អង្គការសម្ព័ន្ធសត្វព្រៃ និង រដ្ឋបាលព្រៃឈើ ខ្វែងគំនិតគ្នាចំពោះការខិតខំប្រឹងប្រែងសង់របងព័ទ្ធជុំវិញជម្រកសត្វព្រៃភ្នំតាម៉ៅ ក្នុងខេត្តតាកែវ ដោយមានមន្ត្រីរដ្ឋាភិបាលចង់ដកតំបន់គ្មានដើមឈើចេញពីជម្រកសត្វព្រៃនេះ ដែលពេលនេះជាសួនជម្រើសរុក្ខជាតិ។
តំបន់ភាគឦសាននៃភ្នំតាម៉ៅ ត្រូវបានឈូសឆាយព្រៃកាលពីឆ្នាំមុន ហើយទុកសម្រាប់អភិវឌ្ឍអចលនទ្រព្យ ដោយមានផ្ទៃដីជិត ១ ៥០០ ហិកតា ត្រូវបានឈូសឆាយអស់ដើមឈើត្រឹមតែ៥ថ្ងៃប៉ុណ្ណោះ។ លោក នាយករដ្ឋមន្ត្រី ហ៊ុន សែន បានធ្វើ អន្តរាគមន៍ បន្ទាប់ពីមានប្រព័ន្ធផ្សព្វផ្សាយសង្គមមួយទទូចសុំឲ្យការពារព្រៃឈើ។
ព្រះរាជក្រឹត្យចុះហត្ថលេខាកាលពីថ្ងៃទី១៩ ខែសីហា បានបង្កើតដែនជម្រកសត្វព្រៃភ្នំតាម៉ៅ និងសួនជម្រើសរុក្ខជាតិ ដែលការពារផ្ទៃដីប្រមាណ ២ពាន់ហិកតា។ ការព្យាយាមដាំដើមឈើឡើងវិញត្រូវបានដឹកនាំដោយអង្គភាពអង្គរក្សរបស់លោកនាយករដ្ឋមន្ត្រី ដោយតំបន់ដែលអស់ព្រៃឈើត្រូវប្រែក្លាយទៅជាសួនដាំដើមឈើឡើងវិញ ឬសួនជម្រើសរុក្ខជាតិ។
លោក Nick Marx នាយកផ្នែកសង្គ្រោះ និងថែទាំសត្វព្រៃ នៃអង្គការសម្ព័ន្ធសត្វព្រៃ បាននិយាយថា នៅសប្តាហ៍នេះ អង្គការកំពុងសង់របងលួសបន្លាកម្ពស់៣ ម៉ែត្រនៅភ្នំតាម៉ៅ ដោយមានការសាងសង់ចាប់ផ្តើមពីជាយភាគនិរតីនៃតំបន់ការពារ និងឆ្ពោះទៅទិសខាងជើង។
លោក Marx បាននិយាយថា អង្គការនេះគ្រោងនឹងសង់របងជុំវិញដែនជម្រកសត្វព្រៃទាំងមូល និងសួនរុក្ខជាតិ ប៉ុន្តែបានជួបការជំទាស់ពីរដ្ឋបាលព្រៃឈើ ដែលបានស្នើសុំឱ្យធ្វើរបងមិនឲ្យព័ទ្ធចូលតំបន់គ្មានព្រៃឈើទេ។
លោក Marx បាននិយាយថា៖ «យើងគិតថា វាមានសារៈសំខាន់ណាស់ក្នុងការធ្វើរបងព័ទ្ធតំបន់ទាំងមូល ហើយយើងមិនចង់បំបែកតំបន់ដែលគេឈូសឆាយអស់ព្រៃចេញពីតំបន់មានព្រៃនោះទេ»។
លោក Marx បានបន្ថែមថា អង្គការសម្ព័ន្ធសត្វព្រៃ ក៏មិនច្បាស់លាស់អំពីព្រំប្រទល់ពិតប្រាកដនៃតំបន់នេះដែរ ដោយសារ កូអរដោណេ UTM ដែលប្រើសម្រាប់កំណត់ព្រំប្រទល់ដីមិនទាន់ត្រូវបានបោះពុម្ពផ្សាយនៅឡើយ។ ប៉ុន្តែពួកគេនៅតែចង់ឲ្យសង់របងហ៊ុមព័ទ្ធជុំវិញជម្រកសត្វព្រៃ និងសួនរុក្ខជាតិទាំងមូល។
លោកសង្ឃឹមថា រដ្ឋបាលព្រៃឈើនឹងផ្តល់ហេតុផលក្នុងការកំណត់ទីតាំងដែលត្រូវសង់របងព័ទ្ធ។ ប្រសិនបើរដ្ឋបាលព្រៃឈើទទូចមិនរាប់បញ្ចូលសួនរុក្ខជាតិនោះ លោកសង្ឃឹមថា ពួកគេនឹងបញ្ចូលវត្តថ្មអន្ទងទៅក្នុងតំបន់ការពារដែរ។
នៅមុនការឈូសឆាយព្រៃឈើ មានឯកសារទាំងឡាយបង្ហាញថា ផ្នែកមួយនៃតំបន់ភ្នំតាម៉ៅ ត្រូវបានគ្រោងអភិវឌ្ឍដោយក្រុមហ៊ុនមួយរបស់ឧកញ៉ា ឃុន សៀ។ លោក វេង សាខុន រដ្ឋមន្ត្រីក្រសួងកសិកម្ម បានប្រាប់ VOD ថា ដីនោះត្រូវបានលក់ទៅឱ្យឧកញ៉ាម្នាក់ទៀត គឺលោក ឡេង ណាវ៉ាត្រា។
ព្រះតេជគុណ កែម ព្រឿន គង់នៅវត្តថ្មអន្ទង មានសង្ឃដីកាថា ព្រះអង្គព្រួយបារម្ភថាតើវត្តនេះនឹងទទួលបានបណ្ណកម្មសិទ្ធិ ឬឯកសារ ដើម្បីកាន់កាប់ដីវត្តដោយស្របច្បាប់ឬយ៉ាងណាទេ។
ព្រះតេជគុណ ព្រឿង បន្តថា៖ «វត្តនេះមានទំហំដីប្រហែល ៥ ហិកតា ប៉ុន្តែអត្មាមិនដឹងថានឹងមានអ្វីកើតឡើងទៀតទេ។ អាត្មាសង្ឃឹមថា អាជ្ញាធរនឹងផ្តល់ប្លង់ដីដល់វត្ត»។
ការឈូសឆាយព្រៃឈើកាលពីខែកក្កដា ឆ្នាំមុន និងខែសីហាកន្លងទៅកើតឡើងជាប់នឹងវត្ត។ ព្រះសង្ឃនៅវត្តនោះមានសង្ឃដីកាកាលពីឆ្នាំមុនថា ព្រះអង្គបានឃើញសត្វព្រៃរត់ចេញពីកន្លែងឈូសឆាយព្រៃ ដោយព្រះតេជគុណព្រឿនមានសង្ឃដីកាថា ពេលនេះគេកម្រឃើញសត្វព្រៃនៅក្នុងតំបន់នេះណាស់។
លោក កែវ អូម៉ាលីស ប្រធានរដ្ឋបាលព្រៃឈើបាននិយាយថា ដោយសារភ្នំតាម៉ៅជារបស់រដ្ឋាភិបាល អ៊ីចឹងវាអាស្រ័យលើមន្ត្រីជាអ្នកសម្រេចថាតើត្រូវសង់របងនៅត្រង់ណា ហើយមិនមែនជាការសម្រេចចិត្តដោយអង្គការសម្ព័ន្ធសត្វព្រៃនោះទេ។
លោក អូម៉ាលីស បាននិយាយសំដៅទៅលើអង្គការសម្ព័ន្ធសត្វព្រៃថា «ប្រាប់ពួកគេទៅថា វាជារបស់រដ្ឋ។ កន្លែងណាដែលយើងសង់ [របង] វានឹងធ្វើទៅបាន វាមិនពាក់ព័ន្ធនឹងអង្គការនោះទេ»។
អ្នកយកព័ត៌មានខេមបូចា បានចុះទៅដល់តំបន់ភ្នំតាម៉ៅក្នុងសប្តាហ៍នេះ ហើយបានឃើញដីដែលឈូសឆាយអស់ព្រៃដ៏ធំល្វឹងល្វើយ។ ដើមឈើតូចៗពីរបីដើមដុះចន្លោះៗគ្នានៅក្នុងសួនដែលមានលក្ខណៈដូចទីវាល ដោយមានកម្មករពីរបីនាក់កាត់ជម្រះស្មៅនៅក្នុងសួន៕
ប្រែសម្រួលពីអត្ថបទភាសាអង់គ្លេស៖ Gov’t Wants to Exclude Phnom Tamao Deforested Area from Fencing Efforts
