សមាគមសម្ព័ន្ធអ្នកសារព័ត៌មានកម្ពុជា

អ្នកភូមិនៅខេត្តកណ្តាលរារាំងការសាងសង់របងរបស់គម្រោងព្រលានយន្តហោះថ្មី ប៉ុន្តែពួកគាត់នៅតែមានការភ័យខ្លាច

ផ្ទះនៅតាមប្រឡាយក្នុងភូមិអំពៅព្រៃ ស្រុកកណ្តាលស្ទឹង ដែលរងផលប៉ះពាល់ដោយសារគម្រោងព្រលានយន្តហោះថ្មី។ (ខេមបូចា/ ផុន សុទ្ធីរ័ត្ន)
ផ្ទះនៅតាមប្រឡាយក្នុងភូមិអំពៅព្រៃ ស្រុកកណ្តាលស្ទឹង ដែលរងផលប៉ះពាល់ដោយសារគម្រោងព្រលានយន្តហោះថ្មី។ (ខេមបូចា/ ផុន សុទ្ធីរ័ត្ន)

ក្រុមហ៊ុន​អភិវឌ្ឍន៍​គម្រោង​ព្រលាន​យន្តហោះ​ថ្មី​នៅ​ខេត្ត​កណ្តាល​បាន​ផ្អាក​ការ​សាងសង់​របង​កាលពី​សប្តាហ៍​មុន​ បន្ទាប់​ពី​មាន​ការ​តវ៉ា​ពី​អ្នក​ភូមិ​ដែល​រស់​នៅ​ក្នុង​ការដ្ឋាននោះ។

អ្នកស្រី យួន ស្រីមុំ អាយុ៤៩ឆ្នាំ ជា​អ្នកភូមិអំពៅព្រៃបាននិយាយថា អ្នក​ស្រី ​និងអ្នកជិត​ខាង​ប្រហែល៥០នាក់បានប្រមូលផ្តុំគ្នាកាលពីថ្ងៃទី៦ ខែកក្កដា និង​បានរា​រាំងកម្មករនៅ​ព្រលាន​យន្ត​ហោះថ្មី​នេះ មិនឱ្យសាងសង់របងពណ៌ខៀវដ៏ធំដែលនឹងធ្វើ​ឱ្យ​ផ្ទះរបស់អ្នក​ស្រី​ និងផ្ទះ​ប្រជា​ពលរដ្ឋ​១០​គ្រួសារ​ផ្សេងទៀត​​មិន​អាច​ចេញ​ចូល​ទៅ​ផ្លូវនៅ​ក្បែរនោះ។

អ្នក​ស្រី​នៅ​តែ​មាន​ការ​ព្រួយ​បារម្ភ​ថា ការ​សាង​សង់​សម្រាប់​គម្រោង​អាកាសយានដ្ឋាន​អន្តរជាតិ​តេជោ​តាខ្មៅ នឹង​បន្ត​​សាងសង់​របង​ឡើង​វិញ​ក្នុង​ពេល​ឆាប់​ៗ​នេះនិង​​​ការ​ចាក់ដីលុប​​​ប្រឡាយ​លេខ​៩៤ជាប់​នឹង​ផ្ទះ​អ្នក​ភូមិ។ អ្នកស្រុកបានប្រើប្រាស់​ប្រឡាយនេះដើម្បី​នេសាទ ហើយថ្មីៗ​នេះបានប៉ះទង្គិចជាមួយសន្តិសុខរបស់ក្រុមហ៊ុនជុំវិញប្រឡាយ និងផ្ទះរបស់ពួកគាត់​។

ព្រលាន​យន្តហោះថ្មី​​នេះ​កំពុង​ត្រូវ​បាន​សាងសង់​ដោយ​ក្រុម​ហ៊ុន​សាជីវកម្ម​វិនិយោគ​ក្រៅ​ប្រទេស​​កម្ពុជា​របស់​លោក ពុង ឃាវ​សែ។

អ្នកស្រី ស្រីមុំ បានបញ្ជាក់ថា៖ «ខ្ញុំ​មិន​ដឹង​ថា ​ពេល​ណា​ពួកគេ​មក​ទៀត​ទេ យើង​ខ្លាច​​ថា ក្រោយ​បោះឆ្នោត ​គេ​នឹង​មក​ចាក់​ដីបន្ថែម​​ទៀត​ព្រោះ​គេ​​​មិន​ទាន់​ដឹកដី​ទៅ​វិញ​ទេ​»

អ្នក​ស្រី ស្រីមុំ បាន​បន្តថា បន្ទាប់ពីអ្នកភូមិចាប់ផ្តើមតវ៉ា មេការម្នាក់បានទូរស័ព្ទ​ទៅថៅកែ​របស់​គាត់ ដែលបន្ទាប់មកបាន​ផ្អាកការងារ ប៉ុន្តែគាត់ថា ការសាងសង់នឹង​បន្តនៅពេល​ដែល​ថៅកែ​ចេញបញ្ជា។

អ្នក​ស្រី​​បាន​ឱ្យដឹង​ថា៖ «ខ្ញុំ​នៅ​តែ​ព្រួយ​បារម្ភ និង​ភ័យ​ខ្លាច។ ខ្ញុំ​មិន​ស្រណុក​ចិត្ត​​ទាល់​តែ​សោះ»

អ្នកស្រី យួន​ ស្រីមុំ អ្នក​ភូមិ​អំពៅ​ព្រៃ​ចង្អុល​ទៅ​របង​ដែលទើប​សាងសង់​​​ថ្ងៃ​ទី​១២ ខែ​កក្កដា ឆ្នាំ​២០២៣ (ខេមបូចា / ផុន សុទ្ធីរ័ត្ន​)

អ្នកស្រី ស្រីមុំ ក៏​បារម្ភ​​ថា ការ​ចាក់​ដី​​តាម​ប្រឡាយ​​នឹង​បំផ្លាញ​ផ្ទះ​របស់​ពួកគាត់​​។ អ្នក​ស្រី​​កត់​សម្គាល់​ថា លោក អ៊ូច សាវឿន អភិបាល​ស្រុក​កណ្តាល​ស្ទឹង បាន​មក​ជួប​អ្នកភូមិ​​កាល​ពី​ថ្ងៃ​អង្គារ ហើយ​ប្រាប់ថា លោក​នឹង​ព្យាយាម​រក​ដំណោះស្រាយ​ក្រោយ​ការ​បោះឆ្នោត​ជាតិ​នៅ​ថ្ងៃ​ទី២៣ ខែ​កក្កដា។

លោក សា​វឿន​ បានបដិសេធការដែល​ថា លោកបាន​សន្យាដោះស្រាយបញ្ហាជូនប្រជាពលរដ្ឋ​ភូមិអំពៅព្រៃ​ក្រោយការបោះឆ្នោត ប៉ុន្តែលោកមាន​ប្រសាសន៍​ថានឹងលើកយក​បញ្ហានេះទៅ​អាជ្ញាធរ​ថ្នាក់លើ ព្រោះលោកអះអាងថា លោកមិនអាច​ផ្តល់ដំណោះស្រាយដោយខ្លួនឯង​បាន​ទេ។

លោក ជីវ កុកសាយ ដែលទទួល​ខុស​ត្រូវ​ការទិញដីសម្រាប់គម្រោងព្រលានយន្តហោះថ្មី​បាន​ប្រាប់​ខេមបូចា​កាលពីថ្ងៃពុធថា របងនោះធ្វើ​ព័ទ្ធជុំវិញដីរបស់ក្រុមហ៊ុន ហើយប្រឡាយនោះជា​កម្មសិទ្ធិ​​របស់រដ្ឋ។

លោកបានថ្លែង​​ថា ក្រុមហ៊ុន​នឹង​បន្ត​ទាក់ទង​ជាមួយ​អ្នក​ភូមិ​ដែល​រង​ផល​ប៉ះពាល់ ប៉ុន្តែ​មិន​ធ្វើ​អត្ថាធិប្បាយ​អំពី​អ្វី​ដែល​នឹង​កើត​ឡើង​ចំពោះ​អ្នក​ណា​ដែល​បដិសេធ​មិន​ទទួល​យក​​សំណង​របស់​ក្រុមហ៊ុននោះទេ។​ ​អ្នក​ភូមិ​បាន​លើក​ឡើង​ថា ​អ្វីដែល​​​ក្រុម​ហ៊ុនផ្តល់​ជូន​​គឺ​ទាប​ជាងតម្លៃ​​ទីផ្សារដី​​ និង​តម្លៃ​ផ្ទះ​របស់​ពួកគាត់​ឆ្ងាយ​ណាស់​។

លោក កុកសាយ បាន​មានប្រសាសន៍ថា៖ «ខ្ញុំ​មិន​អាច​និយាយ​ច្រើន​អំពីរឿង​នេះ​ [​ដំណោះ​ស្រាយ​ដែល​ក្រុម​ហ៊ុន​នឹង​ផ្ដល់] សម្រាប់​គ្រួសារ​ដែល​បដិសេធ​មិន​ទទួល​យក​សំណង។ ប៉ុន្តែ​ក្រុមហ៊ុន​នឹង​បន្ត​ដោះស្រាយ​ជាមួយ​ពួកគាត់»

របង​ដែល​អ្នក​ភូមិ​អំពៅព្រៃ​តវ៉ា​។ រូប​ភាព​នៅ​ថ្ងៃ​ទី​១២ ខែ​កក្កដា ឆ្នាំ​២០២៣។ (ខេមបូចា/ផុន សុទ្ធីរ័ត្ន)

លោក គង់ សោភ័ណ្ឌ អភិបាល​ខេត្ត​កណ្ដាលមាន​ប្រសាសន៍​ថា អាច​នឹង​មាន​ដំណោះស្រាយ​នៅ​ពេល​ក្រោយ ប៉ុន្តែ​មិន​បាន​ផ្តល់​ព័ត៌មាន​លម្អិត​ទេ។ «វាអាចទៅរួច [បញ្ហានឹងត្រូវបាន​ដោះ​ស្រាយ បន្ទាប់ពីការបោះឆ្នោតជាតិ]»

លោក គង់ សោ​ភ័ណ្ឌ បាន​មាន​ប្រសាសន៍ថា៖ «ព្រោះនៅពេលនេះ​ [​ការ​បោះឆ្នោត​] ​កៀក​មែនទែន​ ​ហើយ​យើងកំពុង​​ប្រមូលផ្តុំ​​គ្នា​គាំទ្រ​រដ្ឋាភិបាល​ គាំទ្រ​គណបក្ស​ប្រជាជន​កម្ពុជា​»

ប្រែសម្រួលពីអត្ថបទអង់គ្លេស៖ Kandal Villagers Halt Airport Project’s Fence Construction But Fears Remain

453 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម