អាជ្ញាធរខេត្ដកណ្ដាលអះអាងថា នឹងផ្ដល់សំណងផលប៉ះពាល់ក្រោយពីចុះសិក្សាវាយតម្លៃរួចសម្រាប់ពលរដ្ឋនៅឃុំបឹងខ្យាងក្រោមគម្រោងពង្រីកប្រឡាយសងខាង៥០ម៉ែត្រ ខណៈរដ្ឋបាលបានចេញសេចក្ដីបំភ្លឺជុំវិញសារព័ត៌មានមួយចំនួនបានចុះផ្សាយកន្លងមក។
បើតាមលោក គង់ សោភណ្ឌ អភិបាលខេត្ដកណ្ដាល បានថ្លែងនៅព្រឹកថ្ងៃចន្ទថា សម្រាប់ដោះស្រាយជូនពលរដ្ឋដែលរងផលប៉ះពាល់នៅឃុំបឹងខ្យាងនឹងផ្ដល់សំណងក្រោយពីក្រសួងធនធានទឹក និងស្ថាប័នពាក់ព័ន្ធចុះសិក្សាវាយតម្លៃរួច តែលោកមិនបានបញ្ជាក់ពីចំនួនពលរដ្ឋដែលរងផលប៉ះពាល់នោះទេ។ លោកបានបន្តថា សម្រាប់អាជ្ញាធរតែងតែគិតគូរពីសុខទុក្ខប្រជាពលរដ្ឋ ខណៈលោកថា ការចុះដោះស្រាយមិនទាន់ដឹងច្បាស់លាស់នោះទេ។
លោកអភិបាលខេត្ដបញ្ជាក់ថា៖ «ការសិក្សានេះ គឺក្រសួងធនធានទឹកបានធ្វើ។ ចំនួនតួលេខជាក់ស្ដែងនោះ គឺកំពុងប្រមូលហើយ។ សុំឱ្យពិនិត្យបន្ដិចសិនដើម្បីកុំឱ្យវាខុស។ យើងកំពុងពិនិត្យមើលអ្វីដែលវាប៉ះពាល់ពិតប្រាកដ អ្វីដែលមិនពិតប្រាកដ»។
កាលពីថ្ងៃទី៧ខែមិនាឆ្នាំ២០២៤សប្ដាហ៍មុននេះ រដ្ឋបាលខេត្ដកណ្ដាលបានចេញសេចក្ដីបំភ្លឺព័ត៌មានមួយក្រោយពីស្ថាប័នខេមបូចាបានចេញផ្សាយនូវអត្ថបទមួយដែលមានចំណងជើងថា៖ « ពលរដ្ឋជាង១០០គ្រួសារនៅឃុំបឹងខ្យាងរងផលប៉ះពាល់ពីគម្រោងពង្រីកប្រឡាយរបស់រដ្ឋ»។
ក្នុងលិខិតនោះដែរ រដ្ឋបាលខេត្ដកណ្ដាលក៏បានបញ្ជាក់ថា ជុំវិញការស្ដារប្រឡាយនេះនៅមិនទាន់ដឹងពីផលប៉ះពាល់ច្បាស់លាស់នោះទេដោយបញ្ជាក់ថា កំពុងសិក្សា និងវាយតម្លៃដែលបាននឹងកំពុងចុះវាស់វែងលម្អិតលើផលប៉ះពាល់ និងស្រង់ទិន្នន័យផលប៉ះពាល់ជូនប្រជាពលរដ្ឋផងដែរ នៅត្រង់ចំណុចស្ទឹងតូចក្នុងភូមិសាស្រ្ដឃុំរលាំងកែន ឃុំព្រែករកា និងឃុំដើមឫស ស្រុកកណ្ដាលស្ទឹង។ សម្រាប់ភូមិកំពុងតាឡុង និងភូមិស្រុកចេក ឃុំបឹងខ្យាង ស្រុកកណ្ដាលស្ទឹង ក៏ស្ថិតនៅក្នុងគម្រោងនេះដែរ។
យ៉ាងណាក្នុងលិខិតដដែលបានបន្ដថា៖ «គម្រោងផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចក្នុងភូមិសាស្រ្ដរាជធានីភ្នំពេញ»។
ក្នុងសេចក្ដីបំភ្លឺព័ត៌មានរបស់រដ្ឋបាលខេត្ដកណ្ដាលនេះស្នើសុំឱ្យខេមបូចាជួយសម្រួលអត្ថបទរបស់ខ្លួនឡើងវិញ ដើម្បីកុំឱ្យពលរដ្ឋមានការយល់ច្រឡំជុំវិញព័ត៌មានខាងលើ និងបានបញ្ជាក់ពីដំណោះស្រាយជូនពលរដ្ឋក្រោយពីសិក្សារួច។
ចំណែកឯលោក ណៃ ចាន់ឌី មេឃុំបឹងខ្យាងបានលើកឡើងថា ថ្នាក់លើមិនទាន់បានបញ្ជាក់ចំនួនតួលេខណាមួយនោះទេ លោកថាកន្លងមកលោកគ្រាន់តែបានចូលរួមស្ដាប់ក្នុងកិច្ចប្រជុំប៉ុណ្ណោះកិច្ចការងារផ្សេងៗទៀតមិនដឹងនោះទេ។ លោកបានរុញសំណួរអ្នកសារព័ត៌មានខេមបូចាទៅថ្នាក់ស្រុកទើបជាក់លាក់ជាងលោក។
លោកបន្ដថា៖ «គេមិនទាន់ប្រាប់ពូទេរឿងប៉ះពាល់គ្រួសារហ្នឹង។ បើក្មួយឯងចង់ច្បាស់ទាក់ទៅលោកអភិបាលស្រុកទៅ។ កន្លងមកពូចូលរួមស្ដាប់ដូចតែប្រជាពលរដ្ឋដែរទេ»។
លោក អ៊ូច សាវឿន អភិបាលស្រុកកណ្ដាលស្ទឹង ថ្លែងថា ការដោះស្រាយជូនពលរដ្ឋនៅមិនទាន់ច្បាស់លាស់នោះទេ តែយ៉ាងណាលោកបញ្ជាក់ថា កំពុងស្នើសុំទៅថ្នាក់លើដើម្បីឱ្យពលរដ្ឋដែលគ្មានប្លង់កម្មសិទ្ធិអាចទទួលបានសំណងសមរម្យ។
លោកបានថ្លែងថា៖ «យើងអត់ទាន់ដឹងទេ ព្រោះថ្នាក់ក្រសួងជាអ្នកដោះស្រាយ។ ខ្ញុំកំពុងស្នើទៅថ្នាក់លើដើម្បីអាចឱ្យពលរដ្ឋទទួលបានសំណងសមរម្យដូចពលរដ្ឋនៅប៉ែតប្រាំបីដែរ[ពលរដ្ឋព្រមដោះដូរពីព្រលានយន្ដហោះថ្មី]»។
បើតាមអ្នកស្រី សួង ចាន់ណា អាយុ៥៥ឆ្នាំដែលមានដី និងផ្ទះប្លង់រឹង បានលើកឡើងថា អ្នកស្រីចង់បានដី និងសំណងផ្ទះដែលអ្នកស្រីបានសាងសង់ដោយអ្នកស្រីបានបញ្ជាក់ថា អ្នកស្រីបានសាងសង់ផ្ទះមុននឹងមានគម្រោងជីកប្រឡាយបានរយៈពេល៦ខែមកហើយទើបមានគម្រោងស្ដារនេះ។
អ្នកស្រីថា៖«បានសមរម្យខ្ញុំមិនថាអីទេ បើមិនបានសមរម្យពួកខ្ញុំនឹងតវ៉ា។ខ្ញុំមិនចង់បានអីទេ ឱ្យតែសមរម្យ ធ្វើអីធ្វើចុះ»។
កាលពីថ្ងៃពុធទី៣១ ខែមករា ឆ្នាំ២០២៤ អាជ្ញាធរបានហៅប្រជាពលរដ្ឋ២ភូមិ រួមមាន ភូមិកំពង់តាឡុង និងភូមិស្រុកចេក ឃុំបឹងខ្យាងដើម្បីប្រជុំបង្ហាញពីគម្រោងពង្រីកប្រឡាយសងខាង៥០ម៉ែត្រមានប្រវែងជាង៤គីឡូម៉ែត្រដែលមានប្រជាពលរដ្ឋប្រមាណ៧០នាក់ចូលរួម។
ក្នុងលិខិតមួយដែលក្រសួងធនធានទឹក និងឧតុនិយមបានតម្រូវឱ្យរដ្ឋបាលខេត្ដកណ្ដាលចុះអនុវត្ដគម្រោងស្ដារស្ទឹង និងប្រឡាយតូចៗនៅក្នុងភូមិសាស្ដ្រខេត្ដកណ្ដាល ដោយក្នុងនោះមានប្រឡាយទឹកដែលត្រូវស្ដារមានប្រវែងជិត៥គីឡូម៉ែត្រ និងទទឹង៥០ម៉ែត្រសងខាងស្ថិតនៅឃុំបឹងខ្យាង ស្រុកកណ្ដាលស្ទឹង។
លិខិតនោះបន្ដថា ភូមិសាស្រ្ដដែលត្រូវស្ដារ និងពង្រីកមានរាជធានីភ្នំពេញ ខេត្ដកំពង់ស្ពឺ ខេត្ដកណ្ដាល និងខេត្ដតាកែវ ដើម្បីរំដោះទឹកជំនាន់។
ពលរដ្ឋម្នាក់ទៀតដែលកំពុងរង់ចាំដំណោះស្រាយពីអាជ្ញាធរនោះគឺ ឈន លី អាយុ៥១ឆ្នាំ រស់នៅភូមិកំពង់តាឡុង ឃុំបឹងខ្យាង ស្រុកកណ្ដាលស្ទឹង បានបញ្ជាក់ថា លោកមិនជំទាស់នឹងគម្រោងរបស់រដ្ឋឡើយ ដោយលោកថាឱ្យតែរដ្ឋអាចផ្ដល់សំណងសមរម្យ និងអាចផ្ដល់ដីមួយកន្លែងឱ្យលោក លោកនឹងព្រមចាកចេញ។ យ៉ាងណាលោកបានបង្ហាញការព្រួយបារម្ភរបស់លោកថា ក្នុងករណីរដ្ឋមិនអាចផ្ដល់សំណងឱ្យលោកបានសមរម្យទេ នោះលោកនឹងប្រឈមបញ្ហាជាខ្លាំង ខណៈលោកថា ដីរបស់លោកមិនមានប្លង់រឹងនោះទេ ប៉ុន្ដែលោកបានកាន់កាប់ជាង១០ឆ្នាំមកហើយ។
លោកលើកឡើងថា៖ «ខ្ញុំចង់បានដីរស់នៅឡើងវិញ ព្រោះខ្ញុំអត់មានអីត្រូវទៅកន្លែងណា។ បើរដ្ឋត្រូវការដីមែន ខ្ញុំចប់ហើយ។ បើគេវាយតម្លៃទាបពេកយើងក៏មិនអាចទទួលយកបាន បើសមរម្យខ្ញុំចេញ ខ្ញុំចង់បានតែប៉ុណ្ណឹង។ គេ[អាជ្ញាធរ]អត់ប្រាប់ថាយ៉ាងម៉េចដែរតាំងពីថ្ងៃប្រជុំមក»។
ហាក់មិនខុសគ្នានោះទេ អ្នកស្រី អួន សាន អាយុ៥៧ឆ្នាំ បានឱ្យដឹងថា អ្នកស្រីគ្មានដីជាកម្មសិទ្ធិឡើយ ដោយផ្ទះអ្នកស្រីរស់នៅសព្វថ្ងៃគឺជាដីចំណីស្ទឹង ប៉ុន្ដែអ្នកស្រីថា ការរស់នៅ និង សាងសង់នេះអ្នកស្រីបានសុំពីអាជ្ញាធរភូមិឃុំរួចហើយនិងបានរស់នៅចាប់តាំង២០១៧មក។ អ្នកស្រីបានសម្ដែងការព្រួយបារម្ភ និងស្នើឱ្យអាជ្ញាធរមេត្ដាផ្ដល់ទីតាំងសមរម្យ ទើបអ្នកស្រីនឹងព្រមចាកចេញ។
អ្នកស្រីបន្ថែមថា៖ «ខ្ញុំចង់បានតែដី១ដុំទេ បើអត់បានទេ ខ្ញុំមិនដឹងពឹងស្អីទេ។ ដីនៅនេះ គឺខ្ញុំសុំមេឃុំនៅទេ ព្រោះអត់មានដីនៅនឹងគេ។ខ្ញុំចង់បានដំណោះស្រាយឱ្យខ្ញុំសមរម្យទេ»។
កាលពីថ្ងៃទី២៥ ខែធ្នូ ឆ្នាំ២០២៣ កន្លងទៅអង្គការសមាគមធាងត្នោតបានរកឃើញថា ពលរដ្ឋ៣ខេត្ដរងគ្រោះដោយបណ្ដេញចេញទាំងបង្ខំ និងមិនទទួលបាននូវសំណងសមរម្យ១២ករណី ខណៈសង្គមស៊ីវិលផ្សេងទៀតថា ការចេញរបាយការណ៍នេះ គឺជាការរួមចំណែកមួយក្នុងការជំរុញដល់រដ្ឋាភិបាលថ្មីងាកមកគិតគូរពីបញ្ហាសិទ្ធិមនុស្សកាន់តែខ្លាំង។
ក្នុងរបាយការណ៍របស់អង្គការសមាគមធាងត្នោត បានចេញស្ដីពីការបណ្ដេញទាំងបង្ខំ២០២៣ថា ការបណ្ដេញមាន១២ករណីនៅរាជធានីភ្នំពេញ ខេត្ដតាកែវ និងខេត្ដកណ្ដាល ចន្លោះពីឆ្នាំ២០១៩ដល់២០២៣ ចំពេលមានការរីករាលដាលនៃជំងឺកូវីដ១៩។ ក្នុងរបាយការណ៍ដដែលបង្ហាញថា ការបណ្ដេញចេញទាំងនេះ ត្រូវបានចាត់ទុកថា ជាការរំលោភលើច្បាប់សិទ្ធិមនុស្សអន្ដរជាតិ ជាពិសេសសិទ្ធិទទួលបានលំនៅឋានសមរម្យ។
លោក វណ្ណ សូផាត មន្រ្ដីធុរៈកិច្ច និងសម្របសម្រួលនៃមជ្ឈមណ្ឌលសិទ្ធិមនុស្សកម្ពុជា បានចាត់ទុកថា ការផ្ដល់សំណងសមរម្យមុននឹងមានការអភិវឌ្ឍគឹជារឿងដែលអាជ្ញាធរគួរគិត។ យ៉ាងណាមិញលោកសង្ឃឹមថា អានជ្ញាធរនឹងផ្ដល់សំណងសមរម្យឱ្យប្រជាពលរដ្ឋជាជាងការបណ្ដេញដោយបង្ខំ និងមិនផ្ដល់សំណងសមរម្យ។
លោកបន្ថែមថា៖ «តាមច្បាប់មុននឹងអភិវឌ្ឍអីមួយរដ្ឋត្រូវបានផ្ដល់សំណងសមរម្យជាមុនសិន។ ខ្ញុំសង្ឃឹមថា អាជ្ញាធរគិតគូរបញ្ហាសិទ្ធិមនុស្សឱ្យបានច្រើន និងជារឿងសំខាន់»៕
