កម្លាំងនគរបាលរាជធានីភ្នំពេញបានឃុំខ្លួនប្រធានគណបក្សខ្មែរឈ្នះ លោក សួង សុភ័ណ្ឌ កាលពីថ្ងៃទី១៤ សីហា ដោយចោទប្រកាន់ថាបំភ្លៃព័ត៌មានទាក់ទងនឹងបញ្ហាព្រំដែន ដែលនាំឲ្យចំនួនសកម្មជនដែលត្រូវបានចាប់ខ្លួនខណៈដែលតវ៉ាទាមទារឲ្យដោះលែងមេដឹកនាំសហជីពកម្មករ លោក រ៉ុង ឈុន កើនឡើងដល់ ១៣នាក់ហើយ ។
សកម្មជនពីរនាក់ផ្សេងទៀតបានត្រូវចោទប្រកាន់ពីបទញុះញង់ បន្ទាប់ពីពួកគេត្រូវបានចាប់ខ្លួន រួមជាមួយនឹងមនុស្ស៤នាក់ផ្សេងទៀត ដោយសារនាំគ្នាធ្វើការតវ៉ាគាំទ្រលោក រ៉ុង ឈុន នៅខាងក្រៅសាលាដំបូងរាជធានីភ្នំពេញ កាលពីថ្ងៃទី១៣ សីហា ដែលនៅក្នុងព្រឹត្តិការណ៍នោះ លោក សួង សុភ័ណ្ឌ ក៏មានវត្តមានចូលរួមដែរ ។
កាលពីថ្ងៃទី១០ សីហា លោក សុភ័ណ្ឌ និងសមាជិក ៨រូបផ្សេងទៀតនៃគណបក្សរបស់លោក បានធ្វើដំណើរទៅកាន់ខេត្តត្បូងឃ្មុំ ចុះទៅជួបជាមួយអ្នកភូមិជាង ៣០នាក់ ហើយអ្នកភូមិទាំងនោះបាននាំពួកគេទៅកាន់បង្គោលព្រំដែនដែលមានជម្លោះ ដែលលោក រ៉ុង ឈុន បានចុះទៅមើលកាលពីខែកក្កដា ។
លោក ឈុន ត្រូវបានចាប់ខ្លួននៅថ្ងៃទី៣១ ខែកក្កដា និងត្រូវបានចោទប្រកាន់ពីបទញុះញង់ឲ្យមានវឹកវរធ្ងន់ធ្ងរដល់សន្តិសុខសង្គម នៅថ្ងៃបន្ទាប់ ដោយសារតែការអត្ថាធិប្បាយរបស់លោកនៅក្នុងបទសម្ភាសន៍មួយជាមួយវិទ្យអាស៊ីសេរី ដែលក្នុងនោះ លោកបាននិយាយថា ទាហានវៀតណាមបានបោះបង្គោលព្រំដែនចូលក្នុងដីកម្ពុជា ៥០០ម៉ែត្រ និងបានបណ្ដេញអ្នកភូមិចេញពីដីធ្លីរបស់ពួកគេ ។
នៅក្នុងគ្លីបវីដេអូមួយដែលបង្ហោះនៅលើទំព័រហ្វេសប៊ុករបស់លោក កាលពីថ្ងៃទី១០ ខែសីហា លោក សុភ័ណ្ឌ បានថ្លែងការពារសកម្មភាពរបស់លោក ។
លោក សុភ័ណ្ឌ បាននិយាយដូច្នេះថា៖ «ទីមួយ ខ្ញុំបានចុះទៅជួបប្រជាពលរដ្ឋក្នុងនាមខ្ញុំជាអ្នកនយោបាយ ។
ទីពីរ ខ្ញុំបានចុះទៅពិនិត្យមើលអធិបតេយ្យដែនដី ដើម្បីមើលថាតើគេគោរព ឬអត់ និងថាតើ[តាមអ្វីដែលអ្នកភូមិ]បាននិយាយ មានការបាត់ដីពិតមែន ឬអត់»។
លោក សុភ័ណ្ឌ និយាយនៅក្នុងគ្លីបវីដេអូដែលបានបង្ហោះលើហ្វេសប៊ុក យ៉ាងដូច្នេះថា៖ «ដូចដែលខ្ញុំបាននិយាយរួចហើយ ប្រសិនបើវាទាក់ទងនឹងអធិបតេយ្យ ខ្ញុំមិនមានយោបល់អ្វីទេ ហើយយើងឆ្ងល់ថា តើយើងគួរចាត់វិធានការជជែកជាមួយរដ្ឋាភិបាល ឬក្រសួងពាក់ព័ន្ធ ឬអត់ និងថាតើយើងគួរតែពិនិត្យឡើងវិញ ឬទេ ទៅលើបញ្ហានោះ [កិច្ចការព្រំដែន] »។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានមានប្រសាសន៍នៅថ្ងៃទី១៤ សីហា ថា លោក សុភ័ណ្ឌ ត្រូវបានចាប់ខ្លួនកាលពីពេលរសៀល ពីបទញុះញង់ ។
លោក គឹមខឿន មានប្រសាសន៍ថា៖ «គាត់ [សុភ័ណ្ឌ] ត្រូវបានចាប់ខ្លួនដោយសារប្រព្រឹត្តបទល្មើសជាក់ស្ដែង ដោយសារគាត់ផ្សព្វផ្សាយព័ត៌មានដែលមានលក្ខណៈញុះញង់ទាក់ទិននឹងបញ្ហាព្រំដែន »។ លោកបានបន្តទៀតថា លោក សុភ័ណ្ឌ កំពុងស្ថិតក្នុងការសាកសួរនៅឯស្នងការដ្ឋាននគរបាលរាជធានីភ្នំពេញ ។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានបញ្ជាក់ថា លោក សុភ័ណ្ឌ កំពុងត្រូវបានឃុំខ្លួនដើម្បីសាកសួរ ។
លោក គឹមឡុង បានឆ្លើយនៅក្នុងសារតេឡេក្រាម ដូច្នេះថា៖ «សួង សុភ័ណ្ឌ ត្រូវបានចាប់ខ្លួនពីបទល្មើសជាក់ស្ដែង ដោយញុះញង់បំភ្លៃព័ត៌មានស្ដីពីបញ្ហាព្រំដែន ហើយលោកបានចោទប្រកាន់គណៈកម្មាធិការកិច្ចព្រំដែនកម្ពុជា ថាបានប្រព្រឹត្តអំពើក្បត់ជាតិ»។
អ្នកនាំពាក្យគណបក្សខ្មែរឈ្នះ លោក យិន ឈឿន បានមានប្រសាសន៍ថា ការចាប់ខ្លួនលោក សុភ័ណ្ឌ គឺ«ក្រោមហេតុផលនយោបាយ» ដោយលោកកត់សម្គាល់ថា មន្ត្រីនគរបាលបានចាប់ខ្លួនគាត់ដោយមិនបានបង្ហាញដីកាឡើយ ។
លោក ឈឿន មានប្រសាសន៍ថា៖ «លោក សួង សុភ័ណ្ឌ មិនបានចោទប្រកាន់អ្នកណាម្នាក់ថាធ្វើឲ្យបាត់បង់ទឹកដីទេ ពីព្រោះគាត់គ្រាន់តែចោទជាសំណួរ[អំពីការអះអាងនោះ] និងចាំបាច់ត្រូវតែផ្ទៀងផ្ទាត់ព័ត៌មានពីអាជ្ញាធរ[ថ្នាក់ជាតិ] »។
លោក ឈឿន បានបន្តទៀតថា៖ «ការចាប់ខ្លួននេះ គឺជារឿងនយោបាយសុទ្ធសាធ ។ [ពួកគេ]បំបាក់ស្មារតីនរណាម្នាក់ដែលមានក្ដីកង្វល់អំពីព្រំដែន និងបានតវ៉ាប្រឆាំងនឹងរដ្ឋាភិបាល»។
លោក ឈឿន បានមានប្រសាសន៍ថា លោក សុភ័ណ្ឌ មិនបានបំភ្លៃការពិតទេ ពីព្រោះគាត់បានទទួលព័ត៌មានលម្អិតជាច្រើនដោយផ្ទាល់ ពីអ្នកភូមិដែលបាននិយាយថា កាលពីមុន ពួកគេធ្លាប់ដាំដុះនៅលើដីមួយកន្លែង ដែលឥឡូវ ពួកគាត់មិនអាចចូលទៅធ្វើស្រែចម្ការនៅលើដីនោះបានទៀតហើយ បន្ទាប់ពីបង្គោលកំណត់ព្រំដែនជាច្រើនត្រូវបានគេចោទប្រកាន់ថា ត្រូវគេរំកិល ។
លោក ឈឿន បានមានប្រសាសន៍ដូច្នេះថា៖ «គាត់ [លោក សុភ័ណ្ឌ] គ្រាន់តែលើកឡើងអំពីអ្វីដែលអ្នកភូមិបាននិយាយប៉ុណ្ណោះ ។ វាជាជម្លោះរបស់អ្នកភូមិដែលអ្នកនយោបាយត្រូវតែដោះស្រាយ ប៉ុន្តែ គាត់បែរជាត្រូវរដ្ឋាភិបាលចាប់ខ្លួនទៅវិញ ។ យើងសោកស្ដាយចំពោះការចាប់ខ្លួននេះ»។
នៅមុននេះមួយថ្ងៃ នគរបាលបានចាប់ខ្លួនបាតុករ ៦រូបផ្សេងទៀត ដែលស្ថិតក្នុងចំណោមក្រុមមនុស្ស ៣០នាក់ ដែលបានធ្វើការតវ៉ានៅខាងក្រៅសាលាដំបូងរាជធានីភ្នំពេញ ដែលនៅទីនោះលោក រ៉ុង ឈុន កំពុងស្ថិតក្រោមការសាកសួររបស់ចៅក្រមស៊ើបសួរ ពាក់ព័ន្ធនឹងសកម្មភាពរបស់លោកនៅឯព្រំដែន ។
លោក សុភ័ណ្ឌ ក៏បានចូលរួមនៅក្នុងការតវ៉ានេះដែរ ដែលក្រោយមក ការតវ៉ាក៏បានក្លាយជាហិង្សានៅពេលដែលមានការប្រតាយប្រតប់គ្នាជាមួយកម្លាំងសន្តិសុខខណ្ឌ ដែលបណ្ដាលឲ្យអ្នកតវ៉ាមួយចំនួនរងរបួសស្រាល ។
លោក សុភ័ណ្ឌ បាននិយាយនៅខាងក្រៅតុលាការនាថ្ងៃនោះ នៅមុនពេលការចាប់ខ្លួនលោក យ៉ាងដូច្នេះ៖ «វាជាសិទ្ធិរបស់យើងដែលផ្ដល់ដោយច្បាប់ ដែលចែងថា ពលរដ្ឋទូទៅ និងអ្នកគាំទ្រមានសិទ្ធិតាមដាន ។ យើងត្រូវតែក្រោកឈរឡើង និងតស៊ូដើម្បីអ្វីដែលច្បាប់ផ្ដល់ឲ្យយើង»។
អ្នកនាំពាក្យសាលាដំបូងរាជធានីភ្នំពេញ លោក គឹមឡុង បាននិយាយថា មនុស្សពីរនាក់ក្នុងចំណោមអ្នកដែលត្រូវបានចាប់ខ្លួន ម្នាក់ឈ្មោះ ឈឿន ដារ៉ាវី និងម្នាក់ទៀតឈ្មោះ ហ៊ុន វណ្ណៈ ត្រូវបានចោទប្រកាន់នៅថ្ងៃទី១៤ ខែសីហា ពីបទញុះញង់ឲ្យមានវឹកវរធ្ងន់ធ្ងរដល់សន្តិសុខសង្គម ក្រោមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ និងត្រូវបានដាក់ឲ្យស្ថិតក្នុងការឃុំខ្លួននៅមុនពេលបើកសវនាការជំនុំជម្រះក្ដី ។
នគរបាលបានឲ្យដឹងថា មនុស្ស៤នាក់ដែលមិនត្រូវបានចោទប្រកាន់ដោយតុលាការ ត្រូវបានគេដោះលែងវិញហើយ បន្ទាប់ពីពួកគេត្រូវបាន «អប់រំ» និងចុះហត្ថលេខាលើកិច្ចសន្យាដែលសន្យាថា ឈប់តវ៉ាគាំទ្រលោក រ៉ុង ឈុន ទៀត ។
សូ មេត្តា ជាសកម្មជនមួយរូបទៀតដែលបានចូលរួមនៅក្នុងការតវ៉ាកាលពីថ្ងៃទី១៣ ខែសីហា បាននិយាយថា នាងបានឃើញមន្ត្រីស្លៀកពាក់ស៊ីវិល ៥នាក់ ចាប់បោចសក់ ដារ៉ាវី និងវាយរូបនាង នៅមុនពេលចាប់រុញនាងបញ្ចូលទៅក្នុងរថយន្តប្រភេទ SUV នៅវេលាម៉ោង ៣រសៀល ។ ក្រោយពេលការតវ៉ាបានបញ្ចប់ មេត្តា និងសកម្មជនដទៃទៀត បានត្រឡប់ទៅផ្ទះរបស់ ដារ៉ាវី នៅសង្កាត់សំរោងក្រោម ខណ្ឌពោធិ៍សែនជ័យ ដែលនៅទីនោះ ពួកគេបានជួបនគរបាលប្រហែល ៥០នាក់ នៅវេលាម៉ោង ៤រសៀល ហើយនៅចំណុចនេះហើយ ដែល
វណ្ណៈ និងសកម្មជន ៤នាក់ផ្សេងទៀត ត្រូវបានចាប់ខ្លួន ។
មេត្តា បាននិយាយយ៉ាងដូច្នេះថា៖ «ខ្ញុំគិតថា វាជាការរំលោភសិទ្ធិមនុស្ស ដែលគេចាប់មនុស្សដែលពុំបានធ្វើអ្វីដែលខុសច្បាប់សោះ» ។
អ្នកនាំពាក្យនគរបាលជាតិ លោក គឹមខឿន បានមានប្រសាសន៍ថា មន្ត្រីនគរបាលបានដោះលែងសកម្មជន ៤នាក់ផ្សេងទៀតនោះហើយ ។
លោក គឹមខឿន មានប្រសាសន៍ថា៖ «យើងពុំមានភ័ស្តុតាងចោទប្រកាន់ពួកគេទេ យើងគ្រាន់តែអប់រំពួកគេ និងសុំឲ្យពួកគេបញ្ឈប់ការតវ៉ា»។
អ្នកនាំពាក្យនគរបាលជាតិ បានបន្ថែមថា ដារ៉ាវី ត្រូវបានចាប់ខ្លួនបន្ទាប់ពីមានដីកាពីតុលាការ ហើយ វណ្ណៈ ត្រូវបានចាប់ខ្លួន ខណៈដែលមន្ត្រីតុលាការកំពុងធ្វើការអនុវត្តដីកាឆែកឆេរទៅលើផ្ទះរបស់ ដារ៉ាវី ។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍ថា ការឆ្លើយតបរបស់កងកម្លាំងនគរបាលទៅលើការតវ៉ាគាំទ្រលោក រ៉ុង ឈុន គឺពុំមានហេតុផលសមស្របនោះទេ ។
លោកស្រីមានប្រសាសន៍ថា៖ «អាជ្ញាធរបានឆ្លើយតបដោយអំពើហិង្សា និងការបំភិតបំភ័យ ដែលជាការរំលោភដោយឥតខ្មាសអៀនទៅលើសិទ្ធិសេរីភាពក្នុងការប្រមូលផ្ដុំដោយសន្តិវិធី ដែលមានចែងនៅក្នុងទាំងច្បាប់សិទ្ធិមនុស្សជាតិ និងអន្តរជាតិ»។
លោកស្រីបានបន្ថែមថា ការឆែកឆេរផ្ទះរបស់សកម្មជន គឺជាទង្វើបំភិតបំភ័យ ។
លោកស្រី ចក់ សុភាព បានថ្លែងយ៉ាងដូច្នេះថា៖ «ចៅក្រមស៊ើបសួរបានចេញដីកាឆែកឆេរផ្ទះរបស់ ឈឿន ដារ៉ាវី ដើម្បីប្រមូលភ័ស្តុតាងបន្ថែមទៀត ដែលវាហាក់ដូចជាពុំពាក់ព័ន្ធគ្នានឹងបទចោទប្រកាន់ទៅលើរូបនាងឡើយ ហើយវាជាការបំភិតបំភ័យទៅលើរូបនាង គ្រួសាររបស់នាង និងសកម្មជនដទៃទៀត»។
លោកស្រីបន្ថែមថា៖ «ការរំលោភសិទ្ធិសេរីភាពនៃការប្រមូលផ្ដុំនេះ ឆ្លុះបញ្ចាំងអំពីការមិនគោរពសិទ្ធិមនុស្សជាបន្តបន្ទាប់និងដោយចំហរបស់រដ្ឋាភិបាលកម្ពុជា» ៕
ប្រែសម្រួលពីអត្ថបទភាសាអង់គ្លេស៖ Khmer Win Party leader arrested, two more charged with incitement
