សមាគមសម្ព័ន្ធអ្នកសារព័ត៌មានកម្ពុជា

គ្រួសារអះអាងថាលោក យួន ឈីវ ចាងហ្វាងសារព័ត៌មានអនឡាញ ត្រូវចាប់ខ្លួនពាក់ព័ន្ធជម្លោះដីធ្លី

ភរិយាលោក យួន ឈីវ អ្នកស្រី អ៊ូច វ៉ាន់ថន ជូតទឹកភ្នែកអំឡុងពេលផ្ដល់បទសម្ភាសន៍នៅផ្ទះក្នុងភូមិព្រៃក្រឡម ឃុំថ្មស ខណៈនិយាយរៀបរាប់ពីការចាប់ខ្លួនរបស់ស្វាមីអ្នកស្រី។ រូបភាពថតកាលពីថ្ងៃទី២២ ខែតុលា ឆ្នាំ២០២១។ ខេមបូចា/ ឃួន ណារីម
ភរិយាលោក យួន ឈីវ អ្នកស្រី អ៊ូច វ៉ាន់ថន ជូតទឹកភ្នែកអំឡុងពេលផ្ដល់បទសម្ភាសន៍នៅផ្ទះក្នុងភូមិព្រៃក្រឡម ឃុំថ្មស ខណៈនិយាយរៀបរាប់ពីការចាប់ខ្លួនរបស់ស្វាមីអ្នកស្រី។ រូបភាពថតកាលពីថ្ងៃទី២២ ខែតុលា ឆ្នាំ២០២១។ ខេមបូចា/ ឃួន ណារីម

ស្រុក​បុទុមសាគរ នៃខេត្ត​កោះកុង៖ អ្នក​ស្រី អ៊ូច វ៉ាន់ថន ជា​ភរិយា​របស់ចាងហ្វាង​សារព័ត៌មាន​អនឡាញ​ ​លោក យួន​ ឈីវ ដែល​កំពុង​ជាប់​ឃុំ ​បាន​និយាយ​រៀប​រាប់​ពី​ការ​ចាប់​ខ្លួន​ស្វាមី​អ្នកស្រីថាជាប់​ពាក់​ព័ន្ធ​នឹង​ការ​រាយការណ៍​ពី​ជម្លោះ​ដី​ធ្លី​នៅ​តំបន់​ការពារ​ ក្នុង​ឧទ្យានជាតិ​បុទុម​សាគរ។​

ស្រ្តី​ជាម្ដាយ​វ័យ​ ៤២ឆ្នាំ មាន​កូន​ក្នុង​បន្ទុក​ពីរ​នាក់រូបនេះ​បាន​រៀប​រាប់​ថា មុន​ពេល​ប្ដីអ្នកស្រី​ត្រូវ​ចាប់​ខ្លួន អ្នក​ភូមិ​ជា​ច្រើន​រូប​បាន​មក​សុំ​ឲ្យ​លោក យួន​ ឈីវ ផ្សាយព័ត៌មាន​អំពីការ​បណ្ដេញ​​ប្រជា​ពល​​រដ្ឋ​ចេញ​ពីភូមិ​ចម្ការលើ និង​ភូមិ​ចម្លងគោ ក្នុង​ឃុំ​ថ្ម​ស​។​

 អ្នក​ស្រី​បាននិយាយ​ថា៖​«ខ្ញុំ​គ្រាន់​តែ​បាន​ដឹង​ថា​អ្នក​ភូមិ​បាន​មកសុំឲ្យ​គាត់​ជួយ ​នៅ​ផ្ទះ​របស់​ពួកគេ ដែល​ត្រូវ​បាន​បំផ្លាញ[ដោយ​អាជ្ញាធរ]»។

 អ្នក​ស្រី វ៉ាន់ថន កំពុង​រស់​នៅ​ជាមួយ​កូន​ស្រី​​អាយុ​បួន​ឆ្នាំ​ និង​កូន​ប្រុស​​​អាយុបួន​ខែ នៅ​ក្នុង​ផ្ទះ​ឈើ​មួយ​ខ្នង​ក្នុង​ភូមិ​ព្រៃ​ក្រឡំ។​ អ្នកស្រី​ឲ្យ​ដឹង​ថា​ឥឡូវ​នេះស្វាមី​អ្នកស្រី​ត្រូវ​ឃុំ​ខ្លួន និង​មិន​ដឹង​ថា​ខ្លួន​អាច​នឹង​ត្រូវ​មើល​ថែគ្រួសារ​បែប​ណា​ទេ​។

អ្នកស្រី​បន្ថែម​ថា៖ «​ខ្ញុំ​តក់​ស្លុត​ជា​ខ្លាំង​ពេល​ឮ​ថា​គាត់​ត្រូវ​ចាប់​ខ្លួន ហើយ​ខ្ញុំ​មិន​ដឹង​ថា​ត្រូវ​ធ្វើ​អ្វី ខណៈ​គាត់​កំពុង​នៅ​ក្នុង​ពន្ធ​នាគារ…​ខ្ញុំ​កំពុង​ប្រឈម​ការ​លំបាក ខ្ញុំ​មិន​អាច​ធ្វើ​អ្វី​បានទេ ដោយសារតែ​ត្រូវ​នៅ​មើល​ថែកូនៗ​នៅ​ផ្ទះ»។​

លោក យួន ឈីវ ចាងហ្វាងសារព័ត៌មានអនឡាញជាមួយនឹងសំណល់នៃចម្ការស្វាយចន្ទីរបស់លោក ដែលត្រូវបានអាជ្ញាធរកាប់បំផ្លាញកាលពីដើមខែកញ្ញា។
លោក យួន ឈីវ ចាងហ្វាងសារព័ត៌មានអនឡាញជាមួយនឹងសំណល់នៃចម្ការស្វាយចន្ទីរបស់លោក ដែលត្រូវបានអាជ្ញាធរកាប់បំផ្លាញកាលពីដើមខែកញ្ញា។

លោក យួន ឈីវ ត្រូវ​បាន​ចាប់​ខ្លួន​កាល​ពីចុង​ខែ​កញ្ញាកន្លង​ទៅ និង​បាន​កាត់ទោស​ឲ្យជាប់​ពន្ធនាគារ​រយៈពេល​មួយ​ឆ្នាំ ក្រោម​បទ​ចោទថា​បាន​ញុះញង់​ឲ្យ​ប្រព្រឹត្តិបទឧក្រិដ្ឋ តាម​រយៈការ​ផ្សាយ​របស់​ខ្លួន ដែល​ខាង​អាជ្ញាធរ​ថា​ជា​ព័ត៌មាន​មិន​ពិត​ទាក់​ទង​នឹង​រដ្ឋាភិបាល​បាន​ឆ្វៀល​ដី​រដ្ឋ​នៅ​ក្នុង​ឃុំ​ថ្មស ឲ្យ​ទៅ​ប្រ​ជា​ពល​រដ្ឋ​ប្រើ​ប្រាស់​ឯកជន​។​

ចាងហ្វាង​រូប​នេះ​ កន្លង​មក​បាន​សរសេរ​មតិ​លើ​បណ្ដាញ​សង្គម​ហ្វេស​ប៊ុក​នៅ​ថ្ងៃទី៩ និង​ទី​១០ ខែកញ្ញា ថា​អភិបាលរ​ង​ខេត្ត​កោះ​កុង លោក សុខ សុទ្ធី បាន​នាំ​កម្លាំង​សមត្ថកិច្ច១០០​នាក់ បង្ខំ​ប្រជា​ពល​រដ្ឋ​ចេញ​ពី​លំនៅ​ដ្ឋាន​ដោយ​បង្ខំ និង​បាន​បំផ្លាញ​ផ្ទះ និង​ដំណាំ​ផ្សេងៗ​របស់​ប្រជា​ពល​រដ្ឋ​ផង។ លោក ឈីវ ក៏​បាន​សរសេរ​ទៀត​ថា លោក សុទ្ធី និង​អាជ្ញាធរ​មិន​បាន​អនុវត្ត​តាម​អនុក្រឹត្យ​លេខ​៣០ ដែល​ចុះ​ហត្ថលេខា​ដោយ​លោក​នាយក​រដ្ឋ​មន្ត្រី​ហ៊ុន សែន កាលពី​ខែមីនា ដែល​បាន​ឆ្វៀល​​ដី​ពី​ឧទ្យាន​ជាតិ​សម្រាប់​ប្រើ​ប្រាស់​ឯកជន​។​

ការ​ចាប់​ខ្លួន​នេះ​ធ្វើ​ឡើង​តាម​បញ្ជា​របស់​រដ្ឋ​មន្ត្រី​ក្រ​សួង​ការពារ​ជាតិ លោក ទៀ បាញ់ និងបន្ទាប់ពី ​អភិបាល​រង​ខេត្ត​ លោក សុខ សុទ្ធី ដាក់​ពាក្យ​បណ្ដឹង​ប្រឆាំង​នឹង​ចាងហ្វាង​ររូបនេះ។ បណ្ដឹងរបស់​លោក សុខ សុទ្ធី ​​បាន​រៀប​រាប់​ថា លោក ឈីវ បាន​និយាយ​រិះគន់​ដោយ​ផ្ទាល់លើ​រូប​លោក​ក្នុង​ប្រអប់​បញ្ចេញ​មតិ​លើ​ផេក​ហ្វេស​ប៊ុក​របស់​សារព័ត៌មាន​អនឡាញ Koh Kong Hot News ​របស់​លោក​ ឈីវ។

អ្នកស្រី វ៉ាន់ថន រៀប​រាប់​ទៀត​ថា ប្ដី​អ្នកស្រី​ក៏​មាន​ដី​នៅ​តំបន់​ដែល​ប្រជា​ពល​រដ្ឋ​មាន​ជម្លោះ​ជាមួយ​អាជ្ញាធរ​នេះ​ដែរ ប៉ុន្តែ​អ្នកស្រី​ថា​ខ្លួន​មិន​ដឹង​ថា​មាន​ប៉ុន្មាន​ហិកតា​នោះទេ​។​

មុន​ពេល​ចាប់​ខ្លួន អ្នកស្រី​ថា ស្វាមី​ជា​អ្នក​ទទួល​បន្ទុក​លើ​ការ​ចំណាយ​ផ្សេងៗ​របស់​គ្រួសារទាំង​មូល​។​

 អ្នកស្រីបន្ថែម​ថា៖ «បើ​សិន​ជាគាត់​នៅ​បន្ត​ជាប់​ពន្ធនាគារ ខ្ញុំ​នឹងប្រឈម​ការ​លំបាក​ខ្លាំង​លើ​ជីវភាព»។​

អ្នកស្រី អ៊ូច វ៉ាន់ថន ​ជាមួយ​កូនប្រុស​អាយុ​បួន​ខែ និង​កូន​ស្រី អាយុបួ​នឆ្នាំ។ រូបភាពថត កាលពី​ថ្ងៃទី​២២ ខែតុលា។ ខេមបូចា/ ឃួន ណារីម​។
អ្នកស្រី អ៊ូច វ៉ាន់ថន ​ជាមួយ​កូនប្រុស​អាយុ​បួន​ខែ និង​កូន​ស្រី អាយុបួ​នឆ្នាំ។ រូបភាពថត កាលពី​ថ្ងៃទី​២២ ខែតុលា។ ខេមបូចា/ ឃួន ណារីម​។

មេឃុំថ្មស លោក អ៊ិត កួន ប្រាប់​ខេមបូចា ថា​ការ​ចាប់​ខ្លួន​លោក​ឈីវ មិន​មែន​​ធ្វើ​ឡើង​ដោយសារតែ​ការ​ប្រមាថ​អាជ្ញាធរ​ទេ ប៉ុន្តែ​ធ្វើ​ឡើង​ដោយសារតែ​លោក​បាន​ញុះ​ញង់​ប្រជាពល​រដ្ឋ​ឲ្យ​ចូល​កាន់​កាប់​ដី​រដ្ឋ​។​

លោក បាននិយាយថា៖ «បាទ វា​ក៏​ជាប់​ពាក់​ព័ន្ធ​នឹង​ដីជម្លោះដែរ ពីព្រោះ​​គាត់​បាន​ចូល​ទៅកាប់​​ឆ្ការ​​ព្រៃ​ក្នុង​ឧទ្យាន​ជាតិ»។​

លោក​អះអាង​ថា លោក យួន ឈីវ បាន​ប្រមូល​ប្រជា​ពល​រដ្ឋ​ទៅ​ផ្ដិត​មេដៃ​ដាក់​ញត្តិ​ទៅ​កាន់​អាជ្ញាធរ​ខេត្ត និង​ក្រ​សួង​ពាក់​ព័ន្ធ ដើម្បី​ស្នើ​សុំ​ជា​ម្ចាស់​កម្មសិទ្ធិ​លើ​ដី​ទាំង​នោះ​។​

លោក​ឲ្យ​ដឹង​ទៀត​ថា៖ «គាត់​ប្រើ​អ្នក​ភូមិ​ជា​ខែល…​គាត់​បានទិញ​ដី​ពី​ប្រជា​ពល​រដ្ឋ ប៉ុន្តែ​មិនមាន​មន្ត្រី​ណា​ហ៊ាន​ចុះ​ហត្ថលេខា[ទទួល​ស្គាល់កម្មសិទ្ធិ] ដល់​គាត់»។​

លោក​បន្ថែម​ទៀត​ថា ប្រជា​ពល​រដ្ឋ​ប្រហែល​១១០​គ្រួសារ​បាន​ចូលកាប់​ឆ្ការ​ដីនោះ​ដោយ​ខុស​ច្បាប់​រវាង​ឆ្នាំ​២០១៨ និង​២០២០ ទោះ​បីជា​មានការ​ហាម​ឃាត់​ពី​អាជ្ញាធរ​ជា​ច្រើន​ដង​ក៏​ដោយ​។​

អាជ្ញាធរ​មូល​ដ្ឋាន​បានចោទ​ប្រកាន់​លោក ឈីវ ថាបានជួល​ប្រជា​ពល​រដ្ឋ​ទន្ទ្រាន​ដី​ព្រៃ​របស់​ឧទ្យាន​ជាតិ ដើម្បី​លក់​ទៅ​ឲ្យ​ឯក​ជន ក៏​ដូច​ជា​គំរាម​ទារ​ប្រាក់​ជា​ថ្នូរ​នឹង​ការ​ផ្សាយ​ព័ត៌មាន​។​​

លោកបាន​ឲ្យ​ដឹង​ទៀត​ថា៖ «គាត់​បាន​ប្រាប់​យើង​ឲ្យ​បង្រ្កាប​លើ​អ្នកនេសាទ​ក្នុង​ស្រុក ហើយ​បើ​យើងមិន​បង្ក្រាប គាត់​ថា​គាត់​នឹង​ផ្សាយ​លើ​ហ្វេសប៊ុក និ​ងចោទ​យើងថា​មិន​បង្ក្រាប​បទល្មើស»។​

លោក​បន្ថែម​ថា៖ «គាត់​ធ្លាប់​ទារ​ប្រាក់​ពី​ខ្ញុំ ប៉ុន្តែ​ខ្ញុំ​មិន​ដែល​ឲ្យ​ទៅ​គាត់ទេ»។​

អ្នក​ស្រី ណៃ ស៊ី វ័យ​៦០​ឆ្នាំ ដែល​ត្រូវបណ្ដេញ​ចេញពី​ដី​កាល​ពី​ខែ​មុន បាន​និយាយ​ថា អ្នកស្រី​កាន់​កាប់​ដី​ចំនួន​បួន​ហិក​តា​នៅ​ក្នុង​តំបន់​អូរយ៉ូយ៉ា ក្នុង​ឆ្នាំ​២០០៧ ក្នុង​ភូមិ​ចម្លងគោ។​

អ្នក​ស្រី​បន្ថែម​ថា៖ «ខ្ញុំ​មាន​សមាជិក​គ្រួសារ​ចំនួន​១៦​នាក់ និង​ម្នាក់ៗ​មាន​ដី​ប្រហែល​បី​ហិកតា»។​

 អ្នក​ស្រីឲ្យ​ដឹង​ទៀត​ថា៖ «​ខ្ញុំ​យល់​ស្រប​ថា​ខ្ញុំ​បាន​ទៅ​រស់​នៅ​លើ​ដី​រដ្ឋ ប៉ុន្តែ​ដី​នៅ​ក្នុង​ឃុំ​ថ្មស​មិន​ស្រប​ច្បាប់​ទេ​ចាប់ពី​មាត់​សមុទ្រ​ដល់​ភ្នំ ហើយដីមិន​ទាន់​បាន​ឆ្វៀល​ចេញ​ទេ»។​

អ្នក​ស្រី​បន្ថែម​ថា៖ «​ខ្ញុំ​បាន​ដាក់​ញត្តិ​ស្នើសុំ​ដោះ​ដូរ​ដី​ពីព្រោះ​ខ្ញុំ​មិន​មាន​ដីឯណា​ធ្វើ​ស្រែចម្ការទេ»។​

អ្នក​ស្រី ណៃ ស៊ី ជាអ្នក​ភូមិ​ម្នាក់​រង​គ្រោះ​ក្នុង​ជម្លោះ​ដីធី​​ក្នុង​ឧទ្យាន​ជាតិ​បុទុម​សាគរ។ រូបភាព​ថតនៅថ្ងៃទី​២៣ ខែតុលា។ ខេមបូចា/ ឃួន ណារីម​។​
អ្នក​ស្រី ណៃ ស៊ី ជាអ្នក​ភូមិ​ម្នាក់​រង​គ្រោះ​ក្នុង​ជម្លោះ​ដីធី​​ក្នុង​ឧទ្យាន​ជាតិ​បុទុម​សាគរ។ រូបភាព​ថតនៅថ្ងៃទី​២៣ ខែតុលា។ ខេមបូចា/ ឃួន ណារីម​។​

អ្នក​ស្រី​ឲ្យ​ដឹង​ទៀត​ថា ខ្លួន​តែងតែ​លួច​ចូល​ទៅ​ក្នុង​ដី​ចម្ការ​ ដើម្បី​ជីក​ដំឡូងជ្វា គល់​ស្លឹកគ្រៃ និងធ្វើ​ស្រូវ ដើម្បី​ដោះ​ស្រាយ​ជីវភាព ទោះបី​ជា​អាជ្ញាធរ​ហាមឃាត់​ក៏​ដោយ។ កាល​ពី​ខែ​កញ្ញា អ្នកស្រី​ថា អាជ្ញាធរ និងមន្ត្រី​​ឧទ្យានុរក្សបាន​មក​បំផ្លាញ​ដំណាំ និង​ខ្ទម​របស់​អ្នក​ភូមិ​ដែលមាន​នៅ​​លើ​ដី​នោះ​។​

អ្នក​ស្រី​​រៀប​រាប់​ទៀត​ថា៖ «ខ្ញុំ​មិន​ដឹង​ច្បាស់ទេថា​ដីណា​ស្រប​ច្បាប់ និង​ដី​ណា​មិន​ស្រប​ច្បាប់ ហើយ​ខ្ញុំ​នៅ​តែ​ទៅ​កាន់​ដី​ចម្ការ​របស់​ខ្ញុំ»។ អ្នកស្រី​ពន្យល់​ថា ដី​ក្នុង​តំបន់​នោះ​មិនមាន​ប្លង់​កម្មសិទ្ធិ​ទេ និង​សូម្បី​តែ​អ្នកស្រុក​ទិញ​ដី​តពី​គ្នា​ក៏​ដោយ​ ក៏​អាជ្ញាធរ​មិន​ព្រម​ទទួល​ស្គាល់​ជាផ្លូវការ​លើ​ការ​ផ្ទេរ​កម្មសិទ្ធិ​ដែរ​​។​

 អ្នក​ស្រី​ថា បន្ទាប់​ពី​រដ្ឋាភិបាល​ដក​ហូត​ដី​ពួកគាត់​ក្នុង​ខែ​កញ្ញា លោក ឈីវ បាន​មក​ផ្ទះ​អ្នកស្រី និង​ស្នើ​ឲ្យ​អ្នកស្រី​សហការ​ទាម​ទារ​ដី​ត្រឡប់​មក​វិញ ដោយ​និយាយ​ថា​គាត់​នឹង​ដាក់​ឯកសារ​ទៅ​កាន់​ថ្នាក់​ដឹក​នាំ​ជាន់​ខ្ពស់ ដើម្បីស្នើ​សុំ​ឆ្វៀល​ដី ពី​ដី​របស់​រដ្ឋ។​

អ្នក​ស្រី​បញ្ជាក់ថា៖ «​គាត់​បាន​ទាក់​ទង​មក​ខ្ញុំ​ ដើម្បី​ឲ្យ​គាត់​ផ្សាយ​[ព័ត៌មាន​ពី​រឿង​ដី​ជម្លោះ] ប៉ុន្តែ​ខ្ញុំ​មិន​សហការ​ជាមួយ​គាត់ ពីព្រោះ​ខ្ញុំ​បាន​ដាក់​ឯកសារ​ដាក់​ដោយឡែក​មួយ​ផ្សេង​ទៀត​រួច​ហើយ និង​កំពុង​រង់ចាំ​ដំណោះ​ស្រាយ​»។

អ្នក​ស្រី​ថា៖ «​ខ្ញុំ​បាន​ឮ​ថាគាត់​ត្រូវ​ចាប់​ខ្លួន ប៉ុន្តែខ្ញុំ​មិន​ដឹងពី​មូលហេតុ​ជាក់​លាក់ទេ»។

អនុក្រឹត្យ​លេខ៣០ របស់​រដ្ឋាភិបាល​បាន​សរសេរថា​ត្រូវ​បែង​ចែង​ដី​ជិត​ ១២៧ ០០០ហិកតា​នៅ​ក្នុង​តំបន់​អភិរក្សទាំង​ប្រាំបី រួម​មាន​ទាំង​ឧទ្យានជាតិ​បុទុម​សាគរ​ផង ដល់​ប្រជា​ពល​រដ្ឋ​ដែល​បាន​រស់​នៅ​ទីនោះមុន​មាន​ការ​កំណត់​ដែន​អភរិក្ស​។ យ៉ាងណា អ្នក​សង្កេតការ​បាន​និយាយ​ថា​អ្នកមាន​អំណាច​ក្នុង​ជួរ​រដ្ឋាភិបាល​ជា​អ្នក​ទទួល​បាន​ផល​ប្រយោជន៍​នេះ​ច្រើនជាង​គេ​ក្នុង​ការ​ធ្វើ​អនុប្រយោគ​នេះ មិន​មែន​ជា​ប្រ​ជាពល​រដ្ឋ​តូច​តាច​នោះទេ។​

អាជ្ញាធរ​មូល​ដ្ឋាន និង​មន្ត្រី​បរិស្ថាន​បាន​បំផ្លាញ​ផ្ទះ​របស់​ប្រជា​ពល​រដ្ឋដោយចោទ​ថា​បាន​សង់ដោយ​ខុស​ច្បាប់នៅ​ក្នុង​ឧទ្យាន​ជាតិ​បុទុមសាគរ​ក្នុងខេត្ត​កោះ​កុង។ ការ​រុះរើ​​នេះ​ធ្វើ​ឡើង​កាល​ពី​ថ្ងៃទី​៣ ខែកញ្ញា។ រូប​ភាព​ផ្ដល់​ឲ្យ​
អាជ្ញាធរ​មូល​ដ្ឋាន និង​មន្ត្រី​បរិស្ថាន​បាន​បំផ្លាញ​ផ្ទះ​របស់​ប្រជា​ពល​រដ្ឋដោយចោទ​ថា​បាន​សង់ដោយ​ខុស​ច្បាប់នៅ​ក្នុង​ឧទ្យាន​ជាតិ​បុទុមសាគរ​ក្នុងខេត្ត​កោះ​កុង។ ការ​រុះរើ​​នេះ​ធ្វើ​ឡើង​កាល​ពី​ថ្ងៃទី​៣ ខែកញ្ញា។ រូប​ភាព​ផ្ដល់​ឲ្យ​

អ្នក​យក​សារព័ត៌​មាន​ម្នាក់​រស់​នៅ​ខេត្ត​កោះ​កុង​និយាយ​ដោយ​មិនបញ្ចេញ​ឈ្មោះ ដោយបារម្ភពី​សុវត្ថិភាព បាន​ឲ្យដឹងថា លោក ឈីវ គឺជា​អ្នក​រាយការណ៍​ព័ត៌មាន​ទាក់ទង​នឹង​ជម្លោះ​ដី​ធ្លី​ដ៏​សកម្ម​ម្នាក់ ដែលនេះ«ជារឿង​រស៊ើប» នៅ​ក្នុង​ខេត្ត​កោះ​កុង។​

លោក​និយាយ​ថា៖ «​វាមិន​យុត្តិធម៌ទេ…បើ​សិនជា​យើង​មើល​លើស្ថានភាពនោះ វាមិន​មាន​បទល្មើស​ដែល​ត្រូវ​ចាប់​ខ្លួន​គាត់​នោះទេ​…​ពេល​ប៉ូលិស​ចាប់​ខ្លួន​គាត់ គេហាម​យើង​មិន​ឲ្យ​ថត​រូប និង​វីដេអូ​ទេ។ ពួកគេ​ក៏​មិន​បង្ហាញ​ថាអ្នក​ណាជា​អ្នក​ប្ដឹង​គាត់​ដែរ»។​

អ្នកសារព័ត៌មាន​រូប​នោះ​ ឲ្យ​ដឹង​ទៀត​ថា លោក ឈីវ បាន​ដាំ​ស្វាយ​ចន្ទី​ជិត​១០​ឆ្នាំ​មក​ហើយ​នៅ​ដី​ចម្ការ​១០​ហិកតា​របស់​គាត់។ លោកថា ពេលអាជ្ញាធរ​ទៅ​បំផ្លាញ​ដំណាំស្វាយចន្ទី លោក​ឈីវ បាន​បង្ហោះ​ការ​បំផ្លាញ​នោះ​លើ​បណ្ដាញ​សង្គម​ហ្វេសប៊ុក។ ប្រជា​ពល​រដ្ឋ​ជា​ច្រើន​គ្រួសារ​ផ្សេង​ទៀត​ក៏​ដូច​ជា​បាន​យល់ព្រម​តវ៉ា​ទាម​ទារ​សំណង​ផង​ដែរ​។​ ​

លោកឲ្យ​ដឹង​ទៀតថា អ្នក​ភូមិ​បាន​រស់​នៅ​ និង​ដាំ​ដំណាំ​លើ​ដី​របស់​ឧទ្យាន​ជាតិ​ជាយូរ​ឆ្នាំ​មក​ហើយ ដោយ​មិន​បាន​ដឹង​ថា​ដី​នោះ​ខុស​ច្បាប់​នោះទេ និង​ថា​ដី​ជម្លោះ​កើត​មាន​ឡើង​បន្ទាប់​ពី​មាន​ក្រុម​ហ៊ុន​ឯកជន​ចង់​ដេញ​ប្រជា​ពល​រដ្ឋចេញ និង​យក​ដីនោះដើម្បីអភិវឌ្ឍន៍។​

 លោក​បន្ត​ទៀត​ថា៖ «​ក្នុង​នាមជា​អ្នក​សារព័ត៌មាន យើង​មាន​សេរីភាព​ក្នុងការ​រាយការណ៍​ព័ត៌មាន​សម្រាប់​ប្រយោជន៍​សាធារណៈ ដូច​នេះ​អ្នកសារព័ត៌មាន​ពិត​ជា​ខ្លាច និង​បារម្ភពី​ករណី​នេះ»។ លោក​ថា តុលាការ​បាន​បង្វែរ​បទចោទ ខណៈ​ភស្តុតាង​មិន​ត្រូវ​បាន​ស៊ើប​អង្កេត​ឲ្យ​បាន​ច្បាស់​លាស់ មុន​ចោទ​ប្រកាន់។​

លោក​បន្ត​ថា៖ «​វាជាការ​គំរាម​កំហែង និង​ជាការបំពាន ហើយអ្នក​សារព័ត៌មាន​ផ្សេង​ទៀត​ខ្លាច​មិន​ហ៊ាន​និយាយការពិត ពីព្រោះ​សិទ្ធិ​ក្នុង​ការបញ្ចេ​ញ​មតិ​មានការ​រឹតត្បិត​»។​

លោក ហុង ចាន់តារា មន្ត្រី​សម្របសម្រួលសិទ្ធិ​មនុស្ស​របស់​សមាគមសិទ្ធិមនុស្ស​អាដហុក​ប្រចាំ​ខេត្ត​កោះកុង​ឲ្យដឹង​ថា សេរីភាព​បញ្ចេញមតិ​នៅ​កម្ពុជា​ត្រូវ​បាន​រឹតត្បិត​។  

លោក​បន្ថែម​ថា៖ «​បន្ទាប់​ពី​លោក​បាន​​រិះគន់​អភិបាល​រង​ខេត្ត រដ្ឋមន្ត្រី​ក្រ​សួង​ការពារ​ជាតិ បាន​បញ្ជា​ឲ្យ​អាជ្ញាធរ​​ចាត់​វិធានការ និង​តុលាការវិញ​ហាក់​ដូច​ជា​ធ្វើ​តាម​មន្ត្រី​ជាន់​ខ្ពស់»។​

លោក អ៊ិត សូធឿត នាយកប្រតិបត្តិ​ស្តី​ទី​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យមាន​ប្រ​សាសន៍ថា មជ្ឈមណ្ឌល​របស់លោកបាន​ផ្ដល់មេធាវី​ដល់​លោក យួន ឈីវ សម្រាប់​ស្វែង​រក​យុត្តិ​ធម៌ និង​ថា​បាន​តាម​ដាន​យ៉ាង​យក​ចិត្ត​ទុក​ដាក់​ចំពោះ​ហេតុ​ផល​នៅ​ពីក្រោយ​ការចាប់​ខ្លួននេះ។​

លោក​មានប្រសាសន៍​ថា៖ «ខ្ញុំ​គ្រាន់​តែ​បារម្ភ​ថាសំណុំរឿង​នេះ​គ្រាន់​តែមាន​ចេតនា​បំបិទ​មាត់​អ្នក​រិះ​គន់​ថ្នាក់​ដឹកនាំ ឬ​មន្ត្រី​មានអំណាចណាមួយ ដែល​មាន​បញ្ហា​ដី​ធ្លី​ជាមួយ​ប្រជា​ពល​រដ្ឋ»។​

លោក អ៊ិត សូធឿត ​លើក​ឡើង​​ទៀត​ថា អ្នក​សារព័ត៌មាន​ដើរតួសំខាន់ណាស់​ក្នុងការ​ផ្សព្វ​ផ្សាយ​ព័ត៌មាន ពិសេស​រាយការណ៍​ពីមន្ត្រី​អសកម្ម។

លោក ឲ្យ​ដឹង​ទៀតថា អាជ្ញាធរ​គួរតែ​ផ្ដល់​នូវ​ភស្តុតាង​រឹងមាំ​សម្រាប់​ការ​ចោទ​ប្រកាន់​លោក ឈីវ ថាបាន​ញុះញង់​ប្រជា​ពល​រដ្ឋ​ឲ្យ​ចូល​ទន្ទ្រាន​ដី​ព្រៃ​របស់​រដ្ឋ​ក្នុង​ឧទ្យានជាតិ​។​

លោកបន្ថែម​ថា៖ «បើ​សិនជា​គ្មាន​ការ​ស៊ើប​អង្កេត​ប្រកប​ដោយ​តម្លាភាព​ទេ វាគឺជាការគំរាម​កំហែង និង​បំពាន​លើ​អ្នក​សារព័ត៌មាន ដែល​បាន​រាយការណ៍ពីចំណុច​អវិជ្ជមាន​របស់​មន្ត្រី»។​

ទាំង​រដ្ឋមន្ត្រីក្រសួង​ការពារជាតិ លោក ទៀ បាញ់ និង​អភិបាល​រង​ខេត្ត​កោះកុង លោក សុខ សុទ្ធី មិនអាចទាក់​ទង​សុំការ​អត្ថាធិប្បាយ​បានទេ។ ចំណែក​អ្នក​នាំពាក្យ​ក្រ​សួង​បរិស្ថាន​លោក នេត ភក្រ្តា បដិសេធធ្វើអត្ថាធិប្បាយ​លើ​រឿង​នេះ។​

ប្រែសម្រួលពីអត្ថបទភាសាអង់គ្លេស៖ Family of online news publisher say Yuon Chhiv’s arrest linked to land dispute

847 views
ព័ត៌មានថ្មីៗ »
អត្ថបទពេញនិយម »