សមាគមសម្ព័ន្ធអ្នកសារព័ត៌មានកម្ពុជា

មេដឹកនាំសហជីពនៅរោងចក្រ វីងស្តារស៊ូ ត្រូវបានចោទប្រកាន់ពីបទសមគំនិតក្នុងអំពើលួច បន្ទាប់ពីជាប់ឆ្នោត

លោក ជា ចាន់ (ឆ្វេង) ទម្លាក់សន្លឹកឆ្នោតរបស់គាត់ទៅក្នុងប្រអប់ឆ្នោត អំឡុងពេលបោះឆ្នោត ទីដែលក្រោយមកលោកត្រូវបានជាប់ឆ្នោតជាប្រធានសហជីពនៅរោងចក្រជើងវីងស្តារស៊ូ នៅថ្ងៃទី១០ ខែមករា ឆ្នាំ២០២៤។ (រូបភាពផ្តល់ឲ្យ)
លោក ជា ចាន់ (ឆ្វេង) ទម្លាក់សន្លឹកឆ្នោតរបស់គាត់ទៅក្នុងប្រអប់ឆ្នោត អំឡុងពេលបោះឆ្នោត ទីដែលក្រោយមកលោកត្រូវបានជាប់ឆ្នោតជាប្រធានសហជីពនៅរោងចក្រជើងវីងស្តារស៊ូ នៅថ្ងៃទី១០ ខែមករា ឆ្នាំ២០២៤។ (រូបភាពផ្តល់ឲ្យ)

លោក ជា ចាន់​ ប្រធានសហជីពនៅរោងចក្រវីងស្តារស៊ូ (Wing Star Shoes) ដែលទើបតែ​ជាប់ឆ្នោតចូលកាន់តំណែងនោះត្រូវបានចាប់ខ្លួននិងចោទប្រកាន់ពីបទ«សមគំនិតក្នុងអំពើលួច»​ ជុំវិញ​ឧប្បត្តិហេតុមួយដែលតាម​ចោទ​ថា បានកើតឡើងកាលពីពីរឆ្នាំមុន។

ខាងសហជីព​និយាយ​ថា ​លោក ជា ចាន់ ​មិន​ពាក់ព័ន្ធ​​នឹង​ករណី​នេះ​ទេ។ ពួកគេ​អះអាង​ថា ការ​ឃុំ​ខ្លួន​លោក​គឺ​សំដៅ​ «គាបសង្កត់​» ស​មាជិក​សហជីព​ឲ្យ​រំសាយ​សហជីព​ឯករាជ្យ​ក្នុង​រោងចក្រ។ 

មុន​ការ​ចាប់​ខ្លួន​លោក ជា ចាន់​ ការបោះឆ្នោត​ជ្រើសរើស​សមាជិក​ក្រុម​ប្រឹក្សានាយក​​សហជីព​ត្រូវ​បាន​ធ្វើ​ឡើង​នៅ​ក្នុង​រោងចក្រ ទី​​ដែល​លោក​និង​មនុស្ស​ប្រាំបួន​នាក់​ផ្សេង​ទៀត​បាន​ជ្រើស​រើស​ នេះ​បើ​យោង​តាម​សេចក្តី​ថ្លែងការណ៍​​របស់​សហព័ន្ធ​សហជីព​កម្ពុជា (CATU)

បន្ទាប់ពីលោក ជា ចាន់ បានជូនដំណឹងដល់រោង​ចក្រ​វីងស្តារស៊ូ អំពីការបង្កើតសហ​ជីព ក្រុមហ៊ុននេះ បានផ្ញើលិខិត​ព្រមានដល់លោក​ និងមេដឹកនាំសហជីពផ្សេងទៀត ដោយបញ្ចុះបញ្ចូលពួកគេឱ្យរំសាយ​ចោលសហជីពនេះ​ ប៉ុន្តែពួកគេមិនព្រមធ្វើតាម។

 កាលពីថ្ងៃទី១៤ ខែកុម្ភៈ លោក ជា ចាន់ ត្រូវបានឃុំខ្លួននៅកន្លែងធ្វើការដោយនគរ​​បា​ល​ខេត្តកំពង់ស្ពឺ ដែល​តាម​ចោទថា មិនបានបង្ហាញ​ដីកា ឬ​ភស្តុតាងណាមួយ ដើម្បីគាំទ្រការចាប់ខ្លួននោះទេ។

 លោកស្រី​ យ៉ាង សុភ័ណ្ឌ ប្រធានសហព័ន្ធ​សហជីព​កម្ពុជា​មានប្រសាសន៍ថា ការចាប់​ខ្លួនមេដឹកនាំសហជីពនេះ គឺជាការរំលោភសិទ្ធិសហជីពយ៉ាងធ្ងន់ធ្ងរ រួមជា​មួយ​នឹងការ​គ្មាន​ភស្តុតាង ឬដីកា។

លោកស្រី សុភ័ណ្ឌ មាន​ប្រសាសន៍ថា៖ «ក្រុមហ៊ុន​បានត្រូវរ៉ូវ​ជាមួយ​នគរបាល​ ហើយ​បាន​ហៅ​លោក ជា​ ចាន់​ ទៅ​បន្ទប់​ស្តុក​ទំនិញ​ដោយ​និយាយ​ថា ​មានគេ​​ចង់​ជួប​​គាត់​ មុន​ពេល​មន្ត្រីនគរបាល​៥នាក់​ចាប់​គាត់។ ពួក​គេ​ចាប់​ខ្លួន​គាត់​ដោយ​គ្មាន​ដីកា»។

 លោក​ស្រីបានមាន​ប្រសាសន៍​ថា រោងចក្រនេះ​តាម​ចោទ​ថា បានប្តឹងគាត់ពីបទសម​គំនិតក្នុង​អំពើ​លួច ប៉ុន្តែតាម​ចោទប្រកាន់ថា ការ​​ចោទប្រកាន់​នេះ​«ត្រូវ​បានគេ​​ប្រឌិត​ឡើង​ជាមួយ​នគរបាល​»ខណៈលោក ជា ចាន់​ និងអ្នកផ្សេងទៀតមិនពាក់ព័ន្ធ​អ្វីទាំងអស់អំពីចោរកម្ម ដែលកើត​ឡើង​កាល​ពី​២ឆ្នាំមុន​នៅក្នុងរោងចក្រនេះ​។

 លោក​ស្រី​បាន​បន្ថែម​ថា ក្រុមហ៊ុន​នេះ​មិន​ចូល​ចិត្ត​​សហជីព​ឯករាជ្យ​ទេ ហេតុ​ដូច្នេះ​ហើយ​បាន​ជា​ពួក​គេ​បំបាក់​ទឹកចិត្ត​កម្មករ​មិន​ឲ្យ​​បង្កើត​សហជីព​។

 លោកស្រី យ៉ាង សុភ័ណ្ឌ មាន​ប្រសាសន៍ថា៖ «ម្សិលមិញ តុលាការ​បាន​ចោទ​ប្រ​កាន់លោក ជា​ ចាន់​ ពី​បទ​សម​គំនិត​ក្នុងអំពើ​​​លួច ជា [ឧប្បត្តិហេតុ​មួយ] ដែល​បាន​​កើត​ឡើង​កាល​ពី​ពីរ​ឆ្នាំ​មុន ដែល​មិន​ពាក់​ព័ន្ធ​នឹងលោក ចាន់​ ទេ។ នេះ​ជា​មូលហេតុ​ពិត​ដែល​ក្រុមហ៊ុន​ចង់​បំបាក់​ស្មារតី​មេដឹកនាំ​​សហជីព​របស់​ខ្ញុំ»។

 តំណាងពីរនាក់មកពីរោង​ចក្រ​វីងស្តារស៊ូ បានជួបសហព័ន្ធសហជីព​កម្ពុជា​ ដើម្បីពិភាក្សាពីបញ្ហាសហជីព ខណៈដែលពួកគេបរាជ័យក្នុងការបញ្ចុះបញ្ចូលលោក ចាន់​ ឱ្យបោះបង់ការបង្កើតសហជីព​។លោកស្រី យ៉ាង សុភ័ណ្ឌបានបន្ថែមថា៖ «ពួកគេបានឱ្យលុយយើងដើម្បីឲ្យ​គាត់​ផ្លាស់ប្តូរចិត្ត​។ នៅ​ពេល​យើង​បដិសេធ​មិន​ទទួល​យក​សំណើ​របស់​ពួក​គេ ពួក​គេ​បាន​ឃុំ​ខ្លួន​មេដឹកនាំ​​សហជីពរបស់​​ខ្ញុំ​ជំនួស​វិញ»។

អ្នកស្រី ឆាយ ចាន់រ៉ា អាយុ៣៥ឆ្នាំ ជា​ភរិយារបស់​លោក ចាន់ បានប្រាប់ខេមបូចា​​ថា ការចាប់ខ្លួន និងការ​ចោទប្រកាន់ប្តីរបស់អ្នកស្រី​ គឺអយុត្តិធ៌ម ដោយសារប្តីរបស់អ្នកស្រី​មិនបានប្រព្រឹត្តបទល្មើសអ្វីទាំងអស់។

អ្នក​ស្រី​បាន​ចោទ​ជា​សំណួរ​ថា៖«គេ​ចាប់​ប្ដី​ខ្ញុំ​ដោយ​គ្មានដី​កា ដែល​ជា​ការ​រំលោភ​សិទ្ធិ​​កម្មករ និង​សិទ្ធិ​សហជីព។ គាត់បានធ្វើការនៅទីនោះជិត១០​ឆ្នាំហើយ​។ ហេតុ​អ្វីបានជាពួកគេធ្វើដូច្នេះ?»

អ្នកស្រី​ក៏​មាន​ការ​ព្រួយ​បារម្ភ​ពីក្រុម​​គ្រួសារ​របស់​អ្នកស្រី​ ព្រោះ​អ្នក​ទាំង​ពីរ​​មាន​កូន​បី​នាក់ ហើយលោក ជា​ ចាន់​ គឺ​ជា​មេគ្រួសារ​តែ​ម្នាក់គត់​។

អ្នកស្រី​ ចាន់រ៉ា បាន​និយាយថា៖«មិនអាចទទួលយកបានទេ។ ខ្ញុំ​ចង់​ឲ្យ​ក្រុមហ៊ុន​ដក​​ពាក្យ​បណ្ដឹង​ ហើយ​តុលាការ​ដោះលែង​គាត់​​ឆាប់ៗ​តាម​ដែល​អាច​ធ្វើ​ទៅ​បាន»​។

លោក ផេង ស៊ីភ័ណ ប្រធាន​លេខាធិការដ្ឋាន​រដ្ឋបាល និង​ជា​អ្នកនាំពាក្យ​សាលា​ដំ​បូង​ខេត្ត​កំពង់ស្ពឺ បាន​មាន​ប្រសាសន៍​ថា លោក ចាន់ ត្រូវ​បាន​បញ្ជូន​ទៅ​ពន្ធ​នា​គារ​​ខេត្ត​កំពង់ស្ពឺ បន្ទាប់​ពីត្រូវ​បាន​​ចោទ​ប្រកាន់​តាម​មាត្រា ២៩, ៣៥៣, និង៣៥៦ នៃ​ក្រម​ព្រហ្មទណ្ឌ។

យោងតាមមាត្រា ៣៥៦ នៃក្រមព្រហ្មទណ្ឌ អំពើលួចត្រូវផ្តន្ទាទោសដាក់ពន្ធ​នា​គារពី៦ខែ ទៅ៣ឆ្នាំ និងពិន័យជាប្រាក់ពី១លានទៅ៦លានរៀល។

លោក​បាន​ប្រាប់ខេមបូចា​ថា​៖«តុលាការ​បាន​សាកសួរ​គាត់​កាលពី​​ថ្ងៃ​ទី១៧ ខែ​កុម្ភៈ ហើយ​​បាន​បញ្ជូន​គាត់​ទៅ​ពន្ធនាគារ​កាលម្សិល​មិញ​ [​ថ្ងៃ​អាទិត្យ]​»។ 

នៅ​ពេល​សួរ​ថា ហេតុ​អ្វី​បាន​ជា​តុលាការ​ទើ​បតែ​​សាក​សួរ​លោក ជា ចាន់ រយៈពេល​​​ពីរ​ឆ្នាំ​ក្រោយ​ពីមាន​​ការ​ចោទ​ប្រកាន់​អំពើ​​លួច​នោះ លោក ស៊ីភ័ណ បាន​ឆ្លើយ​​ថា៖ «នេះ​គឺ​ជា​នីតិវិធី​របស់​តុលាការ»។

របាយការណ៍ប្រចាំឆ្នាំ២០២៣​ របស់ក្រសួងការងារ និងបណ្តុះបណ្តាលវិជ្ជាជីវៈ បាន​សង្កត់ធ្ងន់ថា រោងចក្រគួរតែគោរពច្បាប់ការងារ និងបានដោះស្រាយវិវាទការងារ​ដែលមានជាង ៨០០០​ករណី។ 

លោក ចឹក បូរិន ប្រធាន​មន្ទីរ​ការងារ​ខេត្ត​កំពង់ស្ពឺបាន​មាន​ប្រសាសន៍​ថា ប្រសិន​បើ​​ករណី​របស់​លោក ចាន់ ពាក់ព័ន្ធ​នឹង​ការ​រំលោភ​សិទ្ធិ​កម្មករ មន្ទីរ​របស់​លោក​នឹង​​ជួយ​អន្តរាគមន៍។ ទោះ​បី​ជា​យ៉ាង​ណា ​ក្រុមហ៊ុន​បាន​ប្ដឹង​លោក ចាន់ តាម​ច្បាប់​​ព្រហ្មទណ្ឌ ដូច្នេះ​លោក​មិន​អាច​លូក​ដៃ​បាន​ឡើយ។ 

លោក បូរិន បាន​មាន​ប្រសាសន៍​ថា៖«ប្រសិនបើ​គាត់ [ចាន់] បាន​ជូន​ដំណឹង​យើង​ទាក់​ទង​នឹង​រឿង​​​ការងារ យើង​នឹង​ធ្វើ​អន្តរាគមន៍ ប៉ុន្តែ​រឿង​នេះ​ទាក់ទង​នឹង​សំណុំ​រឿង​​ព្រហ្មទណ្ឌ»។ 

 របាយការណ៍របស់ក្រសួងការងារ​ក៏បានកត់សម្គាល់ផងដែរថា រដ្ឋាភិបាលបានបើកទូលាយ​ និងលើកទឹកចិត្តដល់សិទ្ធិក្នុងការរៀបចំសហជីព ដែលស្របតាមច្បាប់ការងារ និងស្តង់ដារការងារអន្តរជាតិ។

នៅក្នុង​ឆ្នាំ២០២២ របាយការណ៍របស់អង្គការឃ្លាំមើលសិទ្ធិមនុស្សបានលើកឡើង​ថា ប្រទេសកម្ពុជាមិនមានតុលាការការងារទេ បើទោះបីជាច្បាប់ការងារកម្ពុជា​បានចែងពីតម្រូវការតុលាការនេះ​ក៏ដោយ។ អាស្រ័យហេតុនេះ ក្រុមប្រឹក្សាអាជ្ញាកណ្តាល គឺជាស្ថាប័នតែមួយគត់ ដែលមានភារកិច្ចដោះស្រាយវិវាទក្រៅ​ផ្លូវ​តុ​លាការ​សម្រាប់បញ្ហាទាក់ទងនឹងការងារ។

 ទន្ទឹម​គ្នា​នេះដែរ​ លោកស្រី យ៉ាង សុភ័ណ្ឌ ប្រធាន​សហព័ន្ធសហជីពកម្ពុជា​បាន​សម្តែង​​ការ​ព្រួយ​បារម្ភ​អំពី​សិទ្ធិ​សហជីព ​ដែល​កំពុង​ត្រូវ​បាន​ជាន់​ឈ្លី​ជា​រៀង​រាល់​ថ្ងៃ​។ លោកស្រី​បាន​សម្តែង​ការ​សោកស្តាយ​ថា៖ «ខ្ញុំ​អាច​និយាយ​បាន​ថា ស្ថានភាព​សិទ្ធិ​សហជីព​ពេល​នេះ​ គឺ​អាក្រក់​ណាស់។ បើ​ទោះ​បី​ជា​យើង​មាន​ការ​ការពារ​ពិសេស​ក្រោម​ច្បាប់​ការងារ ប៉ុន្តែ​តាម​ពិត ​វា​ផ្ទុយ​ពី​នេះ។ បុគ្គលិករបស់យើងក៏​​មិនមានសិទ្ធិចរចា [ជាមួយម្ចាស់រោងចក្រ] ផងដែរ»។

ខេមបូចា​បានទាក់ទងតាម​ទូរសព្ទ​ទៅក្រុម​ហ៊ុន​​ផលិត​ស្បែកជើង​វីងស្តារស៊ូ​ ដើម្បីសុំការអត្ថាធិប្បាយ ដោយប្រើលេខដែលផ្តល់នៅលើគេហទំព័ររបស់ក្រុមហ៊ុន ប៉ុន្តែអ្នកទទួលទូរសព្ទ​ប្រាប់ថា ខ្លួន​លែងធ្វើការជាមួយក្រុមហ៊ុននេះ​ទៀតហើយ៕

ប្រែសម្រួលពីអត្ថបទភាសាអង់គ្លេស៖ Wing Star Shoes Union Leader Charged with Conspiracy To Commit Theft After Winning Post 

229 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម