រដ្ឋាភិបាលនៅថ្ងៃទី១ ខែឧសភា ខាងមុខនឹងចាប់ផ្ដើមយុទ្ធនាការចាក់វ៉ាក់សាំងបង្ការកូវីដ១៩ ដល់ប្រជាពលរដ្ឋរស់នៅតំបន់ក្រហម ដែលជាតំបន់មានវិធានការតឹងរឹងក្នុងពេលបិទខ្ទប់ ដោយសារតែតំបន់នេះមានកម្រិតឆ្លងកូវីដ១៩ខ្ពស់។
លោក ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ ត្រូវបានចាត់តាំងជាអ្នកទទួលខុសត្រូវក្នុងការរៀបចំយុទ្ធនាការចាក់វ៉ាក់សាំងជូនប្រជាពលរដ្ឋនៅក្នុងតំបន់ក្រហម។
លោក ឥត សារ៉ាត់ មានប្រសាសន៍តាមទូរសព្ទថា៖ «យុទ្ធនាការចាក់វ៉ាក់សាំងជូនប្រជាពលរដ្ឋក្នុងតំបន់ក្រហមនឹងត្រូវចាប់ផ្ដើមពីថ្ងៃទី១ ខែឧសភា ដល់ថ្ងៃទី៣០ ខែឧសភា»។
លោក ឥត សារ៉ាត់ មានប្រសាសន៍ថា យុទ្ធនាការនេះនឹងដឹកនាំដោយក្រសួងការពារជាតិ និងមានជំនួយពីក្រសួងសុខាភិបាល ក្រសួងការងារ និងអាជ្ញាធររាជធានីភ្នំពេញ ប៉ុន្តែលោកបានបដិសេធផ្ដល់ព័ត៌មានលម្អិត។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមានប្រសាសន៍ថាវ៉ាក់សាំងប្រភេទ ស៊ីណូហ្វាម (Sinopharm) ចំនួន ៤០ម៉ឺនដូសបានមកដល់កម្ពុជាកាលពីយប់ថ្ងៃពុធ និងបានរៀបចំទុកសម្រាប់ចាក់ជូកអ្នកនៅតំបន់ក្រហម។
លោកស្រី បញ្ជាក់ថា៖ «រដ្ឋបាលរាជធានីភ្នំពេញ និងរូបខ្ញុំ បានពិភាក្សា[បញ្ហានេះ]និងបានសម្រេចឲ្យគ្រូពេទ្យរបស់ក្រសួងការពារជាតិជួយក្នុងយុទ្ធនាការចាក់វ៉ាក់សាំងចំនួនបួនខណ្ឌ រួមមានខណ្ឌកំបូល ខណ្ឌពោធិ៍សែនជ័យ ខណ្ឌមានជ័យ និងខណ្ឌដង្កោរ»។
លោកស្រីថា នៅពេលវ៉ាក់សាំងបន្ទាប់មកដល់ ក្រសួងសុខាភិបាលនឹងបើកយុទ្ធនាការចាក់វ៉ាក់នៅតំបន់ផ្សេងទៀត។
លោកស្រីបន្តថា៖ «យើងកំពុងរៀបតែត្រៀមយុទ្ធនាការចាក់វ៉ាក់សាំងទ្រង់ទ្រាយធំសម្រាប់ខណ្ឌផ្សេងទៀតក្រៅពីខណ្ឌទាំងបួននេះ»។
លោក ហេង សួរ អ្នកនាំពាក្យក្រសួងការងារមានប្រសាសន៍ក្នុងសន្និសីទសារព័ត៌មានអន្តរក្រសួងកាលពីថ្ងៃពុធ នៅក្រសួងយុត្តិធម៌ថា ក្រសួងកំពុងសម្លឹងមើលលើការចាប់ផ្ដើមដំណើរការចាក់វ៉ាក់សាំងក្នុងតំបន់ក្រហមឡើងវិញ ដែលតំបន់នេះសម្បូររោងចក្រជាងគេនៅរាជធានីភ្នំពេញ។
លោកបន្ថែមថា៖ «ក្រសួងបានត្រៀមខ្លួនរួចរាល់ហើយក្នុងការសហការជាមួយភាគីពាក់ព័ន្ធ ពិសេសក្រសួងការពារជាតិ ដើម្បីរៀបចំចាក់វ៉ាក់សាំងទ្រង់ទ្រាយធំក្នុងតំបន់ក្រហម ដែលមានទាំងកម្មករ និងប្រជាពលរដ្ឋ»។
នៅថ្ងៃព្រហស្បតិ៍នេះអាជ្ញាធរមូលដ្ឋានបានពង្រឹងការគ្រប់គ្រងប្រជាពលរដ្ឋនៅខាងក្នុង និងខាងក្រៅតំបន់ក្រហម ដោយបានប្ដូរពីការប្រើរបាំងដែកដាក់នៅលើផ្លូវមួយចំនួនមកជារបាំងថ្មវិញ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ មានប្រសាសន៍ថា ការបិទផ្លូវជាប់បែបនេះអាចជួយកាត់បន្ថយចំនួនមន្ត្រីនគរបាលមកឈរចាំយាមនៅលើដងផ្លូវ ដោយថាកងកម្លាំងបានយាមកាមប្រជាពលរដ្ឋទាំងយប់ទាំងថ្ងៃ ហើយដូច្នេះពួកគេអាចមានពេលផ្លាស់ប្តូរវេនគ្នាបាន។
លោកបន្ថែមថាការកើនឡើងនៃការធ្វើតេស្តរកវីរុសកូវីដ១៩ សម្រាប់អ្នករស់នៅក្នុងតំបន់ក្រហម ព្រមជាមួយនឹងយុទ្ធនាការចាក់វ៉ាក់សាំង និងការទប់ស្កាត់បានល្អរបស់កងកម្លាំង នឹងផ្ដល់ក្ដីសង្ឃឹមថាវិធានការបិទខ្ទប់នឹងអាចបិទបញ្ចប់នៅពេលឆាប់ៗខាងមុខ។ ខណៈពេលដែលទីក្រុងភ្នំពេញត្រូវបិទខ្ទប់នៅថ្ងៃទី១៥ ខែមេសា តំបន់ក្រហមត្រូវបានបិទតាំងពីថ្ងៃទី១០ ខែមេសា បន្ទាប់ពីមានការឆ្លងខ្លាំងក្នុងចំណោមកម្មកររោងចក្រកាត់ដេរ។
លោកបន្តថា៖ «យើងធ្វើអ្វីៗ ព្រោះយើងចង់ឲ្យតំបន់នោះធូរស្រាលឡើងវិញ»។ លោកថានៅពេលដែលអត្រាឆ្លងធ្លាក់ចុះ តំបន់នោះអាចនឹងប្រែក្លាយទៅជាតំបន់លឿងទុំ ឬតំបន់លឿងវិញ។ លោកអំពាវនាវថា៖«ដូច្នេះសូមប្រជាពលរដ្ឋស៊ូលំបាកក្នុងរយៈពេលខ្លី ប្រសើរជាងលំបាក្នុងរយៈពេលវែង»។
នៅប្រហែលជាម៉ោង១០ និង៣០នាទីព្រឹក ថ្ងៃព្រហស្បតិ៍ គេឃើញមានកងកម្លាំងប្រហែល១០នាក់ មានទាំងកងរាជអាវុធហត្ថ និងប្រជាការពារភូមិផង បានដករបាំងដែកបិទផ្លូវចេញនៅព្រំប្រទល់សង្កាត់ចោមចៅ១ ជាតំបន់ក្រហម ហើយជំនួសវិញដោយរបាំងថ្មនិងលូស៊ីម៉ង់។
លោក ប៊ុន វិបុល កងរាជអាវុធហត្ថម្នាក់កំពុងយាមនៅលើផ្លូវជិតបន្ទាយទ័ពអាកាសត្រង់ចំណុចព្រំប្រទល់សង្កាត់ចោមចៅ១ បានឲ្យដឹងថាពួកលោកប្ដូររបាំងបិទផ្លូវបែបនេះ ព្រោះពួកលោកចង់បន្ថយចំនួនអ្នកយាមនៅចំណុចនោះ។
លោកបន្ថែមថា៖ «យើងដាក់វាដូចនេះ ព្រោះយើងមិនចង់ឲ្យប្រជាពលរដ្ឋចេញ ចូលច្រើននៅលើផ្លូវនេះ…យើងធ្វើអ្វីៗទៅតាមថ្នាក់លើរបស់យើង»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព គាំទ្រចំពោះយុទ្ធនាការចាក់វ៉ាក់សាំងរបស់របស់រដ្ឋាភិបាលសម្រាប់ពលរដ្ឋនៅតំបន់ក្រហម។
លោកស្រី បន្ថែមថា៖ «ខ្ញុំគាំទ្រចំពោះការពង្រីងវិសាលភាពការទទួលបានវ៉ាក់សាំងពីសំណាក់ប្រជាពលរដ្ឋនៅតំបន់ក្រហម ប៉ុន្តែខ្ញុំស្នើឲ្យ[រដ្ឋាភិបាល] គួរតែរៀបចំឲ្យបានច្បាស់លាស់ បង្កភាពងាយស្រួលដល់ប្រជាពលរដ្ឋអាចរក្សាគម្លាតសុវត្ថិភាពបាន»។
កាលពីថ្ងៃសៅរ៍កន្លងទៅមានភាពច្របូកច្របល់កើតឡើងពេលដែលរដ្ឋាភិបាលបញ្ជាឲ្យគ្រប់គ្នារស់នៅក្នុងតំបន់ក្រហមត្រូវធ្វើតេស្តកូវីដ១៩ ឬបើមិនទៅនឹងត្រូវផាកពិន័យ។ ប្រជាពលរដ្ឋបានប្រមូលផ្ដុំគ្នាយ៉ាងច្រើននៅទីតាំងយកសំណាក អាចបង្កជាហានីភ័យនៃការឆ្លង នាំឲ្យរដ្ឋាភិបាលសម្រេចជាថ្មី កំណត់តែអ្នកដែលត្រូវយកសំណាកធ្វើតេស្តវិញ។
លោកស្រី សុភាព ក៏លើកជាសំណួរទាក់ទងនឹងការផ្លាស់ប្ដូររបាំងបិទផ្លូវនេះដែរ ដោយថារបាំងថ្ម គឺធ្ងន់ពិបាកលើកចុះឡើងបើសិនជាមានបញ្ហាបន្ទាន់ណាមួយ។
លោកស្រីលើកឡើងថា៖«ឧបមាថាបើមានករណីអគ្គិភ័យ ឬប្រជាពលរដ្ឋត្រូវចេញក្រៅបន្ទាន់ដោយសារបញ្ហាសុខភាព តើអាជ្ញាធរអាចជួយអ្នកទាំងនោះទាន់ពេល ឬអត់ ប្រសិនបើពួកគាត់បិទផ្លូវក្នុងភូមិបែបនេះ? អាជ្ញាធរគួរតែពិចារណាចំណុចនេះឡើងវិញ»។
លោកស្រី បន្ថែមថា ប្រជាពលរដ្ឋនៅក្នុងតំបន់ក្រហមជាច្រើននាក់បន្តរងគ្រោះដោយការខ្វះស្បៀងអាហារ ព្រោះអ្នកទាំងនោះបាត់បង់ប្រាក់ចំណូល ដោយលោកស្រីបានស្នើឲ្យរដ្ឋាភិបាលពន្លឿនការចែកស្បៀង ឬជំនួយផ្នែកហិរញ្ញវត្ថុដល់អ្នកទាំងនោះ។
វ៉ាក់សាំងស៊ីណូហ្វាម ចំនួន ៤០ម៉ឺនដូស បានមកដល់កម្ពុជាកាលពីយប់ថ្ងៃពុធ ដែលជាជំនួយរបស់ចិន ដោយគិតទាំងលើកនេះទៀត នេះជាជំនួយលើកទីបីហើយ ដែលកម្ពុជាទទួលបានពីរដ្ឋាភិបាលចិន។ នេះបើតាមការបញ្ជាក់របស់លោកស្រី យ៉ក់ សម្បត្តិ រដ្ឋលេខាធិការក្រសួងសុខាភិបាល ថ្លែងប្រាប់អ្នកសារព័ត៌មាននៅឯអាកាសយានដ្ឋានអន្តរជាតិភ្នំពេញ។
គិតមកដល់ពេលនេះ កម្ពុជាបានទទួលវ៉ាក់សាំងបង្ការកូវីដ១៩ សរុបចំនួន ៣,៧លានដូសពីប្រទេសចិនតាមរយៈជំនួយ និងការបញ្ជាទិញ ក្នុងនោះមាន១,៧លានដូស ជាវ៉ាក់សាំងប្រភេទស៊ីណូហ្វាម និងពីរលានដូសផ្សេងទៀតជាប្រភេទស៊ីណូវ៉ាក់ (Sinovac)។
លោកស្រី យ៉ក់ សម្បត្តិ មានប្រសាសន៍ថាវ៉ាក់សាំងប្រភេទស៊ីណូវ៉ាក់ មួយលានដូសផ្សេងទៀតនឹងមកដល់កម្ពុជានៅថ្ងៃទី១០ ខែឧសភា ខាងមុខ។
ក្រសួងសុខាភិបាលនៅថ្ងៃព្រហស្បតិ៍នេះ បានឲ្យដឹងថាអ្នកឆ្លងកូវីដ១៩ ថ្មីមានចំនួន៨៨០ករណីជាការឆ្លងក្នុងសហគមន៍ទាំងអស់ និងចំនួនអ្នកស្លាប់ឡើងដល់៩១នាក់ ។ ក្រសួងសុខាភិបាលឲ្យដឹងទៀតថា ករណីឆ្លងក្នុងសហគមន៍ព្រឹត្តិការណ៍២០ កុម្ភៈ មានចំនូន១២ ០៩០ករណី នាំឲ្យចំនួនឆ្លងសរុបមានដល់១២ ៦៤១ករណី គិតចាប់ពីមានការផ្ទុះការឆ្លងរាលដាលកូវីដ១៩ តាំងពីដើមឆ្នាំ២០២០ មក៕
ប្រែសម្រួលពីអត្ថបទភាសាអង់គ្លេស៖ Military to run red zone vaccination campaign starting next week