គ្រឹះស្ថានហិរញ្ញវត្ថុដាក់ចេញវិធានការបន្ថែម ដើម្បីសម្រាលបន្ទុកហិរញ្ញវត្ថុ បន្ទាប់ពីមានការអំពាវនាវពីសង្គមស៊ីវិល

អ្នកធ្វើដំណើរបើកបរកាត់មុខទីស្នាក់ការកណ្តាលធនាគារអេស៊ីលីដានៅរាជធានីភ្នំពេញ ថ្ងៃទី១ ខែមេសា ឆ្នាំ២០២១ ។ ខេមបូចា / បញ្ញា ឆព័ណ្ណ
អ្នកធ្វើដំណើរបើកបរកាត់មុខទីស្នាក់ការកណ្តាលធនាគារអេស៊ីលីដានៅរាជធានីភ្នំពេញ ថ្ងៃទី១ ខែមេសា ឆ្នាំ២០២១ ។ ខេមបូចា / បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

គ្រឹះស្ថានហិរញ្ញវត្ថុនៅ​កម្ពុជាបានប្រកាសកាលពី​ថ្ងៃពុធនូវវិធានការបន្ថែម ដើម្បីសម្រាល​បន្ទុកហិរញ្ញវត្ថុចំពោះអតិថិជនរបស់ខ្លួន ដែលរងផលប៉ះពាល់ដោយសារជំងឺកូវីដ-១៩ ដែល​ការ​ដាក់​ចេញ​វិធានការនេះ​ធ្វើ​ឡើង​មួយថ្ងៃ បន្ទាប់ពីអង្គការសង្គមស៊ីវិលជាង១០០ បានអំពាវនាវឱ្យមាន​ការ​ពន្យាពេលសងត្រឡប់​៣ខែដល់អ្នកខ្ចីប្រាក់​។

ទោះយ៉ាងណា យោងតាមសេចក្តីថ្លែងការណ៍រួមចេញផ្សាយថ្ងៃទី៧ ខែមេសារបស់សមាគមមីក្រូហិរញ្ញវត្ថុកម្ពុជា (CMA) និងសមាគមធនាគារនៅកម្ពុជា (ABC) វិធានការនេះដាក់ចេញដោយស្ថាប័នហិរញ្ញវត្ថុមានភ្ជាប់លក្ខខណ្ឌច្រើនជាងអ្វីដែលសង្គមស៊ី វិលបានរំពឹងទុក។

ទោះបីជាផលប៉ះពាល់ផ្នែកសេដ្ឋកិច្ចដោយសារជំងឺរាតត្បាតបានប៉ះពាល់ស្ទើរគ្រប់វិស័យនៅក្នុងសង្គមក៏ដោយ ក៏ស្ថាប័នទាំងពីរនេះ បានកំណត់អាទិភាពតែ​សម្រាប់អ្នក​ដែល​ធ្វើ​តេស្ត​វិជ្ជមាន​ កូវីដ-១៩ និង​អ្នកដែលត្រូវបានគេដាក់ឲ្យធ្វើចត្តាឡីស័ករយៈ​ពេល១៤ថ្ងៃប៉ុណ្ណោះ​។

យោងតាមសេចក្តីថ្លែងការណ៍រួមនេះ ស្ថាប័នជាសមាជិករបស់ CMA និង ABC នឹងលើកលែងការទូទាត់ការប្រាក់មួយចំនួនយ៉ាងហោចណាស់មួយខែ ក៏ដូចជាលើក​លែង​​ការពិន័យចំពោះការ​សងត្រឡប់​​យឺតនិងផ្តល់ការពន្យាពេល៣ខែ សម្រាប់ការសងប្រាក់ដើម សម្រាប់អតិថិជន ដែលបានធ្វើតេស្តវិជ្ជមានជំងឺកូវីដ-១៩។

ស្រដៀងគ្នានេះដែរ សេចក្តីថ្លែងការនេះបានបន្ថែមថា គ្រឹះស្ថានជាសមាជិកនឹងអនុញ្ញាតឱ្យអ្នកខ្ចីប្រាក់ ដែលត្រូវបានអាជ្ញាធរសុខាភិបាលដាក់ឱ្យធ្វើចត្តាឡីស័ករយៈពេល១៤ ថ្ងៃ ធ្វើការ​រៀបចំឥណទាន​ឡើង​វិញ ដោយផ្អាករាល់ការសងប្រាក់កម្ចីក្នុងរយៈពេលមួយខែហើយលើកលែងការពិន័យចំពោះការបង់យឺតផងដែរ។

ទាំង CMA និង ABC ក៏នឹងផ្តល់ការ​រៀបចំឥណទាន​ឡើង​វិញ សម្រាប់អ្នក​ទិញ​ផ្ទះ​​ផ្ទាល់ខ្លួនទី១សម្រាប់រស់នៅ ដែល​រងផលប៉ះពាល់ដោយជំងឺរាតត្បាត។

វិធានការ​ក៏​នឹងផ្តល់ភាពងាយស្រួលក្នុងការទទួលបានប្រាក់កម្ចីសង្រ្គោះបន្ទាន់ ដើម្បីគាំទ្រដល់អាជីវកម្ម ដោយផ្តល់ជូនអតិថិជនទាំងនោះ នូវអត្រាការប្រាក់ទាបជាងមុន។

សេចក្តីថ្លែងការនោះបានសរសេរថា៖ « [គ្រឹះស្ថានមីក្រូហិរញ្ញវត្ថុ] និងធនាគារបានចូល រួមយ៉ាងសកម្ម ដើម្បីសម្រាលបន្ទុកហិរញ្ញវត្ថុដល់អតិថិជនក្នុងកំឡុងពេលនៃការរាត ត្បាតដោយសារជំងឺកូវីដ-១៩ ហើយផ្តល់ការរៀបចំប្រាក់កម្ចីនិងវិធានការបន្ធូរបន្ថយផ្សេងទៀត។ ជាមួយនឹងផលប៉ះពាល់នេះ ទាំង CMA និង ABCត្រូវតែបន្តអនុវត្តរាល់វិធានការ ដែលបានដាក់ចេញដោយរដ្ឋាភិបាល ដើម្បីធានាថា អតិថិជនទាំងអស់ត្រូវបានការពារអំឡុងពេលនេះ»

គិតត្រឹមដំណាច់ខែកុម្ភៈ អតិថិជនជាង៣៤០.០០០នាក់នៃគ្រឹះស្ថាន CMA និងABC ទទួលបាន​ការរៀប​ចំឥណទាន​​ឡើងវិញ ដែលមានទឹកប្រាក់សរុបជាង៤ពាន់លានដុល្លារ។ ភាគច្រើននៃអ្នកខ្ចីទាំងនោះគឺប្រមាណជា៣០ម៉ឺននាក់មក​ពីគ្រឹះស្ថានមីក្រូហិរញ្ញវត្ថុ​ដែលមាន​ឥណទាន១,៤ពាន់លានដុល្លារគិតត្រឹមខែមីនា។

ទោះជាយ៉ាងណា អង្គការសង្គមស៊ីវិល ដែលបានចុះហត្ថលេខាលើសេចក្តីថ្លែងការណ៍រួម​កាលពីថ្ងៃអង្គារបានលើកឡើងថា ការរៀបចំឥណទាន​ឡើងវិញ គឺមិនទាន់គ្រប់គ្រាន់ ដើម្បីជួយដល់ប្រជាជន ដែលរងផលប៉ះពាល់នោះទេ ជាពិសេស នៅពេលដែលការផ្ទុះ ឡើងជំងឺកូវីដ-១៩ លើកទី៣ បានធ្វើឱ្យចំណូលប្រចាំគ្រួសារធ្លាក់ចុះ។ ​សេចក្តីថ្លែងការណ៍រួម​ដែលមានហត្ថលេខា១០៣ អង្គការក្រៅរដ្ឋាភិបាល បាន​អំពាវនាវ​ដល់រដ្ឋាភិបាលឱ្យដាក់សម្ពាធលើគ្រឹះស្ថានហិរញ្ញវត្ថុ ដើម្បីផ្អាករាល់ការសងបំណុលនិងអត្រាការប្រាក់នៃប្រាក់កម្ចីរយពេល​៣ខែ​។

លោក អំ សំអាត អនុប្រធានផ្នែកឃ្លាំមើលសិទ្ធិមនុស្សនៃអង្គការសិទ្ធិមនុស្សលីកាដូដែលបានដឹកនាំការចេញសេចក្តីថ្លែងការណ៍កាលពីថ្ងៃអង្គារបានមានប្រសាសន៍ថា ការឆ្លើយតបពីគ្រឹះស្ថានហិរញ្ញវត្ថុនេះ ដោះស្រាយទៅតាមករណីនីមួយៗប៉ុណ្ណោះ​។ ដើម្បីដោះស្រាយផលប៉ះពាល់ផ្នែកសេដ្ឋកិច្ចដោយសារការរាតត្បាតនៃជំងឺកូវីដ១៩ លោក សំអាត បានអំពាវនាវឲ្យគ្រឹះស្ថានហិរញ្ញវត្ថុពង្រីកវិសាលភាពនៃការសម្រាលបន្ទុកនេះដល់អ្នកខ្ចីបន្ថែមទៀត។

លោក សំអាត ថ្លែថា៖«ប្រសិនបើយើងក្រឡេកមើលទិដ្ឋភាពទូទៅនៅក្នុងគ្រាលំបាកដោយសារជំងឺកូវីដ១៩ វាមានសម្ពាធធ្ងន់ធ្ងរនៅពេលប្រជាពលរដ្ឋជ្រើសរើស​យក​វិធី​ស្នាក់នៅផ្ទះ ដើម្បីសុវត្ថិភាព។ នៅពេលពួកគាត់ស្នាក់នៅផ្ទះ វាមានន័យថា ពួកគាត់ក៏នៅធ្វើចត្តាឡីស័កដែរ ហើយបាត់បង់ប្រាក់ចំណូល ដូច្នេះពួកគាត់នឹងមិនអាចសងប្រាក់កម្ចីបានទេ»

គ្រឹះស្ថានហិរញ្ញវត្ថុនៅកម្ពុជាក៏បានទទួលថវិកាពីម្ចាស់បំណុលបរទេស ដែលជាផ្នែកមួយនៃគម្រោងការអភិវឌ្ឍន៍ ដើម្បីជំរុញការបង្កើត«ការងារខ្នាតតូច»  និងអាជីវកម្មដល់​ប្រជាជន​កម្ពុជា​។ ជារឿយៗក្រុមអង្គការសិទ្ធិមនុស្សបានជំរុញ​ឲ្យ​ម្ចាស់បំណុលបរទេសឲ្យសិក្សាអំពីការអនុវត្តជាក់ស្តែងរបស់​គ្រឹះស្ថានហិរញ្ញវត្ថុនៅកម្ពុជា ដែលអង្គការលីកាដូ និងអ្នកផ្សេងទៀតបានចោទប្រកាន់ថា បានជំរុញអ្នកខ្ចីធ្លាក់ក្នុងបំណុល​វ័ន្ត​ក ។

ដោក សុវណ្ណ កម្មករកាត់ដេរនៅខេត្តកណ្តាលបានប្រាប់ខេមបូចាថា នាងបានខ្ចីប្រាក់ចំនួន១៦.០០០ដុល្លារ ដើម្បីសង់ផ្ទះថ្មី និងទិញម៉ូតូ។ សុវណ្ណ  ត្រូវ​សងបំណុល​ដោយបង់រំលោះ ៣៦០ដុល្លារក្នុងមួយខែ និងមានរយៈពេល៦ឆ្នាំ។

សុវណ្ណ បាននិយាយថា៖ «ខ្ញុំប្រហែលមិនមានលុយ​បង់ទេនៅខែក្រោយនេះ ប្រសិនបើស្ថានភាពនៅតែបន្តយូរ ពីព្រោះប្តីរបស់ខ្ញុំបាត់បង់ការងារហើយខ្ញុំម្នាក់ឯងមិនអាចដោះស្រាយការចំណាយប្រចាំថ្ងៃបានទេ»

អ្នកស្រី សុវណ្ណ ដែលកាលពីឆ្នាំ​មុនទទួល​បាន​ការអនុគ្រោះពី​មីក្រូហិរញ្ញវត្ថុ ឲ្យបង់​តែការប្រាក់​​រយៈពេល៦ខែ បាននិយាយថា អ្នកស្រីរកបានតែ២០០ដុល្លារប៉ុណ្ណោះក្នុងមួយខែ។ ប្តីរបស់អ្នកស្រីដែលជាអ្នក​ដឹកអីវ៉ាន់នៅផ្សារអូរឫស្សីបានបាត់បង់ការងារនៅពេល ដែលអាជ្ញាធរបានបិទផ្សាររយៈពេល២សប្តាហ៍កាលពីថ្ងៃទី៤ ខែមេសា បន្ទាប់ពីរកឃើញករណីឆ្លងជាចង្កោមនៅទីនោះ។ គិតត្រឹមថ្ងៃពុធ មានមនុស្សប្រហែល៦០នាក់ហើយ ដែលបានធ្វើ តេស្តរកឃើញវិជ្ជមាន។

សុវណ្ណ ស្វាគមន៍ចំពោះវិធានការ​របស់គ្រឹះ ស្ថានហិរញ្ញវត្ថុ ដែលបានជួយដល់អ្នកដែល​ឆ្លងជំងឺ និង ​អ្នកដែលត្រូវធ្វើចត្តាឡីស័ក ប៉ុន្តែ​ថា វិធានការទាំងនោះមិនទាន់គ្រប់គ្រាន់ទេ។ សុវណ្ណនិយាយ​ថា៖ «បុគ្គលិកឬអ្នកផ្សេងទៀត ដែលបាត់បង់ការងារឬត្រូវបាន​ផ្អាកពីការងាររបស់ពួកគេក្នុងកំឡុងពេលមានជំងឺកូវីដ-១៩ ក៏រងផលប៉ះពាល់ដែរ តើ​ពួកគេ​ត្រូវ​ធ្វើ​យ៉ាងម៉េច ពួកគេមិនអាចរកប្រាក់បានទេ តើពួកគេមាន​លុយ​ឯណាបង់​ធនាគារ​នោះ?»៕

ប្រែសម្រួលពីអត្ថបទភាសាអង់គ្លេស៖ Financial institutions introduce measures to ease financial burden after call from civil society

497 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »