សមាគមសម្ព័ន្ធអ្នកសារព័ត៌មានកម្ពុជា

ក្រោយរងការគំរាមសម្លាប់ អតីតមន្រ្តីCNRPដែលនិរទេសខ្លួននៅថៃ ស្វែងរកកន្លែងជ្រកកោនសុវត្ថិភាពជាងសព្វថ្ងៃ

សកម្មជនគណបក្សសង្គ្រោះជាតិ អ្នកស្រី សាត ផា ទទួលទានអាហារពេលល្ងាច នៅក្នុងបន្ទប់ជួលរបស់គាត់ក្នុងប្រទេសថៃ នៅថ្ងៃទី៥ ខែកញ្ញា ឆ្នាំ២០២២។ (ខេមបូចា/ខៀវ សរស្វតី)
សកម្មជនគណបក្សសង្គ្រោះជាតិ អ្នកស្រី សាត ផា ទទួលទានអាហារពេលល្ងាច នៅក្នុងបន្ទប់ជួលរបស់គាត់ក្នុងប្រទេសថៃ នៅថ្ងៃទី៥ ខែកញ្ញា ឆ្នាំ២០២២។ (ខេមបូចា/ខៀវ សរស្វតី)

កាល​ពី​ថ្ងៃ​ទី​១៥ ខែ​កញ្ញា លោក ដួង ចន្ត្រា បាន​ទទួល​សារ​អនាមិក​មួយ​តាម​បណ្ដាញ​សង្គមហ្វេសប៊ុក ដែល​អ្នក​ផ្ញើ​គំរាម​សម្លាប់​លោក និង​សហការី​ពីរ​នាក់ទៀត។

សារ​ដែល​អម​ដោយ​រូបស្ទីកឃ័រ​​កាំបិត​ចំនួន ៣ និង​រូបថត​កាំភ្លើង​ខ្លី​មួយ​ដើម​ដែល​មាន​ម្រាម​ដៃ​នៅ​លើកៃកាំភ្លើងត្រូវបាន​ផ្ញើមក​ពី​គណនី​ហ្វេសប៊ុក​មួយ​ឈ្មោះ«ខ្លាពិឃាតរាជធានី»។

អ្នកដែលនៅពីក្រោយគណនីហ្វេសប៊ុកនេះ មុនបូងបានផ្ញើរូបថតរបស់ចន្ត្រា និងសហការីពីរនាក់របស់គាត់។ បន្ទាប់​មក អ្នក​ផ្ញើនោះ​បាន​គំរាម​ចាប់​​លោក ចន្ត្រា អតីត​អនុប្រធាន​គណបក្ស​សង្គ្រោះ​ជាតិខេត្ត និង​មន្ត្រី​អតីត​គណបក្ស​សង្គ្រោះ​ជាតិ​ពីរ​នាក់​ទៀត​ដែល​រស់​នៅ​ក្នុង​ប្រទេស​ថៃ។ សារនោះសរសេរថាប្រសិន​បើ​លោកចន្ត្រានិងបក្សពួក​មិន​ត្រូវ​បានចាប់មក​ឃុំ​ខ្លួន​នៅ​ចុង​ខែ​នេះទេ អ្នក​ផ្ញើសារថានឹង​​សម្លាប់​ពួក​គាត់ចោលនៅបាងកក។

សារនោះបានសរសេរថា៖ «យ៉ាងយូរមួយអាទិត្យ ពីរអាទិត្យទៀត អញនឹងទៅអូសក្បាលអាបីនាក់ឯង មកញាត់គុកដូចគ្នា។​ បើអូសក្បាលអាបីនាក់ឯងមកញាត់គុកមិនបាន អញក៏សំលេះពួកអាក្បត់ឯងចោលនៅបាងកកហ្នឹងដែរ»។​

បន្ទាប់ពីគណបក្សសង្រ្គោះជាតិដែលជាគណបក្សប្រឆាំងដ៏ធំ ត្រូវបានចោទប្រកាន់ពីបទសមគំនិតផ្ដួលរំលំរដ្ឋាភិបាល និងត្រូវបានរំលាយដោយតុលាការកំពូលកាលពីខែវិច្ឆិកា ឆ្នាំ ២០១៧ មេដឹកនាំ និងសកម្មជនគណបក្សជាង ២០០ នាក់បានភៀសខ្លួនឆ្លងព្រំដែនទៅកាន់ប្រទេសថៃ ដើម្បីគេចពីការចាប់ខ្លួនក្រោមបទចោទពាក់ព័ន្ធនឹងការបន្តគាំទ្របក្សដែលត្រូវបានរំលាយនេះ។

ជិតប្រាំឆ្នាំក្រោយមក អ្នកនយោបាយនិរទេសខ្លួនអតីតគណបក្សសង្គ្រោះជាតិប្រហែល៤០នាក់ នៅតែស្ថិតក្នុងប្រទេសថៃ រួមទាំងលោកចន្រ្តា ផងដែរ។ ពួកគេត្រូវបានផ្តល់ឋានៈជាជនភៀសខ្លួនដោយអង្គការសហប្រជាជាតិ ប៉ុន្តែពួកគេជាច្រើននៅតែបន្តរស់នៅក្នុងភាពភ័យខ្លាច ដោយសារតែការគំរាមកំហែងសម្លាប់ដោយជនអនាមិក និងហានិភ័យនៃការចាប់ខ្លួន ការបញ្ជូនត្រលប់មកវិញ និងការចាប់ដាក់ពន្ធនាគារដោយអាជ្ញាធរថៃ និងកម្ពុជា។

លោក ចន្ត្រា ជាអតីតអនុប្រធានគណបក្សសង្គ្រោះជាតិខេត្តកំពង់ឆ្នាំង ដែលបានរត់គេចខ្លួនបន្ទាប់ពីបដិសេធមិនចូលរួមជាមួយគណបក្សកាន់អំណាចបាននិយាយថា៖ «ប្រសិនបើយើងស្នាក់នៅទីនេះ យើងនឹងភ័យខ្លាចអស់មួយជីវិត។ យើងស្ទើរតែបាត់បង់ស្មារតីអស់ហើយ»។​

រូបថតសារអនាមិកផ្ញើទៅកាន់លោក ដួង ចន្ត្រា អតីតអនុប្រធានគណបក្សសង្រ្គោះជាតិខេត្តកំពង់ឆ្នាំង កាលពីថ្ងៃទី១៥ ខែកញ្ញា ឆ្នាំ២០២២ ដោយគំរា​មចាប់ខ្លួន ឬសម្លាប់ លោក និងមន្ត្រីអតីតគណបក្សសង្គ្រោះជាតិពីរនាក់ទៀត ដែលកំពុងរស់នៅប្រទេសថៃ។ (រូបភាពផ្តល់ឱ្យ)

នៅឆ្នាំ ២០១៩ នៅពេលដែលសហស្ថាបនិកគណបក្សសង្រ្គោះជាតិ លោក សម រង្ស៊ី ប្រកាសពីចេតនាវិលត្រឡប់មកកម្ពុជាវិញ បន្ទាប់ពីរស់នៅនិរទេសខ្លួននៅប្រទេសបារាំងអស់ជាច្រើនឆ្នាំ លោក ចន្ត្រា បាននិយាយថា លោកបានគ្រោងប្រមូលផ្តុំអ្នកគាំទ្រគណបក្សសង្គ្រោះជាតិ ដើម្បីស្វាគមន៍លោក សម រង្ស៊ី នៅទីក្រុងបាងកក។ មេបក្សប្រឆាំងរូបនេះ មិនអាចឡើងយន្តហោះមកកម្ពុជាបានទេ ប៉ុន្តែតុលាការខេត្តកំពង់ឆ្នាំង នៅតែចេញដីកាចាប់ខ្លួនលោក ចន្ត្រា នៅឆ្នាំនោះ ដោយចោទប្រកាន់លោកពីបទសមគំនិតប្រឆាំងនឹងរដ្ឋាភិបាល ជាឧក្រិដ្ឋកម្មដែលផ្ដន្ទាទោសដាក់ពន្ធនាគារពី៥ឆ្នាំទៅ១០ឆ្នាំ។ លិខិត​ឆ្លង​ដែន​របស់​លោក​ក៏​ត្រូវ​បាន​រដ្ឋាភិបាល​កម្ពុជា​ដក​ហូត​ផង​ដែរ ដោយ​បន្សល់​ទុក​នូវ​លិខិត​របស់​អង្គការ​សហ​ប្រជាជាតិ​ថា លោក​មាន​សិទ្ធិ​ជ្រកកោន​នៅ​ប្រទេស​ថៃ។

ជីវិត​ជា​ជនភៀសខ្លួន​នយោបាយ​ធ្វើ​ឱ្យលោក​ចន្រ្តាភ័យ​ខ្លាចជារៀងរាល់ថ្ងៃ។ នគរបាល​ថៃ​តែងតែ​សួរ​ម្ចាស់ផ្ទះ​ជួលរបស់លោក​ឱ្យ​ប្រាប់ឈ្មោះ​ពលរដ្ឋ​ខ្មែរ​ដែល​ស្នាក់នៅ​ក្នុង​អគារ។ ពេលប៉ូលីសចុះមកត្រួតពិនិត្យ ចន្ត្រា​បាន​គេច​ខ្លួនទៅកន្លែងផ្សេងទៀត។

លោក​បាន​ថ្លែង​ថា​៖ «​ទោះបី​គណបក្ស​សង្គ្រោះ​ជាតិ​ត្រូវ​បាន​រំលាយ​ក៏ដោយ ក៏​រដ្ឋាភិបាល​កម្ពុជា​នៅ​តែ​តាម​ចាប់​មេដឹកនាំ​គណបក្ស​ប្រឆាំង​មិន​ថា​យើង​នៅ​ទីណា​នោះ​ទេ​»​។

រស់នៅក្នុងភាពភ័យខ្លាច

ចាប់តាំងពីឆ្នាំ ២០១៧ ជនភៀសខ្លួននយោបាយរបស់គណបក្សសង្គ្រោះជាតិជាង ២០០ នាក់បានភៀសខ្លួនទៅប្រទេសថៃ ដោយតិចជាង ៤០ នាក់បានតាំងទីលំនៅថ្មីនៅប្រទេសទីបី ហើយប្រហែល ៤០ នាក់នៅតែរស់នៅក្នុងប្រទេសថៃ នេះបើយោងតាម ​​សៅ ពលក្ខណ៍ ដែលជាគណៈកម្មាធិការគ្រប់គ្រងជនភៀសខ្លួនរបស់គណបក្សសង្គ្រោះជាតិក្នុងប្រទេសថៃ។

លោក ពលក្ខណ៍ បាននិយាយថា ចាប់តាំងពីពេលនោះមក មានមនុស្សជាង ១៥០នាក់ បានត្រឡប់មកកម្ពុជាវិញ ហើយ ៣នាក់ត្រូវបានចាប់ខ្លួន និងនិរទេសត្រឡប់ទៅប្រទេសកម្ពុជាវិញ។

លោក វឿង សំណាង និងលោក ឡាញ់ ថាវរី ជាអតីតមន្ត្រីឃុំសង្កាត់របស់គណបក្សសង្គ្រោះជាតិ និងលោក វឿន វាសនា អ្នកផ្សាយទូរទស្សន៍អនឡាញរបស់គណបក្សសង្គ្រោះជាតិ ត្រូវបានអាជ្ញាធរថៃចាប់ខ្លួន និងនិរទេសមកកម្ពុជាកាលពីខែវិច្ឆិកាឆ្នាំមុន។ អ្នកទាំងបីត្រូវបានទទួលស្គាល់ថាជាអ្នកស្វែងរកសិទ្ធិជ្រកកោននយោបាយដោយទីភ្នាក់ងារជនភៀសខ្លួនរបស់អង្គការសហប្រជាជាតិ។ យ៉ាងហោចណាស់ពីរនាក់ក្នុងចំណោមពួគគេទាំងបីនាក់នេះត្រូវបានកាត់ទោសពីបទញុះញង់ ហើយត្រូវបានកាត់ទោសឱ្យជាប់ពន្ធនាគារពី១៨ខែ ទៅ២ឆ្នាំ។ នេះបើយោងតាមអង្គការសិទ្ធិមនុស្សលីកាដូ។ អ្នក​ទាំង​បី​កំពុង​ជាប់​ពន្ធនាគារ​នៅ​កម្ពុជា។

អតីត​មន្ត្រី​គណបក្ស​សង្គ្រោះ​ជាតិ​បី​រូប គឺ​លោក ដួង ចន្ត្រា លោក ហុង ថេង និង​លោក តាំង សុផុន (រាប់ពី​ឆ្វេង) នៅ​សួន​មួយ​ក្នុង​ប្រទេស​ថៃ កាល​ពី​ថ្ងៃ​ទី​១៤ ខែ​កញ្ញា ឆ្នាំ​២០២២។ (រូបថតផ្តល់ឱ្យ)

ចាប់តាំងពីសហការីទាំងបីនាក់របស់លោកត្រូវបានឃុំខ្លួន និងដាក់ពន្ធនាគារមក លោក ចន្រ្តា បាននិយាយថាលោកមិនសូវហ៊ានចេញពីផ្ទះឡើយ។ លោកក៏បានឈប់ធ្វើការសំណង់នៅដើមឆ្នាំនេះ ដោយខ្លាចអាជ្ញាធរថៃចាប់លោកនៅកន្លែងធ្វើការ ហើយបញ្ជូនលោកមកកម្ពុជាវិញ។

លោកបានថ្លែងថា៖ «សម្រាប់ពួក​យើង ​ការ​ផ្លាស់​មកនេះ​ប្រទេស​ថៃ​ដើម្បី​រស់​នៅ​នេះគឺ​​លំបាក​ណាស់​។ ពួកយើង​មិនមានម្ហូបអាហារហូបចុកគ្រប់គ្រាន់ ហើយ​តស៊ូ​ចេញ​ទៅ​ធ្វើ​ការ​ដោយ​ភ័យ​ខ្លាច។ ពួកយើង​តែង​តែ​ខ្លាច​គេ​ចាប់​ខ្លួន។ ពួកយើង​ពិត​ជា​ព្រួយ​បារម្ភ​មែនចំពោះ​ការ​គំរាម​កំហែង​​ពី​រដ្ឋាភិបាល​ក្រុង​ភ្នំពេញ»។

អ្នកស្រី សាត ផា សកម្មជនគណបក្សសង្គ្រោះជាតិម្នាក់ទៀត បាននិយាយថា ចាប់តាំងពីមកដល់ប្រទេសថៃក្នុងខែមេសា អ្នកស្រីបានផ្លាស់ប្តូរកន្លែងរស់នៅពីរដង ដោយសារអ្នកស្រីបានឃើញមនុស្សចម្លែកមកមើលអ្នកស្រី ដោយឈរនៅមុខបន្ទប់ជារៀងរាល់ថ្ងៃ និងតាមពេលអ្នកស្រីដើរតែម្នាក់ឯងដើម្បីទៅយកអាហារនៅវត្តក្បែរនោះ។

អ្នកស្រី ផា បាននិយាយថាអ្នកស្រីមិនគិតថាមានសុវត្ថិភាពនោះឡើយ ក្នុងការរស់នៅប្រទេសថៃ ដោយអ្នកស្រីជឿថាជនភៀសខ្លួននយោបាយដែលស្នាក់នៅទីនោះ នឹងត្រូវបញ្ជូនមកកម្ពុជាវិញដោយអាជ្ញាធរថៃ។

សកម្មជន​ដែល​បាន​ជាប់​ពន្ធនាគារ​ក្នុង​ការ​តវ៉ា​នៅ​ខាង​ក្រៅ​ស្ថានទូត​ចិន​នៅរាជធានី​ភ្នំពេញកាលពី​ឆ្នាំ ២០២០ រូបនេះបាន​ថ្លែង​ថា​៖ «យើង​មិន​ហ៊ាន​ចេញក្រៅ​ទេ ព្រោះ​​ប្រឈម​នឹង​ការ​ចាប់​ខ្លួន និង​ការ​គំរាម​កំហែង​ដល់​អាយុ​ជីវិត​​យើង។ ខ្ញុំ​ភៀស​ខ្លួន​នៅ​ប្រទេស​ទី​ពីរ​នេះ​រស់​នៅ​ក្នុង​ភាព​លំបាកលំបិនណាស់​ ​គ្មាន​ផ្ទះ​សម្បែង និង​គ្មាន​ប្រាក់​ចំណូលអីទេ។ ខ្ញុំ​រស់​នៅ​ដោយ​សុំ​អាហារ​នៅ​វត្ត»។

អ្នកស្រីផា បានដាក់ពាក្យសុំសិទ្ធិជ្រកកោននៅប្រទេសទីបីរួចហើយ។

ការគំរាមកំហែងពីមុន

ការ​គំរាម​សម្លាប់​ដែល​ផ្ញើ​ទៅ​លោក​​​ ចន្រ្តា ​កាល​ពី​ខែ​មុន​ក៏​សំដៅ​ទៅ​​លោក ហុង ថេង អតីត​អនុប្រធាន​គណបក្ស​សង្គ្រោះ​ជាតិ​ខេត្ត​កំពង់ស្ពឺ ដែល​រស់​នៅ​ប្រទេស​ថៃដែរ។

លោក ថេង បាននិយាយថាលោកបានទទួលការគំរាមសម្លាប់ស្រដៀងគ្នា ពីគណនីហ្វេសប៊ុកដូចគ្នាកាលពីថ្ងៃទី ៥ ខែមិថុនា នៅពេលដែលលោកបានឡាយហ្វេសប៊ុកមួយថ្ងៃ បន្ទាប់ពីការបោះឆ្នោតឃុំសង្កាត់នៅកម្ពុជា។ លោក ថេង នៅពេលនោះបាន​និយាយ​អំពី​ភាព​មិន​ប្រក្រតី​នៃ​ការ​បោះ​ឆ្នោត រួម​ទាំង​ការិយាល័យ​បោះឆ្នោត​មួយ​ចំនួន​ខ្វះ​អ្នក​សង្កេតការណ៍​ឯករាជ្យ។

លោកបានមានប្រសាសន៍ថាអតីតមន្រ្តីនិងអ្នកគាំទ្រគណបក្សសង្គ្រោះជាតិដែលនិរទេសខ្លួនស្ថិតក្នុង«គ្រោះថ្នាក់ធ្ងន់ធ្ងរ» ហើយពួកគេមានការព្រួយបារម្ភយ៉ាងខ្លាំង ចំពោះការគំរាមសម្លាប់នេះ។

នៅពាក់កណ្តាលខែកញ្ញា លោក ចន្រ្តា លោក ថេង និងអតីតសមាជិកក្រុមប្រឹក្សាឃុំមកពីគណបក្សសង្គ្រោះជាតិ លោក តាំង សុផុន បានជូនដំណឹងទៅភ្នាក់ងារអង្គការសហប្រជាជាតិទទួលបន្ទុកជនភៀសខ្លួន និងមេធាវីការពារជនសុំសិទ្ធិជ្រកកោនថៃ អំពីការគំរាមកំហែងប្រឆាំងនឹងពួកគេរួចហើយ។

លោក ចន្ត្រាបាននិយាយថាលោកបានដាក់ពាក្យសុំសិទ្ធិជ្រកកោន ជាលើកដំបូងនៅប្រទេសទីបីតាំងពីឆ្នាំ២០១៩ ប៉ុន្តែលោកមិនទាន់ទទួលបានសិទ្ធទៅប្រទេសណាមួយនៅឡើយ ហើយលោកក៏ខ្លាចមានការចាប់ខ្លួន និងការនិរទេសមកកម្ពុជាវិញដែរ។

លោកបានលើកឡើងថា៖ «យើងនៅតែស្ថិតក្នុងភាពគ្រោះថ្នាក់ បើទោះជា UNHCR បានផ្តល់សិទ្ធិជ្រកកោនដល់ពួកយើងក៏ដោយ។ ដោយសារខ្ញុំធ្លាប់មានបទពិសោធន៍នេះពីមុនមក ខ្ញុំមានការព្រួយបារម្ភថា ប្រសិនបើ UNHCR មិនរកកន្លែងមានសុវត្ថិភាពសម្រាប់ខ្ញុំរស់នៅទេ នោះខ្ញុំប្រហែលជាមានបញ្ហាដូច [អតីតមន្ត្រីគណបក្សសង្គ្រោះជាតិដែលត្រូវនិរទេស] សំណាង និងវាសនាដែរ»។

ការភ័យខ្លាចក្នុងការធ្វើបត្យាប័ន

ក្នុងរយៈពេលប៉ុន្មានឆ្នាំចុងក្រោយនេះ អ្នកតស៊ូមតិផ្នែកសិទ្ធិមនុស្ស បានកត់សម្គាល់ឃើញពីស្ថានភាពជាក់ស្តែង ការដោះដូរគ្នារវាងកម្ពុជានិងថៃ ដែលប្រទេសនីមួយៗតែងចាប់ខ្លួនបញ្ជូន អ្នកនយោបាយប្រឆាំងដែលជ្រកកោនឱ្យប្រទេសសាមីតាមការស្នើសុំរៀងខ្លួន។​

កម្ពុជានិងថៃ បានឈានដល់កិច្ចព្រមព្រៀងមួយក្នុងឆ្នាំ ២០១៨ ដើម្បីដោះដូរ«ជនល្មើសបរទេសដែលគេចខ្លួន» ដើម្បីការពារកុំឱ្យប្រទេសទាំងពីរ ក្លាយជាមូលដ្ឋានសម្រាប់«ការញុះញង់និងបង្កជម្លោះ» នេះបើយោងតាមសេចក្តីរាយការណ៍ របស់កាសែតភ្នំពេញប៉ុស្តិ៍ដែលបានដកស្រង់សេចក្តីថ្លែងការណ៍របស់រដ្ឋាភិបាលថៃនាពេលនោះ។​​ ប៉ុន្មានថ្ងៃក្រោយមក សមាជិកបក្សប្រឆាំងកម្ពុជានៅទីក្រុងបាងកក បានប្រាប់ភ្នំពេញប៉ុស្តិ៍ថា ពួកគេបានកត់សម្គាល់ថាឃើញមានរថយន្តយោធាកម្ពុជា នៅជិតផ្ទះរបស់ពួកគេ។

ក្រុមអ្នកការពារសិទ្ធិជនភៀសខ្លួន (Asylum Access Thai) បានឱ្យដឹងថា ប្រទេសថៃមិនមែនជាប្រទេសហត្ថលេខីនៃអនុសញ្ញាជនភៀសខ្លួនឆ្នាំ១៩៥១ឡើយ ហើយ«មិនមានច្បាប់ណាមួយនៅថៃដើម្បីផ្តល់ឱ្យជនភៀសខ្លួននូវភាពស្របច្បាប់ណាមួយឡើយ»។

រឿងនេះមានន័យថាជនសុំសិទ្ធជ្រកកោនរាប់ពាន់នាក់ខ្វះភាពស្របច្បាប់ ដែលកក្តានេះ«បានធ្វើឱ្យពួកគេប្រឈមនឹងហានីភ័យនៃការចាប់ខ្លួន ការឃុំខ្លួន និងការបញ្ជូនត្រឡប់ទៅរកគ្រោះថ្នាក់» នៅប្រទេសកំណើតរបស់ពួកគេវិញ។

អតីតមន្ត្រី និងសកម្មជនគណបក្សសង្គ្រោះជាតិ ដែលបានភៀសខ្លួនចេញពីប្រទេសកម្ពុជា ជួបជុំផ្តុំគ្នាបង្ហាញពីសាមគ្គីភាពដើម្បីសិទ្ធិមនុស្ស នៅបន្ទប់ជួលមួយកន្លែងក្នុងប្រទេសថៃ នៅថ្ងៃទី២៤ ខែកញ្ញា ឆ្នាំ២០២២។ (ខេមបូចា/ខៀវ សរស្វតី)

អ្នកនាំពាក្យភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប្រចាំប្រទេសថៃបាននិយាយថា តិចជាង១% នៃជនភៀសខ្លួននៅលើពិភពលោកត្រូវបានតាំងទីលំនៅថ្មីជារៀងរាល់ឆ្នាំ ហើយគិតត្រឹមចុងខែកញ្ញា ប្រទេសថៃមានអ្នកស្វែងរកសិទ្ធិជ្រកកោន និងជនភៀសខ្លួននៅចំនួន៤៨០០នាក់ ។

Roussel-Hemery បានប្រាប់តាមអ៊ីម៉ែលថា៖ «ជាមួយនឹងកូតាមានកំណត់សម្រាប់ ការតាំងលំនៅថ្មី ជារៀងរាល់ឆ្នាំ UNHCRប្រចាំប្រទេសថៃ ក៏ដូចជាបណ្តាប្រទេសផ្តល់សិទ្ធិ ជ្រកកោនផ្តល់អាទិភាពដល់ជនភៀសខ្លួនដោយផ្អែកលើតម្រូវការការពាររបស់ពួកគេ ។ មិនមែនជនភៀសខ្លួនទាំងអស់នឹងមានសិទ្ធិទទួលបានការតាំងទីលំនៅថ្មីទេ»។​

«អនុវត្តតាមច្បាប់»

អ្នកនាំពាក្យគណបក្សកាន់អំណាច លោក សុខ ឥសាន ច្រានចោលការអះអាងរបស់មន្រ្តីអតីតគណបក្សសង្រ្គោះជាតិដែលនិរទេសខ្លួននៅប្រទេសថៃ ដែលចោទថារដ្ឋាភិបាលក្រុងភ្នំពេញបានបញ្ជូនអាជ្ញាធរទៅឃ្លាំមើលពួកគេ។

លោកបានលើកឡើងថា៖ «រាជរដ្ឋាភិបាលយល់អំពីច្បាប់ជាតិ និងច្បាប់អន្តរជាតិ ដូច្នេះការចោទប្រកាន់ថាមានបញ្ជូនភ្នាក់ងារសមត្ថកិច្ចទៅធ្វើការប្រតិបត្តិការនៅក្នុងប្រទេសថៃ វាអត់មានទេ»។

អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន មានប្រសាសន៍ថា អតីតមន្ត្រី និងសកម្មជនគណបក្សសង្គ្រោះជាតិក្នុងប្រទេសថៃ ប្រហែលជាខ្លាច«អំពើអាក្រក់របស់ពួកគេកន្លងមកនៅកម្ពុជា» និងការចាប់ខ្លួនជាបន្តបន្ទាប់។

លោកបាននិយាយថា៖«យើងមិនដែលតាមចាប់អ្នកនយោបាយទេ។ ឧក្រិដ្ឋជនទាំងអស់ សុទ្ធតែមានដីការតុលាការពាក់ព័ន្ធនឹងបទឧក្រិដ្ឋ [មុន​ពេល​ចាប់​ខ្លួន]»។

លោក គឹម ឃឿន បាន​និយាយ​ថា ទោះ​បី​ជា​ការ​ទាមទារ​សិទ្ធិ​ជ្រកកោន​ក្តី ការ​ធ្វើ​បត្យាប័ន​គឺ​អាស្រ័យ​លើ​ប្រទេស​ម្ចាស់​ផ្ទះ​ដែល​បញ្ជូន​មនុស្ស​ត្រឡប់​មក​កម្ពុជា​វិញ។

លោក​បាន​មាន​ប្រសាសន៍​ថា៖ «យើង​មាន​កិច្ច​សហប្រតិបត្តិការមែន ប៉ុន្តែ​យើង​ទាំង​អស់​គ្នាសុទ្ធតែអនុវត្តទៅ​តាម​ច្បាប់​របស់​ប្រទេស​នីមួយៗ»។

អ្នកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា ប្រទេសមួយចំនួន រួមទាំងប្រទេសថៃ បានសហការជាមួយរដ្ឋាភិបាលកម្ពុជា ក្នុងការបញ្ជូនសកម្មជនកម្ពុជាមកប្រទេសវិញ។

អ្នកស្រីមានប្រសាសន៍ថា៖ «វាជាការបំពានទៅលើសិទ្ធិសុំជ្រកកោនផ្នែកនយោបាយ ដែលធានាដោយអង្គការសហប្រជាជាតិ។ ប្រទេសជាសមាជិកគួរតែអនុលោម ទៅតាមគោលការណ៍របស់អង្គការសហប្រជាជាតិក្នុងការផ្ដល់នូវកិច្ចគាំពារ ហើយធានាថាពួកគាត់មានសុវត្ថិភាព»។

ដើម្បីការពារជនភៀសខ្លួននៅក្នុងប្រទេសថៃ លោកស្រីបាននិយាយថា ប្រទេសទីបីគួរតែពន្លឿនដំណើរការផ្តល់សិទ្ធិជ្រកកោនដើម្បីទទួលយកអ្នកដែលស្ថិតនៅក្រោមការគំរាមកំហែង។

អ្នកស្រី សុភាព បាន​ថ្លែង​ថា​៖ «ពីព្រោះការពន្យាពេលកាន់តែយូរ [​ក្នុង​ការ​តាំង​ទី​លំនៅ​ថ្មី​របស់​ជនភៀសខ្លួន​] ធ្វើឱ្យពួកគាត់ប្រឈមនឹងហានិភ័យកាន់តែច្រើនឡើង»។

ទោះបីជាមានការគំរាមកំហែងសម្លាប់ ហានិភ័យនៃការចាប់ខ្លួន និងត្រូវប្រឈមនឹងការបញ្ជូនត្រលប់មកវិញ ក៏អតីតមន្រ្តីគណបក្សសង្គ្រោះជាតិ ដែលនិរទេសខ្លួនបាននិយាយថា ពួកគេនៅតែសង្ឃឹមថាពួកគេនឹងស្វែងរកបាន កន្លែងសុវត្ថិភាពនៅក្នុងប្រទេសទីបី ហើយនឹងបន្តតស៊ូដើម្បីសិទ្ធិរបស់ពួកគេ ក្នុងការចូលរួមក្នុងនយោបាយ។ អ្នក​ខ្លះថាប្រសិនបើមិនអាចទៅណាទេមានតែទទួល​​យក​ភាព​អយុត្តិធម៌។

លោក ចន្ត្រា អតីតមន្ត្រីគណបក្សសង្គ្រោះជាតិ បាននិយាយថា លោកបានលើកទឹកចិត្តខ្លួនឯងដោយគិតថាការធ្វើនេះដើម្បីអនាគតរបស់ប្រទេស និងប្រជាជនកម្ពុជា។​

លោកបានលើកឡើងថា៖ «ខ្ញុំ​នឹង​មិន​បោះបង់​ការ​ចង់​បាន​លទ្ធិប្រជាធិបតេយ្យ​ពិតប្រាកដ​នៅ​កម្ពុជា​សម្រាប់​មនុស្ស​ជំនាន់​ក្រោយ​ឡើយ»

ប្រែសម្រួលពីអត្ថបទភាសាអង់គ្លេស៖ Facing Death Threats, CNRP Exiles in Thailand Seek Safer Refuge

574 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម