សមាគមសម្ព័ន្ធអ្នកសារព័ត៌មានកម្ពុជា

មន្រ្តីសហគមន៍ព្រួយបារម្ភពីការបាត់បង់ព្រៃឈើនៅតំបន់ព្រៃឡង់ ក្រោយរកឃើញការកាប់បំផ្លាញព្រៃឈើថ្មីៗ

មន្ត្រីសហគមន៍ប្រទះឃើញការកាប់បំផ្លាញព្រៃឈើនៅចំណុចស្ទឹងដំរី ស្រុកសណ្តាន់ ខេត្តកំពង់ធំ។ (រូបភាពផ្តល់ឱ្យ)
មន្ត្រីសហគមន៍ប្រទះឃើញការកាប់បំផ្លាញព្រៃឈើនៅចំណុចស្ទឹងដំរី ស្រុកសណ្តាន់ ខេត្តកំពង់ធំ។ (រូបភាពផ្តល់ឱ្យ)

ក្រុមបណ្តាញព្រៃឡង់បានរកឃើញការកាប់បំផ្លាញព្រៃឈើថ្មីៗបន្ថែមទៀតនៅតំបន់ព្រៃឡង់ និងតំបន់សហគមន៍ក្នុងខេត្តកំពង់ធំ ដែល​ជាក្តីព្រួយបារម្ភពីការហិនហោច​ព្រៃឈើ​ក្នុងតំបន់​​ការពារ​​នេះ ហើយប្រឈមនឹងរលាយអស់ជាមិនខានបើសិនជាក្រសួងពាក់ព័ន្ធ​មិនរិតបន្តឹង​ការការពារនោះទេ។

លោក​ ហឿន សុភាព មន្រ្តីសម្របសម្រួលព្រៃឡង់ប្រចាំខេត្តកំពង់ធំ​បានឱ្យដឹងថា មន្រ្តី​សហគមន៍​​ចុះល្បាតកាលពីថ្ងៃទី១៤ទៅ១៥ខែមករាឆ្នាំ២០២៤​បានរកឃើញ​ក្រុមល្មើស​ប្រើ​ប្រាស់​រណាយន្តអារកាត់​ច្រៀកឈើធំៗ​អស់ប្រហែល១០ដើមលើ៤ទៅ៥ទីតាំង​ផ្សេង​គ្នា​ថ្មីបន្ថែមទៀតក្នុង​ចំណុចស្ទឹងដំរី ស្រុកសណ្តាន់ស្ថិតក្នុងតំបន់ព្រៃឡង់។

លោក ហឿន សុភាព បន្ថែមថា៖ «ខ្ញុំឃើញគេកាត់ឈើច្រៀកឈើ៤ទៅ១០គល់ជាគ្រឿងផ្ទះ​ជាផ្ទោង ជាផ្លាន ជាក្តារឃើញកាប់ថ្មីដូចជាដើមស្រឡៅ កកោះ និងឈើទាលអី! ពេលគេ ឃើញ​យើងគេរត់អស់ទៅ! តែគេដឹកឈើ​ទៅខ្លះ នៅសល់ខ្លះមិនដឹងខាងណានោះទេ​ក្នុងដែន​មន្រ្តី​បរិស្ថានការពារនោះ»

មន្រ្តីសហគមន៍ខាងលើបន្តថា ការកាប់បំផ្លាញព្រៃឈើនៅតំបន់ព្រៃឡង់ឃើញមានប្រើប្រាស់​រូបភាព​ធំៗ​ចំនួនពីរ​ដូចជាការកាប់ អារជ្រៀកឈើដឹកចេញដោយប្រើរណាយន្ត និងការរុករាន​ព្រៃ​ឈើ​យកដីធ្វើជាកម្មសិទ្ធិរបស់អ្នកភូមិ និងអ្នកមកពីខាងក្រៅជាដើម។ បន្ថែមពីនោះក៏មាន កាប់រានព្រៃយកសត្វស្វា យកសំពោច និងការដាក់អន្ទាក់ ការដាក់ខ្សែភ្លើងឆក់សត្វកម្រ ព្រម​ទាំង​​​ការ​​ប្រើប្រាស់កាំ​ភ្លើងកែ​ឆ្នៃបរបាញ់សត្វលឺរំពងព្រៃផងដែរ។

លោក សុភាព ឱ្យដឹងបន្តថា កាលពីខែវិច្ឆិកា និងខែធ្នូ ឆ្នាំ២០២៣ មន្រ្តីសហគមន៍បាន​ចុះ​ល្បាត​​រកឃើញការ​កាប់រុករានដីព្រៃថ្មីៗប្រហែល៣០ទៅ៤០ហិកតា​នៅតំបន់អូរតាលោក​ និង​ប្រមាណ​​​​​៤០​ហិកតានៅចំណុចអូរដាសស្គរក្នុងឃុំមានរិទ្ធ​ព្រមទាំងព្រៃសហគមន៍​នៅចំណុច​អូរធ្នង់​ក្នុងឃុំដងកាំបិត ស្រុកសណ្តាន់ ជាច្រើនហិកតា។

លោក ប៊ុត បាន ប្រធានសហគមន៍អូរធ្នុងបានឱ្យដឹងថា បច្ចុប្បន្ននេះ​ដីសហគមន៍អូរធ្នុង​ប្រមាណជិត​៣ពាន់ហិកតាត្រូវបានប្រជាជនក្នុងសហគមន៍ និងអ្នកមាន​លុយមកពី​ខាង​ក្រៅ​កាប់រុករានធ្វើកម្មសិទ្ធិអស់ប្រហែលពាក់កណ្តាលទៅហើយបើទោះជាសហគមន៍ប្រឹងប្រែង​ជួយទប់ស្កាត់យ៉ាងណាក៏ដោយ។

លោក ប៊ុត បាន បន្ថែមថា៖ «នៅពេលល្បាតសហគមន៍ប្រទះឃើញតែងតែហៅប្រជាជន​ដែល​រុករានព្រៃឈើមកណែនាំបន្តបន្ទាប់ដែរ។ ហើយស្ទើររាល់យប់តែងតែឃើញគោយន្ត​ដឹកឈើ​ចេញ​ពីព្រៃឡង់កាត់តាមចំការកៅស៊ូឆ្លងកាត់ព្រៃសហគមន៍ចេញទៅខាងក្រៅ​មិនដឹងទៅ​ខាង​ណានោះទេ»។

ដោយឡែកលោក សឿ សុជា អ្នកសារព័ត៌មានអនឡាញមួយរូបដែលតែងតែចុះទៅកាន់​តំបន់​ព្រៃ​ឡង់​ក្នុង​ខេត្តកំពង់ធំជាញឹកញាប់ប្រៀបដូចសកម្មជនព្រៃឈើ​មួយរូបដែរបាន ឱ្យ​ដឹង​ថា ចាប់តាំងពីឆ្នាំ២០២២ដល់បច្ចុប្បន្ន លោកប្រទះឃើញការប្រើរណាយន្តអាររំលំដើមឈើធំៗ​ក្នុង​ព្រៃឡង់ និងការកាប់បំផ្លាញព្រៃឈើយកដីធ្វើចម្ការជាច្រើនផងដែរ។

លោក សឿ សុជា លើកឡើងថា៖ «ខ្ញុំជួបការកាប់បំផ្លាញព្រៃឈើអស់ច្រើនណាស់​ខ្ញុំមិនដែល​បាន​រាប់ចំនួនទេ»

លោកបន្ថែមថា តំបន់ដែលកាប់បំផ្លាញព្រៃឈើទាំងនោះមាននៅតំបន់ស្នងអន ឃុំសុចិត្រ នៅតំបន់អូរដាសស្គរ ឃុំមានរិទ្ធិ តំបន់អូរក្រពើ តំបន់ត្បែង ឃុំបឹងស្លា និងតំបន់អង់តែន ខេត្តកំពង់ធំ ជាដើម។

លោកបញ្ជាក់ថា តាមការសាកសួរប្រភពនៅតំបន់នោះឱ្យដឹងថាការកាប់រុករានព្រៃនេះ​ក្រៅ​ពីប្រជាសហគមន៍​ក៏មានឈ្មួញមានលុយមានខ្សែ និងពាក់ព័ន្ធមន្រ្តីមួយចំនួនផងដែរ ។

លោក សុជា បន្ថែមថា៖ «ឈ្មួញបានទិឈើពីប្រជាជនដែលរកស៊ីជាយូរឆ្នាំមក​ហើយ​ឲ្យ​ដឹក​លក់​ឲ្យ និងឲ្យលុយខ្ចីសម្រាប់ប្រជាជនធ្វើដើមទុនដើម្បីកាប់ឈើមកលក់ឲ្យពួកគេ»។

មន្ត្រីសហគមន៍ប្រទះឃើញការកាប់បំផ្លាញព្រៃឈើនៅចំណុចស្ទឹងដំរី ស្រុកសណ្តាន់ ខេត្តកំពង់ធំ។ (រូបភាពផ្តល់ឱ្យ)

លោក លឹម យ៉េន មេឃុំដងកាំបិត​ បានថ្លែងទទួលស្គាល់ថាដីព្រៃក្នុងឃុំលោកពិតជាមានការ កាប់បំផ្លាញរុករានមែននាពេលកន្លងមក ប៉ុន្តែបច្ចុប្បន្នស្ងប់ស្ងាត់ហើយដោយសារតែ​មានការ​ទប់ស្កាត់ខ្លាំង​ដោយមន្រ្តីឃុំ មន្រ្តីប៉ុស្តិ៍ និងថ្មីៗមានការចូលរួមពីសហគមន៍ព្រៃឡង់ដែរ ​បាន​ចុះដើរល្បាតក្នុងមួយខែម្តង។ លោកបន្តថា ក្នុងការល្បាតនេះពេលខ្លះប្រទះឃើញកំពុង​អារ​ឈើ​ពួកគេភ័យរត់ចោលម៉ាស៊ីនបាត់ចាប់មនុស្សមិនបានប៉ុន្តែពេលខ្លះស្គាល់ថាជាប្រជាជន​ក្នុងភូមិក៏បានហៅមកធ្វើការអប់រំពួកគេឱ្យបញ្ឈប់ការកាប់រុករានព្រៃឈើបន្តទៀត។

លោកបន្ថែមថា៖ «នៅតែមានការកាប់បំផ្លាញព្រៃឈើ តាមខ្ញុំមើលកុំតែមានការទប់ស្កាត់ខ្លាំង​វាអស់ព្រៃយូរមកហើយ»។   

លោកថា ដីព្រៃសហគមន៍ភាគច្រើនប្រជាជននៅសហគមន៍បានកាប់រុករានធ្វើចម្ការ និង​ខ្លះ​បាន​កាប់រុករាន រួចលក់ឱ្យអ្នកខាងក្រៅមកពីស្រុកសណ្តាន់ មកពីកំពង់ចាម និងមកពី​កន្លែង​នានា​ជាដើម។

លោកមេឃុំបន្ថែមថា៖ «ជួនកាលអ្នកភូមិកាប់លក់ឱ្យគេ គេចូលមកកាប់ពង្រីកបន្ថែមទៀតទៅ អ្នកភូមិកាប់បាន២០ទៅ៥០ម៉ែត្រអី លក់ឱ្យអ្នកក្រៅគេមកកាប់ពង្រីកបន្ថែម​ទំរាំយើងដឹង​កាប់​វាល​អស់ច្រើន»

លោក លឹម យ៉េន ឱ្យដឹងថា ឃុំដងកាំបិតមានបីសហគមន៍ក្នុងនោះសហគមន៍អូរធ្នង់ជាង ២ ០០០ហិកតា សហគមន៍អូរតាគង់ជាង ២ ០០០ហិកតា និងសហគមន៍គគីរប្រហោងជាង​១ ៥០០ហិកតា ក្នុងចំណោមបីសហគមន៍នេះមានតែសហគមន៍អូរធ្នង់មួយប៉ុណ្ណោះសល់ព្រៃ​ច្រើនជាងគេចំណែកពីរសហគមន៍ទៀតកាប់វាលស្ទើរអស់ទៅហើយ។

លោក លឹម យ៉េន ​បន្ថែមថា៖ «មួយសហគមន៍១ពាន់ជាង២ពាន់ហិកតាជាងកាប់ចង់អស់​ហើយ សល់តិចតួចប៉ុណ្ណោះ រដ្ឋាភិបាលឱ្យធ្វើសាលាកប័ត្របម្រុងកាត់ឆ្វៀលតែធ្វើតែដីចម្ការ​នោះទេ ដីវាលគឺមិនធ្វើឱ្យនោះទេ។»

ចំណែកលោក ស៊ីន វណ្ណវុធ អភិបាលស្រុកសណ្តាន់ បានមានប្រសាសន៍ថា តំបន់ព្រៃឡង់ កន្លងទៅពិតជាមានការកាប់រុករានដីព្រៃធ្វើកម្មសិទ្ធិមែន ប៉ុន្តែបច្ចុប្បន្ននេះស្ងប់ស្ងាត់​ហើយ​ពុំ​មានការកាប់រានថ្មីទៀតនោះទេ។​លោកថាកន្លងទៅអន្តរក្រសួងបានកាត់ឆ្វៀល​ឱ្យ​ប្រជាពលរដ្ឋ​​ដែលអា​​ស្រ័យផលជាក់ស្តែង ចំណែកដីដែលកាប់រានថ្មីៗ គឺដកហូតយក​មកវិញ​រាប់ពាន់​ហិកតា​​រួចមកហើយ ដូចជានៅចំណុចព្រៃអង់តែនដែលជាតំបន់រ៉េដបូកជាដើម។

លោកអភិបាលស្រុកបន្ថែមថា ចំណែកចំណុចស្ទឹងដំរីក្នុងឃុំសុចិត្រដែលមានការរុករានថ្មីៗ​នោះលោកបានឱ្យអភិបាលរងស្រុកដឹកនាំកម្លាំងជំនាញចុះទៅពិនិត្យដើម្បីធ្វើរបាយការណ៍ទៅខេត្តដើម្បីស្នើសុំដកហូតយកមកវិញផងដែរ ។

លោកថ្លែងថា៖ «វាមានជនខិលខូច វាពិបាកណាស់យើងមិនដឹងចោទអ្នកណា លើអ្នកណីទេ ខ្ញុំទើបមកកាន់ស្រុកនេះជិតមួយឆ្នាំ ក្តាប់ភូមិសាស្រ្តមិនទាន់ជុំដែរ កន្លងមកមានការកាប់រាន​ដើម្បីលក់ឱ្យក្រុមហ៊ុនចិនអី តែឥឡូវនេះវាស្ងប់ស្ងាត់ហើយមិនមានកាប់ទេ បើសិនកាប់ថ្មីៗមិន​មាន​ការអាស្រ័យផលទេគឺដកហូតមកវិញហើយ»

លោកបញ្ជាក់ថា បន្ថែមថាចំណែកការរត់ពន្ធឈើពីតំបន់ព្រៃឡង់បច្ចុប្បន្ននេះ គឺក្នុងលក្ខណៈ​លួច​ដឹកទ្រង់ទ្រាយតូចៗតាមគោយន្តកន្រ្តៃប៉ុណ្ណោះ មិនមានដឹកលក្ខណៈទ្រង់ទ្រាយធំនោះ ឡើយ​​ដោយសារ​អាជ្ញាធរ និង​មន្រ្តីពាក់ព័ន្ធមានការគ្រប់គ្រងតឹងតែង។

មន្ត្រីសហគមន៍ប្រទះឃើញការកាប់បំផ្លាញព្រៃឈើនៅចំណុចស្ទឹងដំរី ស្រុកសណ្តាន់ ខេត្តកំពង់ធំ។ (រូបភាពផ្តល់ឱ្យ)

លោក ប៉ែន វណ្ណារិទ្ធិ ប្រធានមន្ទីរកសិកម្មខេត្តកំពង់ធំ បានបដិសេធការធ្វើអត្ថាធិប្បាយកាល​ពី​ល្ងាចថ្ងៃទី១៩ ខែមករា ឆ្នាំ២០២៣ ​ដោយលោកប្រាប់ថាកំពុងជាប់​ប្រជុំ។

ជុំវិញការលើកឡើងពីការកាប់បំផ្លាញព្រៃឈើខាងលើនេះដែរលោក តុប កក្កដា ប្រធាន​មន្ទីរ​បរិស្ថានខេត្តកំពង់ធំ ​បានបដិសេធធ្វើអត្ថាធិប្បាយដោយលោកបញ្ជាក់យ៉ាងខ្លីថា៖ «ហឺបាន​ហើយ ដឹងកាប់ត្រង់ណាទេ បងឯងទទួលបងសរសេរតាមហ្នឹងទៅ! ព្រោះខ្ញុំអត់ដែលទទួល​ផង!» ។

ខេមបូចា មិនអាចទំនាក់ទំនងលោក ផៃ ប៊ុនឈឿន អ្នកនាំពាក្យក្រសួងបរិស្ថាន​ដើម្បី​បំភ្លឺ បន្ថែមបាននៅឡើយទេ ។

ព្រៃឡង់ត្រូវបានរាជរដ្ឋាភិបាលដាក់ជាតំបន់ការពារតាំងពីឆ្នាំ២០១៦មកដែលមានផ្ទៃដីទំហ៊ុំជាង៤៨ម៉ឹនហិកតាលាតសន្ធឹងលើខេត្តចំនួនបួនក្នុងនោះមានខេត្តក្រចេះ ព្រះវិហារ កំពង់ធំ និង​ខេត្តស្ទឹងត្រែងដោយបានចាត់ជាតំបន់ដែលមានព្រៃស្រោងធំជាងគេនៅក្នុងប្រទេសកម្ពុជា ។

ក្រសួងបរិស្ថានដែលមានលោក អ៊ាង សុផល្លែត ជារដ្ឋមន្រ្តីបានបង្ហាញទស្សនៈ លើផេក​ផ្លូវ​ការ​​របស់ក្រសួងបរិស្ថានកាលពីថ្ងៃទី១៦ ខែធ្នូ ឆ្នាំ២០២៣បានបញ្ជាក់ថា ក្រសួង​​បរិស្ថាន​បាន​ដាក់ចេញវិធានការចម្បងចំនួន៤ ដើម្បីគ្រប់គ្រងធនធានធម្មជាតិ និង​អភិរក្សជីវៈចម្រុះ ឲ្យ​មាន​ប្រសិទ្ធភាព រួមមាន៖ ១) ក្រសួងបរិស្ថានអនុវត្តច្បាប់១០០% និង​បញ្ចប់​នូវ​វប្បធម៌​អប់រំ​ណែនាំ និងចុះកិច្ចសន្យា ហើយដោះលែងចំពោះអ្នកប្រព្រឹត្ត​បទ​ល្មើស​ធនធានធម្មជាតិ។ ២) ក្រសួង​បរិស្ថាន សហការជាមួយគណៈបញ្ជាការឯកភាព​រដ្ឋបាល​រាជធានី​-ខេត្ត ជាពិសេសជាមួយ​អាជ្ញាធរ​ដែនដី ឲ្យបានស្អិតរមួត ដើម្បីទប់ស្កាត់បទល្មើស​ធនធានធម្មជាតិ នៅតាមតំបន់​ការ​ពារ​​ធម្មជាតិ។ ៣) សហការជាមួយអង្គភាពប្រឆាំង​នឹង​អំពើ​ពុករលួយ និងបញ្ជាការដ្ឋាន​កងរាជ​អាវុធហត្ថលើផ្ទៃប្រទេស ធ្វើការបង្រ្កាបនិងទប់ស្កាត់​បទ​ល្មើស​ធនធានធម្មជាតិ បន្ថែម​លើកិច្ច​សហការ​ជាមួយអាជ្ញាធរមូលដ្ឋាន ដែលបានអនុវត្ត​កន្លង​មកនិង ៤)​ការដាំដើមឈើ​ឱ្យច្រើន​ជាង​ការកាប់ដើម្បីរក្សានូវកំណើន ជាពិសេសការ​ជំរុញ​ការ​ដាំស្តាព្រៃឈើ ជាទិសដៅ​អាទិភាព​បង្កើនគម្របព្រៃឈើឲ្យបាន៦០% នៅឆ្នាំ២០៥០។ តាម​រយៈវិធានការនេះ ក្រសួងបរិស្ថាន​បាន​ដាក់ចេញយុទ្ធនាការថ្ងៃទី១០ តុលា នឹងធ្វើការផ្តល់ និងដាំដើមឈើយ៉ាងតិច១លាន​ដើម​ក្នុង​មួយឆ្នាំចាប់ពីឆ្នាំ២០២៤។

ទោះបីយ៉ាងណាលោក ​ហឿន សុភាព មន្រ្តីសម្របសម្រួលព្រៃឡង់នៅតែ​សម្តែងក្តីព្រួយបារម្ភ ថាព្រៃឈើតំបន់ព្រៃឡង់នៅតែមានការកាប់បំផ្លាញរាល់ថ្ងៃ ទោះបីជាមានមន្រ្តី​ឧទ្យាននុរក្ស​ក្រសួងបរិស្ថាន​ដែលមានកម្លាំងច្រើនការពារយ៉ាងណាក៏ដោយ។

លោក សុភាព បន្ថែមថា៖« យើងមានការព្រួយបារម្ភមែនទេ ខ្ញុំគិតថាបើរដ្ឋាភិបាលមិន​ចាត់​វិធានការរិតបន្តឹងច្បាប់ឱ្យបានតឹងរឹងនោះទេខ្ញុំគិតថាវាមិនអាចនៅយូរទេព្រៃឡង់បើវាចេះតែបាត់បង់ពីរមួយថ្ងៃទៅមួយថ្ងៃដូច្នេះនោះ»

បណ្តាញព្រៃឡង់បានបង្ហាញរបាយការណ៍ឱ្យដឹងថា រយៈពេល១២ខែ ឆ្នាំ២០២៣ ខេត្តទាំង​បួន ក្នុងតំបន់ព្រៃឡង់មានខេត្តកំពង់ធំ ខេត្តព្រះវិហារ ខេត្តក្រចេះ និងខេត្តស្ទឹងត្រែង បានរក​ឃើញ បទល្មើសក្នុងតំបន់ព្រៃឡង់ចំនួន​២៥៨៤ករណី​ក្នុងនោះមានប្រភេទបទល្មើស​ទាក់ទង​ការសម្បទានរ៉ែ ការកាប់រានដីព្រៃ បទល្មើសព្រៃឈើនិងបទល្មើសសត្វព្រៃជាដើម​៕

956 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម