សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋរាប់រយនាក់នៅក្បែរតំបន់អង្គរផ្ទុះការតវ៉ាអំឡុងពេលអាជ្ញាធរជាតិអប្សរាចុះរុះរើផ្ទះដោយចោទថា​សាង​សង់ខុសច្បាប់

ពលរដ្ឋជាច្រើននាំគ្នាផ្ទុះការតវ៉ានឹងអាជ្ញាធរជាតិអប្សរាដែលចុះទៅរុះរើផ្ទះរបស់ពួកគាត់ ស្ថិតនៅភូមព្រៃក្មេង ឃុំខ្នាត ស្រុកពួក ខេត្ដសៀមរាប កាលពីថ្ងៃទី២៥ ខែតុលា ឆ្នាំ២០២៣។ (រូបភាពផ្ដល់ឱ្យ)
ពលរដ្ឋជាច្រើននាំគ្នាផ្ទុះការតវ៉ានឹងអាជ្ញាធរជាតិអប្សរាដែលចុះទៅរុះរើផ្ទះរបស់ពួកគាត់ ស្ថិតនៅភូមព្រៃក្មេង ឃុំខ្នាត ស្រុកពួក ខេត្ដសៀមរាប កាលពីថ្ងៃទី២៥ ខែតុលា ឆ្នាំ២០២៣។ (រូបភាពផ្ដល់ឱ្យ)

ពលរដ្ឋរាប់រយនាក់មកពី៧ភូមិនៅក្បែរតំបន់អង្គរ ស្ថិតនៅឃុំខ្នាត ស្រុកពួក និង​សង្កាត់​​ទឹកវិល ក្រុងសៀមរាប ខេត្តសៀមរាប បានផ្ទុះ​ការ​តវ៉ាអំឡុងពេល​អាជ្ញាធរជាតិ​អប្សរា​ចុះរុះរើដោយចោទថា​ពួកគាត់សាងសង់​ខុសច្បាប់ ខណៈ​​ពួកគាត់ព្រួយបារម្ភពីការបណ្ដេញ​ចេញដោយបង្ខំ និងគ្មានទីជម្រក យោងតាមពលរដ្ឋ និងអាជ្ញាធរមូលដ្ឋាន។

ពលរដ្ឋម្នាក់ក្នុងចំណោមពលរដ្ឋរងគ្រោះផ្សេងទៀត លោក ធី ធាង អាយុ៣៦ឆ្នាំ រស់ភូមិ​ព្រៃក្មេង ឃុំខ្នាត ស្រុកពួក ខេត្ដសៀមរាប បានប្រាប់ ខេមបូចា ថា សម្រាប់លោក​ និង​ពលរដ្ឋ​ផ្សេងទៀត គឺជួបបញ្ហាលំបាកច្រើន ពីព្រោះតែខាងអាជ្ញាធរជាតិអប្សរា​តម្រូវឱ្យពលរដ្ឋ​រើ​សំយ៉ាប​ផ្ទះ​ចំនួន២ម៉ែត្រ ដូច្នេះពិបាកក្នុងការទុកដាក់របស់របរ។

លោកបន្ដថា មុននឹងមានការសាងសង់លោកបានជូនដំណឹងទៅអាជ្ញាធរមូលដ្ឋានដែរ ហើយ​អាជ្ញាធរ​បានយល់ព្រម ទើបលោកសាងសង់ ប៉ុន្ដែបែរជាអាជ្ញាធរជាតិអប្សរាចុះមកឱ្យលោក និង​ពលរដ្ឋផ្សេងទៀត​រុះរើចេញ ខណៈអាជ្ញាធរមូលដ្ឋានបែរមិនចេញមុខដោះស្រាយ​ជូន​ប្រជាពលរដ្ឋ​។

លោកបានឱ្យដឹងបន្តថា ក្រោយពីមានការតវ៉ាជាមួយអាជ្ញាធរលោក​ព្រួយ​បារម្ភពីការដាក់ពាក្យ​បណ្ដឹងទៅតុលាការដោយចោទលោកជាមេខ្លោង​លើការ​ប្រឆាំង​នឹង​អាជ្ញាធរ ជាពិសេស​លោក​ខ្លាចបាត់បង់ការងាររបស់លោក។ លោកបានបញ្ជាក់ថា ពលរដ្ឋ​តវ៉ា​មាន៧ភូមិ និងមានគ្នា​ប្រមាណ​៧០០នាក់​បានផ្ទុះការតវ៉ានឹងអាជ្ញាធរជាតិអប្សរា ដែលចុះទៅព្យាយាមរុះរើផ្ទះពួក​គាត់​​កាលពី​ថ្ងៃ​ទី២៥ ខែតុលា ឆ្នាំ២០២៣។

លោក ធាង បានបញ្ជាក់ថា៖ «ខ្ញុំបានជូនដំណឹងទៅអាជ្ញាធរមូលដ្ឋានថា ខ្ញុំតយ៉ាក ហើយ​អាជ្ញាធរ​ក៏ព្រម ខ្ញុំក៏ធ្វើ ស្រាប់តែអាជ្ញាធរជាតិអប្សរាចុះមករុះរើ។ មិនថាខ្ញុំទេបង ពលរដ្ឋផ្សេង​ទៀតក៏ដូចគ្នាគឺគេឱ្យរុះរើទាំងអស់។ ពលរដ្ឋតវ៉ាមាន៧ភូមិ មនុស្ស៧០០នាក់»។ លោកបន្ត​ថា៖ «ខ្ញុំបារម្ភខ្លាចតែគេដាក់ពាក្យបណ្ដឹងទៅតុលាការទេបង បើចឹងមែនខ្ញុំបាត់បង់ការងារ​ហើយ​។​ ខ្ញុំធ្វើការជាមន្ដ្រីឥណទាននៅស្ថាប័នមួយបង»

កាលពីថ្ងៃទី២៥ ខែតុលា ឆ្នាំ២០២៣ កន្លងទៅ ផ្ទះពលរដ្ឋចំនួន៧ភូមិស្ថិតនៅក្នុង​សង្កាត់​ទឹកវិល ក្រុងសៀមរាប និងឃុំខ្នាត ស្រុកពួក ខេត្ដសៀមរាប ត្រូវបានអាជ្ញាធរជាតិអប្សរា ចុះរុះរើ​ផ្ទះ មានដូចជា ភូមិស្វាយ ភូមិប្រឡាយ ភូមិព្រៃចាស់ ភូមិព្រៃក្មេង ភូមិគោកដូង ភូមិព្រៃធ្លក ឃុំខ្នាត និងភូមិគោកស្នួល សង្កាត់ទឹកវិល ដែលមានប្រជាពលរដ្ឋ​រាប់ម៉ឺនគ្រួសារ​រស់នៅ និងបានផ្ទុះការតវ៉ាជាមួយអាជ្ញាធរជាតិអប្សរា។​

យោងតាមការបង្ហោះវីដេអូលើបណ្ដាញសង្គមកាលពីថ្ងៃទី២៥ ខែតុលា មានប្រជាពលរដ្ឋជា​ច្រើន​គ្រួសារ​បាននាំគ្នាផ្ទុះការតវ៉ាជាមួយអជ្ញាធរជាតិអប្សរា និងបណ្ដេញអាជ្ញាធរឱ្យចាកចេញ​ពីភូមិរបស់ពួកគេ។

ហាក់មិនខុសគ្នាទេ លោក ធី សុគន្ធា អាយុ៥៣ឆ្នាំ ជាប្រជាពលរដ្ឋម្នាក់​ក្នុងចំណោម​ពលរដ្ឋ​ដែល​ត្រូវរងគ្រោះពីការបណ្ដេញរបស់អាជ្ញាធរជាតិ​អប្សរា បានលើកឡើងពីការព្រួយបារម្ភ​របស់​ខ្លួនថា សម្រាប់រូបលោក និងពលរដ្ឋផ្សេងទៀត គឺតែងតែព្រួយបារម្ភពីការបណ្ដេញចេញ ជាពិសេសទៅតំបន់ផ្សេងអាចបាត់បង់ការងារ និងការរស់នៅមិនសមរម្យដូចកន្លែងចាស់។

លោកបន្ដថា កន្លងមកពលរដ្ឋដែលព្រមចាកចេញពីតំបន់អង្គរទៅតំបន់រុនតាឯក និង​ពាក់​ស្នែង​កំពុងតែជួបប្រទះបញ្ហាប្រឈមជាច្រើន ដូចជាគ្មានការងារធ្វើ ផ្ទះលិចទឹក និងរស់នៅ​ឆ្ងាយ​ពីកន្លែងរកស៊ី។ លោកឱ្យដឹងទៀតថា ទោះបីជាមានពលរដ្ឋខ្លះបានចាកចេញក៏ដោយ ប៉ុន្ដែការចាកចេញរបស់ពលរដ្ឋគឺមិនបានគោរពសិទ្ធិលំនៅឋាន និងសិទ្ធិមនុស្សទេ។ លោកថា មុននឹងឱ្យពលរដ្ឋរុះរើចេញអាជ្ញាធរគួរតែរៀបចំឱ្យមានកន្លែងរស់នៅសមរម្យ បង្កើតការងារ​ដើម្បី​ឱ្យពលរដ្ឋមានប្រាក់ចំណូលដូចដើម។

លោក សុគន្ធា ថ្លែងថា៖ «ខ្ញុំព្រួយបារម្ភរាល់ថ្ងៃរឿងបណ្ដេញទាំងបង្ខំ​ដោយគ្មាន​ការដោះដូរ​ដែល​សមស្រប។ គ្មានពលរដ្ឋណាមិនចង់ចាកចេញទេបើរដ្ឋត្រូវការ ប៉ុន្ដែការដោះដូរ​វាមិន​ស៊ី​គ្នា។ ខ្ញុំគិតថា បើអាជ្ញាធររៀបចំកន្លែងរស់នៅបានសមរម្យ មានទឹក មានភ្លើង មានការងារ​ធ្វើ​អាចរកប្រាក់ចំណូលដូចដើម រឿងអីពួកខ្ញុំមិនចាកចេញ ជាក់ស្ដែងវាអត់ចឹង បានជាខ្ញុំដេក​ព្រួយបារម្ភ»

លោក ធី សុគន្ធា​ ក៏បានលើកឡើងបន្ថែមថា អាជ្ញាធរជាតិ​អប្សរា មកយកដីពលរដ្ឋគ្រប់គ្រង មិនមែនពលរដ្ឋទៅយកដីអាជ្ញាធរជាតិអប្សរាមកគ្រប់គ្រង​នោះទេ ហើយរាល់ការលើកឡើង​របស់អាជ្ញាធរគឺមិនត្រឹមត្រូវ  និងមិនអាចទទួលយកបាន។ លោកថា លោកនឹងមិនព្រមចាក​ចេញ​នោះទេ ព្រោះលោកមិនរស់នៅដោយខុសច្បាប់ និង​សំណង់មិនរៀបរយទេ គឺលោករស់​នៅ​លើដីដូនតាលោក។

បើតាមការបញ្ជាក់ពីលោក ឡឹក ឡូន មេឃុំខ្នាត​ អាយុ៦៦ឆ្នាំ ថា ពិតជាមានការចុះរុះរើ​របស់​អាជ្ញាធរជាតិអប្សរានៅក្នុងឃុំលោកមែន។ លោកថា មូលហេតុចុះរុះរើដោយសារតែ​ពលរដ្ឋ​លួចសាងសង់សំណង់ដែលអប្សរាហាមឃាត់ ទើបមានការចម្រូងចម្រាស់ ប៉ុន្តែមិនមាន​បញ្ហា​ធំដុំ​កើតឡើងនោះទេ។​ លោកបន្តថា​ ចំណែកអាជ្ញាធរក៏មិនបានរុះរើដែរ​ដោយសារមាន​ពលរដ្ឋ​ច្រើននាក់​មកទប់ស្កាត់។ យ៉ាងណាមិញ លោកបានបញ្ជាក់ថា ក្នុងឃុំរបស់លោកមាន​ភូមិចំនួន១២ ហើយការប៉ះពាល់មានប្រមាណ៨៥%  នៅសល់តែ១៥%​ប៉ុណ្ណោះ​ដែលមិនប៉ះ​ពាល់។ លោកបន្ដថា កន្លងមកពលរដ្ឋតែងតែជូនដំណឹងមកសាលាឃុំមែន តែលោកថា ការសម្រេចលើ​អាជ្ញាធរជាតិអប្សរា។

លោកមេឃុំបន្ថែមថា៖ «បាទ ពិតមែន។ ពលរដ្ឋជិត៧០០នាក់នាំគ្នាមកតវ៉ា។ ខាងអប្សរាគេ​ដក​​ទៅវិញ​ទៅ។ពលរដ្ឋគាត់ជូនដំណឹងមកឃុំមែន ប៉ុន្ដែការសម្រេចគឺខាងអាជ្ញាធរជាតិ​អប្សរា​ទេ ខ្ញុំគ្មានសិទ្ធិទេ គ្រាន់តែដឹងឮប៉ុណ្ណោះ»

ពលរដ្ឋជាច្រើន​នាំគ្នា​ផ្ទុះការតវ៉ា​នឹងអាជ្ញាធរជាតិអប្សរា​ដែលចុះទៅរុះរើផ្ទះ​របស់ពួកគាត់ ស្ថិតនៅភូមព្រៃក្មេង  ឃុំខ្នាត ស្រុកពួក ខេត្ដសៀមរាប  កាលពីថ្ងៃទី២៥  ខែតុលា ឆ្នាំ២០២៣។ (រូបភាពផ្ដល់ឱ្យ)

អ្នកយកព័ត៌មានខេមបូចា មិនសុំការអត្ថាធិប្បាយពីលោក  ស៊ីន ចាន់ថុល អភិបាលស្រុកពួក​បានទេ​កាល​ពីថ្ងៃសុក្រ។

ជុំវិញរឿងចុះរុះរើរបស់អាជ្ញាធរជាតិអប្សរានេះដែរ លោក ឡុង កុសល អ្នកនាំពាក្យ​អាជ្ញាធរ​ជាតិអប្សរា បានបញ្ជាក់ប្រាប់ ខេមបូចា ថា សកម្មភាពរបស់អាជ្ញាធរជាតិអប្សរា​ដែលបានចុះ​ទៅភូមិគោកដូងកាលពីម្សិលម្ង៉ៃ គឺដើម្បីចុះរុះរើសំណង់ខុសច្បាប់ និងមិនមានការអនុញ្ញាត​ពី​អាជ្ញាធរ។ លោកបន្ដថា ការចុះរុះរើរបស់អាជ្ញាធរនេះ ក៏មានការតវ៉ាពីពលរដ្ឋដែរ ប៉ុន្ដែគ្មានការ​ប៉ះទង្គិចណាមួយនោះទេ។ លោកបន្ដទៀតថា​ សម្រាប់ពលរដ្ឋដែលបន្ដសាងសង់​ដោយ​ខុស​ច្បាប់ និងមិនបានសុំច្បាប់ពីអាជ្ញាធរគួរបញ្ឈប់សកម្មភាពទាំងនោះជាបន្ទាន់ រង់ចាំឱ្យមាន​ច្បាប់​ត្រឹមត្រូវសិន។

យ៉ាងណាមិញ អ្នកនាំពាក្យរូបនេះបានលើកឡើងថា លោកទទួលស្គាល់សកម្មភាព​របស់​អាជ្ញាធរ​​ជាតិអប្សរាមួយចំនួននៅមិនទាន់បានល្អនៅឡើយ ហើយលោកថា ខាងលោកនឹង​ព្យាយាម​ដោះស្រាយ និងសហការនឹងពលរដ្ឋឱ្យបានកាន់តែល្អ។

លោកថ្លែងថា៖ «យើងចុះរុះរើតែសំណង់ខុសច្បាប់ទេ។ រឿងបណ្ដេញពលរដ្ឋចេញ គឺមិនមាន​ឡើយ​។ ពលរដ្ឋគាត់ចេញសម្ដែងមតិអាហ្នឹងជារឿងត្រឹមត្រូវ។ ខ្ញុំសុំឱ្យពលរដ្ឋមេត្ដាកុំបន្ដ​សាង​សង់សំណងខុសច្បាប់ទៀតអី។ ខ្ញុំទទួលស្គាល់ថាកន្លែងខ្លះយើងក៏នៅខ្វះខាតដែរ ប៉ុន្ដែ​យើង​នឹងព្យាយាមដោះស្រាយ»

លោកបានបញ្ជាក់ថា សម្រាប់ពលរដ្ឋដែលកំពុងរស់នៅជុំវិញតំបន់អង្គរមានរាប់ម៉ឺនគ្រួសារ ហើយមានពលរដ្ឋខ្លះក៏បានដោះដូរទៅទីតាំងថ្មីរួចហើយ​ តាមការដោះស្រាយរបស់អាជ្ញាធរ។ យ៉ាងណា លោកមិនបានបញ្ជាក់ពីពលរដ្ឋដែលបន្ដសាងសង់សំណង់​ខុសច្បាប់​នៅជុំវិញ​តំបន់​អង្គរបានទេ ដោយលោកថា ច្រើនពេកលោកមិនអាចផ្ដល់ទិន្នន័យជាក់លាក់​មកកាន់ខេមបូចា​បានទេ គ្រាន់តែលោកថា មានរាប់ម៉ឺនគ្រួសារ។ លោកថា សម្រាប់ពលរដ្ឋដែលសាងសង់​ខុស​ច្បាប់ ​ខាងលោកបានជូនដំណឹងយ៉ាងតិច២ដង ដើម្បីឱ្យពលរដ្ឋរុះរើដោយស្មគ្រចិត្ដ មុននឹង​អាជ្ញាធរ​ជាតិ​អប្សរាចុះរុះរើ ប៉ុន្ដែពលរដ្ឋមិនព្រមរុះរើដោយខ្លួនឯង ទើបអាជ្ញាធរត្រូវចុះ​ដោយ​ផ្ទាល់។

លោក កុសល បន្ថែមថា៖ «ខ្ញុំមិនអាចឆ្លើយនឹងសំណួរប្អូនបានទេ គ្រាន់តែដឹងថាច្រើន​គ្រួសារ។ មុននឹង​ចុះ​ យើងជូនដំណឹងពួកគាត់យ៉ាងតិច២ដងទើបយើងទៅ មិនមែនសុខៗ​យើងចុះទៅទេ»

កាលពីពេលកន្លងទៅ អ្នកនាំពាក្យអាជ្ញាធរជាតិអប្សរា​រូបនេះធ្លាប់បានប្រាប់ខេមបូចា ពាក់ព័ន្ធ​នឹង​ការបណ្ដេញពលរដ្ឋនៅជុំវិញតំបន់អង្គរថា លោកសូម​ច្រានចោល​ការលើកឡើងកន្លង​មក​​របស់​​អង្គការលើកលែងទោសអន្តរជាតិដែល​ថា កិច្ច​ប្រឹងប្រែង​តាំង​ទីលំនៅ​ថ្មី​​​នេះ​គឺ​ជា «ការ​បណ្តេញ​​ចេញដោយបង្ខំ» ហើយលោក​មាន​ប្រសាសន៍​ថា ប្រជាជនបានផ្លាស់ប្តូរ​ទីលំនៅ​ដោយ​ស្ម័គ្រចិត្ត។

លោក​មាន​ប្រសាសន៍​ថា៖ «​យើង​បាន​អនុវត្ត​ការងារ​របស់​យើង​ដោយ​រលូន និងគោ​រព​​តាម​គោលការណ៍ [​នៃ​គោលនយោបាយ​របស់​រដ្ឋាភិបាល​] ជា​ពិសេស​ការ​លើក​​កម្ពស់​ជីវភាព​របស់​ប្រជាពលរដ្ឋ​​។ យើងកំពុងធ្វើការយ៉ាងសកម្មលើបញ្ហា [ហេដ្ឋារចនាសម្ព័ន្ធ] ហើយប្រសិនបើ​លោក​ចង់ឃើញ [ទីតាំង​] សូមមកមើលដោយខ្លួនឯង»

លោក លី សំរិទ្ធ អ្នកនាំពាក្យសាលាខេត្ដសៀបរាម បានឱ្យដឹងថា លោកមិនបានដឹងនោះទេ ពាក់ព័ន្ធនឹងការចុះរុះរើរបស់អាជ្ញាធរជាតិអប្សរា ដោយលោកថា លោកបានមកបំពេញការងារ​នៅភ្នំពេញមួយរយៈហើយ ដូច្នេះលោកមិនអាចឆ្លើយនឹងសំណួរខេមបូចាបានទេ។

លោកថា៖ «ខ្ញុំអត់ដឹងទេ ព្រោះខ្ញុំឡើងមកភ្នំពេញពីរបីថ្ងៃហើយ។ ខ្ញុំមិនអាចឆ្លើយបានទេ»

កាល​ពី​ថ្ងៃទី​២២ ខែមីនា ឆ្នាំ២០២២ អង្គការ​យូណេស្កូ​បាន​ស្នើ​ឱ្យ​ក្រសួង​វប្បធម៌ ដែល​គ្រប់​គ្រង​លើ​អាជ្ញាធរ​​ជាតិ​អប្សរាឱ្យ «​ផ្ដល់​ព័ត៌មាន​បន្ថែមលើ​បញ្ហា​ផ្លាស់​ទីលំនៅ​ប្រជា​ពល​រដ្ឋ» នៅ​តំបន់​អង្គរ​។​

អង្គការ​យូណេស្កូ​បន្ថែម​ថា ​ខ្លួន​នឹង «យក​ព័ត៌មាន​ពាក់​ព័ន្ធ​ទាំង​អស់» ដូច​ជា​ «របាយការណ៍​ពី​រដ្ឋាភិបាល» និង​ «ព័ត៌មាន​របស់​ភាគីទីបី» ដើម្បី​ផ្ដល់​ជូន​ទៅ​កាន់​គណៈកម្មាធិការ​បេតិកភ័ណ្ឌ​ពិភព​លោក ដែល​គណៈកម្មាធិការ​នេះ​មាន​តំណាង​មកពី​រប្រទេស​ចំនួន​២១ ហើយ​និង​មាន​ការ​រៀប​ចំ​កិច្ច​ប្រជុំ​មួយ​នៅ​ខែ​កញ្ញា ខាង​មុខ​ដើម្បី​ពិនិត្យ វាយ​តម្លៃ​លើ​ស្ថាន​ភាព​ជាក់​ស្ដែង​នៅ​ឧទ្យានអង្គរ​។​

​អ្នកនាំពាក្យ​អង្គការ​យូណេស្កូ​ សរសេរ​បន្ថែម​ថា៖​ «នៅ​ក្រោម​យន្តការ​អនុសញ្ញា​អង្គការ​យូណេស្កូ​​ឆ្នាំ​១៩៧២ ​រដ្ឋជា​សមាជិក​ទាំងអស់​នៃគណៈកម្មាធិការ​នឹង​សិក្សា​ពីស្ថានភាព រួច​នឹង​ធ្វើ​ការ​សម្រេច​ចិត្ត​ដ៏​ត្រឹម​ត្រូវ​មួយ​»។​

Joe Freeman នាយករង​ស្ដី​ទី​ប្រចាំ​តំបន់​របស់​អង្គការ​លើក​លែង​ទោស​អន្តរជាតិ​សម្រាប់​ផ្នែក​ទំនាក់ទំនង បង្ហាញ​កង្វល់​របស់​ខ្លួន​តាម​រយៈ​សារអេឡិចត្រូនិកធ្លាប់បាន​ផ្ញើ​មក​កាន់​ខេមបូចា​កន្លងទៅថា ការ​ផ្លាស់ទី​លំនៅ​ជា​លើក​ទី​ពីរ​នេះ​អាច​នាំ​ឱ្យ​មានប្រជា​ពល​រដ្ឋ​កាន់​តែច្រើនដែល​មាន​បញ្ហា​ត្រូវ​ដោះ​ស្រាយ​ដូច​ប្រជា​ពល​រដ្ឋ​នៅ​តំបន់​រុន​តាំឯក​ដែរ​។​

លោកបន្ត​ថា៖ «​ប្រជា​ពល​រដ្ឋ​ជា​ច្រើន​កំពុង​ជាប់​បំណុល ពីព្រោះ​ពួកគេ​មិន​មានការ​ងារធ្វើ ឬ​ផ្ទះ​ដែល​មិន​ទាន់​សាងសង់​រួច​ពេល​ពួកគេ​ទៅ​ដល់​កន្លែង​ថ្មី​នោះ»។ លោក​បន្ថែមថា៖ «​បើ​តាម​ការ​ស្រាវ​ជ្រាវ​របស់​យើងបង្ហាញ​ថា​រដ្ឋាភិបាល​មិន​បាន​មាន​វិធានការ​ត្រឹម​ត្រូវ​ក្នុង​ការ​ការពារ​ពល​រដ្ឋ​ពី​ការ​ជម្លៀស​ដោយ​បង្ខំ​ ស្រប​ទៅ​តាម​បទដ្ឋាន​សិទ្ធិ​មនុស្ស​អន្តរជាតិ​នោះទេ រួម​មាន​ដូចជា​ខ្វះ​ការ​ជូន​ដំណឹង​ជាមុន ហើយ​នឹង​ការ​ប្រឹក្សា​ត្រឹម​ត្រូវ​ជាមួយ​នឹង​អ្នក​រង​ផល​ប៉ះពាល់​ពីការ​បណ្ដេញ​​ចេញ និង​នីតិវិធី​ដោះស្រាយ​បញ្ហា​ជា​ដើម​»។​​

លោក ចាប ចម្រើន មន្ត្រី​សម្រប​សម្រួល​របស់​សមាគមសិទ្ធិ​មនុស្ស​អាដ​ហុក​ប្រចាំ​ខេត្ត​សៀម​រៀប​រាប់ថា លោកមិនទាន់បានចុះស៊ើបអង្កេតលើករណីអាជ្ញាធរជាតិអប្សរា​ចុះរុះរើផ្ទះពលរដ្ឋ​នៅភូមិគោកដូង សង្កាត់ទឹកវិល ក្រុងសៀមរាប នៅឡើយទេ ដោយលោកថា ចាំមានការ​ដាក់​ពាក្យ​បណ្ដឹង​ពីពលរដ្ឋមកកាន់សមាគមលោកសិន ទើបលោកអាចចុះទៅបាន។

លោកថ្លែងថា៖ «ខ្ញុំអត់បានចុះទេ ខ្ញុំរវល់ ណាមួយពលរដ្ឋរងគ្រោះមិនទាន់បាន​ដាក់ពាក្យ​បណ្ដឹង​ទេ ដូច្នេះយើងអត់ទាន់បានទៅទេ»

ចំណែកឯលោក អំ សំអាត នាយកចាត់ការទូទៅនៃអង្គការលីកាដូ បានលើកឡើងថា ជាទូទៅ​ពលរដ្ឋតែងតែរងគ្រោះរឿងដីធ្លីរបស់ខ្លួន មិនថា តំបន់អង្គរកំពុងតែមានជម្លោះនឹងទេ គឺស្ទើតែ​គ្រប់​កន្លែងទៅហើយ។ យ៉ាងណាលោកបន្ដថា មុននឹងមានការចុះរុះរើអាជ្ញាធរគួរតែមាន​ដំណោះ​ស្រាយសមស្របជាមុនសិន ដើម្បីឱ្យពលរដ្ឋអាចទទួលយកបាន ប៉ុន្ដែជាក់ស្ដែង​អាជ្ញាធរ​មិនបានយកច្បាប់ដែលមានចែងមកប្រើប្រាស់ទេ គឺថាសឹងតែគ្រប់ពេលចង់​ធ្វើអ្វីមិន​ព្យាយាមស្វែងរកគោលនយោបាយឈ្នះៗ។

លោកបន្តថា លោកមានការព្រួយបារម្ភខ្លាចមានអំពើហិង្សាកើតឡើងរហូតមានរបួសសងខាង វាមិនចំណេញអីទេ។ លោកបានសង្កត់ធ្ងន់ថា សម្រាប់អាជ្ញាធរអប្សរា​គួរតែសិក្សាឱ្យបាន​ច្បាស់​លាស់ និងពន្យល់ដល់ពលរដ្ឋថាអ្វីអាចធ្វើបាន អ្វីមិនអាចធ្វើបាន ហើយតំបន់កំពុង​មាន​ជម្លោះមិនមែនពួកគាត់ទើបតែរស់នៅទេគឺយូរមកហើយ។

លោកបានបន្ថែមថា៖ «ខ្ញុំគិតថាវាជាទម្លាប់ទៅហើយ រឿងពេលមានបញ្ហាតែងមាន​ការប៉ះ​ទង្គិច​គ្នា​កើតឡើង។គួរតែស្វែងមធ្យោបាយក្នុងការជជែកណាមួយ កុំឱ្យមាន​អំពើហិង្សា។ ការសិក្សាឱ្យបានច្បាស់គឺជារឿងសំខាន់ បើមិនអឹចឹងទេអាជ្ញាធរចេះតែដើរចង្អុលថា​នេះ​ជាដីរបស់អប្សរា ទាំងពលរដ្ឋមិនបានដឹង បញ្ហានៅតែបន្ដ»

គិតចាប់តាំងពីខែមីនា ឆ្នាំ២០២២ មកដល់ពេលនេះ មានពលរដ្ឋជាច្រើន​គ្រួសាររស់នៅ​ជុំវិញ​តំបន់​អង្គរត្រូវបានអាជ្ញាធរជាតិអប្សរា តែងតែចុះរុះរើផ្ទះរបស់ពួកគាត់ ដោយអះអាងថា ពួក​គាត់​​រស់នៅលើដីរបស់អាជ្ញាធរជាតិអប្សរាដែលជាតំបន់ត្រូវហាមឃាត់ ខណៈពលរដ្ឋ​បាន​លើកឡើងថា តំបន់ដែលពួកគាត់រស់នៅគឺច្រើនជំនាន់មកហើយ ដូច្នេះពួកគាត់​មិនព្រម​ចាក​ចេញនោះទេ ដរាបណាខាងអាជ្ញាធរមិនព្រមរៀបចំទីតាំងឱ្យបានល្អប្រសើរដូចកន្លែងចាស់។ ហើយមានពលរដ្ឋប្រហែល១ម៉ឺនគ្រួសារដែលបានបណ្ដេញចេញដោយបង្ខំ នោះបើយោង​តាម​​របាយការណ៍​របស់អង្គការលើកលែងទោសអន្តរជាតិនៅថ្ងៃទី១០ ខែកញ្ញា ឆ្នាំ២០២២ កន្លង​ទៅស្នើគណៈកម្មាធិការបេតិកភណ្ឌពិភពលោក។

សេចក្ដីព្រៀងនៃសេចក្ដីសម្រេចសម្រាប់តំបន់​អង្គររួមមានសំណើឲ្យ​រដ្ឋាភិបាលកម្ពុជា​ផ្តល់​ព័ត៌មាន​​បច្ចុប្បន្នភាពត្រឹមថ្ងៃទី១ ខែធ្នូ ឆ្នាំ២០២៤។ ឯកសារនេះក៏ស្នើសុំឱ្យរដ្ឋាភិបាលបន្តគ្រប់​គ្រង​តំបន់​​នោះ​ និង«បង្កើន​ការយល់ដឹងអំពីបទប្បញ្ញត្តិកំណត់តំបន់» ដល់​ប្រជាពលរដ្ឋ​ក្នុង​មូលដ្ឋាន​ទាំងអស់ ដោយគិតគូរដល់​សិទ្ធិ​​របស់សហគមន៍មូលដ្ឋាន និងប្រជាពលរដ្ឋ​ដែល​រង​ផល​ប៉ះពាល់ដោយការផ្លាស់ទីលំនៅនេះ​។ របាយការណ៍​នោះដែរបញ្ជាក់​​ថា ប្រជាពលរដ្ឋ​ចំនួន៩០០០គ្រួសារ​ត្រូវ​បាន​ផ្លាស់​ប្តូរ​ទីលំនៅ​ទៅ​តំបន់​រុនតាឯក និង​ទីតាំង​ផ្លាស់​ទី​លំនៅ​ទីពីរគឺស្ថិត​​នៅឃុំ​ពាក់​ស្នែង​​៕

359 views

ព័ត៌មានថ្មីៗ

អត្ថបទពេញនិយម