សមាគមសម្ព័ន្ធអ្នកសារព័ត៌មានកម្ពុជា

ប្រធានសហជីពណាហ្គាវើលដ៍ការពារភាពស្របច្បាប់របស់ខ្លួនក្នុងការធ្វើកូដកម្ម

បុគ្គលិកណាហ្គាវើលដ៍បាតុកម្មនៅខាងក្រៅតុលាការក្រុងភ្នំពេញក្នុងគោលបំណងគាំទ្រប្រធានសហជីពរបស់ពួកគេកាលពីថ្ងៃទី២៨ ខែកុម្ភៈ ឆ្នាំ២០២៣។ (ខេមបូចា/សុវណ្ណ ស្រីពេជ្រ)
បុគ្គលិកណាហ្គាវើលដ៍បាតុកម្មនៅខាងក្រៅតុលាការក្រុងភ្នំពេញក្នុងគោលបំណងគាំទ្រប្រធានសហជីពរបស់ពួកគេកាលពីថ្ងៃទី២៨ ខែកុម្ភៈ ឆ្នាំ២០២៣។ (ខេមបូចា/សុវណ្ណ ស្រីពេជ្រ)

ក្នុង​ថ្ងៃទី២​នៃ​ការ​ជំនុំ​ជម្រះ​ក្ដី​សម្រាប់​សមាជិកសហជីព​ណាហ្គាវើលដ៍ប្រាំបួន​រូប ដែល​រង​ការចោទ​ពី​បទ​ញុះញង់​ ព្រះរាជអាជ្ញាសាលាដំបូង​រាជធានីភ្នំពេញ​បាន​អះអាង​ថា​ប្រធានសហជីព កញ្ញា ឈឹម ស៊ីថរ បានពាក់ព័ន្ធ​ដោយ​ផ្ទាល់​ក្នុង​ការ​ធ្វើ​កូដកម្មខុស​ច្បាប់ ខណៈ​ដែល​កញ្ញា ឈឹម ស៊ីថរ នៅ​រក្សា​ជំហរ​ថា​ខ្លួន​បាន​ចូល​រួម​ធ្វើ​កូដកម្ម​ស្រប​ទៅ​តាម​ច្បាប់​ស្ដីពី​ការងារ​។​

ព្រះ​រាជអាជ្ញារង​លោក សេង ហៀង បាន​ដាក់​បន្ទុក​ថា​ការ​ធ្វើ​បាតុកម្ម​គឺ​ជា​ជម្លោះ​បុគ្គល​ផ្ទាល់​ខ្លួន​រវាង​កញ្ញា ឈឹម ស៊ីថរ និង​ក្រុម​ហ៊ុន​។​ លោក​អះអាង​ថាសកម្មភាព​របស់​​កញ្ញា ឈឹម ស៊ីថរ បាន​យក «ក្រុម​ហ៊ុន​ជា​ចំណាប់​ខ្មាំង» ក្នុង​គោល​បំណង​ទាម​ទារ​ឲ្យ​ក្រុម​ហ៊ុន​ទទួល​បុគ្គលិក​ជា​ច្រើនរយនាក់​ដែល​ត្រូវបញ្ឈប់​ពីការងារ​ឲ្យចូលធ្វើការវិញ និង​ទទួល​បាន​សំណង​ផ្សេងៗ​។ លោក​បាន​ចោទ​ប្រកាន់​កញ្ញា ឈឹម ស៊ីថរ ថាបាន​បញ្ជាឲ្យ​សមាជិក​ធ្វើបាតុកម្ម​ដោយ​ខុស​ច្បាប់ និង​ថា​ពួកគេលែងជា​បុគ្គលិក​របស់​ក្រុម​ហ៊ុន​ទៀត​ហើយ ដែល​មិន​អាច​ចាត់ទុក​ថា​ជា​បាតុកម្ម​ស្រប​ច្បាប់​នោះទេ។​

លោក​លើក​ឡើង​ថា៖ «ពួកគេ[ណាហ្គាវើលដ៍]មក​​រក​ស៊ី​នៅ​ក្នុង​ប្រទេស​យើង ហើយ​ខ្លួន [ជា​សហជីព] បែរ​ជា​បង្ខំ​ពួកគេ [ឲ្យ​ទទួលយក​ការទាមទាររបស់​ខ្លួន​]»។​

ពាក់​ឯកសណ្ឋាន​ពណ៌​ទឹក​ក្រូច​របស់​ពន្ធនាគារ កញ្ញា ឈឹម ស៊ីថរ បាន​ឆ្លើយ​តប​​ទៅ​នឹ​ង​សំណួរ​ដែល​បាន​ធ្វើ​ឡើង​ជិត​បី​ម៉ោង និង​បាន​ជំទាស់​ទៅ​​នឹង​អ្វី​ដែល​ខាង​ព្រះ​រាជអាជ្ញា​បាន​ឡើក​ឡើង​។ កញ្ញា និយាយ​ថា​គ្រប់​មធ្យោបាយ​ផ្លូវច្បាប់​សម្រាប់​ដោះ​ស្រាយវិវាទការងារ​ត្រូវ​បាន​រិតត្បឹត​ និង​ថា​កញ្ញា​គឺ​ជា​អ្នក​ចូល​រួម​ម្នាក់​ក្នុង​កូដកម្មដែល​រៀប​ចំដោយ​សហជីព។​

កញ្ញា​បញ្ជាក់ថា៖ «​មុន​មាន​កូដកម្ម គឺ​មិន​មាន​ដំណោះ​ស្រាយ​ណា​មួយ​បាន​ធ្វើ​ឡើង​សម្រាប់​វិវាទ​ការងារ​នេះទេ ហើយ​ខ្ញុំ​ក៏​មិន​អាច​ទទួល​យក​ពាក្យ​ ចំណាប់​ខ្មាំង​ដែរ»។ កញ្ញា​បន្ថែម​ថា៖ «ខ្ញុំ​នៅ​តែ​ជា​បុគ្គលិក ពីព្រោះ​ថា​បុគ្គលិក​អាច​ប្រើ​វិធី​ស្រប​ច្បាប់​នានា​ដើម្បី​ដោះ​ស្រាយវិវាទ ខ្ញុំ​សូម​ច្រាន​ចោល​ការ​ចោទ​ប្រកាន់​[របស់​ព្រះរាជអាជ្ញា]»។​

មេដឹក​នាំ​សហជីព​ប្រចាំ​ណាហ្កាវើលដ៍ កញ្ញា​ ឈឹម ស៊ីថរ បាន​មក​ដល់​តុលាការ​ក្រុង​ភ្នំពេញ​សម្រាប់​ការ​ជំនុំ​ជម្រះ​នៅ​ថ្ងៃទី​២៨ ខែកុម្ភៈ ឆ្នាំ​២០២៣។ (ខេមបូចា/ព្រីង សំរាំង)

ចៅក្រម​ជំនុំ​ជម្រះ សឿង ចរិយា បាន​លើក​យក​ភស្តុតាង​នៃ​កិច្ច​ប្រជុំ​តាម​រយៈ​Zoom របស់​សហជីព និង​បាន​សួរ​ទៅ​កញ្ញា ឈឹម ស៊ីថរ អំពី​មូលនិធិ​របស់​សហជីព ការ​ដឹក​នាំ និងមូល​ហេតុនានា​។ សវនាការ​ជំនុំជម្រះ​លើក​ដំបូង​កាល​ពីសប្ដាហ៍​មុន តុលាការ​បាន​សួរ ​កញ្ញា ឈឹម ស៊ីថរ​ អំពីរ​ម្ចាស់​ជំនួយ​អន្តរជាតិ​មួយ​ចំនួន​ដែល​បាន​គាំទ្រដល់​សហជីព​។​​

កញ្ញា ឈឹម ស៊ីថរ បាន​បដិសេធ​ការ​ដែល​ថា​កញ្ញា​ជា​មេដឹកនាំ​ធ្វើ​បាតុកម្ម ដោយ​បានលើក​ឡើងថា​ក្នុង​នាមជា​ប្រធាន​សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ខ្លួន​បាន​ដើរតួជា​អ្នក​សម្រប​សម្រួល​លើការ​សម្រេច​ចិត្ត​រួម​របស់​បុគ្គលិក​។​

កញ្ញា​បញ្ជាក់ថា៖ «​ខ្ញុំ​គ្រាន់​តែ​ធ្វើការ​ជា​អ្នក​សម្រប​សម្រួល​លើ​កិច្ច​ប្រជុំ ខ្ញុំ​មិន​បាន​ដឹក​នាំ​ធ្វើ​កូដកម្មទេ…​គ្មាន​នរណា​ម្នាក់​ផ្ដល់​គំនិត​ឲ្យ​ដឹក​នាំ​កូដកម្មទេ ប៉ុន្តែ​ ​គឺ​ធ្វើ​តាម​ច្បាប់​ស្ដី​ពី​ការងារ​»។​

កញ្ញា​ឲ្យ​ដឹងថា​​សមាជិក​សហជីព​ភាគ​ច្រើន​បាន​បោះ​ឆ្នោត​ឲ្យ​មាន​ការ​ធ្វើ​កូដកម្ម​ស្រប​តាម​ច្បាប់​ស្ដីពី​ការងារ។ កញ្ញាក៏​បញ្ជាក់​ដែរថា​សហជីព​តស៊ូដោយ​អហិង្សា។​

មេធាវីការ​ពារ​ឲ្យ​ជន​ជាប់​ចោទ លោក ហុង សម្បត្តិ​ បាន​បង្ហាញ​​ការ​ខក​ចិត្ត​នៅ​ក្នុង​សវនាការ​ចំពោះ​ព្រះ​រាជអាជ្ញារង សេង ហៀង ដែល​ចាត់​ទុកសកម្មភាព​កូន​ក្ដី​លោក​​ថា​ជា​ជម្លោះ​បុគ្គល មិន​ជាប់​ពាក់​ព័ន្ធ​ដំណើរ​ការ​ផ្លូវ​ច្បាប់​ក្នុង​វិវាទ​ការងារ​។​

លោក​មាន​ប្រសាសន៍​ថា៖ «​ខ្ញុំ​មាន​ការ​សោកស្ដាយ​ [ការលើក​ឡើង​របស់​ព្រះរាជអាជ្ញា] ពីព្រោះ​ថា​វាមិន​មែន​ជា​ជម្លោះ​បុគ្គល​នឹង​បុគ្គល​ទេ»។ លោក​ថា បាតុករ​គួរ​តែ​ត្រូវ​នៅ​តែ​ចាត់​ទុក​ថា​ជា​បុគ្គលិក​របស់​ក្រុម​ហ៊ុន ព្រោះ​ថាពួកគេ​មិន​ដែល​យល់​ព្រម​នឹ​ង​ការ​បញ្ឈប់​ពី​ការងារ​នោះ​ទេ។​

អ្នកស្រី អ៊ូ ទេពផល្លីន ប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជា ប្រាប់​ខេមបូចា​ថា សមាជិក​សហជីព​ណាហ្គាវើលដ៍ ធ្វើ​សកម្មភាព​ដោយ​គ្រាន់​តែ​ទាមទារ​ដំណោះ​ស្រាយ​លើ​វិវាទ​ការងារ ដោយ​មិន​មាន​ចេតនា​ណា​មួយ​បង្ក​ឲ្យ​មាន​ការ​រំខាន ឬ​ប៉ះ​ពាល់​សង្គម​នោះ​ទេ​។​

អ្នកស្រី​បន្ថែម​ទៀត​ថា៖ «​ស៊ីថរ បាន​ព្យាយាម​លើក​ពី​បញ្ហា​ច្បាប់ស្ដីពីការងារ​ពី​ព្រោះ​តែ​ជា​វិវាទការងាររវាង​និយោជក និង​បុគ្គលិក ក៏​ដូច​ជា​ថ្នាក់​ដឹក​នាំ​សហជីព»។ អ្នក​ស្រី​បាន​លើក​ឡើង​សំដៅ​ដល់​ការ​ចោទ​​ប្រកាន់​របស់​ណាហ្គាវើលដ៍​លើ​ការ​ដឹក​នាំ​របស់​សហជីព​ក្នុង​អំឡុង​ពេល​មាន​ការ​បញ្ឈប់ការ​ងារ​ទ្រង់ទ្រាយ​ធំ​​។ អ្នកស្រី​ថា៖ «គ្មាន​ជម្លោះណា​ដែល​នាំ​ទៅ​ដល់​ការ​ញុះញង់​នោះទេ«។

សមាជិក​មួយ​ចំនួន​របស់​សហជីព​​ដែល​មាន​វត្ត​មាន​នៅ​ក្នុង​សវនាការ​បាន​និយាយ​ថា​ពួក​គេ​នៅ​តែ​ចាត់​ទុក​ខ្លួន​ឯង​ថា​ជា​បុគ្គលិក​ពីព្រោះ​ពួកគេ​មិន​បាន​ទទួល​យក​លក្ខខណ្ឌ​នៃ​ការ​បញ្ឈប់​ពី​ការងារ​របស់​ក្រុម​ហ៊ុន​នៅ​ឡើយ​។​ អ្នក​ទាំង​នោះ​បាន​អះអាង​ដែរថា​ការ​បញ្ឈប់​បុគ្គលិក ​១ ៣២៩​នាក់​ក្នុង​ឆ្នាំ​២០២១ ដែល​រួម​ទាំង​មេដឹក​នាំ​សហជីព និង​សមាជិក​១ ១០០​នាក់ ថា​ជា​អំពើ​ខុស​ច្បាប់ ពីព្រោះ​ថា​ចំនួន​នេះ​បាន​ប៉ះពាល់​ដល់​សមាជិក​សហជីព​ជា​ខ្លាំង​។​

កញ្ញា ស្រី​រ័ត្ន ជាកូដករម្នាក់បានលើក​ឡើង​ថា៖ «យើង​នៅ​តែ​ជា​បុគ្គលិក​របស់​ក្រុម​ហ៊ុន​ណាហ្គាវើលដ៍ ពីព្រោះ​ថា​ការ​បញ្ឈប់​បុគ្គិល​គឺ​ពិត​ជា​ការ​រើស​អើស​​[លើ​សមាជិក​សហជីព]កញ្ញា​បន្ថែម​ថា៖ «ក្រុម​ហ៊ុន​បាន​បញ្ឈប់​…​សមាជិក​សហជីព​ដោយ​ប្រើ​ហេតុ​ផល​វិបត្តិ​កូវីដ១៩»។​

អ្នក​នាំពាក្យ​ក្រ​សួង​ការងារ​លោក ហេង សួរ ប្រាប់​ខេមបូចា​តាម​ប្រព័ន្ធ​តេឡេក្រាម​ថា នីតិវិធី​ដោះ​ស្រាយ​វិវាទ​នេះ​បាន​បញ្ចប់​ហើយ រួម​ទាំង​នៅ​ក្រុម​ប្រឹក្សា​អាជ្ញាកណ្ដាល​ផង​ដែរ។​

លោក​អះអាង​ថា៖ «បុគ្គលិក​បាន​បដិសេធ​បញ្ជា​របស់​ក្រុម​ប្រឹក្សា​អាជ្ញាកណ្ដាល ហើយ​ភាគី​ទាំង​ពីរ​បាន​បន្ត​វិវាទ​នៅ​តុលាការ»។​

លោក ហេង សួរ បញ្ជាក់​ថាក្រសួង​នៅ​តែ​បើក​ទទួល​ធ្វើ​ជា​អ្នក​សម្រប​សម្រួល​បើ​សិនជា​ភាគី​ទាំង​ពីរ​មាន​បំណង​វិល​ចូល​តុចរចា ប៉ុន្តែ​សមាជិក​សហជីព​ណាហ្គាវើលដ៍​បាន​និយាយ​ថា​ពួកគេ​មិន​ជឿ​ក្រុម​ហ៊ុន ឬ​ក្រសួង​ធ្វើ​ការ​ដោយ​សុទ្ធចិត្ត​។​

លោក អំ សំអាត នាយកទទួលបន្ទុកកិច្ចការទូទៅ នៃអង្គការ​លីកាដូ​ អំពាវ​នាវ​ឲ្យ​តុលាការ​ទម្លាក់​ចោល​ការ​ចោទប្រកាន់​បទញុះញង់​លើ​សហជីព​ទាំង​ប្រាំ​បួន​រូប​។​ លោក​ថា កិច្ច​ខិត​ខំ​ប្រឹង​ប្រែ​ង​ដោះ​ស្រាយ​វិវវាទការងារ​នេះ​គួរ​តែត្រូវ​ធ្វើ​ឡើង ជាជាង​ការ​ដាក់​ទោស​ទណ្ឌ​លើ​សមាជិក​សហជីព​។​

លោក​បន្ថែម​ថា៖ «​[យើង]បាន​ឃើញ​ថា​ជម្លោះ​នេះ​កើត​ចេញ​ពី​វិវាទការងារ វា​មិន​មែន​ជា​បទល្មើស​ព្រហ្មទណ្ឌទេ»។ លោក​ថា៖ «​ឫសគល់​នៃ​បញ្ហា​ គឺ​ការ​បញ្ចប់​វិវាទការងារ និង​ចៀសវាង​ការ​ចោទ​ប្រកាន់​គ្នា​»៕

(រាយការណ៍​បន្ថែម​ដោយ​ ឃួន ណារីម)

អត្ថបទប្រែសម្រួលពីភាសាអង់គ្លេស៖ NagaWorld Union Leader Defends Strike’s Legality on Day Two of Trial

469 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម