កម្ពុជាប្ដឹងម្ចាស់នាវា ដោយចោទថាបានលួចប្រេងឆៅរបស់ខ្លួន

ទិដ្ឋភាពនៅអណ្ដូងប្រេង ដែលប្រតិបត្តិការដោយក្រុមហ៊ុន KrisEnergy និងរដ្ឋាភិបាលកម្ពុជាក្នុងឈូងសមុទ្រថៃ។ KrisEnergy
ទិដ្ឋភាពនៅអណ្ដូងប្រេង ដែលប្រតិបត្តិការដោយក្រុមហ៊ុន KrisEnergy និងរដ្ឋាភិបាលកម្ពុជាក្នុងឈូងសមុទ្រថៃ។ KrisEnergy

ផែន​ការ​បូម​យក​ប្រេង​លើក​ដំបូង​របស់​កម្ពុជា​មើល​ទៅ​ទំនង​ជា​បរាជ័យ ប៉ុន្តែ​ពេល​នេះ​រដ្ឋា​ភិបាល​កំពុង​ប្រើ​ប្រាស់​វិធាន​ការ​ច្បាប់​ដើម្បី​រក្សា​ប្រេង​ដែល​បូម​បាន​។​​

​នៅ​ពេលការ​​បូម​ប្រេង​ក្នុង​​​​ដែនសមុទ្រ​កម្ពុជា​តំបន់​អប្សរាត្រូវ​បាន​ផ្អាក នាវា​​ដឹក​ប្រេង​មួយ​គ្រឿង​បាន​បាត់​ខ្លួន ដោយ​នាំ​យក​ប្រេង​ឆៅ​ពេញ​ទៅ​ជាមួយ​ផង ដែល​សកម្មភាព​នេះ​ត្រូវ​បាន​រដ្ឋាភិបាល​កម្ពុជា​ហៅ​ថា​ជា​ការ​លួច​។​ ការ​បូម​ប្រេង​នេះ​ធ្វើ​ឡើង​ដោយ​មាន​ការ​ចូល​ហ៊ុន​គ្នា​រវាង​រដ្ឋាភិបាល​កម្ពុជា និង​ក្រុម​ហ៊ុន​ចុះបញ្ជី​នៅ​សិង្ហបុរីឈ្មោះ KrisEnergy ​។

រដ្ឋា​ភិបាល​កម្ពុជា​ពេល​នេះ​បាន​ដាក់​ពាក្យ​បណ្ដឹង​ប្រឆាំង​នឹង​ម្ចាស់​នាវា អ្នក​គ្រប់​គ្រង ប្រធានក្រុម​ និង​បក្ស​ពួក​ទាក់​ទង​នឹង​បទល្មើស ​ផ្សេង​ទៀត​ ដែល​បាន​លួច​ដឹក​ប្រេង​ចេញ​នេះ​។ នាវិក​នៅ​លើ​នាវា​ MT Strovolos នេះបច្ចុប្បន្ន​កំពុង​ត្រូវ​បាន​ឃុំ​ខ្លួន និង​សាក​សួរ​ក្នុង​ប្រទេស​ឥណ្ឌូណេស៊ី បន្ទាប់​ពី​​មន្ត្រី​ប្រទេស​នេះ​បាន​ចាប់​ឃាត់ ពេល​នាវា​​​ចូល​ចត​ក្នុង​ដែន​ទឹក​ឥណ្ឌូនេស៊ី​ដោយ​គ្មាន​ការ​អនុញ្ញាត​។​​ នាវា​នេះ បើ​តាម​ក្រ​សួង​រ៉ែ គឺ​គ្រប់​គ្រង​ដោយ​ ក្រុមហ៊ុន World Tankers Management មាន​មូល​ដ្ឋាន​នៅ​សិង្ហបុរី​។

លោក ជៀប សួរ អគ្គនាយក​នៃ​អគ្គនាយក​ដ្ឋាន​ប្រេង​ នៃ​ក្រ​សួង​រ៉ែ និង​ថាម​ពល ​បាន​បញ្ជាក់​ថាបណ្ដឹង​នេះ​បាន​ដាក់​​ទៅ​កាន់​តុលាការ​កម្ពុជា​។ លោក​មាន​ប្រ​សាសន៍​ទៀត​ថា រដ្ឋាភិបាល​​កម្ពុជាបាន​ដាក់​សំណើ​ទៅ​កាន់​អាជ្ញាធរ​ឥណ្ឌូណេស៊ី ដើម្បី​បញ្ជូនជន​សង្ស័យ​មក​កម្ពុជា​ដើម្បី​ស៊ើប​អង្កេត ប៉ុន្តែ​លោក​មិន​បាន​ផ្ដល់​ព័ត៌មាន​លម្អិត​ជាង​នេះ​ទេ ដោយ​បង្វែរ​ឲ្យ​ទៅ​យោង​​តាម​សេចក្ដី​ប្រកាស​ព័ត៌មាន​របស់​ក្រ​សួង​។​

បើ​តាម​សេចក្ដី​ប្រកាស​ព័ត៌មាន​របស់​ក្រ​សួង រាជរដ្ឋាភិបាល​កម្ពុជា​បាន​ស្វែង​រក​ជំនួយ​ពី​ប្រ​ទេស​ឥណ្ឌូណេស៊ី ដើម្បី​នាំ​យក​អ្នក​ដែល​រង​ការ​ចោទ​ថា​បាន​ប្រព្រឹត្តិ​ល្មើស និង​អ្នក​ពាក់ព័ន្ធ​ផ្សេង​ទៀត «មក​ផ្ដន្ទាទោស និង​ដើម្បី​យក​ប្រេង​ឆៅ​កម្ពុជា​មកវិញ»។​

​ក្រ​សួង​បញ្ជាក់នៅក្នុងសេចក្តីប្រកាសព័ត៌មានថា៖ «​បញ្ហា​នេះ​ គឺ​ជា​នីតិវិធីផ្លូវច្បាប់​សុទ្ធសាធ ហើយ​មិន​ពាក់​ព័ន្ធ​នឹង​បញ្ហា​នយោបាយ ​ឬ​ពាណិជ្ជកម្ម​ឡើយ»។

ក្រ​សួង ក៏​បាន​បញ្ជាក់​ពី​ជម្លោះ​រវាង​អ្នក​គ្រប់គ្រង​​នាវា​ Strovolos និង​ក្រុម​ហ៊ុន​ KrisEnergy លើ​ថ្លៃ​ឈ្នួល​នាវា​ផង​ដែរ។ កន្លង​មក​មាន​ការ​ផ្សាយ​ថាម្ចាស់​នាវា​បាន​យក​​ប្រេស​ឆៅ​នោះ​ជាថ្នូរ​នឹង​ថ្លៃ​ដែល​ក្រុម​ហ៊ុន​ KrisEnergy ជំពាក់​ តែ​ក្រ​សួង​បាន​ច្រាន​ចោល​​រឿង​នេះ​ និង​ថាមិន​ពាក់​ព័ន្ធ​នឹ​ង​កម្ពុជា​នោះ​ទេ​។

សេចក្តីប្រកាសព័ត៌មានបានបន្ថែមថា៖ «នេះ​ជា​រឿងរវាង​ពួក​គេ ហើយ​មិន​មាន​អ្វី​ពាក់​ព័ន្ធ​នឹង​រាជរដ្ឋាភិបាល​កម្ពុជា និង​ប្រេង​ឆៅកម្ពុជា​ឡើយ»។​

ក្រ​សួង​បាន​ពន្យ​ល់​ថា ខណៈ​ពេល​ស្ថិត​នៅ​ក្រោម​ការជួល​​របស់​ក្រុម​ហ៊ុន​ KrisEnergy អ្នក​គ្រប់​គ្រង​នាវា​ បាន​ទទួល​បញ្ជា​ពី​ក្រុម​ហ៊ុន World Tankers នៅ​ល្ងាច​​​ថ្ងៃទី​២៨ ខែ​មិថុនា ​ឲ្យ​ចាក​ចេញ​ពី​កម្ពុជា​ និង​បើក​ចូល​ក្នុង​ដែនទឹក​ថៃ​ ដោយ​​យក​ទាំង​ប្រេង​ឆៅ​កម្ពុជា​ទៅ​ជាមួយ​ផង​។​ ការ​ចាក​ចេញ​ពី​ដែន​ទឹក​កម្ពុជា ក្រ​សួង​ថា​​នាវា​នេះ​មិន​បាន​ឆ្លង​កាត់​នីតិវិធី​គយ និង​មិន​មាន​ការ​អនុញ្ញាត​ពី​អាជ្ញាធរ​កម្ពុជា និង​បាន​បំពាន​ទៅ​នឹង​ច្បាប់​កម្ពុជា​។​

​នាវា​​ និង​នាវិក​ទាំង​អស់​ ក្រោយ​មក​ត្រូវ​បាន​ចាប់​ឃាត់​ដោយ​អាជ្ញាធរ​ឥណ្ឌូណេស៊ី​នៅ​ថ្ងៃទី​២៧ ខែ​មិថុនា បន្ទាប់​ពី​បាន​ចូល​ចត​នៅ​សមុទ្រ​ស៊ូមាត្រា​។​

នាវា​​ប្រវែង​១៨៣​ម៉ែត្រនេះ​បាន​បើក​ចេញ​ពី​ដែនទឹក​ប្រទេសថៃ​ទៅ​កាន់​កោះ ​Batam ដោយ​ត្រូវ​បានគេ​រាយការណ៍​ថាបាន​បិទ​ប្រព័ន្ធ​កំណត់​ទី​តាំង​​របស់​ខ្លួន​ និង​បាន​ចូល​ចត​ដោយ​ខុស​ច្បាប់​ក្នុង​ទី​ប្រជុំ​កោះ​របស់​ឥណ្ឌូណេស៊ី។ កងទ័ពជើង​ទឹក​ឥណ្ឌូណេស៊ី​ បាន​និយាយ​ថា​ខ្លួន​​កំពុង​សួរ​ចម្លើយ​លើ​នាវិក​ទាំងនោះ មាន​ជន​ជាតិ​ឥណ្ឌា​ចំនួន​១៣​នាក់ បង់ក្លាដេស​ចំនួន​បី​នាក់ និង​មីយ៉ាន់ម៉ាចំនួន​បី​នាក់ នៅ​មូល​ដ្ឋាន​របស់ខ្លួន​ក្បែរ​ប្រទេស​សិង្ហបុរី​។

យ៉ាងណា​ក្រុម​ហ៊ុន​ World Tankers បានបដិសេធការចោទប្រកាន់ថាបាន​ផ្ទុក​ប្រេងដោយខុសច្បាប់និ​ង​ថានាវា​នេះមិនមានការអនុញ្ញាតចូល​ចត​នៅដែនទឹកឥណ្ឌូណេស៊ី នេះ​បើ​តាម​ការ​ផ្សាយរបស់​សារព័ត៌មាន Reuters ។

សេចក្ដី​រាយការណ៍​បាន​បន្ត​ថា ក្រុម​ហ៊ុន​បាន​និយាយ​ថា​នាវា​ Strovolos បាន​ដាក់​ប្រេង​ឆៅ​​ចំណុះ​៣០០ ០០០​បារ៉ែល កាលពី​ថ្ងៃទី​២១ ខែឧសភា ដោយ​ដឹងថា​នេះ​ជា​ទំនិញ​របស់​ក្រុម​ហ៊ុន​ដែល​បាន​ជួល​នាវា។​

អ្ននាំ​ពាក្យក្រុម​ហ៊ុន World Tankers បាន​ប្រាប់ខេមបូចា​​តាម​រយៈអ៊ីម៉ែល​ថា​ភាគី​ពាក់ព័ន្ធ​កំពុង​ធ្វើ​ការ​ជាមួយ​គ្នា​លើ​បញ្ហា​នេះ តែ​មិន​បាន​ផ្ដល់​ព័ត៌មាន​លម្អិត​នោះទេ​។​​​

អ្ននាំ​ពាក្យ​ក្រុមហ៊ុនបាន​លើក​ឡើង​ថា៖ «​ភាគី​ជាប់​ពាក់​ព័ន្ធ​ក្នុង​រឿង​នេះ​ទាំង​អស់ ឥឡូវ​នេះ​កំពុង​ធ្វើ​ការ​ជាមួយ​គ្នា​ដើម្បី​ធានាថា​នឹង​ទទួលបាន​លទ្ធផល​ឆាប់ៗ និង​មាន​ទំនាក់​ទំនង​ល្អ ហើយ​យើង​ជឿ​ថា​រឿង​នេះនឹង​ចេញ​ផ្លែផ្កា​ឆាប់ៗ​នេះ»។​

ក្រុម​ហ៊ុនWorld Tankers បាន​បញ្ជាក់​ទៀត​ថា​ នាវា​គ្មាន​ជម្រើស​អ្វី​ផ្សេង​​ច្បាស់​លាស់ ក្រៅ​តែ​ពី​ការ​បើក​នាវាចេញ​ពី​ដែន​ទឹក​កម្ពុជា ដើម្បី​ផ្លាស់​ប្ដូរ​នាវិក និង​ចាក់​ប្រេង​។​ ក្រសួង​រ៉ែ និង​ថាមពល​កម្ពុជា​បាន​ច្រាន​ចោល​ការ​លើក​ឡើង​នេះ និង​ថា​មិន​ដែល​មាន​ម្ចាស់​នាវា អ្នកគ្រប់​គ្រង ឬភាគី​ពាក់ព័ន្ធ​ណា​បាន​ទាក់​ទង​មក​អាជ្ញាធរ​ដើម្បី​រៀប​ចំ​ ឬ​អនុញ្ញាត​ឲ្យ​មាន​សកម្មភាព​នេះ​ទេ​។​

ក្រសួង​បានបញ្ជាក់ទៀត​ថា៖ «បញ្ហា​ទាំង​អស់​នេះ​មិន​អាច​យក​ជា​លេស​ដើម្បី​យក​នាវា និង​ប្រេង​ឆៅ​ចេញ​ពី​ដែន​ទឹក​កម្ពុជា ដោយ​មិន​អនុលោម​តាម​ច្បាប់​កម្ពុជា​ឡើយ»។  ដោយបន្ថែម​ថា​៖ «ក្រោយ​ពី​នាវា​ចាកចេញ​ពី​ដែន​ទឹក​កម្ពុជា​ដោយ​ខុស​ច្បាប់ នាវា​មិន​ដែល​បាន​បង្ហាញ​ឆន្ទៈ​ក្នុង​ការ​វិល​ត្រឡប់ និង​ដឹក​ប្រេង​ឆៅ​មក​ដែន​ទឹក​កម្ពុជា​វិញ​ឡើយ»។​

លោក ប៉ិច ពិសី នាយ​ក​ប្រតិបត្តិ​អង្គការ​តម្លាភាព​អន្តរជាតិ​​កម្ពុជា បាន​សាទរ​ទៅ​នឹង​វិធានការ​ច្បាប់​លើ​ជន​ដែល​បាន​លួច​ប្រេងនេះ​។​

លោក​មាន​ប្រ​សាសន៍​ថា៖ «វា​ពិត​ជាមាន​សារសំខាន់​ណាស់​ដែល​កម្ពុជានាំ​យក​ជន​សង្ស័យ​ទៅ​កាន់​តុលាការ​ ហើយ​ច្បាប់​ត្រូវ​តែ​អនុវត្ត​លើ​អ្នក​ពាក់​ព័ន្ធ បើ​សិន​ជា​​រក​ឃើញ​កំហុស»។ លោក​បន្ត​ថា៖ «​មុខ​មាត់​កម្ពុជា​នឹង​ប៉ះពាល់ បើ​យើង​មិន​បន្ត​វិធានការ​នេះ​ឲ្យ​បាន​សម​ស្រប»។

លោក ពិសី ថា​កម្ពុជាគួរ​តែ​រិះ​រក​គ្រប់​វិធានការ​ច្បាប់​ដែល​មាន និង​បទដ្ឋាន​នានា​ ដើម្បី​បន្ត​សំណុំ​រឿង​នេះ និង​ធ្វើ​ការ​ឲ្យ​បាន​ជិត​ស្និទ្ធ​ជាមួយ អាជ្ញាធរ និង​​ភាគី​ពាក់​ព័ន្ធ​នានា ដើម្បី​បាន​យុត្តិ​ធម៌ និង​តម្លាភាព​៕​

ប្រែសម្រួលពីអត្ថបទភាសាអង់គ្លេស៖ Cambodia files lawsuit against vessel owners over alleged crude oil theft

291 views
ព័ត៌មានថ្មីៗ »
អត្ថបទពេញនិយម »