លោក គង់ រ៉ៃយ៉ា ជំទប់ឃុំទី២មកពីគណបក្សភ្លើងទៀន បានសម្រេចស្នើសុំលាលែងពីជំទប់ទី២ឃុំស្ដៅ ស្រុកកងមាស ខេត្តកំពង់ចាម ដោយសារតែកត្តាជីវភាព និងការងារ ព្រមទាំងបញ្ហាសុវត្ថិភាពផ្ទាល់ខ្លួន។
លោក រ៉ៃយ៉ា បានលើកឡើងថា លោកមានការព្រួយបារម្ភពីសុវត្ថិភាពផ្ទាល់ខ្លួនពេលទៅធ្វើការដោយលោកថា កាលពីចុងឆ្នាំ២០២០ លោកត្រូវបានគេលួចវាយប្រហារ២លើក ហើយទិដ្ឋភាពទាំងអស់ហ្នឹងវានៅតែដក់ជាប់ក្នុងអារម្មណ៍លោក។ ម៉្យាងវិញទៀត លោកថា កត្ដាជីវភាពក៍គួបផ្សំផងដែរដោយសារប្រាក់ខែដែលលោកទទួលបានមិនគ្រប់គ្រាន់នឹងថ្លៃចំណាយ ទើបលោកសម្រេចចិត្ដលាលែងតែម្ដង។
លោក រ៉ៃយ៉ា ថ្លែងថា៖ «ខ្ញុំត្រូវទៅធ្វើការរាល់ថ្ងៃ ហើយការចំណាយវាលើសប្រាក់ខែដែលខ្ញុំទទួលត្រឹមតែ៨៧ម៉ឺនទេ ហើយចំណូលផ្សេងៗក៏មិនអាចរកបាន ដូច្នេះខ្ញុំមានបញ្ហាជីវភាពដែលត្រូវដោះដែរ។ ចឹងហើយបានជាខ្ញុំលាលែងឈប់ ហើយខ្ញុំទុកឱ្យអ្នកដែលគាត់នៅឃុំស្ដៅជាអ្នកបន្ដធ្វើកិច្ចការងារហ្នឹង»។
លោកបានបន្តថា កត្តាផ្សេងទៀត ដោយសារតែការងារជាជំទប់ទី២គ្មានសិទ្ធិអ្វីក្នុងការចាត់ចែងការងារក្នុងឃុំបាន។ លោកលើកឡើងថា នៅពេលលោកទាមទាររបាយការណ៍ពីកញ្ចប់ថវិកា និងរបាយការណ៍ផ្សេងៗទៀត ខាងឃុំហាក់មិនសហការជាមួយលោកដែលជាហេតុធ្វើឱ្យលោកពិបាកក្នុងការធ្វើការ និងដោយសារតែខាងលោកមានសម្លេងតិចពេក ពេលលោកលើកជាយោបល់អីទៅ ខាងមេឃុំហាក់មិនសូវស្ដាប់។
លោកឱ្យដឹងថា៖ «ខ្ញុំពិបាកទទួលព័ត៌មានពីពួកគាត់[មេឃុំ និងស្មៀន]។ បញ្ហាក្នុងឃុំពួកគាត់ខាងគណបក្សប្រជាជនគាត់អាចដឹងបាន ដោយសារតែពួកគាត់មានទំនាក់ទំនងល្អជាមួយមេភូមិ អនុភូមិ សមាជិកភូមិ គ្រូបង្រៀន និងមេប៉ុស្ដិ៍ ដែលពួកគាត់ទទួលបានព័ត៌មាន។ គ្រប់រឿងទាល់តែខ្ញុំទៅសួរបានពួកគាត់ប្រាប់ តែមិនដែលឱ្យជាលិខិតបញ្ជាក់ការងារណាដល់ខ្ញុំឡើយ»។
លោកថ្លែងទៀតថា លោកបានដាក់លិខិតសុំលាលែងពីជំទប់ទី២ទៅក្រសួងមហាផ្ទៃជិត២ខែមកហើយ ប៉ុន្ដែមិនទាន់ឃើញសេចក្ដីសម្រេចណាមួយនោះទេ ដោយលោកថា ការងាររបស់ក្រសួងមហាផ្ទៃហាក់បង្កភាពស្រពេចស្រពិលដល់រូបលោកជាខ្លាំង។
លោក រ៉ៃយ៉ា បន្ថែមថា៖ «ជារឿងស្រពេចស្រពិលមែនទែន ខ្ញុំមិនយល់ទេថា ហេតុអ្វីនីតិវិធីរបស់ក្រសួងមហាផ្ទៃមានការយឺតយ៉ាវចឹង។ ខ្ញុំមិនដឹងថាលិខិតហ្នឹងទៅដល់ណាទេ ខ្ញុំតែងតែសួរមេឃុំថាលិខិតហ្នឹងទៅដល់ណាហើយ»។
លោក រ៉ៃយ៉ា ក៍បានបញ្ជាក់បន្ថែមថា លោកលាលែងតែពីកិច្ចការនៅឃុំស្ដៅទេ ហើយការងារក្នុងគណបក្សភ្លើងទៀន លោកមិនបានលាឈប់នោះទេ។
លោក គង់ រ៉ៃយ៉ា ត្រូវបានជាប់ជាជំទប់ទី២ក្នុងឃុំស្ដៅ ស្រុកកងមាស ខេត្ដកំពង់ចាម កាលពីបោះឆ្នោតឃុំសង្កាត់អាណត្ដិទី៥ថ្ងៃទី៥ ខែមិថុនា ឆ្នាំ២០២២ ហើយបានបម្រើការងារបានជាង៤ខែ លោកក៏បានសម្រេចចិត្ដលាលែងពីតំណែង ដោយសារកត្ដាជីវភាព និងសុវត្ថិភាព ព្រមទាំងកត្តាការងារ ដោយលោកអះអាងថា មិនសូវទទួលបានព័ត៌មាន និងកិច្ចសហការពីមេឃុំ ក៏ដូចជាក្រុមប្រឹក្សា។
ថ្ងៃទី១៧ ខែកក្កដា ឆ្នាំ២០២២ អនុប្រធានក្រុមការងារគណបក្សភ្លើងទៀន ខណ្ឌពោធិ៍សែនជ័យ លោក លន់ ពង្សធិរិទ្ធ ត្រូវបានក្រុមជនល្មើសជិះម៉ូតូវាយត្រង់ក្បាលឱ្យរបួសធ្ងន់ នៅក្បែរទីស្នាក់ការគណបក្សភ្លើងទៀនខណ្ឌ ស្របពេលលោកជិះម៉ូតូទៅចូលរួមប្រជុំគណបក្ស។
ជុំវិញរឿងនេះការលាឈប់នេះ លោក ចេប គឹមអ៊ាង អនុប្រធានគណបក្សភ្លើងទៀន បានប្រាប់ខេមបូចាថា ការលាលែងឈប់ពីជំទប់ទី២របស់គណបក្សភ្លើងទៀននៅឃុំស្ដៅ មិនបានប៉ះដល់គណបក្ស ឬនយោបាយនោះទេ តែវាជាសិទ្ធិបុគ្គល។ លោកថា កន្លងមក ករណីមួយចំនួនក៏តែងតែកើតលើមន្ដ្រីគណបក្សភ្លើងទៀនច្រើនដែរ ជាពិសេសការធ្វើទុក្ខម្នេញដោយមិនសូវសហការ និងអ្នកខ្លះក៏នៅតែរងបណ្ដឹងជាច្រើនផ្សេងទៀត ទាំងនេះសុទ្ធតែជាបញ្ហាដែលធ្វើឱ្យមន្ដ្រីឃុំសង្កាត់របស់គណបក្សភ្លើងទៀនពិបាកធ្វើការ។
លោក គឹមអ៊ាង បន្ដថា៖ «ការលាលែងរបស់គាត់មិនធ្វើឱ្យប៉ះពាល់ដល់គណបក្ស ឬនយោបាយឡើយ វាជាសិទ្ធិបុគ្គលទេ»។ លោកបន្ថែមថា៖ «មេឃុំ និងក្រុមប្រឹក្សាគឺមានតួនាទីធ្វើយ៉ាងណាឱ្យភូមិឃុំមានការអភិវឌ្ឍ ប៉ុន្ដែមានចំណុចខ្លះនូវមិនទាន់បានធ្វើពេញលេញនោះទេ។ ខ្ញុំជឿថា នៅមូលដ្ឋាននៅតែមានបញ្ហាមិនយោគយល់គ្នា ហើយបញ្ហាទាំងអស់នេះមន្ដ្រីរបស់គណបក្សភ្លើងទៀនតែងតែជួប»។
ចាប់តាំងពីគណបក្សភ្លើងទៀនចាប់ផ្តើមធ្វើសកម្មភាពកាលពីដើមឆ្នាំ២០២២នេះ មានសកម្មជនគណបក្សភ្លើងទៀនមិនតិចជាង៣០នាក់ទេ ដែលកំពុងជាប់ពាក់ព័ន្ធនឹងនីតិវីធីតុលាការ ក្នុងនោះមានសកម្មជនអតីតគណបក្សសង្គ្រោះជាតិដែលចង់ចូលមកគណបក្សភ្លើងទៀន ហើយរងការកាត់ទោសដាក់ពន្ធនាគារ អ្នកដែលរងការចោទប្រកាន់ពីការក្លែងឯកសារ និងអ្នកដែលមានដីកាកោះឱ្យចូលខ្លួន ហើយបានរត់ចោលផ្ទះសម្បែង។
លោក ឡាយ សេងហុង មេឃុំស្ដៅ បានថ្លែងថា លោកសុំបដិសេធការលើកឡើងរបស់លោក គង់ រ៉ៃយ៉ា ដែលថាលោកមិនសូវសហការ និងមិនផ្ដល់របាយការណ៍ពីកញ្ចប់ថវិកា និងរបាយការណ៍ផ្សេងៗទៀត។ លោកបន្តថា លោកតែងតែសហការ និងអនុគ្រោះចំពោះលោក គង់ រ៉ៃយ៉ា បើទោះបីជាមិនសូវគោរពពេលវេលា និងច្បាប់រដ្ឋបាល ដោយសារលោកយល់ថា ផ្ទះនៅភ្នំពេញហើយត្រូវមកធ្វើនៅឃុំស្ដៅវាឆ្ងាយ ទើបលោកមិនប្រកាន់ឡើយ។
ទោះយ៉ាងណា លោកមេឃុំក៏បានលើកសរសើរ និងទទួលស្គាល់ថា លោក គង់ រ៉ៃយ៉ា ធ្វើការងារបានល្អពាក់ព័ន្ធនឹងការសួរនាំពីកង្វល់ និងបញ្ហាប្រឈមរបស់ប្រជាពលរដ្ឋក្នុងពេលដែលបំពេញការងារ។ លោកថា លោក គង់ រ៉ៃយ៉ា មានចេតនាចង់ទាញរឿងទាំងអស់ហ្នឹងទៅជារឿងនយោបាយ ទាំងដែលសកម្មភាពរបស់លោកមិនមែនជារឿងនយោបាយសុទ្ធសាធ។
លោក សេងហុង បានគូសបញ្ជាក់ថា៖ «ពេលដែលគាត់ចូលមកធ្វើការនៅឃុំ គាត់[គង់ រ៉ៃយ៉ា]សួរយើងមែន សួរយើងពីថវិកា ហើយយើងក៏បានប្រាប់គាត់រួចហើយដែរថា យើងចំណាយលើអីខ្លះ ប៉ុន្ដែនៅតែសួរថាឃុំមានលុយអត់ៗ ដែលជាសំណួរដែលខុសគោលការណ៍យើងឆ្លើយ»។
លោកមេឃុំបន្ថែមទៀតថា៖ «ឯកសារជាលិខិតដូចជាខ្ញុំមិនដែលឃាត់ឃាំងអីទេ គាត់ទៅយកពីខាងស្មៀន ស្មៀនមានទាំងអស់ ព្រោះមិនមែនខ្ញុំជាអ្នកកាន់របាយការណ៍ទេ។ ចំណូលចំណាយគេមានទាំងអស់ ហើយខ្ញុំសហការជាមួយគាត់រហូត សូម្បីដោះស្រាយទំនាស់អីក៏ខ្ញុំឱ្យគាត់ជាអ្នកចេញមុខដែរ»។
លោក អែម វាសនា នាយកដ្ឋានកិច្ចការសមាគម និងគណបក្សនយោបាយនៃក្រសួងមហាផ្ទៃ បានបញ្ជាក់ថា លោកមិនអាចឆ្លើយនឹងសំណួរខេមបូចា បានទេ ដោយលោករុញឱ្យទៅសួរខាងអគ្គឬក៏អ្នកនាំពាក្យក្រសួងមហាផ្ទៃវិញ។
លោកថ្លែងថា៖ «ខ្ញុំឆ្លើយអត់បានទេ! សួរទៅអ្នកនាំពាក្យរបស់អគ្គក៏បាន អ្នកនាំពាក្យរបស់ក្រសួងមហាផ្ទៃក៏បាន ខ្ញុំត្រឹមមន្ដ្រីបច្ចេកទេស ខ្ញុំអត់អាចឆ្លើយបាន!»។
បើតាមលោក ខៀវ សុភ័ក្រ អ្នកនាំពាក្យក្រសួងមហាផ្ទៃបានមានប្រសាន៍ថា ករណីរឿងការបញ្ចប់តំណែងជំទប់ទី២នៅឃុំស្ដៅ លោកមិនទាន់ទទួលបានលិខិតរបស់លោក គង់ រ៉ៃយ៉ា នោះទេ។ តែលោកបានបញ្ជាក់ថា ករណីនេះខាងក្រសួងមហាផ្ទៃគ្មានសិទ្ធិអ្វីនឹងត្រូវទទួលខុសត្រូវឡើយ វាជាចំណាត់ការរបស់គណបក្សរបស់សាមីខ្លួនផ្ទាល់ និងគជប ដែលជាអ្នកសម្រេចលើករណីនេះ។
អ្នកនាំពាក្យក្រសួងមហាផ្ទៃបន្ដថា៖ «រឿងបញ្ចប់តំណែង ឬមិនបញ្ចប់តំណែងមិនមែនក្រសួងមហាផ្ទៃមានសិទ្ធិទេ ព្រោះគាត់ជាប់ដោយសន្លឹកឆ្នោត ដូច្នេះក្រសួងមិនមានសិទ្ធិបញ្ចប់តំណែងអ្នកណាបានទេ។ គាត់[គង់ រ៉ៃយ៉ា]អាចសុំលាលែងពីគណបក្សគាត់ទៅ»។
កាលពីខែមិថុនា ឆ្នាំ២០២២ កន្លងទៅសមាជិកគណបក្សភ្លើងទៀនពីររូប ម្នាក់បម្រើការជាមន្រ្តីរាជការនៅក្រសួងសុខាភិបាល និងម្នាក់ទៀតជាមន្រ្តីនគរបាលត្រូវបានបណ្តេញចេញពីក្របខណ្ឌ ដែលការណ៍នេះពួកគេសង្ស័យថា បណ្តាលមកពីសកម្មភាពនយោបាយរបស់ពួកគេ។
ចំណែកឯ លោក ហង្ស ពុទ្ធា អ្នកនាំពាក្យ គណៈកម្មាធិការរៀបចំការបោះឆ្នោតជាតិ(គជប) បានមានប្រសាសន៍ថា ពាក់ព័ន្ធនឹងករណីរឿងលោក គង់ រ៉ៃយ៉ា លាលែងឈប់នេះ មិនប៉ះពាល់ដល់ គជប ទេ។ លោកថា បើសិនជាឈប់ គជប នឹងប្ដូរបេក្ខជនបន្ទាប់រូបណាដែលអាចបន្ដការងារជំនួសបាន។
លោក ពុទ្ធា ថ្លែងថា៖ «បើគាត់លាលែង នោះតួនាទី គជប នឹងរៀបបេក្ខជនបន្ទាប់ដែលមានឈ្មោះក្នុងបញ្ជីបេក្ខជនហ្នឹង រំកិលឡើងមកលើដើម្បីដាក់ឈ្មោះនោះជំនួស ដោយសហការ និងគណបក្សនយោបាយដែលគាត់ដាក់តាមរយៈហ្នឹង បាទ»។
កាលពីខែមីនា ឆ្នាំ២០២២ មុនការបោះឆ្នោតជ្រើសរើសក្រុមប្រឹក្សាឃុំសង្កាត់ដែលខិតជិតមកដល់សកម្មជនគណបក្សភ្លើងទៀនយ៉ាងតិច១០នាក់ ត្រូវបានប៉ូលិសមូលដ្ឋាន ហៅទៅសួរនាំដោយគ្មានបង្ហាញដីកា ឬបញ្ជាក់មូលហេតុអ្វីឡើយ។ នេះបើតាមកំណត់ហេតុរបស់គណបក្សប្រឆាំងដ៏ធំមួយនេះ។
ទន្ទឹមនឹងនេះ លោក កង សាវាង្ស មន្រ្ដីសម្របសម្រួលផ្នែកអង្កេតនៃអង្គការខុមហ្រ្វែល បានមានប្រសាសន៍ថា នៅក្នុងច្បាប់មានចែងអំពីអាណត្ដិ និងការកំណត់របស់ក្រុមប្រឹក្សាឃុំសង្កាត់ដែលមានចែងនៅក្នុងច្បាប់គ្រប់គ្រងរដ្ឋបាលឃុំសង្កាត់ គឺមានចែងនៅក្នុងហ្នឹង ប៉ុន្ដែលោកមិនអត្ថាធិប្បាយលម្អិតនោះទេ។
លោកបន្តថា ការឈប់ដោយបុគ្គលខ្លួនឯង ឬក៏គណបក្សជាអ្នកបញ្ឈប់វាអាស្រ័យលើអង្គហេតុ តែបើសិនជាពួកគាត់ឈប់ដោយសារតែធ្វើការងារមិនចុះសម្រុងនឹងគ្នា អាហ្នឹងវាជារឿងដែលគួរតែមានការស៊ើបអង្កេតឱ្យបានច្បាស់លាស់សិន ជាពិសេសក្រសួងមហាផ្ទៃត្រូវពិនិត្យ និងស៊ើបអង្កេតថាតើមានអ្វីនៅពីក្រោយខ្នងរឿងទាំងអស់ហ្នឹង។
លោក សាវាង្ស បន្ថែមថា៖ «ក្រសួងមហាផ្ទៃគួរតែស៊ើបអង្កេត ដើម្បីរកដំណោះស្រាយលើករណីហ្នឹងបើសិនជាបញ្ហាមិនចុះសម្រុងនឹងគ្នា។ ប៉ុន្ដែបើបុគ្គលជាអ្នកសុំលាលែងទេ អាហ្នឹងជាសិទ្ធិហើយ គ្មានអ្នកណាអាចហាមឃាត់បានទេ»៕