សមាគមសម្ព័ន្ធអ្នកសារព័ត៌មានកម្ពុជា

តំណាងពលរដ្ឋ៥នាក់ត្រូវបានតុលាការខេត្តបាត់ដំបងឃុំខ្លួនដោយចោទថារំលោភលើដីសម្បទានសេដ្ឋកិច្ចរបស់ក្រុមហ៊ុនឯកជន

ប្រជាពលរដ្ឋប្រហែល១០០នាក់ឡើងមកតវ៉ាមុខតុលាការ២ថ្ងៃ គឺ២២និង២៣ ខែមិថុនា ឆ្មាំ២០២៣ សុំដោះលែងតំណាងរបស់ខ្លួន៥នាក់ដែលតុលាការខេត្តបាត់ដំបង សាកសួរពាក់ព័ន្ធនឹងដីសម្បទានរបស់ក្រុមហ៊ុន រ័ត្ន សម្បត្តិ។ ខេមបចា/ សុខ សាវី
ប្រជាពលរដ្ឋប្រហែល១០០នាក់ឡើងមកតវ៉ាមុខតុលាការ២ថ្ងៃ គឺ២២និង២៣ ខែមិថុនា ឆ្មាំ២០២៣ សុំដោះលែងតំណាងរបស់ខ្លួន៥នាក់ដែលតុលាការខេត្តបាត់ដំបង សាកសួរពាក់ព័ន្ធនឹងដីសម្បទានរបស់ក្រុមហ៊ុន រ័ត្ន សម្បត្តិ។ ខេមបចា/ សុខ សាវី

តំណាងប្រជាពលរដ្ឋប្រាំនាក់ក្នុងចំណោម៦នាក់ត្រូវបានតុលាការសម្រេចឃុំខ្លួននាថ្ងៃសុក្រ ទី២៣ ខែមិថុនា ដោយចោទប្រកាន់ពាក់ព័ន្ធនឹងករណីរំលោភយកដីកម្មសិទ្ធិឯកជនរបស់រដ្ឋ ដែលជួលឱ្យក្រុមហ៊ុន រ័ត្ន សម្បត្តិ ស្ថិតនៅភូមិអូរតាតៀក ឃុំតាតោក ស្រុកសំឡូត ខេត្តបាត់ដំបង។

ខណៈដែលសមត្ថកិច្ចឃាត់ខ្លួនបញ្ជូនតំណាង៥នាក់ខាងលើទៅតុលាការ ប្រជាពលរដ្ឋ​ប្រមាណ​១០០នាក់ ក្នុងចំណោមជាង២០០គ្រួសារ បានលើកគ្នាមកតវ៉ាមុខតុលាការ​ដើម្បី​ដោះលែងតំណាងរបស់ខ្លួន។

តំណាងពលរដ្ឋម្នាក់លោក នុត ម៉ៅ បាននិយាយថា តំណាងពួកគាត់៥នាក់​ខាងលើត្រូវ​បាន សមត្ថកិច្ចធ្វើការឃាត់ខ្លួននៅសាលាឃុំតាតោកនាព្រឹកថ្ងៃទី២២ ខែមិថុនា ខណៈដែល​លោក​មេឃុំកោះហៅពួកគាត់មកដោះស្រាយរឿងប្រជាជន២០០នាក់នាំគ្នាលើកស្លាក​គណបក្ស​ប្រជាជននៅមុខក្លោងទ្វារ ក្រុមហ៊ុន រ័ត្ន សម្បត្តិ កាលពីថ្ងៃទី១៨ ខែមិថុនា ឆ្នាំ២០២៣។

លោកបញ្ជាក់ថា ប្រជាពលរដ្ឋមិនដឹងថាសមត្ថកិច្ចបញ្ជូនតំណាងរបស់ខ្លួនប្រាំនាក់ ដែលមាន​ឈ្មោះ ធុង យាង ភេទប្រុសអាយុ២៧ មាស ទូច អាយុ៣៧ឆ្នាំ ធុង ធាន អាយុ៣៤ឆ្នាំ ឈ្មោះ ហឿម ម៉ៃ អាយុ៤៤ និងឈ្មោះ ង៉ែត ចន្ថា មកកាន់តុលាការពាក់ព័ន្ធនឹង​ករណីអ្វីច្បាស់លាស់​នោះ​ទេ ។

លោកបញ្ជាក់ថា៖ «អាជ្ញាធរឆបោកឱ្យតំណាងរបស់ខ្ញុំទៅសាលាឃុំដើម្បី​ដោះស្រាយ​រឿងនាំ​គ្នាលើកស្លាកគណបក្សប្រជាជនមុខក្លោងទ្វា​រក្រុមហ៊ុន ស្រាប់តែសមត្ថកិច្ចចូល​ទៅឃាត់ខ្លួន​ពួកគាត់តែម្តង ពួកខ្ញុំបាត់តំណាងបានលើកគ្នាមកដើររកទើបដឹងថាគេបញ្ជូនមកតុលាការ»

ពលរដ្ឋម្នាក់ទៀតលោក ស៊ីន លីដែន បានឱ្យដឹងថា ពួកគាត់ចង់ឱ្យតុលាការដោះលែង​តំណាងរបស់ខ្លួន និងសុំឱ្យសម្តេចនាយករដ្ឋមន្រ្តីផ្តល់ដីធ្លីដល់ប្រជាពលរដ្ឋទាំងជាង​២០០​គ្រួសារ លើ​ផ្ទៃដី​ជាង៥០០ហិកតា ដើម្បីបានរស់នៅអាស្រ័យផលស្របច្បាប់ផង។

លោក លីដែន បញ្ជាក់ថា៖ «ពួកខ្ញុំមិនត្រឡប់ទៅផ្ទះវិញនោះទេបើសិនជាតុលាការមិន​ដោះ​លែងតំណាងរបស់ខ្ញុំទាំងប្រាំនាក់ ពួកខ្ញុំសុខចិត្តដេកនៅមុខតុលាការ​លុះត្រាដោះលែង​តំណាងរបស់ខ្ញុំទើបពួកខ្ញុំត្រឡប់ទៅភូមិវិញ»

ថ្វីត្បិតតែតំណាងប្រជាពលរដ្ឋទាំង៥នាក់ តុលាការមិនទាន់ដោះលែង ខណៈសាកសួរអស់​រយៈពេល​ពីរថ្ងៃ គឺថ្ងៃទី២២និង២៣ ខែមិថុនា ក្តី ក្រុមប្រជាពលរដ្ឋអះអាងថា ​ពួកគាត់បង្ខំចិត្ត​ត្រឡប់​ទៅ​ភូមិវិញ ដោយសារទទួលព័ត៌មានថា អាជ្ញាធរស្រុក មេព្រៃ និងកម្លាំងសមត្ថកិច្ច​បាន​ប្រើគ្រឿងចក្រឈូសផ្ទះរបស់គាត់អស់ជាង១០ខ្នង ។

លោក នុត ម៉ៅ បាននិយាយថា៖ «ខណៈដែលពួកខ្ញុំឡើងមកតវ៉ាឱ្យតុលាការដោះលែង​តំណាង​​៥នាក់ កម្លាំងមេព្រៃ និងសមត្ថកិច្ចបានទៅឈូសឆាយផ្ទះ​ប្រជាពលរដ្ឋ​ដែលឡើង​មកតវ៉ា គ្មានអ្នកចាំផ្ទះអស់ចំនួន១២ខ្នងហើយចំណែកផ្ទះដែលមានមនុស្ស​នៅគេធ្វើ​កិច្ចសន្យា​ឱ្យរុះរើរយៈពេលបីថ្ងៃឱ្យអស់»

ជុំវិញការឃុំខ្លួនប្រជាពលរដ្ឋទាំងប្រាំនាក់ខាងលើនេះលោក កែវ សុជាតិ ព្រះរាជអាជ្ញា​អម​សាលាដំបូង ខេត្តបាត់ដំបង បានបញ្ជាក់យ៉ាងខ្លីថា ប្រជាពលរដ្ឋទាំង៥នាក់នេះ​ត្រូវ​បាន​បញ្ជូន​ទៅឃុំខ្លួនអស់ហើយកាលពីល្ងាចថ្ងៃសុក្រនេះប៉ុន្តែពាក់ព័ន្ធនឹងសំណុំរឿងអ្វីនោះលោកបាន​រុញឱ្យសួរអ្នកនាំពាក្យ ដើម្បី​ទទួល​បានព័ត៌មានច្បាស់។

ខេមបូចា មិនទាន់អាចទំនាក់ទំនងលោក ទុត វីនីត ព្រះរាជអាជ្ញារង និងជាអ្នកនាំពាក្យ​សាលាដំបូង ខេត្តបាត់ដំបង បញ្ជាក់ជុំវិញការឃុំខ្លួនតំណាងពលរដ្ឋ៥នាក់​ខាងលើនេះបាន​នោះទេ។

លោក ទុត វីនីត ព្រះរាជអាជ្ញារងអមសាលាដំបូងខេត្តបាត់ដំបង បានចេញដីការលើកទី១ កោះ​ហៅ តំណាងប្រជាពលរដ្ឋ ឱ្យចូលមកបំភ្លឺនៅព្រឹកថ្ងៃទី១៨ខែមករា ឆ្នាំ២០២៣ ក្នុង​សំណុំ​រឿងព្រហ្មទណ្ឌ ចុះថ្ងៃទី៥ ខែមករា ឆ្នាំ២០២៣ ដែលមានដើមបណ្តឹង គឺលោក ឈឹម វិជ្ជរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង។

ក្នុងដីការនេះបានប្តឹងចោទប្រកាន់តំណាងប្រជាពលរដ្ឋថា បានចូលរំលោភកាន់កាប់ និង​ប៉ះពាល់​កម្មសិទ្ធិជាសម្បត្តិសាធារណៈ  មានស្ថានទម្ងន់ទោសប្រឆាំងនឹង​អ្នករាជការ​សាធារណៈ ប្រព្រឹត្តនៅភូមិអូរតាទៀក ឃុំតាតោក ស្រុកសំឡូតខេត្តបាត់ដំបង ចម្លោះពី​ខែតុលាដល់ខែធ្នូ ឆ្នាំ២០២២។

ខណៈពេលនោះប្រជាពលរដ្ឋបានលើកគ្នាទៅមុខតុលាការជាង១០០នាក់ និងចង់ចូល​ទៅក្នុង​តុលាការទាំងអស់គ្នាជាមួយតំណាងរបស់ខ្លួនដើម្បីបំភ្លឺជាមួយគ្នា តែត្រូវមន្រ្តីតុលាការ​មិន​យល់​​​ព្រម ដូច្នេះពួកគាត់បានវិលត្រឡប់ទៅភូមិវិញដោយមិនបានចូលបំភ្លឺ​។

បន្តមកនៅថ្ងៃទី២០ ខែមិថុនា ឆ្នាំ២០២៣ សាលាដំបូងខេត្តបាត់ដំបងបានចេញដីកាជាលើក​ទីពីរ ក្នុងសំណុំរឿងព្រហ្មទណ្ឌខាងលើ ឱ្យប្រជាពលរដ្ឋ៦នាក់ ចូលបង្ហាញខ្លួន​នៅ​សាលាដំបូង​ រាល់ម៉ោងធ្វើការពាក់ព័ន្ធនឹងករណីរំលោភយកដីកម្មសិទ្ធិឯកជនរបស់រដ្ឋនៅ​ចំណុច​ភូមិអូរតាតៀក ឃុំតាតោក ស្រុកសំឡូត។ ដីកានេះមានអនុភាពរហូតដល់ថ្ងៃទី៣១​ ខែកក្កដា ឆ្នាំ២០២៣។

លោក ម៉ែន រីម អធិការនគបាលស្រុកសំឡូតបាន​ឱ្យដឹងថា កម្លាំងលោកបានឃាត់ខ្លួន​តំណាង​​ប្រជាពលរដ្ឋប្រាំនាក់ខាងលើក្នុងចំណោម៦នាក់ ដែលមានឈ្មោះក្នុងដីកា​របស់​តុលាការ​ក្នុង​សំណុំរឿងព្រហ្មទណ្ឌខាងលើនេះ។ លោកបញ្ជាក់ថា ប្រជាពលរដ្ឋម្នាក់ឈ្មោះ មាស រស្មី អាយុ​៣១ឆ្នាំ រស់នៅភូមិភ្នំរៃ ឃុំតាតោក ស្រុកសំឡូត ដែលមានឈ្មោះក្នុងដីកាដែរ បានទៅ​ភ្នំពេញ​ផុត មុនសមត្ថកិច្ចទៅដល់។

លោក ម៉ែន រីម ថ្លែងថា៖ «យើងឃាត់តាមដីកាទាក់ទងនឹងប្រជាពលរដ្ឋទៅរុករានដី​ឯកជន​របស់​រដ្ឋក្នុងក្រុមហ៊ុន រ័ត្ន សម្បត្តិ ដែលរដ្ឋវិនិយោគឱ្យតែខ្ញុំមិនសូវច្បាស់ទេ ទាល់សួរខាង​មន្ទីរ​កសិកម្ម​បានដឹងច្បាស់រឿងនេះ ហើយវាមិនពាក់ព័ន្ធនឹងការលើកស្លាកគណបក្សនោះទេ»​

ជុំវិញការលើកឡើងរបស់ប្រជាពលរដ្ឋថា មានកម្លាំងសមត្ថកិច្ចប្រើគ្រឿងចក្រឈូសផ្ទះ​ពលរដ្ឋ​​ជាង១០ខ្នង ខណៈដែលពួកគាត់ឡើងតវ៉ាឱ្យដោះលែងតំណាងរបស់ខ្លួននៅ​មុខ​សាលាដំបូងនោះ លោកអធិការបញ្ជាក់ថា ខាងមន្ទីរកសិកម្មចុះធ្វើកិច្ចសន្យាឱ្យពលរដ្ឋរុះរើ​ផ្ទះចាកចេញពីដីរបស់រដ្ឋដែលវិនិយោគឱ្យក្រុមហ៊ុន។

ទាក់ទងការកំណត់ឱ្យពលរដ្ឋរុះរើផ្ទះចេញពីទីតាំងខាងលើនេះ លោក ឆាយ ណារ៉េត មន្រ្តី​រដ្ឋបាលព្រៃឈើនៃមន្ទីរកសិកម្មដែលប្រជាពលរដ្ឋឃើញមានវត្តមាននៅទីនោះដែរ បាន​បដិសេធ​​មិនធ្វើ អត្ថាធិប្បាយ ដោយលោករុញឱ្យទៅសួរ​លោកប្រធានមន្ទីរកសិកម្ម​ទើប​ច្បាស់។

លោក ឆាយ ណារ៉េត បន្ថែមថា៖ «ខ្ញុំទៅជាមួយមេខ្ញុំ បងទាក់ទងទៅប្រធានមន្ទីរទើបច្បាស់ ព្រោះខ្ញុំកូនចៅគ្មានសិទ្ធិអីទេ​»

ខេមបូចា មិនអាចទំនាក់ទំនងសុំការបំភ្លឺពី លោក ឈឹម វិជ្ជរ៉ា ប្រធានមន្ទីរកសិកម្ម​ខេត្តបាត់ដំបង កាលពីថ្ងៃទី២៤​ ខែមិថុនា។

កាលពីថ្ងៃទី១៤ ខែមិថុនា សាលាដំបូងខេត្តបាត់ដំបងបានចេញដីការកោះក្នុងសំណុំរឿង ព្រហ្មទណ្ឌផ្សេងទៀតចុះថ្ងៃទី១៨ ខែឧសភា ឆ្នាំ២០២៣ ដោយតំណាង​អយ្យការ​កោះហៅ ប្រជាពលរដ្ឋ៧រូបឱ្យចូលទៅកាន់តុលាការនៅថ្ងៃទី៤ ខែកក្កដា ឆ្នាំ២០២៣ ខាងមុខ តាមពាក្យ បណ្តឹងរបស់ឈ្មោះ ម៉ិញ កញ្ញារ័ត្ន តំណាង ក្រុមហ៊ុន រ័ត្ន​ សម្បត្តិ ។

ប្រជាពលរដ្ឋទាំង៧រូបនេះរួមមាន ឈ្មោះ ហែម ម៉ៃ, ង៉ែត ចន្ថា, មាស ទូច, មាស រស្មី, ធុង យាង, ធន ធាន, សួន សុជាតិ និងបក្សពួកត្រូវចោទប្រកាន់ថា បានសាងសង់លំនៅឋាន និងកាប់ទន្រ្ទានដី ដំណាំរបស់ក្រុមហ៊ុន។

លោក ឈុត ម៉ៅ បានអះអាងថា ប្រជាពលរដ្ឋបានអាស្រ័យផលលើដីចំណុច ភូមិអូរតាតៀក ឃុំតាតោក ស្រុកសំឡូត តាំងពីឆ្នាំ១៩៩៣ តែក្រោយមក​ក្រុមហ៊ុន រ័ត្ន សម្បត្តិ ទទួល​បានសិទ្ធិ​វិនិយោគពីរដ្ឋហើយចូលមកឈូសឆាយនឹងដេញ​ប្រជាជនចេញ​នៅឆ្នាំ​២០១១​។ លោកបន្តថា ក្រោយមក ដោយពលរដ្ឋទទួលដំណឹងតគ្នាថា​នៅឆ្នាំ២០១៧​ទីតាំង​ដីនេះ ក្រុមហ៊ុនខាងលើ​បាន​ដកចេញប្រគល់ឱ្យរដ្ឋគ្រប់គ្រងវិញ ទើបប្រជាពលរដ្ឋ​ឃើញ​ដីទំនេរ​បាន​នាំគ្នាវិលទៅ​អាស្រ័យ​ផលលើទីតាំងនេះវិញ ខ្លះមកឆ្នាំ២០២១ ខ្លះ២០២២ និង​ខ្លះ​ទៀតឆ្នាំ២០២៣ ដែល​មានប្រជាពលរដ្ឋសរុប២២៩គ្រួសារលើផ្ទៃដី៥៥២ហិកតា​នាពេល​បច្ចុប្បន្ន​ ។

លោកបានបញ្ជាក់ថា នៅថ្ងៃច័ន្ទទី២៦ ខែមិថុនា ឆ្នាំ២០២៣ ខាងមន្ទីរកសិកម្មបានកំណត់ឱ្យ ប្រជាពលរដ្ឋរុះរើផ្ទះចេញពីទីតាំងដីដែលពួកគាត់កំពុងអាស្រ័យផលនេះ ហើយបើសិន​ជា​មិន​រុះរើចេញនោះទេ គេនឹងយកគ្រឿងចក្រមកឈូសឆាយហើយ។

លោក ឈុត ម៉ៅ លើកឡើងទៀត៖ «ពួកខ្ញុំប្តេជ្ញាមិនចាកចេញពីដីរបស់ពួកខ្ញុំនោះទេ ប្រជាជន​ប្តូរស្លាប់នៅទីនេះហើយ»

ទោះបីយ៉ាងណា លោក អ៊ុន ខែម មេឃុំតាតោក បានឱ្យដឹងថា ទីតាំងដីខាងលើនេះជាដី​របស់​រដ្ឋ ស្ថិតក្រោមការគ្រប់គ្រងដោយក្រសួងកសិកម្ម រុក្ខាប្រមាញ់ និងនេសាទ  ដែលបានផ្តល់ដី​សម្បទានសេដ្ឋកិច្ចជួលទៅឱ្យក្រុមហ៊ុន រ័ត្ន សម្បត្តិ ដែលដំបូងចំនួនជាង ៥ ០០០ហិកតា តែ​ក្រោយ​មកបានកាត់ឆ្វៀលឱ្យពលរដ្ឋដែលរស់នៅទីនោះនៅសល់តែជាង ២ ០០០ហិកតា ប្រហែល​​៤ទៅ៥ឆ្នាំមុន។

លោកបញ្ជាក់ថា ចំណែកប្រជាពលរដ្ឋជាង២០០គ្រួសារខាងលើនេះ បាននាំគ្នាមកសង់ផ្ទះនិង កាប់ទន្រ្ទានដីឯកជនរបស់រដ្ឋ ដែលជួលឱ្យក្រុមហ៊ុនខាងលើនេះ នៅឆ្នាំ២០២២នេះប៉ុណ្ណោះ។ ប្រជាពលរដ្ឋដែលរុករាននេះភាគច្រើនអ្នកចំណូលថ្មីដែលមកតាមគ្នាពីកន្លែងផ្សេងៗ ក្នុងនោះ​ក៏មាន​ប្រជាជនក្នុងភូមិប្រហែល៣០ភាគរយដែរដែលទៅសង់ផ្ទះនឹងកាប់រុករាននឹងគេដែរ ហើយពួកគាត់មិនគោរពអាជ្ញាធរនោះទេ។

លោក អ៊ុន ខែម បញ្ជាក់ថា៖ «តាមការពិនិត្យរបស់ខ្ញុំទីតាំងខាងលើនេះមិនមានដីរបស់​ប្រជាពលរដ្ឋ​ណានោះទេ ជាដីរបស់រដ្ឋដែលបានធ្វើផែនទីកំណត់ត្រឹមត្រូវ នឹងបានធ្វើការ​វិនិយោគជួលដីឱ្យក្រុមហ៊ុន រ័ត្ន សម្បត្តិ ជាង ២ ០០០ហិកតា»

ខេមបូចា មិនអាចទំនាក់ទំនង តំណាងក្រុមហ៊ុន រ័ត្ន ​សម្បត្តិ ដើម្បីធ្វើការបំភ្លឺបាននៅ​ឡើយទេ។

លោក អ៊ិន គង់ជិត មន្រ្តីសម្របសម្រួលអង្គការសិទ្ធមនុស្ស លីកាដូ ប្រចាំខេត្តបាត់ដំបង និង​ប៉ៃលិន បានថ្លែងថា ក្នុងនាមសង្គមស៊ីវិលបើសិនប្រជាពលរដ្ឋធ្លាប់អាស្រ័យផលពីមុនមក ហើយ ពេលនេះគាត់ខ្វះខាតដីមែនអាជ្ញាធរគួរពិចារណាផ្តល់ដីឱ្យប្រជាពលរដ្ឋកាន់កាប់ និង​អាស្រ័យផល បើសិនជាគាត់មិនធ្លាប់អាស្រ័យផល ហើយទើបចូលថ្មីៗនោះ គឺ​ខាង​សង្គម​ស៊ីវិល​​មិនគាំពារនោះទេ ។

លោក គង់ជិត បន្ថែមថា៖ «យើងស្នើសុំឱ្យអាជ្ញាធរខេត្តបង្កើតគណៈកម្មាការមួយចុះទៅស្រាវ​ជ្រាវ​ធ្វើជំរឿន ស្រង់ស្ថិតិប្រជាពលរដ្ឋឱ្យបានច្បាស់លាស់​ថាតើគាត់ពិតជា​រស់នៅ​មូលដ្ឋាន​ហ្នឹង​មែន រឺអត់ ហើយបើគាត់រស់នៅមូលដ្ឋា្ននហើយខ្វះដីមែន និងមិនមានអ្នកណា​នៅពី​ក្រោយ​​ខ្នង គួរពិចារណាផ្តល់ដីកសិកម្មឱ្យប្រជាពលរដ្ឋអាស្រ័យផលទៅ»

313 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម