អតីតសកម្មជននិងសមាជិកគណបក្សសង្គ្រោះជាតិប្រហែល ២០នាក់ត្រូវបានចាប់ខ្លួនឬ «អប់រំ» ហើយដោះលែងវិញនៅមុនការវិលត្រឡប់ដែលបានគ្រោងទុករបស់លោកស្រី មូរ សុខហួរ អតីតអនុប្រធានគណបក្សនេះ។
លោកស្រី មូរ សុខហួរ និងសហការីមួយចំនួនរបស់លោកស្រីមានគម្រោងវិលត្រឡប់មកប្រទេសកម្ពុជាវិញនៅថ្ងៃទី៤ ខែមករា ឲ្យទាន់ពេលសម្រាប់សវនាការលើអតីតសមាជិកនិងអ្នកគាំទ្រគណបក្សសង្គ្រោះជាតិជាង១៣០នាក់ដែលមិនធ្លាប់មានពីមុន ពីបទញុះញង់និងរួមគំនិតក្បត់។ លោកស្រី សុខហួរ និងមនុស្សប្រហែល៤០នាក់ផ្សេងទៀតនឹងចូលរួមសវនាការនៅថ្ងៃទី១៤ ខែមករា ចំណែកអ្នកនៅសល់នឹងត្រូវឡើងសវនាការនៅថ្ងៃទី៤ ខែមីនា។
ទោះបីជាយ៉ាងណា ក្នុងរយៈពេលពីរសប្តាហ៍ចុងក្រោយនេះ គណបក្សដែលត្រូវបានគេរំលាយចោលនេះបានរាយការណ៍ថា មានអតីតសមាជិករបស់គណបក្សប្រហែល២០នាក់ត្រូវបាននគរបាលឃាត់ខ្លួនដោយសារតែគាំទ្រការវិលត្រឡប់របស់សហសេវិករបស់ពួកគេ ដោយមានមនុស្ស១០នាក់ប្រឈមនឹងការចោទប្រកាន់ពីបទឧក្រិដ្ឋ។
លោក ឆាយ គឹមឃឿន អ្នកនាំពាក្យអគ្គស្នងការនគរបាលជាតិបានបញ្ជាក់ថា មនុស្ស២០នាក់ត្រូវបានឃាត់ខ្លួន ប៉ុន្តែបដិសេធមិនផ្តល់ព័ត៌មានលម្អិតអំពីការចាប់ខ្លួននេះទេ។
លោក ឆាយ គឹមឃឿន បានមានប្រសាសន៍ថា៖ «យើងបានគ្រោងរួចហើយ ដើម្បីអនុវត្តដីកាចាប់ខ្លួនមេដឹកនាំក្រុមឧទ្ធាមទាំងនោះ»។
លោក សំ សុគង់ ជាមេធាវីដែលតែងតែតំណាងឲ្យកូនក្តីមកពីគណបក្សសង្គ្រោះជាតិបានមានប្រសាសន៍ថា អ្នកគាំទ្រ សកម្មជននិងអតីតសមាជិកប្រហែល២០នាក់ត្រូវបាននគរបាលឃុំខ្លួននៅទីក្រុងភ្នំពេញ ខេត្តបាត់ដំបង ខេត្តត្បូងឃ្មុំនិងខេត្តកណ្តាល ពីបទគាំទ្រការវិលត្រឡប់របស់លោកស្រី សុខហួរ និងមនុស្សផ្សេងទៀត។
លោក សំ សុគង់ មានប្រសាសន៍ថា៖ «មានមនុស្ស១០នាក់ដែលត្រូវបានចោទប្រកាន់ពីបទរួមគំនិតក្បត់ ញុះញង់បង្កឲ្យមានភាពវឹកវរដល់សន្តិសុខសង្គមប្រមាថព្រះមហាក្សត្រ និងត្រូវបានឃុំខ្លួនក្នុងពន្ធនាគារ»។
លោកមានប្រសាសន៍ថា ការចាប់ខ្លួននេះបានធ្វើឲ្យប៉ះពាល់ដល់សិទ្ធិរបស់កូនក្តីក្នុងការបញ្ចេញមតិនិងការជួបជុំដោយសេរីដែលមានចែងក្នុងរដ្ឋធម្មនុញ្ញនៃប្រទេសកម្ពុជា។
រដ្ឋាភិបាលកម្ពុជាធ្លាប់ធ្វើការចាប់ខ្លួនស្រដៀងគ្នានេះ ហើយក្រោយមកដោះលែងអតីតសមាជិកគណបក្សសង្គ្រោះជាតិជាង១០០នាក់ដែលតាមចោទថា បានគាំទ្រការវិលត្រឡប់របស់លោក សម រង្ស៊ី អតីតប្រធានគណបក្សនេះកាលពីឆ្នាំ២០១៩ និងបានលុបចោលលិខិតឆ្លងដែនរបស់មេដឹកនាំជាន់ខ្ពស់របស់គណបក្សនេះផងដែរ។
យោងតាមព័ត៌មានដែលបានចុះផ្សាយដោយគណបក្សសង្គ្រោះជាតិតាមប្រព័ន្ធអ៊ីនធើណិតបានឲ្យដឹងថា អតីតសកម្មជនគណបក្សឈ្មោះ គង់ ម៉ាស គឺជាមនុស្សម្នាក់ក្នុងចំណោមអ្នកដែលត្រូវបានចាប់ខ្លួននិងបញ្ចូនទៅឃុំខ្លួនជាបណ្តោះអាសន្ន។ កន្លងមកលោក គង់ ម៉ាស ត្រូវបានចាប់ខ្លួននិងផ្តន្ទាទោសកាលពីឆ្នាំ២០១៩ ពីបទ «ញុះញង់» និង «ប្រមាថរដ្ឋាភិបាល» ដោយសារបង្ហោះសាររិះគន់គោលនយោបាយរបស់រដ្ឋាភិបាលតាមបណ្តាញសង្គម។ លោកត្រូវបានដោះលែងពីពន្ធនាគារកាលពីខែសីហាឆ្នាំ២០២០ បន្ទាប់ពីជាប់ពន្ធនាគាររយៈពេល១៨ខែ។
អ្នកស្រី កុល សាត ភរិយារបស់លោក គង់ ម៉ាស បានបញ្ជាក់ថា លោក គង់ ម៉ាស ត្រូវនគរបាលចាប់ខ្លួនកាលពីថ្ងៃទី៣១ ខែធ្នូកាលពីសប្តាហ៍មុន។ អ្នកស្រីបន្ថែមថា ការចាប់ខ្លួនគាត់គឺជារឿងនយោបាយនិងអ្នកស្រីសួរថា ហេតុអ្វីបានទៅជាបទល្មើស បើគ្រាន់តែគាំទ្រការវិលត្រឡប់របស់លោកស្រី មូរ សុខហួរ។
អ្នកស្រី កុល សាត បាននិយាយថា៖ «ចា៎! ខ្ញុំគិតថា ពួកគេចាប់ខ្លួនគាត់ទាក់ទិននឹងបញ្ហាហ្នឹង។ វាអយុត្តិធម៌ ពីព្រោះពលរដ្ឋគ្រប់រូបមានសិទ្ធិសេរីភាពក្នុងការបញ្ចេញមតិ»។
លោកស្រី មូរ សុខហួរ បានបង្ហោះនៅលើហ្វេសប៊ុករបស់លោកស្រីថា ក្រុមហ៊ុនអាកាសចរណ៍ដែលលោកស្រីគ្រោងនឹងជិះនោះបានលុបចោលជើងហោះហើរដោយសារតែបញ្ហាជំងឺកូវីដ-១៩ ហើយនៅពេលនេះលោកស្រីនឹងវិលត្រឡប់ជាមួយអតីតសមាជិកគណបក្សសង្គ្រោះជាតិផ្សេងទៀតនៅថ្ងៃទី១៧ ខែកក្កដា ដែលនឹងខកខានមិនបានចូលរួមការចាប់ផ្តើមសវនាការ។
លោកស្រី មូរ សុខហួរ បានថ្លែងតាមអ៊ីម៉េលកាលពីថ្ងៃចន្ទថា លោកស្រីប្តេជ្ញាចិត្តថា នឹងវិលត្រឡប់មកវិញនៅថ្ងៃទី១៧ ខែមករា។
លោកស្រីមានប្រសាសន៍ថា៖ «មានឧបសគ្គច្រើនដែលហួសពីការគ្រប់គ្រងរបស់ខ្ញុំរួមទាំងជំងឺកូវីដ-១៩ ផងដែរ។ ប៉ុន្តែប្រសិនបើខ្ញុំផ្លាស់ប្តូរជើងហោះហើរ ខ្ញុំនឹងផ្លាស់ប្តូរជើងហោះហើរ។ ខ្ញុំនឹងធ្វើអ្វីៗគ្រប់យ៉ាងដែលអាចធ្វើទៅបាន ដើម្បីវិលត្រឡប់ទៅវិញ។ ដូចដែលខ្ញុំបាននិយាយយ៉ាងច្បាស់ វាគឺជាសិទ្ធិរបស់ខ្ញុំដែលមានចែងក្នុងរដ្ឋធម្មនុញ្ញ»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានច្រានចោលការចោទប្រកាន់ថា មនុស្ស១០នាក់ត្រូវបានចោទប្រកាន់ដោយសារតែពួកគាត់ពាក់ព័ន្ធទៅនឹងការវិលត្រឡប់របស់លោកស្រី មូរ សុខហួរ ដែលបានគ្រោងទុកនោះ។
លោកបានមានប្រសាសន៍ថា៖ « [នរគបាល] បានអនុវត្តច្បាប់ចំពោះអ្នកដែលបានប្រព្រឹត្តិបទល្មើសធ្ងន់ធ្ងរ។ វិធានការច្បាប់មិនពាក់ព័ន្ធនឹងដំណើរវិលត្រឡប់ដែលបានគ្រោងទុករបស់លោកស្រី មូរ សុខហួរ ទេ»។
លោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៅសមាគមអាដហុកបានមានប្រសាសន៍ថា ការផ្តោតគោលដៅជាបន្តបន្ទាប់លើ សកម្មជននយោបាយបានត្រឹមតែធ្វើឲ្យជម្លោះដែលកំពុងបន្តរវាងគណបក្សសង្គ្រោះជាតិនិងរដ្ឋាភិបាលដែលដឹកនាំដោយគណបក្សប្រជាជនកម្ពុជានេះកាន់តែធ្ងន់ធ្ងរទៅវិញទេ។
លោកបានមានប្រសាសន៍ថា៖ «វាជារឿងនយោបាយ ជាជាងការអនុវត្តច្បាប់ពីព្រោះយើងមើលឃើញថា វាគឺជាការផ្តោតគោលដៅលើក្រុមសកម្មជននយោបាយ»៕
ប្រែសម្រួលពីអត្ថបទភាសាអង់គ្លេស៖ More CNRP activists arrested ahead of Mu Sochua’s planned return
