ប្រជាពលរដ្ឋសហគមន៍ឡកំបោរ រស់នៅក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ កំពុងមានការព្រួយបារម្ភថាថ្ងៃណាមួយអាជ្ញាធរនឹងយកគ្រឿងចក្រមកឈូសឆាយផ្ទះ របស់ពួកគាត់ទាំងមិនទាន់ទទួលបានសំណង ខណៈពួកគាត់រងផលប៉ះពាល់ពីគម្រោងពង្រីកផ្លូវ៣០ម៉ែត្រ និងត្រូវបានចោទប្រកាន់ថារស់នៅខុសច្បាប់លើមាត់បឹង។
កញ្ញា ប៉ូគឹមថេង សុតធីតា ដែលត្រូវបានគេស្គាល់ថាជា Miss Grand Cambodia ឆ្នាំ២០២១ បានបង្ហោះវីដេអូមួយក្នុងគណនីហ្វេសបុករបស់ខ្លួន ដែលបានបង្ហាញអំពីសកម្មភាពរបស់អាជ្ញាធរកំពុងវាយកំទេចរបងហាងកាហ្វេរបស់គាត់ នៅដើមខែកក្កដានេះ ។
នៅក្នុងវីដេអូនោះ កញ្ញា សុតធីតា បានស្រែកថា៖ «ពួកខ្ញុំខុសអី ពួកខ្ញុំសាងសង់លើដីរបស់ពួកខ្ញុំ ខ្ញុំអត់មានប៉ះពាល់លើដីរដ្ឋទេ។ អ្នកទាំងអស់គ្នាជួយមើលយុត្តិធម៌នៅកន្លែងណា មកបំផ្លាញទ្រព្យសម្បត្តិរបស់ខ្ញុំ ខ្ញុំជាប្រជាពលរដ្ឋធម្មតា អាចនិយាយជាមួយខ្ញុំបាន។ ហេតុអ្វីបានបំផ្លាញទ្រព្យសម្បត្តិឯកជនរបស់ពួកខ្ញុំ សងអ្វីដែលជារបស់ខ្ញុំវិញ ខ្ញុំសង់ដោយញើសឈាមខ្ញុំ លុយកាក់ខ្ញុំ»។
សារព័ត៌មានខេមបូចាពុំអាចសូមការអត្ថាធិប្បាយបន្ថែមពីកញ្ញា ប៉ូគឹមថេង សុតធីតា បានទេ ដោយខលពុំមានអ្នកលើកទូរសព្ទ។
ចំណែកអ្នកស្រី ហ៊ី សុខហុយ វ័យ២៧ឆ្នាំ មានផ្ទះថ្មនៅជាប់មាត់ផ្លូវចាក់បេតុង បាននិយាយថា អ្នកស្រី កំពុងមានការព្រួយបារម្ភថាថ្ងៃណាមួយករណីវាយកំទេចផ្ទះឬរបងនឹងធ្លាក់លើគ្រួសាររបស់គាត់។
អ្នកស្រី ហ៊ុយ ឱ្យដឹងថា៖ «ថ្ងៃហ្នឹងផ្ទះគេ តិចថ្ងៃក្រោយផ្ទះឯង ពីរនាក់ប្ដីប្រពន្ធចេះតែភ័យ ដេកៗគេមកវាយផ្ទះម៉េចដឹង»។
អ្នកស្រី ហ៊ុយ បានបដិសេធក្នុងការដោះដូរដី ដែលមានទីតាំងនៅខាងក្រោយវត្តទួលសន្តិវ័ន្ត ហៅវត្តទួលអស់លោក ស្ថិតក្នុងភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ដែលស្នើឡើងដោយអាជ្ញាធរ។ អ្នកស្រី ឱ្យដឹងថា ទីតាំងដីដែលដោះដូរនោះ គឺស្ថិតនៅក្បែរលូ ព្រមទាំងមានក្លិនស្អុយទៀត។
អ្នកស្រី ហ៊ុយ បន្ថែមថា៖ «ការដោះស្រាយវារញ៉េរញ៉ៃ ហើយអាជ្ញាធរធ្វើមកលើយើងវាដូចឃោរឃៅ។ ចេញមកសុទ្ធយកគ្រឿងចក្រមកវាយ ហើយមិនមែនតែម្ដងហ្នឹង ច្រើនលើកច្រើនសារ សុទ្ធគំរាម ដូចយើងទៅតវ៉ា សុទ្ធគំរាមចង់វាយខ្នោះវាយអីយើង»។
ស្រ្តីមានកូនស្រី២នាក់នៅក្នុងបន្ទុករូបនេះ បន្ថែមថា ទីលំនៅបច្ចុប្បន្នបានបង្កឱ្យមានអំណោយផលសម្រាប់អ្នកស្រី ក្នុងការប្រកបរបររកស៊ី ដោយសារនៅមុខផ្លូវធំ។ អ្នកស្រីស្នើសុំឱ្យមានការអភិវឌ្ឍនៅហ្នឹងកន្លែងដោយចេញជាប្លង់កម្មសិទ្ធិ ឬផ្ដល់សំណងសមរម្យតាមតម្លៃទីផ្សារ។
អ្នកស្រី ហ៊ុយ អះអាងទៀតថា ផ្ទះថ្មដែលកំពុងស្នាក់នៅ បានសាងសង់អស់ថវិកាជិត៣ម៉ឺនដុល្លារ ហើយការប្រកបរបរបើកវីងនៅពីមុខផ្ទះ បានជួយឱ្យគ្រួសាររបស់គាត់ អាចរកប្រាក់ចំណូលបានចន្លោះ២ពាន់់ដុល្លារទៅ៣ពាន់ដុល្លារក្នុង១ខែទៀតផង។
អ្នកស្រី ស៊ន ង៉ែត អាយុ៥៤ឆ្នាំ រស់នៅភូមិឡកំបោរ អស់រយៈពេល២៧ឆ្នាំ តាំងពីមិនទាន់មានផ្លូវបេតុង ទឹងស្អាតនិងភ្លើងសម្រាប់ប្រើប្រាស់ បានលើកឡើងថា សកម្មភាពរបស់អាជ្ញាធរ គឺជាការធ្វើបាបប្រជាពលរដ្ឋ ហើយគេចវេះមិនរកដំណោះស្រាយ។
អ្នកស្រី ង៉ែត បន្តថា៖ «មានអារម្មថា គាត់ធ្វើចឹងធ្វើបាបប្រជាពលរដ្ឋ ធ្វើបាបប្រជាពលរដ្ឋចឹង ពលរដ្ឋអាចនាំគ្នាស្រុះគ្នានាំគ្នាតវ៉ាមិនឱ្យធ្វើចឹងទេ[វាយកំទេចផ្ទះ] ត្រូវសួរពលរដ្ឋ ពួកគាត់ចង់បានអី»។
អ្នកស្រី ង៉ែត ឱ្យដឹងថា ផ្ទះអ្នកស្រីនៅផ្លូវលំខាងក្នុង បើទោះបីជាពង្រីកផ្លូវ៣០ម៉ែត្ររួចរាល់ក្ដី ក៏មិនប៉ះពាល់ឡើយ ដូច្នេះអ្នកស្រីទាមទារឱ្យអាជ្ញាធរផ្ដល់ប្លង់កម្មសិទ្ធិ។
អ្នកស្រី ង៉ែត បន្ថែមថា៖ «ខ្ញុំជំរាបទៅអភិបាលខណ្ឌថា ដីខ្ញុំទោះបីធ្វើផ្លូវ៣០ម៉ែត្រហើយក៏ខ្ញុំអត់ប៉ះពាល់ដែរ នៅ១០ម៉ែត្រទៀត។ គាត់(អភិបាលខណ្ឌឫស្សីកែវ)ថាចាំមើលធ្វើផ្លូវហើយ ស្នើទៅសាលាក្រុងរកដំណោះស្រាយថាយើងនៅហ្នឹងបានមិនបាន ដីយើងនៅសល់ហ្នឹង»។
កាលពីថ្ងៃចន្ទសប្ដាហ៍មុន ពលរដ្ឋសហគមន៍ឡកំបោរប្រមាណ៤០នាក់បានជួបជុំគ្នាដើម្បីពិភាក្សា និងឆ្លើយតបទៅនឹងការស្នើសុំរបស់អាជ្ញាធរក្នុងការដោះដូរដី ទៅនៅខាងក្រោយវត្តទួលសន្តិវ័ន្ត ហៅវត្តទួលអស់លោក ក្នុងខណ្ឌឫស្សីកែវ ក្រោយការប្រជុំរួច តំណាងពលរដ្ឋអ្នកស្រី រឿង អូន ថ្លែងថា ប្រជាពលរដ្ឋដែលរងផលប៉ះពាល់ទាំងអស់ បានសម្រេចចិត្តពុំព្រមធ្វើការដោះដូរដីតាមការស្នើសុំរបស់អាជ្ញាធរឡើយ។
អ្នកស្រី អូន បានថ្លែងថា៖ «ពួកខ្ញុំប្រជុំគឺសម្រេចគ្នាមិនដូរ ហើយសូមឱ្យអាជ្ញាធរគាត់ទិញ ចង់ថាលក់ទៅខ្ញុំយកលុយទៅទិញដីនៅជិតបងប្អូនចឹង។ ការលក់តាមម្ចាស់រៀងខ្លួន»។
បើតាមតំណាងពលរដ្ឋរូបនេះ បានឱ្យដឹងថា ក្រុមហ៊ុនបុរីដែលសាងសង់ផ្ទះ បានទិញផ្ទះប្រជាពលរដ្ឋអស់ចំនួន១២៦ផ្ទះ ខណៈផ្ទះពលរដ្ឋនៅសល់សរុបចំនួន២៤៤ទៀត។
រយៈពេល២ឆ្នាំចុងក្រោយនេះ ពេលដែលផ្លូវកប់ស្រូវ ក្នុងសង្កាត់ស្វាយប៉ាក ខណ្ឌឫស្សីកែវ ត្រូវបានពង្រីកនិងចាក់បេតុង អាជ្ញាធរក៏ចាប់ផ្ដើមជំរុញប្រជាពលរដ្ឋសហគមន៍ឡកំបោរ ឱ្យធ្វើការដោះដូរដីទៅនៅតំបន់ផ្សេងទៀត ដោយមន្រ្តីរដ្ឋាភិបាល អះអាងថា ដីដែលប្រជាពលរដ្ឋកំពុងរស់នៅនេះ គឺស្ថិតនៅលើមាត់បឹងដែលខុសទៅនឹងច្បាប់ ហើយរដ្ឋត្រូវធ្វើការពង្រីកផ្លូវនោះឱ្យដល់៣០ម៉ែត្រផងដែរ ប៉ុន្តែបើតាមការអះអាងរបស់ប្រជាពលរដ្ឋ ក្រុមហ៊ុនបុរីដែលកំពុងសាងសង់ផ្ទះនៅជុំវិញនោះសុទ្ធតែមានប្លង់កម្មសិទ្ធិ ខណៈដីនោះពីមុនមកគឺស្ថិតនៅលើផ្ទៃបឹងដូចគ្នាទៅនឹងផ្ទះប្រជាពលរដ្ឋផងដែរ។
លោក ផាន ហួត ចៅសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ មានប្រសាសន៍ថា អាជ្ញាធរសម្រេចវាយកំទេចរបងហាងកាហ្វេរបស់ប្រជាពលរដ្ឋកាលពីដើមខែនេះ ដោយសារតែបានណែនាំច្រើនលើករួចមកហើយថា កុំឱ្យមានការសាងសង់អ្វីបន្ថែមលើដីកំពុងមានវិវាទនោះ។
លោក ហួត ថ្លែងថា៖ «យើងបានណែនាំគាត់ច្រើនលើកហើយ បានរុះរើពីរដងហើយ គាត់នៅតែនេះ[បន្តសាងសង់]បានយើងរុះរើថែមទៀត។ កាលមុនរើម្ដងហើយ ហើយយើងសុំគាត់ថាឱ្យនៅប៉ុណ្ណឹងសិនចុះ យើងសូមគាត់ចឹងកុំឱ្យប៉ះពាល់អី ឧបមាផ្ទះយើងនៅប៉ុន្មាន នៅប៉ុណ្ណឹងសិនទៅ កុំអាលរុះរើធ្វើថ្មធ្វើអី»។
ទាក់ទិននឹងទីតាំងដីដែលដោះដូរនៅក្បែរលូនិងមានក្លិនស្អុយនោះ ចៅសង្កាត់ថ្មីរូបនេះថា លោកពុំទាន់ស្គាល់ទីតាំងដីនោះនៅឡើយទេ ហើយគ្រាន់តែជាការជំរាបជូនប្រជាពលរដ្ឋប៉ុណ្ណោះ នៅពុំទាន់មានការជូនដំណឹងជាផ្លូវការឡើយ។
លោក វណ្ណ សុផាត អ្នកសម្របសម្រួលគម្រោងធុរកិច្ច និងសិទ្ធិមនុស្សនៅមជ្ឈមណ្ឌលសិទ្ធិមនុស្សកម្ពុជា ថ្លែងថា វិវាទដីធ្លីនេះ គឺទាមទារឱ្យអាជ្ញាធរពាក់ព័ន្ធត្រូវមានឆន្ទៈពិតប្រាកដក្នុងការដោះស្រាយ បើពុំដូច្នេះទេប្រជាពលរដ្ឋនឹងខាតបង់នូវអត្ថប្រយោជន៍។
លោក សុផាត មានប្រសាសន៍ថា៖ «បើសិនជាមានឆន្ទៈដោះស្រាយពិតប្រាកដអាចចេញប្លង់កម្មសិទ្ធិនៅកន្លែងឬក៏អាចដោះដូរនៅទីតាំងណាមួយដែលនៅជិតកន្លែងរបស់គាត់ ទំហំដីគាត់អាចទទួលបាន។ ប៉ុន្តែបើសិនជាទុកដីហ្នឹងទៅឱ្យក្រុមហ៊ុន ឱ្យបុគ្គលឯកជន បើគិតចឹងអ្នកដែលរងគ្រោះគឺប្រជាពលរដ្ឋនោះហើយ»។
ពាក់ព័ន្ធនឹងរឿងវិវាទដីធ្លីស្រដៀងគ្នានេះដែរ កាលពីពាក់កណ្ដាលខែមិថុនា ឆ្នាំ២០២២ នេះតំណាងអយ្យការអមសាលាដំបូងរាជធានីភ្នំពេញ បានចេញដីកាកោះហៅតំណាងពលរដ្ឋសហគមន៍សំរោងត្បូងចំនួន៧នាក់ ឱ្យចូលទៅបំភ្លឺនៅដើមខែសីហា ឆ្នាំ២០២២ ពាក់ព័ន្ធនឹងការចោទប្រកាន់ពីបទ រារាំង ញុះញង់ បង្កើតសកម្មភាពអនាធិបតេយ្យតាមដងផ្លូវសាធារណៈ។
កាលពីចុងឆ្នាំ២០២១នេះ អង្គការលីកាដូ បានចេញផ្សាយរបាយការណ៍មួយថា រយៈពេលពីរឆ្នាំចុងក្រោយ ក្នុងអំឡុងពេលរីករាលដាលនៃជំងឺកូវីដ-១៩ អង្គការសិទ្ធិមនុស្សមួយនេះ បានរកឃើញថា ប្រជាពលរដ្ឋជាង៥០០០ គ្រួសារ រងនូវការរំលោភបំពានដីធ្លី និងលំនៅដ្ឋាន។ របាយការណ៍ដដែលបន្តថា សមាជិកសហគមន៍ និងសកម្មជនដីធ្លីចំនួន ២១នាក់ ត្រូវបានឃាត់ខ្លួន ក្នុងនោះមាន ១០នាក់កំពុងជាប់ពន្ធនាគារផងដែរ៕
