ចៅក្រមសាលាដំបូងរាជធានីភ្នំពេញបានសម្រេចបញ្ចប់សវនាការនៅថ្ងៃដំបូងលើសំណុំរឿងរបស់លោក ថាច់ សេដ្ឋា អនុប្រធានគណបក្សភ្លើងទៀន ដែលត្រូវចោទប្រកាន់ពីបទចេញមូលប្បទានប័តគ្មានសាច់ប្រាក់មុនម៉ោងកំណត់ ដោយសារតែលោក ថាច់ សេដ្ឋា មាន «អារម្មណ៍មិនល្អ»។
លោកស្រី ឈុន ដាវី ប្រធានក្រុមប្រឹក្សាជំនុំជម្រះមានប្រសាសន៍កាលពីថ្ងៃពុធថា៖ «ជនជាប់ចោទមើលទៅហាក់ដូចជាមិនមានសុខភាពល្អទេ បើតាមចម្លើយរបស់គាត់។ សវនាការនេះគួរត្រូវបានពន្យារទៅពេលក្រោយ»។
ការសម្រេចរបស់ចៅក្រមបានធ្វើឡើង បន្ទាប់ពីមានការឆ្លើយឆ្លងគ្នាដ៏តានតឹងដែលក្នុងនោះ លោកព្រះរាជអាជ្ញារង ប្លង់ សុផល បានសាកសួរលោក សេដ្ឋា អំពីមូលប្បទានប័តគ្មានសាច់ប្រាក់ ដែលតាមចោទថា លោកបានចេញទៅឱ្យលោក ហៃ វ៉ាន់រិន ម្ចាស់ហាងបញ្ចាំ។
លោក ថាច់ សេដ្ឋា បានឆ្លើយតបទៅកាន់ព្រះរាជអាជ្ញារងរូបនេះថា៖ «ខ្ញុំហ៊ានហៅគាត់ [វ៉ាន់រិន] មកស្បថ [ថាខ្ញុំបានចេញមូលប្បទានប័ត្រទាំងនេះ] ហើយខ្ញុំសុខចិត្តជាប់គុកបន្តទៀត»។
លោក ថាច់ សេដ្ឋា ត្រូវបានចាប់ខ្លួនកាលពីខែមករា ដែលតាមចោទថា បានចេញមូលប្បទានប័តគ្មានសាច់ប្រាក់ចំនួនប្រាំសន្លឹកកាលពីឆ្នាំ២០១៩ និងពីបទខកខានមិនបានបង្ហាញខ្លួននៅចំពោះមុខចៅក្រមស៊ើបសួរកាលពីឆ្នាំ២០២១បន្ទាប់ពីលោក ហៃ វ៉ាន់រិន ដាក់ពាក្យបណ្តឹងព្រហ្មទណ្ឌ។ មេដឹកនាំគណបក្សភ្លើងទៀនបាននិយាយថា ការចាប់ខ្លួននេះ គឺជារឿងនយោបាយ។
ករណីនេះកើតឡើងតាំងពីឆ្នាំ២០១៦ ពេលដែលលោក ថាច់ សេដ្ឋា ទទួលប្រាក់កម្ចី១៨.០០០ដុល្លារពីហាងបញ្ចាំ រិន ឆាយ ដោយបានយកបណ្ណកម្មសិទ្ធិដីធ្លីដាក់បញ្ចាំ។
មេធាវីតំណាងឱ្យម្ចាស់ហាងបញ្ចាំបានអះអាងថា មូលប្បទានប័ត្រមួយចំនួនដែលលោកបានចេញ គឺមានការក្លែងបន្លំ ដោយសារតែមិនមានប្រាក់គ្រប់គ្រាន់នៅក្នុងគណនីរបស់គាត់។ មេធាវីរបស់លោក ថាច់ សេដ្ឋា ច្រានចោលការលើកឡើងនេះ ដោយនិយាយថា មូលប្បទានប័ត្រត្រូវបានបញ្ចាំត្រឹមត្រូវ និងបានដោះស្រាយនៅក្នុងសំណុំរឿងតុលាការមុនរួចហើយ។
ការចោទប្រកាន់នេះ គឺផ្អែកលើមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់។ ការបំពានច្បាប់នេះ អាចត្រូវបានផ្ដន្ទាទោសជាអតិប្បមរា ដោយពិន័យជាប្រាក់១០លានរៀល (២.៤៣៧ដុល្លារ) និងជាប់ពន្ធនាគាររយៈពេល៥ឆ្នាំ។
លោក ថាច់ សេដ្ឋា បាននិយាយនៅក្នុងតុលាការកាលពីថ្ងៃពុធថា៖ «ខ្ញុំមិនអាចទទួលយកការចោទប្រកាន់នេះបានទេ ពីព្រោះខ្ញុំមិនដែលចេញសែកនៅក្នុងឆ្នាំ ២០១៩ទេ»។
អំឡុងសវនាការរយៈពេលពីរម៉ោង លោក ថាច់ សេដ្ឋា បានទទួលស្គាល់ថា បានធ្វើកិច្ចសន្យាខ្ចីប្រាក់ចំនួនពីរលើកក្នុងឆ្នាំ២០១១ និងឆ្នាំ២០១៦។ លោកបាននិយាយថា លោកបានទទួលប្រាក់ចំនួន១៨.០០០ដុល្លារពីហាងបញ្ចាំ រិន ឆាយ ហើយបានប្រើប្រាស់ប័ណ្ណកម្មសិទ្ធិអចលនទ្រព្យជាវត្ថុបញ្ចាំ។
លោកធ្លាប់ចុះហត្ថលេខាលើមូលប្បទានប័ត្រនៅឆ្នាំ២០១៦ ដើម្បីប្រើប្រាស់សម្រាប់ការសងប្រាក់កម្ចី ប៉ុន្តែបាននិយាយថា បានទុកចំហកន្លែងដាក់ទឹកប្រាក់ និងកាលបរិច្ឆេទ។ លោកបន្តថា មូលប្បទានប័ត្រទាំងនេះគឺទុកប្រើសម្រាប់ការបង់រំលស់ប្រចាំខែប្រហែល១០០០ដុល្លារ។
ប៉ុន្តែបន្ទាប់ពីតុលាការកំពូលរំលាយគណបក្សសង្គ្រោះជាតិកាលពីឆ្នាំ២០១៧ លោកត្រូវបានដកចេញពីតំណែងជាសមាជិកព្រឹទ្ធសភា។ ដោយសារលោកប្រឈមនឹងបញ្ហាហិរញ្ញវត្ថុ ព្រោះគ្មានប្រាក់ខែសមាជិកព្រឹទ្ធសភា លោកបានសុំឱ្យម្ចាស់ហាងបញ្ចាំឈប់ប្រើមូលប្បទានប័ត្រ ហើយជំនួសមកវិញដោយលោកនឹងសងប្រាក់កម្ចីជាសាច់ប្រាក់ដោយឡែកវិញ។
លោក ថាច់ សេដ្ឋា បានប្រាប់តុលាការថា៖ «ខ្ញុំមិនដែលចេញមូលប្បទានប័ត្រទាំងប្រាំនេះ ក្រោយឆ្នាំ២០១៦ទេ។ វាជាសែកក្លែងក្លាយ ព្រោះខ្ញុំមិនបានសរសេរចំនួនទឹកលុយនិងកាលបរិច្ឆេទទេ។ ខ្ញុំឯកភាពថា វាជាមូលប្បទានប័ត្ររបស់ខ្ញុំ និងហត្ថលេខារបស់ខ្ញុំ ប៉ុន្តែកាលបរិច្ឆេទមិនមែនខ្ញុំសរសេរទេ»។
លោក សេដ្ឋា បាននិយាយថា លោកមិនអាចចាំថា លោកបានផ្តល់មូលប្បទានប័ត្រចំនួនប៉ុន្មានសន្លឹកទៅឲ្យហាងបញ្ចាំនេះទេ។
ចៅក្រម ឈុន ដាវី បានមានប្រសាសន៍នៅក្នុងតុលាការកាលពីថ្ងៃពុធថា សែកគ្មានសាច់ប្រាក់ទាំងប្រាំនេះ ត្រូវបានចេញចាប់ពីខែមិថុនាដល់ខែតុលាឆ្នាំ២០១៩ ដែលមូលប្បទានប័ត្រនីមួយៗមានទឹកប្រាក់៤.២៣០.២០០ រៀល ប្រហែល១០០០ដុល្លារ។
លោក ជូង ជូងី មេធាវីការពារក្តីរបស់លោក ថាច់ សេដ្ឋា បានស្នើឱ្យតុលាការផ្តល់សែកច្បាប់ដើមទាំងប្រាំនេះ ដែលជាភស្តុតាងសំខាន់ប្រើប្រាស់ក្នុងការចោទប្រកាន់កូនក្តីរបស់លោកពីបទព្រហ្មទណ្ឌ និងឃុំខ្លួនគាត់នៅពន្ធនាគាររយៈពេលប្រាំពីរខែមកនេះ។
លោកបានមានប្រសាសន៍ថា៖ «សែកកូពីមិនអាចប្រើជាភស្តុតាង ដើម្បីចោទប្រកាន់កូនក្តីរបស់ខ្ញុំបានទេ។ ប្រសិនបើមិនមានសែកច្បាប់ដើមទេ នោះមានន័យថា គ្មានភស្តុតាង»។
លោកស្រី ធីម សុភាព មេធាវីតំណាងឱ្យម្ចាស់ហាងបញ្ចាំ រិន ឆាយ មានប្រសាសន៍ថា ធនាគារ FTB បានបញ្ជាក់ថា មូលប្បទានប័ត្រចំនួន៥សន្លឹកនេះ ត្រូវបានចេញដោយលោក ថាច់ សេដ្ឋា នៅពេលដែលគណនីរបស់គាត់មិនមានថវិកាគ្រប់គ្រាន់។
ធនាគារ FTB មិនបានឆ្លើយតបភ្លាមៗទៅនឹងសំណើសុំការអត្ថាធិប្បាយតាមអ៊ីម៉ែល ជុំវិញការអះអាងរបស់មេធាវី ធីម សុភាព និងសំណុំរឿងនេះទេ។
លោក គឹមសួរ ភិរិទ្ធ អ្នកនាំពាក្យគណបក្សភ្លើងទៀនមានប្រសាសន៍ថា ពលរដ្ឋមិនគួរជាប់ពន្ធនាគារក្នុងសំណុំរឿងរដ្ឋប្បវេណី ពាក់ព័ន្ធនឹងការចេញមូលប្បទានប័ត្រឡើយ។
លោកបានមានប្រសាសន៍ថា៖ «តិចឬច្រើន នយោបាយពាក់ព័ន្ធនៅទីនេះ ពីព្រោះគាត់ [សេដ្ឋា] ជាអ្នកនយោបាយដែលបានរិះគន់រដ្ឋាភិបាលលើប្រធានបទទាក់ទងនឹងបញ្ហាសង្គម និងកិច្ចការព្រំដែន»។
លោក សុខ ឥសាន អ្នកនាំពាក្យគណបក្សកាន់អំណាចមិនបានលើកទូរសព្ទ ឬឆ្លើយតបសំណើសុំការអត្ថាធិប្បាយតាមតេឡេក្រាមពីខេមបូចាទេ៕
ប្រែសម្រួលពីអត្ថបទភាសាអង់គ្លេស៖ First Day of Candlelight Leader Thach Setha Trial Cut Short Due to His “Bad Mood”
