សមាគមសម្ព័ន្ធអ្នកសារព័ត៌មានកម្ពុជា

កូដករណាហ្គា៤នាក់បន្ថែមទៀតកំពុងប្រឈមនឹងការចាប់ខ្លួន ខណៈ៣នាក់ទៀតត្រូវបានចាប់ខ្លួនកាលពីថ្ងៃសៅរ៍

លោក សេង វណ្ណរិទ្ធ បុគ្គលិកនៃក្រុមហ៊ុនណាហ្កាវើលដ៍ កាន់មេក្រូបំពងសម្លេងនិយាយកំឡុងពេលចូលរួមធ្វើកូដកម្មទាមទារដំណោះស្រាយ ពីក្រុមហ៊ុន នៅជិតស្ថានទូតអូស្ត្រាលី ក្នុងរាជធានីភ្នំពេញ ជាទីតាំងដែលពួកគេត្រូវបានរារាំង។ គាត់ត្រូវបានចាប់ខ្លួននៅថ្ងៃទី៥ ខែកុម្ភះ ឆ្នាំ២០២២។ រូបថតថ្ងៃទី៦ ខែមករា ឆ្នាំ២០២២។ ខេមបូចា/ ព្រីង សំរាំង
លោក សេង វណ្ណរិទ្ធ បុគ្គលិកនៃក្រុមហ៊ុនណាហ្កាវើលដ៍ កាន់មេក្រូបំពងសម្លេងនិយាយកំឡុងពេលចូលរួមធ្វើកូដកម្មទាមទារដំណោះស្រាយ ពីក្រុមហ៊ុន នៅជិតស្ថានទូតអូស្ត្រាលី ក្នុងរាជធានីភ្នំពេញ ជាទីតាំងដែលពួកគេត្រូវបានរារាំង។ គាត់ត្រូវបានចាប់ខ្លួននៅថ្ងៃទី៥ ខែកុម្ភះ ឆ្នាំ២០២២។ រូបថតថ្ងៃទី៦ ខែមករា ឆ្នាំ២០២២។ ខេមបូចា/ ព្រីង សំរាំង

យ៉ាងហោចណាស់កូដករនៃក្រុមហ៊ុនណាហ្គាវើលដ៍ចំនួន៤នាក់ផ្សេងទៀត ត្រូវបានសមត្ថកិច្ច​កំពុងស្វែងរកនាំខ្លួនឱ្យចូលបំភ្លឺទាក់ទិននឹងករណីរារាំងពីវិធានការសុខាភិបាល។ ចំណែក​កូដករចំនួន៣នាក់ទៀត កំពុងឃុំខ្លួននៅស្នងការនគរបាលរាជធានីភ្នំពេញ​នៅ​ឡើយ។

អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ដែលបានបង្ហោះតាមរយៈ​ទំព័រ​ហ្វេសប៊ុក កាលពីយប់ថ្ងៃទី៥ បានឱ្យដឹងថា ​ ការចាប់ខ្លួនបុគ្គលិកនៃក្រុមហ៊ុនណាហ្គាវើលដ៍ គឺតាមដីការបញ្ជាឱ្យចូលខ្លួនរបស់ព្រះរាជអាជ្ញា​ នៃអយ្យការអមសាលាដំបូងរាជធានីភ្នំពេញ​ ពាក់ព័ន្ធករណី​ រារាំងដល់ការអនុវត្តវិធានការទប់ស្កាត់ជំងឺកូវីដ-១៩​ ដោយយោងលើមាត្រា១១ នៃច្បាប់ប្រយុទ្ធប្រឆាំងកូវីដ​។

ស្នងការនគរបាលរាជធានីភ្នំពេញ បានឱ្យដឹងទៀតថា កូដករដែលកំពុងស្វែងរកចំនួន៤នាក់​នោះ រួមមានឈ្មោះ ខេង ចិន្តា ឈ្មោះ អ៊ុក សុភ័ក្រម៉ូលីកា ឈ្មោះ ​ម៉េង កាក់នីកា និងឈ្មោះ អេង ស្រីបូ។ ចំណែកអ្នកដែលត្រូវបានចាប់ខ្លួនកាលពីយប់ថ្ងៃទី៥ មានចំនួនយ៦នាក់ ក្នុង​នោះមានស្ត្រី៣នាក់ និងបុរស៣នាក់ ប៉ុន្តែស្ត្រី៣នាក់ត្រូវបានដោះលែងវិញ ដោយឡែក​បុរស​៣នាក់ រួមមាន លោក ជួប​ ចាន់ណាត​ ឈ្មោះ​ សេង​ វណ្ណរិទ្ធ​ និង​ឈ្មោះ​ សៅ​ សម្បត្តិ កំពុង​សាកសួរនៅស្នងការរាជធានីភ្នំពេញនៅឡើយ។

ចំណែកសាលារាជធានីភ្នំពេញ ក៏បានព្រមានទៅក្រុមកូដករ ឱ្យបញ្ឈប់ជាបន្ទាន់នូវការ​ប្រមូលផ្ដុំធ្វើកូដកម្ម ដើម្បីទប់ស្កាត់ការឆ្លងរាលដាលជំងឺកូវីដ-១៩ ប្រភេទអូមីក្រង ឬប្រភេទ​ផ្សេងទៀតចូលទៅក្នុងសហគមន៍ ក្នុងទ្រង់ទ្រាយធំ។

សាលារាជធានីភ្នំពេញបញ្ជាក់យ៉ាងដូច្នេះថា៖ «បញ្ឈប់ជាបន្ទាន់នូវការប្រមូលផ្តុំធ្វើបាតុកម្ម ហើយត្រូវបន្តអនុវត្តតាមវិធានការសុខាភិបាល រហូតដល់ធានាបានថាលែង​មានការ​ឆ្លង​ជំងឺកូវីដ-១៩ ចូលទៅក្នុងចំណោមបាតុករ និងក្រុមគ្រួសារ»។

បន្ថែមពីនេះ ក្នុងករណីដែលបាតុករនៅតែចចេស រឹងរូស បន្តប្រមូលផ្ដុំ ដែលជាហេតុ​បង្ក​ឱ្យមានការឆ្លងរាលដាលជំងឺ កូវីដ-១៩ ចូលក្នុងសហគមន៍ជាបន្តបន្ទាប់ទៀតនោះ បុគ្គល​បង្កហេតុ ដែលមិនព្រមអនុវត្តវិធានការសុខាភិបាល និងវិធានការរដ្ឋបាល ត្រូវទទួលទោស ដោយមានការផាកពិន័យ និងទោសដាក់ពន្ធនាគារ ដោយគ្មានការលើកលែងឡើយ។

ជាមួយគ្នានេះដែរ ក្រសួងសុខាភិបាល បានរកឃើញករណីវិជ្ជមានជំងឺកូវីដ-១៩ មេរោគ​បំប្លែងខ្លួនថ្មីប្រភេទអូមីក្រុងចំនួន៣៣នាក់ ក្នុងចំណោមកូដករដែលបានធ្វើតេស្តចំនួន​៥៤៦នាក់​នៅថ្ងៃទី៥ និងទី៦ ខែកុម្ភៈ ឆ្នាំ២០២២។

មន្ត្រីសុខាភិបាលរៀបចំធ្វើតេស្តរកវីរុសអូមីក្រុងលើកូដករនៃក្រុមហ៊ុនណាហ្គាវើលដ៍ នៅកន្លែងធ្វើកូដកម្មក្បែរស្ថានទូតអូស្ត្រាលី ក្នុងរាជធានីភ្នំពេញ ជាទីតាំងដែលពួកគេ ត្រូវបានរារាំង។ រូបថតថ្ងៃទី៤ ខែកុម្ភះ ឆ្នាំ២០២២។ ខេមបូចា/ ព្រីង សំរាំង

យោងតាមទំព័រហ្វេសប៊ុករបស់សហជីពណាហ្គាវើលដ៍កាលពីថ្ងៃទី០៦ ខែកុម្ភៈ ឆ្នាំ២០២២ អយ្យការអមសាលាដំបូងរាជធានីភ្នំពេញបានចេញដីកាឱ្យចូលខ្លួនបំភ្លឺករណីរារាំងពីវិធានការសុខាភិបាល លើកូដកម្មចំនួន៤នាក់ដែលជាសកម្មជនសហជីព និងបុគ្គលិកនៃ​ក្រុមហ៊ុន​ណាហ្គាវើលដ៏ ១.កញ្ញា អ៊ុក សុភ័ក្រម៉ូលីកា ២.អ្នកនាង អេង ស្រីបូ ៣.កញ្ញា ម៉េង កាន់នីកា ៤.អ្នកស្រី ខេង ចន្តា បានទទួលដីកាបញ្ជាឲ្យ ចូលខ្លួនក្រោមហេតុផល រារាំងដល់ការ​អនុវត្ត​វិធានការ។

ខណៈពេលដែល មានការចោទប្រកាន់បែបនេះ កញ្ញា ម៉េង កាន់នីកា និង អ្នកស្រី ខេង ចន្ថា កំពុងតែនៅកន្លែងធ្វើតេស្តដើម្បីយក សំណាកនៅឯកោះពេជ្រចំពោះ កញ្ញា អ៊ុក សុភ័ក្រម៉ូលីកា កំពុងធ្វើចត្តាឡីស័កព្រោះបានយកសំណាកកាលពីថ្ងៃទី០៥ ខែកុម្ភៈឆ្នាំ២០២២ រួចហើយនៅកោះពេជ្រដែលជាទីតាំងកំណត់របស់ក្រសួងសុខា ភិបាល។ រីឯ អ្នកនាង អេង ស្រីបូ វិញមានធុរៈផ្ទាល់ខ្លួនជាមួយនឹង ក្រុមគ្រួសារហើយមិនដែលបានចូលរួម​ជាមួយ​ក្រុម​កូដករតាំងពីថ្ងៃទី០៣ ខែមករា ឆ្នាំ២០២២ មកម្ល៉េះ ក្រោយពីការចាប់ខ្លួនគាត់កាលពីថ្ងៃទី៣១ ខែធ្នូ ឆ្នាំ២០២១។

ទំព័រហ្វេសប៊ុករបស់សហជីពណាហ្គាវើលដ៍ឲឱ្យដឹងថា៖ «ចំពោះការកោះហៅរបស់អយ្យការអមសាលាដំបូង យើងជាកូដករមិនរុញរាស្ទាក់ស្ទើរ ក្នុង ការចូលខ្លួនបំភ្លឺឡើយ តែរហូតមកដល់ពេលនេះ យើងខ្ញុំនៅមិនទាន់បានទទួលការ ទាក់ទង ទូរស័ព្ទជាផ្លូវការណាមួយឡើយ មានតែសេចក្តីប្រកាសដែល ធ្វើការផុសនៅ លើផេករបស់ ស្នងការដ្ឋាននគរបាលរាជធានីភ្នំពេញប៉ុណ្ណោះ»។

ទំព័រហ្វេសប៊ុកបន្តថា៖ «យើងខ្ញុំជាកូដករស្នើសុំឲ្យអយ្យការអមសាលាដំបូង មេត្តាចាត់បញ្ជូនមន្ត្រីធ្វើការកោះហៅ ដោយវិជ្ជាជីវៈ មានការទាក់ទងមកកូដករដែលត្រូវចូលខ្លួនដោយផ្លូវការ និងមានកាលបរិច្ឆេទ ពេលវេលាដែលបានកំណត់»។

យ៉ាងណាមិញ បន្ទាប់ពីមានការចាប់ខ្លួនកូដករជាបន្តបន្ទាប់ សហជីពទ្រទ្រង់សិទ្ធិការងារ​បុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ បានបកស្រាយថា ការចេញដីកាចាប់ខ្លួន​នោះ​ថាពួកគេពាក់ព័ន្ធនឹងការរារាំងមិនឱ្យពិនិត្យរកសំណាកនោះមិនពិតទេ ដោយពួកគេ និងអ្នក​ដែលបានចាប់ខ្លួនបានសហការគ្រប់រឿង ស្របពេលដែលក្រសួងសុខាភិបាល​បានទុកពេល​ធ្វើតេស្ត ៣ថ្ងៃ។

សហជីពបានអះអាងថា៖ «យើងខ្ញុំក៏ទៅធ្វើតេស្តតាម តែបែរជាមិនមានពេទ្យ​មក​ពិនិត្យ​ពេល​ដែលកូដករទៅដល់វិញនោះទេ។ វិវាទការងាររវាងកម្មករនិយោជិត ជាមួយក្រុមហ៊ុន​ណាហ្គាវើលដ៏កាន់តែមកដល់ពេលនេះ ១១នាក់ត្រូវបានចាប់ខ្លួន»។

ក្រុមសហជីពបានបញ្ជាក់ថា ការចាប់ខ្លួននឹងការចោទប្រកាន់ទាំងឡាយ គឺបង្ហាញរូបភាព​មិនល្អ ប៉ះពាល់ដល់កិត្តិយសរបស់រាជរដ្ឋាភិបាល ដែលបានផ្តល់សច្ចាប័នដល់អនុសញ្ញាស្នូល​អង្គការពលកម្មអន្តរជាតិស្តីពីសេរីភាពសមាគម និងការចរចារួមលេខ៨៧ និង៩៨ រួមទាំង រំលោភលើរដ្ឋធម្មនុញ្ញនៃព្រះរាជាណាចក្រកម្ពុជា។

មន្ត្រីសុខាភិបាលរៀបចំធ្វើតេស្តរកវីរុសអូមីក្រុងលើកូដករនៃក្រុមហ៊ុនណាហ្គាវើលដ៍ នៅកន្លែងធ្វើកូដកម្មក្បែរស្ថានទូតអូស្ត្រាលី ក្នុងរាជធានីភ្នំពេញ ជាទីតាំងដែលពួកគេ ត្រូវបានរារាំង។ រូបថតថ្ងៃទី៤ ខែកុម្ភះ ឆ្នាំ២០២២។ ខេមបូចា/ ព្រីង សំរាំង

ទាក់ទងនឹងបញ្ហានេះ អង្គការសង្គមស៊ីវិលមកពី១៣៤ស្ថាប័ន នឹងដាក់លិខិតចំហចំនួន៣​លិខិត ស្នើអន្តរាគមន៍ដោះស្រាយវិវាទការងាររបស់ណាហ្គាវើលដ៍ និងស្នើដោះលែង និង​ទម្លាក់ការចោទប្រកាន់លើថ្នាក់ដឹកនាំនិងសកម្មជនសហជីពទាំង៨រូប ជាបន្ទាន់។

បើតាមលោក ឃុន ថារ៉ូ អ្នកគ្រប់គ្រងកម្មវិធីការងាររបស់សង់ត្រាល់ បានឱ្យដឹងថា អង្គការ​សង្គមស៊ីវិល សមាគម និងសហជីពដែលធ្វើសកម្មភាពដើម្បីលើកកម្ពស់ និងការពារ​សិទ្ធិ​មនុស្ស សិទ្ធិស្រ្តី និងសិទ្ធិការងាររបស់កម្មករនិយោជិតនៅប្រទេសកម្ពុជាមួយចំនួននឹង​ធ្វើការ​ជួបជុំគ្នា​នៅ​មុខ​ក្រសួងមហាផ្ទៃ ដើម្បីដាក់លិខិតចំហជូនទៅស្ថាប័នសភាជាតិ និងក្រសួង​ពាក់ព័ន្ធ ក្នុងគោលបំណងទាមទារឱ្យមានការដោះលែងជាបន្ទាន់ និងទម្លាក់ចោលនូវការចោទ​ប្រកាន់ដោយឥតលក្ខខណ្ឌនូវមេដឹកនាំនិងតំណាងសហជីពទាំង៨រូបដែលតុលាការកំពុងឃុំ​ខ្លួន។

លោកបញ្ជាក់ថា៖ «ខ្លឹមសារនៅក្នុងលិខិតចំហគឺមានគោលបំណងបង្ហាញជូនដល់ស្ថាប័ន​ពាក់ព័ន្ធ និងសាធារណជនអំពីការការវិភាគស៊ីជម្រៅលើការរើសអើង និងរំលោភលើ​សិទ្ធិ​ការងារពីសំណាក់ក្រុមហ៊ុនណាហ្គាវើលដ៍ទៅលើបុគ្គលិកនិយោជិត (សរុបចំនួន ៣៦៥ នាក់) ដែលភាគច្រើនជាស្រ្តី និងភាពស្របច្បាប់នៃកូដកម្មរបស់បុគ្គលិកនិយោជិត​ដោយផ្អែកលើ​ច្បាប់ជាតិ និងអន្តរជាតិនានាដែលទទួលស្គាល់ដោយកម្ពុជា»

ថ្វីបើយ៉ាងនេះក្ដី កន្លងមក លោក ស ខេង បានរំពឹងយ៉ាងមុតមាំថាវិវាទ​ការងារ​វាងបុគ្គលិក​ណាហ្គាវើលដ៍ ជាមួយក្រុមហ៊ុន នឹងបញ្ចប់ទៅនៅពេលឆាប់ៗ ដោយសន្តិវិធី និង​ទៅតាម​ច្បាប់ដែលបានចែងជាជាងការមិនងាកមកចរចារកដំណោះស្រាយ។

លោក ស ខេង  ធ្លាប់បានមានប្រសាសន៍ថា  វិវាទការងារនេះ  គណៈកម្មការ ដោះស្រាយ​វិវាទ​ការងារ ដែលមានក្រសួងការងារជាអ្នកនាំមុខ និងអាជ្ញាធរពាក់ព័ន្ធ គួរបន្ត អត់ធ្មត់ ហើយ​ប្រកាន់​នូវជំហរសម្របសម្រួល ទាំងភាគីក្រុមហ៊ុនណាហ្គាវើលដ៍ ភាគីបុគ្គលិក និងភាគី​អាជ្ញារ​កណ្ដាលជាសមត្ថកិច្ច ដើម្បីរកដំណោះស្រាយជាមួយគ្នា។

លោក ស ខេង មានប្រសាសន៍ថា៖ «ភាគី៣ដែលមានការពាក់ព័ន្ធក្នុងរឿងនេះ ខិតខំ​រក​វិធី​ឱ្យ​បាន​ឆាប់កាលណាល្អកាលហ្នឹង ហើយបើសិនបែរខ្នងដាក់គ្នារហូត គឺដោះអាម៉េចក៏មិនចប់ដែរ បើអាចថាបន្តិចម្ដងៗយើងងាកមុខរកគ្នាទៅប្រហែលជាអាចរកឃើញដំណោះស្រាយ តែបើ​ថាមិនបែរមុខដាក់គ្នាទេ អាហ្នឹងមិនដឹងថាឆ្នាំណាអាចរកឃើញដំណោះស្រាយទេ»។

លោក ស ខេង  បន្តថ្លែងថា សម្ដេចលើកទឹកចិត្ត និងតែងតែផ្ដល់នូវយោបល់ដើម្បីទៅ​អាជ្ញាធរ​ក្រុង ក៏ដូចជាឯកឧត្តម អ៊ិត សំហេង រដ្ឋមន្រ្តីក្រសួងការងារ ឱ្យសមត្ថកិច្ច និងនគរបាល ខិតខំ និងសម្របសម្រួលឱ្យភាគីទាំងពីរអាចនិយាយជាមួយគ្នា និងរកដំណោះស្រាយ។

គួរជម្រាបជូនថា កូដករដែលជាសមាជិកសហជីពដែលត្រូវបានចាប់ខ្លួន០៦នាក់ នាយប់​ថ្ងៃ​ទី០៥ ខែកុម្ភៈ ឆ្នាំ២០២២នោះ តែត្រូវបានសមត្ថកិច្ចដោះលែងស្ត្រីចំនួន៣នាក់មកវិញ គឹលោកស្រី អ៊ុក សោភ័ណ អ្នកនាង ទូច ដាណែត និងអ្នកនាង ឯម គន្ធា។ បច្ចុប្បន្ន តំណាងសហជីព និងសមាជិកចំនួន១១នាក់ហើយ ដែលជាប់ឃុំខ្លួន ក្រោមបទចោទពីរផ្សេងគ្នា៕

643 views

ព័ត៌មានទាក់ទង

ព័ត៌មានថ្មី

អត្ថបទពេញនិយម