ពលរដ្ឋ២ភូមិចំនួន២៥២គ្រួសារនៅឃុំទឹកវិល ស្រុកស្អាង ខេត្ដកណ្ដាល ស្នើអាជ្ញាធរចេញប្លង់កម្មសិទ្ធិ ដោយពួកគាត់អះអាងថា បានកាន់កាប់តាំងពីឆ្នាំ១៩៧៩ និងមានលិខិតកាន់កាប់ ប៉ុន្តែអាជ្ញាធរនៅតែមិនព្រមចេញប្លង់ជូនពួកគាត់ ខណៈអាជ្ញាធរបញ្ជាក់ថា ដី៩០ហិកតាដែលពលរដ្ឋទាមទារនោះជាដីរបស់រដ្ឋ។
ស្រ្ដីវ័យចំណាស់ម្នាក់ឈរចង្អុលទៅកាន់ដីដែលបានបាត់បង់ក្រោមកម្ដៅថ្ងៃ និងជាតំណាងពលរដ្ឋ អ្នកស្រី ឆុំ សុធី អាយុ៥០ឆ្នាំ រស់នៅភូមិទួលខ្មួញ ឃុំទឹកវិល ស្រុកស្អាង ខេត្ដកណ្ដាល បានផ្ដល់បទសម្ភាសន៍ជាមួយ ខេមបូចា ទាំងទឹកមុខក្រៀមក្រំថា ដីក្នុងឃុំមានចំនួន៩០ហិកតាដែលមានប្រជាពលរដ្ឋ២៥២គ្រួសារតែងតែអាស្រ័យផល ដោយក្នុងនោះមាន២ភូមិ គឺភូមិទួលខ្មួញ និងភូមិព្រែករាំង ខណៈដីទាំងនោះគឺពលរដ្ឋបានកាន់កាប់តាំងពី១៩៧៩មកម្ល៉េះ ប៉ុន្ដែបែរជាមានជម្លោះជាមួយក្រុមហ៊ុនឯកជនមួយឈ្មោះថា កែវ សុជាតា អំឡុងឆ្នាំ២០២០។
ស្រី្ដស្លៀករ៉ូបព៌ណខ្មៅ លាយសបន្ដិចៗ បានឈរបន្ដរៀបរាប់ថា នៅខែកក្កដាឆ្នាំ២០១៩ពលរដ្ឋមានការសាទរដោយមានខាងមន្ទីរសុរិយោដីស្រុកស្អាងបានចុះវាស់វែងថា ចេញបណ្ណកម្មសិទ្ធិស្របច្បាប់ឱ្យពលរដ្ឋ ប៉ុន្ដែនៅចុងខែសីហាឆ្នាំ២០២០ ស្រាប់តែមានក្រុមហ៊ុនឯកជនមួយមកកាយដីដែលពលរដ្ឋកំពុងអាស្រ័យផល ដោយអះអាងថា ទទួលបានសិទ្ធិពីរដ្ឋដើម្បីកាយអាចម៍ដី។
អ្នកស្រីបន្តថា៖ «ខ្ញុំខំតែអរ ឃើញខាងមន្ទីរសុរិយោដីស្រុកចុះវាស់ដីថាចេញប្លង់ឱ្យ តែបែរជាឱ្យក្រុមហ៊ុន កែវ សុជាតា មកកាយដីពួកខ្ញុំវិញ។ ខ្ញុំឈឺចាប់ណាស់»។
ស្រ្ដីពាក់វ៉ែនតា សម្បុរខ្មៅស្រអែម បានលើកឡើងថា ចាប់តាំងពីមានជម្លោះមក ក្រុមអ្នកស្រីបានដាក់ញត្ដិទៅសាលាខេត្ដកណ្ដាល និងស្ថាប័នពាក់ព័ន្ធឱ្យជួយអន្ដរាគមន៍ ប៉ុន្ដែនៅគ្មានដំណោះស្រាយឱ្យពួកអ្នកស្រី។ អ្នកស្រីបន្ដថា ក្រោយពីដាក់ញត្ដិទៅស្ថាប័ននានា ឃើញមានកិច្ចអន្ដរាគមន៍ពីលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា តម្រូវឱ្យរដ្ឋបាលខេត្ដកណ្ដាលចេញបំភ្លឺពាក់ព័ន្ធនឹងជម្លោះដីកាលពីថ្ងៃទី១០ខែឧសភាឆ្នាំ២០២៣ ប៉ុន្ដែខាងរដ្ឋបាលខេត្ដកណ្ដាលមិនបានចេញបំភ្លឺឡើយ។
យ៉ាងណាមិញអ្នកស្រី សុធី បន្ដថា គិតមកដល់ពេលនេះរយៈពេលជាង៣ឆ្នាំហើយ ដែលពលរដ្ឋចំនួន២៥២គ្រួសារតែងតែតវ៉ា និងស្នើសុំទៅអាជ្ញាធរឱ្យចេញបណ្ណកម្មសិទ្ធិស្របច្បាប់ ដើម្បីឱ្យពលរដ្ឋទាំងអស់អាចអាស្រ័យផលដើម្បីមានលទ្ធភាពសងទៅធនាគារ ខណៈអ្នកស្រីបានបញ្ជាក់យ៉ាងច្បាស់ថា ពលរដ្ឋ៩៥%ហើយដែលជំពាក់ធនាគារ និងមិនមានលទ្ធភាពសង។
ស្រ្ដីវ័យ៥០រូបនេះបានត្អូញត្អែរពីទុក្ខលំបាកដោយផ្ទាល់ថា៖ «ចាប់តាំងពីមានជម្លោះដីធ្លីមកពួកខ្ញុំម្នាក់ៗ៩៥%ហើយជំពាក់ធនាគារ។ ដីពួកខ្ញុំធ្វើសុខៗបែរជាអាជ្ញាធរយកឱ្យក្រុមហ៊ុនឯកជនមកកាយ និងចាក់សំរាមចូល ពេលខ្ញុំសួរគេថា អភិបាលខេត្ដកណ្ដាលឱ្យគេមកចាក់។ ខ្ញុំស្នើដល់អាជ្ញាធរមេត្ដាជួយចេញប្លង់រឹងឱ្យពួកខ្ញុំមក ពួកខ្ញុំគ្មានអីរំពឹងទេ មានតែដីម្នាក់តិចតួចហ្នឹងទេ។សម្ដេចពុក និងសម្ដេច ហ៊ុន ម៉ាណែត មេត្ដាជួយរកយុត្ដិធម៌ឱ្យកូនចៅផង»។
កាលពីថ្ងៃទី១០ ខែវិច្ឆិកា ឆ្នាំ២០២៣កន្លងទៅ ប្រជាពលរដ្ឋជិត២០០នាក់បាននាំគ្នាតវ៉ានៅលើដីរបស់ពួកគេដែលមានទំហំ៩០ហិកតា ស្ថិតនៅភូមិទួលខ្មួញ ឃុំទឹកវិល ស្រុកស្អាង ដើម្បីឱ្យអាជ្ញាធរចេញប្លង់រឹង។ ក្នុងអំឡុងពេលតវ៉ាក៏ត្រូវបានលោក ជី គឹមហៃ អភិបាលស្រុងស្អាងចុះអន្ដរាគមន៍ដោយឱ្យពលរដ្ឋរំសាយសិន រង់ចាំការដោះស្រាយពីថ្នាក់លើ។ ប៉ុន្ដែមកដល់ពេលនេះ ពលរដ្ឋអះអាងថា មិនមានការឆ្លើយតបណាមួយនៅឡើយទេ។
ហាក់មិនខុសគ្នាទេស្រ្ដីវ័យ៦៤ឆ្នាំមា្នក់ដែលក្នុងដៃមានកាន់លិខិតបញ្ជាក់ពីអាជ្ញាធរភូមិឃុំលើដីរបស់អ្នកស្រី នោះគឺអ្នកស្រី អាង ថារិន រស់នៅភូមិទួលខ្មួញ ឃុំទឹកវិល ស្រុកស្អាង ដោយបានថ្លែងថា ដីដែលអ្នកស្រីកាន់កាប់មានចំនួន២ហិកតាដែលជាដីអ្នកស្រីអាស្រ័យផលទាំងពី១៩៧៩មក ហើយនៅឆ្នាំ២០១០ អាជ្ញាធរភូមិ និងឃុំបានចេញលិខិតបញ្ជាក់ដើម្បីឱ្យអ្នកស្រីដាក់កម្ចីធនាគារបាន។
អ្នកស្រី ថារិន ឱ្យដឹងថា នៅឆ្នាំ២០១៩ អ្នកស្រីឮថា អាជ្ញាធរចុះវាស់វែងដើម្បីចេញប្លង់រឹងឱ្យអ្នកស្រី ខណៈអ្នកស្រីកើតបានចៅម្នាក់ អ្នកស្រីថា វាជារឿងសំណាងណាស់ ប៉ុន្ដែបែរជាផ្ទុយស្រឡះទៅវិញ។ អ្នកស្រីបន្ដថា ចាប់តាំងពីដីរបស់អ្នកស្រីមានជម្លោះមកអ្នកស្រីគ្មានអ្វីអាស្រ័យផល ហើយជួបការលំបាកជាច្រើន ខណៈអ្នកស្រីរំពឹងប្លង់រឹងពីអាជ្ញាធរ។
អ្នកស្រីបន្ថែមថា៖ «ថ្ងៃគេចុះវាស់វែងចំថ្ងៃកូនខ្ញុំកើតកូននៅពេទ្យថាខ្ញុំអរអើយអរ! ខ្ញុំថាអញអត់នៅទេ អញទៅផ្ដិតមេដៃប្លង់រឹង ដីខ្ញុំ២ហិកតា។ ស្រាប់តែមិនបានប៉ុន្មានគេចុះបោះបង្គោលើដីខ្ញុំ ខ្ញុំថាហ្អាក! ក្រែងចុះវាស់ចេញប្លង់ ម៉េចទៅជាថាដីខ្ញុំគេយកលក់ឱ្យអ្នកនេះ អ្នកនោះវិញ។ ខ្ញុំចង់បានប្លង់រឹងកម្មសិទ្ធិ ស្រណុកពួកប្រជាពលរដ្ឋខ្ញុំយកលុយរដ្ឋ គ្រាន់ចឹញ្ចឹមក្រពះតទៅទៀត»។
ក្នុងលិខិតមួយដែលខេមបូចាទទួលបានពីពលរដ្ឋក្នុងនោះបានបញ្ជាក់ថា ពលរដ្ឋជាម្ចាស់កម្មសិទ្ធិស្របដែលចេញដោយអាជ្ញាធរឃុំមានបោះត្រាដោយលោក ជ្រិន ស្រៀង មេឃុំទឹកវិល និងចុះហត្ថលេខាដោយលោក លុយ ហៀក ជាមេភូមិព្រែករាំងនៅឆ្នាំ២០១០។ ក្នុងលិខិតដដែលបន្ដថា ការចេញលិខិតបញ្ជាក់នេះឱ្យអ្នកស្រី អាង ថារិន អាចយកទៅប្រើប្រាស់នឹងអាស្រ័យផលចាប់ពីថ្ងៃបោះត្រា និងហត្ថលេខា។
ពេលអ្នកសារព័ត៌មានខេមបូចាចុះទៅផ្ទាល់គេអង្កេតឃើញថា ដីដែលពលរដ្ឋកំពុងតវ៉ាមានបោះបង្គោលដូចពលរដ្ឋលើកឡើងថា អាជ្ញាធរស្រុកអ្នកចុះបោះ និងមានរណ្ដៅដីមួយយ៉ាងធំ ទំហំប្រហែល១០ហិកតា និងមានគ្រឿងចក្រដូចជា អាអិច២គ្រឿង និងឡានដឹកដី១គ្រឿង និងអាប៊ុលឈូសដី១គ្រឿងនៅជាប់រណ្ដៅដី។ គ្រឿងចក្រដែលនៅជាប់រណ្ដៅដី ពលរដ្ឋអះអាងថា ជាគ្រឿងចក្ររបស់ក្រុមហ៊ុន កែវ សុជាតា។
ខេមបូចា មិនអាចសុំការបំភ្លឺពីក្រុមហ៊ុន កែវ សុជាតា បានទេជុំវិញរឿងជម្លោះដីធ្លីនេះ កាលពីសប្តាហ៍ទី២នៃខែនេះ។
ស្រដៀងគ្នានេះដែរ លោក រឿង សារ៉ុម អាយុ៥៤ឆ្នាំ រស់នៅភូមិទួលខ្មួញ ឃុំទឹកវិល ស្រុកស្អាង បានឱ្យដឹងថា លោកមានដី៧០អា ទាំងដីកេរ្ដិ៍ និងដីទិញអ្នកជិតខាងមានទំហំតូចៗ ដើម្បីយកមកអាស្រ័យផល ត្បិតលោកមិនមានមុខរបរផ្សេងទេ គឺពឹងផ្អែកទាំងស្រុងលើការធ្វើស្រែ។
លោកបន្ដថា ពលរដ្ឋទាំង២ភូមិ គឺរស់ពឹងផ្អែកលើដីដែលកំពុងមានជម្លោះទាំងស្រុង ប៉ុន្តែអ្នកភូមិព្រែករាំង មិនសូវជាមានដីច្រើនទេ មានតែអ្នកភូមិទួលខ្មួញប៉ុណ្ណោះមានដីប៉ះពាល់ច្រើន។ ហើយកន្លងមកក្រុមហ៊ុនដែលអះអាងថាអាជ្ញាធរឱ្យចុះមកកាយដីពលរដ្ឋតែងតែងធ្វើទុក្ខបុកម្នេញពួកលោក អស់ពីរឿងមួយចូលរឿងមួយលោកថា ពេលលោកសាកសួរទៅអាជ្ញាធរមូលដ្ឋានបែរជាថា មិនដឹងរឿងទាំងអស់។
លោក សារ៉ុម ឱ្យដឹងថា លោកបានចាត់ទុកសកម្មភាពរបស់អាជ្ញាធរថា ជាការគប់គិតគ្នាជាប្រព័ន្ធដើម្បីធ្វើស៊ីប្រជាពលរដ្ឋ។ លោកបន្តថា ពេលពលរដ្ឋនាំគ្នាតវ៉ានិងទាមទារអ្វីមួយគឺពលរដ្ឋតែងតែទទួលបាននូវការគំរាមកំហែងពីអាជ្ញាធរ។
លោកបន្ថែមថា៖ «ផលលំបាកគឺគាត់[អាជ្ញាធរ និងក្រុមហ៊ុន]មកធ្វើទុក្ខបុកម្នេញប្រជាពលរដ្ឋអត់ឱ្យបានសុខហ្មង។ ដីខ្ញុំសរុបទាំងអស់៧០អា។ គប់គិតគ្នាជាប្រព័ន្ធ ចង់យកដីប្រជាពលរដ្ឋ អត់មានដោះស្រាយឱ្យប្រជាពលរដ្ឋ។ ចាប់តាំង២០១៩មកពួកខ្ញុំដើរដាក់លិខិតរហូតបែរជាមិនមានការឆ្លើយតបទាំងអស់»។
ជុំវិញរឿងចេញលិខិតបញ្ជាក់នេះលោក ជ្រិន ស្រៀង មេឃុំទឹកវិល បានបញ្ជាក់ថា សម្រាប់ចេញលិខិតនេះគឺពលរដ្ឋបានមកពឹងឱ្យរដ្ឋបាលឃុំជួយធ្វើលិខិតដើម្បីឱ្យកម្ចីធនាគារបាន ប៉ុន្ដែលោកក៏បានប្រាប់ពលរដ្ឋថា ការចេញបណ្ណកម្មសិទ្ធិមិនមែនជាដែនសមត្ថកិច្ចរបស់ឃុំឡើយ។ លោកបានបញ្ជាក់ថា ការចេញលិខិតបញ្ជាក់នេះព្រោះជាការយោគយល់ដល់ពលរដ្ឋប៉ុណ្ណោះ បើលោកមិនចេញឱ្យទេពលរដ្ឋគ្មានដើមទុនរកស៊ី។
មេឃុំរូបនេះបន្ដថា៖ «វាកំហុសយើងអាជ្ញាធរដែរ។ប្រជាពលរដ្ឋគាត់ត្រូវការយកលុយពីធនាគារ ហើយគាត់សុំឱ្យយើងជួយតែបញ្ជាក់ធ្វើមិចយកលុយពីធនាគារមករកស៊ី មកដោះស្រាយស្ថានភាពគ្រួសារចឹងក្មួយ។ យើងក៏បានប្រាប់គាត់ថាបើយកជាកម្មសិទ្ធិអីគឺថ្នាក់ឃុំអត់មានសិទ្ធិសម្រេចទេ។ យើងជាការយោគយល់ពលរដ្ឋទេ ព្រោះយើងរស់នៅជាមួយពលរដ្ឋ»។
លោក ជី គឹមហៃ អភិបាលស្រុកស្អាង បានផ្ដល់បទសម្ភាសន៍ដល់ ខេមបូចា ថា ជុំវិញករណីជម្លោះដី៩០ហិកតានៅឃុំទឹកវិល ពិតជាមានមែន ប៉ុន្ដែលោកថា ការទាមទាររបស់ពលរដ្ឋដោយស្នើចេញបណ្ណកម្មសិទ្ធិស្របច្បាប់លោកថា មិនអាចទៅរួចនោះទេ ពីព្រោះតែដីទាំងនោះគឺដីរដ្ឋ។ លោកបានបញ្ជាក់យ៉ាងច្បាស់ថា ដីទាំងអស់មានចំនួន៣ប្លង់ និងមានទំហំជាង៩០ហិកតា ដែលជាដីរដ្ឋទាំងស្រុង។
លោកថ្លែងថា ការទាមទារបស់ពលរដ្ឋវាជាសិទ្ធិលោកមិនអាចហាមឃាត់បាននោះទេ តែយ៉ាងណា លោកសុំបដិសេធចំពោះការចោទប្រកាន់របស់ពលរដ្ឋថា អាជ្ញាធរគប់គិតគ្នាវាជារឿងមិនពិត។ លោកបន្ដថា បើសិនជាពលរដ្ឋនៅតែបន្ដតវ៉ាឱ្យចេញបណ្ណកម្មសិទ្ធិ លោកថា មានតែរង់ចាំចំណាត់ការពីថ្នាក់លើនោះទេ សម្រាប់លោកបានត្រឹមសម្របសម្រួលប៉ុណ្ណោះ។
លោកអភិបាលស្រុកបន្ថែមថា៖ «បាទ! ដីហ្នឹងជាកម្មសិទ្ធិរបស់រដ្ឋ។ ដីហ្នឹងមានប្លង់រឹងរបស់រដ្ឋរួចហើយ លើសពីហ្នឹងខ្ញុំមិនអាចឆ្លើយជូនបានទេ ខ្ញុំជម្រាបជូនប៉ុណ្នឹង»។
ខេមបូចា មិនអាចសុំការបំភ្លឺពីលោក គ្រុយ ម៉ាឡែន អ្នកនាំពាក្យរដ្ឋបាលខេត្ដកណ្ដាលបានទេដោយទូរសព្ទចូលជាច្រើនដង ប៉ុន្ដែគ្មានអ្នកលើក។
កាលពីថ្ងៃទី២០ ខែមិថុនា ឆ្នាំ២០២៣កន្លងប្រជាពលរដ្ឋបាននាំគ្នាដាក់លិខិតសុំកិច្ចអន្ដរាគមន៍ទៅកាន់លោក សាយ ឈុំ ប្រធានព្រឹទ្ធសភា ដើម្បីឱ្យជួយអន្ដរាគមន៍ឱ្យចេញប្លង់កម្មសិទ្ធិស្របច្បាប់ ហើយនៅថ្ងៃទី១៩ ខែកញ្ញា ឆ្នាំ២០២៣ ពលរដ្ឋបាននាំគ្នាដាក់លិខិតស្នើសុំកិច្ចអន្ដរាគមន៍ទៅកាន់ក្រសួងមហាផ្ទៃផងដែរ។
ក្នុងលិខិតទាំងនោះបានបង្ហាញពីការកាន់កាប់ និងអាស្រ័យផលចាប់តាំងពី១៩៧៩ និងបានស្នើឱ្យជួយចេញបណ្ណកម្មសិទ្ធិស្របច្បាប់ជូនពួកគាត់លើទំហំដី៩០ហិកតាស្ថិតនៅភូមិ ទួលខ្មួញ ឃុំទឹកវិល ស្រុកស្អាង ខេត្ដកណ្ដាល។
បើតាមលោក អំ សំអាត នាយកចាត់ការទូទៅនៃអង្គការលីកាដូ បានលើកឡើងថា បើដីកំពុងមានជម្លោះជាដីសាធារណៈរបស់រដ្ឋ គឺពលរដ្ឋអាចអាស្រ័យផលបាន ប៉ុន្ដែពេលរដ្ឋបំប្លែងដីទៅជាដីឯកជនរបស់រដ្ឋ ត្រូវប្រគល់ឱ្យប្រជាពលរដ្ឋដែលបានកាន់កាប់ និងប្រើប្រាស់។ លោកថា ជាក់ស្ដែងពលរដ្ឋមានលិខិតបញ្ជាក់ពីភូមិឃុំថា ដីរបស់ពួកគាត់មានទំហំប៉ុណ្ណេះដូច្នេះរដ្ឋត្រូវតែចេញបណ្ណកម្មសិទ្ធិស្របច្បាប់ជូន។
លោកថ្លែងថា ក្នុងករណីដែលរដ្ឋមិនព្រមចេញប្លង់រឹង និងយកដីទាំងនោះទៅលក់ឱ្យក្រុមហ៊ុនឯកជនគឺជាការរំលោភសិទ្ធិរបស់ពលរដ្ឋធ្ងន់ធ្ងរហើយ។ លោកបានសង្កត់ធ្ងន់ថា រដ្ឋាភិបាលគួរតែត្រួតពិនិត្យលើចំណុចនេះ ដើម្បីចៀសវាងបង្កបញ្ហាជាច្រើនដល់ពលរដ្ឋកំពុងតែកាន់កាប់ និងអាស្រ័យផល ព្រោះពលរដ្ឋទាំងអស់រស់ពឹងផ្អែកលើដីហ្នឹង។
លោក សំអាត បន្ថែមថា៖ «បើរដ្ឋបានបំប្លែងដីទាំងអស់ហ្នឹងទៅជាដីឯកជនរបស់រដ្ឋហើយគឺត្រូវចេញប្លង់កម្មសិទ្ធិស្របច្បាប់ឱ្យពលរដ្ឋដែលបានកាន់កាប់ជាយូរមកហើយ ជាពិសេសមានលិខិតបញ្ជាក់ពីអាជ្ញាធរមូលដ្ឋានទៀត។ លើកលែងតែដកហូតដីយកមកបម្រើផលប្រយោជន៍សាធារណៈ តែបើអត់ទេគឺរដ្ឋត្រូវចេញប្លង់រឹងឱ្យពលរដ្ឋ»។
ចំណែកឯលោក វណ្ណ សូផាត មន្រី្ដសម្របសម្រួល និងធុរៈកិច្ចនៃមជ្ឈមណ្ឌលសិទ្ធិមនុស្សកម្ពុជា បានថ្លែងថា ជាទូទៅអាជ្ញាធរថ្នាក់ក្រោមជាតិ និងអាជ្ញាធរមូលដ្ឋានគប់គិតគ្នាជាប្រព័ន្ធក្នុងការលក់ដីឯកជនរបស់រដ្ឋទៅឱ្យក្រុមហ៊ុនឯកជន ឬមួយឈ្មួញដី ជាជាងប្រគល់ឱ្យប្រជាពលរដ្ឋ។ លោកបានដាក់ជាសំណួរថា បើសិនជាអាជ្ញាធរថ្នាក់ក្រោមជាតិ និងអាជ្ញាធរមូលដ្ឋានអាចលក់បាន ហេតុអ្វីមិនអាចចេញប្លង់រឹងឱ្យពលរដ្ឋដែលបានកាន់កាប់ និងអាស្រ័យផលជាយូរមកហើយបាន។ វាជារឿងដដែលៗរបស់អាជ្ញាធរ។
លោកបន្តថា កិច្ចការទាំងអស់នេះ គឺជាការទទួលខុសត្រូវរបស់ក្រសួងដែនដី នគរូបនីកម្ម និងសំណង់ គួរតែចុះពិនិត្យឱ្យបានជាក់លាក់ថាតើដីមានជម្លោះវាជាដីសាធារណៈរបស់រដ្ឋ ឬក៏ដីឯកជនរបស់រដ្ឋ ហើយគួរចេញប្លង់ឱ្យពលរដ្ឋដែរឬទេ។
លោកថា៖ «មួយរយៈកន្លងមកឃើញថាមិនមានការគ្រប់គ្រងដីរដ្ឋឱ្យបានច្បាស់លាស់ទេ ជាពិសេសដីប្រជាពលរដ្ឋបានអាស្រ័យផល។ បើអាជ្ញាធរអាចលក់ដីហ្នឹងឱ្យក្រុមហ៊ុន ឬអ្នកមានអំណាចបានអាហ្នឹងវាជាការខុសច្បាប់ និងនីតិវិធី។ ការធ្វេប្រហែសរបស់ស្ថាប័នពាក់ព័ន្ធមួយចំនួនហ្នឹងហើយដែលធ្វើឱ្យអាជ្ញាធរថ្នាក់ក្រោមជាតិ និងមូលដ្ឋានងាយគប់គិតគ្នាណាស់ ហើយអ្នករងគ្រោះគឺប្រជាពលរដ្ឋ»។
កាលពីថ្ងៃទី១០ ខែឧសភា ឆ្នាំ២០២៣ លោក កែវ រ៉េមី រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានគណៈកម្មាធិការសិទ្ធិមនុស្សនៃក្រសួងមហាផ្ទៃ បានចេញលិខិតផ្លូវការមួយឱ្យទៅអភិបាលខេត្ដកណ្ដាលក្រោយពីទទួលលិខិតពីប្រជាពលរដ្ឋថ្ងៃទី៦ ខែមិថុនា ឆ្នាំ២០២៣។
ក្នុងលិខិតសរសេរថា៖ «សូមឯកឧត្ដមអភិបាលនៃគណៈអភិបាលខេត្ដកណ្ដាល និងជាប្រធានគណៈសុរិយោដីថា្នក់ខេត្ដ ជួយបំភ្លឺករណីទំនាស់ដីធ្លីខាងលើមកគណៈកម្មាធិការសិទ្ធិមនុស្ស មានមូលដ្ឋានគ្រប់គ្រាន់សម្រាប់ចំណាត់ការបន្ដ»៕
