សមាគមសម្ព័ន្ធអ្នកសារព័ត៌មានកម្ពុជា

កូដករណាហ្គាវើលដ៍អាចឈរតវ៉ានៅមុខកាស៊ីណូដោយមិនមានការរារាំងពីអាជ្ញាធរ ខណៈអ្នករាយការណ៍ពិសេសUNទៅសង្កេតការណ៍

លោក វិទិត មុតតាបន អ្នករាយការណ៍ពិសេសរបស់អង្គការសហប្រជាជាតិ កំពុងឈរមើលការតវ៉ារបស់កូដករណាហ្គាវើលដ៍ រាជធានីភ្នំពេញ។ រូបថតនៅថ្ងៃទី១៧ ខែសីហា ឆ្នាំ២០២២។ ខេមបូចា/ ព្រីង សំរាំង
លោក វិទិត មុតតាបន អ្នករាយការណ៍ពិសេសរបស់អង្គការសហប្រជាជាតិ កំពុងឈរមើលការតវ៉ារបស់កូដករណាហ្គាវើលដ៍ រាជធានីភ្នំពេញ។ រូបថតនៅថ្ងៃទី១៧ ខែសីហា ឆ្នាំ២០២២។ ខេមបូចា/ ព្រីង សំរាំង

ក្រុមកូដករណាហ្គាវើលដ៍ប្រមាណ១០០នាក់ នៅរសៀលថ្ងីទី១៧ ខែសីហា បានទៅ​ឈរ​តវ៉ាដោយលើកបដា និងស្រែកតវ៉ានៅមុខក្រុមហ៊ុនណាហ្គាវើលដ៍ ដោយគ្មានការ​រារាំង​ពីអាជ្ញាធរ និងប្រើហិង្សាដូចសព្វដងឡើយ ខណៈអ្នករាយការណ៍ពិសេស​របស់​អង្គការ​សហប្រជាតិបានចុះទៅសង្កេតការណ៍ផ្ទាល់។

កូដករស្រីប្រុសនៃក្រុមហ៊ុនណាហ្គាវើលដ៍ប្រមាណ១០០នាក់ បានជួបជុំគ្នាមកឈរតវ៉ាឱ្យ​ក្រុមហ៊ុនទទួលយកពួកគេឱ្យចូលធ្វើការវិញ ដោយមានការលើកបដាទាមទារ និងស្រែក​តវ៉ាទៅតាមទម្លាប់ដូចសព្វដង។

ប៉ុន្តែអ្វីដែលប្លែក នៅថ្ងៃនេះមិនមានការរាំងពីសំណាក់អាជ្ញាធររាជធានីភ្នំពេញឡើយ ខណៈគេ​ឃើញមានវត្តមានលោក វិទិត មុតតាបន អ្នករាយការណ៍ពិសេសរបស់​អង្គការសហប្រជាជាតិ​ទទួលបន្ទុកឃ្លាំមើលបញ្ហាសិទ្ធិមនុស្សនៅកម្ពុជាកំពុងឈរសង្កេតការតវ៉ារបស់ក្រុមកូដករ។

ចំណែកនៅតាមផ្លូវមានការជួយសម្រួលចរចាមិនមានការបិទប៉ារាស់ និងឃើញមានក្រុម​អាជ្ញាធរ​ជាច្រើនអ្នកស្លៀកពាក់ស៊ីវិលសង្កេតការតវ៉ានោះ​ ដោយមានការបង្ហោះដ្រូន និងថត​រូប​ផងដែរ។

កញ្ញា ចាន់ ស្រីរត្ន កំពុងកាន់បដាស្រែកតវ៉ានៅមុខក្រុមហ៊ុនដែលបានបញ្ឈប់ការងារកញ្ញា ថ្លែង​ប្រាប់ ខេមបូចា ថា រូបនាងមិនយល់ពីចេតនាអាជ្ញាធរឡើយ ត្បិតថ្ងៃនេះក្រុមកូដករអាច​មក​ឈរ​តវ៉ា​នៅមុខក្រុមហ៊ុន ដោយមិនមានការដាក់ប៉ារាសរារាំងដូចពេលកន្លងទៅ។

កូដកររូបនេះអះអាងថា ទំនងមកពីមានវត្តមានអ្នករាយការណ៍ពិសេសមកសង្កេតការណ៍​ដោយ​ផ្ទាល់​ទើបអាជ្ញាធរមិនទប់ស្កាត់ដូចពេលកន្លងទៅ។

កញ្ញាឱ្យដឹងថា៖ «ជាក់ស្ដែងថ្ងៃនេះ អាចមកពីគាត់ឃើញអ្នកសង្កេតការណ៍UNច្រើន បានគាត់​បន្ទន់ឥរិយាបទឱ្យពួកខ្ញុំមកឈរនៅមុខអគារណាហ្គាវ័នដោយស្រួល»។

កូដកររូបនេះ នៅតែទទូចថាឱ្យអាជ្ញាធររដ្ឋបញ្ឈប់ធ្វើបាបកូដករស្រ្ដី  និងស្នើទៅលោក​នាយករដ្ឋមន្រ្តី ហ៊ុន សែន អន្តរាគមន៍លើវិវាទការងារមួយនេះផង ត្បិតក្រសួងការងារ​មិនមាន​ឆន្ទៈដោះស្រាយ។

លោក វិទិត មុតតាបន អ្នករាយការណ៍ពិសេសរបស់អង្គការសហប្រជាជាតិ ពាក់មួកស វែនតាខ្មៅ កំពុងសម្លឹងមកក្រុមកូដករស្រែកតវ៉ានៅមុខក្រុមហ៊ុនណាហ្គាវើលដ៍ រាជធានីភ្នំពេញ។ រូបថតនៅថ្ងៃទី១៧ ខែសីហា ឆ្នាំ២០២២។ ខេមបូចា/ ព្រីង សំរាំង

កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុន​ណាហ្គាវើលដ៍ ថ្លែងថា អាជ្ញាធរបានរៀបចំសម្ដែង ស្របពេលដែលអ្នករាយការណ៍ពិសេស​របស់អង្គការសហប្រជាជាតិមកសង្កេតការណ៍ដោយផ្ទាល់។ ត្បិតថាកកន្លងមក កូដករមិន​ដែល​បានឈរនៅក្បែរក្រុមហ៊ុនដូច្នេះឡើយ មានតែការរារាំង និងប្រើហិង្សារមកលើ​ក្រុម​កូដករ​ស្រ្តី។

កញ្ញា ស៊ីថរ ថ្លែងថា៖ «ខ្ញុំមិនដឹងគាត់រៀបឈុតឆាកទៅណាទេ តែវាខុសប្រក្រតី​នៅពេល​មានវត្តមានអ្នករាយការណ៍ពិសេសនៅ ព្រោះរាល់ដងកូដករទៅតវ៉ារងអំពើហិង្សា រហូត​មានអ្នករលូតកូនក៏មានដែរ តែថ្ងៃនេះទៅជាមានការបើកឱ្យទៅធ្វើកូដកម្ម»។

កញ្ញាបញ្ជាក់ថា កន្លងទៅនៅពេលដែលគ្មានវត្តមានអ្នករាយការណ៍ពិសេស កុំថាឡើយ​តែកម្មករឈរតវ៉ាក្បែរក្រុមហ៊ុន សូម្បីតែអ្នកសារព័ត៌មាន អ្នកសង្កេតការណ៍​ពីក្រុមអង្គការ​សង្គមស៊ីវិលក៏មិនអាចចូលក្បែរបានដែរ។

ជុំវិញបញ្ហាវិវាទការងារនេះ លោកនាយករដ្ឋមន្រ្តីហ៊ុន សែន មានប្រសាសន៍នៅក្នុងពិធីប្រគល់សញ្ញាបត្រ មួយថា អ្នកវិនិយោគមិនខ្វល់រឿងប្រជាធិបតេយ្យនោះទេ ហើយកាន់តែស្អប់រឿងធ្វើបាតុកម្ម គ្មានក្បួនខ្នាត។ ទន្ទឹមនឹងនោះ លោកក៏បានណែនាំឱ្យក្រសួងការងារខិតខំប្រឹងប្រែង​ដោះ​ស្រាយ​លើវិវាទការងារ ផងដែរ។

លោក ហ៊ុន សែន បានថ្លែងថា៖ «កម្ពុជាមិនមែនបោះបង់ចោលរឿងការទាមទាររបស់កម្មករ ឬសហជីព ដែលទាមទារត្រឹមត្រូវនោះទេ»

ជុំវិញករណីនេះ អ្នកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ថ្លែងថា លោកស្រី​មានការភ្ញាក់ផ្អើលនៅពេលឃើញកូដករអាចទៅឈរតវ៉ាក្បែររបងក្រុមហ៊ុន​ណាហ្គវើលដ៍ ប៉ុន្តែក្រោយមកទើបដឹងថា មានវត្តមានអ្នករាយការណ៍ពិសេស​របស់អង្គការ​សហប្រជាជាតិនៅទីតាំងនោះ ដូច្នេះទើបអាជ្ញាធរមិនមានការរារាំងដូចពេលកន្លងទៅ។

លោកស្រីបន្តថា៖ «នោះអាចជាហេតុផលសំខាន់ ព្រោះខុសសព្វមួយដងគឺ កូដករតែង​ត្រូវ​បានរងការទប់ស្កាត់ មិនអាចមកឈរនៅមុខក្រុមហ៊ុនបានពេលមានការប្រើហិង្សា​មកលើ​កូដករថែមទៀត ប៉ុន្តែសភាពនៅថ្ងៃនេះដូចជាអាជ្ញាធរបានបើកឱកាស​ឱ្យកូដករបានធ្វើ​កូដកម្ម​ដោយសន្តិវិធីបាន»។

អ្នកស្រីបន្តថា អាជ្ញាធរគួរតែបង្កបរិយាកាសអំណោយផលក្នុងការធ្វើកូដកម្មបែបនេះដល់​កូដករ​តាំងពីដំបូង មិនមែនចាំទាល់តែមានមានវត្តមានអ្នកសង្កេតការណ៍ពិសេសចុះទៅ ទើបមិនរារាំងដូច្នេះទេ។

លោកស្រីបន្ថែមថា៖ «ស្ថានភាពនេះគួរតែបានផ្ដល់ជាភាពអំណោយផលតាំងពីដំបូងម្ល៉េះ​សម្រាប់កូដករ ព្រោះនេះជាសិទ្ធិក្នុងការធ្វើកូដកម្មដែលកម្ពុជាយើងទទួលស្គាល់​នូវអនុសញ្ញា​ពាក់ព័ន្ធសិទ្ធិការងារ»។

ក្រុមអ្នកសង្កេតការណ៍UNត្រឡប់ទៅវិញបន្ទាប់ពីសង្កេតអស់រយៈពេលជាង២ម៉ោង​នៅមុខក្រុមហ៊ុនណាហ្គាវើលដ៍ រាជធានីភ្នំពេញ។ រូបថតថ្ងៃទី១៧ ខែសីហា ឆ្នាំ២០២២។ ខេមបូចា/ ព្រីង សំរាំង

ចំណែកអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី លើកឡើងថា កាលដែល​ក្រុមកូដករអាចទៅឈរមុខរបងក្រុមហ៊ុនណាហ្គាវើលដ៍បាន មិនមែនដោយសារតែមាន​វត្តមាន​អ្នករាយការណ៍ពិសេសឡើយ ហើយលោកនៅតែចាត់ទុកថាជាសកម្មភាព​ធ្វើបាតុកម្ម​ខុសច្បាប់។

លោកបញ្ជាក់ថា៖ «ដូចជាមិនមានជាការអនុញ្ញាតក្នុងការធ្វើនេះទេ! គ្រាន់តែថាបងប្អូនយើង​គាត់​នៅតែបន្តល្មើសប៉ារាស់ដែលយើងដាក់ហាមឃាត់មិនឱ្យឆ្លងកាត់ អាហ្នឹងជាប៉ារាស់​សមត្ថកិច្ច ប៉ុន្តែនៅតែបងប្អូនយើងលោកបន្តឆ្លងកាត់ទីតាំងទាំងអស់»។

អ្នកនាំពាក្យរូបនេះ អះអាងថា លោកមានការខកចិត្តដែលក្រុមបាតុកម្មខុសច្បាប់ មិនយល់​និង​មិនអនុវត្តទៅតាមសេចក្ដីណែនាំរបស់រដ្ឋបាលរាជធានីភ្នំពេញដែលបានប្រកាសឱ្យបញ្ឈប់​សកម្មភាពខុសច្បាប់។

លោកថ្លែងថា៖ «មិនគួរនៅតែបន្តធ្វើសកម្មភាព ដូចដែលធ្លាប់បានជូនព័ត៌មានជាញឹកញយ ថាវាជាសកម្មភាពធ្វើបាតុកម្មខុសច្បាប់ ព្រោះបងប្អូនទាំងអស់គ្នានៅតែបន្តដដែលៗចឹង»។

យ៉ាងណាមិញ លោកស្រី ចក់ សុភាព ក៍បានអះអាងថា ស្ថានភាពសិទ្ធិសេរីភាពក្នុងការជួបជុំ​មានការប្រឈមខ្លាំង ជាក់ស្ដែងករណីណាហ្គាវើលដ៍កូដកររងការប្រឈមទាំងផ្លូវច្បាប់ និងផ្លូវ​តុលាការ និងការគំរាមកំហែងផ្សេងៗ គឺជាកំណត់ត្រាអាក្រក់សម្រាប់កម្ពុជា ខណៈកម្ពុជា​ទទួល​ស្គាល់លិខិតតូបករផង និងការអះអាងថាលុបបំបាត់អំពើហិង្សាផង។

លោកស្រីសង្កត់ធ្ងន់ថា សន្តិភាពមិនមានគុណតម្លៃទេ ប្រសិនបើគាំទ្រការប្រើទម្រង់ហិង្សា​ពី​សំណាក់​មន្ត្រីមានសមត្ថកិច្ចមកលើកូដករស្រ្តី។

លោកស្រីបន្ថែមទៀតថា៖ «ក្នុងនាមជាអាជ្ញាធរហ្នឹងត្រូវយកង្វល់ពលរដ្ឋខ្លួនទៅដោះស្រាយ ផ្ដល់នូវដំណោះស្រាយវិជ្ជមាន ដែលភាគីមួយអាចទទួលយកបាន យើងត្រូវមើល​អំពីគោល​ការណ៍​ច្បាប់អំពីការរើសអើងសហជីពជាដើម»។

គួររំលឹកថា វិវាទការងារនៅក្រុមហ៊ុនណាហ្គាវើលដ៍ បានចាប់ផ្ដើមនៅចុងឆ្នាំ២០២១ ក្រោយ​ក្រុមហ៊ុន​ល្បែងមួយនេះ ប្រកាសបញ្ឈប់បុគ្គលិកក្នុងទ្រង់ទ្រាយធំ​​ ដែលភាគច្រើនជា​មេដឹកនាំ​សហជីព និងសមាជិកសហជីព។

មកទល់ពេលនេះវិវាទនេះ មិនទាន់បញ្ចប់ឡើយ ដោយសារតែក្រុមហ៊ុនមិនព្រមទទួលយក​បុគ្គលិកទាំងនោះឱ្យចូលធ្វើការវិញឡើយ។ តែសហជីពថា ទង្វើនេះគឺជាការរើសអើង​សហជីព​ឯករាជ្យ ខណៈក្រុមហ៊ុនកំពុងតែប្រកាសរើសបុគ្គលិកបន្ថែម។

ខេមបូចា ព្យាយាមសុំសម្ភាសលោក វិទិត មុតតាបន នៅកន្លែងកូដកម្ម ប៉ុន្តែលោកបដិសេធ ដោយប្រាប់ថាចាំសួរសរុប នៅថ្ងៃធ្វើសន្និសិទ្ធសារព័ត៌មានថ្ងៃទី២៦ ខែសីហា ឆ្នាំ២០២២។

ប៉ុន្តែលោក វិទិត មុតតាបន បានមានប្រសាសន៍នៅក្នុងហ្វេសប៊ុកផ្លូវការរបស់លោកថា លោកសប្បាយរីករាយដែលបានទៅជួបកម្មករដែលធ្វើកូដកម្មដោយសន្តិវិធី ហើយបាន​ឃើញពួកគេអនុវត្តសិទ្ធិសេរីភាពនៃការបញ្ចេញមតិ។

លោក វិទិត មុតតាបន ថ្លែងថា៖ «ខ្ញុំរីករាយដែលបានទៅជួបកម្មករដែលធ្វើកូដកម្ម ហើយ​ឃើញពួកគេអនុវត្ត​សេរីភាព​នៃការបញ្ចេញមតិ និងសិទ្ធិក្នុងការជួបប្រជុំដោយសន្តិវិធី​នៅថ្ងៃ​នេះ»

503 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម