សមាគមសម្ព័ន្ធអ្នកសារព័ត៌មានកម្ពុជា

សមាជិកសមាគមគ្រូបង្រៀនកម្ពុជាឯករាជ្យនៅតែជួបការគំរាមកំហែង​ខាងផ្នែកនយោបាយ ខណៈគ្រូមួយចំនួនរត់ទៅជ្រកកោននៅបរទេស

លោកគ្រូអ្នកគ្រូចូលរួមក្នុងទិវាគ្រូបង្រៀនអន្ដរជាតិនៅទីលានប្រជាធិប្បតេយ្យដើម្បីសម្ដែងមតិផ្សេងៗ រាជធានីភ្នំពេញ។ រូបថតនៅថ្ងៃទី៥ ខែតុលា ឆ្នាំ២០២២។ រូបភាពផ្ដល់ឱ្យ
លោកគ្រូអ្នកគ្រូចូលរួមក្នុងទិវាគ្រូបង្រៀនអន្ដរជាតិនៅទីលានប្រជាធិប្បតេយ្យដើម្បីសម្ដែងមតិផ្សេងៗ រាជធានីភ្នំពេញ។ រូបថតនៅថ្ងៃទី៥ ខែតុលា ឆ្នាំ២០២២។ រូបភាពផ្ដល់ឱ្យ

សមាជិកសមាគមគ្រូបង្រៀនកម្ពុជាឯករាជ្យនៅតែជួបបញ្ហាប្រឈម ជាពិសេសការ​រើសអើង​ផ្នែក​នយោបាយ​ ដែលធ្វើឱ្យគ្រូមួយចំនួនត្រូវរត់ទៅជ្រកកោននៅបរទេស​និងមួយចំនួនទៀត​ត្រូវ​បាន​ក្រសួងអប់រំបញ្ឈប់ពីក្របខណ្ឌដោយអះអាងថា​មិនគោរពតាមវិជ្ជា​ជីវៈ​គ្រូ​បង្រៀន ខណៈ​សមាគមគ្រូបង្រៀថានេះជាការគំរាមកំហែង​និងបំបិទ​សិទ្ធិការ​បញ្ចេញ​មតិ​។

អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានថ្លែងថា កន្លង​មកបញ្ហា​ធំ​គឺ​ការគំរាមកំហែងពីថ្នាក់ដឹកនាំសាលានិងខាងក្រសួងអប់រំ ជាពិសេសការ​រើសអើង​ផ្នែក​នយោបាយ​តែម្ដងរហូតមានគ្រូបង្រៀនខ្លះត្រូវបានរត់គេចខ្លួនពីការតាមចាប់​របស់​អាជ្ញាធរ ក្នុងនោះមានគ្រូ​បង្រៀន៥នាក់កំពុង​​រត់គេចខ្លួននៅបរទេស​និងរកទី​កន្លែង​សុវត្ថិភាព។

អ្នកស្រីបន្ដថា៖ «លោកគ្រូអ្នកគ្រូដែលជាសមាជិក សមាជិការបស់សមាគមត្រូវខ្លាច ត្រូវ​គេ​ហៅ ភាសាឱ្យងាយស្ដាប់ហើយទាន់សម័យ ទសវត្សរ៍២០២១នេះ​គឺលោកគ្រូ​អ្នកគ្រូ​យើង​ដែល​ចូលជាសមាជិកជាច្រើនគេហៅទៅផឹកទឹកតែ ទៅនិយាយឬក៏គំរាមកំហែង​ទោះបី​ជា​មិនប្រើ​អំពើផ្ដាច់ការពេក តែភាសាផ្អែមល្ហែមក្នុងនាមឱ្យលោកគ្រូអ្នកគ្រូយើងឈឺចាប់ គឺឱ្យពួកគាត់​ខ្លាច ភាសាប្រយ័ត្នលុបក្របខណ្ឌដូច រ៉ុង ឈុន អ៊ីចឹងទៅ នេះជាសារមួយ​ក្នុងន័យគំរាម​កំហែង​ពួកគាត់»

ប្រធានសមាគមរូបនេះបន្ដថា បញ្ហាប្រឈមរបស់គ្រូបង្រៀនមិនអាចលុបបំបាត់នោះទេ​​ ដរាប​ណាក្រសួងអប់រំស្ថិតនៅក្រោមនិន្នាការគណបក្សនយោបាយឬក៏គណបក្សកាន់អំណាចប៉ះ​ឥទ្ធិពលហ្នឹងគឺនៅតែមានការគំរាមកំហែង នៅតែមានការបំភិតបំភ័យទៅលើលោកគ្រូអ្នកគ្រូ អត់អាចកាត់បន្ថយបានទេ។

អ្នកស្រី ឆាយ៉ាវី បន្ដថា៖ «យើងឃើញហើយករណីចុងក្រោយនេះមានការចាប់ខ្លួនរបស់​លោកគ្រូ៥នាក់ ហីនិងការផ្ដាច់ក្របខណ្ឌពីក្រសួងអប់រំចំនួន១១នាក់ នេះហើយដែល​យើង​ថាយើង​មិនទាន់​ចចារ មិនអាចទទួលការដោះស្រាយបាននៅឡើយជាមួយក្រសួង»

អ្នកស្រី ឆាយ៉ាវី បន្ដថា សមាគមគ្រូបង្រៀនកម្ពុជាឯករាជ្យនៅតែទទួលបាន​ការរើសអើង​ពីក្រសួងអប់រំ បើទោះបីមានអង្គការអប់រំអន្ដរជាតិដែលមកជួយឃ្លាំមើលក្នុងស្រុកក្ដី ប៉ុន្ដែ​អ្នកស្រីថា​ខាង​ក្រសួង​​នៅតែបន្ដរើសអើង។

អ្នកស្រីឱ្យដឹងថា «អ្វីដែលយើងឃើញសុំឱ្យក្រសួងអប់រំកែប្រែនូវបញ្ហារើសអើង ដើម្បីឱ្យ​វិស័យ​អប់រំប្រសើរឡើងលុះត្រាតែក្រសួងព្រមកែប្រែនិងទទួលយកនូវអ្វីដែលជាការឆកល្វែង»

អ្នកស្រីបានបញ្ជាក់ថា សម្រាប់ករណីលោកគ្រូដែលរត់ភៀសខ្លួនទៅស្រុកក្រៅ ពួកគាត់​បាន​ទៅ​ទាំងគ្រួសារដូច្នេះខាងសមាគមអ្នកស្រីមិនបានដាក់សំណើណាមួយដើម្បី​ជួយ​អន្ដរាគមន៍​នោះ​ទេ ពីព្រោះក្របខណ្ឌរបស់ពួកគាត់ត្រូវបានកាត់ជាស្ថាពរដោយសារតែពួកគាត់​គេចពី​ការ​ចាប់ខ្លួននិងការគំរាមកំហែង​ផ្សេងៗ។

អ្នកស្រី ឆាយ៉ាវី លើកឡើងទៀតថា កន្លងទៅសមាគម​គ្រូ​បង្រៀន​កម្ពុជា​ឯករាជ្យបាន​ចេញ​សេចក្ដី​ប្រកាស​ព័ត៌មាន​មួយ​បង្ហាញ​លទ្ធផល​នៃ​ការ​អង្កេត​ថ្នាក់​ជាតិ ទៅ​លើ​វិស័យ​អប់រំ​ឆ្នាំ​២០១១ ចំនួន១៧​ខេត្ដក្រុង បាន​រក​ឃើញ​បញ្ហា​ធំៗ​បី ដែល​គ្រូ​បង្រៀន​នៅ​ទូទាំង​ប្រទេស​កំពុង​ប្រឈម​មុខ គឺ​បញ្ហា​ប្រាក់​ខែ អំពើ​ពុករលួយ ខ្វះខាត​ការ​ផ្គត់ផ្គង់ ការ​បណ្ដុះបណ្ដាល និង​សម្ភារៈ​​សិក្សា។

ចំណែកឯអ្នកស្រី វង រុន្នី អាយុ៤៨ឆ្នាំ ជាគ្រូបង្រៀនគរុកោសល្យប្រចាំខេត្តព្រះសីហនុ​ដែល​ត្រូវបានគេបញ្ឈប់ពីក្រមខណ្ឌ បានឱ្យដឹងថា មុននឹងក្រសួងអប់រំបានបញ្ចប់ក្របខណ្ឌ​អ្នកស្រី​ដោយសារកាលពីមុនអ្នកស្រីបានឈរឈ្មោះជាប្រធានខេត្តឱ្យគណបក្សសង្រ្គោះជាតិ និង​បានជាតំណាងប្រចាំខេត្តព្រះសីហនុ បន្ទាប់ពីជាប់អ្នកស្រីបានជាប់លក្ខណៈពិសេសដោយ​អាច​ព្យួរឈ្មោះបាន៥ឆ្នាំ តែក្រោយមកគណបក្សសង្រ្គោះជាតិរំលាយទៅ អ្នកស្រី​បាន​ទៅ​សួរ​មន្ទីរអប់រំ ខាងមន្ទីរថាមិនអីទេ ប៉ុន្ដែក្រោយពីអ្នកស្រីចូលបង្រៀនបានមួយអាទិត្យ​ស្រាប់​តែ​ឈ្មោះអ្នកស្រីត្រូវបានដកចេញពី​ក្របខណ្ឌ ទាំងអ្នកស្រីមិនដឹងខ្លួន។

អ្នកស្រីបានចាត់ទុកថា៖ «ខ្ញុំគិតថាការបញ្ចប់ក្របខណ្ឌខ្ញុំជាគ្រូបង្រៀនហ្នឹង ខ្ញុំដឹងថាវាគឺមាន​ភាពអយុត្ដិធម៌ចំពោះខ្ញុំ ខ្ញុំគិតថាការបញ្ចប់ក្របខណ្ឌខ្ញុំ គឺជាការរើសអើងផ្នែកនយោបាយ ដោយ​សារខ្ញុំជាអតីតសមាជិករបស់គណបក្សសង្រ្គោះជាតិ ហើយខ្ញុំបាន​ជាប់ជា​ក្រុម​ប្រឹក្សា​ក្រុង»

អ្នកស្រីបន្ថែមទៀតថា ចំពោះអ្នកស្រីមិនថាក្រសួងអប់រំឬក៏ក្រសួងផ្សេងទេ ជាពិសេស​រដ្ឋាភិបាលគួរតែពិនិត្យឡើងវិញលើការរើសអើងផ្នែកនយោបាយចំពោះអ្នកធ្វើការឬក៏គាំទ្រ​គណបក្សផ្សេងដែលផ្ទុយពីគណបក្សប្រជាជន អ្នកស្រីថាគួរតែមានការអនុវត្តច្បាប់​ឱ្យស្មើភាព​គ្នា ពីព្រោះនៅក្នុងច្បាប់ចែងថាពលរដ្ឋគ្រប់រូបមានសិទ្ធិក្នុងការចូលរួមនិងបញ្ចេញមតិទៅ​តាម​ការយល់របស់ខ្លួន។

អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ សម្តែងមតិក្នុង​ទិវា​គ្រូបង្រៀនអន្ដរជាតិនៅទីលានប្រជាធិបេតយ្យ កាលពីថ្ងៃទី៥ ខែតុលា ឆ្នាំ២០២២។ រូបភាពផ្ដល់ឱ្យ

ជាមួយគ្នានេះលោក ហ៊ី សម្បត្ដិ អាយុ៤៤ឆ្នាំ ជាគ្រូបង្រៀនគរុកោសល្យប្រចាំ​ខេត្តសៀមរាប​និងជាសមាជិកសមាគមគ្រូបង្រៀនឯករាជ្យ​កម្ពុជា បានប្រាប់ថា គ្រូបង្រៀនបច្ចុប្បន្ននេះ​កំពុង​តែជួបបញ្ហាប្រឈមជាច្រើនដែលត្រូវបានក្រសួងអប់រំបញ្ឈប់ពីក្របខណ្ឌរដ្ឋដោយសារបញ្ហា​នយោបាយនេះជាបញ្ហាធំបំផុត និងជាចំណុចដែលខាងក្រសួងដាក់ជា​បញ្ហាចម្បងក្នុងការ​បញ្ឈប់​គ្រូបង្រៀន។

លោក សម្បត្តិ បន្តថា តាមដែលលោកដឹងមានគ្រូបង្រៀន២១នាក់ហើយក្នុងនោះមានគ្រូក្នុង​ខេត្ត​​សៀមរាប​ចំនួន៤នាក់ដែលត្រូវបានក្រសួងដកចេញ លោកថាបើពាក់ព័ន្ធនិងការបង្រៀន​ដូចជាមិនអីទេ បញ្ហាធំគឺរឿងនយោបាយតែម្ដង។

លោក សម្បត្តិ បញ្ជាក់ថា៖ «គ្រូបង្រៀននៅសៀមរាបដែលគេដក និយាយឱ្យចំទាក់ទង​នឹង​ស្ថានភាព​នយោបាយ គេថាយើងមិនគោរពទៅតាមក្រសួងអប់រំ ប៉ុន្ដែគ្រូដែលគេដកហ្នឹង​ពួក​គាត់​​គឺគោរពណាស់។ មួយទៀតដោយសារតែគេយល់ថាជា​គណបក្សប្រឆាំង  គណបក្ស​ដែលគេ​មិនប្រកាន់អាហ្នឹងអត់អីទេ តែគណបក្សដែលគេប្រកាន់គឺគេដកក្របខណ្ឌទាំង៤នាក់ អានេះ​យើងមើលឃើញជាក់ស្ដែង»

លោកថ្លែងទៀតថា កន្លងមកគ្រូបង្រៀនដែលក្រសួងបានដកចេញពីក្របខណ្ឌ​បាននាំគ្នា​ប្ដឹងតវ៉ាដើម្បីបានចូលបង្រៀនវិញ ប៉ុន្ដែមកដល់ពេលនេះការទាមទារ​របស់ពួកគាត់​មិនទាន់​មានដំណោះស្រាយនោះទេ។

លោកបន្ថែមថា៖ «ក្រសួងគួរតែគិតគូរកុំយកបញ្ហានយោបាយដាក់បន្ទុក​ឬក៏បញ្ឈប់​គ្រូ​បង្រៀន​ទៀតអី និងស្នើឱ្យក្រសួងមេត្តាផ្ដល់ក្របខណ្ឌឱ្យគ្រូៗដែលបានដកចេញមកឱ្យពួកគាត់វិញ»

ជុំវិញការចោទប្រកាន់ថាក្រសួងអប់រំយុវជននិងកីឡាស្ថិតនៅក្រោមឥទ្ធិពលរបស់គណបក្ស​កាន់អំណាចត្រូវបានអ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រាន​ចោល​និងបានលើកឡើងថា គ្រូបង្រៀនជាមន្ដ្រីរាជការស្ថិតនៅក្រោមអាណាព្យាបាល​របស់​រាជរដ្ឋាភិបាល មិនមែនក្រោមគណបក្សប្រជាជនកម្ពុជាទេ លោកថាការដាក់ទណ្ឌកម្មឬ​មួយ​វិវាទអីផ្សេងៗដែលពាក់ព័ន្ធនឹងគ្រូបង្រៀនកន្លងមកវាជាការដោះស្រាយតាមផ្លូវច្បាប់។

លោក ឥសាន ថ្លែងថា៖ «មានតែរាជរដ្ឋាភិបាលនិងក្រសួងអ់រំទេ ដែលលោកមានតួនាទី​ភារកិច្ចសម្រេចលើករណីរបស់លោកគ្រូអ្នកគ្រូមួយចំនួនដែលពាក់ព័ន្ធហ្នឹង មិនមែន​គណបក្សប្រជាជនកម្ពុជាទេ សុំកុំឱ្យច្រឡំ គ្រាន់តែថា រាជរដ្ឋាភិបាលជារាជរដ្ឋាភិបាល​របស់គណបក្សឈ្នះឆ្នោតគឺគណបក្សប្រជាជនកម្ពុជាហ្នឹងឯង»

អ្នកនាំពាក្យរូបនេះបន្ដថា ការលើកឡើងរបស់សមាគមគ្រូបង្រៀនឯករាជ្យកម្ពុជា​មិនត្រឹម​ត្រូវ​និងគ្រាន់តែវាយប្រហារដើម្បីយកប្រជាប្រិយភាពដោយសារតែជិតដល់ថ្ងៃបោះឆ្នោតខាងមុខ ហើយគណបក្សប្រជាជនដឹងតួនាទីខ្លួនឯងច្បាស់មិនមែនចេះតែលូកដៃការងាររបស់រាជរដ្ឋាភិបាលនោះទេ ដូច្នេះសុំកុំមានការយល់ច្រលំ។

ពាក់ព័ន្ធបញ្ហានេះលោក រស់ សុវាចា អ្នកនាំពាក្យក្រសួងអប់រំ មិនបានឆ្លើយនឹង​សំណួរ​អ្នកសារព័ត៌មានយើងដែលបានសួរពីការប្រឈមរបស់គ្រូបង្រៀននោះទេ លោកបែរជា​ឆ្លើយ​ពាក់ព័ន្ធនិងទិវាគ្រូបង្រៀន ៥ តុលា ២០២២ ប្រព្រឹត្តទៅក្រោមប្រធានបទ «គ្រូបង្រៀន​យើង អនាគតយើង ប្រទេសជាតិយើងវិញ»។

លោកបន្ដថា ក្រសួងអប់រំ ផ្តោតលើការលើកកម្ពស់ជីវភាព និងគុណវុឌ្ឍិរបស់គ្រូ​បង្រៀន​សម្រាប់ចូលរួមចំណែកពង្រឹងគុណភាពអប់រំដូចមានចែងនៅក្នុងផែនការយុទ្ធសាស្ត្រវិស័យ​អប់រំឆ្នាំ២០១៩-២០២៣ ដែលមានបំណងចូលរួមជាមួយ​រាជរដ្ឋាភិបាលក្នុងការ​អភិវឌ្ឍ​មូលធន​មនុស្សសម្រាប់ប្រែក្លាយសេដ្ឋកិច្ចកម្ពុជាឱ្យមានចំណូលមធ្យមកម្រិតខ្ពស់ក្នុងឆ្នាំ២០៣០ និង​ក្លាយជាប្រទេសអភិវឌ្ឍន៍នៅឆ្នាំ២០៥០។

លោកបន្ដថា៖ «ក្នុងបរិការណ៍នេះ គ្រូបង្រៀនបន្តដើរតួនាទីសំខាន់មួយក្នុងការលើកកម្ពស់​គុណភាពរៀន និងបង្រៀន»

ជុំវិញបញ្ហានេះ ខេមបូចា មិនអាចសុំការបំភ្លឺពីលោកបណ្ឌិត ឈត ប៊ុនថង ជាមន្ដ្រី​ស្រាវជ្រាវ​ផ្នែក​ទំនាក់ទំនងវប្បធម៌ អប់រំ និងទេសចរណ៍នៃរាជបណ្ឌិត្យសភាកម្ពុជាបានទេ  ប៉ុន្ដែលោក​ធ្លាប់​បាន​លើកឡើងជាកាសែតក្នុងស្រុកថានៅក្នុងសង្គមកម្ពុជាមិនបានបង្ហាញ​ច្បាស់ថា​ជាការ​រើសអើង ឬការ​ប្រកាន់​​និន្នាការ​នយោបាយចំពោះគ្រូបង្រៀននោះទេ ពោលគឺត្រូវការការ​សិក្សា​ស្រាវជ្រាវ​ច្បាស់​លាស់​ជាមុនសិន។

លោក ប៊ុនថង លើកឡើងថា៖ «ជាក់ស្តែងដូចជាករណីដែលមានការប៉ុនប៉ងរឹតត្បិត ឬប្រើ​ហិង្សាផ្សេងៗ​លើគ្រូ​បង្រៀន ក៏មិនអាចចាត់ទុកជាការរើសអើង ឬការប្រកាន់និន្នាការ​នយោបាយ​ចំពោះគ្រូបង្រៀន​ដែរ ព្រោះវាក៏អាចជាបញ្ហារវាងបុគ្គលនិងបុគ្គល»

កាលពីខែសីហាឆ្នាំ២០២២កន្លងទៅ លោកនាយករដ្ឋមន្ត្រី ហ៊ុន សែន បានប្រកាសថា នៅឆ្នាំ​២០២៣ រាជរដ្ឋាភិបាលនឹងដំឡើងប្រាក់បៀវត្សជូនមន្ត្រីរាជការទាំងអស់ ដោយក្នុង​នោះគ្រូ​បង្រៀន ត្រូវបានចាត់ទុកជាគោលដៅសំខាន់ដែលនឹងត្រូវបានដំឡើងច្រើនជាងគេ។

លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ថា មន្ដ្រីរាជការ កងកម្លាំងប្រដាប់អាវុធ ក៏ដូចជា អ្នកចូលនិវត្តន៍ ឬតួអង្គដែលធ្វើការឱ្យរដ្ឋ សុទ្ធតែត្រូវទទួលបានការដំឡើងបៀវត្ស​នៅឆ្នាំ២០២៣ខាងមុខនេះ។ ប៉ុន្តែលោកថា គ្រូពេទ្យ និងគ្រូបង្រៀននឹងទទួលបាន​ការ​ដំឡើង​ច្រើនជាងមន្ដ្រីរាជការផ្សេងៗ។ លោកនាយករដ្ឋមន្ត្រីចាត់ទុកដែរថា ប្រាក់ខែគ្រូបង្រៀន​មិន​អាច​ធ្វើអ្នកមានបានឡើយ ប៉ុន្ដែគ្រូបង្រៀនអាចជួយសិស្សធ្វើជាអ្នកមានបាន ដូច្នេះត្រូវតែ​យក​ចិត្ដទុកដាក់ចំពោះគ្រូបង្រៀន។

បើតាមឯកសាររបស់ក្រសួងអប់រំធ្លាប់បានបង្ហាញកាលពីឆ្នាំ២០១៩ថា ប្រាក់ខែគ្រូបង្រៀន សម្រាប់ក្របខណ្ឌគ្រូបង្រៀនកម្រិតឧត្តមឬហៅថាប្រភេទ (ក) ទទួលបានប្រាក់បៀវត្ស​អតិបរមាជាង២,១លានរៀល (២,១៦៥,០០០រៀល) និងអប្បបរមាជាង ១,៤លានរៀល (១,៤៦២,៥០០រៀល)។ ដោយឡែក សម្រាប់គ្រូកម្រិតបឋមឬប្រភេទ (គ) ទទួលបាន​ប្រាក់​បៀវត្សពីជាង ១,២លានរៀល (១,២៤២,៥០០ រៀល) ទៅជាង ១,៦លានរៀល (១,៦២៥,០០០ រៀល)។

លោកបានសង្កត់ធ្ងន់ថា៖ «ខ្ញុំយល់ឃើញថាគ្រូបង្រៀនទាំងអស់មានសេរីភាពេញលេញនៅ​ក្នុងសេរីភាពជា​មូលដ្ឋាន ដូច្នេះពួកគាត់មិនត្រូវបានមានការគំរាមកំហែងណាមួយនោះទេ​ ហើយ​យើងឃើញក្នុងមាត្រា៣៥នៃរដ្ឋធម្មនុញ្ញចែងយ៉ាងច្បាស់ថាពលរដ្ឋខ្មែរទាំង២ភេទមាន​សិទ្ធិ​យ៉ាងសកម្មចូលរួមក្នុងជីវភាពនយោបាយ សេដកិច្ច សង្គមនិងវប្បធម៌»

លោក អំ សំអាត នាយកចាត់ការទូទៅនៃអង្គ លីកាដូ បានមើលឃើញថា បញ្ហារបស់លោកគ្រូ​អ្នកគ្រូ​ដែលកំពុងប្រឈមនិងទទួលការរឹតត្បិត គួរតែផ្អែកលើសេរីភាពជាមូលដ្ឋាន​របស់​ពលរដ្ឋ ដូចជាគ្រូបង្រៀនសុទ្ធសឹងតែជាពលរដ្ឋ ទោះបីពួកគាត់ជាមន្ដ្រីរាជការក៏ដោយក៏ពួក​គាត់ស្រលាញ់និងគាំទ្រជាមួយគណក្សនយោបាយណាមួយក៏មិនមានបញ្ហាអីដែរ។

លោក សំអាត បន្ត​ថា «​កុំ​ឱ្យតែពួកគាត់យកការងារទៅបម្រើផលប្រយោជន៍គណបក្ស​នយោបាយ​បាន​វាខុស​ហើយ​ការគំរាមកំហែងឬការរឹតត្បិតណាមួយវាជាការរំលោភច្បាប់​ដែលមានចែង​ហើយ»

លោកគ្រូ រ៉ុង ឈុន ចូលរួម ដើម្បីសម្ដែងមតិ ក្នុងទិវាគ្រូបង្រៀនអន្ដរជាតិនៅ​ទីលានប្រជាធិប្បតេយ្យ រាជធានីភ្នំពេញ។ រូបថតនៅថ្ងៃទី៥ ខែតុលា ឆ្នាំ២០២២។ រូបភាពផ្ដល់ឱ្យ

មានករណីដោយឡែក កាលពីថ្ងៃទី១១ ខែកញ្ញា ឆ្នាំ២០២២ កន្លងមក គ្រូបង្រៀននិង​សិស្ស​វិទ្យាល័យ​ទួលប្រាសាទសែនសុខ ស្ថិតនៅភូមិសំរោង សង្កាត់ឃ្មួញ ខណ្ឌសែនសុខ រាជធានី​ភ្នំពេញ បាននាំគ្នាដាក់ញត្ដិទៅក្រសួងអប់រំយុវជននិងកីឡា ដើម្បីឱ្យក្រសួង​ដកនាយកសាលា​ឈ្មោះ អ៊ុំ សុកំ ចេញ ក្រោយពីនាយកសាលាបានប្រព្រឹត្ដអំពើពុករលួយ​និងភាពមិនប្រក្រតី​ជាច្រើន។

នៅក្នុងលិខិតមួយដែល ខេមបូចា ទទួលបានបញ្ជាក់ថា លោកគ្រូអ្នកគ្រូនិងសិស្ស​នៃ​វិទ្យាល័យ​ទួលប្រាសាទសែនសុខបានដាក់ទៅរដ្ឋមន្ដ្រីក្រសួងអប់រំ លោក ហង់ ជូនណារ៉ុន ដើម្បីស្នើឱ្យក្រសួងផ្លាស់ប្ដូរនាយកសាលាចេញដោយសារនាយករូបនេះបានប្រព្រឹត្តអំពើ​ពុករលួយជាច្រើន។

លិខិតដដែលបានថ្លែងថា អំពើពុករលួយដែលនាយកសាលាវិទ្យាល័យទួលប្រាសាទ​បាន​ប្រព្រឹត្តមានដូចជា ទី១ មិនបង្ហាញតម្លាភាពថវិកាក្នុងការចំណាយផ្សេងៗ។ ទី២ ថវិកា​ចំណូល​ដែលសាលាទទួលបានពីការដេញថ្លៃ ភាស៊ីកង់និងតូបផ្សារ មិនដែលបានប្រកាសប្រាប់​បុគ្គលិក​ពីការចំណាយផ្សេងៗឡើយ។ ទី៣ គប់គិតគ្នាលាក់បុគ្គលិកអសកម្ម ដែលមិនបាន​បំពេញ​ការងារដោយប្រើពាក្យសម្ដីថា ខ្លួនមានឆន្ទានុសិទ្ធិ។ ទី៤ យកកូនប្រុសរបស់ខ្លួនដែល​គ្មាន​វិជ្ជាជីវៈជាគ្រូបង្រៀន មកបង្រៀនជំនួសគ្រូដែលអសកម្មជាថ្នូរជាមួយការបើកយកប្រាក់​បៀវត្សពីបុគ្គលិកដែលអសកម្មទាំងនោះនិងតែងតែប្រើអំណាច គាបសង្កត់ គំរាមកំហែង អសីលធម៌ ដែលធ្វើឱ្យប៉ះពាល់ដល់សតិអារម្មណ៍ លោកគ្រូ អ្នកគ្រូ ដែលកំពុងបំពេញ​ការងារ​បង្រៀននិងដល់សិស្សានុសិស្សនិងមានករណីជាច្រើនទៀត។

យ៉ាងណាក្ដីលោកគ្រូអ្នកគ្រូនិងសិស្សានុសិស្សនៃវិទ្យាល័យទួលប្រាសាទសែនសុខ បាននិយាយក្នុងពាក្យបណ្តឹងថា​៖ «យើងខ្ញុំទាំងអស់គ្នា មានការមិនពេញចិត្តជាខ្លាំង​ចំពោះ​លោក អ៊ុំ សុកំ ដែលជាមនុស្សអសីលធម៌ដោយគាត់តែងដើរញុះញង់ លាបពណ៌ ឆ្កឹះឆ្កៀល បំបែកបំបាក់សាមគ្គីផ្ទៃក្នុងនៅក្នុងអង្គភាព ខ្វះគុណធម៌ អាត្មានិយម ប្រកាន់បក្សពួក នៅតែផ្ទះ មកធ្វើការមិនដែលទៀងទាត់ឡើយ»

គោលបំណងក្នុងលិខិតស្នើទៅក្រសួងអប់រំយុវជននិងកីឡា គឺពួកគាត់ស្នើសុំឱ្យរដ្ឋមន្ដ្រីក្រសួង លោក ហង់ ជូនណារ៉ុន មេត្ដាជួយត្រួតពិនិត្យ និងធ្វើការសម្រេចករណីខាងលើ​ជូនពួកលោក​ដោយសេចក្ដីអនុគ្រោះ(ពីព្រោះលោកគ្រូអ្នកគ្រូមិនអាចធ្វើការងារក្រោមការគាបសង្កត់ផ្លូវចិត្ត​របស់លោក អ៊ុំ សុកំ បន្ដទៀតបានឡើយ)។

ពាក់ព័ន្ធនិងរឿងនេះគ្រូបង្រៀននៅក្នុងវិទ្យាល័យទួលប្រាសាទសែនសុខ លោក វិចិត្រ​(ឈ្មោះ​អ្នកសារព័ត៌មានដាក់ឱ្យ)បានប្រាប់ ខេមបូចា ថា ករណីនេះមានភាពអយុត្តិធម៌​ខ្លាំងណាស់​ចំពោះ​ពួកលោក លោកថាកន្លងមកនាយកសាលារូបនេះតែងតែកោះហៅគ្រូណា​ដែលមិន​ព្រម​បង់លុយយាម​និងបង្ខំសិស្សសាលាមួយចំនួនឱ្យផ្ដិតមេដៃដើម្បី​ក្នុងចេតនាប្ដឹងគ្រូ​បង្រៀន​ទៅវិញ ហើយពួកលោករងនូវការគំរាមកំហែងពីសកម្មភាពរបស់នាយកសាលា​និង​បាន​ប្រើ​ពាក្យ​អសុរសជាច្រើនទៀតដែលនាយកប្រើលើសិស្ស។

លោក វិចិត្រ បន្ដថា៖ «គាត់លាបពណ៌ចោទប្រកាន់គ្រប់បែបយ៉ាង លាបពណ៌​គ្រូផ្សេងៗ​ឱ្យ​ពាក់ព័ន្ធ​និន្នាការនយោបាយប្រឆាំងអីរបស់គាត់ផ្សេងៗច្រើន»

លោកគ្រូរូបនេះបន្ដថា រាល់សកម្មភាពរបស់នាយក នាយករងនៃវិទ្យាល័យទួលប្រាសាទ​សែនសុខគឺបង្ហាញពីការគាបសង្កត់និងគំរាមកំហែងនិងមិនមានតម្លាភាពថវិកាចំពោះការ​ចំណាយអីៗនៅក្នុងសាលា។

មិនខុសគ្នានោះទេ លោកគ្រូបង្រៀនវិទ្យាល័យម្នាក់ទៀត លោក ម៉ឺន ហាន បានចាត់ទុកថា វាជាអំពើពុករលួយ ជាបក្សជាពួក ដែលមិនគួរកើតមាន លោកថាកន្លង​មកបុគ្គលិក​ម្នាក់គ្នា​សកម្ម គ្រាន់តែគ្នាសុំឈប់៣ថ្ងៃបែរជាបង្កកប្រាក់ខែគ្នាទុកមិនព្រមបើកឱ្យគ្នា លោកថា​រឿង​មួយទៀត គឺបុគ្គលិកមិនដែលឃើញមុខរាប់ខែបែរជាបានប្រាក់ខែ តែអ្នកធ្វើការប្រចាំ​តែងតែរង​នូវការគំរាមកំហែងវិញ។

លោកថ្លែងយ៉ាងខ្លីថា៖ «សុំក្រសួងមេត្ដាជួយដោះស្រាយបញ្ហាហ្នឹងផង ពួកខ្ញុំមិនពេញចិត្ត​នាយកសាលាចឹងទេ​»

ស្ត្រី២នាក់ជិះម៉ូតូឆ្លងកាត់ក្លោងទ្វារវិទ្យាល័យទួលប្រាសាទសែនសុខ សង្កាត់ឃ្មួញ ខណ្ឌសែនសុខ រាជធានីភ្នំពេញ។ រូបថតនៅថ្ងៃទី៨​ ខែតុលា ឆ្នាំ២០២២។ ខេមបូចា/ ឃាង សុខមាន

កាលពីថ្ងៃទី២៤ ខែសីហា ឆ្នាំ២០២២កន្លងមក លោក អ៊ុំ សុកំ ក៏ត្រូវបានអង្គភាពប្រឆាំង​អំពើ​ពុករលួយធ្លាប់បានអញ្ជើញដើម្បីដោះស្រាយបញ្ហាមិនប្រក្រតី​មួយចំនួនទៅតាមការចោទ​ប្រកាន់បណ្ដឹងរបស់លោកគ្រូអ្នកគ្រូនិងសិស្សានុសិស្សនៃវិទ្យាល័យទួលប្រាសាទសែនសុខ​បានដាក់កាលពីថ្ងៃទី២៩ ខែមេសា ឆ្នាំ២០២២ ប៉ុន្ដែនៅមិនទាន់បានសម្រេចជាផ្លូវការ​ណាមួយ​ទើបពួកគាត់បន្ដប្ដឹងទៅរដ្ឋមន្ដ្រីក្រសួងអប់រំបន្ថែមទៀត។

ជុំវិញរឿងនេះនាយកសាលានៃវិទ្យាល័យទួលប្រាសាទសែនសុខ លោក អ៊ុំ សុកំ បានឆ្លើយ​បដិសេធទាំងស្រុងចំពោះការចោទប្រកាន់ចំពោះរូបលោក ដោយឆ្លើយតបថា រឿងរបស់​លោកគឺកំពុងស្ថិតនៅដែនសមត្ថកិច្ចរបស់អង្គភាពប្រឆាំងអំពើពុករលួយ ដែលក្នុងសេចក្ដី​ប្រកាស​គឺបានបិទពេញក្នុងសាលា លោកថាមិនទាន់បានដល់ការសម្រេចរបស់ACUផង បែរជាពួកគាត់ដើរប្ដឹងគ្រប់កន្លែង ទៅសាលាក្រុងផង ទៅក្រសួងអប់រំ មន្ទីរអប់រំ។

លោកនាយកបន្ដថា៖ «ខ្ញុំបានឆ្លើយបំភ្លឺនៅACUហើយ ហើយបិទសេចក្ដីប្រកាសពេញសាលា​តែពួកគាត់មិនមើល ហើយចេះតែដើរប្ដឹងខ្ញុំ វាអាចខូចកិត្ដិយសខ្ញុំដែរបង ទម្រាំរកខុសរក​ត្រូវឃើញបានត្រឹមតែម៉ាស្អុយឈ្មោះ ធ្វើឱ្យអង្គភាពខ្ញុំវាអាក្រក់ឈ្មោះចឹងឯង»

លោកបានចាត់ទុកថា រឿងដែលលោកគ្រូអ្នកគ្រូដើរប្ដឹងលោកបានបង្កភាពរញ៉េរញ៉ៃ​នៅក្នុង​អង្គភាពនិងមិនគួរកើត​មាននោះទេ យ៉ាងណាលោកក៏បានស្នើឱ្យមហាជនធ្វើវិនិច្ឆ័យផង កុំ​ចេះ​តែជឿតែម្ខាងនិងទុកឱ្យម្ខាងទៀតរងគ្រោះ លោកថារឿងវាមានហេតុ មិនមែននៅសុខៗ​បែរជាកើតរឿងពីម្ខាងបាននោះទេ។

បើតាមលោក រស់ សុវាចា អ្នកនាំពាក្យក្រសួងអប់រំយុវជន និងកីឡា មានប្រសាសន៍ថា គណ:​គ្រប់គ្រងគ្រឹះស្ថានសិក្សាត្រូវដោះស្រាយករណីបាតុភាពផ្សេងៗនៅតាមគ្រឹះស្ថានសិក្សា ដោយ​ចាត់​វិធានការតាមទិដ្ឋភាពជាក់ស្តែង។ បើចាំបាច់ គណ:គ្រប់គ្រងគ្រឹះស្ថានសិក្សា អាច​សហការ​ជាមួយមន្ទីរអប់រំ យុវជន និងកីឡាទាំង២៥ខេត្ត រាជធានី ដែលជាសេនាធិការ​តាម​ឋានានុក្រមនៃក្រសួងអប់រំ។

លោក សុវាចា បន្ថែមថា៖ «គុណភាពគណៈគ្រប់គ្រងគ្រឹះស្ថានសិក្សា និងគុណភាព​គ្រូ​បង្រៀន អាចជះផលវិជ្ជមានលើគុណភាពអប់រំនៅទូទាំងប្រទេសកម្ពុជា។ ជាក់ស្តែង ការ​ដំឡើង​ឋានៈវិជ្ជាជីវៈដល់បុគ្គលិកអប់រំជា «នាយកល្អ» និងជា «គ្រូល្អ» ជាកិច្ចការ​មួយ​ក្នុង​ចំណោមកិច្ចការផ្សេងទៀតរបស់ក្រសួងអប់រំ យុវជន និងកីឡាក្នុងការ​បន្តលើក​កម្ពស់​គុណភាពគណៈគ្រប់គ្រងគ្រឹះស្ថានសិក្សា និងគុណភាពគ្រូបង្រៀន»

ចំណែកឯអ្នកស្រី​​​ អ៊ុក ឆាយ៉ាវី ក៏បានបញ្ជាក់បញ្ហានេះថា អ្នកស្រីសប្បាយចិត្ត​និងគាំទ្រ​ចំពោះលោកគ្រូ អ្នកគ្រូដែលពួកគាត់ហ៊ានក្នុងការរើបម្រះពីការគំរាមកំហែង ជាពិសេស​បានប្ដឹងតវ៉ាជនផ្ដាច់ការ អ្នកស្រីថា អ្នកស្រីចង់ឃើញវិស័យអប់រំឱ្យមានតម្លាភាពនិងកុំឱ្យ​អ្នកដឹកនាំផ្ដាច់ការ គាបសង្កត់ទាំងស្មារតីទាំងផ្លូវចិត្តរបស់លោកគ្រូអ្នកគ្រូ។

អ្នកស្រីបន្ថែមទៀតថា៖ «ខ្ញុំបើឃើញមានសាលាដែលគេហ៊ានប្ដឹងដើម្បីលុបបំបាត់​អំពើ​ពុករលួយ  អាលួយនេះខ្ញុំអត់គាំទ្រ ខ្ញុំលើកទឹកចិត្តគាត់ឱ្យក្លាហានបែបនេះតទៅទៀត»

អ្នកស្រី ឆាយ៉ាវី ក៏បានស្នើទៅក្រសួងអប់រំ យុវជន និងកីឡា គួរតែកុំបន្ដឱ្យសកម្មភាព​អំពើ​ពុករលួយបែបនេះបន្ដទៀត ពីព្រោះវាបានប៉ះពាល់ខ្លាំងដល់វិស័យអប់រំ​ ជាពិសេសដល់​សិស្សា​នុសិស្សជាដើម ហើយអ្នកស្រីចង់ឃើញសាលាផ្សេងទៀតមានភាព​ក្លាហាន​ក្នុង​ចូល​រួមកំចាត់អំពើពុករលួយឬក៏បញ្ឈប់ការគំរាមកំហែងពីថ្នាក់ដឹងនាំទាំងឡាយ៕

156 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម