អ្នកភូមិប្រមាណ១០០នាក់មកពីស្រុកកណ្តាលស្ទឹង និងក្រុងតាខ្មៅ បានប្រមូលផ្តុំគ្នានៅសាលាខេត្តកណ្តាល ដើម្បីដាក់ញត្តិជូនលោក គង់ សោភ័ណ្ឌ អភិបាលខេត្តកណ្តាលកាលពីព្រឹកថ្ងៃពុធ។
ពួកគាត់កំពុងស្វែងរកកិច្ចអន្តរាគមន៍ពីអាជ្ញាធរ ដើម្បីដោះស្រាយបញ្ហារបស់ពួកគាត់ បន្ទាប់ពីក្រុមហ៊ុនអភិវឌ្ឍន៍អាកាសយានដ្ឋានអន្តរជាតិភ្នំពេញថ្មី Overseas Cambodia Investment Corp Ltd (OCIC) បានបន្តចាក់ដីលុបប្រឡាយខាងក្រោយផ្ទះរបស់ពួកគាត់ឡើងវិញ។ កាលពីសប្តាហ៍មុន កម្មករបានព្យាយាមបោះបង្គោលព្រំដី ប៉ុន្តែមិនបានជោគជ័យដោយសារអ្នកភូមិតវ៉ានិងរុះរើចេញ។
ក្នុងញត្តិនោះ អ្នកភូមិបានស្នើឲ្យក្រុមហ៊ុនកាយយកខ្សាច់ចេញពីប្រឡាយ ព្រោះពួកគាត់បារម្ភពីផលប៉ះពាល់ចំពោះផ្ទះសម្បែងរបស់ពួកគាត់។ ពួកគាត់បារម្ភថា ផ្លូវទឹកដែលត្រូវបានបិទនេះ អាចបង្កគ្រោះថ្នាក់ដល់អាយុជីវិតពួកគាត់ ជាពិសេសកុមារតូចៗ និងមនុស្សចាស់ អំឡុងរដូវវស្សា។
ញត្តិនេះត្រូវបានចុះហត្ថលេខាដោយប្រជាពលរដ្ឋមកពីភូមិចំនួន៤ គឺភូមិអំពៅព្រៃ ភូមិស្វាយព្រៃ និងភូមិរយោង ក្នុងឃុំកណ្តោក ដែលស្ថិតក្នុងស្រុកកណ្តាលស្ទឹង និងភូមិអាចម៍កុកក្នុងសង្កាត់កំពង់សំណាញ់ ក្រុងតាខ្មៅ។
អ្នកស្រី អ៊ួង ស៊ីម មកពីភូមិអំពៅព្រៃ ដែលអ្នកស្រីរស់នៅតាំងពីឆ្នាំ២០០០ បាននិយាយថា នេះជាលើកទី៣ហើយ ដែលអ្នកស្រីដាក់ញត្តិ ដើម្បីសុំអន្តរាគមន៍ពីអភិបាលខេត្តកណ្តាល។ អំឡុងពេលដាក់ញត្តិលើកទីមួយ អ្នកភូមិបានសួរទៅអាជ្ញាធរថា ហេតុអ្វីបានជាបាញ់ថ្នាំពណ៌ជាសញ្ញាបណ្តេញចេញលើផ្ទះរបស់ពួកគាត់? នៅក្នុងញត្តិលើកទី២ ពួកគាត់បានស្នើទៅអភិបាលខេត្ត ដើម្បីធ្វើការអភិវឌ្ឍនៅនឹងកន្លែង ប៉ុន្តែមិនមានចម្លើយទេ។
ប្រជាពលរដ្ឋដែលឈរក្នុងបរិវេណសាលាខេត្តរយៈពេលជិតមួយម៉ោងត្រូវបានជំរុញឲ្យចូលរួមប្រជុំភ្លាមៗមួយ ជាមួយលោក ស្វាយ ម៉េងលី អភិបាលរងស្រុកកណ្តាលស្ទឹងដែលមានរយៈពេលមួយម៉ោង។
ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំនេះ អ្នកភូមិបាននិយាយថា ក្រុមមន្ត្រីបានសន្យាថា ពួកគាត់នឹងចុះទៅតំបន់នោះក្នុងពេលឆាប់ៗនេះ ប៉ុន្តែមិនបានផ្តល់ពេលវេលាជាក់លាក់ណាមួយទេ។ អ្នកស្រី អ៊ួង ស៊ីម រៀបរាប់ថា អាជ្ញាធរបានចរចាជាមួយក្រុមហ៊ុន ដើម្បីផ្អាកការសាងសង់ បន្ទាប់ពីអ្នកភូមិដាក់ញត្តិកាលពីព្រឹកថ្ងៃពុធ ហើយស្នើសុំឱ្យពួកគាត់រំងាប់អារម្មណ៍។
អ្នកស្រីបាននិយាយថា៖ «យើងអាចស្ងប់ស្ងាត់បាននៅពេលនេះ ប៉ុន្តែប្រសិនបើក្រុមហ៊ុននៅតែបន្តចាក់ខ្សាច់ [ចូលប្រឡាយ] ដែលប៉ះពាល់ដល់ផ្ទះប្រជាពលរដ្ឋ យើងមិនអាចស្ងប់ស្ងាត់បានទេ។ ដូច្នេះហើយបានជាគាត់និយាយថា គាត់បានចរចាជាមួយក្រុមហ៊ុនឲ្យផ្អាក [សកម្មភាព]»។
អ្នកស្រី អ៊ួង ស៊ីម បានស្នើឲ្យលោកអភិបាលរងពន្លឿនការចុះពិនិត្យរបស់លោក ដើម្បីឲ្យលោកបានឃើញច្បាស់នូវអ្វីដែលកំពុងកើតឡើងនៅនឹងកន្លែង។ អ្នកស្រីនិយាយថា ប្រសិនបើគ្មានដំណោះស្រាយទេ ប្រជាពលរដ្ឋនឹងទៅសាលាខេត្តម្តងទៀត។
អ្នកស្រី អ៊ួង ស៊ីម បាននិយាយថា៖ «យើងនឹងត្រឡប់ទៅមូលដ្ឋានរបស់យើងវិញ ហើយរង់ចាំមើលថា តើពួកគាត់រកដំណោះស្រាយសម្រាប់យើងឬអត់។ បើគាត់មិនរកដំណោះស្រាយទេ យើងនឹងមកទីនេះម្ដងទៀត»។
អ្នកស្រី សុខ ចិន្តា ជាជនរងគ្រោះម្នាក់ទៀតនៃគម្រោងព្រលានយន្តហោះថ្មីនេះបាននិយាយថា អ្នកស្រីមិនជឿការសន្យារបស់អាជ្ញាធរនោះទេ ដោយសារពួកគាត់បានសុំអន្តរាគមន៍លើរឿងផ្សេងៗកាលពីពេលកន្លងមក ប៉ុន្តែគ្មានដំណោះស្រាយទេ។
បើទោះបីជាបែបនេះ អ្នកស្រីសង្ឃឹមថា អាជ្ញាធរនឹងរក្សាការសន្យាជុំវិញបញ្ហានេះ ព្រោះក្រុមហ៊ុនបានបូមខ្សាច់ចាក់លុបប្រឡាយ និងបោះបង្គោលព្រំដីរួចហើយ ដោយបានបង្កការភ័យខ្លាច និងព្រួយបារម្ភក្នុងចំណោមប្រជាពលរដ្ឋ។ អ្នកស្រីស្នើឲ្យអាជ្ញាធរដោះស្រាយបញ្ហានេះឲ្យបានឆាប់។
អ្នកស្រីបាននិយាយថា៖ «ខ្ញុំចង់ឱ្យគាត់មកល្ងាចនេះ ព្រោះយើងបារម្ភខ្លាំង។ ពួកគេ [ក្រុមហ៊ុន] កំពុងចាក់ខ្សាច់ទាំងយប់ទាំងថ្ងៃរៀងរាល់ថ្ងៃ។ វាពិតជាគួរឲ្យព្រួយបារម្ភខ្លាំងណាស់ ព្រោះគ្មានដែនកំណត់។ ពួកគេកំពុងចាក់លុប [ប្រឡាយ] តាមចិត្តរបស់ពួកគេ ដោយមិនប្រាប់ប្រជាពលរដ្ឋ»។
អ្នកស្រីបានបន្ថែមថា៖ «កន្លងមក យើងមានប្រឡាយនៅសងខាង។ ពេលទឹកហូរខ្លាំង ផ្ទះ៣ទៅ៤ខ្នងត្រូវទឹកអូសយកទៅ ។ ឥឡូវនេះ ផ្នែកម្ខាងទៀតនៃប្រឡាយត្រូវបានចាក់លុប។ តើនឹងមានអ្វីកើតឡើងចំពោះផ្ទះរបស់ប្រជាពលរដ្ឋ? ដីខ្សាច់ដែលគេចាក់លុបក្នុងប្រឡាយ គឺខ្ពស់ជាងផ្លូវដែលប្រជាពលរដ្ឋរស់នៅ»។
លើសពីនេះទៅទៀត អ្នកស្រីនិយាយថា អ្នកភូមិចង់រស់នៅក្នុងភូមិរបស់ខ្លួន មិនព្រមផ្លាស់ទៅទីណាទេ ដោយសារមានការអភិវឌ្ឍផ្លូវនៅទីនោះ ដែលបង្កភាពងាយស្រួលដល់ពួកគាត់ក្នុងការធ្វើដំណើរ ប្រកបអាជីវកម្ម និងនៅជិតទីប្រជុំជន។
អ្នកស្រី ចិន្តា បានអះអាងថា ប្រជាពលរដ្ឋមិនបានធ្វើសំណើអ្វីផ្សេងទៀតទេ អំឡុងពេលប្រជុំ ក្រៅតែពីសុំការអន្តរាគមន៍ជាបន្ទាន់ពីអាជ្ញាធរ។
លោក ជីវ កុកសាយ ទទួលបន្ទុកទិញដីសម្រាប់គម្រោងសាងសង់ព្រលានយន្តហោះដែលមានតម្លៃ១,៥ពាន់លានដុល្លារ បានប្រាប់ខេមបូចាថា លោកបានដឹងពីការប្រមូលផ្តុំ និងការដាក់ញត្តិរបស់ប្រជាពលរដ្ឋកាលពីព្រឹកថ្ងៃពុធ។
លោក កុកសាយ បានមានប្រសាសន៍ថា៖ «យើងបានដឹងពីរឿងនេះ។ ក្រុមការងារខ្ញុំក៏បានជូនដំណឹងមកខ្ញុំដែរ។ សូមបញ្ជាក់ថា ដីនោះជាកម្មសិទ្ធិរបស់ក្រុមហ៊ុន មិនមែនរបស់ប្រជាពលរដ្ឋទេ។ ហើយវាមិនមែនជាការរំលោភយកដីសាធារណៈទេ។ យើងគ្មានសិទ្ធិទន្ទ្រានយកដីសាធារណៈទេ ដូចខ្ញុំបាននិយាយពីមុន»។
លោក កុកសាយ បានបន្ថែមថា លោកនឹងសហការជាមួយអាជ្ញាធរប្រសិនបើមានសំណើ។ លោកបានបន្ថែមថា៖ «ខ្ញុំនឹងពន្យល់ពីអ្វីដែលបានកើតឡើងពិតប្រាកដ។ ខ្ញុំនឹងសហការជាមួយពួកគាត់»។
នៅពេលសួរថា តើពេលណាក្រុមហ៊ុននឹងផ្តល់ដំណោះស្រាយជូនប្រជាពលរដ្ឋ គាត់បានឆ្លើយថា៖ «ខ្ញុំមិនអាចផ្តល់ពេលវេលាច្បាស់លាស់សម្រាប់ដំណោះស្រាយទេ។ សូមសួរអាជ្ញាធរខេត្តដែលមានសិទ្ធិឆ្លើយ»។
លោក អ៊ូច សារឿន អភិបាលស្រុកកណ្តាលស្ទឹងមិនអាចទាក់ទងសុំការបំភ្លឺបានទេ។
លោក គង់ សោភ័ណ្ឌ អភិបាលខេត្តកណ្តាលបានប្រាប់ខេមបូចានៅរសៀលថ្ងៃពុធថា លោកបានដឹងអំពីបញ្ហាដែលបានកើតឡើងនៅព្រឹកថ្ងៃនោះ។
លោកមានប្រសាសន៍ថា៖ «ខ្ញុំបានទទួលព័ត៌មាន។ យើងនឹងសហការជាមួយអ្នកជំនាញ និងបន្តសិក្សាករណីនេះ»។
លោក គង់ សោភ័ណ្ឌ លើកឡើងថា៖ «ក្នុងនាមជាអាជ្ញាធរ យើងមានការទទួលខុសត្រូវក្នុងការការពារប្រជាពលរដ្ឋ ហើយមិនបណ្តោយឲ្យពួកគាត់រងផលប៉ះពាល់ និងបាត់បង់ផលប្រយោជន៍នោះទេ»។
នៅពេលសួរថា តើដំណោះស្រាយនឹងត្រូវផ្តល់ជូនប្រជាពលរដ្ឋនៅពេលណា លោកបានមានប្រសាសន៍ថា ដំណោះស្រាយនឹង«ធ្វើតាមនីតិវិធីច្បាប់»។
លោកបានបន្ថែមថា៖ «ខ្ញុំមិនអាចបញ្ជាក់ពីពេលវេលាពិតប្រាកដថា តើដំណោះស្រាយនឹងត្រូវសម្រេចនៅពេលណាទេ ប៉ុន្តែវានឹងធ្វើតាមនីតិវិធីច្បាប់។ យើងនឹងបន្តដោះស្រាយបញ្ហានេះជាមួយប្រជាពលរដ្ឋ ហើយរង់ចាំលទ្ធផលពីការសិក្សារបស់អ្នកជំនាញ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ មានប្រសាសន៍ថា ប្រជាពលរដ្ឋមានការព្រួយបារម្ភអំពីទឹកជំនន់ក្នុងរដូវវស្សា ព្រោះប្រឡាយនៅជិតផ្ទះរបស់ពួកគាត់ត្រូវបានគេលុប។
លោក សំអាត បន្ថែមថា៖ «ដើម្បីទប់ស្កាត់ [ទឹកជំនន់] និងជៀសវាងបញ្ហាដែលអាចកើតមាន អាជ្ញាធរគួរតែដោះស្រាយបញ្ហានេះឱ្យបានឆាប់តាមដែលអាចធ្វើទៅបាន»៕
ប្រែសម្រួលពីអត្ថបទភាសាអង់គ្លេស Canal 94 Residents Fear Flooding From Sand Filling, Four Villages Submit Petition





