ក្រុមឃ្លាំមើលរបស់រដ្ឋាភិបាលហូឡង់ កាលពីថ្ងៃសុក្រសប្ដាហ៍កន្លងទៅ បានទទួលយកពាក្យបណ្ដឹងមួយដែលចោទប្រកាន់ថា ក្រុមហ៊ុនវិនិយោគសង្គម Oikocredit បានរួមចំណែកនៅក្នុងការរំលោភសិទ្ធិនៅក្នុងវិស័យមីក្រូហិរញ្ញវត្ថុនៅប្រទេសកម្ពុជា។
បណ្ដឹងនេះត្រូវបានធ្វើឡើងកាលពីខែធ្នូកន្លងទៅ ដោយអង្គការមិនមែនរដ្ឋាភិបាលចំនួន៣ ដោយចោទប្រកាន់ថា ក្រុមហ៊ុនវិនិយោគសង្គម Oikocredit ដែលមានមូលដ្ឋាននៅក្នុងប្រទេសហូឡង់ បានដឹងពីផលប៉ះពាល់អវិជ្ជមានដែលជាប់ទាក់ទិននឹងវិស័យមីក្រូហិរញ្ញវត្ថុរបស់កម្ពុជា តាំងពីឆ្នាំ២០១៧មកម្ល៉េះ ប៉ុន្តែនៅតែបន្តវិនិយោគជាមួយគ្រឹះស្ថានមីក្រូហិរញ្ញវត្ថុ ប្រាសាក់, អម្រឹត និង LOLC Cambodia ដដែល។
ក្រុមឃ្លាំមើលរបស់ប្រទេសហូឡង់បានកត់សម្គាល់នៅក្នុងរបាយការណ៍វាយតម្លៃរបស់ខ្លួនថា ការចោទប្រកាន់ពីការរំលោភសិទ្ធិរបស់គ្រឹះស្ថានទាំងនេះ រួមមាន «ការគំរាមកំហែង និងបំភិតបំភ័យ ការអនុវត្តការផ្ដល់កម្ចីដែលលក្ខណៈជញ្ជក់បឺតឈាម, ការលក់ដីធ្លីដោយបង្ខំក្នុងនោះរាប់បញ្ចូលទាំងដីធ្លីដែលកាន់កាប់ដោយជនជាតិដើមភាគតិច, ពលកម្មកុមារ, ការបាត់បង់ផ្ទះសម្បែងនិងមុខរបរ, ការធ្វើចំណាកស្រុកដោយបង្ខំ, អសន្តិសុខស្បៀង និងការបញ្ឈប់ការអប់រំរបស់កុមារ»។
ពាក្យបណ្ដឹងនេះ «ស័ក្ដិសមនឹងទទួលបានការពិចារណាបន្ថែមទៀត» ហើយការចោទប្រកាន់គឺមានលក្ខណៈ«សមហេតុផល» ។ នេះបើតាមការកត់សម្គាល់របស់ក្រុមឃ្លាំមើលនៅក្នុងការវាយតម្លៃរបស់ខ្លួន។
ពាក្យបណ្ដឹង ដែលបានផ្ញើទៅកាន់មន្ត្រីទំនាក់ទំនងថ្នាក់ជាតិសម្រាប់ការប្រតិបត្តិធុរកិច្ចប្រកបដោយការទទួលខុសត្រូវ (NCP) របស់ប្រទេសហូឡង់ ដែលជាប្រព័ន្ធសាទុក្ខមួយគាំទ្រដោយរដ្ឋាភិបាល ដែលត្រួតពិនិត្យទៅលើសកម្មភាពរបស់ក្រុមហ៊ុនហុល្លង់ ផ្ដល់ហេតុផលអះអាងថា Oikocredit មិនបានគោរពទៅតាមគោលការណ៍ណែនាំ និងបទដ្ឋានសាកលសម្រាប់ការប្រតិបត្តិធុរកិច្ចរបស់អង្គការកិច្ចសហប្រតិបត្តិការសេដ្ឋកិច្ចនិងអភិវឌ្ឍន៍(OECD)ទេ។
របាយការណ៍វាយតម្លៃបានលើកឡើងថា NCP នឹងអញ្ជើញគ្រប់ភាគីទាំងអស់ឱ្យចូលរួមក្នុងកិច្ចសន្ទនា ហើយប្រសិនបើបញ្ហានេះមិនអាចដោះស្រាយបានតាមរយៈការសម្រុះសម្រួលគ្នាទេ នោះក្រុមឃ្លាំមើលនេះ«នឹងត្រួតពិនិត្យទៅលើបញ្ហានេះ និងផ្ដល់អនុសាសន៍»ដោយឈរលើគោលការណ៍ណែនាំរបស់OECD។
លោកស្រី ណាលី ពីឡូក (Naly Pilorge) នាយិកាផ្នែកផ្សព្វផ្សាយរបស់អង្គការ លីកាដូ បាននិយាយនៅក្នុងសេចក្ដីថ្លែងការណ៍មួយ យ៉ាងដូច្នេះថា៖ «ការរំលោភសិទ្ធិមនុស្សធ្ងន់ធ្ងរនៅក្នុងវិស័យមីក្រូហិរញ្ញវត្ថុរបស់ប្រទេសកម្ពុជាបាននិងកំពុងកើនឡើងអស់រយៈពេលស្ទើរតែមួយទសវត្សរ៍មកហើយ ខណៈដែលអ្នកវិនិយោគបរទេសបានបិទភ្នែកចំពោះរឿងនេះ»។
Oikocredit, គ្រឹះស្ថានមីក្រូហិរញ្ញវត្ថុ ប្រាសាក់ និង អម្រឹត មិនអាចឆ្លើយតបភ្លាមៗចំពោះសំណើសុំការអត្ថាធិប្បាយនៅឡើយទេ ។
លោក សុខ វឿន ប្រធាននាយកប្រតិបត្តិ អិលអូអិលស៊ី ខេមបូឌា ដែលលោកក៏ជាប្រធានសមាគមមីក្រូហិរញ្ញវត្ថុកម្ពុជា (CMA) ផងដែរនោះ បានថ្លែងនៅក្នុងសារតេឡេក្រាម ថា៖ «យើងមិនបានដឹងពីព័ត៌មានលម្អិតជាក់ជាក់នៃបណ្ដឹងនោះទេ»។ លោកបានបន្ថែមថា អិលអូអិលស៊ី ខេមបូឌា គោរពតាម«គោលការណ៍គន្លឹះនៃការការពារអតិថិជន» និងគោរពតាមច្បាប់កម្ពុជា៖ «អិលអូអិលស៊ី គឺជាស្ថាប័នទទួលខុសត្រូវមួយ ដែលធានាការពារផលប្រយោជន៍របស់ភាគីពាក់ព័ន្ធ ដូចជា អ្នកខ្ចី អ្នកដាក់ប្រាក់ អ្នកឱ្យខ្ចី អ្នកវិនិយោគ ភាគហ៊ុនិក បុគ្គលិក និងសាធារណជន»។
Oikocredit បានថ្លែងថា ការស៊ើបអង្កេតផ្ទាល់ខ្លួនដែលឆ្លើយតបទៅនឹងពាក្យបណ្ដឹង បានរកឃើញថា៖ «ពុំមានសញ្ញានៃការប្រព្រឹត្តខុសណាមួយពីសំណាក់ដៃគូរបស់ Oikocredit នៅកម្ពុជាឡើយ» ប៉ុន្តែ ថា ពួកគេ«រង់ចាំទទួលព័ត៌មានជាក់លាក់បន្ថែមទៀតអំពីការចោទប្រកាន់» ។ នេះបើយោងតាមការវាយតម្លៃរបស់ក្រុមឃ្លាំមើលហូឡង់។
របាយការណ៍វាយតម្លៃក៏បានកត់សម្គាល់ផងដែរថា Oikocredit ក៏បាននិយាយដែរថា ខ្លួនមើលឃើញ«ភ័ស្តុតាងនៃផលល្អរបស់មីក្រូហិរញ្ញវត្ថុទៅលើការធ្វើឱ្យប្រសើរឡើងនូវជីវិតរស់នៅរបស់ប្រជាជន ហើយ Oikocredit ដឹងពីផលប៉ះពាល់ជាសក្ដានុពលដែលអាចកើតចេញពីការអនុវត្តមិនត្រឹមត្រូវនៅក្នុងវិស័យនេះ» និងថា៖ «ដូច្នេះហើយ ការប្រព្រឹត្តខុសឆ្គងណាមួយគឺមិនអាចទទួលយកបានទេ ចំពោះពួកគេ»។
ប៉ុន្តែ Oikocredit បានឱ្យគេធ្វើការសិក្សាមួយកាលពីឆ្នាំ២០១៧ ទៅលើវិស័យមីក្រូហិរញ្ញវត្ថុនៅកម្ពុជា ដែលបានរកឃើញ«ឧទាហរណ៍ជាច្រើននៃការអនុវត្តមិនសមស្របនៅក្នុងការបញ្ចេញកម្ចីនិងការទារបំណុល» និងថា អ្នកខ្ចីចន្លោះពី ២៨% និង ៥០% នៃអ្នកខ្ចីមីក្រូហិរញ្ញវត្ថុនៅកម្ពុជា គឺ«គ្មានលទ្ធភាពសងបំណុល», «ស្ថិតក្នុងភាពលំបាក» ឬ«ប្រឈមនឹងហានិភ័យ»។ អ្នកខ្ចីជាងមួយភាគបួន បានជំពាក់បំណុលប្រចាំខែក្នុងកម្រិតមួយដែលលើសពីចំណូលប្រចាំខែ។ នេះបើតាមការរកឃើញដោយការសិក្សានោះ ហើយការសិក្សាមួយនេះមិនទាន់ត្រូវបានចេញផ្សាយជាសាធារណៈឡើយ។
អង្គការ លីកាដូ និងអង្គការ សមធម៌កម្ពុជា បានចេញផ្សាយរបាយការណ៍ចំនួន៥ ស្ដីពីវិស័យមីក្រូហិរញ្ញវត្ថុ ក្នុងនោះរាប់បញ្ចូលទាំងការសិក្សាបែបបរិមាណវិស័យមួយកាលពីពេលថ្មីៗនេះ ដែលទាញចំណាប់អារម្មណ៍ទៅលើការលក់ដីធ្លីនិងផលប៉ះពាល់អវិជ្ជមានដទៃទៀត ដែលជាប់ទាក់ទិនទៅនឹងការអនុវត្តនៃវិស័យមីក្រូហិរញ្ញវត្ថុ ។ រដ្ឋាភិបាលអាល្លឺម៉ង់ក៏បានឱ្យគេធ្វើការសិក្សាបែបបរិមាណវិស័យមួយដែរ ដែលចេញផ្សាយកាលពីឆ្នាំទៅមិញ ដែលបានប៉ាន់ស្មានថា មានករណីលក់ដីធ្លីដែលរុញច្រានដោយបំណុលមីក្រូហិរញ្ញវត្ថុចំនួនច្រើនជាង ១៦៥ ០០០ករណី ដែលកើតឡើងចន្លោះឆ្នាំ២០១៧ និងឆ្នាំ២០២២។
លោកស្រី ពីឡូក ថ្លែងថា៖ «Oikocredit និងវិនិយោគិនដទៃទៀតអះអាងថា ដើម្បីធ្វើឱ្យប្រសើរឡើងនូវជីវិតរស់នៅរបស់សហគមន៍ដែលមានចំណូលទាប»។ លោកស្រីបន្តថា៖ «ដូច្នេះ យើងរំពឹងថាពួកគេពិតជានឹងប៉ះប៉ូវចំពោះបញ្ហាដែលអ្នកខ្ចីបានរងគ្រោះជាយូរយារណាស់មកហើយ»។
ពាក្យបណ្ដឹងប្រឆាំនឹង Oikocredit ស្នើឱ្យមានដំណោះស្រាយកែតម្រូវ ក្នុងនោះរួមទាំងការបង្វែរនូវប្រាក់ចំណេញទាំងអស់ពីកម្ចីទៅឱ្យ ប្រាសាក់, អិលអូអិលស៊ី និង អម្រឹត ចាប់តាំងពីឆ្នាំ២០១៧មក ដាក់ចូលទៅក្នុងមូលនិធិជួយសង្គ្រោះមួយសម្រាប់ជួយដល់អ្នកខ្ចី, ទទួលស្គាល់ជាសាធារណៈអំពីផលប៉ះពាល់អវិជ្ជមានដែលបង្កឡើងដោយការវិនិយោគរបស់ខ្លួន និងបញ្ឈប់នូវការវិនិយោគសិន «រហូតទាល់តែ និងល្គិកណាបណ្ណកម្មសិទ្ធិដីធ្លីដែលដាក់បញ្ចាំជាទ្រព្យធានាសម្រាប់កម្ចីខ្នាតតូច ត្រូវបានប្រគល់ទៅឱ្យម្ចាស់វិញ»។
ពាក្យបណ្ដឹងដដែលក៏អំពាវនាវឱ្យមាន«សវនកម្មឯករាជ្យមួយទៅលើរបៀបដូចម្ដេចបានជានីតិវិធីត្រួតពិនិត្យសុចរិតភាពស្ថាប័ន និងការដាក់ពិន្ទុ ESG ដែលមានស្រាប់នៅក្នុង Oikocredit ខកខានមិនបានគិតគូរដល់ភាពធ្ងន់ធ្ងរនិងវិសាលភាពនៃផលប៉ះពាល់អវិជ្ជមានដែលបានកើតឡើងនៅក្នុងវិស័យមីក្រូហិរញ្ញវត្ថុនៅកម្ពុជា»។
គ្រឹះស្ថាន អម្រឹត, ប្រាសាក់ និង អិលអូអិលស៊ី ខេមបូឌា ក៏ស្ថិតក្នុងចំណោមស្ថាប័នផ្ដល់កម្ចីខ្នាតតូចចំនួន ៦ ដែលកំពុងស្ថិតក្រោមការស៊ើបអង្កេតពីសំណាក់ការិយាល័យទទួលបណ្ដឹងរបស់សាជីវកម្មហិរញ្ញវត្ថុអន្តរជាតិ (IFC) របស់ធនាគារពិភពលោក ជុំវិញការចោទប្រកាន់ពីការរំលោភសិទ្ធិរបស់អ្នកខ្ចីជាពលរដ្ឋខ្មែរ។
អ្នកនាំពាក្យ CMA លោក កាំង តុងងី បានបដិសេធការធ្វើអត្ថាធិប្បាយ ប៉ុន្តែជុំវិញបណ្ដឹងប្រឆាំងនឹង Oikocredit នេះ លោកធ្លាប់បានប្រាប់ ខេមបូចា ថា៖ «យើងទទួលស្គាល់ថា វិស័យនេះមិនមែនល្អឥតខ្ចោះទេ ប៉ុន្តែវិស័យនេះក៏មិនអត់ឱនជាដាច់ខាតចំពោះការអនុវត្តខុសក្រមសីលធម៌ ឬការរំលោភបំពានណាមួយពីសំណាក់សមាជិកបុគ្គលិកនិយោជិតរបស់ខ្លួនដែរ»។
នាយកប្រតិបត្តិអង្គការ សមធម៌កម្ពុជា លោក អ៊ាង វុទ្ធី បាននិយាយថា លោករីករាយដែលឃើញវឌ្ឍនភាពទៅមុខពាក់ព័ន្ធនឹងបណ្ដឹងនេះ។
លោកបាននិយាយថា៖ «វាដល់ពេលវេលាដែល Oikocredit និងវិនិយោគិន«ដើម្បីផលសង្គម»ដទៃទៀត ឈប់ពន្យារពេល និងចាប់ផ្ដើមចាត់វិធានការជាក់ស្ដែងដើម្បីដោះស្រាយកែតម្រូវចំពោះផលប៉ះពាល់អវិជ្ជមានដែលពួកគេរួមចំណែកបង្កើតឱ្យមានឡើង»។
បច្ចុប្បន្នភាព៖ អត្ថបទនេះត្រូវបានធ្វើបច្ចុប្បន្នភាពនៅថ្ងៃទី១៩ ខែកញ្ញា នៅវេលាម៉ោង៤ និង ១៤នាទីរសៀល ម៉ោង ICT ដើម្បីដាក់បញ្ចូលនូវអត្ថាធិប្បាយមួយពីប្រធាននាយកប្រតិបត្តិរបស់ អិលអូអិលស៊ី ខេមបូឌា លោក សុខ វឿន ដែលលោកក៏ជាប្រធាននៃសមាគមមីក្រូហិរញ្ញវត្ថុកម្ពុជា ផងដែរ៕
ប្រែសម្រួលពីអត្ថបទភាសាអង់គ្លេស៖ Complaint Advances Against Investor Oikocredit For Role in Microfinance Sector’s Abuses
