សមាគមសម្ព័ន្ធអ្នកសារព័ត៌មានកម្ពុជា

សកម្មជនបរិស្ថានដាក់លិខិតសុំចូលគាល់ព្រះមហាក្សត្រ​ដើម្បីថ្វាយអំពីកិច្ចការពារបរិស្ថាន និងសង្គម

យុវជនបរិស្ថាននាំគ្នាដាក់ញត្តិនៅព្រះបរមរាជវាំង ដើម្បីសុំព្រះរាជានុញ្ញាតចូលគាល់ព្រះមហាក្សត្យ ដើម្បីទូលថ្វាយព័ត៌មានអំពីកិច្ចការពារបរិស្ថាននិងសង្គម។ រូបថតថ្ងៃទី២៩ ខែមីនា ឆ្នាំ២០២៣។ ខេមបូចា/ ព្រីង សំរាំង
យុវជនបរិស្ថាននាំគ្នាដាក់ញត្តិនៅព្រះបរមរាជវាំង ដើម្បីសុំព្រះរាជានុញ្ញាតចូលគាល់ព្រះមហាក្សត្យ ដើម្បីទូលថ្វាយព័ត៌មានអំពីកិច្ចការពារបរិស្ថាននិងសង្គម។ រូបថតថ្ងៃទី២៩ ខែមីនា ឆ្នាំ២០២៣។ ខេមបូចា/ ព្រីង សំរាំង

យុវជនជាង២០នាក់បាននាំគ្នាដើរដង្ហែដើម្បីយកលិខិតទៅដាក់នៅ​ព្រះរាជខុទ្ទកាល័យ ក្នុង​គោលបំណងសុំព្រះរាជានុញ្ញាត​ចូលគាល់ព្រះមហាក្សត្រ និងទូល​ថ្វាយអំពីបញ្ហា​ផ្សេងៗ​​ទាក់​ទង​នឹងបញ្ហាសិទ្ធិមនុស្ស ធនធានធម្មជាតិ និងបរិស្ថាននៅកម្ពុជា ខណៈ​កន្លងមក​ពួកគេ​​បាន​ដាក់​ញត្តិ​ស្នើទៅកាន់ក្រសួង និងស្ថាប័នពាក់ព័ន្ធប៉ុន្តែមិនមាន​ដំណោះ​ស្រាយ។

ក្នុងលិខិតថ្វាយព្រះមហាក្សត្រ បានរៀបរាប់ថា៖ «ទូលព្រះបង្គំយើងខ្ញុំសូមព្រះបរម​រាជានុញ្ញាតទូលថ្វាយព្រះអង្គនូវបញ្ហាផ្សេងៗអំពីសិទ្ធិមនុស្ស ធនធានធម្មជាតិ និងបរិស្ថាន ដែលកំពុងតែវិវត្តធ្ងន់ធ្ងរពីមួយថ្ងៃទៅមួយថ្ងៃ ដើម្បីឱ្យទ្រង់អាចយកព័ត៌មានសំខាន់ៗទាំងនេះ ទៅព្រះរាជតម្រិះ ដោះស្រាយបញ្ហាដល់ប្រជាពលរដ្ឋមូលដ្ឋាន និងបន្តគង់នៅជាម្លប់​ដ៏ត្រជាក់​ដល់ប្រជានុរាស្ត្រតរៀងទៅ»

គួរបញ្ជាក់ថា ការដាក់ស្នើលិខិតបានប្រព្រឹត្តទៅនាព្រឹកថ្ងៃទី២៩ ខែមីនា ឆ្នាំ២០២៣ ដោយមាន​ការចូលរួមពីសំណាក់អង្គការមិនមែនរដ្ឋាភិបាល សកម្មជនបរិស្ថាន និងសហគមន៍​ការពារ​ព្រៃ​ឈើ​ប្រមាណ២២នាក់។ ក្នុងនោះអ្នកចូលរួមបានជួបជុំគ្នានៅសួនមុខវត្តបទុមវតី និងធ្វើ​ដំណើរ​​ដោយ​ថ្មើរជើង​ឆ្ពោះទៅមុខវាំងពីទិសខាងកើតដើម្បីដាក់ថ្វាយលិខិត។

លោក កើត សារ៉ាយ ប្រធាន​សមាគម​និស្សិត​បញ្ញាវន្ត​ខ្មែរ បានឱ្យដឹងថា ក្រោយចូលយក​លិខិត​ទៅស្នើថ្វាយ គឺមន្រ្តីរដ្ឋបាល​ព្រះបរមរាជវាំង​បានទទួលយកលិខិតនោះ ដោយថា​នឹង​បញ្ជូនទៅ​តាមដំណាក់កាល​នៃរដ្ឋបាល។

ជាមួយគ្នា លោក​ សារ៉ាយ បានសង្ឃឹមថានឹងមានការឆ្លើយតបពីអង្គព្រះមហាក្សត្រ​ដោយ​នឹង​អាចឱ្យលោកចូលគាល់ព្រះអង្គបាន។ ចំពោះគោលបំណងវិញ លោកថាគឺដើម្បីចូលថ្វាយ​ព្រះពរដល់ព្រះអង្គក្នុងឱកាសពិធីបុណ្យចូលឆ្នាំថ្មី ទូលថ្វាយអំពីបញ្ហាព្រៃឈើ​ដែលកំពុង​បាត់​បង់​ និងរងការបំផ្លាញ ក៏ដូចជាការសុំឱ្យទ្រង់ជួយអន្តរាគមន៍ ព្រមទាំងពិនិត្យលើករណី​សកម្មជន​ដែលចូលរួមក្នុងការដោះស្រាយបញ្ហាជាតិ បញ្ហាអយុត្តិធម៌ និងការចាប់សកម្មជន​ឃុំឃាំងជាដើម។

លោកបន្តថា មានតែព្រះមហាក្សត្រតែប៉ុណ្ណោះដែលមានសិទ្ធិអំណាច​ក្នុងការធានាលើរាល់​បញ្ហាដែលកើតមានក្នុងប្រទេស ទោះបីក្នុងរដ្ឋធម្មនុញ្ញបានចែងថាទ្រង់មិនកាន់អំណាច​ក៏​ដោយ។

លោកបន្ថែមថា៖ «នៅក្នុងរដ្ឋធម្មនុញ្ញ ត្បិតចែងថាព្រះមហាក្សត្រមិនកាន់អំណាចក៏ពិតមែន ប៉ុន្តែព្រះអង្គជាអ្នកធានានូវគ្រប់យ៉ាង បូរណភាពទឹកដី ការឯកភាពជាតិ ការផ្សះផ្សាជាតិ ផ្សះផ្សានយោបាយ គឺព្រះអង្គជាអ្នកធានា»

យុវជនបរិស្ថាននាំគ្នាដាក់ញត្តិនៅព្រះបរមរាជវាំង ដើម្បីសុំព្រះរាជានុញ្ញាត​ចូលគាល់​ព្រះមហាក្សត្យ ដើម្បីទូលថ្វាយព័ត៌មានអំពីកិច្ចការពារបរិស្ថាន​និងសង្គម។ រូបថតថ្ងៃទី២៩ ខែមីនា ឆ្នាំ២០២៣។ ខេមបូចា/ ព្រីង សំរាំង

ស្រដៀងគ្នា សកម្មជនបរិស្ថានមាតាធម្មជាតិ កញ្ញា មាន លីសា បានឱ្យដឹងបន្ថែមថា នេះជា​លើកទីមួយ​ដែលកញ្ញា បានដាក់លិខិតថ្វាយព្រះមហាក្សត្រដោយសារតែ​មើលឃើញថា​ នេះ​ជា​ជម្រើស​ចុងក្រោយសម្រាប់ពួកគេ។ កញ្ញាបន្ថែមថា កន្លងមកគឺក្រសួង និងស្ថាប័ន​ពាក់ព័ន្ធ​ហាក់ពុំមាន​ចុះអន្តរាគមន៍ និងផ្ដល់ដំណោះស្រាយសមស្របតាមញត្តិដែលពួកគាត់បានដាក់​ស្នើ​ឡើយ។

កញ្ញា លីសា ឱ្យដឹងថា៖ «លិខិតដាក់មកព្រះមហាក្សត្រនេះគឺក្រុមពួកយើង​ក៏ទើបតែធ្វើឡើង​ជាលើកទីមួយ ដែលយើងមើលឃើញជាជម្រើសចុងក្រោយមែនទែន ដែលថាក្រសួងដែល​ធ្វើការទៅលើការងារផ្ទាល់ មិនថាក្រសួងបរិស្ថានអីគឺអត់មានដំណោះស្រាយឱ្យពួកយើង។ ដូច្នេះយើងមើលឃើញពីម្លប់របស់ព្រះមហាក្សត្រដែលជាម្លប់ដល់ប្រជាពលរដ្ឋ ក្នុងការជួយ​អន្តរាគមន៍​ឱ្យមានការគោរពសិទ្ធិមនុស្សជាងនេះ»

លោក គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រី​ទទួលបន្ទុកកិច្ចការ​ទូទៅ​អមក្រសួងព្រះបរមរាជវាំង មិនអាចសុំការអត្ថាធិប្បាយបាន​ដោយលោកថា​កំពុង​ជាប់​រវល់។

ចំណែកអ្នកនាំពាក្យក្រសួងបរិស្ថាន លោក នេត ភក្រ្តា ពុំបានឆ្លើយតបសំណួរដែល​ទាក់ទង​នឹង​ការលើកឡើងរបស់ក្រុមយុវជននោះទេ។ ប៉ុន្តែលោកអះអាងថា ក្រសួងនៅតែ​បន្តយក​ចិត្តទុកដាក់ក្នុងការអភិរក្សធនធានធម្មជាតិដោយបានទប់ស្កាត់បទល្មើសផ្សេងៗ និងបាន​ទាញ​ផលចំណេញពីធនធានធម្មជាតិដូចជា ការទាញយកកាបូនជាដើម។

លោកថ្លែងថា៖ «បច្ចុប្បន្ន​នេះគឺជាមួយនឹងការការពារ​ និងអភិរក្សបានល្អប្រសើរ​ យើងឃើញ​ថា ​កម្ពុជារបស់យើងបានផ្លាស់ប្តូរនូវបរិបទថ្មី​ គឺពីប្រទេសដែលកាប់ឈើ​យកលុយពីមុន​ តែ​ឥឡូវ​នេះយើងបានថែរក្សាតំបន់ការ​ពារ​ តំបន់អភិរក្សរបស់យើងបានល្អ​ គឺយើងបានទទួល​នូវប្រាក់ចំណូលពីការអភិរក្សរបស់យើង»។

យុវជនបរិស្ថាននាំគ្នាដាក់ញត្តិនៅព្រះបរមរាជវាំង ដើម្បីសុំព្រះរាជានុញ្ញាត​ចូលគាល់​ព្រះមហាក្សត្យ ដើម្បីទូលថ្វាយព័ត៌មានអំពីកិច្ចការពារបរិស្ថាន​និងសង្គម។ រូបថតថ្ងៃទី២៩ ខែមីនា ឆ្នាំ២០២៣។ ខេមបូចា/ ព្រីង សំរាំង

ឆ្លើយតបនឹងការលើកឡើងរបស់ក្រុមយុវជន លោក ឥសាន អ្នកនាំពាក្យគណបក្ស​ប្រជាជនកម្ពុជា យល់ឃើញថា ការណ៌ដែលក្រសួង និងស្ថាប័នពាក់ព័ន្ធមិនមានជា​ដំណោះ​ស្រាយជូនពួកគាត់ចំពោះការដាក់ញត្តិស្នើកន្លងមក អាចថាមកពីការស្នើនោះមិនត្រឹមត្រូវ ឬសមស្របទៅតាមផ្លូវច្បាប់និងសង្គមជាក់ស្ដែង។ ​

លោកមានប្រសាសន៍ថា៖ «ការស្នើរបស់ក្មួយៗនោះវាមិនច្បាស់! មិនប្រាកដថាជាការស្នើ​ត្រឹម​ត្រូវ​នោះទេ។ ហើយបើស្នើត្រឹមត្រូវខ្ញុំយល់ថាក្រសួងស្ថាប័នពាក់ព័ន្ធ គេនឹងដោះស្រាយ​ជូន​ហើយ។ ប៉ុន្តែបើសំណើហ្នឹងមិនត្រឹមត្រូវទេ ខ្ញុំយល់ថាទៅដល់ណាក៏មិនអាចដោះស្រាយ​បាន»។

លោក សុខ ឥសាន បន្ថែមថា ការលើកឡើងរបស់យុវជនទាំងនោះ គឺជាសិទ្ធិរបស់ពួកគេ​ក្នុង​ការដាក់លិខិតនោះ ហើយក៏ជាការប្រសើរប្រសិនបើព្រះមហាក្សត្រសព្វព្រះទ័យនឹងការចូល​គាល់​ដើម្បីទូលថ្វាយព្រះអង្គអំពីបញ្ហាផ្សេងៗ។ យ៉ាងណាលោកថា ព្រះអង្គក៏មិនអាចទទួល​ដោះស្រាយនូវរាល់បញ្ហាដល់ប្រជារាស្ត្រនោះឡើយ ដោយទ្រង់ក៏នឹងចាត់ឱ្យក្រសួង និង​ស្ថាប័នពាក់ព័ន្ធ​ធ្វើការអន្តរាគមន៍។

លោកមានប្រសាសន៍ថា៖ «នេះជាការយល់ឃើញរបស់ក្មួយៗយុវជននោះទេ តែតាមពិត​ព្រះករុណាលោកមិនមានតួនាទីភារកិច្ចដើម្បីដោះស្រាយរាល់បញ្ហាដែលក្មួយៗចង់បានទេ។ប្រសិនណាលិខិតហ្នឹងទៅដល់ព្រះបរមរាជវាំង គង់តែបញ្ចូនមក​ក្រសួងជំនាញរបស់​រាជរដ្ឋាភិបាល​ដដែលទេ!»។

យុវជនបរិស្ថាននាំគ្នាដាក់ញត្តិនៅព្រះបរមរាជវាំង ដើម្បីសុំព្រះរាជានុញ្ញាត​ចូលគាល់​ព្រះមហាក្សត្យ ដើម្បីទូលថ្វាយព័ត៌មានអំពីកិច្ចការពារបរិស្ថាន​និងសង្គម។ រូបថតថ្ងៃទី២៩ ខែមីនា ឆ្នាំ២០២៣។ ខេមបូចា/ ព្រីង សំរាំង

ដោយឡែក អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា យល់​ឃើញថា ការទូលថ្វាយអំពីកិច្ចការពាររបស់​ក្រុមយុវជនដល់អង្គ​ព្រះមហាក្សត្រ គឺអាច​នឹងផ្ដល់​ជាភាពវិជ្ជមានលើការស្នើសុំកិច្ចអន្តរាគមន៍របស់ក្រុមយុវជនសកម្ម។ 

លោក សែនករុណា បន្ថែមថាដើម្បីទប់ស្កាត់ការបំផ្លិចបំផ្លាញធនធានធម្មជាតិនិងព្រៃឈើ អាជ្ញាធរ​ពាក់ព័ន្ធគួរជជែកពិភាក្សាជាមួយក្រុមយុវជនសកម្មទាំងនោះ។ ជាពិសេសលោកថា អាជ្ញាធរ​ត្រូវផ្ដល់​ឱកាស​ឱ្យយុវជនបានបំពេញនូវរាល់សកម្មភាពដែលនាំជា​ប្រយោជន៍​ដល់​ប្រទេសជាតិ។

លោកបន្ថែមថា៖ «ខ្ញុំថាអ្វីដែលជាការល្អគឺគួរតែខាងស្ថាប័នពាក់ព័ន្ធ​ទាំងអស់ជាមួយ​នឹង​ខាង​យុវជនហ្នឹងគួរតែមានការពិគ្រោះជជែកពិភាក្សាគ្នា ហើយផ្ដល់ឱកាស​ឱ្យក្រុមយុវជន​ដែល​សកម្មទាំងអស់នោះគាត់មានឱកាសក្នុងការបំពេញរាល់សកម្មភាពដើម្បីឱ្យគាត់ជួយការពារ​ទប់ស្កាត់រាល់ការបំផ្លិចបំផ្លាញនូវធនធានធម្មជាតិ ក៏ដូចជាព្រៃឈើជាដើម»

ទិន្នន័យពីផ្កាយរណបកាលពីឆ្នាំ២០២១បានបង្ហាញថា ដែនជម្រកសត្វព្រៃព្រៃឡង់ត្រូវ​បានរង​ការកាប់បំផ្លាញព្រៃឈើដ៏ធ្ងន់ធ្ងរបំផុតក្នុងចំណោមតំបន់ការពារផ្សេងទៀត ដោយបានបាត់បង់​គម្របព្រៃឈើជិត១ម៉ឺនហិកតា(៩,១១៩) ក្នុងឆ្នាំ២០២០ ដែលតួលេខនេះកើនឡើង​២១​ភាគរយ បើធៀបនឹងឆ្នាំ២០១៩។ ​

របាយការណ៍របស់អង្គការ​លើកលែង​ទោស​អន្តរជាតិ(Amnesty International) បានបង្ហាញ​កាល​ពី​ថ្ងៃ​ទី​២៨ ខែ​មករា ឆ្នាំ​២០២២ ថា ព្រៃឈើ​ចំនួន ៦,២៧១​ហិកតា​ត្រូវ​បាន​កាប់​បំផ្លាញ​នៅ​ក្នុង​ដែន​ជម្រក​សត្វព្រៃ​ចំនួន​ពីរ។ ក្នុង​នោះ​មាន​ដែន​ជម្រក​សត្វព្រៃ​ព្រៃឡង់ និង​ដែន​ជម្រក​សត្វ​ព្រៃព្រះរការ ដោយព្រៃឈើទាំងនោះត្រូវបានរងការទន្ទ្រាន​​ខុសច្បាប់​យ៉ាង​ច្រើន​សន្ធឹកសន្ធាប់ ហើយក៏​កំពុង​ប៉ះពាល់​ធ្ងន់ធ្ងរ​ដល់​សិទ្ធិ និង​វប្បធម៌​របស់​ជនជាតិ​ដើម​ភាគតិចផងដែរ៕

509 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម