អតីតសមាជិកគណបក្សភ្លើងទៀន ដែលបានចូលរួមជាមួយគណបក្សប្រជាជនកម្ពុជាដែលកំពុងកាន់អំណាច កាលពីខែមិថុនានោះ បានភៀសខ្លួនចេញពីប្រទេសកម្ពុជាកាលពីដើមខែនេះ ដោយសារការភ័យខ្លាច និងការព្រួយបារម្ភអំពីសុវត្ថិភាព បន្ទាប់ពីលោកបានសម្រេចចិត្តចាកចេញពីគណបក្សកាន់អំណាច។
លោក គង់ រ៉ៃយ៉ា បានចាកចេញពីប្រទេសកម្ពុជា កាលពីថ្ងៃទី៩ ខែកក្កដា ហើយបាននិយាយថា លោកកំពុងដាក់ពាក្យសុំឋានៈជាជនភៀសខ្លួនពីឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ដើម្បីទទួលបានសិទ្ធិជ្រកកោននយោបាយ។ កាលពីថ្ងៃអង្គារ លោកបានដាក់ពាក្យលាលែងពីសមាជិកគណបក្សប្រជាជនកម្ពុជានិងពីមុខតំណែងជាទីប្រឹក្សាក្រសួងអប់រំ ដែលលោកបានទទួលកាលពីថ្ងៃទី១៩ ខែមិថុនា បន្ទាប់ពីចុះចូលគណបក្សប្រជាជនកម្ពុជាកាលពីខែមុន។
លោក គង់ រ៉ៃយ៉ា ប្រាប់ខេមបូចាតាមរយៈSignalពីបរទេសថា៖ «ខ្ញុំបានចុះចូលគណបក្សប្រជាជនកម្ពុជាដោយសារតែការព្រួយបារម្ភពីសុវត្ថិភាពផ្ទាល់ខ្លួន» ។
លោក ហ៊ុន សែន គំរាមចាប់សមាជិក និងសកម្មជនគណបក្សភ្លើងទៀន ដែលសម្រេចចិត្តតវ៉ាប្រឆាំងនឹងការបដិសេធមិនឲ្យគណបក្សភ្លើងទៀនចូលរួមប្រកួតប្រជែងនៅក្នុងការបោះឆ្នោតជាតិ។
លោក រ៉ៃយ៉ា បាននិយាយថា លោកមានការព្រួយបារម្ភខ្លាំងចំពោះសុវត្ថិភាពរបស់លោកចាប់តាំងពីលោកនាយករដ្ឋមន្ត្រី ហ៊ុន សែន បង្ហោះតាមឡេក្រាមកាលពីថ្ងៃទី១៥ឧសភានូវរូបភាពនិងវីដេអូនៃការសន្ទនាឯកជនក្នុងក្រុមតេឡេក្រាមរបស់គណបក្សភ្លើងទៀន។
រូបភាពទាំងនេះបានបង្ហាញពីការពិភាក្សាអំពីថា តើពួកគេគួរតែតវ៉ាចំពោះការសម្រេចចិត្តរបស់ គ.ជ.ប ក្នុងការដកសិទ្ធិគណបក្សភ្លើងទៀនមិនឲ្យចូលរួមការបោះឆ្នោតនៅថ្ងៃទី២៣ ខែកក្កដានេះឬយ៉ាងណា។ គេអាចមើលឃើញឈ្មោះរបស់លោក គង់ រ៉ៃយ៉ា រួមជាមួយនឹងឈ្មោះអ្នកផ្សេងទៀត។
នៅពេលដែលលោក រ៉ៃយ៉ា ចូលរួមជាមួយគណបក្សកាន់អំណាច លោកបាននិយាយថា ក្រុមការងារគណបក្សនេះតែងតែជំរុញលោកឱ្យបញ្ចេញវីដេអូឃ្លីបវាយប្រហារមេដឹកនាំគណបក្សប្រឆាំង ប៉ុន្តែលោកបានបដិសេធ។
លោក រ៉ៃយ៉ា និយាយថា៖ «ខ្ញុំមិនអាចបង្ខំខ្លួនឯងឱ្យធ្វើការងារដែលខ្ញុំមិនពេញចិត្តនោះទេ ដូច្នេះខ្ញុំបានសម្រេចចិត្តចាកចេញពីគណបក្សប្រជាជនកម្ពុជា»។
នៅក្នុងលិខិតលាលែងរបស់លោក រ៉ៃយ៉ា ផ្ញើជូនលោក ឃួង ស្រេង ប្រធានគណបក្សប្រជាជនកម្ពុជារាជធានីភ្នំពេញ និងបានបង្ហោះនៅលើគណនីហ្វេសប៊ុក របស់លោកផ្ទាល់ លោក រ៉ៃយ៉ា បានសរសេរថា៖ «ខ្ញុំបាទសុំលាឈប់ពីតួនាទីជាសមាជិកគណបក្សប្រជាជនកម្ពុជារាជធានីភ្នំពេញ ដោយសារខ្ញុំមានធុរៈផ្ទាល់ខ្លួន មិនអាចបំពេញការងារជូនគណបក្សតទៅទៀតបាន» ។
ដោយឡែកពាក់ព័ន្ធនឹងតួនាទីជាទីប្រឹក្សាអមក្រសួងអប់រំវិញ លោក រ៉ៃយ៉ា បាននិយាយថា៖ «តាំងពីខ្ញុំត្រូវបានតែងតាំងជាទីប្រឹក្សាក្រសួងមក ខ្ញុំមិនដែលទៅធ្វើការ ឬទទួលបានប្រាក់ខែទេ ព្រោះខ្ញុំគ្មានការងារធ្វើ ហើយខ្ញុំគ្រាន់តែអង្គុយទទួលប្រាក់ខែប៉ុណ្ណោះ» ។
មន្ត្រីគណបក្សភ្លើងទៀនបួនរូបត្រូវបានចាប់ខ្លួនកាលពីសប្តាហ៍មុនពីបទញុះញង់ប្រជាពលរដ្ឋធ្វើឱ្យខូចសន្លឹកឆ្នោតនៅថ្ងៃបោះឆ្នោត។ កាលពីដើមខែនេះ សកម្មជនគណបក្សភ្លើងទៀនម្នាក់ទៀតបានភៀសខ្លួនចេញពីប្រទេសកម្ពុជា ដែលតាមចោទថា ដោយសារការធ្វើទុក្ខបុកម្នេញផ្នែកនយោបាយ។
លោក ថុល សំណាង អាយុ៣៤ឆ្នាំ ត្រូវបានអាជ្ញាធរថៃចាប់ខ្លួន នេះបើតាមអង្គការឃ្លាំមើលសិទ្ធិមនុស្ស។ មន្ត្រីនគរបាលជាតិកម្ពុជាម្នាក់បាននិយាយថា លោក សំណាង ត្រូវបានចាប់ខ្លួនដោយសារតែសកម្មភាពនយោបាយរបស់គាត់។
លោក ឃួង ស្រេង អភិបាលរាជធានីភ្នំពេញ និងជាប្រធានគណបក្សប្រជាជនកម្ពុជារាជធានីភ្នំពេញមានប្រសាសន៍ថា វាជាសិទ្ធិរបស់ពលរដ្ឋក្នុងការចូលរួមជាមួយគណបក្សនយោបាយក្នុងព្រះរាជាណាចក្រកម្ពុជា។
លោកមានប្រសាសន៍ថា៖ «វាមិនមែនជារឿងចម្លែកទេ ក្នុងរបបប្រជាធិបតេយ្យសេរីពហុបក្ស ដែលប្រជាពលរដ្ឋចាកចេញពីបក្សមួយទៅបក្សមួយទៀត» ។
នៅពេលសួរនាំអំពីការអះអាងរបស់លោក រ៉ៃយ៉ា ដែលថា សមាជិកគណបក្សប្រជាជនបានស្នើឱ្យគាត់ផ្សព្វផ្សាយវីដេអូឃ្លីបដែលវាយប្រហារទៅលើមេដឹកនាំគណបក្សប្រឆាំង លោកមានប្រសាសន៍ថា៖ «ខ្ញុំមិនដែលឮថា មាននរណាម្នាក់ស្នើឱ្យគាត់ធ្វើដូច្នេះទេ» ។
លោក រស់ សុវាចា អ្នកនាំពាក្យក្រសួងអប់រំបដិសេធមិនធ្វើអត្ថាធិប្បាយជុំវិញករណីនេះទេ។
លោក រ៉ៃយ៉ា ពីមុនគឺជាអ្នករិះគន់រដ្ឋាភិបាលកម្ពុជាឥតសំចៃមាត់។ លោកត្រូវបានកាត់ទោសពីបទញុះញង់កាលលោកជានិស្សិតសាកលវិទ្យាល័យមួយក្នុងឆ្នាំ២០១៥ បន្ទាប់ពីលោកបានអំពាវនាវតាមហ្វេសប៊ុកឱ្យមាន «បដិវត្តន៍ពណ៌» ។ លោកត្រូវបានដោះលែងពីពន្ធនាគារក្នុងឆ្នាំ២០១៧ ប៉ុន្តែក្រោយមកត្រូវបានកាត់ទោសពីបទញុះញង់នៅឆ្នាំ២០២០។ គាត់បានគេចផុតពីការជាប់ពន្ធនាគាររយៈពេល២ឆ្នាំដោយបានភៀសខ្លួនទៅប្រទេសថៃ។
មន្ត្រីនិងអ្នកគាំទ្រគណបក្សភ្លើងទៀនផ្សេងទៀតដែលបានចូលរួមជាមួយគណបក្សប្រជាជនដែលកំពុងកាន់អំណាចក្នុងរយៈពេលប៉ុន្មានខែចុងក្រោយនេះ រួមមានលោក ស ឡុងដេត លី ចាន់វត្តី និងលោកស្រី យក់ នាង។
សេចក្តីរាយការណ៍របស់បណ្តាញផ្សព្វផ្សាយព័ត៌មានដែលគាំទ្ររដ្ឋាភិបាលនៅឆ្នាំនេះបានអះអាងថា មានសមាជិកគណបក្សភ្លើងទៀនជាង៦,០០០នាក់បានចាកចេញពីគណបក្សនេះ នេះបើយោងតាមការវិភាគរបស់មូលដ្ឋានទិន្នន័យអនឡាញ Kamnotra។
លោក គឹមសួរ ភិរិទ្ធ អ្នកនាំពាក្យគណបក្សភ្លើងទៀនបានមានប្រសាសន៍ថា លោក រ៉ៃយ៉ា មិនមែនជាសមាជិករបស់គណបក្សភ្លើងទៀនទៀតទេ ព្រោះលោកបានលាលែងពីគណបក្សកាលពីថ្ងៃទី១៦ ខែមិថុនា។
លោកបានមានប្រសាសន៍ថា៖ «ខ្ញុំមិនដឹង [ហេតុអ្វីបានជា រ៉ៃយ៉ា ចាកចេញពីគណបក្សប្រជាជនកម្ពុជាទេ] វាជាសិទ្ធិរបស់គាត់ ព្រោះគាត់បានចាកចេញពីគណបក្សភ្លើងទៀនរួចហើយ» ។
លោកមានប្រសាសន៍ថា សមាជិក និងសកម្មជនគណបក្សភ្លើងទៀនមួយចំនួនបានសម្រេចចិត្តចុះចូលគណបក្សប្រជាជនកម្ពុជា ដោយសារពួកគេទទួលការគំរាមកំហែង ឬដោយសារពួកគេចង់បានតំណែងក្នុងជួររដ្ឋាភិបាល។
លោក សុខ ឥសាន អ្នកនាំពាក្យគណបក្សកាន់អំណាចមានប្រសាសន៍ថា៖ «គ្មានការបង្ខិតបង្ខំ និងការបំភិតបំភ័យ» ប្រជាពលរដ្ឋឱ្យចូលរួមជាមួយគណបក្សប្រជាជនទេ។
លោក សុខ ឥសាន បានមានប្រសាសន៍ថា៖ «ខ្ញុំគិតថា គាត់គឺជាជនឆ្លៀតឱកាស ពីព្រោះគាត់ព្យាយាមគេចចេញពីបញ្ហា គាត់ចុះចូល ហើយឥឡូវនេះ គាត់បានចាកចេញ ដូច្នេះមនុស្សនេះមិនអាចជឿទុកចិត្តបានទេ» ។
លោក ហ្វីល រ៉ូបឺតសិន នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស បានឲ្យដឹងតាមអ៊ីមែលថា ការភៀសខ្លួនរបស់លោក គង់ រ៉ៃយ៉ា ពីប្រទេសកម្ពុជា «បង្ហាញថា ភាគច្រើននៃការចុះចូលរបស់សមាជិកគណបក្សភ្លើងទៀនទៅគណបក្សប្រជាជនកម្ពុជា គឺដោយការបង្ខិតបង្ខំ ហើយកើតឡើងបន្ទាប់ពីមានយុទ្ធនាការនៃការធ្វើទុក្ខបុកម្នេញទ្រង់ទ្រាយធំ និងការគាបសង្កត់ពីអាជ្ញាធរមកលើថ្នាក់ដឹកនាំ ឬសកម្មជនគណបក្សភ្លើងទៀន» ៕
(រាយការណ៍បន្ថែមដោយ Leila Goldstein)
ប្រែសម្រួលពីអត្ថបទភាសាអង់គ្លេស៖ Former Opposition Party Member Quits Ruling CPP and Flees Cambodia