សមាគមសម្ព័ន្ធអ្នកសារព័ត៌មានកម្ពុជា

កូដករណាហ្គាវើលដ៍មិនបញ្ឈប់ការធ្វើកូដកម្មដាច់ខាត បើ​តុលាការ​មិនទម្លាក់​បទចោទ​លើតំណាងសហជីព

បុគ្គលិកក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបានចាប់ខ្លួនកូដករដាក់ចូលក្នុងឡានក្រុង នៅពេលដែលពួកគេព្យាយាមធ្វើកូដកម្មឡើងវិញនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ នៅថ្ងៃទី១៦ ខែមិនា ឆ្នាំ២០២២។ ខេមបូចា/ព្រីង សំរាំង
បុគ្គលិកក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបានចាប់ខ្លួនកូដករដាក់ចូលក្នុងឡានក្រុង នៅពេលដែលពួកគេព្យាយាមធ្វើកូដកម្មឡើងវិញនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ នៅថ្ងៃទី១៦ ខែមិនា ឆ្នាំ២០២២។ ខេមបូចា/ព្រីង សំរាំង

បុគ្គលិកក្រុមហ៊ុនណាហ្គាវើលដ៍ ដែលកំពុងធ្វើកូដកម្មទាមទារសិទ្ធិការងារ បានបញ្ជាក់​ពី​ជំហរបស់ពួកគេយ៉ាងដាច់ខាតថា ពួកគេនឹងមិនបញ្ឈប់ការធ្វើកូដកម្មឡើយ ​បើ​តុលាការ​មិនព្រមទម្លាក់បទចោទប្រកាន់មកលើតំណាងរបស់ពួកគេ។

អ្នកស្រី សៀក កញ្ញា ជាកូដករមួយរូបដែលមិនទាន់មានឈ្មោះកាត់ អាយុ៣៤ឆ្នាំ បម្រើ​ការ​ផ្នែកកាស៊ីណូរយៈពេល១២ឆ្នាំ បានឱ្យដឹងថា ដើម្បីឱ្យមានការចរចាប្រកបដោយ​តម្លាភាព តុលាការត្រូវតែទម្លាក់បទចោទប្រកាន់មកលើថ្នាក់ដឹកនាំសហជីពទាំង៨រូប និងសមាជិក​ចំនួន៧នាក់ទៀត។

អ្នកស្រី កញ្ញា បានប្រាប់ថា៖«ខ្ញុំសូមឱ្យតុលាការទម្លាក់បទចោទ មកលើតំណាងរបស់​ពួកខ្ញុំទាំង៨នាក់ និងកូដករទាំង៧នាក់ទៀត ដោះលែងឱ្យពួកគាត់មានសិទ្ធិសេរីភាព ដើម្បីចូលតុចរចា»។

កូដករវ័យ៣៤ឆ្នាំរូបនេះ បន្តទៀតថា រូបនាងមិនអាចបញ្ឈប់ការធ្វើកូដកម្មបានឡើយ ប្រសិនបើតុលាការមិនទាន់ទម្លាក់បទចោទ ដោយគ្រាន់តែដោះលែងតំណាងសហជីព​ឱ្យ​នៅ​ក្រៅឃុំ ដើម្បីតែទៅចរចា ព្រោះវាមិនបានបង្ហាញពីតម្លាភាព និងយុត្តិធម៌ឡើយ។

ស្រ្តីរូបនេះអះអាងថា៖«បើអត់មានការទម្លាក់បទចោទទេ ហើយហៅពួកគាត់ទៅចរចា ចឹង​ពួកខ្ញុំក៍ទទួលយកមិនបានដែរ ពួកខ្ញុំនៅតែរក្សាគោលជំហរទាមទារសិទ្ធិសេរីភាពការងារ ធ្វើកូដកម្មដោយសន្តិវិធីទាល់តែមានដំណោះស្រាយ និងទម្លាក់បទចោទ»។

អ្នកស្រី កញ្ញា បញ្ជាក់ទៀតថា រាល់ការធ្វើកូដកម្មទាមទារកន្លងមក គឺជាការសម្រេច​ចិត្ត​របស់កូដករទាំងអស់ មិនមែនជាការញុះញង់ពីមេដឹកនាំសហជីព ឬបុគ្គលណាឡើយ ហើយមេដឹកនាំសហជីពក៍មិនអាចបញ្ឈប់ការធ្វើកូដកម្មនេះបានដែរ គឺមានសិទ្ធិ​ពាំនាំការ​សម្រេចចិត្តរបស់កូដករតែប៉ុណ្ណោះ។

ចំណែកកញ្ញា មៀច ស្រីអូន  ដែលជាកូដករមួយរូបដែរ ក៍បានលើកឡើងស្រដៀងគ្នាថា រូប​នាងក៍ដូចជាកូដករផ្សេងទៀត នៅតែបន្តធ្វើកូដកម្មដោយអហិង្សា ទាល់តែតុលាការទម្លាក់​បទចោទប្រកាន់មកលើមេដឹកនាំសហជីព និងសមាជិកទាំង១៥នាក់ជាផ្លូវការ។

កញ្ញា ស្រីអូន បានឱ្យដឹងថា៖« តំណាងរបស់ពួកខ្ញុំចូលតុចរចា តែខ្សែនៅជាប់កចឹង តើសួរ​ថាការចរចានឹងមានតម្លាភាពអត់? គឺមិនមានទេ ទាល់តែដោះខ្សែនៅជាប់ក​ចេញសិន បាន​ខ្ញុំទទួលស្គាល់ថាជាភាពយុត្តិធម៌សម្រាប់កូដករ»។

កញ្ញា ស្រីអូន បន្តថា បច្ចុប្បន្ននេះ រូបនាងនិងកូដករប្រមាណ១៩៩នាក់ផ្សេងទៀត ដែល​កំពុងចេញធ្វើកូដកម្មទាមទារដំណោះស្រាយ កំពុងរងការគំរាមកំហែង និងធ្វើ​ទុក្ខបុកម្នេញ ពីសំណាក់អាជ្ញាធរ ក្រោមរូបភាពថាចាប់ពួកគេមកធ្វើចត្តាឡីស័កនៅខណ្ឌព្រែកព្នៅ។

ស្រីអូន បន្ថែមថា៖«តាំងពីម្សិលមិញគ្នាខ្ញុំនៅនេះ១៩៩នាក់ គឺអាជ្ញាធរចាប់មក​កុំឱ្យ​ខ្ញុំ​ស្រែក​ទាមទាររកសិទ្ធិការងារនៅក្បែរក្រុមហ៊ុនណាហ្គាវើលដ៍ ចាប់មកគឺចាប់​រារាំង​មិនឱ្យ​ទៅក្បែរ​ណាហ្គាតែម្ដង»។

ចំណែកអ្នកស្រី ឈឹម​ សុខន ជាអគ្គលេខាសហជីព ដែលទើបតែត្រូវបានដោះលែង​ឱ្យនៅ​ក្រៅឃុំ បានឱ្យដឹងថា រដ្ឋាភិបាលមេត្តាយកចិត្តខ្លួនដាក់លើបញ្ហាកម្មករផង ព្រោះរាល់ការតវ៉ា​របស់កម្មករគឺមិនមែនជារឿងសម្ដែងទេ។

អ្នកស្រី សុខន បន្តថា៖« រដ្ឋាភិបាលសូមដោះស្រាយ និងយកចិត្តទុកដាក់លើកម្មករផង កុំយកចិត្តទុកដាក់តែលើនិយោជក គ្មានកម្មករណាចង់ឱ្យគេចាប់យកទៅឃុំទេ»។

បុគ្គលិកណាហ្គាវើលដ៍ធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ នៅថ្ងៃទី១៦ ខែមិនា ឆ្នាំ២០២២។ ខេមបូចា/ព្រីង សំរាំង

ទន្ទឹមនឹងនេះ កញ្ញា ឈឹម ស៊ីថរ ជាប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន ណាហ្គាវើលដ៍ រំពឹងថាការចរចានេះ នឹងទទួលបានដំណោះស្រាយឈ្នះៗ​ទាំងអស់​គ្នា ដោយមិនមានភាគីខាងណាមួយជាអ្នកខាតបង់ឡើយ ដរាបណាមានការដោះលែង​សមាជិក និងទម្លាក់បទចោទប្រកាន់មកលើពួកគេ។

កញ្ញ ស៊ីថរ បញ្ជាក់ថា៖« កម្មករចង់បានបែបណា ខ្ញុំទៅចរចាបែបនោះ នេះគឺជាជំហរដែល​ពួកយើងចង់បាន ទាល់តែគ្នាយើងមានសេរីភាព ទើបយើងអាចទៅចរចាបាន យើងមិនអាច​សម្បទានច្រើនជាងនេះបានទៀតទេ»។

យ៉ាងណាមិញ កញ្ញា ស៊ីថរ អះអាងថា បើទោះបីជា៩ចំណុចត្រូវបានដោះស្រាយក៍ដោយ បើតុលាការមិនព្រមទម្លាក់បទចោទមកលើថ្នាក់ដឹកនាំសហជីពទេ ក៍កម្មករដែល​ជាសមាជិក​សហជីពទាំងអស់មិនយល់ព្រមដែរ។

ជុំវិញបញ្ហានេះ លោក ហេង សួរ អ្នកនាំពាក្យក្រសួងការងារ មិនអាចសុំការបកស្រាយ​បានឡើយ ដោយអ្នកសារព័ត៌មានធ្វើការទំនាក់ទំនងទៅតែលោកចុចបិទ​មិនទទួល។

ចំណែក លោក ជិន ម៉ាលីន អ្នកនាំពាក្យក្រសួងយុត្តិធម៌ បានឱ្យដឹងថា ការទាមទាររបស់​កូដករ គឺអាស្រ័យលើអំណាចឆន្ទានុសិទ្ធិរបស់តុលាការតែប៉ុណ្ណោះ ហើយប្រសិនបើអ្នក​នៅក្រៅឃុំ នៅតែធ្វើសកម្មភាពបំពានច្បាប់គឺអាជ្ញាធរអាចយកមកឃុំវិញបាន។

លោកថ្លែងថា៖«ការសម្រេចយ៉ាងណាជាអំណាចឆន្ទានុសិទ្ធិរបស់តុលាការ ហើយគោល​ការណ៍ច្បាប់ អ្នកនៅក្រៅឃុំ បើនៅតែធ្វើសកម្មភាពបំពានច្បាប់​គឺគេអាចយកមក​ឃុំវិញ​បាន។»។

ដោយឡែក លោក ​អំ សំអាត ​នាយករង​ទទួលបន្ទុក​កម្មវិធី​ឃ្លាំមើល​នៃអង្គការ​លីកាដូ​ លើក​ឡើងថា ដើម្បីឱ្យការចរចានេះប្រព្រឹត្តទៅដោយយុត្តិធម៌ ខាងសង្គមស៊ីវិល នៅតែទទូច​ដល់​តុលាការ ឱ្យទម្លាក់បទចោទប្រកាន់មកលើមេដឹកសហជីព និងសមាជិករបស់ពួកគេ ទោះ​បី​ការដោះលែងឱ្យនៅក្រៅឃុំនេះ ជាជំហានវិជ្ជមានមួយក្ដី តែតំណាងសហជីពនៅតែមាន​សម្ពាធពីផ្លូវច្បាប់នៅឡើយ។

 លោក សំអាត បញ្ជាក់ថា៖«យើងឃើញថាថ្ងៃនេះតំណាងកូដករ៣នាក់ទៀត ត្រូវបានដោះ​លែងហើយ ចឹងការដោះលែងនៅក្រៅឃុំនេះជាគម្លាតមួយឈាន​ទៅរកភាពវិជ្ជមាន​ក្នុងការ​ចរចា»។ លោកបន្តថា ៖«ទិដ្ឋភាពជាក់ស្ដែង អ្នកទាំង១១នាក់នោះត្រូវជាប់ពន្ធនាគារ​​ដោយសារ​តែធ្វើកូដកម្មស្របច្បាប់ការងារ ទោះបីដោះលែងឱ្យនៅក្រៅឃុំតែគាត់ហាក់​ដូចជា​មាន​កំាបិតមួយផ្ជង់កដោយសារតែតុលាការនៅតែចោទប្រកាន់នៅលើករណីរបស់គាត់នៅ​ឡើយ»។

ជុំវិញបញ្ហាវិបតិ្តការងារនៅក្រុមហ៊ុនណាហ្គាវើលដ៍ កាលពីថ្ងៃទី១៥ ខែមីនា កន្លងទៅ លោក ស ខេង បានលើកឡើងនៅលើទំព័រហ្វេសប៊ុកលោកថា លោកតែងអំពាវនាវ និងជំរុញ​ឱ្យ​ភាគី​ពាក់ព័ន្ធប្រកាន់យកការចរចាដើម្បីឈានទៅរកដំណោះស្រាយ ដោយមានការដោះលែង​អ្នក​ពាក់ព័ន្ធមួយចំនួនឱ្យនៅក្រៅឃុំ។

លោក ស ខេង មានប្រសាសន៍ថា៖«ពេលនេះមានការដោះលែងអ្នកពាក់ព័ន្ធមួយចំនួន​ឱ្យ​នៅ​ក្រៅឃុំ​ជាបណ្ដោះអាសន្ន ដើម្បីស្វែងរកការចរចារបន្តក្រោមការសម្របសម្រួល​ពីក្រសួង​ការងារ និងបណ្ដុះបណ្ដាលវិជ្ជាជីវៈ ហើយខ្ញុំក៍នៅតែបន្តលើកទឹកចិត្ត​និងជំរុញឱ្យ​មានការ​ចរចាដើម្បីឈានទៅបញ្ចប់បញ្ហានេះឱ្យបានឆាប់ដែរ»។

យោងតាមសេចក្តីជូនដំណឹងរបស់ក្រសួងការងារនៅថ្ងៃទី១៧ ខែមិនានេះ បាន​អំពាវនាវ​ឱ្យ​តំណាងសហជីពចូលប្រជុំដោះស្រាយជាមួយភាគីនិយោជកនៅក្រសួងការងារនៅថ្ងៃសុក្រ តាមការសន្យារបស់ខ្លួនដែលស្នើសុំកិច្ចអន្តរាគមន៍ឱ្យខ្លួនបាននៅក្រៅឃុំបណ្តោះអាសន្ន៕

431 views

ព័ត៌មានទាក់ទង

ព័ត៌មានថ្មី

អត្ថបទពេញនិយម