សមាគមសម្ព័ន្ធអ្នកសារព័ត៌មានកម្ពុជា

សកម្មជនបរិស្ថានដាក់ញត្តិស្នើក្រសួងបរិស្ថានកំណត់កោះកុងក្រៅជាតំបន់ឧទ្យានជាតិសមុទ្រ

ក្រុមយុវជនស្រឡាញ់បរិស្ថានធ្វើដំណើរជាក្រុមទៅដាក់ញតិនៅក្រសួងបរិស្ថាន រាជធានីភ្នំពេញ។ រូបថតនៅថ្ងៃទី២៣ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ
ក្រុមយុវជនស្រឡាញ់បរិស្ថានធ្វើដំណើរជាក្រុមទៅដាក់ញតិនៅក្រសួងបរិស្ថាន រាជធានីភ្នំពេញ។ រូបថតនៅថ្ងៃទី២៣ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

សកម្មជនបរិស្ថាន​បានដាក់ញតិទៅក្រសួងបរិស្ថាននៅថ្ងៃទី២៣ ខែសីហា ស្នើក្រសួង​បរិស្ថាន​ដាក់កោះកុងក្រៅជាឧទ្យានជាតិសមុទ្រ បន្ទាប់ពីរដ្ឋាភិបាលផ្តល់សិទ្ធិឱ្យក្រុមហ៊ុន​ឈ្មោះ​កោះកុង SEZ ​របស់ឧកញ៉ា លី យ៉ុងផាត់ ស​មាជិក​ព្រឹទ្ធិ​សភាមក​ពី​គណបក្ស​កាន់​អំណាច អភិវឌ្ឍន៍តាំងពីឆ្នាំ២០១៩។

យុវជនយុវតីប្រមាណ១២នាក់ដែលជាអ្នកស្រលាញ់បរិស្ថាន ធនធានធម្មជាតិតុបតែងខ្លួន​ជា​មួយការពាក់មួកសុវត្ថិភាព ដោតអង់តែន និងផ្កាយរណប ដើរពីមជ្ឈមណ្ឌលភ្នំពេញ​យក​ញត្តិ​ទៅដាក់នៅក្រសួងបរិស្ថាន ដើម្បីឱ្យក្រសួងបរិស្ថានបកស្រាយជាសាធារណៈ អំពី​លទ្ធផល​នៃ​កិច្ចស្រាវជ្រាវកន្លងមក ដើម្បីដាក់តំបន់កោះក្រុងក្រៅជាតំបន់អភិរក្ស។

បើតាមកញ្ញា ភួន កែវរស្មី ជាសកម្មជនបរិស្ថាន ប្រាប់ឱ្យដឹងថា ដោយសារតែ​ក្រសួង​បរិស្ថាន​បានសិក្សាស្រាវជ្រាវអំពីតំបន់កោះកុងក្រៅអស់រយៈពេល៦ឆ្នាំមកហើយ ដូច្នេះគោលបំណង​របស់យុវជនដែលយកញតិមកដាក់នេះ គឺដើម្បីស្នើឱ្យក្រសួងបរិស្ថាន បង្ហាញលទ្ធផលនៃ​ការ​សិក្សាកន្លងមក និងបង្ហាញពីលទ្ធភាពវិជ្ជមានដើម្បីលុបចោល​គម្រោងអភិវឌ្ឍន៍​នៅកោះកុង​ក្រៅ ហើយប្រគល់សិទ្ធិឱ្យរដ្ឋជាអ្នកគ្រប់គ្រងវិញ។

បើតាមកញ្ញាថ្លែងថា៖ «ពេលនេះគឺ២០២២ហើយ​កោះកុងក្រៅនៅមិនទាន់មានសេចក្ដី​ប្រកាស​ណាមួយ ឬអនុក្រឹត្យណាមួយបញ្ជាក់ថាកោះកុងក្រៅ​ជាឧទ្យានជាតិសមុទ្យ​នៅឡើយ​ទេ ចឹងខ្ញុំសង្ឃឹមថា ក្រសួងនឹងទទួលញត្តិ និងឆ្លើយតបមកពួកយើងវិញជាវិជ្ជមាន»។

យុវតីរូបនេះបន្តថា កោះកុងក្រៅគឺជាកោះដែលធំជាងគេ ស្អាតជាងគេនៅក្នុងប្រទេសកម្ពុជា​បន្ទាប់ពីកោះត្រល់ដែលកម្ពុជាបាត់បង់ទៅ។ កញ្ញាពិតជាមានការសោកស្ដាយដែល​រដ្ឋាភិបាល​​​សម្រេចផ្ដល់សិទ្ធិឱ្យក្រុមហ៊ុនលោក លី យ៉ុងផាត់​ គ្រប់គ្រងដោយគ្មាន​ការចូលរួម​ដឹងឮពីប្រជាជន និងវាយតម្លៃផលប៉ះពាល់បរិស្ថាន។

កញ្ញាអះអាងថា ហេតុអ្វីរដ្ឋាភិបាលទុកចិត្តលើក្រុមហ៊ុនលោក លី យ៉ុងផាត់ ព្រោះបុគ្គលនេះ​មានប្រវត្តិមិនល្អក្នុងការធ្វើជំនួញឡើយ ហើយកញ្ញាទទូចឱ្យរដ្ឋាភិបាលដកតំបន់នោះមកជា​តំបន់ឧទ្យានជាតិសមុទ្រវិញ គ្រប់គ្រងដោយរដ្ឋ​ ខណៈបច្ចុប្បន្ននេះ កញ្ញារកឃើញមាន​ស្នាម​កាប់ព្រៃឈើធំជាងមុនក្នុងបរិវេណឆ្នេរទី១នៃតំបន់កោះកុងក្រៅទៀតផង។

កញ្ញាបញ្ជាក់ថា៖ «យើងបារម្ភណាស់​បើមើលពីប្រវត្តិលលោក  លី យ៉ុងផាត់ ពាក់ព័ន្ធ​ជាមួយ​ការអភិវឌ្ឍ និងការធ្វើជំនួញ គឺលើទឹកភ្នែករាស្រ្ត រំលោភសិទ្ធិមនុស្ស ប្រើប្រាស់ពលកម្មកុមារ តើយើងទុកចិត្តម៉េចបានក្នុងការប្រគល់ធនធានដ៏កម្រឱ្យលោកលី យ៉ុងផាត់? ចឹងទើបយើង​ចង់​ឱ្យរដ្ឋាភិបាលដកអាជ្ញាបណ្ណពីក្រុមហ៊ុនSEZ និងដាក់កោះកុងក្រៅជាឧទ្យានជាតិសមុទ្រ​គ្រប់គ្រងដោយរដ្ឋ»។

កញ្ញាបន្តថា ក្រសួងបរិស្ថាន ក្រសួងកសិកម្ម រុក្ខាប្រមាញ់និងនេសាទ អាចសហការគ្នា​ក្នុង​ការ​មើលថែកោះកុងក្រៅ និងអាចទាញចំណូលពីភ្ញៀវទេសចរចូលរដ្ឋបាន ដោយមិន​បាច់​ពឹងផ្អែកលើក្រុមហ៊ុនឯកជនឡើយ។ កញ្ញាថា យុវជនចង់ឃើញតំបន់កោះកុងក្រៅ​មាន​អនុក្រឹត្យការពារដូចតំបន់ភ្នំតាម៉ៅដែរ ដោយមិនចង់ឃើញបាត់បង់ហើយ ទើបចេញមក​ការពារ ឬដាំដើមឈើឡើងវិញដូចព្រៃនៅភ្នំតាម៉ៅឡើយ។

កញ្ញាបន្ថែមថា៖ «យើងជាយុវជនខំការពារទុកមុនកុំឱ្យដូចភ្នំតាម៉ៅអស់ប្រាំមួយ ប្រាំពីររយ​ហិកតាហើយ ទើបតែចេញអនុក្រឹត្យដាក់ជាតំបន់ការពារ ដូច្នេះយើងចង់ឃើញកោះកុងក្រៅ​ការពារ នៅពេលដែលមានសម្រស់ស្រស់ស្អាត»។

ចំណែកយុវតី ដាំ សុស្រីនាង ជានិស្សិតមួយរូប លើកឡើងថា  ការចូលរួមដាក់ញត្តិដើម្បី​សុំការបកស្រាយពីក្រសួងបរិស្ថាន គឺជាសិទ្ធិរបស់យុវជន ក្នុងការឈឺឆ្អាលពីបញ្ហាសង្គម ក៏ដូចជាធនធានធម្មជាតិ។​ យុវតីរូបនេះបន្តថា តំបន់កោះកុងក្រៅ គឺជាតំបន់​សក្ដានុពល​មួយដែលទាក់ទាញភ្ញៀវទេសចរ និងរកចំណូលជូនរដ្ឋ។

កញ្ញា សុស្រីនាង ឱ្យដឹងថា៖ «ខ្ញុំស្គាល់ពីសិទ្ធិខ្លួនឯង ក៏ដូចជាចូលរួមដើម្បីគាំទ្រ​បានជា​សម្លេងកាន់តែខ្លាំងដើម្បីទទួលបានការឆ្លើយតបពីក្រសួងបរិស្ថាន ប្រសិនបើបាត់បង់​យើងមានការសោកស្ដាយណាស់»។

យុវតីរូបនេះអះអាងថា ក្រសួងបរិស្ថានបានចំណាយពេលសិក្សាស្រាវជ្រាវយូរឆ្នាំមកហើយ សមល្មមបង្ហាញលទ្ធផលជាសាធារណៈ ឱ្យបានដឹងអំពីដំណើរការអំពីការដាក់តំបន់​កោះកុង​ក្រៅ​ជាតំបន់ឧទ្យានជាតិសមុទ្រ។

កញ្ញាថ្លែងទៀតថា៖ «សម្រាប់ខ្ញុំជាយុវជន ខ្ញុំពិតជាចង់បានរបាយការណ៍នានា​ដែលក្រសួង​បានសិក្សាស្រាវជ្រាវកន្លងមក បើប្រគល់ឱ្យក្រុមហ៊ុនឯកជនមែន សូមបង្ហាញ EIA មានន័យ​ថា​ផលប៉ះពាល់បរិស្ថានដល់សាធារណជន»។

ក្រុមយុវជនស្រលាញ់បរិស្ថានលើកបដាទាមទារឱ្យក្រសួងបរិស្ថានដាក់កុងកោះក្រៅជា​ឧទ្យានជាតិសមុទ្រ ខណៈពួកគេយកញត្តិទៅដាក់នៅក្រសួង។ រូបថតនៅថ្ងៃទី២៣ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

ចំណែកអ្នកនាំពាក្យក្រសួងបរិស្ថាន លោក នេត្រ ភត្រា មិនអាចទាក់ទងបានដើម្បី​ស្រាយបំភ្លឺ​ឡើយ។ ប៉ុន្តែមន្រ្តីនៃក្រសួងបរិស្ថាន បានចេញមកទទួលញត្តិ ដោយនិយាយថា​នឹងឆ្លើយតប​មក​កាន់ក្រុមសកម្មជនបរិស្ថានវិញ ជុំវិញការដាក់ញត្តិនេះ។

ទោះជាយ៉ាងណាកាលពីឆ្នាំ២០២០កន្លងទៅ ក្រសួងបរិស្ថានបានចាត់ទុកថា សកម្មភាព​របស់​សកម្មជនបរិស្ថានគ្រាន់តែជាលេសដើម្បីបិទបាំងនូវឧបាយកលនយោបាយទុច្ចរិតដែល​ស្ថិត​ក្រោមការរៀបចំមួយដ៏ច្បាស់លាស់ប៉ុណ្ណោះ។

ក្នុងសេចក្ដីប្រកាសដដែលនោះបន្តថា ទោះបីជាគ្មានយុទ្ធនាការ ឬការទាមទារណាមួយ​ក៏​ដោយ ​ក្រសួង​​បាន​បញ្ជូន​មន្ត្រី​ជំនាញ​ចុះ​សិក្សា​ស្រាវជ្រាវ​នៅ​តំបន់​កោះកុង​ក្រៅ​តាំង​ពី​ឆ្នាំ​២០១៦​មក​ម្លេះ ដោយ​រំពឹងថា នឹង​ប្រកាសតំបន់កោះកុង​ក្រៅ​ជាឧទ្យាន​ជាតិ​សមុទ្រអំឡុង​ឆ្នាំ២០២១ ក្រោយ​ពី​បញ្ចប់​ការ​សិក្សា​ស្រាវជ្រាវ។  ប៉ុន្តែមក​ដល់​ឆ្នាំ២០២២នេះ ក្រសួង​បរិស្ថាន​មិន​ទាន់​បាន​ប្រកាសជាសាធារណៈអំពីលទ្ធផលនៃការស្រាវជ្រាវដើម្បីដាក់កោះកុងក្រៅ​ជា «ឧទ្យានជាតិសមុទ្រ» នៅ​ឡើយ​ទេ។

ជុំវិញបញ្ហានេះ លោក ហេង គីមហុង ប្រធានផ្នែកកម្មវិធីនិងតស៊ូមតិ នៃសមាគមបណ្ដាញ​យុវជន​កម្ពុជា(CYN) លើកឡើងថា ការសិក្សាស្រាវជ្រាវដើម្បីដាក់តំបន់កោះកុងក្រៅ​ជា​តំបន់ឧទ្យានជាតិសមុទ្រ គឺមិនមែនប្រើពេលយូរឡើយ តែវាអាស្រ័យលើឆន្ទៈរបស់​ក្រសួង​សាមី ឬរដ្ឋាភិបាលទៅវិញទេថាតើចង់ទុកជាតំបន់ឧទ្យានជាតិសមុទ្រ ឬក៏ចង់អភិវឌ្ឍន៍។

លោកថ្លែងថា៖ «ក្នុងនាមខ្ញុំជាពលរដ្ឋ និងជាអ្នកធ្វើការក្នុងវិស័យនេះម្នាក់ ការបង្កើតទៅ​ជាតំបន់ឧទ្យានជាតិសមុទ្រក៏ដោយមិនមែនជាការប៉ះពាល់ទៅដល់ការអភិវឌ្ឍប្រទេសទេ ផ្ទុយទៅវិញជំរុញសក្ដានុពលទេសចរ និងផ្ដល់ចំណូលជូនរដ្ឋ»។

លោកបន្តថា វាជាការល្អប្រសើរណាស់ ប្រសិនបើរដ្ឋាភិបាលពិចារណាក្នុងការដក​តំបន់​កោះកុង​ក្រៅពីក្រុមហ៊ុនលោក លី យ៉ុងផាត់ ហើយបញ្ចូលតំបន់នោះជាឧទ្យានជាតិសមុទ្រវិញ នោះនឹងមានផលចំណេញមករដ្ឋ ព្រោះអាចរក្សាបាននូវស្ថិរភាពនៃ​ធនធានធម្មជាតិដែន​សមុទ្រ​កម្ពុជា។

លោក គីមហេង បញ្ជាក់ថា៖ «រដ្ឋាភិបាលគួរតែពិចារណា អាចដកហូតពីក្រុមហ៊ុនឯកជន​មករៀប​ចំកោះកុងក្រៅជាតំបន់ឧទ្យានជាតិសមុទ្រក៏ល្អម្យ៉ាងដែរ ព្រោះអីតំបន់នេះជាកោះ​មួយ​ធំ​ក្នុងដែនសមុទ្រខ្មែរពោរពេញដោយធនធានធម្មជាតិ»។

យ៉ាងណាមិញ លោក គីមហុង បន្ថែមថា ប្រសិនបើថ្ងៃណាមានការអភិវឌ្ឍតំបន់កោះកុងក្រៅ គួរណាតែរដ្ឋជាអ្នកគ្រប់គ្រង មិនមែនក្រុមហ៊ុនឯកជនឡើយ ហើយត្រូវតែធានាថា​សហគមន៍​មូលដ្ឋានជាអ្នកទទួលផលអំពីការអភិវឌ្ឍនៅតំបន់នោះ។

កោះកុងក្រៅគឺជាកោះដ៍ធំបង្អស់របស់ប្រទេសកម្ពុជា មានផ្ទៃដី១០៣ម៉ែត្រការ៉េ ស្ថិតក្នុង​ឃុំ​ជ្រោយប្រស់ ស្រុកកោះកុង ខេត្តកោះកុង ដែលមានចម្ងាយប្រមាណ ៣០គីឡូម៉ែត្រពីក្រុង​ខេមរភូមិន្ទ។ តំបន់នេះត្រូវបានគេស្គាល់ថា មានសក្តានុពលផ្នែកធនធានធម្មជាតិ ជីវៈចម្រុះ មានផ្ទៃដីប្រមាណ ៨០គីឡូម៉ែត្រការ៉េ និងកម្ពស់ប្រហែល ៤១០ម៉ែត្រ ស្ថិតនៅលើផ្ទៃទឹក​សមុទ្រ​ដ៏ធំរបស់កម្ពុជា សព្វថ្ងៃតំបន់កោះកុងក្រៅនេះស្ថិតនៅក្រោមការគ្រប់គ្រងរបស់​អង្គភាព​យោធាជើងទឹកផ្នែកលំហសមុទ្រ។

គួរជម្រាបជូនថា កោះកុងក្រៅជាកោះមួយដែលធំជាងគេ នៅកម្ពុជា ត្រូវបានរដ្ឋាភិបាល​ប្រគល់​ផ្ដាច់មុខ​ដោយស្ងាត់ៗទៅឱ្យក្រុមហ៊ុនរបស់លោក លី យ៉ុងផាត់ សមាជិកព្រឹទ្ធសភា ធ្វើការអភិវឌ្ឍនៅឆ្នាំ២០១៩ ដោយមិនបានធ្វើការវាយតម្លៃផលប៉ះពាល់បរិស្ថានជាមុន និងប្រកាសប្រាប់សាធារណៈឡើយ៕

162 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម