សមាគមសម្ព័ន្ធអ្នកសារព័ត៌មានកម្ពុជា

អង្គការសង្គមស៊ីវិល និងសហជីពសម្ដែងការខកចិត្តចំពោះការបញ្ឈប់បុគ្គលិករបស់កាស៊ីណូណាហ្គាវើលដ៍

អាគារកាស៊ីណូ និងសណ្ឋាគារណាហ្គាវើលដ៍ ក្នុងរាជធានីភ្នំពេញ។ រូបថតកាលពីថ្ងៃទី១ ខែធ្នូ ឆ្នាំ២០២១។ ខេមបូចា/ ព្រីង សំរាំង
អាគារកាស៊ីណូ និងសណ្ឋាគារណាហ្គាវើលដ៍ ក្នុងរាជធានីភ្នំពេញ។ រូបថតកាលពីថ្ងៃទី១ ខែធ្នូ ឆ្នាំ២០២១។ ខេមបូចា/ ព្រីង សំរាំង

អង្គការ សមាគម និង​សហជីព​ចំនួន ២៥ បាន​សំដែង​ការ​ខក​ចិត្ត​ចំពោះកាស៊ីណូ​ណាហ្គាវើលដ៍ នូវ​អ្វី​ដែល​ក្រុម​សង្គម​ស៊ីវិល​ទាំង​នេះ​បាន​ចាត់​ទុក​ថា​មាន​ចេតនា​រំលាយរចនា​សម្ព័ន្ធ​​ថ្នាក់​ដឹក​នាំ​សហជីព ដោយ​ថា ​ការ​ធ្វើ​បែបនេះ​មិន​សម​ហេតុ​ផល និង​មិន​អាច​ទទួល​យក​បាន​កអំឡុងវិបត្តិកូវីដ-១៩។​

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ នៃ​ក្រុមហ៊ុន​កាស៊ីណូណាហ្គាវើលដ៍ កញ្ញា ឈឹម ស៊ីថរ បាន​ឲ្យ​ដឹង​ថា ​ណាហ្គាវើលដ៍​មាន​គម្រោង​បញ្ឈប់​បុគ្គលិក​ ១ ៣២៩​នាក់ ក្នុង​ចំណោម​បុគ្គលិក​សរុបជាង​ ៨ ០០០​នាក់ ដោយសារ​តែ​វិបត្តិ​កូវីដ-១៩​។​ ក្នុង​ចំនួន​នេះ កញ្ញា​ ស៊ីថរ ​ថា ៨២​ភាគ​រយជា​សកម្មជន​សហជីព និង​មន្ត្រី​សហជីព ខណៈ​បុគ្គលិក​ចំនួន​ ៣៧៣​នាក់​​មិន​ទាន់​បាន​​ទទួល​សំណង​ដែល​ត្រូវ​ផ្ដល់​ឲ្យ​នៅ​ឡើយ​។​

ក្រុម​អង្គការ​សង្គម​ស៊ីវិល​ទាំង​នោះ រួម​មាន​សហជីព​ប្រចាំ​ណាហ្គាវើលដ៍ អង្គការ​សង់ត្រាល់ អាដហុក លីកាដូ មជ្ឈមណ្ឌលសិទ្ធិមនុស្ស​កម្ពុជា អង្គការ​បណ្ដាញ​យុវជនកម្ពុជា និង​អង្គការ​សង្គម​ស៊ីវិល​មួយ​ចំនួន​ទៀត បាន​ចេញ​សេចក្ដី​ថ្លែង​ការ​ណ៍រួម​មួយ​កាល​ពី​ថ្ងៃពុធ ដោយ​បាន​ចោទ​ថាការ​បញ្ឈប់​បុគ្គលិក​នេះ​ជា​ការ​បំពាន​សិទ្ធិការ​ងារ និង​សេរីភាព​ជា​មូល​ដ្ឋាន​របស់​កម្មករ​សហជីព​នៅ​កាស៊ីណូ​ណាហ្គាវើលដ៍​​យ៉ាង​ធ្ងន់​ធ្ងរ​។​ សេចក្ដី​ជូន​ដំណឹងបាន​ចោទ​ប្រកាន់​ថា ​ការ​ជូន​ដំណឹង​បញ្ឈប់​ថ្នាក់​ដឹក​នាំសហជីព និង​សកម្ម​ជន​សហជីព បង្ហាញ​ពី​ចេតនា​របស់​ក្រុម​ហ៊ុន​ណាហ្គាវើលដ៍ ក្នុង​ការ​បំពាន​សិទ្ធិ​ជាមូល​ដ្ឋាន​របស់​បុគ្គលិក​ដែល​ចង់​ចងក្រងសហជីព​​សម្រាប់​លក្ខខណ្ឌ​ការ​ងារ​ប្រសើរ​ឡើង​។​

សេចក្ដី​ថ្លែង​ការ​ណ៍​បន្ថែម​ថា៖ «​ទុក្ខវេទនា និង​ការ​រង​អំពើ​​អយុត្តិធម៌​របស់​កម្មករ​និយោជិត​នៅ​ក្នុង​ក្រុម​ហ៊ុន​ណាហ្គាវើលដ៍ គឺ​ជាការ​​ឆ្លុះ​បញ្ចាំងការ​អនុវត្ត​ច្បាប់​ក្នុងប្រទេស​​កម្ពុជា ហើយ​វា​ក៏​ជា​គំរូ​អាក្រក់​​ទៅ​​ដល់​និយោជក​ផ្សេង​ទៀត​អនុវត្ត​តាម​បទពិសោធន៍​របស់​ក្រុម​ហ៊ុន​ណាហ្គាវើលដ៍ដូច​គ្នា​»។ បើ​តាម​សេចក្ដី​ថ្លែង​ការណ៍​ដដែលបន្ថែមថា៖ «​ការ​ព្រងើយ​កន្តើយ​ មិន​អើពើអនុវត្ត​ច្បាប់​របស់​ក្រុម​ហ៊ុន​ខ្នាត​យក្ស​មួយ​នេះ​​​នឹង​ជា​គំរូ​អាក្រក់​​ដល់​អ្នក​វិនិយោគទុន​ផ្សេងៗ​ទៀត​យក​តម្រាប់​តាម​ ធ្វើ​ឲ្យ​កម្មករ​និយោជិត​រង​អំពើ​អយុត្តិ​ធម៌​កាន់​តែច្រើន ព្រម​ទាំង​ធ្វើ​ឲ្យ​ប៉ះពាល់​មុខ​មាត់​រាជរដ្ឋាភិបាល​កម្ពុជា​លើ​ឆាក​អន្តរជាតិ​ទៀត​ផង​»។​

សេចក្ដី​ថ្លែង​ការ​ណ៍​នេះ ក៏​បាន​ដក​ស្រង់​មាត្រា១ នៃអនុសញ្ញា​ស្ដី​ពី​សេរីភាព​ខាង​សមាគម និង​សិទ្ធិ​ក្នុង​ការ​បង្កើត​អង្គការវិជ្ជាជីវៈ ដែ​ល​មាន​ចែង​ថា៖ «កម្មករ​និយោជិត​ ត្រូវ​ទទួល​បាន​ការការពារ​យ៉ាងពេញ​ទំហឹង​ទល់​នឹង​សកម្មភាព​នៃ​ការ​រើស​អើង​ប្រឆាំង​នឹង​សមាគម​ក្នុង​មុខរបរ​របស់​ខ្លួន»។​

កញ្ញា ស៊ីថរ ប្រាប់​ខេមបូចាថា សេចក្ដី​ថ្លែង​ការ​ណ៍​នេះ​មាន​បំណង​បង្ហាញ​ពី​ការ​សោក​ស្ដាយ​ចំពោះ​ការ​បំពាន​សិទ្ធិ​ការងារ​​របស់​កាស៊ីណូ​ណាហ្គាវើលដ៍​ប្រឆាំង​នឹង​សមាជិក​សហជីព។​

កញ្ញា​ ស៊ីថរ ​បន្ត​ថា៖ «ទោះបីជា​ណាហ្គាវើល​ដ៍​បាន​ផ្អាក​ដំណើរ​ការ​ពី​បី​ដង​ដោយសារតែ​វិបត្តិ​កូវីដ-១៩ ខណៈ​ឥលូវ​កូវីដ-១៩ បាន​ថយ​ចុះ និង​ណាហ្គា៣ នឹង​ត្រូវ​ការ​បុគ្គលិក​ ១០ ០០០​នាក់ ហេតុ​អ្វី​ពួក​គេ​មិន​ទទួល​យើង​ឲ្យ​ធ្វើ​ការ?»។ ស៊ីថរ ឲ្យដឹងទៀតថា៖ «​ពី​រខែ​ដំបូង​ក្នុង​ឆ្នាំ​២០២១ ក្រុម​ហ៊ុន​បាន​ទទួល​ប្រាក់​ចំណេញ​សុទ្ធ​ជាង​ ១៧២​លាន​ដុល្លារ។ [ប៉ុន្តែ] ក្រុម​ហ៊ុន​នៅ​តែមាន​ចេតនា​ចង់រំលាយ និង​បំបាត់​សំឡេងសហជីព»។​

កញ្ញា បាន​អំពាវ​នាវ​ឲ្យ​ក្រ​សួង​ការងារ ពន្យល់​ពី​ការ​បំពាន​សិទ្ធិការងារ​​ប្រឆាំង​នឹង​សមាជិក​សហជីព​នេះ។​

កញ្ញា ស៊ីថរ ​បន្ត​ថា៖ «​ក្រ​សួង​ហាក់​ស្ងប់​ស្ងាត់​ក្នុង​ការ​ពន្យល់​ និង​បកស្រាយ​ពី​ការ​បំពាន​សិទ្ធិ​ការ​ងារ​ពី​សំណាក់​ក្រុម​ហ៊ុន​ណាហ្គាវើលដ៍»។ ស៊ីថរ បន្ថែមទៀតថា៖ «​ទោះ​បី​ជា​សំណង​មិន​ស្រប​តាម​ច្បាប់​ស្ដីពី​ការងារ ក្រសួង​បាន​បរាជ័យ​ក្នុង​ការ​ផ្ដល់​យុត្តិធម៌​សម្រាប់​ពួក​យើង ហើយ​ក្រុម​ប្រឹក្សា​អាជ្ញាកណ្ដាល ក៏​បាន​ច្រាន​ចោល​ការ​ទាម​ទារ​របស់​សហជីព​​​ផង​ដែរ»។​

កញ្ញា ស៊ីថរ ឲ្យ​ដឹង​ថា ខ្លួន និងបុគ្គលិក​ផ្សេង​ទៀត​នឹង​ធ្វើ​កូដកម្ម​ទាមទារ​ដំណោះ​ស្រាយ​នៅ​ថ្ងៃទី​១៨ ខែ​ធ្នូ និង​ថា​ពួក​ខ្លួន​នឹង​​តវ៉ា​ដោយ​អនុវត្ត​តាម​វិធានការ​ក្រ​សួង​សុខាភិបាល កាត់​បន្ថយ​ការ​ប្រឈម​នឹង​ការ​ឆ្លង​ជំងឺ​កូវីដ-១៩​។​

កញ្ញា ស៊ីថរ ​ឲ្យ​ដឹង​​ថា៖ «យើង​មិន​អាច​ទទួល​យក​បានទេ បើ​សិន​ជា​គេ​មិន​អនុញ្ញាត​ឲ្យ​យើង​ធ្វើ​ការ​តវ៉ា លើក​លែង​តែ​ពួកគេ​ផ្ដល់​ហេតុ​ផល​សមរម្យ និង​​ដំណោះ​ស្រាយ​អាច​ទទួល​យក​បាន ពី​ព្រោះ​យើង​បាន​អត់ធ្មត់​ដល់​កម្រិត​ហើយ​ក្នុង​ការ​ស្វែង​រក​ដំណោះ​ស្រាយ ប៉ុន្តែ​វាមិន​អាច​ទៅ​រួច»។​

អ្នក​ស្រី ឃ្លាំង សុបិន វ័យ​ ៤២​ឆ្នាំ ជាសមាជិក​សហជីព​នៅណាហ្គាវើលដ៍ បានឲ្យ​ដឹងថា​ អ្នកស្រី​ត្រូវ​ក្រុម​ហ៊ុន​បញ្ឈប់​ពី​ការងារកាលពី​ខែឧសភា ឆ្នាំ​២០២១ បន្ទាប់​ពី​ត្រូវ​បាន​គេ​ប្រាប់​ថា​ ក្រុម​ហ៊ុន​រៀបចំ​រចនាសម្ព័ន្ធ​ថ្មី​។  អ្នកស្រី​លើក​ឡើងថា​ខ្លួន​បាន​ខិត​ខំធ្វើ​ការ​យ៉ាងខ្លាំង​សម្រាប់​ក្រុម​ហ៊ុន​ក្នុង​រយៈពេល​ ១៨​ឆ្នាំ​កន្លង​មក​នេះ។​

អ្នក​ស្រី​និយាយ​ថា៖ «​យើង​បាន​ធ្វើ​ការ​យូរ​មក​ហើយ»។ អ្នកស្រីបន្តថា៖ «​ក្រុម​ហ៊ុន​គួរ​តែ​គិត​គូរ​ពី​សំណង​ឲ្យ​បាន​ត្រឹម​ត្រូវ…​យើង​មិន​អាច​ទទួល​យក​អំពើ​អយុត្តិធម៌​នេះទេ ហើយ​យើង​ជាមនុស្ស​ចាស់​ពិបាក​រក​ការងារ​ធ្វើ​ណាស់ យើង​អាច​ត្រឹម​តែ​បន្ត​ទាម​ទារ​ការងារ​មក​វិញ»។

សម្រាប់​រយៈពេល​​ប្រាំមួយ​ខែ​ចុង​ក្រោយ​នេះ អ្នក​ស្រី ថា​ខ្លួន​បាន​ជួប​ការ​ខ្វះខាត​ម្ហូប​អាហារ​ប្រចាំ​ថ្ងៃ និង​មាន​បញ្ហា​ក្នុង​បង់​ថ្លៃ​ស្នាក់​នៅ​ផង​ដែរ។ អ្នក​ស្រី ប្រាប់​ខេមបូចា ទៀត​ថា អ្នកស្រី​សង្ឈឹម​ថា​អាជ្ញាធរ​ពាក់​ព័ន្ធ​នឹង​ផ្ដល់​ដំណោះ​ស្រាយ​ឆាប់ៗ​ដល់​បុគ្គលិក​ក្រុម​ហ៊ុន​ណាហ្គាវើលដ៍ ដែ​លត្រូវ​បញ្ឈប់​។​

តំណាងបុគ្គលិកក្រុមហ៊ុនណាហ្គាវើលដ៍ដាក់ញ្ញតិទៅកាន់ក្រសួងការងារកាលពីថ្ងៃទី៨ ខែមិថុនា ដើម្បីទាមទារឲ្យបុគ្គលិក ១៣០០នាក់បានចូលធ្វើការវិញ បន្ទាប់ពីបានទទួលការជូនដំណឹងពីការបញ្ឈប់ការងារ។ ខេមបូចា/ បញ្ញា ឆព័ណ្ណ
តំណាងបុគ្គលិកក្រុមហ៊ុនណាហ្គាវើលដ៍ដាក់ញ្ញតិទៅកាន់ក្រសួងការងារកាលពីថ្ងៃទី៨ ខែមិថុនា ដើម្បីទាមទារឲ្យបុគ្គលិក ១៣០០នាក់បានចូលធ្វើការវិញ បន្ទាប់ពីបានទទួលការជូនដំណឹងពីការបញ្ឈប់ការងារ។ ខេមបូចា/ បញ្ញា ឆព័ណ្ណ

អ្នក​ស្រី លាង ម៉ៅ ម៉ាណែត វ័យ ៥២​ឆ្នាំ ជាសមាជិក​សហជីព​​នៅ​ណាហ្គាវើលដ៍​ម្នាក់​ទៀត បាន​លើក​ឡើង​ថា អ្នកស្រី​ត្រូវ​បញ្ឈប់ពី​ការងារ​កាលពី​ខែមេសា ឆ្នាំ២០២១ ដោយ​មិន​មាន​ការ​ប្រាប់​មូលហេតុ​អ្វី​នោះទេ​។ អ្នកស្រីឲ្យ​ដឹង​ថា​ខ្លួន​បាន​ធ្វើ​ការ​នៅ​ក្រុម​ហ៊ុន​នេះ​អស់​រយៈ​ពេល​ ២៦​ឆ្នាំ​។​

អ្នក​ស្រី ម៉ាណែត បន្តថា ​បន្ទាប់​ពី​ក្រុម​ហ៊ុនផ្អាក​ដំណើរ​ការ​ក្នុង​វិបត្តិ​កូវីដ-១៩ ជីវភាពគ្រួសារ​អ្នកស្រី​ជួប​ការ​លំបាក​ជា​ខ្លាំង​។ អ្នកស្រី​ថា ខ្លួន​ធ្លាប់​តែមាន​ប្រាក់ខែ​សមរម្យ ប៉ុន្តែ​ពេល​នេះ​កំពុង​ជួប​ការ​លំបាក​​លើ​ការ​ចំណាយ​ផ្សេងៗ រួម​ទាំង​ការ​សិក្សាកូន និង​ម្ហូប​អាហារ​។​

អ្នក​ស្រីឲ្យ​ដឹង​ថា៖ «​ជំហរ​របស់​ខ្ញុំ​គឺ​ថា​ ចង់​ឲ្យ​ក្រុម​ហ៊ុន​ទទួល​ពួក​យើង​ចូល​ធ្វើការ​វិញ ពីព្រោះ​ខ្ញុំ​ចាស់​ហើយ និង​មិន​អាច​រក​ការងារ​ឯណា​ផ្សេង​បានទេ ខ្ញុំ​គ្មាន​ជំនាញ​អ្វី​ផ្សេង​ទេ»។​

អ្នក​ស្រី សំ សុផា វ័យ​ ៤៨​ឆ្នាំ ជាបុគ្គលិក​របស់​ក្រុម​ហ៊ុន​ណាហ្គា​ម្នាក់​ទៀត បាន​ឲ្យ​ដឹង​ថា​ខ្លួន​បាន​ទទួល​សារ​តាម​ប្រព័ន្ធ​អនឡាញ​កាលពី​ខែ​ឧសភា ឆ្នាំ២០២១ ពី​ខាង​កាស៊ីណូ ដោយ​បាន​បញ្ជាក់​ថា​អ្នកស្រី​ត្រូវ​ព្យួរ​ការងារ ដោយសារតែកិច្ច​សន្យាការងារ​បា​ន​បញ្ចប់​។ អ្នកស្រី អះអាងថា ​តាំងពី​ធ្វើ​ការ​ជាមួយ​កាស៊ីណូ​ណាហ្គាវើលដ៍​ ២៦​ឆ្នាំ កន្លង​មក​នេះ អ្នកស្រី​មិន​ដែល​ទទួល​បាន​កិច្ច​សន្យាការងារ​ម្ដង​ណា​នោះទេ​។​​

ក្រោយ​ពី​ក្រុម​ហ៊ុន​បាន​ផ្អាក​ប្រតិបត្តិការកាលពី​ប្រាំពីរ​ខែមុន អ្នក​ស្រី​បាន​ទៅ​ធ្វើ​ការ​នៅ​ការដ្ឋាន​សំណង់​មួយ​កន្លែង​។​

អ្នកស្រី​បន្ត​ថា៖ «​ខ្ញុំ​បាន​បន្ត​តស៊ូ​មតិ​ ដើម្បី​បាន​ចូល​ធ្វើ​ការ​វិញ ហើយ​ថា​សំណង​ត្រូវ​តែ​សម​រម្យ ពី​ព្រោះ​ក្នុង​​អតីតកាល ក្រុម​ហ៊ុនគួរ​តែ​ពិចារណា​អំពីសំណង​របស់​ខ្ញុំ​សម្រាប់​ ២៦​ឆ្នាំ​មកនេះ ខ្ញុំ​បាន​ទទួល​តិច​តួច​ណាស់»។​

លោក ឃុន ថារ៉ូ អ្នកគ្រប់គ្រងកម្មវិធីការងារ របស់​អង្គការ​សង់ត្រាល់ មាន​ប្រសាសន៍​ថា លោក​មាន​អារម្មណ៍​សោក​ស្ដាយ​ដែល​ឃើញ​ថាទាំង​ក្រុម​ហ៊ុន និង​ក្រ​សួង​មិន​បាន​ផ្ដល់​ដំណោះ​ស្រាយ​ដែល​អាច​ទទួល​យក​បាន​។​

លោក​ថារ៉ូ បន្ថែម​ថា៖ «វាគឺ​ជា​ការ​រើសអើស​ពី​សំណាក់ក្រុម​ហ៊ុន​ ដែល​រំលាយ​សហជីព ខណៈ​សហជីព​ដើរ​តួនាទី​យ៉ាង​សកម្ម​ក្នុ​ងការ​ការពារ​សិទ្ធិ​ការងារ និង​ផល​ប្រយោជន៍​បុគ្គលិក​។ បើ​សិន​ជា​ក្រុម​ហ៊ុន​យក្ស​មួយ​នេះ​អាច​បំពាន[សិទ្ធិទាំងនេះ] បាន​ជោគ​ជ័យ នោះវា​ជាគំរូ​អាក្រក់​មួយ​សម្រាប់​អ្នក​ផ្សេង​ទៀត»។​

លោកបាន​លើក​ឡើង​ថា មន្ត្រី​សហជីព​មិន​​អាចបាន​ចូល​រួម​ជាមួយ​ក្រុម​អធិការកិច្ច​ក្រ​សួង​ការងារ​ក្នុង​ដំណើរ​ការ​ស្នើ​ឲ្យ​មាន​ការ​បញ្ឈប់​បុគ្គលិក​នេះទេ​។​

លោក​បន្ថែម​ថា៖ «​ក្រ​សួង និង​មន្ត្រី​អធិការកិច្ច​មិន​បាន​បំពេញ​តួនាទី​របស់​ខ្លួន​ឲ្យ​បាន​ត្រឹម​ត្រូវ ដើម្បី​ដោះស្រាយ​សំណើរបស់​សហជីព និង​មាន​ភាព​មិន​ប្រក្រតី​ជាច្រើន​ក្នុង​អំឡុង​ពេល​ធ្វើ​អធិការកិច្ច ពីព្រោះ​ខ្វះការ​ចូល​រួម​ពី​ខាង​សហជីព ដើម្បី​ស្វែង​រក​កំហុស​របស់​ពួកគេ ដែល​ឈាន​ដល់​ការ​រំលាយ​នេះ»។ ថារ៉ូឲ្យដឹងទៀតថា៖ «​វា​បាន​បង្ហាញ​ថា សហជីព​មិន​បាន​ទទួល​ការការ​ពារ​ទៅ​តាម​ច្បាប់»។​

លោក Hein Dames ប្រធាន​ផ្នែក​ធនធានមនុស្សរបស់ក្រុម​ហ៊ុន​ណាហ្គាវើលដ៍​ និង​បុគ្គលិក​ផ្នែក​ធន​ធានមនុស្ស​ផ្សេង​ទៀត​មាន​លោក ឌី សីហា និង​ រស់ ប៊ុនឡេង មិន​អាច​ទាក់ទង​សុំ​ការ​អត្ថាធិប្បាយបាន​ទេ។​

អ្នក​នាំពាក្យ​ក្រ​សួង​ការងារ លោក ហេង សួរ មាន​ប្រ​សាសន៍​ថា ក្រ​សួង​ និង​ក្រុមប្រឹក្សា​អាជ្ញាកណ្ដាល បាន​បំពេញ​តួនាទី​យ៉ាង​ត្រឹម​ត្រូវ និង​ស្រប​ច្បាប់។

លោក​មានប្រសាសន៍​ថា៖ «​បើសិន​ជា​សេចក្ដី​ថ្លែង​ការណ៍​ដែល​ចេញ​នោះ​អាច​ផ្លាស់​ប្ដូរ​លទ្ធផល​ដែល​បាន​ដោះស្រាយ​តាម​ច្បាប់​ហើយ​នោះ យើង​មិន​ចាំបាច់​ត្រូវ​ការឯកសារ​ច្បាប់ និង​នីតិវិធី​ច្បាប់​នោះទេ»។​

លោក​បន្ត​ថា៖ «​ក្នុង​អំឡុង​វិបត្តិកូវីដ-១៩ ឬ​វិបត្តិ​សេដ្ឋកិច្ច ការ​បញ្ឈប់​បុគ្គលិក​ជា​រឿង​ចៀស​មិន​រួច»។ លោកសួរបន្តទៀតថា៖ «​ក្នុង​ពិភព​លោក​នេះ គ្មាន​ច្បាប់​ណា​ហាម​ឃាត់ក្រុម​ហ៊ុន​ពី​ការ​បញ្ឈប់​បុគ្គលិក​ក្នុង​វិបត្តិ​កូវីដ-១៩ នោះទេ បើមាន​បង្ហាញ​ខ្ញុំ​មក»។​

លោក អ៊ុក ចន្ធូ ប្រធាននាយកដ្ឋាន​អធិការកិច្ច​ក្រសួងការងារ​មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។​

ប្រែសម្រួលពីអត្ថបទភាសាអង់គ្លេស៖ Civil society organizations and unions express disappointment with NagaWorld layoffs

484 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »