សមាគមសម្ព័ន្ធអ្នកសារព័ត៌មានកម្ពុជា

ក្រុមសង្គមស៊ីវិលអំពាវនាវឱ្យរដ្ឋាភិបាលបង្កើនថវិកាសម្រាប់សេវាកម្មសុខភាព អប់រំ និងសង្គម

អគារក្រសួងអប់រំនៅរាជធានីភ្នំពេញ ថតនៅថ្ងៃទី២ ខែកុម្ភៈ ឆ្នាំ២០២៤ ។ (ខេមបូចា / ព្រីង សំរាំង)
អគារក្រសួងអប់រំនៅរាជធានីភ្នំពេញ ថតនៅថ្ងៃទី២ ខែកុម្ភៈ ឆ្នាំ២០២៤ ។ (ខេមបូចា / ព្រីង សំរាំង)

ក្រុមការងារដែលតំណាងឱ្យ​អង្គការសង្គមស៊ីវិលចំនួន ១៩ស្ថាប័ន អំពាវនាវ​ស្នើឱ្យ​រដ្ឋាភិបាល​កម្ពុជា​បង្កើន​ថវិកាសម្រាប់​វិស័យអប់រំ សុខាភិបាល និងការគាំពារ​សង្គម​ នៅក្នុងការ​ឆ្លើយតបទៅនឹងថវិកា​ជាតិឆ្នាំ២០២៤ ដែល​ត្រូវបានរដ្ឋសភាអនុម័តរួចហើយ ។

ក្រុមការងារថវិកា​នៃអង្គការសង្គមស៊ីវិល ដែលបានបង្កើតឡើង​នាដើមទសវត្សរ៍ឆ្នាំ២០០០ ធ្វើការងារ​ដើម្បី​តស៊ូមតិ​ជំរុញ​ឱ្យមានតម្លាភាពនិងគណនេយ្យភាព​នៅក្នុងការគ្រប់គ្រង​ហិរញ្ញវត្ថុរបស់​រដ្ឋាភិបាល ។ នៅក្នុងរបាយការណ៍ក្នុងខែមករា ក្រុមការងារនេះ​លើកឡើងថា ការ​បង្កើន​កញ្ចប់ថវិកា​ ព្រមទាំង​ការកែលម្អ​សេវាកម្ម​ឱ្យកាន់តែប្រសើរឡើង នៅក្នុងកម្មវិធី​អប់រំ សុខាភិបាល និង​សង្គមកិច្ច នឹងលើកកម្ពស់​ការអភិវឌ្ឍ​ប្រកប​ដោយ​ចីរភាព ។

កាលពីថ្ងៃទី១៦​ ខែវិច្ឆិកាកន្លងទៅ រដ្ឋសភា​បានអនុម័ត​ច្បាប់ថវិកាជាតិឆ្នាំ២០២៤ ដែលមាន​ចំនួន​ថវិកាប្រចាំឆ្នាំ ៩,១ប៊ីលានដុល្លារ ដែលថយចុះ ៥,៣% ប្រសិនបើធៀបនឹងឆ្នាំ២០២៣ ។ ចំណូលថវិការដ្ឋសរុបដែលរំពឹងទុក មានត្រឹមតែ ៨ប៊ីលានដុល្លារប៉ុណ្ណោះ ដែល​បង្កើតឱ្យមាន​ឱនភាពថវិកា ១២,៣៩% ។ រដ្ឋាភិបាល​ថ្លែងថា អាទិភាពជាយុទ្ធសាស្ត្រ​របស់​ខ្លួន​សម្រាប់​ថវិកា​ជាតិប្រចាំឆ្នាំ គឺ​ពង្រឹង​សេវាកម្មថែទាំសុខភាព ពង្រីក​ជំនាញ​វិជ្ជាជីវៈ​សម្រាប់​ក្រុមប្រជាជនក្រីក្រ បង្កើត​កម្មវិធីជំនួយសង្គមសម្រាប់​គ្រួសារងាយរងគ្រោះ​ ព្រមទាំង​អភិវឌ្ឍន៍​សេដ្ឋកិច្ចក្រៅប្រព័ន្ធ ​តាមរយៈការគាំទ្រ​ហិរញ្ញវត្ថុ ។

ទោះបីមានការប្ដេជ្ញាចិត្តជាសាធារណៈពីរដ្ឋាភិបាល​ដើម្បី​លើកកម្ពស់​វិស័យ​អប់រំ សុខាភិបាល និងសង្គមកិច្ចក្ដី ក្រុមអង្គការសង្គមស៊ីវិលនិយាយថា ថវិកាថ្មី​មិនបាន​បង្កើន​ថវិកាគ្រប់គ្រាន់​នៅក្នុងវិស័យទាំងនេះ​ឡើយ ។

ក្រុមអង្គការសង្គមស៊ីវិលលើកឡើងពីការកាត់បន្ថយ​ថវិកាសុខាភិបាល​សម្រាប់ឆ្នាំ២០២៤ ដែល​ខ្លួន​និយាយថា ផ្ទុយពីការប្ដេជ្ញាចិត្តរបស់រដ្ឋាភិបាល​និង​អាទិភាពយុទ្ធសាស្ត្រ​ដែល​បាន​ប្រកាស​ស្ដីពីការពង្រឹង​សេវាកម្មថែទាំសុខភាព ។ ថវិកាសុខាភិបាលសម្រាប់ឆ្នាំ២០២៤ តិចជាង​ថវិកា​ឆ្នាំ២០២៣ ចំនួន ៥២,២៥លានដុល្លារ ។ ថវិកា​សុខាភិបាលឆ្នាំ២០២៤ ដែលមានចំនួន ៦៥៦លានដុល្លារ បង្ហាញឱ្យឃើញថា រដ្ឋាភិបាល​ពុំទាន់សម្រេចបានគោលដៅថវិកា ៧៤៥លានដុល្លារ​របស់​ខ្លួន​ដែលបាន​កំណត់​នៅក្នុង​ផែនការ​យុទ្ធសាស្ត្រ​សុខាភិបាល ឆ្នាំ២០១៦-២០២០ នៅឡើយទេ ។

ដោយសាររដ្ឋាភិបាលនៅថ្នាក់ជាតិ​កាត់​ចំណាយ​ទៅលើ​វិស័យសុខាភិបាល ក្រុម​អង្គការសង្គម​ស៊ីវិល​ផ្ដល់អនុសាសន៍ថា មន្ត្រីមូលដ្ឋាន ដូចជា មេឃុំចៅសង្កាត់ត្រូវ​លៃលក​បែងចែក​ថវិកាដែល​អាចរកបាននៅថ្នាក់មូលដ្ឋាន សម្រាប់​មូលដ្ឋានសុខាភិបាល​និង​សេវាកម្ម​សុខាភិបាល ។

អ្នកនាំពាក្យ​ក្រសួង​សុខាភិបាល លោក លី សុវណ្ណ មិនបានឆ្លើយតបនឹងសំណើ​សុំ​ការអត្ថាធិប្បាយ​ឡើយ ។

ទីស្ដីការក្រសួងសុខាភិបាល នៅរាជធានីភ្នំពេញ ថត​នៅថ្ងៃទី២ ខែកុម្ភៈ ឆ្នាំ២០២៤ ។ (ខេមបូចា / ព្រីង សំរាំង)

ភាគរយនៃចំណាយថ្នាក់ជាតិ​សម្រាប់វិស័យអប់រំ​បាន​កើនឡើង​ពី ១០,១៩% នៅឆ្នាំ២០២៣ មកដល់ ១១,៧៥% នៅឆ្នាំនេះ ។ ប៉ុន្តែ អនុសាសន៍នានាដែលបានផ្សព្វផ្សាយកត់សម្គាល់ថា ចំនួននេះនៅទាបជាង​ផែនការយុទ្ធសាស្ត្រវិស័យអប់រំ ឆ្នាំ២០១៩-២០២៣របស់រដ្ឋាភិបាល​ នៅឡើយ ដែល​នៅក្នុងផែនការ​នេះ​បានដាក់គោលដៅថវិកា​វិស័យអប់រំ ស្មើនឹង ១៩,១% នៃ​ថវិកា​ជាតិ​នៅ​ឆ្នាំ២០២៣ ។ ក្រុមអង្គការសង្គមស៊ីវិឡ​ចង់​ឱ្យរដ្ឋាភិបាល​ប្ដេជ្ញាចិត្តបង្កើន​ថវិកាអប់រំ​បន្តិចម្ដងៗ ឱ្យដល់ ២០% នៃចំណាយថវិកាជាតិ ដូចដែលបានសន្យាកាលពីឆ្នាំ២០២១ ។ 

ក្រៅពីអនុសាសន៍ពាក់ព័ន្ធនឹងថវិកាជាតិ ក្រុមការងារ​ស្នើជាយោបល់ថា រដ្ឋាភិបាលគួរ​ធ្វើការ​ដើម្បីកាត់បន្ថយ​ភាពខុសគ្នារវាង​សាលារដ្ឋ​និងសាលាឯកជន ដោយ​បង្កើន​ការវិនិយោគបន្ថែម​ទៅលើ​សាលារៀននៅតាមទីជនបទ ។ មួយផ្នែកនៃថវិកា​គួរផ្ដោត​ទៅលើ​ការជួសជុល ហេដ្ឋារចនាសម្ព័ន្ធ និងការបណ្ដុះបណ្ដាលគ្រូ ។ លើសពីនេះទៀត​ ក្រុមអង្គការសង្គមស៊ីវិល​អំពាវនាវ​ឱ្យ​រដ្ឋាភិបាល​ធ្វើតាមការសន្យារបស់​ខ្លួន​ដើម្បី​ធានាថា កុមារ​គ្រប់រូប​ទទួលបាន​«ការអប់រំ​ជាមូលដ្ឋាន ៩ឆ្នាំ» ដោយ​ផ្ដល់​ការគាំទ្រ​បន្ថែម​ដល់​កុមារ​ក្រីក្រ កុមារដែលមានពិការភាព និងកុមារ​ដែលងាយរងគ្រោះ ។

អ្នកនាំពាក្យក្រសួង​អប់រំ លោកស្រី ឃួន វិច្ឆិកា ពុំបានផ្ដល់​ចម្លើយ​ទៅនឹងសំនួរ​របស់ខេមបូចា ពាក់ព័ន្ធនឹង​អនុសាសន៍នៅក្នុងរបាយការណ៍ឡើយ ។

លោកស្រីបានឆ្លើយតបក្នុងសារតេឡេក្រាម យ៉ាងដូច្នេះថា៖ «ការអភិវឌ្ឍ​មូលធនមនុស្ស​គឺជា​អាទិភាព​សំខាន់មួយរបស់រដ្ឋាភិបាល​នៅក្នុងការសម្រេច​ផែនការយុទ្ធសាស្ត្រ​របស់​រដ្ឋាភិបាល​ដើម្បីក្លាយជា​ប្រទេស​អភិវឌ្ឍ​នៅឆ្នាំ២០៥០ ។ ដើម្បីសម្រេចគោលដៅនេះ រដ្ឋាភិបាល​នឹងផ្ដល់​ថវិកា​ដើម្បី​អនុវត្ត​នៅក្នុងវិស័យអប់រំ» ។

លោកស្រី​ក៏បាន​កត់សម្គាល់​ផងដែរថា ថវិកាវិស័យអប់រំ​មានចំនួនស្ទើរតែ ៣ដង​ច្រើន​ជាង​កាលពី​១០ឆ្នាំមុន ដោយ​កើនឡើង​ពីត្រឹមប្រហែល ៣១៩លានដុល្លារនៅឆ្នាំ២០១៤ ឡើងមកដល់ ៩៨១លានដុល្លារ ។

​ថវិកា​សម្រាប់ក្រសួង​សង្គមកិច្ច​កើនឡើង​គួរ​ឱ្យ​កត់សម្គាល់ ពី ៣៦៧លានដុល្លារ​នៅក្នុងឆ្នាំ២០២៣ ដល់ ៥៦៩លានដុល្លារ​នៅឆ្នាំ២០២៤ ។ នេះបង្ហាញពីកំណើនភាគរយ​នៃ​ចំណាយ​ថ្នាក់ជាតិ​ទៅលើ​ក្រសួងនេះ កើនឡើង​ពី ៤,០១% ទៅដល់ ៦,៧១% ។

អនុសាសន៍នានាសម្រាប់​កម្មវិធីគាំពារសង្គម​របស់រដ្ឋាភិបាល រួមមាន ការពង្រីក​ការគាំពារដល់​ក្រុមងាយរងគ្រោះ ដូចជា អ្នកទាំងឡាយដែលធ្វើការនៅក្នុងវិស័យសេដ្ឋកិច្ចក្រៅប្រព័ន្ធ ម្ចាស់​អាជីវកម្មខ្នាតតូច កសិករ​លក្ខណៈគ្រួសារ ជន​ចាស់ជរា ក្រុមជនជាតិដើមភាគតិច និង​ប្រជាជន​ដែលមាន​ពិការភាព ។ ក្រុមអង្គការ​សង្គមស៊ីវិលលើកឡើងថា រដ្ឋាភិបាលគួរពង្រីកថវិកា​និង​វិសាលភាពនៃកម្មវិធីសន្តិសុខសង្គម ព្រមទាំង​បង្កើត​ការគាំទ្រ​ផ្ទះថែទាំមនុស្សចាស់ ។ ក្រុម​ការងារ​អង្គការសង្គមស៊ីវិល ក៏អំពាវនាវផងដែរ ​ឱ្យរដ្ឋាភិបាល​កំណត់​អាណត្តិ​ផ្លូវច្បាប់​ទៅលើ​ការ​បញ្ចេញឱ្យដឹងជាសាធារណៈ​នូវ​​របាយការណ៍ហិរញ្ញវត្ថុ​និង​សវនកម្មរបស់​បេឡាជាតិ​សន្តិសុខសង្គម និង​មូលនិធិជាតិជំនួយសង្គម ។

លោក តូច ចាន់នី អ្នកនាំពាក្យ​ក្រសួងសង្គមកិច្ច បាននិយាយថា រៀងរាល់ឆ្នាំ ថវិកាជាតិ​សម្រាប់​ក្រសួង​មិនគ្រប់គ្រាន់​ដើម្បី​បម្រើ​ដល់​គ្រប់​ប្រជាជន​ដែលងាយរងគ្រោះនោះ​ឡើយ ប៉ុន្តែ អាចជួយ​ដល់​ក្រុមមនុស្ស​គោលដៅបាន ។

លោកបាននិយាយថា៖ «សេចក្ដីត្រូវការរបស់ប្រជាជនមានច្រើនណាស់» ។ ហើយ​ក្រសួង​អាចធ្វើបានតែទៅតាម​ចំនួនថវិកាដែលមានកម្រិតដែលខ្លួនទទួលបានប៉ុណ្ណោះ ។

អ្នកនាំពាក្យ​ក្រសួង​សេដ្ឋកិច្ច​និងហិរញ្ញវត្ថុ លោក គឹម ភក្ដី មិនបានឆ្លើយតបនឹង​សំណួរ​របស់​ ខេមបូចានោះទេ ។

បុរសជាអ្នករើសអេតចាយអូសរទេះតាមផ្លូវក្នុងរាជធានីក្រុងភ្នំពេញ កាលពីថ្ងៃទី២ ខែកុម្ភៈ ឆ្នាំ២០២៤ ។ (ខេមបូចា / ព្រីង សំរាំង)

លោក ប៉ិច ពិសី នាយកប្រតិបត្តិនៃអង្គការតម្លាភាព​អន្តរជាតិកម្ពុជា ជាអង្គការមួយដែល​ចូលរួម​នៅក្នុង​ក្រុមការងារ​អង្គការសង្គមស៊ីវិលដែរ បាននិយាយថា រដ្ឋាភិបាលគួរតែ​វិនិយោគ​បន្ថែមទៀត​ទៅលើ​កម្មវិធី​ថែទាំសុខភាព អប់រំ និង​ជំនួយសង្គម ដើម្បីជួយដល់​ក្រុមប្រជាជន​ដែល​ងាយរងគ្រោះ ។ លោក​បានបន្ថែមថា អ្វីដែលសំខាន់​នៅក្នុងការអនុវត្ត​កំណែទម្រង់ទាំងនេះ គឺ «វាចាំបាច់ណាស់​ដែលរដ្ឋាភិបាលត្រូវ​ដោះស្រាយបញ្ហា​អំពើពុករលួយ​ដ៏រាលដាល​ ជាលក្ខណៈប្រព័ន្ធ និង​ជាលក្ខណៈរចនាសម្ព័ន្ធ» ។

លោក ឡាំ សុជាតិ នាយកវិទ្យាស្ថាន​តស៊ូមតិ​និង​គោលនយោបាយ ដែលជាអង្គការមួយផ្សេងទៀត​ដែលចូលរួមនៅក្នុងក្រុមការងារដែរ បាននិយាយថា អង្គការសង្គមស៊ីវិល​ចង់​ឃើញ​ថវិកា​ច្រើនថែមទៀត​ត្រូវបានគេផ្ដល់ទៅឱ្យ​វិស័យ​អប់រំនិងសុខាភិបាល ពីព្រោះ​វិស័យទាំងនេះ​ដែល​ជួយផ្ទាល់ទៅដល់​ប្រជាជន មិនអាចបម្រើ​សេចក្ដីត្រូវការ​របស់​ប្រជាជន​ឱ្យបានគ្រប់គ្រាន់​នៅឡើយ​ទេ នៅពេល​បច្ចុប្បន្ននេះ ។

លោកបាននិយាយថា៖ «មានមណ្ឌលសុខភាព ប៉ុន្តែ អត់មានគ្រូពេទ្យគ្រប់គ្រាន់ និងគ្មានថ្នាំពេទ្យ​គ្រប់គ្រាន់» ។ លោក​បន្ថែមថា៖ «សាលារៀនពុំមានសម្ភារៈគ្រប់គ្រាន់​សម្រាប់សិស្ស ពុំមាន​បណ្ណាល័យសម្រាប់សិស្ស និងខ្វះ​សម្ភារៈ​រៀន​និង​បង្រៀន»

ប្រែសម្រួលពីអត្ថបទភាសាអង់គ្លេស៖ Civil Society Groups Call for Increased Health, Education and Social Services Funding

303 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម