២១។ ខេមបូចា/ ព្រីង សំរាំង

រដ្ឋាភិបាល​បាន​សម្រេច​បិទ​ខ្ទប់​​ទីក្រុង​ភ្នំពេញ និង​ក្រុង​តាខ្មៅចំនួន​១៤​ថ្ងៃ​ តាំងពីថ្ងៃទី​១៥ ខែមេសា និង​បាន​បន្ត​វិធានការនេះ​មួយ​សប្ដាហ៍​បន្ថែម​ទៀត រហូត​ដល់​ថ្ងៃទី​៥ ខែឧសភា ព្រោះ​តែ​អត្រាឆ្លង​នៅ​មាន​ចំនួន​ខ្ពស់​។ ទោះ​បីជា​ពេល​នេះ ប្រ​ជា​ពល​រដ្ឋ​អាច​ធ្វើ​ដំណើរ​ពី​តាម​ខេត្ត​ចូល​រាជធានី​ភ្នំពេញ​មែន តែ​អ្នក​ទាំង​នោះ​មិន​អាច​ធ្វើ​ដំណើរ​ឆ្លង​កាត់​តំបន់​លឿងទុំ និង​ក្រហម​បានទេ​។ ចំណែក​បំរាមគោចរ ហាម​មនុស្ស​ចេញ​ពី​ផ្ទះ​ចាប់ពី​ម៉ោង​៨​យប់​ដល​ម៉ោង​៥ភ្លឺ នៅ​ជា​ធរមាន​នៅឡើយ​។​

កាល​ពី​ថ្ងៃ​ព្រហស្បតិ៍ លោកនាយក​រដ្ឋ​មន្ត្រី ហ៊ុន សែន បាន​បញ្ចេញ​សារជាសំឡេង​មួយ​នៅ​លើ​បណ្ដាញ​សង្គម​ហ្វេស​ប៊ុក​របស់​លោក ដោយបាន​បញ្ជា​ទៅ​កាន់​អភិបាល​ខេត្ត​ទាំង​អស់​ឲ្យ​លុប​ចោល​វិធានការ​តម្រូវ​ឲ្យ​អ្នក​ធ្វើ​ដំណើរ​ឆ្លង​កាត់​ត្រូវ​ធ្វើ​ចត្តាឡីស័ក។ ការ​ចេញ​បញ្ជានេះ ធ្វើ​ឡើង​បន្ទាប់ពី​មាន​ខេត្ត​មួយ​ចំនួន​បាន​ដាក់ចេញ​វិធានការ​តម្រូវ​ឲ្យ​អ្នក​ចូល​ក្នុង​ខេត្ត​ខ្លួន​ត្រូវ​ធ្វើ​ចត្តាឡីស័ក​១៤​ថ្ងៃ។​​​

លោក​មាន​ប្រសាសន៍​ថា​៖ «នេះ​មិន​ខុស​ពី​យើង​បង្កើត​រដ្ឋ​នៅ​ក្នុង​រដ្ឋ​នោះទេ…​វា​ដូច​ជា[យើង]ចែក​ប្រទេស​កម្ពុជា​ទៅ​ជា​២៥​ប្រទេស​» ដោយលោកបន្ថែមថា៖ «វា​នឹង​ធ្វើ​ឲ្យ​គាំង​ដំណើរ​ការ​ក្បាល​ម៉ាស៊ីន​នៃ ដំណើរ​ការ​សេដ្ឋកិច្ច​សង្គម​របស់​ប្រ​ជាពល​រដ្ឋ​តែម្ដង​… ដូច​នេះ​​ត្រូវ​តែ​កែប្រែនូវ​សេចក្ដី​សម្រេចនោះ​​ជា​បន្ទាន់​ ដើម្បី​សម្រួល​ដល់​ចរាចរណ៍​របស់​ប្រជា​ពល​រដ្ឋ…​កុំ​ឲ្យ​សេចក្ដី​សម្រេច​នោះ​ជ្រុល​ហួស​នាំទៅ​ដល់​ការ​រំខាន​ទៅ​ដល់ជីវភាព​របស់ប្រជា​ពល​រដ្ឋ​ទៅវិញ ដែល​វា​សម្លាប់សេដ្ឋកិច្ច​តែម្ដង»។

លោកនាយក​រដ្ឋ​មន្ត្រី​ បន្ថែម​ថា​អ្នក​ទាំង​ឡាយ​ណា​ដែល​សង្ស័យ​ថា​មាន​កូវីដ១៩ ត្រូវ​ប្រឈម​នឹង​ការ​ធ្វើ​ចត្តាឡីស័ក​។​

ក្នុង​សេចក្ដី​សម្រេច​បញ្ចប់​វិធានការ​បិទខ្ទប់ លោកនាយក​រដ្ឋ​មន្ត្រី បាន​ផ្ដល់អំណាច​ដល់​អាជ្ញាធរ​ខេត្ត​ដាក់​ចេញ​នូវ​វិធានការរបស់​ខ្លួន​ដើម្បី​គ្រប់​គ្រង​ការ​ឆ្លង​រាលដាល​វីរុស​កូវីដ១៩​។ ជា​ការ​ឆ្លើយ​តប ខេត្ត​ព្រៃវែង និង​ខេត្ត​ត្បូង​ឃ្មុំ បាន​កំណត់​ឲ្យ​ប្រ​ជា​ពល​រដ្ឋ​ឆ្លង​កាត់​ខេត្ត​របស់​ខ្លួន​ត្រូវ​ធ្វើ​ចត្តាឡីស័ក​១៤ថ្ងៃ ដែល​វិធានការ​ទាំងនេះ ត្រូវ​បាន​ដក​ចេញ​វិញ​ដែរ​ហើយ​នៅពេល​នេះ។​

អភិបាល​ខេត្ត​ត្បូង​ឃ្មុំ លោក ជាម ច័ន្ទសោភ័ណ មាន​ប្រសាសន៍​ថា​ខេត្ត​នឹង​អនុវត្តតាម​​បញ្ជា​របស់​លោក​នាយក​រដ្ឋ​មន្ត្រី​។ 

លោក​បន្ថែមថា៖ «តាម​ពិត​ ខ្ញុំ​គ្រាន់តែ​បង្ហោះនៅលើ​ status ហ្វេសប៊ុក ដើម្បីពញាក់អារម្មណ៍​របស់​ប្រជា​ពលរដ្ឋ ​កុំ​ឲ្យ​សម្រុក​មក​ខេត្ត​ច្រើន​ពេក ហើយ​យើង​មិន​បាន​ចេញ​សេច​ក្ដី​សម្រេចជា​​ផ្លូវការណាមួយ​[ពីការ​តម្រូវ​ឲ្យ​ធ្វើ​ចត្តាឡីស័ក​] នៅឡើយ​ទេ»។ លោក​បន្ត​ថា ប្រ​ជា​ពល​រដ្ឋ​ដែល​មាន​បំណង​ទៅ​កាន់​ខេត្ត​ត្បូង​ឃ្មុំ​ គឺអាច​មក​ដោយ​សេរី មិន​មានការ​ហាម​ឃាត់នោះទេ​។​

លោក​បញ្ជាក់ថា៖ «​ទោះបី​យ៉ាងណា យើង​នឹង​ធ្វើ​តេស្ត​រហ័ស​ក្នុង​ករណី​សង្ស័យ​ថា​ពួកគាត់​មាន​វីរុស…​យើង​ត្រូវ​តែ​រឹត​បន្តឹង​នៅ​ថ្នាក់​​មូល​ដ្ឋាន អាជ្ញាធរ​ភូមិ ឃុំ នឹង​ល្បាត​តាម​ភូមិ​នានា​ដើម្បី​រក​អ្នក​ចំណូល​ថ្មី ហើយ​យើង​នឹង​មាន​វិធានការ​សុខាភិបាល ដូច​ជា​វាស់​កម្ដៅ​ជា​ដើម»។ លោក​ថា នៅ​ក្នុង​ខេត្ត​ត្បូង​ឃ្មុំ​មាន​អ្នក​ឆ្លង​កូវីដ១៩ ចំនួន​៥១​ករណី​។​

នៅ​ថ្ងៃព្រហស្បតិ៍​នេះ​ ក្រ​សួង​សុខាភិបាល​បាន​ឲ្យ​ដឹង​ថា​អ្នក​ឆ្លង​កូវីដ១៩​ មាន​៦៥០​ករណី​បន្ថែម​ទៀត ទាក់​ទងនឹងព្រឹត្តិការណ៍​២០ កុម្ភៈ។ ជា​រួម​ចំនួន​ករណី​ឆ្លង​កើនឡើង​ដល់​១៧ ៦២១ករណី គិត​ពី​មានការ​ផ្ទុះ​រាល​ដាល​វីរុស​កូវីដ​១៩ ចាប់ពីដើម​ឆ្នាំ​២០២០។ តាំងពី​ពេល​នោះ​មក ចំនួន​អ្នក​ស្លាប់ មាន​ចំនួន​សរុប​១១៤​នាក់​។

(រាយការណ៍​បន្ថែម​ដោយ ស៊ន សារ៉ាត)

ប្រែសម្រួលពីអត្ថបទភាសាអង់គ្លេស៖ Businesses reopen as Phnom Penh lifts lockdown in yellow zones

139 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »