វេបសាយថ្មីមួយឈ្មោះថា «កំណត់ត្រា» បានដាក់សម្ពោធឱ្យប្រើប្រាស់ដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ហៅកាត់ថា CCIM។ ការដាក់ដំណើរការវេបសាយនេះក្នុងគោលបំណងជួយឱ្យសារធារណជនអាចទទួលបានទិន្នន័យសាធារណៈទាំងភាសាខ្មែរ និងអង់គ្លេស។
អង្គការCCIM សរសេរក្នុងសេចក្ដីប្រកាសព័ត៌មានរបស់ខ្លួនថា៖ «គោលដៅរបស់យើងនៅ CCIM គឺផ្ដល់ឱ្យប្រជាពលរដ្ឋកម្ពុជានូវព័ត៌មានដែលពួកគាត់ត្រូវការដើម្បីធ្វើការសម្រេចចិត្តប្រកបដោយការយល់ដឹង»។
កំណត់ត្រាបានចាប់ផ្ដើមដំណើរការជាមួយមូលដ្ឋានទិន្នន័យចំនួនពីរ។
«ទំព័ររាជកិច្ច» គឺជាផ្នែកមួយដែលចងក្រងទិន្នន័យចេញពីឯកសារនៅក្នុងសៀវភៅព្រះរាជកិច្ច ដែលប្រមូលផ្ដុំដោយសេចក្ដីសម្រេចសំខាន់ៗរបស់រដ្ឋាភិបាល មានដូចជាការផ្ដល់ដីសម្បទានសេដ្ឋកិច្ច និងការផ្ដល់គោរម្យងារដល់ឥស្សរជនជាន់ខ្ពស់ជាដើម។
ចំណែក «ទំព័រដីធ្លី» គឺជាការប្រមូលព័ត៌មានជម្លោះដីធ្លីនៅទូទាំងប្រទេស និងដាក់បង្ហាញទីតាំងជម្លោះដីធ្លីនៅលើផែនទីដែលមានទំនាក់ទំនងគ្នាទៅវិញទៅមកផងដែរ។
វេបសាយនេះក៏មានលម្អិតអំពីផែនទី ទិន្នន័យជាតួលេខ និងជាក្រាហ្វិក អំពីការបោះឆ្នោតនៅកម្ពុជា រួមមានទាំងការវិភាគលម្អិតលើគ្រប់គណបក្សនយោបាយ និងបេក្ខជនចូលរួមប្រកួតប្រជែងក្នុងការបោះឆ្នោតជាតិថ្ងៃទី២៣ ខែកក្កដា ឆ្នាំ២០២៣ ខាងមុខផងដែរ។
នៅលើវេបសាយកំណត់ត្រា ជាដំបូងទិន្នន័យដែលប្រមូលចងក្រងគឺមានពីឆ្នាំ២០១៩ ដល់ឆ្នាំ២០២៣ ហើយនឹងបន្តធ្វើបច្ចុប្បន្នភាពជាបន្តបន្ទាប់ទៀត។
នៅលើវេបសាយកំណត់ត្រាបានសរសេរថា៖ «បច្ចុប្បន្ន ប្រភពព័ត៌មានឯករាជ្យមានតិចតួចណាស់ដែលនៅសេសសល់ក្នុងប្រទេសកម្ពុជា»។ ប្រភពដដែលសរសេរទៀតថា៖ «ជាមួយគ្នានេះ ការបិទស្ថាប័នព័ត៌មានដោយបង្ខំ ការដាក់សម្ពាធលើសិទ្ធិ ពលរដ្ឋ និងការរីកសាយភាយនៃការផ្សព្វផ្សាយគ្រប់ទម្រង់បានធ្វើឱ្យទិន្នន័យដែលអាចទុកចិត្តបាន និងព័ត៌មានត្រឹមត្រូវកាន់តែមានសារៈសំខាន់ជាងពេលណាៗទាំងអស់»។
កាលពីខែកុម្ភៈ រដ្ឋាភិបាលបានដកអាជ្ញាប័ណ្ណសារព័ត៌មានវីទ្យុសំឡេងប្រជាធិបតេយ្យ វីអូឌី (VOD) តាមបញ្ជារបស់លោកនាយករដ្ឋមន្ត្រី ហ៊ុន សែន។ ស្ថាប័នសារព័ត៌មានជាភាសារខ្មែរចំនួនបីផ្សេងទៀតក៏ត្រូវបានដកអាជ្ញាប័ណ្ណដែរកាលពីខែមីនា។
ច្បាប់ស្ដីពីសិទ្ធិទទួលបានព័ត៌មានត្រូវបានអូសបន្លាយអស់ពេលជាច្រើនឆ្នាំ និងមិនទាន់ត្រូវបានរដ្ឋាភិបាលអនុម័តនៅឡើយ។ ច្បាប់នេះត្រូវបានគេជឿថាអាចផ្ដល់លទ្ធភាពឱ្យសាធារណជនទទួលបានព័ត៌មានសាធារណៈពីរដ្ឋាភិបាល។ ច្បាប់ស្ដីពីរបបសារព័ត៌មានរបស់កម្ពុជាបានចែងថា សារព័ត៌មានមានសិទ្ធិទទួលបានព័ត៌មានដែលស្ថិតក្នុងការគ្រប់គ្រងរបស់រាជរដ្ឋាភិបាល លើកលែងតែព័ត៌មានកំណត់ត្រាសំខាន់ៗរបស់រដ្ឋមួយចំនួនដែលអាចបណ្ដាលឱ្យអន្តរាយដល់សន្តិសុខជាតិ ទំនាក់ទំនងអន្តរជាតិ និងឯកសារសម្ងាត់ផ្នែកពាណិជ្ជកម្ម និងហិរញ្ញវត្ថុជាដើម។
លោក មាស សុភ័ណ្ឌ អ្នកនាំពាក្យក្រសួងព័ត៌មាន មានប្រសាសន៍ថា លោកមិនអាចវាយតម្លៃថាគេហទំព័រ Kamnotra នេះបានផ្ដល់សារៈអត្ថប្រយោជន៍ក្នុងការផ្ដល់ព័ត៌មានដល់សង្គមកម្ពុជាកម្រិតណានោះទេ។ ដោយលោកថា អង្គភាពដែលដាក់ដំណើរការគេហទំព័រមិនបានផ្ដល់ព័ត៌មានណាមួយដែលពាក់ព័ន្ធនឹងគេហទំព័រទៅក្រសួងនៅឡើយ។
លោកមានប្រសាសន៍ថា៖ «ព្រោះអង្គភាពដែលដាក់ដំណើរការគេហទំព័រនេះមិនបានផ្តល់ព័ត៌មាន ណាមួយដែលពាក់ពន្ធ័នឹងគេហទំព័រនេះមកក្រសួងព័ត៌មានឡើយ ដូច្នេះខ្ញុំក៍មិនអាចវាយតម្លៃថាយ៉ាងម៉េចបាននោះដែរ»។
យ៉ាងណា លោក មាស សុភ័ណ្ឌ បានបញ្ជាក់ថា វាជាសិទ្ធិរបស់អង្គភាពក្នុងការបង្កើតគេហទំព័រសម្រាប់ផ្សព្វផ្សាយអំពីសកម្មភាពការងាររបស់ពួកគេ ឫការសម្រេចចិត្តក្នុងការចុះបញ្ជី ឬអត់។ ប៉ុន្តែលោកថា អង្គភាពចាំបាច់ត្រូវចុះបញ្ជីនៅក្រសួងព័ត៌មាន ក្នុងករណីគេហទំព័រនោះធ្វើកិច្ចការពាក់ព័ន្ធនឹងវិស័យព័ត៌មាននិងសោតទស្សន៍។
លោកបន្ថែមថា៖ «ប៉ុន្តែបើគេហទំព័រនោះធ្វើកិច្ចការពាក់ព័ន្ធនឹងវិស័យព័ត៌មាន និងសោតទស្សន៍ គឺចាំបាច់ត្រូវចុះបញ្ជីនៅក្រសួង។ ហើយបើមិនចុះបញ្ជីគេហទំព័រនោះជាគេហទំព័រមិនស្របច្បាប់»។
នាយកប្រព័ន្ធផ្សព្វផ្សាយរបស់ CCIM លោក អុិត សូធឿត បានប្រាប់ខេមបូចា ថា CCIM សង្ឃឹមថានឹងរក្សាវេបសាយកំណត់ត្រាឱ្យនៅជាអចិន្ត្រៃយ៍។ លោកថា វេបសាយនេះមិនមែនជាវេបសាយថ្មីជំនួសឱ្យវេបសាយសារព័ត៌មានវីអូឌីនោះទេ ប៉ុន្តែថាបណ្ដុំព័ត៌មានដែលបានប្រមូលឡើង គឺជាព័ត៌មានដែលមានស្រាប់ និងប្រើដើម្បីជាប្រយោជន៍សាធារណជនទូទៅ។
លោកបញ្ជាក់ថា៖ «កំណត់ត្រាជាវេបសាយដែលផ្ទុកទិន្នន័យសាធារណៈ យើងប្រមូល និងចេញផ្សាយទិន្នន័យទាំងនោះដើម្បីឱ្យប្រជាពលរដ្ឋទូទៅងាយស្រួលយល់ និងដឹងថាព័ត៌មានទាំងនោះមានស្រាប់ទៅហើយ»។
លោកឱ្យដឹងទៀតថា CCIM ចង់ដាក់ឱ្យដំណើរការវេបសាយនេះជាអចិន្ត្រៃយ៍ និងស្វែងរកការពង្រីកទិន្នន័យបន្ថែម ក៏ដូចជាវេបសាយផ្ទាល់ដែរ។ លោក សូធឿត បានបន្តថា៖ «ចំពោះថាលទ្ធភាពនៃការបិទវេបសាយនេះ CCIM ក៏មានក្ដីបារម្ភដែរពីព្រោះអង្គការសង្គមស៊ីវិលមួយចំនួនក៏កំពុងតែរងការគំរាមកំហែង ប៉ុន្តែយើងសង្ឃឹមថារដ្ឋាភិបាលនឹងឃើញពីប្រយោជន៍របស់កំណត់ត្រា»។ លោកបន្ថែមថា៖ «បន្ថែមពីនេះ វេបសាយគឺបង្កើតឡើងតាមគោលការណ៍ និងលក្ខខណ្ឌនៃអាជ្ញាបណ្ណរបស់ក្រសួងមហារផ្ទៃ»៕
ប្រែសម្រួលពីអត្ថបទភាសាអង់គ្លេស៖ New Interactive Database Expands Access to Public Information