សមាគមសម្ព័ន្ធអ្នកសារព័ត៌មានកម្ពុជា

សាលាដំបូងខេត្តព្រះសីហនុបានផ្តន្ទាទោសជនជាតិចិនតៃវ៉ាន់​២​នាក់​​ដាក់ពន្ធនាគារ២ឆ្នាំពាក់ព័ន្ធនឹងការធ្វើឱ្យប៉ះពាល់សន្តិសុខសង្គម

សមត្ថកិច្ចបង្ហាញមុខ ជនសង្ស័យជនជាតិចិនតៃវ៉ាន់ពីរនាក់ឈ្មោះ Chen Neng Chuan និងឈ្មោះ Lu Tsu Hsien នៅក្នុងសន្និសីទកាសែត នៅស្នងការដ្ឋាននគរបាលខេត្តព្រះសីហនុ រសៀលថ្ងៃទី១៥ ខែកុម្ភៈ ឆ្នាំ២០២៤។ (ខេមបូចា/ ដែន សីមា)
សមត្ថកិច្ចបង្ហាញមុខ ជនសង្ស័យជនជាតិចិនតៃវ៉ាន់ពីរនាក់ឈ្មោះ Chen Neng Chuan និងឈ្មោះ Lu Tsu Hsien នៅក្នុងសន្និសីទកាសែត នៅស្នងការដ្ឋាននគរបាលខេត្តព្រះសីហនុ រសៀលថ្ងៃទី១៥ ខែកុម្ភៈ ឆ្នាំ២០២៤។ (ខេមបូចា/ ដែន សីមា)

ខេត្តព្រះសីហនុ៖ សាលាដំបូងខេត្តព្រះសីហនុ នៅថ្ងៃទី១៥ ខែកុម្ភៈ បានសម្រេចផ្តន្ទាទោស​ជនជាតិចិនតៃវ៉ាន់ចំនួន២នាក់ ដាក់ពន្ធនាគារ​ក្នុងម្នាក់ៗចំនួន២ឆ្នាំ និងពិន័យប្រាក់​ក្នុងម្នាក់ៗ​ចំនួន៤លានរៀល ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខ​សង្គម ប្រព្រឹត្ត​នៅ​ភូមិ៦ សង្កាត់លេខ៤ ក្រុង-ខេត្តព្រះសីហនុ កាលពីថ្ងៃទី១៣ ខែកុម្ភៈ ឆ្នាំ​២០២៤។ ​

​យោងតាមសេចក្តីប្រកាសព័ត៌មានរបស់អ្នកនាំពាក្យសាលាដំបូង និងអយ្យការអមសាលា​ដំបូង​​ខេត្តព្រះសីហនុចុះថ្ងៃទី១៥ ខែកុម្ភៈ ឆ្នាំ​២០២៤ ​ស្តីពីចំណាត់ការលើសំណុំរឿងពាក់ព័ន្ធ​នឹង​ករណីញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមបានបញ្ជាក់ថា កាលពី​ថ្ងៃ​ទី១៥ ខែកុម្ភៈ សាលាដំបូងខេត្តព្រះសីហនុ បានសម្រេចផ្តន្ទាទោសលើឈ្មោះ Chen Neng Chuan ភេទប្រុស អាយុ៣១ឆ្នាំ និងឈ្មោះ Lu Tsu Hsien ភេទប្រុស អាយុ៣៤ឆ្នាំ ជាជនជាតិ​ចិន​តៃវ៉ាន់ ដាក់ពន្ធនាគារម្នាក់ៗចំនួន២ឆ្នាំ និងពិន័យក្នុងម្នាក់ៗ៤លាន​រៀល​ពីបទ​ញុះញង់បង្ក​ឱ្យមានភាពវឹកវរធ្ងន់ធ្ងរដល់សន្តិសុខសង្គម បន្ទាប់បើកសវនាការក្នុងថ្ងៃដដែលនោះ។

សេចក្តីប្រកាសរបស់អ្នកនាំពាក្យដដែលនេះបន្ថែមថា កាលពីថ្ងៃទី១២ ខែកុម្ភៈ ឆ្នាំ​២០២៤ ស្ថិត​នៅអគារមួយកន្លែង ក្នុងក្រុងព្រះសីហនុ បុគ្គលទាំងពីរខាងលើ បានថតសំដែង ​ផ្សាយ​ផ្ទាល់​ចេញ​​ពីគណនី Facebook ឈ្មោះ Wa An Xiao Ji ដែលមានសកម្មភាពត្រូវបាន​សន្តិសុខ​ចាប់​ខ្លួន និងវាយដំ។ ហើយនៅថ្ងៃទី១៣ ខែកុម្ភៈ បុគ្គលទាំងពីរ ក៏បានថតសម្តែងផ្សាយ​ផ្ទាល់​សា​ជា​ថ្មីម្តងទៀត ចេញពីទីតាំងម្តុំ ឆាយណាថោន ស្ថិតក្នុងក្រុងព្រះសីហនុ ដែលមាន​សកម្មភាព​រត់គេចខ្លួន មានការភ័យខ្លាច និងនិយាយជាភាសាចិនមានអត្ថន័យ​ថា ខ្លួនត្រូវ​បាន​គេតាម​ចាប់​​​វាយធ្វើបាប និងស្រែកឱ្យគេជួយ។

​ក្រោយបានស្តាប់ចម្លើយ  និងពិនិត្យ​ភស្តុតាង​តំណាងអយ្យការអមសាលាដំបូងខេត្ត​ព្រះសីហនុ បានសម្រេចចោទប្រកាន់ និងបញ្ជូនជនជាតិចិនតៃវ៉ាន់ទាំងពីរទៅសាលា​ដំបូង​ខេត្តព្រះសីហនុ ដើម្បីជំនុំជម្រះ តាមនីតិវិធី នៃការបង្ហាញខ្លួនភ្លាម ពីបទ​ញុះញង់បង្កឱ្យ​មានភាពវឹកវរធ្ងន់ធ្ងរដល់សន្តិសុខសង្គម​ ប្រព្រឹត្តនៅភូមិ៦ សង្កាត់លេខ៤ ក្រុង-ខេត្ត​ព្រះសីហនុ កាលពីថ្ងៃទី១៣ ខែកុម្ភៈ ឆ្នាំ​២០២៤ ​បទល្មើសដែល​មានបញ្ញត្តិឱ្យផ្តន្ទាទោស​តាមមាត្រា៤៩៤ និងមាត្រា៤៩៥នៃក្រមព្រហ្មទណ្ឌ។

ខេមបូចា នៅមិនទាន់អាចទាក់ទង លោក ធុច បញ្ចសន្តិភាព ព្រះរាជអាជ្ញារង និងជា​អ្នកនាំពាក្យ អយ្យការអមសាលាដំបូង ខេត្តព្រះសីហនុ ដើម្បីបំភ្លឺ ថាតើមានមូលហេតុអ្វី បានជាសាលាដំបូងខេត្តព្រះសីហនុ ​លើកយកសំណុំរឿង របស់ជនជាតិចិនតៃវ៉ាន់ទាំងពីរនាក់ ខាង​លើ ​មកជំនុំជម្រះជាបន្ទាន់ ហើយចេញសេចក្តីសម្រេចដាក់ពន្ធនាគារជនជាប់ចោ​ទភ្លាមៗ ដែល​ខុសប្លែកពីសំណុំរឿងដ៏ទៃទៀត អូសបន្លាយពេលយូរ។

ទាក់ទិនបញ្ហានេះ ស្នងការដ្ឋាននគរបាលខេត្តព្រះសីហនុ កាលពីរសៀលថ្ងៃទី១៥ ខែកុម្ភៈ បានធ្វើសន្និសីទកាសែត បង្ហាញមុខជនសង្ស័យជនជាតិ​ចិន​តៃវ៉ាន់ ចំនួន​២នាក់ ដែល​ត្រូវ​សមត្ថកិច្ចចាប់ខ្លួន បន្ទាប់ពីពួកគេ បានផលិតមាតិកា​វីដេអូឃ្លីប​បង្ហោះ​​តាមបណ្តាញរបស់ខ្លួន ដែលអាជ្ញាធរចាត់ទុកថា បង្ក​ឲ្យមានភាពវឹកវរធ្ងន់ធ្ងរដល់កិត្តិយស​សង្គម​កម្ពុជា ជាពិសេស​ប៉ះពាល់​ដល់​​​សន្តិសុខ និងសណ្តាប់ ធ្នាប់ខេត្តព្រះសីហនុ​​។

​ថ្លែងនៅចំពោះមុខក្រុមអ្នកសារព័ត៌មាន លោក គួច ចំរើន អភិបាលខេត្តព្រះសីហនុ មាន​ប្រសាសន៍​ថា ​​​ជនជាតិចិនតៃវ៉ាន់ទាំងពីរនាក់ ដែលសមត្ថកិច្ចចាប់ខ្លួននេះ គឺពួកគេ​បាន​ប្រព្រឹត្ត​នូវអំពើ​ញុះញង់បង្កឲ្យមានស្ថានភាពវឹកវរធ្ងន់ធ្ងរដល់សន្តិសុខសង្គម ជាពិសេស​ប៉ះពាល់​ដល់​សុវត្ថិភាព​ នៃការរស់នៅ​របស់ប្រជាពលរដ្ឋ ភ្ញៀវទេសចរ ក៏ដូចជាអ្នកវិនិយោគទុន ក្នុងខេត្ត​ព្រះសីហនុ​។

លោកអភិបាលបន្តថា ​ករណីជនសង្ស័យទាំងពីរនាក់នេះ ទោះពួកគាត់​មកថតសម្តែងជា វីដេ​អូ​ឃ្លីបខ្លីៗ​​ក្តី ប៉ុន្តែការថតនេះវាបានបង្កការភ័យខ្លាចទៅ​ដល់សាធារណៈជន ភ្ញៀវទេសចរជាតិ-អន្តរជាតិ និងអ្នកវិនិយោគទុន ដែលពួកគាត់ មានបំណងចង់ចូលមក​ធ្វើវិនិយោគ ឬក៏ធ្វើ​ទេសចរណ៍​នៅក្នុងខេត្តព្រះសីហនុ ឬចូលមកទស្សនាប្រទេសកម្ពុជា​ គឺពួកគាត់ពិត​ជា​មានការ​ភ័យខ្លាច ពេលឃើញវីដេអូទាំងនោះ​។

លោក គួច ចំរើន សង្កត់ធ្ងន់ថា៖ «កន្លងម​ព័ត៌មានដែលបានផលិត និងបានផ្សព្វផ្សាយចេញ​ពីខេត្តព្រះសីហនុ​ គឺភាគច្រើនជាការសម្តែង ដើម្បីផលប្រយោជន៍របស់ក្រុម ឬបុគ្គល​ណា​មួយ ហើយ​ផ្សាយ​ក្លែងពីអសន្តិសុខនៅមូលដ្ឋាននេះ ខុសពីការពិតជាក់ស្តែង។ ផ្ទុយទៅវិញ យើង​កំពុង​តែរស់នៅដោយសុខសុវត្ថិភាព សប្បាយរីករាយ នៅគ្រប់ដំណាក់កាល នៃកម្មវិធីបុណ្យ​ផ្សេងៗ ដោយមានទាំងប្រជាពលរដ្ឋខ្មែរ និងបរទេស ​ចូលមកកម្សាន្ត​​យ៉ាងច្រើនកុះករ»

លោកអភិបាលខេត្តព្រះសីហនុ បន្ថែមថា ស្ថានភាពជាក់ស្តែងនៅខេត្តព្រះសីហនុ ជាបន្ត​បន្ទាប់​​មកនេះ គឺពុំដែលមានបុគ្គលរូបណាម្នាក់រងផលប៉ះពាល់ដោយបញ្ហា​សន្តិសុខនោះ​ទេ។ លោក​ទទួលស្គាល់នៅក្នុងសង្គមមួយទាំងមូល គឺពិតជាកើតមានបញ្ហាអសន្តិសុខខ្លះៗ​​មែន ប៉ុន្តែ​វាមិនមានស្ថានភាពធ្ងន់ធ្ងរដូចអ្វី ដែលគេកំពុងតែបំប៉ោង បំភ្លៃ បំភ្លើស ខុសការពិតពីក្រៅ​ប្រទេសចំពោះខេត្តព្រះសីហនុ​ទេ​។

សម្ភារៈដែលសមត្ថកិច្ចរឹបអូសបានពីជនសង្ស័យជនជាតិចិនតៃវ៉ាន់ពីរនាក់​ឈ្មោះ Chen Neng Chuan​​ និងឈ្មោះ Lu Tsu Hsien ត្រូវបានដាក់បង្ហាញ​​ក្នុងសន្និសីទកាសែត នៅស្នងការដ្ឋាននគរបាលខេត្ត​ព្រះសីហនុ ​រសៀលថ្ងៃទី១៥ ខែកុម្ភៈ ឆ្នាំ​២០២៤។ (ខេមបូចា/ ដែន សីមា)

ក្រោយបញ្ចប់ធ្វើសន្នសីទកាសែត ជនសង្ស័យជនជាតិចិនតៃវ៉ាន់ទាំងពីរនាក់ ត្រូវ​កម្លាំង​ជំនាញ​នៃស្នងការដ្ឋាននគរបាលខេត្តព្រះសីហនុ បញ្ជូនសំណុំរឿងភ្លាមៗ ​ទៅកាន់​សាលា​ដំបូង​​ខេត្តព្រះសីហនុ ដើម្បីបន្តនីតិវិធី នៅរសៀលថ្ងៃទី១៥ ខែកុម្ភៈ ឆ្នាំ​២០២៤។

សមត្ថកិច្ច​​ បញ្ជាក់ថា ​ពេលឃាត់ខ្លួន​ជនជាតិចិនតៃវ៉ាន់ទាំងពីរនាក់ ​កម្លាំងជំនាញបាន​ដក​ហូត​សម្ភារៈមួយចំនួនរួមមាន៖ ឯកសណ្ឋានយោធា ស្រោមមុខខ្មោ​ច កាំភ្លើង​ជ័របាញ់ទឹក និងសម្ភារៈ សម្រាប់បម្រើឲ្យការថតវីដេអូមួយចំនួនទៀត​។

​តាម​រាយការណ៍សមត្ថកិច្ច​ ឲ្យដឹងថា ជនសង្ស័យជនជាតិចិនតៃវ៉ាន់ទាំង២នាក់ ត្រូវកម្លាំង​ជំនាញ ចុះស្រាវជ្រាវឃាត់ខ្លួន នៅក្នុង​បន្ទប់សណ្ឋាគារមួយកន្លែង ស្ថិត​ក្នុងក្រុងព្រះសីហនុ ​ក្រោយពួកគេ​រួមគ្នាផលិតវីដេអូក្លែងក្លាយ ដើម្បីទាក់ទាញការចាប់អារម្មណ៍ នៅលើបណ្ដាញ​សង្គមនានា ពិសេសបណ្ដាញសង្គម ហ្វេសប៊ុក (Facebook) និង តិកតុក (TikTok) ដែលមាន​អ្នកគាំទ្រចូលទស្សនា (View) ឬចុចឡាច (Like) រហូតដល់ជាង៥លាននាក់។

​វីដេអូដែលពួកគេផលិតនោះ មានដូចជា ផលិតធ្វើជាសកម្មភាពក្រុមឧក្រិដ្ឋជន​ចាប់បង្ខាំ​ង​មនុស្ស-​​​ផលិតធ្វើជាខ្មោចលង នៅតាមសណ្ឋាគារ កាស៊ីណូ ឬទីតាំងផ្សេងៗ ​ក្នុងមូលដ្ឋាន​ខេត្តព្រះសីហនុ។ តាមរយៈវីដេអូប្រឌិត​​នេះ សមត្ថកិច្ចចាត់ទុកថា បានធ្វើឲ្យមហាជន​មាន​ការភ័យខ្លាច និងយល់ច្រឡំ ពិសេសអ្នក​រស់នៅក្រៅប្រទេស ​ខ្លាចមិនហ៊ានចូលមក​កម្សាន្ត​ខេត្តព្រះសីហនុ នាថ្ងៃខាងមុខ​ទេ។ ​ តែធាតុពិត មិនមានហេតុការណ៍អាក្រក់ៗ​ កើតឡើង​ដូច​អ្នកផ្សព្វផ្សាយ ឬអ្នកផលិតមាតិកា​វីដេអូទាំងនោះទេ​។

​​​ទាក់ទិនបញ្ហានេះ លោកស្រី ជៀប សុធារី អ្នកសម្របសម្រួលសមាគមន៍អាដហុក ប្រចាំ​ខេត្ត​ព្រះសីហនុ មានប្រសាសន៍ថា ក្នុងនាមអ្នកឃ្លាំមើលសង្គម សូមស្វាគមន៍ និងគាំទ្រចំពោះ​សកម្មភាពរបស់ថ្នាក់ដឹកនាំរដ្ឋបាលខេត្តព្រះសីហនុ និងសមត្ថកិច្ចស្ថាប័នពាក់ព័ន្ធ ដែលតែង​តែ​យកចិត្តទុកដាក់ ​ចុះបង្ក្រាបបទល្មើសផ្សេងៗបានទាន់ពេល និងចាប់បញ្ជូន​ខ្លួន​ជនសង្ស័យ​ទៅផ្តន្ទាទោស ដើម្បីរក្សា​សុវត្ថិភាព ជូនប្រជាពលរដ្ឋ ភ្ញៀវទេសចរ​ ក៏ដូចជាអ្នកវិនិយោគទុន​ជា​ដើម។

លោកស្រី សុធារី លើកឡើងថា៖ «គ្រប់ជនបរទេសទាំងអស់ ដែលចូលមកកម្ពុជា ពិសេស​ខេត្ត​ព្រះសីហនុ ត្រូវគោរព និងអនុវត្តតាមច្បាប់កម្ពុជា។ ហើយចំពោះជនសង្ស័យ​ជនជាតិចិន​តៃវ៉ាន់ ដែលបានផលិតវីដេអូខ្លីៗ និងធ្វើឲ្យប៉ះពាល់ដល់​សន្តិសុខ ​សុវត្ថិភាព និងប៉ះពាល់​កិត្តិយស​របស់សង្គមកម្ពុជា ត្រូវតែទទួលទោស​ បើ​ពួកគេអនុវត្តផ្ទុយពីច្បាប់កម្ពុជា»។ លោក​ស្រី​បន្តថា៖ «ពួកគេ គួរ​សុំច្បាប់ ឬទាក់ទងមកអាជ្ញាធរពាក់ព័ន្ធជាមុន​ បើសិនបើចង់​ផលិត​ជាវីដេអូ​ផ្សេងៗ ដើម្បី​ឲ្យ​មានសុវត្ថិភាពតាមផ្លូវច្បាប់»

​​​យ៉ាងនេះក្តី នៅចំពោះមុខអ្នកសារព័ត៌មានជាតិ-អន្តរជាតិ ​ជនសង្ស័យជនជាតិតៃវ៉ាន់​ទាំង​ពីរ​នាក់​ ក៏បានលុត​ជង្គង់សុំការលើកលែងទោសពី​លោក គួច ចំរើន អភិបាលខេត្តព្រះសីហនុ និង​កម្លាំងសមត្ថកិច្ច ចំពោះកំហុសឆ្គងរបស់ពួកគេ ដែលបានផលិតវីដេអូ ចាប់បង្ខាំមនុស្ស​ធ្វើ​ទារុណកម្ម រួចបង្ហោះតាមបណ្តាញសង្គម​របស់ខ្លួន នាំឲ្យប៉ះពាល់ដល់​កិត្តិយសរបស់​ប្រទេស​កម្ពុជា ជាពិសេសប៉ះពាល់ដល់សន្តិសុខ និង​សណ្តាប់ធ្នាប់ខេត្តព្រះសីហនុ។

​​សមត្ថកិច្ចខេត្តព្រះសីហនុ បានឲ្យដឹងថា ជនជាតិចិនតៃវ៉ាន់ទាំងពីរនាក់ ​បាន​ចូលមក​ប្រទេស​កម្ពុជា កាលពីថ្ងៃទី១១ ខែកុម្ភៈ ​ក្នុងគោល​បំណងផលិតមាតិកា​វីដេអូខ្លីៗ ពាក់ព័ន្ធ​ការចាប់​បង្ខាំង​មនុស្ស ឬវីដេអូខ្មោចលងជាដើម រួចបង្ហោះនៅលើបណ្ដាញសង្គមរបស់ខ្លួន ដើម្បី​ទាក់​ទាញអ្នកចូលទស្សនា និង​​​លក់ដូរផលិតផល​នៅប្រទេសរបស់ពួកគេ។​ ប៉ុន្តែក្រោយ​បង្ហោះ​វីដេអូ​ទាំងនេះរួច ក៏ត្រូវកម្លាំងសមត្ថកិច្ច ខេត្តព្រះសីហនុ ចុះស្រាវ​ជ្រាវ​ចាប់ខ្លួន​ កាលពីថ្ងៃ​ទី១៤ ខែកុម្ភៈ ឆ្នាំ​២០២៤​។

តាមការកត់សម្គាល់ ក្នុងប៉ុន្មានឆ្នាំកន្លងមកនេះ នៅក្នុងមូលដ្ឋាន​ខេត្តព្រះសីហនុ ក៏ធ្លាប់កើត​មាន​​ក្រុមឧក្រិដ្ឋ​ជនជនជាតិចិន បាន​ធ្វើសកម្មភាពចាប់បង្ខាំងជនជាតិចិនដូចគ្នា ដើម្បីជំរិតទារ​ប្រាក់ បានកើតមានជាច្រើនករណី ដោយករណីខ្លះបាន​ធ្វើទារុណកម្មជនរងគ្រោះ​រហូតដល់​ស្លាប់​ក៏មាន​។

ប៉ុន្តែទន្ទឹមគ្នានេះ កម្លាំងសមត្ថកិច្ចជំនាញនៃអគ្គស្នងការនគរបាលជាតិ ក៏​ដូច​ជា​​កម្លាំង​សមត្ថកិច្ច​នៃស្នងការដ្ឋានខេត្តព្រះសីហនុ ក៏បានសហការគ្នា ចុះបង្ក្រា​ប​ជន​ល្មើស​​​ទាំង​នោះ​បានទាន់ពេល និងបានបញ្ជូនសំណុំរឿងទៅកាន់តុលាការផ្តន្ទាទោសបាន​ជា​ច្រើន​ករណី​។ ជាក់ស្តែង គិតមកដល់ដើមឆ្នាំ​២០២៤នេះ បទល្មើសចាប់បង្ខាំងមនុស្ស​ជំរិតទារ​ប្រាក់ និង​បទ​ល្មើស​ផ្សេងៗទៀត ហាក់មានសញ្ញាថយចុះ​​គួរឲ្យកត់សម្គាល់៕

1,529 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម