សកម្មជនជិត៤០នាក់ដែលបានជាប់ឃុំជាងមួយឆ្នាំក្រោមបទចោទញុះញង់ នៅឆាប់ៗនេះនឹងត្រូវបំបែកសំណុំរឿងដាច់ដោយឡែកពីគ្នាដើម្បីជំនុំជម្រះ ដែលនេះជារបត់ថ្មីមួយទៀតក្នុងសំណុំរឿងដែលបានអូសបន្លាយពេលដ៏យូរមួយនេះ។ អ្នកទាំងនេះត្រូវបានចាប់ខ្លួនបន្ទាប់ពីរៀបចំឲ្យមានការតវ៉ាមួយកាលពីឆ្នាំមុនដើម្បីជំទាស់នឹងគម្រោងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) ដែលក្រោយមករដ្ឋាភិបាលបានសម្រេចលុបចោលវិញ។
សកម្មជនមួយចំនួនក្នុងចំណោមអ្នកទាំងនោះបានជាប់ឃុំបណ្ដោះអាសន្នអស់ពេលជាងពាក់កណ្ដាលនៃកម្រិតទោសអតិបរមារួចទៅហើយនៅពន្ធនាគារតាមបណ្ដាខេត្ត។
អង្គការសង្គមស៊ីវិលលើកឡើងថាការចាប់ខ្លួននេះ ដែលដំបូងឡើងមានជិត១០០នាក់រួមទាំងកូនក្មេងផង គឺជាការចាប់ឃាត់ខ្លួនតាមតែអំពើចិត្ត និងមិនស្របតាមច្បាប់។ ក្រុមអង្គការសង្គមស៊ីវិលទាំងនេះបានជំរុញឲ្យអាជ្ញាធរទម្លាក់ចោលបទចោទលើសកម្មជនទាំងនោះ។
សកម្មជនដែលកំពុងជាប់ឃុំទាំង៣៧នាក់ ដែលមានខ្លះជាសកម្មជនកិច្ចព្រមព្រៀងសន្តិភាពក្រុងបារីស នឹងត្រូវបែងចែកចេញជាប្រាំក្រុមសម្រាប់សវនាការដែលចាប់ផ្ដើមនៅសប្ដាហ៍ក្រោយ។ សវនាការនឹងត្រូវធ្វើឡើងរាល់សប្ដាហ៍ ប៉ុន្តែតុលាការនឹងមិនបន្តសវនាការលើក្រុមបន្ទាប់ទេរហូតមានសាលក្រមសម្រាប់ក្រុមមុនៗសិន។ នេះបើតាមការឲ្យដឹងរបស់អ្នកនាំពាក្យសាលាដំបូងរាជធានីភ្នំពេញនៅថ្ងៃពុធនេះ។
នៅថ្ងៃពុធនេះ មេធាវីការពារក្ដីឲ្យជនជាប់ចោទដែលជាសម្មជន១១នាក់បានស្នើជាថ្មីឲ្យកូនក្ដីរបស់ខ្លួនបាននៅក្រៅឃុំ ដែលសំណើនេះត្រូវបានច្រានចោលរួចម្ដងហើយ។ មេធាវីម្នាក់ឲ្យដឹងថាការប្រកាសសាលក្រមសង្ឃឹមថាអាចធ្វើឡើងនៅថ្ងៃទី៣ ខែកញ្ញា។
លោក ឡោ ជុនធី មេធាវីការពារក្ដីឲ្យសកម្មជនជាង១០នាក់រួមទាំងលោក ស្រ៊ុន ស្រ៊ន ផង មានប្រសាសន៍ថា៖ «កូនក្ដីរបស់ខ្ញុំបានជាប់ឃុំបណ្ដោះអាសន្នមួយឆ្នាំ ពីរខែ និងបីថ្ងៃមកហើយ ដែលរយៈពេលនេះលើសពីពាក់កណ្ដាលនៃកម្រិតទោសអតិបរមាចំពោះបទចោទទៅហើយ»។
លោកបន្ថែមថា៖ «មិនមានអ្វីត្រូវបន្តឃុំខ្លួនពួកគាត់ទៀតនោះទេ»។ លោកបានបន្តថា កូនក្ដីរបស់លោកខ្លះកំពុងមានបញ្ហាសុខភាព ហើយគ្រួសារអ្នកទាំងនោះកំពុងប្រឈមនឹងបញ្ហាផ្លួវចិត្ត និងហិរញ្ញវត្ថុ។
បទចោទញុះញង់នេះត្រូវបានរងការរិះគន់ជាខ្លាំងពីសំណាក់ក្រុមអង្គការសិទ្ធិមនុស្ស ដោយថាបទចោទនេះច្រើនប្រើសម្ដៅលើក្រុមអ្នករិះគន់ ក្រុមអ្នកប្រឆាំង អ្នកសារព័ត៌មាន និងក្រុមសកម្មជន។
ព្រះរាជអាជ្ញារង លោក សេង ហៀង បានជំទាស់នឹងសំណើសុំនៅក្រៅឃុំរបស់មេធាវីជនជាប់ចោទ ដោយលោកបានជំរុញឲ្យចៅក្រមបន្តឃុំខ្លួនជនជាប់ចោទដដែល។ លោកអះអាងថា អ្នកទាំងនោះបានប្រព្រឹត្តទង្វើ «ប្រឆាំងនឹងរដ្ឋាភិបាល» ដែល «បង្កឲ្យប៉ះពាល់ធ្ងន់ធ្ងរដល់សណ្ដាប់ធ្នាប់សង្គម និងសន្ដិសុខជាតិ»។
ក្នុងសវនាការសុំនៅក្រៅឃុំនេះ លោក ស្រ៊ុន ស្រ៊ន លើកឡើងថាសកម្មភាពរិះគន់របស់លោកទៅលើគម្រោងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម គឺ «ជាការអនុវត្តសិទ្ធិសេរីភាពនៃការបញ្ចេញមតិ ក្នុងនាមជាប្រជាពលរដ្ឋកម្ពុជាម្នាក់ដែលព្រួយបារម្ភពីបូរណភាពទឹកដី និងការអភិវឌ្ឍជាតិ»។
ក្រុមអ្នកគាំទ្រ និងសាច់ញាតិសកម្មជនជាប់ឃុំកំពុងប្រមូលផ្ដុំគ្នានៅមុខសាលាដំបូងរាជធានីភ្នំពេញនៅព្រឹកថ្ងៃពុធ ដើម្បីទាមទារឲ្យមានការដោះលែងអ្នកទាំងនោះ។
លោក សេង សុវឌ្ឍនា នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា បានរិះគន់ទៅនឹងភាពយឺតយាវនៃនីតិវិធីរបស់តុលាការ ដោយថាការពន្យារពេលឃុំខ្លួនបណ្ដោះអាសន្នគឺបំពាននឹងសិទ្ធិដែលជនជាប់ចោទត្រូវទទួលបានការជំនុំជម្រះដោយយុត្តិធម៌។
លោកមានប្រសាសន៍ថា៖ «ជនជាប់ចោទមានសិទ្ធិសេរីភាពស្របតាមច្បាប់» ដោយលោកកត់សម្គាល់ថា តាមច្បាប់ជាតិ ការឃុំខ្លួនបណ្តោះអាសន្នសម្រាប់បទល្មើសកម្រិតមធ្យមមិនអាចលើសពីប្រាំមួយខែបន្ទាប់ពីការស៊ើបអង្កេតនោះទេ ហើយការពន្យារពេលណាមួយលើសពីនេះគឺគួរតែត្រូវបានដោះលែងដោយស្វ័យប្រវត្តិ៕
ប្រែសម្រួលពីអត្ថបទភាសាអង់គ្លេស៖ Nearly 40 Activists From Blocked CLV-DTA Protest Face Staggered Trial After Year in Jail
