លោក សំ សុគង់ មេធាវីការពាររបស់លោក ថាច់ សេដ្ឋា អះអាងថា អនុប្រធានគណបក្សភ្លើងទៀនរូបនេះមិនបានបំពេញ ឬមានចេតនាចេញសែកគ្មានសាច់ប្រាក់ដែលនាំឲ្យមានការចាប់ខ្លួននោះទេ។
បន្ទាប់ពីការចាប់ខ្លួននិងឃុំខ្លួនបណ្តោះអាសន្នកាលពីថ្ងៃទី១៦ ខែមករា សារព័ត៌មាន Fresh News ដែលមានទំនាក់ទំនងជាមួយរដ្ឋាភិបាលបានចុះផ្សាយដីការបស់តុលាការ ដោយចោទប្រកាន់លោក ថាច់ សេដ្ឋា ថា បានចេញមូលប្បទានប័ត្រគ្មានសាច់ប្រាក់ចំនួន៥ កាលពីឆ្នាំ២០១៩ ហើយខកខានមិនបានចូលខ្លួនមកសាកសួរនៅតុលាការកាលពីឆ្នាំ២០២១។
មេធាវីការពាររូបនេះបានមានប្រសាសន៍ថា លោក សេដ្ឋា អះអាងថា លោកមិនដែលបានទទួលដីកាកោះហៅរបស់តុលាការទេ ហើយបានប្តឹងឧទ្ធរណ៍ប្រឆាំងនឹងការឃុំខ្លួននេះ។
លោកមេធាវី សំ សុគង់ មានប្រសាសន៍ថា លោក សេដ្ឋា ពិតជាបានទទួលប្រាក់កម្ចីកាលពីឆ្នាំ២០១៦ ពីហាងបញ្ចាំ រិន ឆាយ ដោយបានដាក់បញ្ចាំប័ណ្ណកម្មសិទ្ធិដីផ្ទាល់ខ្លួនរបស់លោក។ លោកមេធាវីបានបន្ថែមថា លោក «មិនដឹងមូលហេតុ» កូនក្តីរបស់លោកដែលជាតំណាងរាស្រ្តគណបក្សប្រឆាំងបានយកប្រាក់កម្ចីពីហាងបញ្ចាំដែលម្ចាស់ហាងនេះមានទំនាក់ទំនងជាមួយឥស្សរជនគណបក្សប្រជាជនកម្ពុជា។
បន្ទាប់មក លោក សេដ្ឋា បានចុះហត្ថលេខាលើមូលប្បទានប័ត្រជាបន្តបន្ទាប់ដោយកាលបរិច្ឆេទនិងចំនួនទឹកប្រាក់នៅចំហ ដែលលោកបានផ្តល់ឱ្យទៅហាងបញ្ចាំ ដើម្បីបំពេញនិងទទួលការទូទាត់ប្រចាំខែពីលោក។ ប៉ុន្តែលោកបានស្នើឲ្យបញ្ឈប់ការសងប្រាក់តាមមូលប្បទានប័ត្រ បន្ទាប់ពីលោកត្រូវបានដកចេញពីមុខតំណែងជាតំណាងរាស្រ្តគណបក្សសង្គ្រោះជាតិ ក្រោយការរំលាយគណបក្សនេះដោយតុលាការកំពូលកាលពីឆ្នាំ២០១៧។
លោក សុគង់ បានមានប្រសាសន៍ថា៖ «គាត់ [សេដ្ឋា] បានទូទាត់ប្រចាំខែតាមមូលប្បទានប័ត្រ ហើយនៅពេលដែលលោកគ្មានប្រាក់ខែ លោកក៏បានសុំម្ចាស់ហាងបញ្ចាំបង់ជាសាច់ប្រាក់ជាលក្ខណៈឯកជន ប៉ុន្តែនៅមានសល់សែកបួនឬប្រាំទៀតនៅហាងបញ្ចាំ»។
លោក សេដ្ឋា បានទទួលប្រាក់ចំនួន១៨,០០០ដុល្លារពីហាងបញ្ចាំនេះ ដោយប្រើប្រាស់ប័ណ្ណកម្មសិទ្ធិដីធ្លីចំនួន៥ ដែលមានឈ្មោះរបស់លោក ប៉ុន្តែត្រូវបានប្រើប្រាស់ដោយសហគមន៍ខ្មែរកម្ពុជាក្រោម ដែលគាត់ជាប្រធាន។ មេធាវីរបស់លោក សេដ្ឋា ថ្លែងថា កម្ចីនេះមានគោលបំណងជួយដល់សកម្មភាពរបស់សមាគម។
លោក សំ សុគង់ មានប្រសាសន៍ថា លោក សេដ្ឋា ចាប់ផ្តើមសងប្រាក់កម្ចីជាលក្ខណៈឯកជន ប៉ុន្តែបានស្នើសុំពន្យារពេលសងវិញក្នុងអំឡុងពេលមានការរីករាលដាលជំងឺកូវីដ-១៩។ លោក សេដ្ឋា បានបាត់បង់ទំនាក់ទំនងជាមួយហាងបញ្ចាំនេះ ចាប់តាំងពីពេលនោះមក ប៉ុន្តែនៅតែជំពាក់ក្រុមហ៊ុនក្នុងចំនួនមួយដែលមិនច្បាស់លាស់។
ហាងបញ្ចាំនេះបានប្តឹងលោក សេដ្ឋា ពីបទឆបោកកាលពីឆ្នាំ២០១៨ ក្រោមហេតុផលថា លោក សេដ្ឋា បានឈប់សងប្រាក់កម្ចី។ តុលាការបានស៊ើបអង្កេតរួចទម្លាក់ចោលសំណុំរឿងនេះ ដោយសារលោក សេដ្ឋា បានផ្តល់ប័ណ្ណកម្មសិទ្ធិដីឲ្យហាងបញ្ចាំជាវត្ថុបញ្ចាំ ប៉ុន្តែនៅឆ្នាំ២០១៩ ហាងបញ្ចាំបានដាក់ពាក្យបណ្តឹងព្រហ្មទណ្ឌ ជាពិសេសដោយលើកឡើងពីមូលប្បទានប័ត្រចំនួន៥ដែលនៅសល់។
ដោយលើកឡើងពីគោលការណ៍ច្បាប់ស្តីពីអាជ្ញាអស់ជំនុំជាសេចក្តីសម្រេចដែលចែងថា តុលាការមិនអាចកាត់ទោសជនណាម្នាក់ពីបទល្មើសដែលខ្លួនត្រូវបានសម្រេចឲ្យរួចខ្លួនពីមុនមក លោក សំ សុគង់ បានមានប្រសាសន៍ថា «ករណីដូចគ្នានេះត្រូវបានប្តឹងរួចហើយ។ គេមិនអាចប្រើប្រាស់បទល្មើសដដែលនេះដើម្បីប្តឹងម្តងទៀតបានទេ»។
លោក ប្លង់ សុផល ព្រះរាជអាជ្ញារងនិងជាអ្នកនាំពាក្យសាលាដំបូងរាជធានីភ្នំពេញមិនអាចទាក់ទងសុំការបំភ្លឺបានឡើយ។
បុរសម្នាក់ដែលឆ្លើយតាមលេខទូរសព្ទដែលចុះបញ្ជីសម្រាប់ហាងបញ្ចាំ រិន ឆាយ បាននិយាយថា លោកគឺជាក្មួយប្រុសរបស់លោក ហាយ វណ្ណរិន ដែលជាម្ចាស់ក្រុមហ៊ុន ហើយបានបង្វែរសំណួរទៅមេធាវីរបស់ហាងបញ្ចាំគឺលោក លី ទិត្យបូនាមី។
លោក ទិត្យបូនាមី អះអាងថា លោក សេដ្ឋា បានចុះកិច្ចសន្យាជាមួយហាងបញ្ចាំធានាសងវិញតាមរយៈមូលប្បទានប័ត្រ ប៉ុន្តែបានប្រព្រឹត្តអំពើឆបោកតាមពីររបៀប ដោយសារលោកមិនមានប្រាក់ក្នុងគណនីធនាគាររបស់លោកនិងបានប្រើប្រាស់ប័ណ្ណកម្មសិទ្ធិលើអចលនទ្រព្យដែលមិនមែនជាកម្មសិទ្ធិរបស់គាត់។ (មេធាវីរបស់លោក សេដ្ឋា បាននិយាយថា កូនក្តីរបស់លោកគឺជាម្ចាស់នៃអចលនទ្រព្យទាំងប្រាំនេះ)។
លោក ទិត្យបូនាមី អះអាងថា បណ្តឹងឆបោកឆ្នាំ២០១៨ផ្តោតតែលើប័ណ្ណកម្មសិទ្ធិដី ចំណែកបណ្តឹងឆ្នាំ២០១៩ ដែលប្តឹងដោយហាងបញ្ចាំទាក់ទងនឹងមូលប្បទានប័ត្រ។
លោក ទិត្យបូនាមី មានប្រសាសន៍ថា៖ «វាជាករណីថ្មីដែលទាក់ទងនឹងការចេញមូលប្បទានប័ត្រដែលគ្មានសាច់ប្រាក់ ហើយកូនក្តីរបស់ខ្ញុំបានដាក់ពាក្យបណ្តឹងនៅឆ្នាំ២០១៩ ដោយចោទប្រកាន់ [សេដ្ឋា] ថា មិនបានអនុវត្តតាមកាតព្វកិច្ចចំពោះឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់។ វាជាបទល្មើសផ្សេងគ្នា»។
លោក ទូច ថាន់ អគ្គលេខាធិការនៃសហគមន៍ខ្មែរកម្ពុជាក្រោម ដែលជាសមាគមគាំទ្រជនជាតិខ្មែរដែលមានដើមកំណើតពីដីសណ្ដទន្លេមេគង្គរបស់វៀតណាម បានបញ្ជាក់ថា លោក សេដ្ឋា បានយកប័ណ្ណកម្មសិទ្ធិអចលនទ្រព្យចំនួនប្រាំដែលសមាគមប្រើប្រាស់ទៅបញ្ចាំមែន។ លោកមានប្រសាសន៍ថា លោកមិនដឹងថាលុយនោះ ត្រូវបានប្រើប្រាស់របៀបណានោះទេ។ លោកថា អចលនទ្រព្យទាំងអស់មានប័ណ្ណកម្មសិទ្ធិឈ្មោះរបស់លោក ថាច់ សេដ្ឋា។
លោក ថន បានមានប្រសាសន៍ថា៖ «យើងមិនជំទាស់ទេ ព្រោះគាត់គ្រាន់តែប្រើជាបណ្ដោះអាសន្ន [បញ្ចាំប័ណ្ណកម្មសិទ្ធិដី] ហើយយើងមិនដែលគិតថា ពួកគេ [ហាងបញ្ចាំ] នឹងដាក់ពាក្យបណ្ដឹងនោះទេ។ គ្មានសមាជិកសហគមន៍ណាម្នាក់ជំទាស់នោះទេ»។
លោក ថាន់ មានប្រសាសន៍ថា ប្រសិនបើពិតជាមានបញ្ហាមែននោះ តុលាការគួរបានឃុំខ្លួនលោក សេដ្ឋា បន្ទាប់ពីហាងបញ្ចាំបានប្តឹងកាលពីដើមឆ្នាំ២០១៩ម៉្លេះ បើមិនដូច្នេះទេ ហាងបញ្ចាំអាចទាមទារប័ណ្ណកម្មសិទ្ធិដីដែលនៅក្នុងដៃរបស់ពួកគេ ដើម្បីបង្គ្រប់ការទូទាត់។
លោក ទិត្យបូនាមី ជាមេធាវីហាងបញ្ចាំបាននិយាយថា លោកមិនអាចផ្តល់ការអត្ថាធិប្បាយបន្ថែមបានទេ៖ «ខ្ញុំមិនអាចលម្អិតអំពីករណីនេះបានទេ ព្រោះវាស្ថិតក្រោមការស៊ើបអង្កេតរបស់តុលាការ»៕
ប្រែសម្រួលពីអត្ថបទភាសាអង់គ្លេស៖ Detained Candlelight Leader Did Not Authorize Bad Checks, Lawyer says
