សាលាដំបូងខេត្ដកំពង់ឆ្នាំងនៅថ្ងៃទី៦ ខែកក្កដានេះបានផ្ដន្ទាទោសលោក រាជ សីម៉ា សកម្មជនតវ៉ាដីធ្លីសហគមន៍ឡពាងឱ្យជាប់ពន្ធនាគារ២ឆ្នាំពាក់ព័ន្ធនឹងបទ ប្រើហិង្សាដោយចេតនាលើពលរដ្ឋម្នាក់ស្ថិតក្នុងឃុំតាជេស ស្រុកកំពង់ត្រឡាច កាលពីឆ្នាំ២០២១។
លោក ហុង គឹមហាក់ អ្នកនាំពាក្យនៃសាលាដំបូងខេត្ដកំពង់ឆ្នាំង បានមានប្រសាសន៍ថា សាលដំបូងខេត្តកំពង់ឆ្នាំងបានផ្ដន្ទាទោសលោក រាជ សីម៉ា សកម្មជនតវ៉ាដីធ្លីសហគមន៍ឡពាងឱ្យជាប់ពន្ធនាគារ២ឆ្នាំនិងពិន័យជាប្រាក់៤លានរៀល ពាក់ព័ន្ធនឹងបទប្រើហិង្សាដោយចេតនាលើពលរដ្ឋម្នាក់ស្ថិតក្នុងឃុំតាជេស ស្រុកកំពង់ត្រឡាច ក្នុងខែវិច្ឆិកា ឆ្នាំ២០២១។
លោក គឹមហាក់ថ្លែងថា៖ «យើង[តុលាការ]បានផ្ដន្ទាទោសគាត់ឱ្យជាប់ពន្ធនាគារ២ឆ្នាំនិងពិន័យជាប្រាក់៤លានរៀល»។
បើតាមលោកស្រី ស៊ឹម សោភា មេធាវីការពារក្ដីឱ្យលោក រាជ សីម៉ា បានឱ្យដឹងថា សេចក្តីសម្រេចរបស់តុលាការខេត្តកំពង់ឆ្នាំងនេះ គឺវាអយុត្តិធម៌សម្រាប់កូនក្ដីរបស់លោកស្រីណាស់ ហើយលោកស្រីនឹងជួបពិភាក្សាជាមួយកូនក្ដីដើម្បីបន្ដនីតិវិធីប្ដឹងទៅសាលាឧទ្ធរណ៍ដើម្បីស្វែងរកយុត្តិធម៌ជូនលោក រាជ ស៊ីម៉ានិងគ្រួសារ។
លោកស្រីបានបញ្ជាក់ថា លោកស្រីនឹងដាក់ពាក្យបណ្ដឹងទៅសាលាឧទ្ធរណ៍ល្ងាចថ្ងៃពុធហើយការដាក់ពាក្យបណ្ដឹងឧទ្ធរណ៍នេះគឺមាន២ ទី១ស្នើសុំឱ្យនៅក្រៅឃុំ និងទី២ស្នើសុំឱ្យសាលាឧទ្ធរណ៍កាត់រឿងអង្គសេចក្ដីទាំងមូល។
លោកស្រីបន្ថែមថា៖ «ល្ងាចនេះខ្ញុំនឹងដាក់ពាក្យបណ្ដឹងឧទ្ធរណ៍ហ្នឹងហើយ ដើម្បីបន្ដនីតិវិធីឱ្យកូនក្ដីទទួលបានយុត្តិធម៌នៅសាលាឧទ្ធរណ៍»។
អ្នកស្រី ណាក់ កេន អាយុ៣៧ឆ្នាំ ត្រូវជាប្រពន្ធរបស់លោក រាជ ស៊ីម៉ា រស់នៅឃុំតាជេស ស្រុកកំពង់ត្រាច បាននិយាយថា ការក្ដីរបស់តុលាការខេត្តកំពង់ឆ្នាំងឱ្យប្ដីអ្នកស្រីជាប់ពន្ធនាគារ២ឆ្នាំនិងពិន័យជាប្រាក់៤លានរៀល វាជារឿងអយុត្តិធម៌ណាស់សម្រាប់ប្ដីនិងខ្លួនអ្នកស្រី ព្រោះប្ដីអ្នកស្រីមិនប្រព្រឹត្តដូចការចោទរបស់តុលាការទេ។
អ្នកស្រី កេន បន្តថា ជាពិសេសការពិន័យជាប្រាក់គឺអ្នកស្រីមិនមានលទ្ធភាពដូចការបង្គាប់របស់តុលាការនោះទេ បើរាល់ថ្ងៃជីវភាពកំពុងតែខ្វះខាត ណាមួយប្ដីត្រូវជាប់គុក ហើយខ្លួនអ្នកស្រីជាស្រីទៀតតើអាចទៅរកចំណូលឯណាបានសម្រាប់ការបង់ពិន័យនេះ។
អ្នកស្រី កេន ប្រាប់ថា៖ «ខ្ញុំពិបាកនិយាយ វាអួលដើមកគ្រាន់តែលឺថាកាត់ប្ដីខ្ញុំជាប់ទោស២ឆ្នាំ ខ្ញុំវាពិបាកចិត្តខ្លាំង ពីព្រោះអីខ្ញុំត្រូវជំពាក់រដ្ឋផង អីផង ហើយសង្ឃឹមថាបានប្ដីឆាប់ចេញ បានជួយរកលុយបង់រដ្ឋបង់អី ដល់ពេលកាត់ជាប់រយៈពេល២ឆ្នាំហើយពិន័យជាប្រាក់ចឹងទៀត ខ្ញុំលឺចឹងខ្ញុំរន្ធត់ ខ្ញុំអស់សង្ឃឹមក្នុងចិត្ត»។
អ្នកស្រីបញ្ជាក់ទៀតថា អ្នកស្រីនឹងឱ្យមេធាវីប្តឹងសាលាឧទ្ធរណ៍ក្រែងអាចឱ្យប្ដីអ្នកស្រីឆាប់បានចេញមកក្រៅវិញហើយអ្នកស្រីក៏បានអំពាវនាវដល់រាជរដ្ឋាភិបាលមេត្តាចុះស៊ើបអង្កេតតុលាការខេត្តកំពង់ឆ្នាំង ដោយអ្នកស្រីអះអាងថាប្ដីអ្នកស្រីគ្មានទោសទេ ប៉ុន្ដែត្រូវបានតុលាការខេត្តកំពង់ឆ្នាំងសម្រេចឱ្យជាប់ទោស អ្នកស្រីថាតុលាការវាអយុត្តិធម៌ពេក។
អ្នកស្រីបានសង្កត់ធ្ងន់ថា៖ «តុលាការវាអយុត្តិធម៌ពេក ខ្ញុំសុំអំពាវនាវដល់លោកនាយករដ្ឋមន្ដ្រី ហ៊ុន សែន ជួយធ្វើអន្ដរាគមន៍ឱ្យឆាប់បានប្ដីខ្ញុំចេញពីពន្ធនាគារវិញផង»។
ចំណែកឯអ្នកស្រី អ៊ុំ សុភី ប្រធាសហគមន៍ដីធ្លីឡពាង បានចាត់ទុកថា ការកាត់ក្ដីរបស់តុលាការនេះវាអយុត្តិធម៌ណាស់ ពីព្រោះដើមបណ្ដឹងបានដកពាក្យបណ្ដឹងតាំងពីយូរមកហើយ ហេតុអ្វីបានជាតុលាការមិនព្រមដោះលែងលោក រាជ ស៊ីម៉ា ឱ្យមានសេរីភាព បែរជានៅតែបន្ដនីតិវិធីនិងសម្រេចផ្ដន្ទាទោសរូបលោកឱ្យជាប់ពន្ធនាគារ២ឆ្នាំនិងពិន័យជាប្រាក់៤លានរៀលថែមទៀតទៅវិញ។
ប្រធានសហគមន៍រូបនេះបន្ដថា៖ «ខ្ញុំយល់ឃើញថាការសម្រេចរបស់តុលាការបែរនេះ វាជា រឿងអយុត្តិធម៌សម្រាប់លោក[រាជ សីម៉ា]និងក្រុមគ្រួសាររបស់លោកណាស់ និយាយរួមទៅគាត់[តុលាការ]មានចេតនាធ្វើឱ្យពួកខ្ញុំហ្នឹងលំបាកហ្មង ពីព្រោះសូម្បីតែកាត់ក្ដីហើយត្រូវប្រកាសសាលក្រមពេលពួកខ្ញុំមកស្ដាប់បែរជាលើកពេលពន្យារហូតដល់១ខែរហូតដល់ថ្ងៃនេះ ដល់ពេលចុងក្រោយចេញសាលក្រមបែរនេះវិញ»។
ចំណែកលោក សំ ចាន់គា មន្ត្រីសម្របសម្រួលអង្គការអាដហុកប្រចាំខេត្តកំពង់ឆ្នាំង មានប្រសាសន៍ថា សេចក្តីសម្រេចរបស់តុលាការហាក់ដូចជាមានចេតនាចង់បង្រ្កាបទៅលើតំណាងសហគមន៍ដែលធ្លាប់តវ៉ារឿងដីធ្លីកន្លងមក ពីព្រោះអ្វីដែលលោកដឹង អង្គហេតុនេះវាជាជម្លោះក្នុងគ្រួសារក្នុងនាមជាបងប្រដៅនិងណែនាំទៅលើប្អូន ប៉ុន្ដែពេលដែលតុលាការដាក់ទណ្ឌកម្មនេះវាធ្ងន់ពេកហើយ ម្យ៉ាងវិញទៀត ការស្វែងរកយុត្តិធម៌ក្នុងរឿងហ្នឹងគឺតុលាការហាក់ដូចជាព្រងើយកន្ដើយមិនស្វះស្វែងរកយុត្តិធម៌ថាវាកើតចេញពីអ្វី?
លោក ចាន់គា បន្តថា តុលាការក៏បានពន្យាពេលយ៉ាងយូរក្នុងការប្រកាសសាលក្រមរឿងនេះដែរ កុំតែបានក្រុមគ្រួសារនិងសហគមន៍នាំគ្នាទៅប្ដឹងនៅក្រសួងយុត្តិធម៌ កុំអីមិនដឹងពេលណាតុលាការបានប្រកាសចឹងទេ។
លោកបន្ថែមថា៖ «អ្វីដែលតុលាការសម្រេចនេះវាហាក់ដូចជាមានចេតនាមួយក្នុងការបង្រ្កាបទៅលើតំណាងសហគមន៍ដែលធ្លាប់តវ៉ារឿងដីធ្លីទៅវិញទេ»។
ដោយឡែក កាលពីថ្ងៃទី២៧ខែមិថុនាឆ្នាំ២០២២កន្លងទៅ តុលាការកំពូលក្រុងភ្នំពេញបានសម្រេចដោះលែងសកម្មជនដីធ្លីឡពាងខេត្តកំពង់ឆ្នាំងគឺអ្នកស្រី ទួន សេង ឱ្យនៅក្រៅឃុំជាបណ្ដោះអាសន្នក្រោយពីឃុំខ្លួនអស់រយៈពេលជិតកន្លះឆ្នាំបន្ទាប់ពីសាលាដំបូងខេត្ដកំពង់ឆ្នាំងបានចោទប្រកាន់អ្នកស្រីពីបទបានបំផ្លិចបំផ្លាញទ្រព្យសម្បត្តិអ្នកដទៃនិងពីបទលួចទ្រព្យសម្បត្តិអ្នកដទៃ។
កាលពីថ្ងៃទី៨ ខែកក្កដា សាលាដំបូងរាជធានីភ្នំពេញបានផ្តន្ទាទោសអ្នកភូមិ៤នាក់រួម ទាំងអ្នកស្រី អ៊ុំ សុភី និងលោក រាជ សីម៉ា ដោយកំបាំងមុខដាក់ពន្ធនាគាររយៈពេលមួយឆ្នាំពីបទញុះញង់ឱ្យប្រព្រឹត្តបទឧក្រិដ្ឋជាអាទិ ធ្វើឱ្យខូចខាតដោយចេតនានិងបទប្រើប្រាស់អំពើហិង្សាលើបុគ្គលជាអ្នកកាន់កាប់អចលនទ្រព្យកាលពីឆ្នាំ២០១២៕