ភាគីសហជីពបានដាក់ស្នើដំឡើងប្រាក់ឈ្នួលបន្ថែម១៥ដុល្លារលើប្រាក់ឈ្នួលអប្បបរមាបច្ចុប្បន្ន២០០ដុល្លារទៅកាន់ក្រុមប្រឹក្សាជាតិប្រាក់ឈ្នួលអប្បបរមា សម្រាប់ប្រាក់ឈ្នួលឆ្នាំ២០២៤ ខណៈភាគីនិយោជកអាចផ្តល់ឱ្យត្រឹមតែ១ដុល្លារបន្ថែម យោងតាមកិច្ចប្រជុំនៅក្រសួងការងារកាលពីថ្ងៃចន្ទ។
លោក អាត់ ធន់ ប្រធានសហភាពការងារកម្ពុជា បញ្ជាក់ថាខាងភាគីសហជីពបានរកឃើញតួលេខចំនួនពីរសម្រាប់ដាក់នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា គឺទី១តួលេខ២១២ដុល្លារ និងទី២ តួលេខ២២០,២ដុល្លារ ខណៈប្រាក់ឈ្នួលអប្បបរមារបស់កម្មករនិយោជិតឆ្នាំ២០២៣មានចំនួន២០០ដុល្លារក្នុងមួយខែ។
លោកបន្តថា មូលហេតុដែលយើងស្នើតំឡើងប្រាក់ឈ្នួល ព្រោះអតិផរណាសេដ្ឋកិច្ចឡើងខ្ពស់ ដូច្នេះទំនិញ និងអាហារហូបចុកផ្សេងៗក៏ឡើងថ្លៃតាមហ្នឹងដែរ ដែលធ្វើឱ្យជីវភាពរបស់កម្មករកាន់តែលំបាក។ ខណៈពេលចំណូលរបស់កម្មករបច្ចុប្បន្ននេះនៅតិចតួចនៅឡើយ ហើយពួកគាត់ត្រូវការចំណាយច្រើន ដែលមិនអាចឆ្លើយតបជាមួយស្ថានភាពទំនិញកំពុងឡើងថ្លៃបាន។
លោកបន្ថែមថា៖ «យើងចុះជិត២ខែ បានចុះស្ទង់មតិ និងស្ថានភាពរោងចក្រ ស្ថានភាពកម្មករ និងការចំណាយ ការរស់នៅ រួមទាំងការជំពាក់បំណុល និងបញ្ហាប្រឈមផ្សេងៗរបស់គាត់(កម្មករ)។ អ៊ីចឹងហើយបាននៅពេលចរចា យើងបានជជែកគ្នា យើងបានដាក់ស្នើ១៥ដុល្លារនេះឡើង ដើម្បីចរចា»។
ទន្ទឹងនឹងនេះលោកយល់ឃើញថានៅក្នុងវិស័យកាត់ដេនេះ ខាងភាគីនិយោជក ក៏មានកម្រិតនៃផលចំណេញច្រើន ដែលមានខ្ទង់៧០០ទៅ៨០០លានដុល្លារក្នុងមួយឆ្នាំៗ។ យ៉ាងណាមិញលោកក៏ស្នើឱ្យរដ្ឋាភិបាលថ្មី និងនិយោជកដំឡើងប្រាក់ឈ្នួលឱ្យបានសមរម្យជូនកម្មករ ថែរក្សាសេ្ថរភាពការងារ និងបញ្ចុះតម្លៃទំនិញជាដើម។
ជុំវិញបញ្ហានេះ លោក ណាង សុធី អនុប្រធានសហព័ន្ធនិយោជក និងសមាគមពាណិជ្ជកម្ពុជា ដែលតំណាងឱ្យនិយោជក ឆ្លើយតបថា អាស្រ័យលើច្បាប់ប្រាក់ឈ្នួលអប្បបរមា និងលក្ខខណ្ឌវិនិច្ឆ័យ៧យ៉ាង មានសង្គម៤ និងបច្ចេកទេស៣ ដោយគណនាមានចំណូល ចំណាយ ចំណេញ និងខាតជាដើម។ ខាងនិយោកជករកឃើញថា មិនមានតួលេខណា ដែលត្រូវឡើងប្រាក់ឈ្នួលឱ្យកម្មករទេ។
លោក សុធី បញ្ជាក់ថា៖ «មានការនាំចេញទំនិញថយចុះ មានការព្យួរការងារ និងការបញ្ជាទិញពីក្រៅមិនច្រើន ហើយក៏មានកាត់បន្ថយការងាររបស់កម្មករ»។
ខណៈពេលកន្លងមក មានក្រុមហ៊ុននិយោជនមួយចំនួន ប្រឈមនឹងបញ្ហាខ្វះការបញ្ជាទិញពីភាគី ហើយក៏នាំចេញមិនមានច្រើនដូចមុន តែយ៉ាងណាលោកនៅតែប្តេជ្ញាចិត្ត និងអនុវត្តតាមសំណើររបស់រដ្ឋាភិបាល ថាត្រូវតែដំឡើងទោះបីតិច ឬច្រើនក្តី។
លោកអះអាងថា៖ «យើងសុំរក្សាតម្លៃដូចឆ្នាំចាស់២០០ដុល្លារគត់ តែដោយសារមានការសំណូមពររបស់ថ្នាក់នាំជាតិនោះ បានពិចារណាគួរបន្ថែម១ដុល្លារ បាន២០១ដុល្លារ»។
លោក ឃន រិទ្ធិ ជាកម្មកររោងចក្រស្រោមដៃមួយកន្លែង ក្នុងភូមិព្រៃទា សង្កាត់ចោមចៅ៣ ខណ្ឌពោធិសែនជ័យ បញ្ជាក់ថា ចង់បានដំឡើងប្រាក់ឈ្នួល២១៥ដុល្លារ ក្នុងឆ្នាំ២០២៤ ខាងមុខនេះ ដោយសារតម្លៃទីផ្សារឡើងថ្លៃ ដូចជាសាំង ការចំណាយលើសម្ភារៈផ្សេងៗក៏ថ្លៃ ផ្ទះជួលក៏ឡើងថ្លៃ ហើយទឹកភ្លើងក៏ថ្លៃ។ លោកបន្តថា នៅការចំណាយលើថ្លៃកូនរៀនសូត្របន្ថែម ហើយបើថ្ងៃណាមួយធ្លាក់ខ្លួនឈឺ គឺមិនអាចមានលុយបង់ថ្លៃពេទ្យទេ។
លោកសំណូមពរថា៖ «សុំឱ្យគាត់ (និយោជក ឬរដ្ឋាភិបាល) ដំឡើងប្រាក់ខែនូវឆ្នាំ២០២៤ខាងមុខនេះ។ សុំឱ្យឡើង២១៥ដុល្លារ ហើយសុំឱ្យគាត់ចុះថ្លៃសាំង ហើយថ្លៃម្ហូបអាហារ ហើយឱ្យសេដ្ឋកិច្ចដើរវិញ»។
លោក ហ៊ុន ម៉ាណែត នាយករដ្ឋមន្ត្រីថ្មី បានលើកឡើងថា នឹងដំឡើងប្រាក់ឈ្នួលអប្បបរមាលើប្រាក់ខែបច្ចុប្បន្ន២០០ដុល្លារក្នុងមួយខែ សម្រាប់វិស័យកាត់ដេរ វាយនភណ្ឌ និងផលិតស្បែកជើងនៅឆ្នាំក្រោយ ក្នុងឱកាសជួបសំណេះសំណាលជាមួយកម្មករជិត២ម៉ឺននាក់ នៅខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី៣០ ខែសីហា។
លោក ហ៊ុន ម៉ាណែត បានថ្លែងទៅកាន់កម្មករថា៖ «បងប្អូនគិតថា វាមិនគ្រប់គ្រាន់ទេ [២០០ដុល្លារ]។ នេះគឺជាការត្រឹមត្រូវ ហើយរដ្ឋាភិបាលបានទទួលស្គាល់បញ្ហានេះ ជាមូលហេតុដែលយើងខិតខំបង្កើនវាជាបណ្តើរៗ ប៉ុន្តែយើងត្រូវតែធ្វើយ៉ាងណាជាជំហាន ដើម្បីធានាដល់ការប្រកួតប្រជែង និងរក្សាកំណើនរបស់យើង»។
លោកបានបន្ថែមថា៖ «តិចឬច្រើន ប្រាក់ឈ្នួលអប្បបរមាត្រូវតែដំឡើង»។
គួរបញ្ជាក់ថា កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា បានសម្រេចរៀបចំកិច្ចប្រជុំកំណត់ប្រាក់ឈ្នួលចំនួន៧លើក គឺនៅថ្ងៃទី១៦ និងថ្ងៃទី២៨ ហើយថ្ងៃទី៤ ថ្ងៃទី១១ ថ្ងៃទី១៨ និងថ្ងៃទី២៥ ខែកញ្ញា និងចុងក្រោយនៅថ្ងៃទី២ ខែតុលា ឆ្នាំ២០២៣។
លោក ហេង សួរ រដ្ឋមន្ត្រីក្រសួងការងារ បានបដិសេធធ្វើអត្ថាធិប្បាយលើបញ្ហានេះ ខណៈលោក សោម អូន រដ្ឋលេខាធិការក្រសួងការងារ គ្រាន់តែឆ្លើយតបថា លោកមិនមានភារកិច្ចដើម្បីឆ្លើយតបទេ លោកបានបង្វែរសំនួរឱ្យទៅសួរអ្នកនាំពាក្យវិញ ហើយលោកបានបញ្ជាក់ថា អ្នកនាំពាក្យក្រសួងការងារថី្មនឹងតែងតាំងនៅសប្តាហ៍ក្រោយ៕
