ក្នុងចំណោមបេក្ខជនទាំង១២៥រូបដែលឈរឈ្មោះបោះឆ្នោតជ្រើសតាំងតំណាងរាស្ត្ររបស់គណបក្សប្រជាជនកម្ពុជា (CPP) ដែលកំពុងកាន់អំណាច យ៉ាងហោចណាស់មានមនុស្ស២៨នាក់ស្មើនឹង២២.៤% គឺជាសាច់ញាតិនឹងគ្នា នេះបើតាមការពិនិត្យមើលបញ្ជីបេក្ខជនឈរឈ្មោះ។
នេះគឺជាការកើនឡើងគួរឱ្យកត់សម្គាល់ធៀបនឹងការបោះឆ្នោតជ្រើសតាំងតំណាងរាស្ត្រឆ្នាំ២០១៨ នៅពេលដែលបេក្ខជនតែ១១នាក់ប៉ុណ្ណោះ ស្មើនឹង៨.៨% គឺជាសាច់ញាតិនឹងគ្នា នេះបើតាមការពិនិត្យដោយខេមបូចាលើបញ្ជីឈ្មោះបេក្ខជនឆ្នាំ២០១៨។ ភាគច្រើននៃបេក្ខជនជំនាន់ក្រោយ ដែលឪពុករបស់ពួកគេកាន់តំណែងកំពូលៗនៅតាមក្រសួងកំពុងឈរឈ្មោះប្រកួតប្រជែងនៅក្នុងការបោះឆ្នោតជាលើកដំបូង។
លោកនាយករដ្ឋមន្ត្រី ហ៊ុន សែន មានប្រសាសន៍ថា រដ្ឋាភិបាលថ្មី និងគណៈរដ្ឋមន្ត្រីដែលត្រូវបានរុះរើនោះ នឹងបន្តការគ្រប់គ្រងរហូតដល់ដំណាច់ខែសីហា ដែលអ្នកសង្កេតការណ៍ជាច្រើនរំពឹងថា អាចនាំឱ្យមានការផ្លាស់ប្តូរជំនាន់នៃការដឹកនាំរដ្ឋាភិបាលក្រោមកូនប្រុសច្បងរបស់លោកនាយករដ្ឋមន្ត្រី គឺលោក ហ៊ុន ម៉ាណែត ស្របពេលរក្សាដែនឥទ្ធិពលដែលមានស្រាប់របស់គ្រួសារកំពុងកាន់អំណាចសំខាន់ៗ។
លោក ហ៊ុន សែន ដែលមានវ័យ៦៩ឆ្នាំនៅពេលនោះ ត្រូវបានគេដកស្រង់សម្ដីដោយលោកបានថ្លែងថា៖ «យើងអាយុ៧០និង៨០ឆ្នាំនឹងដើរចេញ [ពីគណៈរដ្ឋមន្ត្រី] យើងបានឯកភាពគ្នា»។
ក្នុងចំណោមមនុស្ស២៨នាក់ដែលជាសាច់ញាតិនឹងគ្នានៅក្នុងបញ្ជីឈ្មោះបេក្ខជនឈរឈ្មោះ មាន៥នាក់គឺជាសាច់ញាតិរបស់លោក ហ៊ុន សែន។
លោក ហ៊ុន សែន ថ្លែងក្នុងសុន្ទរកថាមួយកាលពីថ្ងៃទី៣០ ខែមិថុនា ថា៖ «កុំស្រមៃចង់កម្ចាត់គ្រួសារត្រកូល ហ៊ុន ។ យើងមានអ្នកគាំទ្រពេញប្រទេសសម្រាប់គ្រួសារនេះ»។
ខណៈពេលដែលសមាជិកគណៈរដ្ឋមន្ត្រីត្រូវបានតែងតាំងដោយផ្ទាល់ដោយនាយករដ្ឋមន្ត្រី ប្រសិនបើរដ្ឋមន្ត្រីដែលមានស្រាប់ត្រូវបានផ្លាស់ប្តូរក្រោយការបោះឆ្នោត ពួកគេអាចផ្លាស់ប្តូរទៅកាន់តួនាទីនៅរដ្ឋសភាវិញ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាជាគណបក្សកាន់អំណាចមានប្រសាសន៍ថា ភាគរយខ្ពស់នៃបេក្ខជនដែលជាសាច់ញាតិនឹងគ្នានៅក្នុងការបោះឆ្នោតឆ្នាំនេះ គឺជាការគាប់ជួន ហើយបេក្ខជននីមួយៗត្រូវបានជ្រើសរើសដោយសារតែលក្ខណៈសម្បត្តិរបស់ពួកគេសម្រាប់តំណែង។
លោកបានបញ្ជាក់ថា៖ «បេក្ខជនតំណាងរាស្រ្តមិនត្រូវបានជ្រើសរើសដោយសារតែ [ទំនាក់ទំនងរបស់ពួកគេជាមួយ] អតីតបេក្ខជនតំណាងរាស្រ្តនោះ ទេ ប៉ុន្តែត្រូវបានជ្រើសរើសដោយមន្ត្រីគណបក្សដោយផ្អែកលើគុណសម្បត្តិនិងការងារល្អនៅតាមមូលដ្ឋានរបស់ពួកគេ»។
លោក ហ៊ុន សែន បានថ្លែងថា គ្រួសារនិយមមិនពាក់ព័ន្ធនឹងការសម្រេចចិត្តរបស់គណបក្សប្រជាជនកម្ពុជាក្នុងការតែងតាំងកូនប្រុសលោក គឺលោក ហ៊ុន ម៉ាណែត ជាអនាគតនាយករដ្ឋមន្ត្រី និងជាបេក្ខជនលេខរៀងទី១ សម្រាប់មណ្ឌលរាជធានីភ្នំពេញនោះទេ។
លោក ហ៊ុន សែន បានថ្លែងក្នុងសុន្ទរកថាកាលពីថ្ងៃទី១៦ ខែមិថុនា ថា «បើទោះបីជាមិនមែនកូនក៏យើងត្រូវរើសយកដែរ ព្រោះមានគ្រប់លក្ខខណ្ឌសម្បត្តិគ្រប់គ្រាន់ ហើយបានជ្រើសរើសរយៈពេល២ឆ្នាំមកហើយ»។
លោក ហង្ស ពុទ្ធា អ្នកនាំពាក្យ គ.ជ.ប មានប្រសាសន៍ថា គណបក្សនយោបាយអាចដាក់បេក្ខជនណាក៏បាន ដែលខ្លួនចង់ដាក់។
លោក មាស នី អ្នកវិភាគនយោបាយបានមានប្រសាសន៍ថា៖ «នៅក្នុងប្រទេសផ្សេងៗទៀត នៅពេលដែលរចនាសម្ព័ន្ធគ្រួសារក្លាយជាផ្នែកមួយនៃរចនាសម្ព័ន្ធនយោបាយ ជម្លោះផលប្រយោជន៍នឹងកើតឡើងដោយជៀសមិនរួច។ យើងមិនដឹងថា ប្រព័ន្ធនយោបាយក្រោយឆ្នាំ២០២៣ នឹងទៅជាយ៉ាងណានោះទេ ដោយយើងរង់ចាំមើលថា តើរដ្ឋាភិបាលអាចគ្រប់គ្រងប្រព័ន្ធគ្រប់គ្រងដោយគ្រួសារតាមរបៀបណា”។
បញ្ជីឈ្មោះផ្លូវការនៃបេក្ខជនតំណាងរាស្ត្រសម្រាប់ការបោះឆ្នោតថ្ងៃទី២៣ ខែកក្កដា ខាងមុខនេះមានទំនាក់ទំនងគ្រួសារដូចខាងក្រោម៖
លោកនាយករដ្ឋមន្ត្រី ហ៊ុន សែន ជាបេក្ខជនពេញសិទ្ធិលេខរៀងទី១ ប្រចាំមណ្ឌលខេត្តកណ្តាល។ លោក ហ៊ុន ម៉ាណែត កូនប្រុសច្បងរបស់លោក គឺជាបេក្ខជនពេញសិទ្ធិលេខរៀងទី១ នៅមណ្ឌលរាជធានីភ្នំពេញ ខណៈកូនប្រុសច្បងទី២របស់លោក គឺលោក ហ៊ុន ម៉ានី ជាបេក្ខជនពេញសិទ្ធិលេខរៀងទី២ នៅមណ្ឌលខេត្តកំពង់ស្ពឺ។ លោក នឹម ច័ន្ទតារា ប្អូនថ្លៃរបស់លោក ហ៊ុន សែន ឈរឈ្មោះជាបេក្ខជនពេញសិទ្ធិលេខរៀងទី៤ នៅមណ្ឌលកំពត។
លោក ទៀ បាញ់ រដ្ឋមន្ត្រីក្រសួងការពារជាតិ និងកូនប្រុសលោក គឺលោក ទៀ សីហា អភិបាលខេត្តសៀមរាប កំពុងឈរឈ្មោះប្រជែងយកអាសនៈសភាក្នុងចំណោមអាសនៈចំនួនប្រាំមួយ ដើម្បីតំណាងឱ្យខេត្តសៀមរាប។ លោក ទៀ បាញ់ ជាបេក្ខជនពេញសិទ្ធិលេខរៀងទី១ ហើយលោក ទៀ សីហា គឺជាបេក្ខជនពេញសិទ្ធិលេខរៀងទី៣។ លោកទាំងពីរមិនអាចទាក់ទងសុំការអត្ថាធិប្បាយបានទេ។ លោក សុខ ឥសាន អ្នកនាំពាក្យគណបក្សប្រជាជនកម្ពុជាមានប្រសាសន៍ថា លោក ទៀ សីហា ក្នុងនាមជាអភិបាលខេត្តបច្ចុប្បន្ន «ដឹងពីសុខទុក្ខរបស់ប្រជាពលរដ្ឋនៅខេត្តសៀមរាប»។
លោក កែ សួន សុភាព ប្រធានក្រុមការងារអភិវឌ្ឍយុវជនខេត្តបន្ទាយមានជ័យ ត្រូវជាកូនប្រុសរបស់លោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន។ លោក កែ សួន សុភាព ជាបេក្ខជនបម្រុងលេខរៀងទី៥ នៅមណ្ឌលខេត្តបន្ទាយមានជ័យ ខណៈលោក កែ គឹមយ៉ាន ជាបេក្ខជនពេញសិទ្ធិលេខរៀងទី១។ កូនស្រីលោក កែ គឹមយ៉ាន បានរៀបការជាមួយកូនប្រុសរបស់លោក ស ខេង រដ្ឋមន្ត្រីក្រសួងមហាផ្ទៃ។
លោក ស ខេង រដ្ឋមន្ត្រីក្រសួងមហាផ្ទៃជាបេក្ខជនពេញសិទ្ធិលេខរៀងទី១ សម្រាប់មណ្ឌលខេត្តបាត់ដំបង ខណៈកូនប្រុសរបស់លោកគឺលោក ស សុខា ជារដ្ឋលេខាធិការក្រសួងអប់រំ យុវជន និងកីឡាគឺជាបេក្ខជនពេញសិទ្ធិលេខរៀងទី២ សម្រាប់មណ្ឌលខេត្តព្រៃវែង។
លោកស្រី ចម និម្មល រដ្ឋលេខាធិការក្រសួងពាណិជ្ជកម្ម គឺជាកូនស្រីរបស់លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ លោកស្រី និម្មល ជាបេក្ខជនពេញសិទ្ធិលេខរៀងទី៥ប្រចាំមណ្ឌលខេត្តកំពត ចំណែកលោក ចម ប្រសិទ្ធ ជាបេក្ខជនពេញសិទ្ធិលេខរៀងទី១នៅមណ្ឌលខេត្តកែប។
កូនប្រុសរបស់លោក ហ៊ុន សែន បានរៀបការជាមួយកូនស្រីរបស់លោក យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាអភិវឌ្ឍន៍វិស័យកសិកម្ម និងជនបទ។ លោក យឹម ឆៃលី ជាបេក្ខជនពេញសិទ្ធិលេខរៀងទី១ នៅមណ្ឌលខេត្តកំពង់ចាម ហើយកូនប្រុសរបស់លោកឈ្មោះ យឹម លាត ជាបេក្ខជនពេញសិទ្ធិលេខរៀងទី៤ នៅមណ្ឌលខេត្តកំពង់ធំ។
លោក ហេង សំរិន ប្រធានរដ្ឋសភាជាបេក្ខជនពេញសិទ្ធិលេខរៀងទី១ ប្រចាំមណ្ឌលខេត្តត្បូងឃ្មុំ ចំណែកកូនប្រសាររបស់លោក គឺលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា គឺជាបេក្ខជនពេញសិទ្ធិលេខរៀងទី៣ប្រចាំមណ្ឌលខេត្តត្បូងឃ្មុំផងដែរ។ លោក វង សូត មានប្រសាសន៍ថា លោកជាប់រវល់ហើយបានដាក់ទូរសព្ទចុះនៅពេលខេមបូចាទាក់ទងសុំការអត្ថាធិប្បាយ។
លោកស្រី ខេង សំវ៉ាដា រដ្ឋលេខាធិការក្រសួងកិច្ចការនារី គឺជាបេក្ខជនពេញសិទ្ធិលេខរៀងទី៥ ប្រចាំមណ្ឌលកំពង់ស្ពឺ ខណៈស្វាមីរបស់លោកស្រី គឺលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ គឺជាបេក្ខជនពេញសិទ្ធិលេខរៀងទី៤ នៅមណ្ឌលខេត្តកណ្តាល។
លោក តឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី គឺជាបេក្ខជនពេញសិទ្ធិលេខរៀងទី២ ប្រចាំមណ្ឌលខេត្តព្រះសីហនុ ចំណែកប្អូនស្រីរបស់លោកគឺលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មគឺជាបេក្ខជនពេញសិទ្ធិលេខរៀងទី៤ នៅមណ្ឌលខេត្តសៀមរាប។
- លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាបេក្ខជនពេញសិទ្ធិលេខរៀងទី៦ នៅមណ្ឌលខេត្តត្បូងឃ្មុំ និងជាបងថ្លៃរបស់លោក សាយ សំអាល់ រដ្ឋមន្ត្រីក្រសួងបរិស្ថាន ដែលជាបេក្ខជនពេញសិទ្ធិលេខរៀងទី១ នៅមណ្ឌលខេត្តព្រះសីហនុ។
- លោក ឆាយ ថន រដ្ឋមន្ត្រីក្រសួងផែនការជាបេក្ខជនពេញសិទ្ធិលេខរៀងទី១ មណ្ឌលខេត្តកំពង់ស្ពឺ និងកូនប្រុសលោកគឺលោក ឆាយ ឫទ្ធីសែន អគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្ម គឺជាបេក្ខជនពេញសិទ្ធិលេខរៀងទី៨ នៅមណ្ឌលខេត្តត្បូងឃ្មុំ។
- នៅខេត្តកំពង់ឆ្នាំងឯណោះវិញ លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ គឺជាបេក្ខជនពេញសិទ្ធិលេខរៀងទី២ ចំណែកកូនប្រុសលោកគឺលោក អ៊ុក ពញ្ញា រដ្ឋលេខាធិការនៅក្រសួងតែមួយ គឺជាបេក្ខជនបម្រុងលេខរៀងទី៤។
នៅខេត្តត្បូងឃ្មុំ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាបេក្ខជនពេញសិទ្ធិលេខរៀងទី២ ចំណែកកូនប្រសាររបស់លោក គឺលោក អ៊ាង សុផល្លែត ជារដ្ឋលេខាធិការក្រសួងបរិស្ថាននិងជាទីប្រឹក្សាផ្ទាល់របស់លោក ហ៊ុន សែន គឺជាបេក្ខជនពេញសិទ្ធិលេខរៀងទី៤។ លោក សុផល្លែត បដិសេធមិនឆ្លើយសំណួរអំពីបេក្ខភាពរបស់លោក នៅពេលអ្នកយកព័ត៌មានខេមបូចាទាក់ទងទៅ ប៉ុន្តែលោកបាននិយាយថា លោកនឹងផ្តល់ការអត្ថាធិប្បាយក្រោយការបោះឆ្នោត។
នៅក្នុងការបោះឆ្នោតជ្រើសតាំងតំណាងរាស្ដ្រឆ្នាំ២០១៨ មានបេក្ខជន១១រូបមកពីគណបក្សប្រជាជនកម្ពុជាគឺជាសាច់ញាតិនឹងគ្នាជាមួយបេក្ខជនផ្សេងទៀតនៅលើបញ្ជីបេក្ខជនឈរឈ្មោះបោះឆ្នោត។ លោក ហ៊ុន សែន ប្អូនថ្លៃរបស់លោកគឺលោក នឹម ច័ន្ទតារា លោក ហ៊ុន ម៉ានី ជាកូនប្រុសទី៣។ លោក យឹម ឆៃលី ជាឪពុកក្មេករបស់លោក ហ៊ុន ម៉ានី និងលោក យឹម លាត ប្អូនថ្លៃរបស់លោក ហ៊ុន ម៉ានី សុទ្ធតែជាបេក្ខជនឈរឈ្មោះ។ លោក ហេង សំរិន និងលោក វង សូត ជាកូនប្រសារក៏ឈរឈ្មោះសម្រាប់ការបោះឆ្នោតដែរ។ លោក ស ខេង និងលោក ស សុខា ជាកូនប្រុសរបស់លោកក៏ជាបេក្ខជនដែរ។
លោក សុខ សូកាន និងលោក សុខ ផេង ដែលត្រូវជាកូនប្រុសនិងប្អូនប្រុសរបស់លោក សុខ អាន អតីតសមាជិករដ្ឋសភា គឺជាបេក្ខជនបម្រុងនៅក្នុងការបោះឆ្នោតឆ្នាំនេះ។ អ្នកទាំងពីរ គឺជាបេក្ខជនពេញសិទ្ធិនៅមណ្ឌលខេត្តតាកែវក្នុងការបោះឆ្នោតឆ្នាំ២០១៨ ប៉ុន្តែត្រូវបានចុះបញ្ជីជាបេក្ខជនបម្រុងសម្រាប់ការបោះឆ្នោតនៅឆ្នាំនេះ។ នៅពេលសួរថា ហេតុអ្វីបានជាមានការផ្លាស់ប្តូរបែបនេះ លោក សុខ ឥសាន បានមានប្រសាសន៍ថា៖ «វាកើតចេញពីការសម្រេចចិត្តរបស់គណបក្ស»៕
ប្រែសម្រួលពីអត្ថបទភាសាអង់គ្លេស៖ Nearly One Quarter of Ruling CPP’s 125 Candidates Are Related
