សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលត្រៀមបញ្ចេញយន្តការថ្មីឱ្យអ្នកដឹកកម្មកររោងចក្រ​​ទទួល​បានកម្ចីការប្រាក់ទាបដើម្បីប្តូរទៅរថយន្តក្រុង

កម្មករកម្មការិនីរោងចក្រកំពុងធ្វើដំណើរទៅធ្វើការតាមរថយន្តទ្រុងនៅលើបណ្តោយផ្លូវទំនប់ថ្មី៣៧១ កែងនឹងផ្លូវចំការដូង ដែលស្ថិតក្នុងខណ្ឌមានជ័យ រាជធានីភ្នំពេញ នៅព្រឹកថ្ងៃទី២៩ ខែកុម្ភៈ ឆ្នាំ២០២៤។ (ខេមបូចា/ ប៉ា តុងចិន)
កម្មករកម្មការិនីរោងចក្រកំពុងធ្វើដំណើរទៅធ្វើការតាមរថយន្តទ្រុងនៅលើបណ្តោយផ្លូវទំនប់ថ្មី៣៧១ កែងនឹងផ្លូវចំការដូង ដែលស្ថិតក្នុងខណ្ឌមានជ័យ រាជធានីភ្នំពេញ នៅព្រឹកថ្ងៃទី២៩ ខែកុម្ភៈ ឆ្នាំ២០២៤។ (ខេមបូចា/ ប៉ា តុងចិន)

រដ្ឋាភិបាលត្រៀមដាក់ចេញយន្តការជំរុញ​ឱ្យគ្រឹះស្ថានមីក្រូហិរញ្ញវត្ថុ និងធនាគារផ្តល់ប្រាក់កម្ចី ក្នុងអត្រាការប្រាក់ទាបដល់អ្នកប្រកប​របរដឹកជញ្ជូនកម្មករនិយោជិត ដើម្បីជំរុញឱ្យពួកគេផ្លាស់​ប្តូរពីរថយន្តកែច្នៃទៅប្រើប្រាស់រថយន្តក្រុង ខណៈមន្ត្រីរដ្ឋាភិបាលផ្ទាល់​ក៏ទទួល​ស្គាល់ថាអត្រា​ប្តូរទៅរថយន្តក្រុងទើបបានប្រមាណ​៣០​ភាគរយនៅឡើយ។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានមានប្រសាសន៍​ថា បច្ចុប្បន្ននេះក្រសួងពាក់ព័ន្ធកំពុងសិក្សារួមគ្នាលើយន្តការសំខាន់ៗចំនួន៤ ដើម្បីជំរុញឱ្យ​ប្រជាពលរដ្ឋដែលប្រកបរបរដឹកជញ្ជូនកម្មករនិយោជិតទាំងអស់ផ្លាស់ប្តូរពីរថយន្តកែច្នៃទៅ​ប្រើ​ប្រាស់​រថយន្តក្រុង។ ក្នុងនោះយន្តការទី១ គឺការលើកទឹកចិត្តឱ្យអ្នកដឹកជញ្ជូន​ដែលមាន​លទ្ធភាព​ប្រើប្រាស់រថយន្តក្រុងក្នុងស្រុក និងទី២ គឺការផ្តល់ប្រាក់កម្ចីក្នុងអត្រាការប្រាក់​ទាប​សមរម្យ។ ដោយឡែកយន្តការទី៣ គឺការផ្តល់កាតព្វកិច្ចដឹកជញ្ជូនកម្មករនិយោជិតនេះឱ្យ​ទៅភាគីក្រុមហ៊ុនជាអ្នកទទួលខុសត្រូវ ហើយទី៤ គឺការនាំចូលរថយន្តក្រុងដែលមាន​តម្លៃ​សមរម្យ​ពីក្រៅប្រទេស។

យ៉ាងណាលោកឱ្យដឹងថា យន្តការទី១ បានដំណើរការជាបន្តបន្ទាប់ហើយ ខណៈយន្តការទី២​ទាក់​ទងនឹងការផ្តល់ប្រាក់កម្ចីក្នុងអត្រាការប្រាក់ទាបឱ្យអ្នកប្រកបរបរដឹកជញ្ជូនកម្មករ​និយោជិត​​នឹងដាក់ឱ្យអនុវត្តក្នុងរយៈពេលឆាប់ៗខាងមុខនេះ។ ប៉ុន្តែលោកមិនទាន់អាច​បញ្ជាក់​ពីកាលបរិច្ឆេទច្បាស់លាស់នៅឡើយទេ នៅពេលអ្នកសារព័ត៌មានសួរថា តើយន្តការនេះ​អាច​ធ្វើ​បានក្នុងអាណត្តិទី៧នេះដែរឬទេ?

លោកថ្លែងថា៖ «យើងនឹងធ្វើបានភ្លាមៗ គឺកម្ចីប្រាក់ពីធនាគារ និងមីក្រូហិរញ្ញវត្ថុកម្រិត​ការ​ប្រាក់​​ទាបណាមួយ ដែលយើងត្រូវបានព្យាយាមដែរនៅក្នុងការពិគ្រោះយោបល់ ពីព្រោះ​ការ​ចូលរួម​ជួយកម្មករនិយោជិត គឺជាការចូលរួមរបស់និយោជក ក៏ដូចជាភាគីពាក់ព័ន្ធ រដ្ឋាភិបាល​ជាដើម»

បើតាមលោក កត្តា អ៊ន បានឱ្យដឹងថា គិតមកទល់ពេលនេះ អ្នកបើកបរទើបផ្លាស់ប្តូរ​ទៅ​ប្រើ​ប្រាស់​រថយន្តក្រុងបានប្រមាណ​៣០​ភាគ​រយ​ប៉ុណ្ណោះ។

ប្រធានសហភាពការងារកម្ពុជា លោក អាត់ ធន់ យល់ថា ជារឿងចាំបាច់បំផុតដែល​រដ្ឋាភិបាល​គួរចេញនូវយន្តការនេះ ព្រោះធ្លាប់បានជជែកគ្នាជាច្រើនឆ្នាំមកហើយ។ លោកបន្តថា កម្មករ​និយោជិត​នៅតាមទីជនបទនៅតែប្រឈមនឹងហានិភ័យ ដោយពួកគេភាគច្រើនធ្វើដំណើរ​តាម​រ៉ឺម៉ក និងឡានកែច្នៃខុសបច្ចេកទេស។ បញ្ហានេះលោកថាដោយសារតែកង្វះ​លទ្ធភាពរបស់​អ្នក​ដឹក​ជញ្ជូន ដែលតម្រូវឱ្យមានការយកចិត្តទុកដាក់ខ្ពស់ពីស្ថាប័នពាក់ព័ន្ធ។

លោកថ្លែងថា៖ «គួរដល់ពេលហើយ ព្រោះរឿងហ្នឹងជជែកគ្នា៤ទៅ៥ឆ្នាំហើយ អ៊ីចឹងគួរដល់​ពេល​ហើយ[..]សព្វថ្ងៃនេះនៅមានបញ្ហាច្រើនណាស់នៅតាមរោងចក្រសហគ្រាស ជាពិសេស​នៅតាមជាយក្រុង។ មិនត្រឹមតែឡានកែច្នៃទេ មានទាំងរ៉ឺម៉កទៀត ដឹក២០ ឬ​៣០ ឬ៤០នាក់​ឯណុះ ហើយឡានអីគឺនៅដដែលទេ អត់ទាន់មានការប្រែប្រួលទេ»។

អង្គការមូលនិធិបង្ការរបួសអាស៊ីប្រចាំកម្ពុជាបានរកឃើញថា រថយន្តដឹកកម្មករនិយោជិត​ដោយ​ឈរ បានប៉ះពាល់ដល់ផាសុកភាព និងសណ្តាប់ធ្នាប់កម្មករនិយោជិត ហើយជាពិសេស​ប្រឈមនឹងគ្រោះថ្នាក់ដោយសារងាយក្រឡាប់ថែមទៀត។

ប្រធានសមាគមដឹកជញ្ជូន និងការងារក្រៅប្រព័ន្ធ លោក នាក់ ហេង យល់ឃើញថា ការផ្តល់​ប្រាក់កម្ចី​ដែលមានការប្រាក់ទាប ជាយន្តការមួយដែលមានប្រសិទ្ធភាពខ្ពស់ក្នុងការជំរុញឱ្យ​មាន​ការផ្លាស់ប្តូរពីរថយន្តកែច្នៃទៅជារថយន្តក្រុង។ ការអះអាងដូច្នេះ ដោយលោកសំអាងថា បច្ចុប្បន្នអ្នកប្រកបរបរដឹកកម្មករនិយោជិតកំពុងជួបបញ្ហាប្រឈមជាច្រើនជុំវិញបញ្ហាជីវភាព ដោយសារតម្លៃប្រេងឡើងថ្លៃ ហើយចំនួនកម្មករនិយោជិតត្រូវបានថយចុះ ព្រោះតែរោងចក្រ​មួយចំនួនត្រូវបានបិទទ្វារ ឬជម្រុះកម្មករ។

ជាពិសេសលោកថា អ្នកបើកបរជាច្រើនសុទ្ធតែជាប់បំណុលធនាគារដោយសារយកលុយទិញ​រថយន្ត​កែច្នៃ ដូច្នេះពួកគេនឹងមិនមានលទ្ធភាពខ្ចីបន្ថែមទៀតឡើយ បើពុំមានការយកចិត្តទុក​ដាក់​ពី​ស្ថាប័ន​ពាក់ព័ន្ធ។

លោកមានប្រសាសន៍ថា៖ «បើមានឆាប់ៗរបៀបអ៊ីចឹងមែន អ្នកបើកបរសប្បាយចិត្តមែនទែន ដោយសារ​តែ​បច្ចុប្បន្នគាត់ទាក់ទងនឹងការខ្ចីធនាគារការប្រាក់ខ្ពស់ហើយ ទម្រាំតែគាត់ប្តូរ​រថយន្ត​ទៀត វាហាក់បីដូចជាជាន់ទៅលើគាត់។ អ៊ីចឹងបើសិនជាករណីគាត់មានរដ្ឋអាចជួយ​កម្ចីបាន​អ៊ីចឹង អាហ្នឹងគឺជាការប្រសើរមែនទែន»។

រថយន្តប្រភេទទេសចរណ៍ចតនៅខាងក្រៅរោងចក្រ 7NG ដោយរង់ចាំដឹ​កកម្មករ​រោងចក្រ នៅថ្ងៃទី២៣ ខែមិថុនា ឆ្នាំ២០២៣។ (ខេមបូចា/ សុវណ្ណ ស្រីពេជ្រ)

អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា លោក កាំង តុងងី យល់ថា ការជំរុញ​ឱ្យ​ពង្រឹង​សុវត្ថិភាពលើការដឹកជញ្ជូនកម្មករនិយោជិត គឺជាកត្តាចាំបាច់។ ប៉ុន្តែលោកថា សមាគម​របស់​លោក​មិនទាន់ទទួលព័ត៌មានពីយន្តការផ្តល់ប្រាក់កម្ចី​ដល់អ្នកបើកបរក្នុងអត្រាការប្រាក់​ទាប​នេះនៅឡើយ ដោយលោកថាទំនងជារដ្ឋាភិបាលអាចនឹងកំពុងធ្វើការជាមួយស្ថាប័ន​ពាក់​ព័ន្ធ​ផ្សេង។

លោកថ្លែងថា៖ «មកដល់ពេលនេះខ្ញុំដូចជាអត់ទាន់ទទួលបានព័ត៌មានហ្នឹងទេ​[..]ខ្ញុំគិតថា​ប្រហែល​ជាអ្វីដែលរដ្ឋាភិបាលធ្វើហ្នឹង គឺគេធ្វើជាមួយនឹងសមាគមកម្មករនិយោជកអី​ជាដើម​ហ្នឹងទេ»។

យ៉ាងណា អ្នកនាំពាក្យរូបនេះបញ្ជាក់ថា ក្នុងពេលបច្ចុប្បន្ននេះសេវាហិរញ្ញវត្ថុច្រើនរួចទៅ​ហើយ ទៅតាមលក្ខខណ្ឌនៃអតិថិជិនដែលមានចាប់ពី៦ភាគរយដល់១៨ភាគរយក្នុងឆ្នាំ។

អត្រា​ការ​ប្រាក់​ប្រែប្រួលតាម​គ្រឹះ​ស្ថានផ្តល់ប្រាក់កម្ចី​នីមួយៗ ប៉ុន្តែ​អត្រាការ​ប្រាក់ជា​មធ្យម​បច្ចុប្បន្នសម្រាប់​កម្ចី​ទិញ​​រថ​យន្ត​ពីធនាគារ​ភ្នំពេញពាណិជ្ជ​ចាប់ផ្តើម​​ពី៩,៥ភាគរយក្នុង​​មួយ​​ឆ្នាំ ចំណែក​​ឯ​​ធនាគារ​​អេស៊ីលី​ដា​មាន​​​អត្រា​​ចាប់​​​ពី១២ភាគរយទៅ១៨​ភាគរយជា​រៀង​រាល់​​ឆ្នាំ​។

អ្នកប្រកបរបរដឹកកម្មករនិយោជិតដោយប្រើរថយន្តទ្រុងចំណុះ៥តោន​នៅ​ខេត្ត​កំពង់ចាមម្នាក់ លោក អឿ អិត នៅតែយល់ថា ទោះបីអ្នកបើកបរទទួលបានកម្ចីក្រោម​អត្រា​ការ​ប្រាក់ទាប ក៏​នៅ​តែ​ជាបន្ទុកធ្ងន់ធ្ងរដែរ ដោយថាពីមុនលោកធ្លាប់មានភ្ញៀវ៧០នាក់ ប៉ុន្តែ ២ឆ្នាំចុងក្រោយ​នេះ​​មានភ្ញៀវដឹកតែ១០នាក់ប៉ុណ្ណោះ ដោយសារតែរោងចក្រភាគច្រើនបញ្ឈប់​កម្មករ​អស់យ៉ាង​ច្រើន។

បន្ថែមលើនេះ លោកថា រថយន្តទ្រុងរបស់លោកដែលទិញតម្លៃជាង២ម៉ឺនដុល្លារ​អាច​នឹង​លក់​មិនចេញ ឬត្រូវខាតជាងពាក់កណ្តាល ពោលគឺបានត្រឹម៨ពាន់ដុល្លារប៉ុណ្ណោះ។ ដូច្នេះ​លោក​យល់ថា ប្រសិនបើក្រសួងតម្រូវឱ្យផ្លាស់ប្តូរទៅរថយន្តក្រុងដោយប្រើកកម្ចីធនាគារ ហើយ​មិន​បានជួយដោះដូររថយន្តទ្រុងចេញជាមុនទេនោះ ហាក់ដូចជាយកកពួកគាត់ទៅ​ចងនឹង​ខ្សែ​ដែរ​។

លោកបញ្ជាក់ថា៖ «បើដាក់អ៊ីចឹង រឹតតែដាក់បំណុលឱ្យអ្នកតៃកុងឡានថែម។ បើថាដាក់ឱ្យ​តែកុង​ឡាន​គ្នាគ្មានលទ្ធភាពទៅទិញ ហើយខ្ចីលុយធនាគារមកថែម ដូចយកកទៅដាក់​អន្ទាក់​អ៊ីចឹង ដូចចងកអ៊ីចឹង បើអស់មនុស្សហើយ ឡានយើងលក់អត់ចេញផង»។

ស្រដៀងគ្នា អ្នកដឹកកម្មករដែលប្រើរថយន្តទ្រុងចំណុះ២,៥តោននៅខេត្តកំពង់ចាមម្នាក់ទៀត លោក សំណាង សុខវុត្ថា ក៏យល់ថា ការទទួលយកប្រាក់កម្ចីដែលមានការប្រាក់ទាប នឹងមិន​អាច​ឆ្លើយតបនឹងជីវភាពរបស់ពួកគាត់បច្ចុប្បន្នឡើយ ដោយថាលោកនៅមិនទាន់​បង់ផ្តាច់កម្ចី​ធនាគារដែលយកទិញរថយន្តទ្រុងខាងលើនៅ​ឡើយ​។

ជាងនេះទៅទៀត លោកថា តម្លៃឡានក្រុង យ៉ាងហោចណាស់ក៏ចន្លោះពី ១២ ០០០​ដុល្លារ ទៅ ១៥ ០០០​ដុល្លារដែរ ហើយអាចផ្ទុកភ្ញៀវតិចជាងឡានទ្រុងថែមទៀត។ ដូច្នេះលោកថា អាចប្រថុយផ្លាស់ប្តូរបាន ប្រសិនបើរដ្ឋាភិបាលបង្កើនការងារដល់កម្មករនិយោជិត​ឱ្យបានជាប់​លាប់​ជាងពេកបច្ចុប្បន្ន។

លោកឱ្យដឹងថា៖ «ឱ្យតែការប្រាក់ទាប យើងអាចមានសមត្ថភាព តែពិបាកណាស់សេដ្ឋកិច្ច​ក្នុង​រោងចក្រ បិទបើកៗ។ កម្មករឡើងជិះបានមួយខែជម្រុះរំសាយគ្នាចោលអ៊ីចឹង តៃកុងឡាន​គ្នា​មានសមត្ថភាពឯណា មានលុយទៅបង់!»។

កម្មការិនីរោងចក្រកាត់ដេរម្នាក់ដែលធ្វើដំណើរពីស្រុកស្អាង ខេត្តកណ្តាល មកធ្វើការនៅ​រាជធានី​ភ្នំពេញ​ អ្នកស្រី ឈុន ស្រីកា ចង់ឃើញ​មានការផ្លាស់ប្តូរឆាប់ៗ ដើម្បីធានា​បាន​នូវ​សុវត្ថិភាព និងផាសុកភាព។ ការអះអាងនេះ ដោយថាបច្ចុប្បន្នអ្នកស្រីចំណាយថវិកា​៣០​ដុល្លារ​ក្នុងមួយខែលើការធ្វើដំណើរទៅមក ប៉ុន្តែបានត្រឹមជិះឈរ ហើយមានភាពចង្អៀតណែន​ថែម​ទៀត។ មិនតែប៉ុណ្ណោះ កម្មការិនីវ័យ៣៣ឆ្នាំរូបនេះឱ្យដឹងថា ក៏មានក្តីបារម្ភពីសុវត្ថិភាពដែរ ប៉ុន្តែ​ដោយសារ​គ្មាន​ជម្រើសផ្សេង។

អ្នកស្រីថា៖ «បារម្ភដែរ តែយើងមិនមានជម្រើស។ មិនមានជម្រើសណាមួយដែលល្អ​សម្រាប់​ឱ្យយើងធ្វើដំណើរ មានតែជិះឡានរបៀបហ្នឹង ពីព្រោះយើងមានគ្នាច្រើន»។

រ៉ឺម៉កកែច្នៃមួយដឹកកម្មករកម្មការិនីរោងចក្រជាច្រើននាក់ទៅធ្វើការតាម​បណ្តោយ​ផ្លូវទ្រុងមាន់ ស្ថិតក្នុងរាជធានីភ្នំពេញនៅព្រឹកថ្ងៃទី២៩ ខែកុម្ភៈ ឆ្នាំ២០២៤។ (ខេមបូចា/ ប៉ា តុងចិន)​

ប្រហាក់ប្រហែលគ្នា កម្មការិនីរោងចក្រស្បែកជើងមួយក្នុងខេត្តកំពង់ចាម អ្នកស្រី ឈន ចាន់សូត យល់ថា ប្រសិនបើមានការផ្លាស់ប្តូរទៅរថយន្តក្រុងមែន នោះនឹងអាចបង្ក​លក្ខណៈ​ងាយស្រួលមួយកម្រិតទៀត ព្រោះបច្ចុប្បន្នពួកគាត់ត្រូវធ្វើដំណើរទៅមកចំងាយ​ប្រមាណ​៣០គីឡូម៉ែត្រ​ហាលវាល និងខ្យល់ ដោយត្រូវចំណាយថវិកា ៥៥ ០០០រៀលក្នុងមួយខែ។

អ្នកស្រីយល់ថា៖ «បើគេផ្លាស់ប្តូរអ៊ីចឹងក៏ល្អ ព្រោះវាមិនសូវហុយដី ហើយភ្លៀងមកវាមិន​រងារ»។

នាយកប្រតិបត្តិអង្គការបង្ការរបួសអាស៊ីប្រចាំកម្ពុជា លោក គឹម បញ្ញា ទទួលស្គាល់ថា អ្នក​បើកបរ​ពិត​ជាមានបញ្ហាប្រឈមផ្នែកហិរញ្ញវត្ថុ ប៉ុន្តែលោកនៅតែជំរុញ និងលើកទឹកចិត្តឱ្យ​ផ្លាស់​ប្តូរពីរថយន្តកែច្នៃទៅប្រើប្រាស់រថយន្តក្រុង ដើម្បីធានាបាននូវសុវត្ថិភាពរបស់កម្មករ​និយោជិត។ 

លោកគូសបញ្ជាក់ថា ដើម្បីជំរុញឱ្យមានការផ្លាស់ប្តូរបានឆាប់រហ័ស អ្នកពាក់ព័ន្ធត្រូវកំណត់​ឱ្យ​ប្រើប្រាស់​រថយន្តក្រុង​សម្រាប់​រោងចក្រ​ដែលបើកដំណើរការថ្មី ហើយត្រូវធានានូវលទ្ធភាព​របស់​​អ្នក​បើកបរ ដូចជាការផ្តល់កម្ចីអត្រាការប្រាក់ទាបជាដើម។ មួយវិញទៀត លោកថាការ​ដំឡើង​ថ្លៃ​ធ្វើដំណើរឱ្យកម្មករ គឺជាការធានាចំណូលរបស់អ្នកបើកបរ។

លោកថ្លែងថា៖ «ស្ថាប័នរដ្ឋាភិបាលលោកគួរពិចារណា នៅក្នុងការដំឡើងចំណាយ​ធ្វើដំណើរ​ទៅមក ដែលយើងកំណត់៧ដុល្លារយូរដែរហើយ។ អ៊ីចឹងគួរដំឡើងសម្រាប់តែកម្មករ​និយោជិត​​ដែលធ្វើដំណើរតាមរថយន្តដឹកជញ្ជូនរួម»។

យោង​តាមការ​ស្ទាប​ស្ទង់មតិរបស់មជ្ឈមណ្ឌល​សិក្សាគោល​នយោបាយ​ឆ្នាំ​២០២១ បាន​ឱ្យដឹង​ថា ប្រហែល​ពាក់កណ្តាល​នៃកម្មករ​រោង​ចក្រ​នៅកម្ពុជា​ប្រមាណ ៧០០ ០០០នាក់​ធ្វើ​​ដំ​ណើរ​តាម​​ឡាន​កូរ៉េ​​​ធំៗ។

ប្រភពដដែលបង្ហាញដែរថា យានយន្តដឹកកម្មករនិយោជិតនៅកម្ពុជាភាគច្រើនជារថយន្តកូរ៉េ ដែលមានអាយុ២០ឆ្នាំជាមធ្យម ហើយមានតែ២ភាគរយប៉ុណ្ណោះ ដែលផលិតក្រោយ​ឆ្នាំ​២០០៧​។

ទោះបីជារថយន្តទាំងនោះមានវ័យចំណាស់ក៏ពិតមែន ប៉ុន្តែអ្នកបើកបរភាគច្រើនចំណាយពី ៩ ០០០​ដុល្លារទៅ ១៤ ០០០ដុល្លារ សម្រាប់ទិញរថយន្តកូរ៉េ។ ក្នុងនោះមានអ្នកបើកបរ​៩០​ភាគ​រយ​​បានខ្ចីប្រាក់ដើម្បីទិញ ក្នុងអត្រាការប្រាក់១៦ភាគរយក្នុងមួយឆ្នាំជាមធ្យម សម្រាប់​រយៈ​ពេល​៤ទៅ៥ឆ្នាំ។ ជាមួយគ្នា ពួកគេត្រូវចំណាយពី ៨ ០០០ដុល្លារ ទៅ១០ ០០០ដុល្លារ​បន្ថែម​លើការលក់រថយន្តបច្ចុប្បន្ន ដើម្បីទិញឡានក្រុងចាស់មួយ។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានមានប្រសាសន៍​ដែរថា ក្រៅតែពីការត្រៀមដាក់ចេញយន្តកាផ្តល់ប្រាក់កម្ចី​ក្នុងអត្រាការប្រាក់ទាបនេះ រដ្ឋាភិបាល​​ក៏​កំពុងពិភាក្សាពីពីភាពវិជ្ជមាន និងអវិជ្ជមាននៃជម្រើសអទិភាពមួយទៀត គឺការ​បង្វិល​កាតព្វកិច្ច​ដឹកជញ្ជូនកម្មករនិយោជិតនេះទៅឱ្យភាគីរោងចក្រ-សហគ្រាស​ជាអ្នកទទួល​ខុសត្រូវ។

លោកបញ្ជាក់ថា៖«​យើងគិតថាជាជម្រើសមួយដែរ គឺថានិយោជកហ្នឹង គឺផ្គត់ផ្គង់ឡាន ហើយ​ជ្រើស​រើសអ្នកបើកបរដោយខ្លួនឯងមក ហើយផ្តល់ប្រាក់ខែមក អាហ្នឹងក៏ជាជម្រើស​ល្អដែរ»។

គម្រោង​ផ្លាស់ប្តូររថយន្តដឹក​កម្មករ​​រោង​ចក្រ​ ​​ ត្រូវបាន​ចាប់​ផ្តើម​តាំង​ពីឆ្នាំ​២០១៨ ដោយ​​​អង្គការ​មូលនិធិ​បង្ការ​របួស​អាស៊ី​ប្រចាំ​កម្ពុជាស​ហការជាមួយក្រសួងការងារ ហើយត្រូវបានអនុវត្តជា​មួយ​អ្នក​បើកបរ​​​ដឹក​កម្មករ​នៅ​រោងចក្រជាង ១ ០០០កន្លែង ស្ថិត​ក្នុង​ខេត្តកណ្តាល កំពង់ស្ពឺ កំពង់​ឆ្នាំង កំពង់ចាម កំពង់ធំ ស្វាយរៀង និង​រាជធា​នីភ្នំពេញ​។

យោងតាមរយៈរបាយការណ៍របស់​ក្រុមការងារ​សុវត្ថិភាពចរាចរណ៍​ផ្លូវគោក​សម្រាប់គាំពារ​កម្មករ​​និយោជិត​នៃក្រសួងការងារបានឱ្យ​ដឹងថា​ ក្នុងរយៈពេល១០ខែ ឆ្នាំ២០២៣ គ្រោះថ្នាក់​ចរាចរណ៍​បានកើនឡើង​ទៅលើ​កម្មករ​និយោជិត​​ចំនួន ៣ ៨៩២ករណី​ មានជនរងគ្រោះ​សរុប​ ៤ ៤៩៨​នាក់ និងមានស្លាប់​១១២នាក់។

តួលេខនេះ មានការហក់ឡើងជាងរយៈពេល១ឆ្នាំពេញនៃឆ្នាំ២០២២ ដោយរយៈពេល១២ខែ ឆ្នាំ២០២២ ករណីគ្រោះថ្នាក់ចរាចរណ៍លើកម្មករនិយោជិតក្នុងវិស័យកាត់ដេរ សម្លៀកបំពាក់ និងផលិត ស្បែកជើង បានកើតឡើងសរុបចំនួន ៣ ២៧៥ករណី ដែលបណ្ដាលឱ្យមានអ្នក ស្លាប់ចំនួន៦៣នាក់ របួសធ្ងន់៨៥៤នាក់ និងរងរបួសស្រាលចំនួន ៣ ១៣៩នាក់៕

323 views

ព័ត៌មានថ្មីៗ

អត្ថបទពេញនិយម