សមាគមសម្ព័ន្ធអ្នកសារព័ត៌មានកម្ពុជា

ប្រជាសហគមន៍មកពីខេត្តកោះកុងនិងកំពង់ស្ពឺដាក់ញត្តិតាមក្រសួងមួយចំនួនដើម្បីសុំកិច្ចអន្ដរាគមន៍ពាក់ព័ន្ធនឹងវិវាទដីធ្លី

ប្រជាសហគមន៏ដែលមានជម្លោះដីធ្លី មកពីខេត្តកោះកុង ប្រមូលផ្ដុំគ្នាតវ៉ានៅមុខក្រសួងយុត្តិធម៌ ក្នុងរាជធានីភ្នំពេញ។ រូបថតថ្ងៃទី៦ ខែកញ្ញា ឆ្នាំ២០២២។ ខេមបូចា/ ព្រីង សំរាំង
ប្រជាសហគមន៏ដែលមានជម្លោះដីធ្លី មកពីខេត្តកោះកុង ប្រមូលផ្ដុំគ្នាតវ៉ានៅមុខក្រសួងយុត្តិធម៌ ក្នុងរាជធានីភ្នំពេញ។ រូបថតថ្ងៃទី៦ ខែកញ្ញា ឆ្នាំ២០២២។ ខេមបូចា/ ព្រីង សំរាំង

ប្រជាពលរដ្ឋប្រហែល៤០០នាក់ដែលមកពីសហគមន៍ផ្សេងៗក្នុងខេត្តកោះកុងនិងខេត្ត​កំពង់ស្ពឺបាននាំគ្នាឡើងមកដាក់ញត្ដិនៅតាមបណ្ដាក្រសួងមួយចំនួននៅរាជធានីភ្នំពេញ ដើម្បីស្នើសុំកិចអន្តរាគមន៍ពាក់ព័ន្ធនឹងវិវាទដីធ្លីជាមួយក្រុមហ៊ុន លី យ៉ុងផាត់ ដែលអូស​បន្លាយពេលជិត២០​ឆ្នាំកន្លងមក។

ពលរដ្ឋបានឱ្យដឹងថា ពួកគេឡើងមកដាក់ញត្តិនៅស្ថាប័នចំនួន៣ រួមមាន ក្រសួងយុត្តិធម៌ ខុទ្ទការិយាល័យ​លោក​នាយក​រដ្ឋមន្ដ្រី និងក្រសួងរៀបចំដែនដី ដើម្បីស្នើសុំកិច្ចអន្ដរាគមន៍​ពាក់ព័ន្ធ​​និងជម្លោះដីធ្លី​ជាមួយ​ក្រុមហ៊ុន លី យ៉ុងផាត់ ដែលបានអូសបន្លាយ​តាំង​ពី​២០០៦​មក​ម្ល៉េះ ប៉ុន្ដែគ្មានដំណោះស្រាយ ហើយតំណាងសហគមន៍មួយចំនួន​កំពុងជាប់​ពាក្យបណ្ដឹង​នៅ​តុលាការខេត្តដោយសារការទាមទារដីរបស់ពួកគាត់ពីក្រុមហ៊ុនមកវិញ។

យោងតាមញត្ដិមួយរបស់សហគមន៍ដែលពលរដ្ឋ១៥០គ្រួសាររស់នៅភូមិព្រលាន​ ឃុំ​កណ្ដោល ស្រុក​បទុមសាគរ ខេត្តកោះកុង ដែលមានជម្លោះដីធ្លីជាមួយក្រុមហ៊ុនកោះកុង ស៊ូហ្គើរ និង​ក្រុមហ៊ុន​កោះកុងផ្លេនថេសិនអិនដាស្រ្ទី ខមភេនី លីមីធីត របស់ឧកញ៉ា លី យ៉ុងផាត់ បានចូលឈូស​ឆាយ​យកដីតាំងពីឆ្នាំ២០០៦ និងស្នើសុំក្រសួង​យុត្តិធម៌ជួយ​អន្ដរាគមន៍​និ​ងទម្លាក់បទចោទ​លើ​តំណាងសហគមន៍ចំនួន៥រូបនិងឈប់កោះហៅតំណាង​សហគមន៍រងគ្រោះដីធ្លីឡើងតុលាការបន្ដទៀត។

នៅក្នុងញត្ដិបញ្ជាក់ថា៖ «ស្នើសុំឯកឧត្តមជម្រុញទៅតុលាការខេត្តកោះកុងធ្វើការចុះកាត់ក្ដីឱ្យ​មានភាពសុក្រិតនិងយុត្តិធម៌ស្មើគ្នាចំពោះមុខច្បាប់និងធ្វើការដោះស្រាយជូនពួកយើងខ្ញុំទាំង​អស់គ្នា»

ចំណែកឯញត្តិមួយទៀតដែលបានដាក់ទៅក្រសួងយុត្តិធម៌ថាពួកគាត់ស្នើសុំឱ្យក្រសួងមេត្តា​ជួយអន្ដរាគមន៍ទម្លាក់បទចោទប្រកាន់ទៅលើតំណាងសហគមន៍ចំនួន២រូប គឺអ្នកស្រី ផាវ ញ៉ើង និងឈ្មោះ សេង​ លីន ដែលសាលាដំបូងខេត្ដកោះកុង​បានចោទពីញុះញង់​ឱ្យ​ប្រព្រឹត្ត​អំពើបង្កឱ្យមានភាពវឹកវរដល់សន្ដិសុខសង្គម និងបរិហាកេរ្ដិ៍ជាសាធារណៈ ក្នុងសំណុំរឿង​ព្រហ្មទណ្ឌដែលចុះថ្ងៃទី៣ ខែមករា ឆ្នាំ២០២០ ដែលមានជម្លោះនឹងក្រុមហ៊ុនលោកឧកញ៉ា លី យ៉ុងផាត់ ចាប់តាំងពីឆ្នាំ២០០៦មកម្ល៉េះ។

នៅក្នុងញត្ដិដដែលបន្ដថា រហូតមកដល់២០១៨ ដោយមានការដោះស្រាយជាគោល​នយោបាយជាដីធ្លីនិងសំណងរបស់រដ្ឋាភិបាលមកឱ្យប្រជាពលរដ្ឋចំនួន១៧៥គ្រួសារកាន់កាប់និងអាស្រ័យផល។ ដីដែលនៅសល់ពីការបែងចែក ២២២,១៣ហិកតាស្ថិតនៅភូមិជីខ ឃុំជីខលើ ស្រុកស្រែអំបិល ខេត្តកោះកុង នៅឆ្នាំ២០១៩មានបុគ្គលម្នាក់ ឈ្មោះ ឆាយ វី បានមកកៀរគរប្រជាពលរដ្ឋចំណូលថ្មីទៅរស់នៅនិងទិញលក់ដីទាំងនោះយ៉ាងអាណា​ធិបតេយ្យ។

នៅពេលដែលឃើញដូច្នេះ ប្រជាពលរដ្ឋក៏បាននាំគ្នាដាក់ពាក្យបណ្ដឹងទៅអាជ្ញាធរដើម្បី ទាមទារដីមកទុកជាសម្បត្តិរដ្ឋនិងចាត់វិធានការលើបុគ្គលឈ្មោះ ឆាយ វី តាមផ្លូវច្បាប់ ប៉ុន្ដែ អាជ្ញាធរមិនអើពើឡើយ។ ក្រោយមកប្រជាពលរដ្ឋចំនួន២រូប​ត្រូវបាន​បុគ្គលឈ្មោះ ឆាយ វី ប្ដឹងទៅតុលាការខេត្តកោះកុងដោយចោទពីបទញុះញង់​និងបរិហាកេរ្ដិ៍​ជាសាធារណៈ ដោយ សាលាដំបូងខេត្តបានទទួលពាក្យបណ្ដឹងនិងបន្ដនីតិវិធីចំពោះពួកគាត់​តាមផ្លូវច្បាប់ទៅវិញ ដូច្នេះពួកគាត់ថាជារឿងអយុត្តិធម៌ណាស់សម្រាប់ពួកគាត់។

ប្រជាសហគមន៏ដែលមានជម្លោះដីធ្លី មកពីខេត្តកោះកុង ប្រមូលផ្ដុំគ្នាតវ៉ា​នៅមុខ​ក្រសួងយុត្តិធម៌ ក្នុងរាជធានីភ្នំពេញ។ រូបថតថ្ងៃទី៦ ខែកញ្ញា ឆ្នាំ២០២២។ ខេមបូចា/ ព្រីង សំរាំង

រីឯញត្ដិរបស់ប្រជាសហគមន៍ដែលមានជម្លោះជាមួយលោក លី យ៉ុងផាត់ នៅសហគមន៍​ក្នុង​ខេត្តកំពង់ស្ពឺ បានដាក់ទៅខុទ្ទការិយាល័យ និងក្រសួងដែនដី ពលរដ្ឋបានស្នើសុំឱ្យក្រសួង​ទាំង​២ ឱ្យជួយអន្ដរាគមន៍និងពន្លឿនការដោះស្រាយដើម្បីបញ្ចប់ជម្លោះ។

ក្នុងញត្ដិដដែលបញ្ជាក់ថា ដីដែលមានជម្លោះនិងក្រុមហ៊ុនលោក លី យ៉ុងផាត់ មានចំនួន ៤០០០ហិកតាជាង និងមាន១៤៩៦គ្រួសារ ស្ថិតក្នុង៣ឃុំ រួមមានឃុំត្រពាំងជោរ ឃុំអមលាំង និងឃុំ រស្មីសាមគ្គី ដែលមានជម្លោះតាំងពី២០១០មក​និងមិនទាន់មានដោះស្រាយ​ណាមួយ​ដែលពួកគាត់អាចទទួលយកបាននោះទេ ទើបពួកគាត់នាំគ្នាដាក់ញត្ដិដើម្បីមាន​កិច្ច​អន្ដរាគមន៍​ពីក្រសួងនានា។

អ្នកស្រី ជុំ ស្រីនៅ អាយុ៣១ឆ្នាំ ជាតំណាងសហគមន៍៨៤៣ និងជាជនរងគ្រោះមកពីស្រុក​បទុមសាគរ ខេត្តកោះកុង បានប្រាប់ ខេមបូចា នៅមុខក្រសួងយុត្តិធម៌ថា មូលហេតុ​ដែល​ពួកអ្នកស្រីនាំគ្នាឡើងមកដាក់ញត្ដិនៅក្រសួងយុត្តិធម៌ ពីព្រោះជម្លោះដីធ្លីរបស់ពួកអ្នកស្រី​បានអូសបន្លាយអស់រយៈពេលជាច្រើនឆ្នាំមកហើយចាប់តាំងពី២០០៦មក ហើយមិនទាន់​ទទួលបាន​ដោះស្រាយសមស្របណាមួយនោះទេ ហើយថែមទាំងតំណាងមួយចំនួន​ត្រូវជាប់​ពាក្យបណ្ដឹងនៅសាលាដំបូងខេត្តកោះកុងទៀត។

អ្នកស្រីបន្ដថា ការដាក់នៅថ្ងៃនេះមិនមែនតែនៅក្រសួងនានាឯភ្នំពេញនោះទេ ប៉ុន្តែក៏មាន​ដាក់​ញត្ដិនៅសាលាខេត្តកោះកុងដើម្បីស្នើសុំឱ្យមានកិច្ចអន្ដរាគមន៍ពីបញ្ហាជម្លោះដីធ្លីផងដែរ។

តំណាងរូបនេះបន្ដថា៖ «ពួកខ្ញុំឡើងមកដាក់ញត្ដិនៅក្រសួងយុត្តិធម៌ដោយសារតែអាជ្ញាធរ​នៅ​ស្រុកបទុមសាគរបានប្ដឹងតំណាង៨៤៨គ្រួសារចូលសាលាដំបូងខេត្តកោះកុងនិងតំណាង​ផ្សេងៗ​ទៀតដែលគាត់បានប្ដឹង»

អ្នកស្រីបន្ថែមថា៖ «ខ្ញុំយល់ឃើញថាដើម្បីស្វែងរកភាពយុត្តិធម៌មានតែក្រសួងយុត្តិធម៌ទេ ដែលគាត់អាចរកភាពយុត្តិធម៌ជូនតំណាងសហគមន៍ ពីព្រោះក្រសួងយុត្តិធម៌ជាម៉ែជាឪ​និងអាចរកយុត្តិធម៌បាន»

តំណាងសហគមន៍១៧៥ម្នាក់ទៀតដែលកំពុងជាប់បណ្ដឹងនៅសាលាដំបូងខេត្តកោះកុង អ្នកស្រី ផាវ ញ៉ើង អាយុ៤៦ឆ្នាំ បានថ្លែងថា អ្នកស្រីសង្ឃឹមថាក្រសួងយុត្តិធម៌​នឹងអាចផ្ដល់​យុត្តិធម៌ជូនអ្នកស្រីនិងតំណាងផ្សេងៗដែលកំពុងរងពាក្យបណ្ដឹងនៅសាលាដំបូងខេត្ត​កោះកុង ហើយក្រសួងនឹងបន្ដទទួលញត្ដិ​របស់ប្រជាពលរដ្ឋ​ដោយយកចិត្តទុកដាក់​និងយក​ទៅពិនិត្យហើយធ្វើកិច្ចអន្ដរាគមន៍ទៅតុលាការខេត្តកោះកុងដើម្បីទម្លាក់ការចោទប្រកាន់លើប្រជាជននិងតំណាង ពីព្រោះប្រជាពលរដ្ឋជាអ្នករងគ្រោះដីធ្លី។

អ្នកស្រីបន្ដថា៖ «ពួកយើងមានបញ្ហារ៉ាំរ៉ៃតាំងពី២០០៦មកទល់នឹងបច្ចុប្បន្ន​គឺដោះ​ស្រាយ​បាន​ តែបានអត់ចប់ អត់ហើយទេ វាអត់អស់ ចឹងខ្ញុំជឿជាក់លើសម្ដេចថា​ខ្ញុំនឹង​ទៅ​ដាក់ញត្តិនៅ​ការិយាល័យសម្ដេចដើម្បីឱ្យមានការអន្ដរាគមន៍»

តំណាងប្រជាសហគមន៍ខេត្តកំពង់ស្ពឺម្នាក់គឺលោក សឹង សុខុម បានរៀបរាប់ថា ពួកគាត់​ជាច្រើននាក់ត្រូវបានអាជ្ញាធររារាំងនិងទប់ស្កាត់មិនឱ្យចេញមកដាក់ញត្តិបានទេ ដោយ​អាជ្ញាធរ​​ដាក់ច្រើនកន្លែងដើម្បីទប់ស្កាត់ រថយន្ដចំនួន២៣គ្រឿង អាចចេញរួចមក​ដល់ទីតាំង​ដាក់ញត្ដិបានតែ២គ្រឿងប៉ុណ្ណោះ។ លោកអះអាងថា ការរារាំងរបស់អាជ្ញាធរចំពោះការ​ដាក់​ញត្តិដើម្បីស្នើសុំកិច្ចអន្ដរាគមន៍នេះជាការបិទសិទ្ធិរបស់ប្រជាពលរដ្ឋ ហើយវាផ្ទុយនឹងច្បាប់​ដែលមានចែងក្នុងរដ្ឋធម្មនុញ្ញាផងដែរ។

លោក សុខុម បន្ដថា៖ «ការដាក់ញត្ដិថ្ងៃនេះគឺចង់ពន្លឿនការដោះស្រាយដោយតម្លាភាព​និង​ឱ្យយុត្តិធម៌ចឹងទៅ កុំឱ្យយើងបាត់បង់ដីម៉ាគំនរ ហើយមកមានដំណោះស្រាយតិចតួច យើង​អត់​អាចទទួលយកបានទេ។ មួយវិញទៀតកុំឱ្យពួកគាត់សន្យាខ្យល់ថ្ងៃណេះ ថ្ងៃណោះ​រហូតរបស់ក្រសួងដែនដីហ្នឹង»

ប្រជាសហគមន៏ដែលមានជម្លោះដីធ្លី មកពីខេត្តកោះកុង ប្រមូលផ្ដុំគ្នាតវ៉ានៅមុខ​ក្រសួងយុត្តិធម៌ ក្នុងរាជធានីភ្នំពេញ។ រូបថតថ្ងៃទី៦ ខែកញ្ញា ឆ្នាំ២០២២។ ខេមបូចា/ ឃាង សុខមាន

លោក ឈិន ម៉ាលីន អ្នកនាំពាក្យក្រសួងយុត្តិធម៌ បានលើកឡើងថា មែនទែនដែលពួកគាត់​យល់ថា​តុលាការចោទដោយមិនមានភស្ដុតាង ចោទមិនត្រឹមត្រូវ គាត់អាចបន្ដប្ដឹងទៅ​សាលាឧទ្ធរណ៍​ទៀត ដើម្បីធ្វើការការពារខ្លួនទៅតាមនីតិវិធីច្បាប់ដែលមានជាធរមាន អានេះ​វាជាគោលការណ៍ច្បាប់គឺវាចឹង។

អ្នកនាំពាក្យរូបនេះបន្ដថា៖ «ប្រសិនបើប្រជាពលរដ្ឋដាក់ញត្ដិមកក្រសួង ក្រសួងនឹង​ទទួល​ពិនិត្យ​ទៅតាមសមត្ថកិច្ច ប៉ុន្ដែជាគោលការណ៍ច្បាប់ ក្រសួងមិនអាចទៅជ្រៀតជ្រែក​កិច្ចការ​របស់តុលាការបានទេ ពាក់ព័ន្ធនិងរឿងចោទឬក៏មិនចោទហ្នឹង បានទេ»។

ចំណែកឯលោក នៅ  រ៉ា មន្ត្រីខុទ្ទការិយាល័យលោកនាយករដ្ឋមន្ដ្រី ហ៊ុន សែន បានបញ្ជាក់​ប្រាប់ ខេមបូចា យ៉ាងខ្លីថា លោកបានទទួលហើយ ប៉ុន្ដែការដោះស្រាយយ៉ាងម៉េច ចាំ​មើល​អ្នកជំនាញពិនិត្យមើលសិន។

លោកបញ្ជាក់ថា៖ «ខ្ញុំបានទទួលហើយ ហើយខាងជំនាញគេពិនិត្យសិន បាទអរគុណ»

បើតាមលោក ញិល ភាព មន្ដ្រីជាន់ខ្ពស់ផ្នែកចងក្រងសហគមន៍​និងតស៊ូមតិ​នៃសមាគម​សម្ព័ន្ធកសិករកម្ពុជា(CCFC) បានថ្លែងថា ការហាមឃាត់ឬក៏ការដាក់ប៉ារ៉ាស់​របស់អាជ្ញាធរ​ដើម្បីរារាំងប្រជាពលរដ្ឋមិនឱ្យឡើងមកដាក់ញត្ដិជាទង្វើមួយមិនសមស្របទៅតាមច្បាប់ដែលមានចែងនោះទេ ពីព្រោះប្រជាពលរដ្ឋជាម្ចាស់អំណាច​និងជាអ្នកប្រគល់អំណាចទៅឱ្យ​មន្ដ្រី​ស្ថាប័នគ្រប់គ្រងទាំងអស់តាំងពីថ្នាក់មូលដ្ឋានដល់ថ្នាក់ជាតិហ្នឹង។

លោកបន្ដថា សិទ្ធិស្វែងរកដំណោះស្រាយ ពលរដ្ឋទាំងអស់មានសិទ្ធិពេញលេញ​ក្នុងការ​តស៊ូ​មតិ ជាពិសេសអាជ្ញាធរមិនគួរប្រើការរារាំងអស់ហ្នឹងបិទសិទ្ធិពលរដ្ឋនោះទេ។

លោក ​ភាព ​បន្ដថា៖ «ការយល់ឃើញរបស់ខ្ញុំផ្ទាល់ថា អាជ្ញាធរត្រូវតែគោរពនូវច្បាប់​បទដ្ឋាន​គតិយុត្តិដែលរដ្ឋយើងជារដ្ឋហត្ថលេខីបានដាក់ឱ្យប្រើប្រាស់ដែលមានទាំងរដ្ឋធម្មនុញ្ញផងដែរ ហើយមិនគួរបិទសេរីភាពប្រជាពលរដ្ឋមិនឱ្យឡើងមកភ្នំពេញដើម្បីមកដាក់ញត្ដិទាមទាស្វែង​រកដំណោះស្រាយដីធ្លីពីស្ថាប័នពាក់ព័ន្ធនោះទេ»

លោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា ការដាក់ញត្ដិ​របស់ប្រជាពលរដ្ឋវាជារឿងត្រឹមត្រូវណាស់នៅពេលដែលប្រជាពលរដ្ឋមាន​ជម្លោះដីធ្លី​ណា​មួយ​កើតឡើងពិតណាស់គឺពួកគាត់តែងតែស្វែងរកកិច្ចអន្ដរាគមន៍ពីស្ថាប័ន​ពាក់ព័ន្ធ​ទាំងអស់​ហ្នឹងហើយ ជាពិសេសក្រសួងផ្ទាល់តែម្ដងត្រូវយកចិត្តទុកដាក់​ឱ្យបានខ្ពស់​ទៅលើបញ្ហា​ដីធ្លី​ហ្នឹង ហើយលោកថាសុំកុំចេះតែប្រើបា្រស់​ប្រព័ន្ធតុលាការជាខ្នងបង្អែកដើម្បី​គាបសង្កត់​ប្រជាពលរដ្ឋទន់ខ្សោយដែលគ្នាកំពុងតែឈឺចាប់និងការបាត់បង់ដីធ្លីផ្ទះហើយ តែ​បែរ​ជាត្រូវ​មក​រងគ្រោះនឹងប្រព័ន្ធតុលាការ វាជារឿងមិនត្រឹមត្រូវឡើយ។​

លោកបន្ដថា ប្រសិនបើតុលាការប្រើសម្រាប់អ្នកមានអំណាច អ្នកមានលុយ នោះការរង​គ្រោះ​នៅតែបន្ដគ្មានថ្ងៃចប់ឡើយ ជាពិសេសបញ្ហាធំជាងគេគឺប្រជាពលរដ្ឋដែលត្រូវ​សម្ពាធ​ពីប្រព័ន្ធ​តុលាការមុនគេ។

លោក សំអាត បន្ថែមថា៖ «យើងជាអង្គការសង្គមស៊ីវិលនៅតែទទូចស្នើសុំឱ្យក្រសួង​ឬស្ថាប័ន​ទាំងអស់មេត្ដាបន្ដដោះស្រាយបញ្ហាជូនប្រជាពលរដ្ឋដោយសន្ដិវិធីដើម្បីបញ្ចប់រឿងរ៉ាវវិវាទដីធ្លីនេះទៅ​ ហើយចៀសវាងការប្រើប្រាស់នូវប្រព័ន្ធតុលាការដែលជាការដាក់គំនាប ជាការ​គំរាម​កំហែងទៅលើសហគមន៍នោះ»

ប្រជាសហគមន៏ដែលមានជម្លោះដីធ្លី មកពីខេត្តកោះកុងនិងកំពង់ស្ពឺ ប្រមូលផ្ដុំគ្នាហែរទៅដាក់ញត្តិ នៅខុទ្ទកាល័យនាយករដ្ឋមន្ត្រី ក្នុងរាជធានីភ្នំពេញ។ រូបថតថ្ងៃទី៦ ខែកញ្ញា ឆ្នាំ២០២២។ ខេមបូចា/ ព្រីង សំរាំង

បើតាមការបញ្ជាក់របស់តំណាងសហគមន៍ថាពួកគាត់ចំនួន២ខេត្តនិង៦ស្រុក មានគ្នា​១ ០០៨​នាក់គ្រោងនឹងឡើងមកដាក់ទាំងអស់គ្នាប៉ុន្ដែត្រូវអាជ្ញាធរមូលដ្ឋានរារាំងនិងទប់ស្កាត់មិនឱ្យពួកគាត់ចេញមកបានទេ។ ការណ៍នេះពួកគាត់អះអាងថាជាការបិទសិទ្ធិសេរីភាព​របស់ពលរដ្ឋ​ក្នុង​ការតស៊ូមតិដែលមានចែងក្នុងច្បាប់នៃព្រះរាជាណាចក្រកម្ពុជា។

បើតាម​តំណាង​របស់​ពលរដ្ឋ៨៤៣គ្រួសារអះអាង​ថា ដីស្រែដី​ចម្ការ​របស់​ពួក​គាត់ត្រូវ​បាន​ក្រុមហ៊ុនកោះកុង ​ស៊ូហ្គើរ (Koh Kong Sugar) និងក្រុមហ៊ុនកោះកុង​ផ្លេនថេសិន (Koh Kong Plantation) របស់​លោក លី យ៉ុងផាត់ បាន​យក​គ្រឿងចក្រ​មក​ឈូស​ឆាយ​រឹបអូស​យក​ដី​ពលរដ្ឋ​​តាំង​ពី​ឆ្នាំ២០០៦ សរុប ១ ៧២៧,៦ហិកតា តែ​មក​ទល់​ពេល​នេះ​ពលរដ្ឋ​មិន​ទាន់​បាន​ទទួល​សំណង​សមរម្យ​ពី​ក្រុមហ៊ុន​ទាំង​ពីរ​នោះ​ទេ។

កន្លង​មក​ពលរដ្ឋ​ដែល​មាន​ជម្លោះ​ជាមួយ​ក្រុមហ៊ុន​ស្ករ​អំពៅ​របស់​លោក លី យ៉ុងផាត់ បាន​ដាក់​បណ្ដឹង​ទៅ​សាលា​ខេត្តកោះកុង ដើម្បី​ឲ្យ​តុលាការ​ជួយ​រក​យុត្តិធម៌​ឲ្យ​ពួក​គាត់ ប៉ុន្តែ​បែរ​ជា​ត្រូវ​មន្ត្រី​អាជ្ញាធរ​ខេត្ត​ប្ដឹង​បក​មក​ប្រជាពលរដ្ឋ​វិញ ក្នុង​នោះ​មាន​ពលរដ្ឋ​ទាំង​អស់ ១៦នាក់ ដែល​​ត្រូវ​ជាប់​បណ្ដឹង​ក្នុង​តុលាការខេត្ត ក្រោម​បទ​ចោទ «បង្ក​ចលាចល និង​ធ្វើ​ឲ្យ​ខូច​សណ្ដាប់ធ្នាប់​សាធារណៈ» ការ​ចោទ​ប្រកាន់​នេះ ធ្វើ​ឲ្យ​ពលរដ្ឋ​យល់​ថា ពួក​គាត់​បាន​រង​នូវ​ភាព​អយុត្តិធម៌​យ៉ាង​ខ្លាំង​ពី​សំណាក់​អាជ្ញាធរ៕

580 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម