ក្រុមកម្មករប្រមូលសំរាមក្រុមហ៊ុនស៊ីនទ្រី បានយល់ព្រមវិលត្រឡប់ចូលធ្វើការដើម្បីប្រមូលសំរាមទូទាំងរាជធានីភ្នំពេញវិញ នាល្ងាចថ្ងៃទី១៤ ខែតុលា បន្ទាប់ពីក្រុមហ៊ុនបានសន្យាថាខ្លួននឹងធ្វើតាមការទាមទាររបស់កម្មករ នៅពេលកិច្ចសន្យារបស់ពួកគេបញ្ចប់នៅថ្ងៃទី៣១ ខែមករាឆ្នាំក្រោយ។ នេះបើយោងតាមតំណាងសហជីព។
លោក កៅ សុវ៉ាត ប្រធានសហជីពប្រចាំក្រុមហ៊ុនស៊ីនទ្រីដែលជាផ្នែកមួយនៃសហព័ន្ធសហជីពកម្មករនិយោជិតវិស័យទេសចរណ៍កម្ពុជា(CTWUF) បានលើកឡើងថា កម្មករទាំងអស់បានយល់ព្រមបញ្ចប់ការធ្វើកូដកម្មរយៈពេល១២ ថ្ងៃរបស់ពួកគេ បន្ទាប់ពីក្រុមហ៊ុនស៊ីនទ្រីបានយល់ព្រមទូទាត់ប្រាក់អត្ថប្រយោជន៍នានាជូនពួកគេ។
លោក សុវ៉ាតបានមានប្រសាសន៍ថា៖ «ក្រុមហ៊ុនបានព្រមទូទាត់ប្រាក់អត្ថប្រយោជន៍ទាំងអស់ ដល់កម្មករនៅសប្តាហ៍ទី២ នៃខែកុម្ភៈឆ្នាំក្រោយ»។ «កម្មករវេនយប់នឹងចេញទៅប្រមូលសំរាមនៅម៉ោងប្រហែល៤ល្ងាចឬ៥ល្ងាច [ថ្ងៃទី ១៤ ខែតុលា] ហើយកម្មករនឹងធ្វើការវេនថ្ងៃនិងប្រមូលសំរាមនៅព្រឹកថ្ងៃស្អែក»។
លោកបានបញ្ជាក់ថា ក្រុមហ៊ុនស៊ីនទ្រី បានយល់ព្រមទូទាត់ប្រាក់អត្ថប្រយោជន៍៥ចំណុច រួមមាន ប្រាក់អតីតភាពការងារ ប្រាក់សំណងជំងឺចិត្ត ប្រាក់ជួសឱ្យការជូនដំណឹងមុន ប្រាក់ខែចុងក្រោយ និងប្រាក់ដំណាច់ឆ្នាំដែលនៅសេសសល់នៅពេលកិច្ចសន្យាចាស់របស់ក្រុមហ៊ុនត្រូវបានបញ្ចប់ បន្ទាប់ពីសាលារាជធានីបានជ្រើសរើសក្រុមហ៊ុនថ្មីចំនួន៣ ដើម្បីអនុវត្តការងារប្រមូលសំរាមចាប់ពីថ្ងៃទី១៦ ខែតុលា។
ទោះជាយ៉ាងណាក៏ដោយ លោក សុវ៉ាត បាននិយាយថាប្រាក់ឈ្នួលរបស់កម្មករនឹងត្រូវបានកាត់សម្រាប់ថ្ងៃធ្វើកូដកម្មរយៈពេល៧ថ្ងៃ ពោលគឺចាប់ពី ថ្ងៃទី ៨ ដល់ ថ្ងៃទី១៤ ខែតុលាពីព្រោះពួកគេមិនបានចូលធ្វើការវិញទេនៅពេលដែលលោក ឃួង ស្រេង អភិបាលរាជធានីភ្នំពេញបានស្នើសុំឱ្យពួកគេធ្វើដូច្នេះ។
ជាលទ្ធផលមន្ត្រីថ្នាក់ខណ្ឌត្រូវបានទទួលភារកិច្ចប្រមូលសំរាមដែលបានគរលើចិញ្ចើមផ្លូវពាសពេញរាជធានីភ្នំពេញ។
លោក សុវ៉ាត បានលើឡើងថា៖ «មានសំរាមច្រើនជាង៣,០០០ តោនក្នុងមួយថ្ងៃនៅក្នុងរាជធានីភ្នំពេញ»។ លោកបានបន្ថែមថាមានសំរាមច្រើនជាង២ម៉ឺនតោនបានកកកុញនៅតាមដងផ្លូវ នៅពេលកម្មករប្រមូលសំរាមកំពុងធ្វើកូដកម្ម។
ដីការសម្រេចចាត់ចែងបណ្តោះអាសន្នមួយរបស់តុលាការរាជធានីភ្នំពេញដែលចេញកាលពីថ្ងៃទី១៣ ខែតុលា បានបង្ហាញថាការធ្វើកូដកម្មរបស់និយោជិកនៃក្រុមហ៊ុនស៊ីនទ្រីគឺខុសច្បាប់ហើយបានបញ្ជាឱ្យពួកគេត្រឡប់ទៅធ្វើការវិញមុនថ្ងៃទី១៦ ខែតុលា។
កម្មករប្រមូលសំរាមបានចាប់ផ្តើមធ្វើកូដកម្មរបស់ខ្លួននៅថ្ងៃទី២ ខែតុលា បន្ទាប់ពីបានទទួលដំណឹងថាសាលារាជធានីគ្រោងនឹងចាប់ផ្តើមកិច្ចសន្យានៅថ្ងៃទី១៦ ខែតុលាជាមួយក្រុមហ៊ុនសំរាមថ្មីចំនួន៣ ដែលនឹងបណ្តាលឱ្យក្រុមកម្មករបាត់បង់ការងារនៅក្រុមហ៊ុនស៊ីនទ្រី។ ជាលទ្ធផលក្រុមកម្មករបានទាមទារសំណង ប្រសិនបើកិច្ចសន្យារបស់ពួកគេត្រូវបានបញ្ចប់។
បុគ្គលិកក្រុមហ៊ុនស៊ីនទ្រីឈ្មោះ រ៉ុង សារ៉ាយ បានបញ្ជាក់ថាកម្មករបានយល់ព្រមចូលធ្វើការវិញហើយនៅល្ងាចនេះ។
លោក សារ៉ាយ បាននិយាយថា៖ « ឥឡូវនេះពួកយើងបានយល់ព្រមវិលត្រឡប់មកធ្វើការវិញហើយពីព្រោះក្រុមហ៊ុនបានយល់ព្រមផ្តល់ឱ្យពួកយើងនូវប្រាក់អត្ថប្រយោជន៍ទាំងអស់»។
ទោះជាយ៉ាងក៏លោកថាមិនទាន់ច្បាស់នៅឡើយទេថាតើបុគ្គលិកជិត២ ០០០នាក់ នៅក្រុមហ៊ុនស៊ីនទ្រីនឹងត្រូវផ្តល់ការងារថ្មី នៅក្នុងក្រុមហ៊ុនថ្មីដែលសាលាក្រុងជ្រើសរើសដើម្បីទទួលខុសត្រូវក្នុងការប្រមូលសំរាមនៅក្នុងរាជធានីភ្នំពេញឬយ៉ាងណា។
លោក ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជាបានមានប្រសាសន៍ថាបន្ទាប់ពីកិច្ចសន្យារបស់កម្មករត្រូវបានបញ្ចប់នៅថ្ងៃទី៣១ ខែមករា ឆ្នាំ ២០២១ ពួកគេនឹងទទួលបានប្រាក់អត្ថប្រយោជន៍តាមការស្នើសុំ។ ក្រុមហ៊ុនស៊ីនទ្រីនឹងជួលពួកគេវិញបន្ទាប់ពីកាលបរិច្ឆេទខាងលើ និងស្ថិតក្រោមកិច្ចសន្យាថ្មី ប្រសិនបើក្រុមហ៊ុននេះត្រូវបានជ្រើសរើសក្នុងចំណោមបីក្រុមហ៊ុន។
លោក កុសល បាននិយាយថា៖«ខ្ញុំគិតថាបន្ទាប់ពីលទ្ធផលនៃកិច្ចប្រជុំនៅថ្ងៃនេះ ទាំងកម្មករនិងភាគីក្រុមហ៊ុនយល់ព្រមទទួលយកដំណោះស្រាយ»។
អ្នកនាំពាក្យសាលារាជធានី លោក ម៉េត មាសភក្តី បានកោតសរសើរដល់ការខិតខំរបស់អាជ្ញាធរខណ្ឌក្នុងការសម្អាតសំរាមនៅទូទាំងរាជធានីនាពេលកន្លងមក។
លោក មាសភក្តី បានលើកឡើងថា៖«មន្រ្តីរបស់យើងបានខិតខំប្រមូលសំរាមនៅរាជធានីភ្នំពេញក្នុងខណៈពេលដែលកម្មករស៊ីនទ្រីកំពុងធ្វើកូដកម្ម»។
លោកបានបញ្ជាក់ថាសាលារាជធានីកំពុងស្ថិតក្នុងដំណើរការជ្រើសរើសក្រុមហ៊ុនចំនួន ៣ ដើម្បីចូលរួមបំពេញភារកិច្ចប្រមូលសំរាម នៅរាជធានីភ្នំពេញ ប៉ុន្តែលោកបានបដិសេធមិនប្រាប់ឈ្មោះក្រុមហ៊ុនដែលជាប់ក្នុងបញ្ជីសម្រិតសម្រាំងនោះទេ។
ប្រធានក្រុមហ៊ុនស៊ីនទ្រី លោក សេង សាវី មិនអាចទាក់ទងសុំការអត្ថាធិប្បាយបានទេ៕
