សមាគមសម្ព័ន្ធអ្នកសារព័ត៌មានកម្ពុជា

ក្រុមហ៊ុនអ៊ីនធឺណិតក្នុងស្រុកបារម្ភពីការបង្កើនថ្លៃចំណាយ និងសន្តិសុខទិន្នន័យពាក់ព័ន្ធនឹងច្រកទ្វារអ៊ីនធឺណិតជាតិ

ក្រុមហ៊ុនផ្តល់សេវាកម្មអ៊ីនធឺណិតក្នុងស្រុកបានបង្ហាញការព្រួយបារម្ភពីការចំណាយថ្មី និងបញ្ហាភាពពឹងផ្អែកបានរបស់បណ្តាញអ៊ីនធឺណិតពាក់ព័ន្ធនឹងច្រកទ្វារអ៊ីនធឺណិតជាតិ ដែលបានដាក់ចេញនៅក្នុងអនុក្រឹត្យរបស់រដ្ឋាភិបាលកាលពីសប្តាហ៍មុន។ ខេមបូចា/ព្រីង សំរាំង
ក្រុមហ៊ុនផ្តល់សេវាកម្មអ៊ីនធឺណិតក្នុងស្រុកបានបង្ហាញការព្រួយបារម្ភពីការចំណាយថ្មី និងបញ្ហាភាពពឹងផ្អែកបានរបស់បណ្តាញអ៊ីនធឺណិតពាក់ព័ន្ធនឹងច្រកទ្វារអ៊ីនធឺណិតជាតិ ដែលបានដាក់ចេញនៅក្នុងអនុក្រឹត្យរបស់រដ្ឋាភិបាលកាលពីសប្តាហ៍មុន។ ខេមបូចា/ព្រីង សំរាំង

ក្រុមហ៊ុន​ផ្គត់ផ្គង់​សេវាកម្ម​អ៊ីនធឺណិត មេគង្គណិត (MekongNet) និយាយ​ថា ខ្លួន​ព្រួយបារម្ភ​ពី​បណ្តាញ​អ៊ីនធឺណិតដែល​អាច​ជឿជាក់​បាន​ និង​ការ​ចំណាយបន្ថែម​លើការ​វិនិយោគ​​នានា​ ទាក់ទង​ទៅនឹង​ការបង្កើត​​ច្រកទ្វារ​អ៊ីនធឺណិត​ជាតិលើក​ដំបូង​របស់​កម្ពុជា ដែល​នឹង​ផ្តល់​អំណាចដល់​រដ្ឋាភិបាល​ក្នុង​ការ​​គ្រប់គ្រង​មក​លើ​​ទំនាក់ទំនង​តាម​ប្រព័ន្ធ​អ៊ីនធឺណិត​របស់​ពលរដ្ឋ​កម្ពុជា។ ​

អនុក្រឹត្យ​ដែល​បាន​ចេញ​កាល​ពី​សប្តាហ៍​មុន​ បាន​អនុញ្ញាត​ឲ្យ​មាន​ការ​បង្កើត​ជា​ច្រកទ្វារ​អ៊ីនធឺណិត​ជាតិ​ ដើម្បី​គ្រប់គ្រង​លើ​លំហូរ​ព័ត៌មាន​តាម​ប្រព័ន្ធ​អ៊ីនធឺណិត​ ក្នុង​គោលបំណង «កៀរគរ​ចំណូល​ជាតិ រក្សា​សណ្តាប់ធ្នាប់​សាធារណៈ សន្តិសុខជាតិ និង​ប្រពៃណី​វប្បធម៌»។ ប៉ុន្តែ​អង្គការ​ការពារ​សិទ្ធិ​និយាយ​ថា ច្រកទ្វារ​អ៊ីនធឺណិត​អាច​ត្រូវ​ប្រើប្រាស់​ដើម្បី​រឹតត្បិត​ការ​បញ្ចេញ​មតិ​តាម​ប្រព័ន្ធ​អ៊ីនធឺណិត និង​ពង្រឹង​យុទ្ធសាស្រ្ត​ឃ្លាំ​មើល​ដែល​កំពុង​ត្រូវ​បាន​ប្រើប្រាស់​រួច​ស្រាប់ទៅ​ហើយ​​ដើម្បី​កំណត់​​គោលដៅ​មក​លើ​ក្រុម​អ្នក​រិះគន់។ ​

លោកស្រី​សុខ ចិន្តា​ នាយិកា​​ប្រតិបតិ្ត​ក្រុមហ៊ុន មេគង្គណិត បាន​និយាយ​ថា ក្រុមហ៊ុនមេគង្គណិត កំពុង​​រង់ចាំ​សេចក្តីណែនាំ​ផ្នែក​បច្ចេកទេស​បន្ថែម​ពី​រដ្ឋាភិបាល​ពាក់ព័ន្ធ​នឹង​អនុក្រឹត្យ​ថ្មីនេះ​។

លោកស្រី​បាន​លើកឡើង​ថា រដ្ឋាភិបាល​ចង់​គ្រប់គ្រង់​លើ​សន្តិសុខ​តាម​ប្រព័ន្ធ​អ៊ីនធឺណិត ប៉ុន្តែ​រដ្ឋាភិបាល​ក៏​ត្រូវ​ធានា​ផង​ដែរ​ថា ព័ត៌មាន​និង​ទិន្នន័យ​របស់​អតិថិជន​មិន​ត្រូវ​ធ្វើ​ឲ្យ​បែកធ្លាយ​នោះ​ទេ។​

លោកស្រី​បាន​ថ្លែង​ថា៖ «ប្រសិន​បើ​ទិន្នន័យ​ត្រូវ​បែកធ្លាយ វា​នឹង​ប៉ះពាល់​មក​លើ​អតិថិជន​របស់​យើង។ ខ្ញុំ​សូម​លើក​ឧទាហរណ៍​ដូចជា ទិន្នន័យ​ធនាគារ​អាច​បែកធ្លាយ ហើយ​នឹង​ប៉ះពាល់​ដល់​ពួកគាត់។ នេះ​ជា​រឿង​ដែល​យើង​ព្រួយបារម្ភ។ ឬ​ទិន្នន័យ​អាច​ត្រូវ​ផ្តល់​ឲ្យ​ដល់​គូ​ប្រជែង​ផ្នែក​អាជីវកម្ម​របស់​យើង»។​

លោកស្រី​ចិន្តា​បាន​​និយាយ​ថា ចរាចរណ៍​ទិន្នន័យ​តាម​ប្រព័ន្ធ​អ៊ីនធឺណិត​តាម​ច្រក​តែ​មួយ​នឹង​ជា​​បញ្ហា​ព្រួយបារម្ភ​សម្រាប់​ក្រុមហ៊ុន​ផ្គត់ផ្គង់​សេវាកម្ម​អ៊ីនធឺណិត ពីព្រោះត្រូវ​បង្កើនការ​វិនិយោគនៅក្នុង​ច្រក​ទ្វារ​នេះ។​

លោកស្រី​បាន​លើកឡើង​ថា៖ «នៅ​ពេលយើង​ត្រូវ​ឆ្លងកាត់​ច្រក​តែ​មួយ​ យើង​បារម្ភ​ថា ពេល​ដែល​ច្រកទ្វារ​អ៊ីនធឺណិត​ត្រូវ​បាន​កាត់ផ្តាច់ នោះ​ក្រុមហ៊ុន​ផ្គត់ផ្គង់​សេវាកម្ម​អ៊ីនធឺណិត​ទាំងអស់​នឹង​ត្រូវ​កាត់ផ្តាច់​ដូចគ្នា​ផង​​ដែរ»។ ​

លោកស្រីបន្ថែម​ថា ក្រុមហ៊ុន​ផ្គត់ផ្គង់​សេវាកម្ម​អ៊ីនធឺណិត​បាន​ដាក់​សំណើ​ពីការ​​ព្រួយបារម្ភ​នេះ​ទៅ​កាន់​ក្រសួង​ប្រៃសណីយ៍ និង​ទូរគមនាគមន៍​​ក្នុង​អំឡុងពេល​ដែល​ពួកគេ​​ត្រូវ​បាន​អញ្ជើញ​ដើម្បី​ប្រឹក្សា​យោបល់​លើ​អនុក្រឹត្យ។ ប៉ុន្តែ​មក​ទល់​ពេល​នេះ ពួកគេ​មិនទទួល​បាន​ការ​ឆ្លើយតប​នោះ​ទេ។

រដ្ឋាភិបាល​កម្ពុជា​បាន​អះអាង​ថា ច្រកទ្វារ​អ៊ីនធឺណិត​នឹង​លើក​កម្ពស់​ការ​ត​ភ្ជាប់​បណ្តាញ​អ៊ីនធឺណិត ផ្តល់​ឱកាស​ដើម្បី​លុប​បំបាត់​ការ​គំរាមកំហែង​លើ​សន្តិសុខ​ជាតិ និង​ជំរុញ​ការ​ប្រមូល​ថវិកា​ជាតិ។ កាល​ពី​សប្តាហ៍​មុន ក្រសួង​ប្រៃសណីយ៍ និង​ទូរគមនាគមន៍​បាន​ច្រាន​ចោល​ការ​ព្រួយបារម្ភ​លើកឡើង​​ដោយ​អង្គការ​ការពារ​សិទ្ធិ​ ដោយ​និយាយ​ថា ការ​លើកឡើង​​​ទាំង​នោះ​គឺ «មិន​មាន​មូលដ្ឋាន​ច្បាស់​លាស់ ធ្វើ​ឡើង​ក្នុង​ហេតុផល​នយោបាយ មិន​ពិត និង​ផ្ទុយ​ពី» គោលបំណង​ចែង​នៅ​ក្នុង​អនុក្រឹត្យ។

លោក ជា វ៉ាន់ដេត រដ្ឋមន្រ្តី​ក្រសួង​ប្រៃសណីយ៍ និង​ទូរគមនាគមន៍​ បាន​មានប្រសាសន៍សម្រាល​ការ​ព្រួយបារម្ភ ដោយ​លើក​ឡើង​ថា ក្រុមបច្ចេកទេស​របស់​ក្រសួង​កំពុង​ពិភាក្សា​ដើម្បី​ដាក់​បញ្ចូល​បច្ចេកវិទ្យា​ថ្មី​សម្រាប់​ច្រកទ្វារ​អ៊ីនធឺណិត​ជាតិ។

​លោក​បាន​ថ្លែង​ថា៖ «ប្រតិបត្តិករ​មួយ​ចំនួន​ប្រហែល​ព្រួយបារម្ភ​អំពី​រឿង​នេះ ប៉ុន្តែ​យើង​មាន​ច្រកទ្វារ​មួយ​ចំនួន​ដើម្បី​ត​ភ្ជាប់​ ដូចជា នៅ​ក្រុង​ប៉ោយប៉ែត ក្រុង​ភ្នំពេញ​ និង​ក្រុង​ព្រះសីហនុ។ ដូច្នេះ​​ វាមិនគួរ​ជា​ការ​ព្រួយបារម្ភ​នោះ​ទេ»។​

អនុក្រឹត្យ​ខាង​លើ​អនុញ្ញាត​ឲ្យ​មាន​ការ​ផ្តល់​អាជ្ញាបណ្ណ​ដល់​ប្រតិបត្តិករ​ច្រកទ្វារ​អ៊ីនធឺណិត​ជាតិ​ដើម្បី​គ្រប់គ្រង​ច្រកទ្វារ​ទាំង​នេះ ប៉ុន្តែមិន​បាន​ផ្តល់​នូវ​សេចក្តីលម្អិត​ដែល​ថា ក្រុមហ៊ុន​ណា​នឹង​ទទួល​បាន​សិទ្ធិ​គ្រប់គ្រង​លើ​ចរាចរណ៍​ទិន្នន័យ​តាម​ប្រព័ន្ធ​អ៊ីនធឺណិត​នៅ​កម្ពុជា​នោះ​ទេ។

លោក​បាន​ថ្លែង​ថា ក្រសួង​បាន​អញ្ជើញ​ក្រុមហ៊ុន​ឯកជន​សម្រាប់​ការ​ពិគ្រោះយោបល់​ចំនួន​បី​លើក ហើយ​នឹង​បន្ត​ពិភាក្សា​ពី​ច្រកទ្វារ​អ៊ីនធឺណិត​ជាតិ​ជាមួយ​ក្រុមហ៊ុន​ទាំង​នោះ។​

សកម្មជន​សិទ្ធិ​មនុស្ស និង​អង្គការ​សង្គមស៊ីវិល​កាល​ពី​សប្តាហ៍​មុន​បាន​បញ្ចេញ​នូវ​សេចក្តីថ្លែងការណ៍​ដោយ​អំពាវនាវ​ឲ្យ​មាន​ការ​ទម្លាក់​ចោល​នូវ​អនុក្រឹត្យ​ខាង​លើ។ ​

​លោក​ អ៊ុល វ៉ាន់ ប្រធាន​អង្គការ​បណ្តាញ​យុវជន​កម្ពុជា និយាយ​ថា រដ្ឋាភិបាល​មាន​បំណង​គ្រប់គ្រង​លើ​ចរាចរណ៍​អ៊ីនធឺណិត​នៅ​កម្ពុជា ​ស្រប​ពេល​​សកម្មភាព​តាម​ប្រព័ន្ធ​អ៊ីនធឺណិត​​កំពុង​កើនឡើង​យ៉ាងខ្លាំង​នៅ​ក្នុង​ប្រទេស។

លោក​បាន​មានប្រសាសន៍​ថា៖ «ឥឡូវ​នេះ​យើង​​ឃើញ​មនុស្ស​កាន់​តែ​ច្រើន​ប្រើប្រាស់​អ៊ីនធឺណិត​ជា​វេទិកា​ដើម្បី​ទាក់ទង​គ្នា​ និង​ចែករំលែក​ព័ត៌មាន។ ពួកគេ​ប្រើប្រាស់​ប្រព័ន្ធ​អ៊ីនធឺណិត​ដើម្បី​បង្ហាញ​ការ​ព្រួយបារម្ភ​របស់​ពួកគេ និង​អំពាវនាវ​ឲ្យ​មាន​ការ​ដោះស្រាយ​បញ្ហា​ផ្សេងៗ»។​

លោក​បាន​បន្ត​ថា ច្រកទ្វារ​អ៊ីនធឺណិត​ជាតិ​អាច​ឲ្យ​រដ្ឋាភិបាល​គ្រប់គ្រង ឬ​រក្សា​ទុក​ទិន្នន័យ​ និង​ព័ត៌មាន​របស់​អ្នកប្រើប្រាស់​ ដែល​នេះ​​អាច​គំរាមកំហែង​ដោយ​សិទ្ធិ​ឯកជនភាព។ ​

លោក​បាន​ថ្លែង​ថា៖ «យើង​មិន​ដឹង​ថា រដ្ឋាភិបាល​នឹង​ប្រើប្រាស់​ទិន្នន័យ​សម្រាប់​ហេតុផល​ណាមួយ​​នោះ​ទេ ជា​ពិសេស​ទិន្នន័យ​របស់​អ្នក​នយោបាយ សកម្មជន​សិទ្ធិ​មនុស្ស ឬ​អ្នក​ដែល​ជា​គោល​ដៅ​របស់​​រដ្ឋាភិបាល»

ប្រែសម្រួលពីអត្ថបទភាសាអង់គ្លេស៖ Local ISP concerned about costs and data security with new internet gateway

251 views

ព័ត៌មានថ្មីៗ

អត្ថបទពេញនិយម