សង្គមស៊ីវិល បង្ខំចិត្តប្រារព្ធទិវាសិទ្ធិមនុស្ស១០ធ្នូ តាមប្រព័ន្ធអនឡាញ

អ្នកចូលរួមថ្ងៃទិវាសិទ្ធិមុស្សកាលពីខែធ្នូ ឆ្នាំ២០១៩ ខណៈឆ្នាំនេះកម្មវិធីត្រូវពន្យាពេលដោយសារវិបត្តិកូវីដ១៩ រាលដាលក្នុងសហគមន៍ក្នុងរាជធានីភ្នំពេញ។បញ្ញា ឆព័ណ្ណ
អ្នកចូលរួមថ្ងៃទិវាសិទ្ធិមុស្សកាលពីខែធ្នូ ឆ្នាំ២០១៩ ខណៈឆ្នាំនេះកម្មវិធីត្រូវពន្យាពេលដោយសារវិបត្តិកូវីដ១៩ រាលដាលក្នុងសហគមន៍ក្នុងរាជធានីភ្នំពេញ។បញ្ញា ឆព័ណ្ណ

ក្រុម​​សង្គម​ស៊ីវិល ​និង​អង្គការ​សិទ្ធិមនុស្ស​ បាន​ដឹង​តាំង​ពី​ឆ្នាំ​២០១៩មក​ថា​ វាជា​ពេល​វេលា​ចុង​ក្រោយ​ដែល​ថ្ងៃ​សិទ្ធិ​មនុស្ស​អន្តរ​ជាតិ​មួយ​នេះត្រូវ​កំណត់​​ថា​ជា​ថ្ងៃ​ឈប់​សម្រាក បន្ទាប់​ពី​រដ្ឋា​ភិបាល​បាន​កាត់​ថ្ងៃ​ឈប់​សម្រាក​បុណ្យ​ផ្សេងៗចំនួន​ប្រាំ​ថ្ងៃ ដើម្បី​បង្កើន​ចំនួន​ថ្ងៃ​ធ្វើ​ការ​ប្រ​ចាំ​ឆ្នាំ។​

កម្ពុជា​ប្រារព្ធទិវា​ថ្ងៃសិទ្ធិ​មនុស្ស​១០​ធ្នូ មិន​ត្រឹម​តែរំឭក​ដល់​សិទ្ធិមនុស្ស​ជា​អន្តរ​ជាតិ​នោះទេ តែ​ក៏​ដើម្បី​ប្រ​ជា​ជន​កម្ពុជា​បាន​សម្តែង​មតិលើ​សិទ្ធិ​ និង​សេរីភាព​ដែល​មាន​ចែង​ក្នុង​រដ្ឋធម្មនុញ្ញ​ផង​ដែរ​។​ ​

​បន្ទាប់ពី​មាន​ការ​ប្រារព្ធ​ទិវានេះ​ដោយ​ស្ងាត់​ស្ងៀម​ក្នុង​ឆ្នាំ​២០១៩ ការ​រាល​ដាល​វីរុស​កូវីដ​១៩ នៅ​ឆ្នាំនេះ​ក៏​នាំឲ្យ​កម្មវិធី​ប្រារព្ធ​ទិវា​សិទ្ធិ​មនុស្ស​១០​ធ្នូ ​មិន​អាច​ប្រព្រឹត្ត​ទៅ​បាន​ដែរ។ ជា​ធម្មតា​នៅ​ថ្ងៃ​នេះ មាន​ការ​ដើរដង្ហែរ​ក្បួន​ដោយ​ភាព​ចម្រុះពណ៌ និង​កម្មវិធីផ្សេង​ៗ​ពេញ​ផ្ទៃ​ប្រទេស តែ​នៅ​ឆ្នាំនេះ​នឹង​ជំនួស​មក​វិញ​ដោយ​រៀប​ចំតាម​បណ្ដាញ​សង្គម​ ក្នុងន័យ​លើក​កម្ពស់សិទ្ធិម​នុស្ស​។​

រដ្ឋបាល​រាជធានី​ភ្នំពេញ​ កាលពី​សប្ដាហ៍​មុន​បាន​បដិសេធ​សំណើ​​អង្គការ​សង្គម​ស៊ីវិល​ចំនួន​៥០ ដែលបាន​ស្នើ​សុំ​រៀបចំព្រឹត្តិកាណ៍នេះ​នៅ​ទីលាន​ប្រជាធិបតេយ្យ​ក្នុង​ខណ្ឌ​ឫស្សី​កែវ ដោយ​បាន​ស្នើ​ឲ្យ​ក្រុម​អង្គការ​សង្គម​ស៊ីវិល​ពិចារ​ណា​ពន្យា​ពេល​កម្មវិធី​ទៅ​ថ្ងៃ​ខាង​មុខ​។​​

រាជធានី​ភ្នំពេញ​នៅពេល​នេះ​កំពុង​មាន​ការ​ឆ្លង​កូវីដ​១៩​ក្នុង​សហគមន៍​លើ​ដំបូង ដែល​មាន​ចំនួន​អ្នក​ឆ្លង​​៣៨​នាក់គិតត្រឹមថ្ងៃទី៩​ ខែធ្នូ ខណៈ​មាន​សេចក្ដី​រាយការណ៍​ថា​មនុស្ស​រាប់ពាន់​នាក់​ត្រូវបានធ្វើ​តេស្ត។ រដ្ឋាភិបាល​បាន​សម្រេច​ដាក់​បំរាម​មិន​ឲ្យ​មាន​ការ​ប្រមូល​ផ្ដុំ​លើសពី​២០​នាក់ ផ្អាកបណ្តោះអាសន្ន​ទីស្តីការ​ក្រសួង​មហាផ្ទៃ និង​បន្តចាត់​វិធាការ​បន្ទាន់​​គ្រប់គ្រង​គ្រង​ស្ថានការណ៍​រាល​ដាល​នេះ​។​

លោក សឹង សែនករុណា មន្ត្រី​ស៊ើបអង្កត​ជាន់​ខ្ពស់​អង្គការសិទ្ធិមនុស្ស​អាដហុក មាន​ប្រ​សាសន៍ បើ​សិនជា​ក្នុង​ស្ថាន​ភាព​ធម្មតា ការ​ហាម​ឃាត់​មិន​ឲ្យ​មាន​ការ​ជួបជុំ​ដោយ​សន្តិវិធី ជា​ការ​រំលោភ​សិទ្ធិ​មនុស្ស។ ប៉ុន្តែ​ លោក​ថា ក្រុម​អង្គការ​សង្គម​ស៊ីវិល​បាន​ឯកភាព លើក​ការ​ប្រារព្ធ​ពិធីនេះ​តាម​អនឡាញ​វិញ និង​នៅពេល​ក្រោយ​។​

លោក​មានប្រសាសន៍ថា៖ ​«​ថ្វី​ដ្បិត​តែ​​មានការពន្យា​ពេល តែ​យើង​មិន​បាន​បញ្ឈប់​សកម្មភាព​ប្រារព្ធ​ថ្ងៃសិទ្ធិ​មនុស្ស​ទេ យើង​នឹង​ធ្វើ​វាតាម​អន​ឡាញ​វិញ ហើយ​បញ្ជូន​សារ​​តាម​រយៈ​ហ្វេស​ប៊ុក​»

លោក​ឲ្យ​ដឹង​ទៀតថា មានការ​រឹត​បន្តឹង​លើ​អង្គការ​មិន​មែន​រដ្ឋា​ភិបាល​នៅ​ថ្ងៃ​ប្រារព្ធ​ទិវា​នេះ ទាំងនៅ​ភ្នំពេញ និង​នៅ​តាម​បណ្ដាខេត្ត តាំងពី​មុន​មាន​ញ្ហា​វិបត្តិ​កូវីដ​១៩ ទៅ​ទៀត​។

លោក​ ម៉េត មាសភក្ដី អ្នកនាំពាក្យ​រដ្ឋបាលរាជធានីភ្នំពេញ មាន​ប្រ​សាសន៍ថា សាលារាជធានី​អាច​នឹង​ពិចារណាឡើង​វិញ​លើ​បំរាម​នៃការ​ជួបជុំ​នេះ នៅពេល​ដែល​រដ្ឋាភិបាល​អាច​គ្រប់គ្រង​ស្ថានភាព​ឆ្លង​ក្នុង​សហគមន៍​នេះ​បានប្រ​សើរ​។​

លោក​បន្ថែមថា៖ «​យើង​មិនអនុញ្ញាត​ឲ្យ​មាន​ការ​រៀបចំព្រឹត្តិការណ៍​ណាមួយ​ទេ​ក្នុង​កាលៈទេសៈនេះ ហើយពេល​ណា​ស្ថានភាពបាន​ប្រសើរ យើង​នឹង​ពិចារណាឡើងវិញ»។​

លោក ជិន ម៉ាលីន អនុ​ប្រធាន​គណៈកម្មាធិការ​សិទ្ធិ​មនុស្ស​កម្ពុជា ដាក់ជាសំណួរ​ទៅ​នឹង​ចេតនា​របស់​អង្គការ​សង្គម​ស៊ីវិល​ និង​ថា​ឬ​​អ្នក​ទាំង​នោះចង់​បង្កើន​ការ​ចម្លង​វីរុស​កូវីដ​១៩ ដោ​យ​មាន​ការ​ប្រ​មូល​ផ្ដុំ​ទ្រង់ទ្រាយ​ធំ។​​

លោក​មាន​ប្រ​សាសន៍ថា៖ «​ពួកគាត់ទាម​ទារ​​មួយ​ថ្ងៃ​ធ្វើ​ការ​ជួប​ជុំ។ តើនេះជា​ការ​ការ​ពារ​ជីវិត​ពល​រដ្ឋ ដែល​អាច​ប្រ​ឈម​នឹង​ការ​ឆ្លង​វីរុស​កូវដ១៩ ឬ​អត់?»

បើ​តាម​លោក ជិន ម៉ាលីន រដ្ឋាភិបាល និង​គណៈកម្មាធិការ​សិទ្ធិមនុស្ស​កម្ពុជា​នឹង​មិន​មាន​ការ​រៀបចំ​​កម្មវិធី​នៅ​ថ្ងៃ១០ធ្នូ នោះទេ តែ​ថា​នឹង​ចេញ​ផ្សាយ​​ឯកសារ​សិទ្ធ​មនុស្ស​ទៅ​កាន់​ពល​រដ្ឋ​»។​

គណៈកម្មាធិការ​សិទ្ធិមនុស្ស​កម្ពុជា​បាន​ចេញ​ផ្សាយ​វីដេអូ​មួយ​ ផ្សាយ​លើ​សារព័ត៌មាន​អនឡាញ​ Fresh News និយាយ​រៀប​រាប់​ពី​លោក​នាយក​រដ្ឋមន្ត្រី​ហ៊ុន សែន ដែល​បាន​ធ្វើ​ឲ្យ​ប្រ​ជា​ពល​រដ្ឋ​កម្ពុជា​ទទួល​បានសិទ្ធិ​ដូច​សព្វថ្ងៃ​តាម​រយៈ​នយោបាយ «ឈ្នះ ឈ្នះ»។ លោក​នាយក​រដ្ឋ​មន្ត្រី​ ហ៊ុន សែន បាន​រងការ​ចោទ​ប្រ​កាន់​ថា​បាន​រំលោភសិទ្ធិមនុស្ស​នៅ​ក្នុង​ប្រទេស រួមមានការ​រឹបអូស​ដីធ្លី បំផ្លាញ​បរិស្ថាន​ ចាប់​ខ្លូនអ្នក​រិះគន់ និង​ក្រុម​ប្រ​ឆាំង។​

អភិបាល​ខេត្ត​បន្ទាយ​មានជ័យ​បាន​ប្រាប់ទៅអង្គការ និង​សមាគម​ចំនួន​បី​ថា​ពួកគេ​មិន​អាច​រៀបចំ​កម្មវិធី​បានទេ ដោយ​ខ្លាច​មាន​អ្នក​ឆ្លង​ដូវីដ​១៩។​

អភិបាល​ខេត្តលោក អ៊ុំ រាត្រី មាន​ប្រសាសន៍ថា៖ «​យើង​មិន​អនុញ្ញាត​ឲ្យ​ពួកគេ​រៀប​ចំកម្មវិធីទេ ពួកគេ​ធ្វើការ​ជួបជុំមិន​ត្រឹមត្រូវដោយ​មាន​មនុស្ស​ប្រហែល​ពី​៣០០​ទៅ​៤០០​នាក់ ចំពេល​ដែល​យើង​កំពុង​ប្រឈម​នឹង​ការ​រាលដាល​វីរុស​កូវីដ​១៩​»​។​

លោក​ មឿន តុលា នាយកប្រតិបត្តិ​អង្គការ​សង់ត្រាល់ និង​ជា​អ្នក​រៀបចំ​កម្មវិធី​ផង បាន​និយាយថា​ប្រ​ទេស​មួយចំនួន រួ​ម​ទាំង​កម្ពុជា​ផង បាន​យក​វិបត្តិ​កូវីដ​១៩ រំលោភ​សិទ្ធិ​មនុស្ស​បន្ថែម​ទៀត។​ លោក​បាន​លើក​ពី​​ការ​រឹត​ត្បិត​​លើ​ការ​ប្រ​មូល​ផ្ដុំ​សម្រាប់តែ​​ ខេត្ត​សៀម​រាប និង​ភ្នំពេញ​។

លោក​បន្ថែម​ថា៖​«​សម្រាប់​ខ្ញុំ ខ្ញុំ​មើល​ឃើញ​ថា​រដ្ឋាភិបាល​ខ្លះ រួមទាំង​កម្ពុជា​ដែរ បាន​យក​បញ្ហា​កូវីដ​១៩ ជាលេស​ធ្វើ​ឲ្យ​ធ្លាក់​ចុះ​ផ្នែក​សិទ្ធិ​មនុស្ស»។​

លោក​​សង្ឃឹម​ថា​អាជ្ញាធរ​ថ្នាក់​ក្រោម​ជាតិ​នឹង​មានការ​យោគ​យល់ និង​អនុញ្ញាត​ឲ្យ​ក្រុម​សង្គម​ស៊ីវិល​រៀបចំកម្មវិធី​បាន​នៅ​កន្លែង​ណា​ដែល​មិន​មាន​ហានិភ័យ​ខ្ពស់​​នៃ​ការ​រាល​ដាល​កូវីដ១៩​។​​

នាយិកា​មជ្ឈ​មណ្ឌល​សិទ្ធិមនុស្ស​កម្ពុជា លោកស្រី ចក់ សុភាព មាន​ប្រ​សាសន៍​ថា​​ រដ្ឋាភិបាល​កម្ពុជា​បាន​បង្កើន​ការ​បង្ក្រាប​លើ​សិទ្ធិ​សម្ដែង​មតិ ការ​ជួបជុំដោយ​សន្តិវិធី និង​បន្ត​ចាប់​ខ្លួន​អ្នក​ការពារ​សិទ្ធិ​មនុស្ស អ្នក​សារព័ត៌មាន និង​សកម្មជន​នយោបាយ​។

លោកស្រី​មានប្រសាសន៍ថា៖ «​រដ្ឋាភិបាល​ត្រូវ​តែ​ធានាថា​បញ្ហា​កូវីដ១៩​ មិន​ត្រូវ​បាន​ប្រើ​ជា​ឧបករណ៍​ដាក់​សម្ពាធ​លើ​ការ​ប្រារព្ធ​ទិវា​សិទ្ធិមនុស្ស»

ប្រែសម្រួលពីអត្ថបទភាសាអង់គ្លេស៖ CamboJA News

52 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »